السبت، 6 نوفمبر، 2010

بجد فرحان



السلام عليكم ورحمة الله وبركاته
إمبارح كان يوم خيالى يا جماعة ... يوم خيالى بجد 5/11/2010 يوم تاريخى فى حياة شاب فقرى...اليوم كان مزحوم بشكل غريب وغير مسبوق ومش عارف إزاى كل دا إتجمع فى يوم واحد... سبحان الله أحيانا بتيجى أيام بترد للواحد روحه وتطمنه وتفرحه من جديد والأسباب كالتالى :
1- التبرع بالدم الخيخى فى مركز المصل واللقاح فى الدقى
2- لقاء المدونين وتجمعهم فى اليوم دا
3- زيارة من أعز صحاب وأعز الناس من إسكندرية الطيبين للقاهرة وإتشرفت بمقابلتهم جدااااااا فى دريم بارك
4- حفلة بساطة فى مسرح روابط بليل فى وسط البلد
طبعا أى سبب من دول يكفى ... أنا من أول اليوم مبسوط من ساعة ما قابلت المدونين فى مركز المصل واللقاح ...أينعم كنت مطبق يومين ومش شايف قدامى ..لكن ربنا هوا الكريم وأول ما شفتهم والله نسيت التعب كله ونفسى إتفتحت عالحياة ... الظاهر الواحد هيعشق الحياة الإجتماعية ...كدا مش هينفع أقول على نفسى فقرى من تانى ... كفاية اللقاء والترحيب والناس المحترمة اللى حضرت ...بجد والله كنت سعيد بيكم جدا .. طبعا اللى حضروا اللقاء : ( بت خيخا وأى كلام - فاتيما - خالد -ضياء- عسقول- الدوح -كيمو - سلامونى - وليد الدوغرى - مصطفى ريان -أزهرى - مذكرات مريض نفسى اللى نسيت مدونته - عمرو يسرى - رااااااامى الراجل الطيب اللى ميتنسيش أبدا - بيطرية - مروة زهرة الجنه - حفيدة عرابى - أحمد أبو حميد - حسنى المستفز )
وبالمناسبة حصلت على الهدية بتاعتى العشرة جنيه ولمن لا يعرف .. متسألش :D
كنت والله سعيد بيكم جدا ... وبيطمنى دايما إنى ألاقى الناس الطيبين اللى أعرفهم حاضرين وموجودين ( الناس اللى الواحد بيثق فيهم بجد وبيقدرهم ويحبهم ) ... ربنا ما يقطع لنا عادة خير ويجمعنا دايما على خير .
طبعا انا مقدرتش أكمل اللقاء لآخر اليوم ..لأن زى ما قلت فى ناس نازلة من إسكندرية ومقدرش مروحش ...( فى حاجات متقدرش متعملهاش لأن...) وبالفعل روحت سته أكتوبر وأنا نايم تماما .. ومش عايز أقول إنى نمت فى السكة وعلى ما وصلت إتسحلت .. وإن التذكرة كانت بخمسين جنيه :(((( يلا يعوض علينا ربنا ...وللاسف الواحد مقدرش يركب المراجيح ...صراحة مكنتش فاضى :D
والحمد لله الجاكت الحيلة اللى كنت فرحان بيه ضاع فى اول اليوم بس ربنا كرمنى ولله الحمد ولقيته وقدرت أطلع من سته أكتوبر ومن دريم بارك وانا فى غاية السعادة ... وطبعا مش هقول ليه ...:D .. هوا كل مرة الواحد بيقابل حد من إسكندرية بكون مبسوط ..يمكن عشان بيفكرنى بإنى طيب وإن ال ... ولا بلاش كدا لأحسن شكلى هلخبط فى الكلام :P .. لكن بجد كان يوم تحفة وبدون مراجيح ومحدش يسألنى إزاى مهيصتش فى المدينة .
خلصت من سته أكتوبر وطلعت منها على خير ومن هنا لقيت كل الناس بتتصل بالعبد لله ... بجد حسيت إن فى حد مفتقدنى ...كان نفسى ألحق القعدة الحلوة اللى فى البورصة ...لكن الدوح خلع بدرى بدرى ...ولما وصلت لقيت كيمو ومصطفى ريان ونور الدين
والحمد لله قضينا عشر دقايق كلام ونور إستأذن وأنا وكيمو قررنا نروح حفلة بساطة ...
بجد أنا بعشق الفرقة دى والمزيكا والأداء والصوت والفرقة كلها والحفلة كلها كانت من أجمل الحفلات اللى حضرتها فى حياتى ... فى إحساس مميز يلمسك لما تسمع بساطة ... هتحس بفرق فى كل حاجة عن أى حاجة سمعتها قبل كدا أو بتسمعها لما تسمع إيهاب عبد الواحد وماريز ونبيل لحود ..والغنا بجد هتعرف يعنى إيه غنا وصوت جميل وأداء رائع

طبعا من بداية اليوم وانا مطبق قبلها بيوم ومكلتش ومشربتش ولا اى حاجة فى اى حاجة
فكان من الطبيعى إنى وأنا مروح أبقى مش شايف قدامى وتايه ومسقط ونايم كمان ... أو إنى أحيانا أبان مش مركز ساعة اللقاء أو فى ساعة الحضور لسته اكتوبر ...لكن ربنا هوا الكريم ومش عايز أقول إن الواحد وقع وإنهار إمبارح :( لكن الحمد لله ربنا هوا الكريم
على فكرة ... كان المفروض نسافر ..أنا وصحابى للإسكندرية عشان نحضر لمسار إجبارى تانى حفلة.. لكن مش هحكى بقى أى حاجة ...كفاية أوى لحد هنا لان حتى الان الصداع النصفى بيزورنى كل شوية ومش بيرحم :D
بوست عن اللقاء من هنا
عند خيخا
وأولا وأخيرا :
شكرا لكل من حضر اللقاء وبجد أسعدنى وجودهم وبالخصوص ( خيخا و الدوح وكيمو وفاتيما وضياء وبيطرة )
بجد مش متخيل اليوم من غيركم ...
خالص التحية
شاب فقرى

هناك 19 تعليقًا:

الحب الجميل يقول...

ربنا يفرح قلبك دايما
كل تجمع وانت بخير
كلها ناس جميله وحشانى وكان نفسى اشوفها واكون معاكم
ربنا يديم كل الحب ما بين اهل البلوجر
مبسوطه لنجاح التبرع واللقاء
دمت بخير

ghada mOhsen يقول...

اللــه فعلا يوم تاريخي
^^

ربنا يسعدكم دايما ويجازيكم خير


أنا طبعا كان المفروض أجي
بس للأسف إنشغلت بعد محاضراتي غصبا عني :(

بس إن شاء الله تتعوض ..

وربنا يحلي أيامك كلها ياكريم
^_^

norahaty يقول...

مبروك الأنبساط
ومبروك العمل الطيب
ومبروك أنك لقيت الجاكتة:)

بت خيخة وأي كلام يقول...

انا فرحانة بيك اوى يا كريم
ومبسوطة جدا انى اتكلمت معاك
يمكن دى مش اول مرة اشوفك
بس اول مرة اشوفك من جوة
انت شخص كويس جداااااا
ربنا يحميك ويحفظك من كل سوء
والف شكر على حضورك اللى شرفنى واسعدنى جداااا

سلام
اختك خيخة

أسمعنى شكراًً يقول...

بجد والله أنا أسف انى ماروحتش معاكو الحفلة بليل

شمس النهار يقول...

انت بالذات لما باجي مدونتك والاقيك مبسوط بفرحلك جدا

علشان انا لما شفتك لاقيتك شاب طيب مؤدب لطيف لاينقصك شئ علشان تنبسط وتفرح بالحياة

:)

شاب فقرى يقول...

نورا
والله أنا فرحان اكتر بكتير
:)
واكتر اسباب سعادتى انى قعدت معاكى واتكلمنا
صحيح كان وقت قليل لكن انا كنت سعيد بيه جدا
وان شاء الله متواجد دوما
انا والله لما روحت وبفتكر قعدت ادعى لكل اللى حضر اللقاء واللى كانوا وموجودين لانهم بجد كانوا سبب فى سعادتى
و بجد كنت مبسوط جدا :)
تحياتى ليكى دايما
فقرررى

شاب فقرى يقول...

امى
شمس النهار
حمدا لله بالسلامة
يارب يكون المانع خير ويكون سبب البعد والاختفاء خير
:)
ربنا يخليكى ودعواتك الفرحة تستمر :)
خالص التحية والتفدير والاحترام والفرحة لزيارتك للمدونة
كريم :)

شاب فقرى يقول...

الحب الجميل
:)
إن شاء الله وبعون الله
التبرع القادم فى الأسكندرية
:)
دمتى بكل ود
شاب فقرى

شاب فقرى يقول...

غادة
ربنا يقويكى
:)
وتتعوض ان شاء الله
فقرى

شاب فقرى يقول...

norhaty
ههههههههههههههه
والله كنت هزعل عليها اوى
الحمد لله انها رجعت لى تانى :)
نورتى ودمتى بكل ود
فقرى

شاب فقرى يقول...

سلامونى
تتعوض يا جميل
بس هاتلى شوية شاى
:D
وانا هسامحك على طول

همس الاحباب يقول...

اممممممممم
التقرير السرى يوصل باللتى هى احسن
بدل ما اجيبه بطريقتى
ودريم بارك ماشية معاك حلاوة
وكويس انها جات على الجاكت
تعيش وتنبسط يا كريم
تحياتى

reemaas يقول...

ربنا يفرح قلبك كمان كمان يافقرى

Tears يقول...

جميل انك اتبسط االيوم ده اخيرا

ربنا يسعدك دايما

Diyaa' يقول...

وأسعدني أنا كمان بس كنت تيجي بدري شوية :)
لأن الكلام مكملش :)
وبطل بقى :$

قلم رصاص يقول...

يارب دايما سعيد كدا ياكريم
ان شاء الله ربنا مايقطع لكم عاده ياجدع
وكل سنه وانت طيب
صوم من اول بكره بقى العشره الأول من ذي الحجه

واهو انت كدا كدا مش بتاكل باليومين
هههههههههه

سلام ياصاحبي

ولد تحت الصفر يقول...

ربنا يسعدك 10 أيام كل اسبوع
:)

صوت من مصر يقول...

ولا نفسى ابقى محترم لمده 3 ايام اعمل ايه
كل ما بشوفك سفالتى بتزيد تعرف ليه
اخوات بقى
هههههههههههههه