الثلاثاء، 27 ديسمبر، 2011

النسخة الأصلية



النسخة الأصلية
كنت زمان بشتغل على ويندوز إكس بى
وبعد فترة إشتغلت على لينوكس ( سينتوس وفيدورا وكل اللى يخطر على بالك من توزيعات وإشتغلت وكسبت وبقى لى مصدر دخل وكنت محترف جدا مع اللينوكس وبإتقان تام ...) كنت بحب فى اللينوكس أكتر حاجة إنه مجانى وبجد حدود طموحك هى السحاب يعنى تقدر تعمل أى حاجة وكل حاجة فيه بس لو شغلت دماغك شويتين , والأروع من كدا إن اللينوكس كان كل نسخة بشتغل عليها ليها سلسلة نسب يعنى مثلا الأوبنتو تعتبر بنت ديبيان ومش كدا وبس ... تقدر بكل سهولة تحصل على نسخة أصلية وتوصلك بالبريد ولحد البيت , وفى وقت من الأوقات فى أول السنة وقفت شغلى وشركتى ووقفت اللينوكس ووقفت كل حاجة وبدأت أشتغل ويندوز سفن ... ولكن كان فى مشكلة ...
النسخة السفن مش أصلية ..
يعنى أنا حرامى ... وكمان إمكانياتها أقل وكمان مش هى الأصل .. الأصل برده له قيمته ووزنه وإحساس الشغل عليه ...
وفى خلال شهرين ركزت ووفرت وإشتغلت وقدرت أشترى نسخة سفن أصلية ملك للعبد لله وبسيريال خاص بيا ...
ومتتخيلوش فرحتى ... ( علما بانى من عشاق اللينوكس وضد مبادئى إنى أشترى برمجيات لانى مؤمن بإن العلم من حق كل الناس ومش من حق حد يبيعه أو يستغله ويضر الناس ) كنت طاير من السعادة بمعنى الكلمة ,,, إحساسى إن الشىء ملكى ولوحدى وبتاعى أنا وبس بعد الشقاء والعناء مع نسخ بتقع كل شهرين وكل تلات أسابيع .. ببساطة كنت فرحان
الخلاصة والهدف من البوست :
كنت بحب التقليد المتقن .. وبقدر أتعامل معاه وأشغله بس برده كان بيكون فى مشاكل ..
بس النسخة الأصلية تخطف الأنفاس .. بجد بجد يعنى
والنهارده شفت حلم وأنا صاحى ....
نسخة أصلية ...
أحلى من أى تقليد وأحلى من كل النسخ اللى قابلتها واتعاملت معاها فى حياتى .... أصلية بجد .... بيورررر
ممتعة ...
تحياتى
فقرى
النهارده عملت حاجة مش عملتها من سنين وسنين وسنين ..... ربنا يقدم اللى فيه الخير ويستر ...
ملحوظة : لو ركزت هتفهم ... لأن البوست له هدف بعيييييييييييييييييييد أوى

هناك 6 تعليقات:

P A S H A يقول...

صباحك بيــور
:)
هو على قد فهمي المتواضع وتركيزي حالياً استمتعت بالبوست الرايق ده وعجبني جداً بصراحة وحبيت أشكرك عليه

بالنسبة للينوكس لا أخفيك سراً أخي الكريم إني من فترة طويلة كنت عاوز اتعلمه بس للأسف ما لقيتش كتير بيستخدموه فطنشت D:

ربنا ييسر لك اللي فيه الخير قول آميــن

غير معرف يقول...

علي اساس ان حد فاضي يركز
بلا نيلة
ابوهم كلهم ياشيخ

شاب فقرى يقول...

شريف باشا
منورنى يا كبير
:)
هوا القصد مش النسخ بتاعت الكمبيوتر يعنى
اكيد فتاة الاحلام واللى قابلتهم قبل كدا واللى شفتها امبارح
بس كدا :D
بالنسبة للينوكس بقى
لو محتاج مساعدتى انا فى الخدمة
:)
خد رقمى من وليد وكلمنى انا فى الانتظار واللى اقدر اساعد فيه انا تحت امرك
:)
تحياتى يا جميل
وآمين يارب

شاب فقرى يقول...

غير معرف
ههههههههههههههه
محدش فاضى يركز
بس انا بقى
بركز مع كل حاجة مش عشان فااضى
بس هى لعنة
وبعدين لما تتريقى عليا يابابا قولى الكلمة صح
ديشك أبوهم كلهم يا شيخ :D
مشكلتك معايه بتبقى فاهمة وبتستعبطى كتير
منورة جدا
فقرى

Lady E يقول...

قرأت البوست من أخره :) مش عارفه ليه وشجعني اني اقرأ البداية

طبعا انا مليش في البرمجيات خالص بس فعلا عندك حق مفيش زي الأصل

يارب انا كمان الاقي الأصل زي ما انت لقيته وربنا يسعدك بالأصلي

شاب فقرى يقول...

ليدى E
منورة جدا
بقالك زمان مش قلتى رايك فى اللى بكتبه
.... منورة جدا :)
النسخة الأصلية غالية أوى
ومحتاجة وقت أكتر من أى وقت تانى ممكن الواحد يحتاجه عشان اى نسخة أو تقليد تانى
:)
تحياتى :)