الاثنين، 1 نوفمبر 2010

يا خاينة يا فاجرة


فاكرين مشهد أحمد حلمى من فيلم صايع بحر ...لما راح للبت ميريت تحت البيت
وقعد يقول : يا ميريت يا خاينة يا فاجرة ...وخالتك متقولشى ...

والرغى الكتير دا ...
خليه فى دماغك عشان هنرجع له فى آخر البوست
:D
أرجو أن يتم قراءة الملاحظات فى آخر البوست وخاصة الخلاصة .. منعا للفهم الخاطىء للنقاش والبوست والكلام عموما
****

هوا الإنسان إيه غير شوية إختيارات مبنيه على تجارب وخبرات .. والتجارب والخبرات مبنيه على تعامل مع الناس والناس فى حياة الواحد مراحل ...أيون هنا إنته وصلت لمربط الفرص ...مراحل
أنا دايما بسأل نفسى سؤال ليه بخجل بينى وبين نفسى أفتكر منظر شنطتى فى أولى إبتدائى أو البدلة البيج اللى كانت بتخلينى أحلى واحد فى الفصل أو مثلا لهفتى الشديدة لشراء كراسة الأول عشان أخد هدية ...أو حزنى الشديد لأنى مروحتش الرحلة بتاعت واحة سيوة أو منظرى لما ماجى جت قالت لى بحبك أو غمزت لى بعنيها فى تانية إبتدائى ؟؟؟
وليه بضايق بينى وبين نفسى إنى اقول إنى سقطت فى الحربية مثلا فى حرف الراء أو إن البت فلانة جريت وحفيت ورايا لحد ما علقتنى وأنا فى تانية ثانوى أو مثلا أفتكر منظر مدير المدرسة وهوا بيضربنى فى وسط الطابور ( حصلت مرة واحدة فى حياتى لأنى كنت من المتخلفين عن الطابور :D ) وليه بضايق أكتر لما أفتكر منظر البت اللى كنت بحبها فى تانية كلية وكانت صندل محدش يبصله وطالعة فيها ... وليه برده بضايق لما أفتكر أو أحكى موقف الغيط.. وعمرى ما بحكيه .
وليه بحاول دايما اخفى إنى فى مرة أعز أصدقائى كان حشاش كبير وبلطجى عظيم ؟؟؟ أو مثلا لو شفته فى الشارع بحاول مش أسلم عليه وأتناسى الموضوع ؟
***وليه البنت بتحاول تنسى دايما الولد اللى لعب بيها وتخفيه من حياتها أو الشاب اللى إستكردها فى الثانوية العامة وكان بيسحب منها فلوس أو اللى خبطها فى المترو أو اللى أو اللى أو اللى حبته وخانته وأقنعت نفسها إنها الملاك البرىء ومنعت عنه حتى حق الكلام
؟؟؟؟
كل الناس بتقعد تقولك الذكريات مؤلمة والذكريات بتنجان ...لكن ياترى هل بتفضل الذكرى طول العمر مؤلمة ؟؟؟
بتفضل مؤلمة فى حالة واحدة لو لسه جواك عقدة نقص من اللى حصل أو إنك لسه واقع فى غرام الطرف التانى ومتقدرش تمنحه السماح لانه ببساطه هتقرب له زى العبيط ساعتها
كل المواقف اللى حكيتها دى مراحل فى حياة كل واحد مننا وكل شاب وكل بنت وكل واحد له موقف مختلف وحكاية مختلفة بيستعر منها أو بيحس إنها (( وحمة )) ولازم تتدارى أو إنه لازم يستعر منها لأن الحاجة دى تستحق الجلد بجد (( فاكر موقف أحمد حلمى اللى فوق ...أيون عليك نور.... هوا دا )) ولازم البنت او الولد يجلد الذكرى دى ويشوهها وينفيها من تاريخه ويمسح الشخص دا مسح
عارفين
بحس أحيانا ان الواحد بيحاول يهرب من الماضى لأنه بيفكره قد إيه هوا كان قذر ...الفكرة دى جت فى دماغى فى المثال اللى عليه تلات نجوم فوق ... لأن احيانا الحقيقة أو الماضى أو اللى حصل بيجرحنا ... فى ناس مبتقدرش تعيش وهى حاسه بإن على قفاها بصمة من زغلول ...مع إن لو ركزت شوية دى مش بصمة زغلول دى بصمتك إنته لأنك ببساطة إنته اللى سمحت لنفسك تسيب الموضوع يعلم جواك ونفيت زغلول خارج البلاد وقررت فجأة تعلن الحرب عالذكرى والماضى والمواقف وكل اللحظات الحلوة و...( بلاش دى لاحسن تتفهم غلط ) و الآيس كريم والشوكلاته وكل حاجة حلوة لعبتها معاه أو حسيتها ناحيته (( أقصد الطرف التانى مش زغلول ... مبحبش الغباوة :D )
يمكن الماضى بيجرح ويمكن الذكرى بتألم ويمكن ويمكن
ولكن إياك تنسى إن الأيام اللى عملت فيها كل الحاجات العبيطة دى هى اللى عملتك وكل الناس اللى بتقرف منهم وبتهرب منهم وعامل نفسك غبن ناس عليهم وهما سيس ...دول هما اللى كونوك ودول هما اللى وقفوا جمبك فى أوقات العته والعبط بتاعتك وشاركوك لحظة حلوة حتى لو كانت لحظة كلها تخلف عقلى وخروج عن المبادىء والدين والأخلاق
إياك تنسى إن زى ما هما فى نظرك مراحل فإنته كمان سيادتك مرحلة فى نظرهم وبالرغم من كدا مش بيهربوا زيك
إوعى تنسى إن مهما بعدت هيفضلوا برده فى ذكراك وهيفضل ليهم مكانة
اللى بيهرب يا عزيزتى أو يا *** صديقى بيهرب من نفسه مش من أى حاجة تانية
والسلام ختام
===
ملاحيظ عالجمب كدا عشان الحسد :
** البوست اللى فات يا جماعة اللى مقتنع بالفكرة ياريت ينشرها فى كل حته يقدر عليها ويكلم كل الناس عنها ...يعنى مسموح بنقل البوست الله يرضى عليكم ...وهنا إحنا بنستقبل كل البوستات وهيتم جدولتها للنشر ومش مهم مين حضرتك أو حتى بتعمل إيه لكن المهم إنك بتقدر ترسم وطن (( والكلام ليكى يا جارة ... وإفهمى ولو كنتى ح***)
***أحب أطمن كل الناس اللى بتسأل عليه ...يا جماعة أنا مازلت فقرى وزى الفل وبفطر حاليا هوت دوج بالسمنة البلدى زى ما بحبه :D بالجبنه والبيض والكاتشب :P
وأحب أقول لكل الناس اللى بتكرهنى ...فى خبر حلو أوى ليكم أنا بقيت متفائل :(( للأسف يا جماعة شكلى هتفائل قريب
****فى حاجة مهمة كنت عايز أقولها ...أنا بجهز للبوست دا بقالى ساعتين وأنا بعمل الفطار ..حرام يعنى.. بس يلا مش مهم خلوها البوست الجاى
**خلاصة البوست عشان الناس اللى تاهت ...هوا ان فى حياتنا مراحل مهما كانت قذارتها او سوءها او مهما كانت بتجرح او بتفكرنا بقذارتنا لازم نحترمها ونقدرها لان لولاها مكانش زماننا بالشكل دا ...بس كدا
..ومن الواضح انى مش مع موقف الشخصية اللى قام بيها حلمى ..وأنا بتكلم عن المراحل اللى الواحد بيمر بيها وبييجى له وقت بتفكره بحاجة فيه واختفت وبيحتقر المراحل والناس بالرغم من ان كل دا اجزاء منه و الغرض هوا احترام المراحل دى مهما كان سؤها أو قذارتها او انها مش جميلة او ملهاش ملامح جميلة بالنسبة لنا وبتفكرنا باوقات كنا فيها تافهين ...يجب احترامها واحترام الناس دى لملاقاة المعاملة بالمثل
****ملحوظة : الغير معرف مفتوح
**** وليه البوست الجاى ...أنا عايز الناس تحاول تتواصل مع اللى بكتبه أو بقوله دا ...أنا مش فاضى يعنى مش صايع وبضيع وقت ..أنا عايز صوتى يتسمع والناس تفهم المقصود وتحاول تقول رأيها ...بدل ما كل ما اكلم حد يقولى عارفك وبقرالك ومش بينطق ولا بيقول رايه عالنت وبلاقيه حافظ كلامى بالحرف ...بتنقط يا جدعان

شاب فقرى

هناك 15 تعليقًا:

مصري جدا يقول...

حتى لو كلامك صح

ما يصحش _وتحت أي ظرف_ بكون الرد زي ما عمل أحمد حلمي

الرجوله _مهما كانت درجة الألم_ الصمت والتحمل


لو فيه بينكوا كلام يفضل بينكوا للاخر

لو الكلام خلص أحتراما-لنفسه ان لم يكن لها- الصمت أفضل

هوا أحنا بينئصف عمرنا بدري من شويه

ضيف دي بئا عالخبرات الحياتيه موضوع هذا البوست

شاب فقرى يقول...

سيدى الفاضل مصرى جدا

إقرأ هذا الجزء جيدا :
**خلاصة البوست عشان الناس اللى تاهت ...هوا ان فى حياتنا مراحل مهما كانت قذارتها او سوءها او مهما كانت بتجرح او بتفكرنا بقذارتنا لازم نحترمها ونقدرها لان لولاها مكانش زماننا بالشكل دا ...بس كدا

من الواضح انى مش مع موقف الشخصية اللى قام بيها حلمى
انا بتكلم مش عن الخبرات
بتكلم عن المراحل اللى الواحد بيمر بيها وبييجى له وقت بتفكره بحاجة فيه واختفت وبيحتقر المراحل والناس بالرغم من ان كل دا اجزاء منه
حاول تفهم الخلاصة بتاعت البوست :)
الغرض هوا احترام المراحل دى مهما كان سؤها أو قذارتها او انها مش جميلة او ملهاش ملامح جميلة بالنسبة لنا وبتفكرنا باوقات كنا فيها تافهين
يجب احترامها واحترام الناس دى لملاقاة المعاملة بالمثل
:)
نورت وفى انتظار تعقيبك على كلامى
فقرى

فاتيما يقول...

يا كوكو انتا صح
و مية مية

تعرف ؟

صديقة عزيزة عليا
لما قرت حاجات عندى ف المدونة سببتلها حالة صدمة شوية ..
و استغربت جدا انى عايشة عادى
و لما حاولت افهمها
انى واخدة الدنيا ببساطة و كلنا بتحصلنا مشاكل و ازمات
و لازم هتبقى جزء م الماضى
قالتلى لأ بقى تعالى هنا
يعنى لو عندك فرصة
تعيدى حياتك م الأول
عاوزة تفهمينى انك مش هتغيرى حاجة ؟؟
قولتلها أيوه

يعنى تتجوزى نفس الشخص ؟

قولتلها ايوه

تمرى بنفس البلاوى ؟

قولتلها أيوه


تخسرى نفس الخساير ؟

قولتلها ايوه


لأنى لو ممرتش بكل هذه المراحل و الخسارات و الأشياء
مش هكون البنى آدمة اللى انا عليها دلوقتى و اللى انا بحمدلله راضية عن كتير منها و بعافر ف الباقى

الله اعلم
لو كنت اتجوزت شخص تانى
كنت هبقى عاملة ازاى ؟
يوسف مكنش جه ف حياتى

لأ ..يبقى مش عاوزة


كنت هبقى مرتاحة اكتر
طب ما يمكن محسش بالناس حواليا
و محسش بنعمة اللى انا فيه دلوقتى
مقارنة بغيرى

كنت هبقى مستقرة اجتماعياً
ما ممكن وقتها مبحسش بنعمة دا زى ما حواليا متجوزات كتير و مخلفين و مش راضيين و باصيين للنص الفاضى

كنت هفضل متضايقة من اهلى
و حاسة بغربة وسطهم
لأ ..لما بعدت قدرت قيمتهم و بقيت ممتنة ليهم الف مليون مرة


مكنتش هعمل المدونة
يعنى مكنتش هعرف ناس جميلة زيكم


الملخص

عاوزة حياتى زى ما هيا
بكل مراحلها و سقطاتها
السقطات دى اللى بتخلينا نرتفع
و الوقعات هيا اللى بتخلينا نقوم
مش العكس

البوست حلو قوى
الله ينور


بمناسبة السنكوتشات المفتخرة دى
بالهنا و الشفا
و طبعا مفيش تبرع بالدم اكيد
بس تعالى خد بحسنا يا فتى

خالص ودى
يا مش فقرى بالمرة

sony2000 يقول...

علي فكرا ياعم فقري
اوحش حاجه
اننا ديمن بنفتكر كل حاجه وحشا فكل اللي فات
دي بتبقي مششكله فحد ذاتها
والاحسن ان كل حاجه
بجد
بتعدي
سواؤء وحشه ولا حلوه
يارب يجعل ايام الكل سعيدا
اللهم امين

still-searching يقول...

للأسف كلامك صح
بس مش كتير مننا بيعرف يطبقه

دايما بنغلط وبنحاول نداري
وده مش غلط
لأن كوننا بنداري فده معناه اننا حاسين بغلطنا مش بنتفاخر وبنتباهى بيه

لكن الغلط بقى اننا منتعلمش منه

هو ايوة احنا حياتنا مراحل
وفي كل مرحلة بنشوف ناس وننسى ناس

وممكن تقابل الناس اللي نسيتهم من مرحلة في مرحلة تانية
بس ساعتها بتكون انت اتغيرت وهم اتغيروا والمرحلة كمان اتغيرت

لو انت مهربتش منهم بعينيك هم بيهربوا

بنت الغربة يقول...

انا معاك المرة دى..مش لازم خيانة الاخرين تسبب عفدة فى حياتنا...وندور على حد تانى نطلع عليه العقد دى..يمكن لما نعمل كده نرتااح...
انا شايفه ان الخاين ده مايستاهلش اصلا يتزعل عليه ولا يستاهل اصلا محاولة الانتقام منه...ويبقى ده تضييع وقت ومشاعر حتى لو مشاعر سلبيه
اما عن ذكريات الطفوله والمراهقه..
فزى ماكان فيها جوانب سلبيه ..اكيد كان فيها جوانب ايجابيه وذكريات جميله..وزى ماكان فيها اصحااب......
كان فيها اصحاب جمال دامت صداقتهم معايا لغاية دلوقتى..
تحياتى

دعاء العطار يقول...

البوست بتاعك فكرنى بمقوله

" ليس فى الامكان اكثر مما كان "

يعنى ليه نندم على حاجه عملناها زمان مع اننا لو تمعنا ف اللى حصل زمان هنلاقى اننا مكناش نقدر نعمل اكتر من كده

ده كان اقصى حدود تفكيرنا وعقلنا وامكانياتنا

بس مادام احنا مكسوفين من المواقف دى يبقى احنا نضجنا وعقلنا

ومادام نضجنا يبقى اتعلمنا من اخطائنا

حلوه فكرة البوست

تحياتى

همسات وبحــ الحياه ــر يقول...

كلامك كله مظبوط :):)
اوقفتنى بعض الجمل
الواحد بيحاول يهرب من الماضى لأنه بيفكره قد إيه هوا كان قذر

يمكن الماضى بيجرح ويمكن الذكرى بتألم
زى ما هما فى نظرك مراحل فإنته كمان سيادتك مرحلة فى نظرهم
علفكرة البوست بجد مش محتاج تعليق لانك قولت كل اللى يتقال
وانا جايه اسلم وامشى :)
كلمتين على الهامش
انا رحت جرنال صوت الوفد واشتغلت فيه وان شاء الله كدا قريب تلاقونى فى الوفد نفسه :)
بجد نفسى تقرا القصه وتقول رايك :)

Tears يقول...

الذكريات مش شرط تكون وحشة اكيد فيها الحلو و مع الوقت كله بيتساوى و بيبقى مجرد ذكرى

غير معرف يقول...

بوست جميل اووووووووووووي احيك عليه
بيفكرني بأغنية فؤاد الجديدة جميله زيه بالظبط دايما اسمعها اعيط مع ذلك احب جداااا اسمعها
معلش يا زهر

reemaas يقول...

معاك جدا والله يافقرى
خلتنى ارجع بالذكريات لورا كده فعلا لقتنى فيه حاجات بتكسف لما افتكرها وفعلا لانى ممكن لسه عايشه فيها واو ندمانة عليه مع ان ده غباء لان الندم مابيصلحش حاجة

بالنوسبة بقى للملاحيظ هجيب البوست علشان اعرف انت بتتكلم فى ايه

أبو العريف يقول...

ازيك يا فقري

انت عارف الماضي هو اللي بيشكلنا

كل اللي بيحصلنا بيسيب اثر فينا

انا مش بنسي اول بنت حبيتها

ولا اول موقف وحش ولا اول ولا اول

بس دايما بعتبر الحاجات دي جزء من تكويني

مش الحاجات نفسها

لا الذكري

يعني اول بنت مش هتمثلك حاجه

ولو شفففتها عادي

بس حكايتها خلاص بقت جزء منك

بقت ماضيك اللي مينفعش تفصله عنك

انت فاهم حاجه


ان شخصيا مش فاهم

قلم رصاص يقول...

بوست جنان ياكريم

بجد لمست موضوعات حقيقيه جدا

دمت مبدعا يافتى

قول ياااارب يقول...

انا متفقه معاك جدا اننا منحاولش نهرب من زكريات فاشله وناس اكتشفنا مؤخرا انهم مش مناسبين لصداقتنا خصوصا ان الزكريات دى احنا اللى عملناها
يعنى حسيت انك عاوز تقول كل واحد يتحمل نتيجة اختياره وتفكيره وميجيش يعاتب على الزمن او الناس او الزكريات
بس بردوا ده ميمنعش ان لو كانت زكريات سيئه يبقى نحاول ناخد المفيد منها ونتعلم منها ونمحى الباقى علشان نعرف نبص قدام

يمكن اول زياره واول تعليق بس حلو البوست بحييك عليه

fafy يقول...

كلامك فعلا صح لما قلت(**خلاصة البوست عشان الناس اللى تاهت ...هوا ان فى حياتنا مراحل مهما كانت قذارتها او سوءها او مهما كانت بتجرح او بتفكرنا بقذارتنا لازم نحترمها ونقدرها لان لولاها مكانش زماننا بالشكل دا ...بس كدا )ده صحيح لولا الصدمات ماكوناش اتعلمنا ازاى نبقى جامدين