الاثنين، 28 يونيو، 2010

السقوط فى بئر سبع

فكرت كتير وأنا بشوف مسلسل ( السقوط فى بئر سبع ) وأنا صغير
إيه اللى يخلى اتنين زوجين يخونوا وطنهم
كنت بقعد أتخيل أفلام حرب أكتوبر وأشوفهم بيحملوا جواهم شىء من القذارة والخسة
بالظبط زى الجندى اللى ممكن يعذبوه ويعترف بتفاصيل تضر وطنه
أو بالظبط زى المواطن المتغرب عن وطنه لما بتيجى له فرصة أن يبقى جاسوس وبيقبل
طبعا شفت دا فى (( مين اللى ميحبش فاطمة ))
صراحة مكنتش بلاقى تفسير
أحيانا كنت بقول الطمع وقلة الإنتماء وبرضة أفتكر أفلام حرب أكتوبر وأحس بالعزة وأعد من واحد لميه وأنام
لنا كبرت شوية وظهر إهتمام جوايه بمجال الجاسوسية والروايات البوليسية
وقريت إنه فى مثلا موظف أمريكى ممكن يبيع وطنه عادى جدا لصالح وطن تانى
أو مواطن أو مسؤل عسكرى روسى ممكن يبيع بلده بمقابل شوية شوكلاته وسيجار فاخر وفلوس
كنت بستغرب قد إيه الناس دى شايفة وطنها رخيص أوى ومش بتحبه
ولما كنت أقرا عن مواطن بيحن لأصوله اليهودية أو الألمانية وبيخون أمريكا أو أى بلد تانية
كنت بحس إنه برده بيبيع وطنه
شىء غريب عالإنسان إنه يبيع وطنه
شوية شوية وقريت عن الجماعات المتطرفة الإسلامية فى مصر قريت شوية طراطيش كلام
الناس دى برده بتخون أوطانها
فكرت كتير فى السر الرئيسى ورا كل دا
إيه اللى يخلى الواحد يبيع أرضه وشرفه وعرضه قدام أى مقابل
فكرت فى وضع الانسان والمواطن سواء أمريكى أو حتى يوجوسلافى او مصرى جوا بلده
إيه مكانه فى البلد ؟
بمعنى أصح لما بنقسم الوطن بيكون تحت أى شريحة ؟؟؟
هل الشريحة دى بتتعرض لظروف إجتماعية معينه ؟
لكن لقيت إن فى عهد السادات فى ظباط جيش تحولوا لجنود فى جماعات إسلامية متطرفة
الجهاد وغيره
طيب ظابط وظروفه مرتاحه وأهله مرتاحين وعنده زوجة وأولاد وعيشه زى الفل
يمكن بتكون الظروف الاجتماعية ظروف تانية ؟
زى مثلا تخلى الوطن عن قضية بيدافع عنها الشرع والدين
ساعتها بيحس المواطن بخيانة وطنه ليه
دا اللى ممكن يدفعه إنه ياخد مدفع ويقتل أولاد بلده وهوا شايف إنهم أعداء
دا اللى ممكن يدفع المواطن للشعور بالإغتراب والوحدة فى وطنه
إن أفكاره تتغير ويحس إن اللى هوا بيفكر فيه هوا إتخلق عشان كدا
أو هوا مش شايف لنفسه مكان جوا المنظومة اللى عايش فيها
يعنى مثلا
حاجب المحكمة
إيه وظيفته فى تنفيذ العدل فى المجتمع ؟؟؟
هوا مجرد ترس
حاسس إن وجوده لا هيقدم ولا هيأخر
ترس زوغير وقليل لدرجة الضآلة وبكرر كلمة (( زوغير مش صغير ))
حاجة هامشية
ساعتها ممكن يتخلى عن القضية السامية اللى بيجرى وراها ويتابع قضية تانية هيحس فيها بمكانه
هيلاقى فيها دور حقيقى لنفسه
بالظبط زى اللى سافر أفغانستان وإنضم لجماعات هناك للجهاد ضد السوفييت
هوا فى بلده مش لاقى لنفسه مكان ولا هدف ولا قيمة
وفى أمثلة كتير لوظائف أو حتى أعمال بنحس إنها يا إما بلا قيمة أو إنها مش بتؤثر بقوة فى حياتنا
الرغبة فى تحقيق الذات والوصول لهدف مستحيل فى ظل واقع ألم فى إستحالة لتغييره أو التأثير عليه
حلو السطر اللى فات دا إقراه تانى هيفسر كل اللى فات
يعنى ببساطة المواطن بيحس بإهمال وطنه أو خيانة وطنه له زى ما البعض بيشوفها
قد يكون بقى دا من خلال ظروف إجتماعية أو بطالة أو إدمان أو حتى تعطش للجنس وإستحالة الزواج
زى الشاب اللى ملقاش حل غير إنه ينتحر أو اللى قطع ال ... فى سوهاج
الظروف دى بتحول الإنسان لأى شكل ممكن يخطر فى باله يقدر يحقق له احلامه
سواء قاتل بيتقم أو مجرم بيسرق أو بينصب بغرض المكسب السريع أو مغتصب شايف إنه بياخد حقه من الجنس الآخر لأنه يستحق أو مسؤل بيبيع نفسه ويبيع كرسيه للى يدفع له أكتر فى مقابل إنه حتى فى مكانه الكبير دا مش لاقى الإحترام أو الراحة اللى بيدور عليها وعلى طول شايف قضايا الفقرا والنظرة الاشتراكية لمنصبه من الناس بتخليه يحس إنه لازم يخدم كل الناس بدون مقابل
كل دا بيعتبر سقوط فى بئر الخيانة أو ضياع الشرف من وجهة نظرى
الإرهاب الإجرام والخيانة
مش كدا وبس
أحيانا بشوف أشباه الرجال ( الشواذ عموما ) وببص لهم وأحس بالقرف
من غير ما أخد بالى نهائيا من أن أى إنحراف جوا الإنسان سببه البيئة المحيطة بيه
أو الحياة اللى بيعشها
عجزه عن القيام بشىء بالشكل الصحيح
بلاقى إن أحيانا كل المذكورين هنا فى اللى كتبته دا
كلهم أبرياء وإحنا كمجتمع المجرمين
مجتمع بيصنع الشذوذ والإرهاب والإجرام
المفروض إن مجرد فكرة الرفض بتحمل معها بديل آخر
يعنى مينفعش تيجى تقولى بطل كتابة فى المدونة تماما
لاء لازم تيجى ببديل ...مثلا : بطل كتابة فى المدونة وإكتب فى اليوم السابع أو مجلة حرة أو حتى فى ورق طعمية
المهم إن البديل اللى بيتقدم بيكون بيحصل على نفس القدر من الرضا اللى بحاول أوصله
يعنى مثلا مينفعش مجتمع بالكامل بيشتكى من فكرة الإرهاب والإجرام والشذوذ والتحرش الجنسى والإغتصاب والإدمان
وبيدين كل دا وبيتوعد له بالعقاب وفى نفس الوقت مش بيقدم بدايل
العقاب فى الحالة اللى مش بيقدم فيها بدايل بيتحول لمجرد تحجيم الشخص عن القيام بالخطأ
زى بالظبط لما تلاقى حرامى فى بيتك وتوديه السجن ويتسجن تلات سنين
هوا هنا مش لاقى قدامه بديل تانى
بالعكس هوا لقى دافع أقوى للسرقة
الإنتقام من المجتمع متمثل فيك إنته لما مسكته وهوا محتاج
أو السنين اللى ضاعت من عمره هدر فى السجن بدون شهادة أو حتى إحتراف مهنة هوا بيحبها
مينفعش نقول إن إحنا ضد الشذوذ ولازم نعاقب الشواذ أقوى عقاب ممكن ونفضحهم بقوة إذا ملقيناش حل بديل
يعنى مثلا الجواز وتسهيل الجواز
طبعا اللى بتكلم فيه دا مستحيل
لأن كل طبقة فى الزواج بتطمح للصعود لطبقة إجتماعية أعلى
يعنى مثلا البنت بتدور على حد يرفعها من مستواها يكون بينقلها لفوق نقله أحسن
مش مجرد عريس وشقة فى نفس البيت أو بيت شبهه وبيت أولاد زيها هى وأخواتها
مشكلتنا مش فى السرقة أو فى الإجرام عموما أو حتى فى الشذوذ أو الخيانة للوطن أو الإرهاب
مشكلتنا بتكمن فى تحريم البدايل وجعلها مستحيلة
بل وحتى فى حالة وجود بديل بنحاول نحط له مليون إطار ومليون قيد خوفا من بكره
أنا مقتنع إن القيود اللى بتقيد الناس زى العادات والأعراف والتقاليد والقانون حتى الدستور
زى ما بتقيد الناس وبتحددهم وبتحدد أعمالهم وحياتهم كلها فى إطار معين
زى ما بتحميهم
الناس بتلجأ لحاجات زى دى بغرض القيد والحماية
محاولة منها للسيطرة على ما لايمكن السيطرة عليه
ببساطة
محاولة تفادى أى نسبة خطأ تعكر عليهم صفو حياتهم المقيدة اللى بيحاولوا يرضوا فيها بأنصاف الحلول
أنا مش بتكلم عن الجريمة بغرض الجريمة أو الشذوذ كرغبة داخليه أو السرقة بدافع نفسى
أى حاجة تحمل دافع نفسى ملهاش حل غير بالتفاهم ومحاولة الإقناع
إنما لو هترتكب الغلط وتقول الظروف
يبقى لازم اللى قدامك يقدم لك بدايل
المجتمع
الناس اللى حواليك
إحنا والحمد لله نجحنا فى قتل البدايل وتحويلها لنجوم فى السماء يصعب على الخلق الوصول لها
قوم بص فى المراية .......
شوف نفسك وقعت فى البير ولا لسه ؟؟
هل عندك أخطاء ؟
هل عندك مشاكل ؟؟
حاول تناقش نفسك
وتحط لنفسك بدايل
يمكن تلاقى مفر من متاهة الفأر اللى إنته فيها ...
شاب فقرى
على فكرة ملاحظة جانبية : من وجهة نظرى الشخصية إن كل من ذكرتهم فى المقال أبرياء لأننا من يصنعهم بتحكماتنا وأفكارنا التى نحاول فرضها على الاخر ..بداية من الجندى الذى يعترف على وطنه تحت ضغط ( على فكرة كل واحد له طاقة إحتمال ) وحتى المجرمين والخونة والشواذ والقتلة والمغتصبين والمتحرشين ... الظروف نحن من يصنعها وهى من تصنعهم ...فكر شوية يمكن تلاقى نفسك اللى بتصنع الظروف ...ب سكوتك عالأقل ...

هناك 12 تعليقًا:

dr.lecter يقول...

صدقت في كل اللي ذكرته

MR.PRESIDENT يقول...

كلام جميل
بس خد هنا يا عمنا
ربك اداك طريقين ، طريق جنة وطريق النار متقوليش إني مجبر امشي فطريق النار لأنك كدا بتقول الإنسان مسير لا مخير ودا بينافي حكمة ربنا ، أينعم في خلل والخلل موجود في كل مكان ، بس مش البيئة هي اللي بتتحمل الخلل دا كله ، أمان فين ارادة الإنسان ، وإن كان تبريرك لكل فعل بسبب ما يحدث في مصر ، خذ دولة خارج مصر وليكن أمريكا فيها قتلة سادين مش شرط يكون تربيتهم
فيهم لواطين ( شذوذ ) بيختار الجنس اللي عايز يكون معاه بحجة إنه مختلف عن الجميع وعلي فكرة معظمهم بيكونوا أغنياء أو علي اقل تقدير حالتهم كويسة .
بالنسبة برضوا لغلاء المهور اللي انتا بتتكلم عنه ايه مبرره في الشذوذ ، ومش هقولك ان الدين وضع له حل وإن كان من سهل علي الجميع وهوا الصوم .
زمان ايام الرسول مثلا كان الأصل الحلية في كل شيء والحرام بحساب أما الأن هناك بعض الشيوخ خلوا الحرام الأساس والحلال قليل .
تعرف هنا انتا لغيت الإنسان خالص وقلت
البيئة عنصر أساس
الأسرة عنصر اساسي
المجتمع متمثلا في الناس والدولة عنصر اساسي
(((((( والشخص ذات نفسه ))))) عنصر فرعي
أنا رأيي ان الانسان هوا اللي بيتحمل نتيجة أخطاءة تحت وطأية أي ظروف إلا الظروف اللي بيغيب في العقل ودي نوعين باختيار زي المخدرات والمسكرات وبدون زي المرض النفسي .

دا رأي ولك مني سلا م

شاب فقرى يقول...

دكتور ليكتر
شكرا لتواجدك ورايك
شاب فقرى

شاب فقرى يقول...

مستر بريزدنت
يا عزيزى
ليست كل الأسماك تستطيع السباحة ضد التيار
فكر تانى فى الانسان كوحده واحدة
لما بتكلم عن الظروف فى حالة المجرمين والشواذ بقول ان الظروف بتتمثل فى الطفولة او الضغط المجتمعى او الاضطهاد الاسرى
انا مش بقولك إن اللى بيقتل عشان بيحب القتل بريء
لاء
بس مين صنغه ؟؟؟
فكر كويس
ونفس وما سواها فألهمها فجورها وتقواها
اللى صنع الناس دى نظرتنا ليهم ومعاملة اهاليهم وأفكارهم الغير مكتملة الملامح فى ظل تعليم فاشل أو فاسد أو لا يمنح للإنسان ما يستحقه
أنا هنا مش بتكلم عن المرضى النفسيين
فى حين ان حتى المرضى النفسيين بيكون سبب مرضهم ظروف مجتمعية
بص
الانسان دا عامل زى شوية دقيق أبيض وطاهر ونقى
لكن الظروف اللى حواليه هى اللى بتخليه تراب أو طين أو مليان دود
أو كيك جميل يتحط فى افخم الفتارين
طبعا الانسان كان قدامه اختيار
بس اختيار وصل لدرجة الاستحالة
ومستحيل يقدر يختار الذل على حساب الراحة اللى بيحلم بيها
فى حين إنه وهوا بيطيع المجتمع وراضى بدور قليل مش حاسس بنفسه او حاسس بخيانة وطنه لقضيته
مش كل الناس تملك القدرة على اختيار الصواب حتى وإن كان مرا
بص
فكر تانى
اختلاف الرأى لا يفسد للود قضية
تحياتى
شاب فقرى

فتاه من الصعيد يقول...

ونفس وما سواها

عمر ما كان الجريمه ليها مبرر...لكن زي ايام الصحابه لما ترفع حد السرقه في عام الجفاف ..

ربنا رحيم والبنيادم لازم يرحم ويغفر ويقدر...لكن ما نستسهلش الضعف ولا الشر ... ولا نستهون بالمجرم اللي اغتصب ولا اللي قتل لان ده هيفتح مجال لحاجات كتير وانتشار الجريمه

تحياتي

بيطرية ومش بايدى يقول...

كلامك صح يافقرى
اولا كده سلام عليكم عامل ايه يابونى ايش اخبار الدنيا معاك مودك مش عاجبنى بالمرة يارب يتغير وعن قريب
اه بالحق قبل ماانسى سمسم بيسلم عليك
:d اسكت مش انكتب كتابها عقبال عندك كده يااخويا
نرجع بقى لموضوع السقوط
وبما انى مقدمة على نتيجة الامتحان فالبوست ده مبشر بالخير

وشكلك مذاكر حقوق انسان كويس انالسه ممتحنة فيها امبارح وانا كنت بذاكرها لاقيت من ضمن الوسائل الوطنية اللى المفروض بتحمى حقوق الاتسان
المجلس القومى المصرى لحقوق الانسان
والله كان هاين عليا اكتب فى الامتحان عن خالد سعيد وعلى المجهود الجبار اللى عمله المجلس فى حق خالد اتحرك بسرعة جدا وقال انه محشش وبتاع بانجو
وحشيش حاجة تيجى كده
ماعلينا
نخش فى بذر الموضوع
كلامك صح وعجبنى كتير كل انسان بيشوف نفسه صح واى حاجة بتحصل غلط بيلقى اللوم على الاخرين وده الطبيعى
وحتة البدايل برده عجبتنى
سياسة اى حد دلوقتى هى المنع و البتر وعارف اللى هو اقطع عرق وسيح دم واخلص ومفيش حلول تانية او اى بديل للى بيحصل
بس فى نفس الوقت احنا اتملك مننا الخوف من الشريحة اللى انت ذكرتها يعنى اما تقابلنى واحدة شاذة اول شعور هيخش فى بالى انى اخاف منها واترعب كمان وبالتالى هاحاول ابعدها عنى
اكيد ده برده بسببنا احنا وبسبب المجتمع عشان حط الشريحة دى تحت مسمى المجرمين او المنحرفين او الخارجين عن القانون
عارف سالت نفسى كتير اوى
لو فى حد عنده شذوذ ايه العلاج للشذوذ هل علاجه نفسى من الحالة النفسية يعنى
ولا جسدى بواسطة دوا او شبه كده
بس كنت دايما بيجيلى احساس ان اكيد العامل النفسى ليه تاثير كبير اوى
بس برده حابة اعرف رايك


وحابة برده اعرف ايه اللى طالع بايدينا نعمله قدام الناس دى
يعنى ايوة احنا السبب فى ايجاد الظروف الزفت اللى خليتهم يعملوا كده
وايوة احنا برده اللى عقبناهم وحرمناهم من حقهم فى الحياة وان عمرهم مايضعيش هدر
بس تفترك احنا ممكن نعمل ايه
لا احنا فى ايدينا اننا نوفر مهن جوه السجن بدل الاشغال الشاقة والكلام الفاضى ده اصل احنا مش مبارك يابنى
زى اوروبا والدول المتقدمة ماهما فى السجن تلاقى المساجين بيعملوا حرفة اين كانت نجارة بقى حدادة ان شاء الله حتى سباكة بس يتهييالى ان الواحد هنالك فى السجن بيطلع مستفيد اكتر من انه يطلع ندمان او يجيله احساس انه كان بيتعاقب على جريمة
ولا احنا رجال اعمال ولا مستثمرين عشان نوفر فرص عمل للشباب وبالتالى نحسن دخلهم ونتيجة لكده هيتقبلوا ساعة مايروحوا يتجوزوا

الحاجة الوحيدة اللى فى ايدينا اننا نرضى باللى يتقدم لنا والابهات والامهات مايقسوش على العرسان اللى متقدمين لبناتهم مع ان كل اب بيحلم ويتمنى ان يطلع بنته لمستوى احسن من المستوى اللى كان معيشاها فيه او على الاقل زيه بس مش طالع بايده حاجة

اما اجابات الاسئلة اللى انت واجهتها
اه عندى اخطاء
عارف نفس احساسك اللى كان تجاه الشواذ اهو كان نفس احساسى بس على اصغر شوية او يمكن عشان كان عقلى (زوغير)ساعتها كنت ببص للبنات اللى هى مش محجبة او حتى حجابها مش راضى ربنا
بقرف كده واشمئزاز وازاى انها عارفة الصح من الغلط وتعمل الغلط برده
وكنت برده بتريق(بتريئ)مش عارفة لو فهمتها يبقى كويس عشان ساقطة املاء
المهم كنت استغرب ازاى واحدة مختمرة مثلا لابسة خمار يعنى وتمشى مع بنت مش محجبة طب ماهى كده بتشوه صورتها وبتجيب لنفسها شبهة
بس اتضح ليا بعد كده اما انا مشيت مع واحدة مش محجبة اينعم ماكنتش امشى فى حتة الا والاقى كل الناس بتبص علينا
بس هى مسكينة اصلا اتضح ان عيلتها اصلا هما اللى جابرينها على كده انا اعرف واحدة اتخانقت مع ماماتها عشان بس تلبس ترحة وقصيرة كمان والبنات اللى زى دول بيكون ايمانهم مش قوى اوى لدرجة انهم يحاربوا عشان الحجاب
فهمت عليا

احييك على البوست يافقرى
ومستنية اجابتك

تقبل تحياتى وسلامى

يلا صداع ببلاش اهو اى خودعة

موجة يقول...

زيارتي الاولى لك
لن تكون الاخيرة باذن الله
بوست روعة
خالص تحياتي
موجة

بيطرية ومش بايدى يقول...

يانهار اسوس
ده كله تعليق
ده بوستين فى قلب بعض
والله ماكنتش فاكرة انه طويل كده
مش عارفة ايه حكاية الرغى معايا اليومين دول
بس خلاص
عشان ماارغيش كمان زلام

دموع القمر يقول...

صباح الخير
ازيك يافقرى
ياااااارب تكون بخير
اخيرا رجعت ترد على التعليقات :)
انا جاية اسلم :):)
وطبعا انت عارف انى بحب افصص البوست ولان دماغى مش رايقة فانا جيت اصبح وامشى واحجز مكان برضو ههههه
اكيد راجعه تانى
:):)

زى الهوا يقول...

فين جديدك؟

صدى الصمت - عاشقة الورد - يقول...

كل واحد عند طاقة معينة للإحتمال ممكن بعدها ينفجر ويعمل حاجات ماكانش ممكن يتخيل انة يعملها فى يوم من الأيام
تحياتى لفكرك

كراكيب يقول...

شاب فقري....

المقال مليااااااان افكار
كل ما اقرا حت واقول ايوة هرد على دي تقوم تتكلم في حاجة تانية اقول اه يبقى دي ودي ألاقيك دخلت ف حاجة تالته ورابعه

كل اللي انت كاتبه صح الصح...
وبما انك في بلد ما بتهتمش بشعبها فمش هنفضل نقول لما الاحوال تتغير يبقى ساعتها احنا نتغير

احنا لازم نرمي طوبتها ونشتغل احنا على نفسنا

الموضوع بيبدأ بنفسك تبقى الحد اللي عايش صح وبيعمل حاجة لنفسه ولاهله ولدينه ووطنه

ولو جاتلك فرصة ان يبقى ليك يد فإنك تساعد حتى واحد صاحبك انه يبقى بني ادم كويس هتبقى انت كدة بتعمل جزء من اللي عليك

كدة الدنيا ممكن تتصلح.... مش لما نفضل نرمي كل حاجة على الظروف

فقـــــــري
مبسوطة اني جيتلك هنا تاني بعد طول غياب
;)

miro el niro kwaniroooo