الاثنين، 15 فبراير، 2010

نفسك فى إيه ؟؟؟



نفسك فى إيه ؟؟

سؤال بسأله لنفسى دايما لما بكون متوتر أو ممكن أوجه السؤال لأى حد قاعد معايه لإخفاء التوتر

لكن الفترة دى بسأله لنفسى كتير أوى أوى أوى

وطبعا الإجابه مش على طريقة هنيدى ومحمد فؤاد : كامنننا

لدرجة إنى ولأول مرة بلاقى عندى كل القدر دا من الإجابات

يعنى مثلا :

نفسى أصحى الصبح ألاقى أخويا جاب العيش من الفرن ومش خلانى أنزل زى ما بيحصل كل ألفين سنة و أروح أجيب العيش

نفسى أصحى ألاقى فى فطار ويجيلى الفطار فى السرير زى القادة والمتجوزين فى شهر العسل بس

نفسى أخرج وأتمشى وملاقيش زحمة ولا قرف

نفسى أفتح الجرنال ملاقيش أزمة فى الغاز والأنابيب وإحنا بنصدره لإسرائيل لأننا ولاد أصول ولازم نفضل إسرائيل علينا

نفسى أروح الموقف فى مرة ألاقى أتوبيس فيه مكان فاضى والناس متطلعش والأتوبيس مليان

نفسى لما آجى أعدى الشارع ألاقى الناس ملتزمة بالمرور ومفيش زحمة بدون داعى

نفسى ألاقى أر بى جيه أضرب بيه كل سواق معفن

ولا أقولكم على أكتر أمنيتين كانوا فى دماغى الفترة اللى فاتت وطلع فى دماغى أمنية أكتر وأكتر

الأسبوع اللى فات أمنيتى كانت :

إنى أكون مأمور مباحث

وأنزل أعمل تحريات بنفسى

غلاسة بقى عالعباد

الأسبوع اللى بعده :

إنى أكون تاجر مخدرات كبير بتاجر فى الحشيش بس

(( عشان الحشيش مش إدمان كما يقول كل الحشاشين ))

ويكون عندى رجاله وعصابه زى الدفاس وأبو دهشوم ونروح نحط البضاعة فى الملاحات

حاليا بقى :

نفسى أكون كاتب ساخر فاشل :D

مش عايز حد يقولى ما أنته كاتب فاشل أهوه بالفعل


كل واحد وواحدة بقى يقول نفسه فى إيه ؟

شاب فقرى
-------------


بوست تانى كان لازم ينشروا سوا :


حاولت أدور على صورة للبوست دا


روحت على جوجل وكتبت كلمة العار


سبحان الله لقيت الصور كلها عن الحكام العرب وغزة والعراق


حتى جوجل أدرك الحقيقة


--------------


النهارده كنت فى طنطا


كنت قاعد مع صحابى بنتفرج على ماتش برشلونة وفريق تانى كدا


المهم إن الجهل الكروى بتاعى وصل لدرجة إنى قلت لهم مين فيهم برشلونة


فى الأول إفتكرونى بهزر


وبعدين واحد فيهم عارف إنى غلبان ومليش فى الكورة


قالى يابنى هما اللى لابسين أصفر


شوية وقلت لهم شفتوا اخر الاخبار


مش كريستيانو رونالدو بطل لعب


لقيتهم إندهشوا وإستغربوا


قالولى يابنى إزاى كان بيلعب فى ماتش قريب


قلت لهم مش كان إتصاب وقال إن معموله سحر وبتاع


قالولى موت دلوقتى خلينا نشوف الماتش


بعد دقيقة قلت لهم :


تعرفوا بقى إن الجزيرة إشترت قنوات ال ART


هنا بقى مستحملوش الصدمة وكانوا هيجروا ورايه بالكراسى ويسيبوا الماتش


نطلع من دا كله بإنى منعزل عن العالم بشكل غريب ومش عارف ليه فى إيه


بس إن شاء الله هرجع أظبط تانى


يارب يكونوا روحوا البيت سلام


لأحسن أنا حاسس إنى نقطتهم


------------


اليومين دول كل شوية حد يقولى

أنا حلمت بيك


ويطلع الحلم منيل بنيلة


حلم منهم كنت بعيط


والحلم التانى كان فى حد بحبه بيشوهنى وماسك قطر وبيقطع فيه


والعاقبة عندكم فى المسرات


ياريت أى حد يعرفنى


يارييييييييييييييييييييت


قبل ما ينام يقرا الفاتحة ويسمى الأول لو ناوى يحلم


كفاية اللى أنا فيه


آخر حلم إتحكالى خلانى أخد أكتر من قرار


- أسافر الغردقة


- أبطل نت وأشوف شغلى


- أقطع علاقاتى ببعض الناس


يارب سترك وعفوك ورضاك يارب


---------------


المشكلة الأكبر بقى اللى بواجهها إن معادى مع الدكتور


(( الميعاد الوهمى طبعا ))


لانى قررت من شهرين إنى هروح لدكاترة تانى فى اول يوم فى شهر تلاتة


عشان الصداع ومشاكل السمع والبلاوى الحلوة دى كلها


المشكلة الكبرى إن الميعاد قرب


وأنا قلقان لانى مبحبش الدكاترة (( لازم يكون دكتور مدون عشان اقول صباح الفل من بعيد لبعيد ))


وأنا الصراحة برده فى حد قالى إنى عندى حساسية وأنا خلاص مش ناقص
مش هنسى آخر دكتور روحت لهم أعمل كشف سمع ودخلنى صندوق كدا وقعد يسمعنى فى صفافير زوغيرة اوى
وفى الاخر قالى يابنى المشكلة مش فى السمع
المشكلة فى المخ اللى بيترحم الكلام
إنته تركيزك ضعف
وقالى إننا مش بنسمع بودننا
يعنى الراجل جه على أكتر حاجة واثق فيها وقالى إنها ضعفت
وهى التركيز
وقالى فى مشكلة فى المخ
أنا مش ناقص
أنا لو سافرت الغردقة
يمين بعظيم
وحياة طنط
والنعمة
لأجل الميعاد لحد ما أرجع من هناك
ربنا يسهل بقى

--------------

التعليقات :

الموضوع دا عايز أتكلم فيه بقالى كتير

أنا بعلق فين وإمتى وليه ولمين ؟

والناس اللى بتعلق لى

طبعا مننكرش إن الطريقة المثلى لإنتشار المدون عالنت إنه يعلق هنا وهناك ويكتب بمزاج

لكن أنا أحيانا بعلق وبيحصل عمليه تنفيض قوية جدا

بتنقطنى

يعنى بيكون بوست مهم وبكتب رد ومحدش بيرد عليه

ودى غالبا بتحصل فى مدونة واحدة بس من اللى بزورهم
ودا بيحصل من زمان مش من بس يومين
من قبل اللقاء وأنا ليه هناك خمس تعليقات
والحدق يفهم :)

تانى نقطة :

بلاقى ناس جايه تعلق بكلام غريب بعيد عن البوست

يعنى لو مش فاهم أو مش قريت وفر تعليقك

الموضوع سهل وبسيط جدا

أو أطلب توضيح

وانا ممكن أكتب البوست بشكل تانى فى التعليقات

لكن إن الناس تيجى تعلق عشان أعلق لها

فدا أنا أرفضه تمام الرفض

أنا بعلق عند الناس اللى بحب أقرالهم اللى بيكتبوا فى مواضيع لما بقراها بتفيدنى

فى حاجة إسمها أمانة الكلمة

وفى حاجة تانية إسمها المتعة الشخصية

أنا مش بكتب عشان تعليقات ولا عشان حد يعلق ويقولى إشطة بيس جامد فحت يا مان

أنا بكتب عشان أنا عايز أكتب

ويمكن دا كان ملحوظ الفترة اللى فاتت لما بطلت أنشر اللى بكتبه لحد ما وصل اللى كتبته لعشرة مواضيع

وكمان قفلت التعليقات لأنى كنت زعلان جدا من كل المدونين اللى كانوا معايه فى اللقاء اللى فات

ومكنتش عايز أكلم حد وكنت قافل حتى الموبايل

بلاش نتوه الموضوع

الكلام دلوقتى على إيه ؟


؟؟؟


على إنى بكتب لما بكون عايز أكتب ومش مستنى تعليق غير لو هيضيف حاجة أو يقولى على نقطة خلل


يعنى أنا بحب المناقشة حتى لو فى موضوع مقفول


ممكن ناس بتعلق لى بإنتظام وبتزورنى بإنتظام أكتر ومش بزورهم ولو زرتهم مش بعلق عندهم


مش عشان أنا رخم ومتكبر


عشان أنا مش فاضى وعشان انا ممكن تكون المدونة بتقدم فن أنا لا أرقى لفهمه
أيا ما يكون المكتوب فيمكن إنه مش عجبنى او مش نال إعجابى فطار من دماغى أى رغبة فى التعليق وقررت أقوم أنام
أنا من عشاق المواضيع الهامة (( مش سياسة ))
ومن عشاق القصة القصيرة فى كل مكان وزمان
ومن عشاق الفلسفة والافكار والتأملات ووجهات النظر المختلفة

فلو مش علقت عند حد بيعلق لى كتير ميعتبرش دا تقصير منى ويزعل

لأنى بجد ساعتها

مش هعرف أعمل إيه
مش قصدى أكسف حد ولا أزعل حد منى
بالعكس والله أنا بحب كلماتكم والمتابعة والنقاش فى التعليقات يمكن أكتر ما بحب البوست نفسه
ربنا اللى يعلم
لكن الأهم هوا النقاش الجاااااااااااد
والأفكار الواضحة الجادة اللى ظهرت بعد تفكير مش مجرد مطالعة سريعة ورغبة فى تبادل الزيارات
------------------
واخيرا
عايز مناقشات أكتر فى البوست اللى قبل دا
أراء أكتر
أفكار أكتر
مع العلم أنها قصة قصيرة وما بها من حقيقة لا يتعدى ثلاثة أسطر
------------------------


شاب فقرى

هناك 58 تعليقًا:

صوت من مصر يقول...

بمناسبة التعلقات لو حد قالك شكرا ومشى ترد عليه بايه
ياعم كريم
روح لدكتور بس يكون روش او لذيذ واكشف مش عيب
والنبى بقى لو بقيت تاجر مخدرات ممكن نص صباع

Baskouta يقول...

طيب انا ممكن اعلق تعليق صغنتوت
واقول
صباااااااااااح الخير

بس كدة
بسيطة خالص
لما ارجع من كورس الاسباني بتاعي هبقا اقرا كويس تاني واعلق من تاني
ويمكن برضه تلاقيني بقول تعليق صغنتوت
مساااااااا ء الخير

لا بجد انا قلت بس اصبح لحد ما اقرا علىرواقة بعد الاسباني واه ياني ياني
تحياتي البسكوتية

سبايدرمان spiderman يقول...

السلام عليكم ؟
how are you ?
بقي كل ده كلام كنت مخبيه في قلبك ^_^
..
بالنسبه لنفسك في ايه ؟
مش هقولك غير انك بالضبط بالضبط بتتكلم عـــنـــي
مع اختلاف اني مش عايز ابقي تاجر حشيش خالص هههههههههههههه (( احذف الحته ده من عندك ، بدل ما نبلغ عنك الحكومه تمسكك بتهمه الاحلام غير المشروعه هههههههههه))

...

و الف سلامه عليك يا جميل من الصداع
انا برضه عندي صداع كان الاول حساسيه و قلب معايا بصداع نصفي ^_^ بس دلوقتي الدوا شغال تووومممممااااااام ^_^

...

و حد ميعرفش برشلونه بيلبس ايه بس ؟؟ههههههههه شكلك ملكش خااااالص خااالص خاااالص كمان مره ، في الكوره ههههه

مستخلص افندى. يقول...

والله يا كريم كلنا غلابه

وكل واحد وله وجهه نظره وانا بأحترم اى وجهه نظر حد

انا كان نفسى اطلع فرخه او اى حيوان اخره بيعيش سنه سنتين ويموت وهو مش حاسس بحاجه ولا تعبان فى حاجه ويموت برضه مش حاسس بحاجه ولا هيتعذب ولا هيتحاسب ولا اى حاجه هعيعش كويس ويموت بكرامته كويس

اخوك وحبيبك من الى والحدق يفهم :S

بنت قلبى يقول...

فقرى
بص انا هرد على دا الاول علشان انا اضره فيه دلوقت
وكمان البوست دا انت مجمع فيه مواضيع كتيره ومختلفه
كل الا نفسك فيه صعب يتحقق لاننا احنا كده يا مصر بالذات كده
صعب تغير عاده فيهم هما خدوا عليها او اتاقلموا عليها
وانا هرد على سؤالك
لان انا حتى ما سئلتهوش لنفسى من فتره
الا انا نفسه فيه
هوا ربنا الا يعلم بيه بس من الا بشوفه صعب يتحقق
زى مثلا الحنيه ترجع تانى
العقل
القلب
صعب يا فقرى جدا
ــــــــــــــــــ

وحتته عدم اختلاطك بالا بيحصل وكده غلط
لانها مؤثره عليا بس بتكون كويسه اوى لما بتحس انك فى عالم تانى ومرتاح عليه كده

وعوزا ااقلك حاجه
لما تحلم حلو وحش قلى وانا افسرهولك فى ثانيه
لانى واخده شويه فى الاحلام لانى متابعه البرامج بتاعتها
وكمان الا بسمعه لو وش احكيه فى الحمام
انا بقلك الا بسمعه
وتته التعلقيات د صح
ساعات بسمهيا رخامه زى مابتقول او تكبر
لكن الواحد لما يكون داخل بهدف افيد واستفيد بتكون احسن من انى دخلا اتعرف واكون مميزه
هنا العقل الا بيتحكم
انا مش عاوزه اطول اوى لانك عقدتنى فى تطويل الرد فا بلاش اردها

adel يقول...

طب ما انا لما قالتلك كده
قولتلي مبتعلكقش و عاملي بلوك و هاك
اولع فيك
وبذمتك يا راجل
انا ااقرا كل ده علي الصبح كده ؟؟؟
طب حطي كام نكتة في الاخر عشان اسامحك

1-احلامك الحقيقة كويسة .... امال انا ليه من زمان جدا منفسيش الا اني اتطلع نصاب ؟؟

2-ياريت متتفرجش علي كورة تاني مع حد و لو حصل و كنا سوا ممكن نتكلم في السينما لاني عصبي بعيد عنك و هنتهور علي بعض

3-مممممممممم لا مش هشالك ماله اللقاء
LOL

عاوز اصحي يقول...

اشطه يامان ايه الكلام الجامد فحت كيك دا
هههههههههههههههههههههههه
بما ان بوستك طويل فانا هرد علي نقطه نقطه

نفسفساتك طبعا في منها منكن يتحقق والبعض مش منكن
اللي ممكن منها تقريبا مفيش حاجه ممكنه
والباقي مش ممكن

انا احب الظباط بتوع المرور اتفرج عليهم وهما عمالين يقفشوا في سواقين الميكروباصات
السواق من دول يبقي عمال يتأمر علي اهلينا وييجي قدام الظابط بيبقي عامل زي الكتكوت المبلول

فعلا كل اخبارك قديمه هههههههههههه بس دا راجع لأيه انت بتعزل نفسك ولا مشغول مع سيسكو
ربنا يوفقك وتبقي اي تي قد الدونيا

هو المفروض ان الرؤيه السيئه من الشيطان والمفروض صاحبك ميحيلكش الحاجات دي
دا حتي الرؤيه الكويسه متحكيهاش الا اللي تثق فيه بس

معلش طولت عليك مع اني قلبت شويه نقط
اشوفك علي خير يابوالشباب

واحد كده يقول...

أنا بقى مش نفسي في حاجة ,

نفسي أموت و خلاص ,

لأني مش عاوز أي حاجة من الدنيا ,

مش عارف أنا قاعد فيها بعمل إيه ؟؟

star in the sky يقول...

البوست هعلق عليه حتة حتة

اول حاجة نفسى فى ايه
اممممممممممم
حاجات كتييييير اوووى
بس اللى نفسى فيه اوووى دلوقتى
اول حاجة ان ابقى جريئة مع اجتماعية وابطل الكسوف اللى بيحرجنى موووت لغاية دلوقتى ومش بيخلينى اعمل حاجات كتير نفس فيها واتصرف طبيعى

تانى حاجة نفسى اكون فى كلية الالسن ازاى الله اعلم

تالت حاجة نفسى اسافر اسكندرية والمنصورة

رابع حاجة نفسى يبقى عندى ثقة فى انى بكتب كويس وارجع احب الكتابة تانى

خامس حاجة نفسى حد خنقنى اوووى يمشى من حياته او امشى من حياته او اى حاجة المهم ارتاااااااااااح

سادس حاجة ودى اللى مستحيل تحصل نفسى اصحى من الحلم اللى انا فيه



الدنيا كلها عارفة الحقيقة مش جوجل بس


ياااااااااه حلوة اوووى لمة الصحاب مشتاقة لها اوووى من سنين كتيرة


بالنسبة للحلم لا متخافش انامعرفكش شكلا ولا بحلم بالليل


وبالنسبة لموضوع الدكاترة فكرتنى انا عندى اعيا ولا اروح لدكتور ومستحيل اعمل عملية وبقول فى بالى ان لو فى يوم اضطريت اعمل عملية لا مش هتعالج ودايما بستغرب على اللى عندهم سرطان ليه بيتعالجوا ويروحوا لدكتور طالما هيتعذبوا برده وهيموتوا فى النهاية حتى لو اتعالجوا


نيييييييجى بقى لتعليقات تصدق بعد ما قريت اللى كتبته فى موضوع التعليقات شوية حاجات كده جات فى بالى لخبطتنى بس هتتظبط ان شاء الله

ويارب ميكونش تعليقى رخم وستين غلس

سلمى يقول...

السلام عليكم
شوف حضرتك
سؤال انا نفسى فى ايه
انا نفسى ان ازمه الاخلاق تنتهى نفسى انى اشوف البنت عندها حياء والشاب كده محترم ومش بيقل ادبه
نفسى يكون فى مجمعات للشباب بتنمى التفكير بيجتمعوا على فكره وينفذوها
نفسى البنات تعتز بنفسها وتسبها من موضوع احنا اخوات اللى خرب الدنيا
وحجات تانيه كتير
اما عن نفسى
فانا عندى حجات كتير اوى نفسى اعملها
نفسى اختم القران مره تانيه ونفسى اخدت الكرس بتاع الانجليزى واخلصه وادخل على الفرنساوى
نفس اخد كورس شامل فى التنميه البشريه
وحجات تانيه كتير برضو


اما البوست التانى
فمن فضلك متهملش موضوع الدكتور
وتذكر
ان لبدنك عليك حق

اما بلنسبه للتعليقات
فانا اوقات بفضل افكر قبل ما اعلق
اوقات بدايق من تعليق علقته واوقات بعلق بللى يناسب الموضوع وكده يعنى
لكن فى الاخر بتمنى ان صاحب المدونه يوصله تعليقى بلشكل اللى انا اقصده


شكرا ليك واسفه للاطاله

فراشة يقول...

يابني ايه دا أرد انا بقى على ايه ولا على ايه...

حكايه ان بتفكر نفسك ف ايه دي عادية والحاجات اللى انت نفسك فيها مع انها معظمها طبيعي بس دلوقتى لو حصل يبقى معجزه

وحكايه ان الناس بتحلم بيك احلام زي اللى انت حكيتها دي فمعنى كدا احتمال يعنى الناس دي بتفكر فيك كتير وبتفكر ف حالك وحاسين انك مظلوم من حد او نك مضايق او ف مشكله

وموضوع التعليقات
يعنى انا بقرأ كل بوستاتك اكتر من مره كمان ومش بعلق كل مره او مش بعلق غير كل فتره يمكن زي ما انت بتقول بحس انى مش هضيف حاجه للبوست فبفضل السكوت

ويا كريم ...انا نفسي بقى اكون غير مرئيه :)

wasf_elahsas يقول...

اولا السلامو عليكم والف سلامة عليك
ثانيا ناخدها واحدة واحدة
بالنسبة لموضوع نفسك في ايه
فممكن كنت تختصر كل الكلام ده بامنيه واحدة انك ما تبقي مواطن عادي في اي دوله اخري
لان ولسؤ الحظ ان مصر البلد الوحيدة ال بتتفنن في زل اهلها بكل الطرق
ففي اي دوله تانية حتي لوكانت الدنيا زحمة مش هتلاقي هيئة مواصلات بتحط الناس فوق بعض
وهتلاقي دايما عاملين حسابهم علي عدد الناس
وهتتعامل معامله الاجنبي في مصر ال رافعة شعار الاجانب فوق الجميع
فعلي راي ال قال لو لم اكن مصري عمري ما كنت هتمني كدة والحمد لله اني مش مصري
ده بالنسبة للموضوع ده
بالنسبة بقي للدكتور والاعراض الكتير فزمان قالو نحفظها في الصغر تصوننا في الكبر وانت لسه صغير يعني لسه المفروض تبقي في كيسها
محتاجها لسه جديدة
فخلي بالك من نفسك مفيش حاجة مستهله
حتي لو مش بتحب الدكاترة فوجع ساعة ولا كل ساعة
والف سلامة عليك
بالنسبة بقي لموضوع المواضيع والردود
فيا سيدي كل واحد بيعمل مدونة بيعملها علي ما اظن عشان يتنفس فيها مش فارق في الاول مين ال هيقرا المهم انه يفضفض وخلاص
وبعدين كون ان حد بيرد عليك حتي لو بكلام من نوعيه بيس وجود وفاين فده مش حاجة وحشة برده ايا كان الضيف فهو ضيف واكرام الضيف واجب
وحكاية ان محدش بيرد عليك اما ترد عليه في مدونته فده ممكن من غير قصد حتي لو بقصد انت بترد علي الكلام بالكلام ال في نفسك المهم انك تقول ال جواك
تحس انك بتفكر وبتقول انك مازلت لك وجهة نظر
ومش معني انك زعلان من حد انك تبطل تتكلم او تقفل تليفونك او تقفل التعليقات
واجه بقوة ودافع عن نفسك وخد حقك هو حتي الكلام هتسيب حقك فيه
راجع نفسك يا فقري واعرف ايه سبب فقرك
هتلاقي حاجات كتير انت مش واخد بالك منها او مش عايز تاخد بالك او مغمض عنيك
مع ان دي دنيا ولازم تعيشها ومش بمزاجك تبعد عنها
تحياتي

بيطرية ومش بايدى يقول...

يعنى افهم من كده
ان سياتك دلوقتى فى الغردقة
طب كويس ان انت روحتها فى اليومين الحر دول احسن لوكنت روحت بعد كده كان الله اعلم بيك يمكن مكناش نشوفك تانى فى المدونة

بص انا هاعلق على البوست بس مش بالترتيب
يعنى حكاية الاحلام دى
اولا ماكناش ينفع انك تعرفها يعنى المفروض اللى شافلك حلم وحش يعمل زى ماكان الرسول بيقول يبصق علىشماله ويستعيذ بالله من الشيطان ومايحكيش الحلم اصلا لحد
وبعدين الاحلام دى على حد علمى هى جزء من العقل ابلاطن يعنى يمكن يكونوا قبل مايناموا اتفرجواعلى فيلم رعب لقوا صورة الرجل ابو جمجمة اللى انت حاطه شافوها فى نفس الفيلم فاتخيلوك انت البطل بتاع فيلم الرعب ده

عادى يعنى ماتقلقش من حكاية الاحلام دى خالص وسلمها لله وفكك من الجو ده

نكمل بقى فى تعليق تانى
بس يارب التعليقات دى تتنشر يحسن خلاص انا هافرقع

Mano يقول...

اولا كل اللي نفسك فيه دا سهل اوي خالص
بس محتاج شوية وقت
بس انا شايف اقرب وقت ممكن يبقي في المشمش هههههههه
اما عن امنيتك انك تبقي مأمور مباحث
وبعدها كنت عاوز تبقي تاجر حشيش
فأزاي بقي
كده انتا هاتبلغ علي نفسك
وهاتعمل لنفسك كمين
هههههههه
تحياتي

بيطرية ومش بايدى يقول...

ثانيا بقى بالنوسبة لحكاية نفسك فى ايه
بص ياسيدى
انا كان زمان زمان قبل الثانوية العامشة انى ادخل كلية طب وابقى دكتورة واعالج الناس ببلاش وان انا يكون معايا فلووووووس كتييييير اوى عشان اى حد الاقيه مش لابس زى او ناقصه حاجة اديله
ده كان ايام الطفولة والبراءة
وكان نفسى اطلع ظابط برده واترقى اترقى لحد مااوصل وزيرة للداخلية وامنع الرشاوى واحط قوانين صارمة تمشى الشعب والحكومة على العجين مايلخبطوش يعنى من الاخر اى حاجة يكون فيها سلطة اقدر اتصرف بيها واعمل الخير اللى مش عارفة اعمله وحاسة انى حتى لمجرد انى اتفوه به يبقى جريمة يعاقب عليه القانون
بس زى ماانت قولت احلام تايهة ومش لاقية اللى يدور عليها اصلا

دلوقتى اولا نفسى انجح اوى فى الكلية ونفسى احبها اوى واخلى كل البنات تعرفنى وتشوف ان الالتزام مش معناه انك تبقى خايبة او منطوية او كشرية
او على طول ضاربة بوذك شبرين ونص
دى امنيتى الاولى
امنيتى الثانية ان بعد مااخلص
افتح مشروع كده صغنون اديره واجيب منه فلوس كتير واى حد فى عيلتنا او فى الحى كله يحتاج اى حاجة انا اعرف اساعده ومااخافش ان دى مثلا مش فلوسى
لا يعنى اتصرف فيها براحتى برده

امنيتى الغالية اوى ان احفظ القران بجد بجد نفسى ربنا يعينى كده واحفظه


ده حاليا اللى نفسى فيه
ساعات كتير مبرضاش اسال نفسى السؤال ده لانى اجابتى بتكون كتيرة ومشتتة فبفضل انى مااسألوش تانى عشان اعرف اركز
لان مشكلتى الاساسية انى مش مركزة فى ايتها حاحة خالص فى اى حاجة بعملها تلاقى المشكلة انى مش مركزة

كله خيررررر

واكيد برده رغى خييير

بعوض التعليقات اللى فاتتنى

الشعب لابد له من حكومه تشكمه يقول...

استنى بس علشان انا توهت,,هفتح البوست ادامى واعلق واحده واحده,,

1_نفسك فى ايه؟؟؟؟
اعتقد دا موضوع متغير اوى,,يعنى اللى كان نفسى فى وانا فثانوى مش هو وانا فى الكليه ومش هو وانا بشتغل مش هو اللى نفسى فى حاليا,,
كل مرحله وليها احلامها وممكن احلام تختفى تموت واحلام تظهر ومتتحققش وهكذا,,,
بالنسبه لسؤالك نفسى فى ايه؟
تسمحلى احتفظ بدا لنفسى:) لان تقريبا محدش يعرف انا بحلم بايه:)
(مرضتش اتجاهل سؤالك اهو فهحتفظ بالاجابه لنفسى )

2_ لازم لما تكتب العار يطلع الحكام العرب,,لو حد عنده دم وشاف اللى حصل فى غزه ومنظر الناس وهى مرميه فى الارض وبتقول الشهاده,وكل واحد فيهم قاعد ياكل الباتون ساليه ويقولك نناشد ونندد ونشجب الشكيكه اسرائيل,,
لازم يطلعلك كلمه العار.


3_ انا لو مكان اصحابك يانهارى كان زمان قتلتك مهو لقتلك ياتموتنى انت من الفرسه,,
يامفترى مصر اخدت كاس الامم الافريقيه والبطوله خلصت وجاى تقول الجزيره اشترت الماتشات,,ياقاااااااااااادر:)

بس دا مش انعزال دا ممكن تكون حاجه مش فى دايرة اهتماماتك,,عادى يعنى.
لكن لو انعزال انك مش عاوز تعرف حاجه عن الدنيا,
لا حاول باه تنطلق شويه.

4_ متأجلش موضوع الدكتور واحنا اتكلمنا فى الموضوع دا كتير,,
رووووووووووووح لكل داء دواء.

5_اممممممم زعلان من(كل) المونين فى اللقاء,,دنا حتى متكلمتش كلمتين على بعض كل اللى قولتهولك كل سنه وانت طيب وبعدها زحفت عليا حالة صمت والتعب الشديد,
لحقت ازعلك امتى بسسسس هو انا كنت بتكلم؟؟:(
وبعدين لما انت زعلان ليه متروحش للى انت زعلان منه وتقوله عادى جدا,انا لو زعلانه منك هقولك..
قياريت تقولى انت زعلان منى فى ايه من ضمن الناس اللى زعلت منهم.


اممممممم بالنسبه لموضوع التعليقات انا مش حابه انك تقدم اصلا تبريرات لحد,

يعنى انا مثلا بتابع ناس بانتظام وعمرهم مسابولى كومنتات عاااااادى جدااااا,
انا مش مستنيه من حد انه يجيلى يردلى الزياره انا بتابعك لانى بحب اتابعك وعاوزه اعرف انت كاتب ايه انهاردا؟؟؟
واوقات بدخل اقرا عند ناس بتابعهم جدااا وبحرص على انى اسيب كومنتات عندهم,
اوقات اقرا بوست ومسيبش كومنت لانى مش بيكون عندى رد.
والموضوع مش كومنت بكومنت.

بس كفايه كده رغى.

نـــــــــــــور يقول...

شوف ياكريم
ازيك الاول :)

حكايه نفسك فى ايه دى موديه ياكريم
يعنى بتتوقف على مود الواحد وميوله فى وقتها والموضوع بيدخل فيه افكار مجنونه بقدر مانفسيتك متظبطه او مش متظبطه او لو متظبطه فمزاجك ميوله ايه ولو لا يبقى ايه بالظبط اللى مدايقك وعشان كده امنياتك بتختلف خصوصا لو كنت حد من المجانين زى حالاتى :)

بخصوص الكوره فانا كده احترمك اوى اصلى بحب الرجاله اللى ملهمش فى الكوره :)

الاحلام بتقلق فعلا بس لو حطيتها فى دماغك هتتعب اوى يافقرى
جرب تنساها واعتبرها كده زى الناس اللى بيقروا الفنجان واعمل نفسك مش واخد بالك عشان ماتركزش فى حاجات تتعبك بجد والله
وربنا يهيألك الخير يارب :)


انا زيك فى موضوع الدكاتره بكرههم وبكره اروحلهم بس هما شر لابد منه
خصوصا ان واضح ان عندك حاجات كتير ملخبطه فخد بالاسباب واكشف وربنا يعافيك يارب

اما عن التعليقات فانت صح
انا من الناس اللى بطلت تعليق تقريبا الا نادرا بسبب موضوع الدعايه ده وكمان سدت النفس
ممكن اعمل شير لمقال يعجبنى وبتابع من الردير اول باول لكن مابعلقش عشان مش لاقيه كلام مناسب اقوله واحيانا بيكون بسبب حالتى المزاجيه :(

التعليق اوقات جدا بيكون مطلوب جدا فى النفساويات وكمان فى المناقشات غير كده هو مجاملات وانا مابحبش المجاملات
الخلاصه عايزة اقولك انت صح ونفض خالص وده مش معناه تقفل تعليقاتك !!

اسفه للتطويل :)

promise is promise يقول...

نفسى فى ايه

تصدق ان السؤال ده انا بنسا اساله لنفسى
تصدقنى لو قلتلك ان ساعات بتيجى عليا اوقات بنسا فيها نفسى اصلا فاكيد اكيد بنسا انا نفسى فى ايه

على فكره بالسؤال ده انا حسيت ان عمرى بيتسرق منى من قبل ما اعرف انا عايزه ايه

كويس برضه ان جوجل ادرك ان اللى احنا فيه ده اكبر عار
تعرف بجد ايه العار هو خبر قريته فى جورنان من كام يوم ان ايران اطلقت كبسوله فيها حيونات ومشعارف ايه تدور حول العالم وانت لسه هنا بتقولى مرور ورغيف عيش بزمتك مش يبقا عار

بالنسبه لحكايه التعليقات فانا عايشه على مزاجى فى الموضوع ده بعلق على الموضوع اللى يجعبنى وفى المدونه اللى بحبها وللناس اللى بحترم تفكيرها ومش بحب ابدا اشغل بالى من صاحب المدونه دى ولا ده بيعلق عندى ولا لا
يعنى انا على كيف كيفى بس
وانت كمان طنش تعش تنتعش

wella يقول...

امممممممممممممم
بوست طويل اوى رغاى اية كمية الرغى دة بس عادى مدوتك وترغى بيها برحتك


نفسك فى اية؟؟ سؤال حلو

نفسى اعمل حاجة فى مفيدة فى الاجازة
اخد كورس انجليزى كورس كمبيوتر

اروح ادرب فى شركة بترول او شركة محترمة من غير واسطة

لانى ماعنديش واسطة غير ربنا

نفسى اجيب تقدير فى الكلية لانو بتطلع عين ابويا واللى خلفونى فى المذكرة

نفسى حتة فى البلد الحلوة دى اتمشى فيها مكان فى خضرة كدة اتمشى فيها براحتى واشم هوا نضيف زى مابنشوف فى بلاد برة
واتمشى من غير ماحد يبص علية ويبحلق امشى براحتى
هوة حنا مش عندنا حتة نتمشى فيها لية ؟؟

كفاية عليك لحد كدة امنيات

اما فى حكاية مرضك وانو انتة منش بتحب الدكتور

ربنا يشفيك يارب بس روح للدكتور اللى فيها طيب روح قبل ماتكبر الواو
روح اتعالج وخلص بسرعة وانجز

اقصوصه يقول...

اولا هذا مش بوست

هذا كوكتيل بوستات ببعض!

ما علينا

نفسي اتحول من انسانه عصبيه

الى انسانه هادئه

ويكون عندي القدره اكثر

على ضبط إنفعالاتي والتحكم فيها

تفسي بعد اكون اكثر تدينا

واكثر قربا من الله

ونفسي اكمل دراستي بعد

ونفسي فحجات كتيييييييييير!

Rosie يقول...

سؤال نفسك في أيه..أول حاجة السؤال ده المفروض إن غجابته تبقى متغيرة بس موجودة..بمعنى إنك علطول يبقى نفسك فى حاجة(عايش لهدف يعنى)..و مع الأيام و مع اللى حققته و اللى محققتهوش تبدأ تغير الاجابة بتاعة السؤال..يعنى أنا مثلا نفسى أطلع كتاب و أشتغل شغلانة كويسة..و حاجلت تانية كتيرة...
................حتة أنت الرياضة أنت أثبت أنك متابع بس متابع من خلال الصحف..أو الرياضة السياسية زى قصة art
>>>>>>>>>>
قصة الحلم ببساطة أقيل ما يحكيلوك الحلم ؟أسئلهم هو حلو و لا وحش ...و لو وحش خليهم ما يحكهوش لأنه غلط أصلا أنك تحكى حلم وحش.....
فكرة بقى أنك تضع أكتر من بوست وع بعض دى بتعمل لخبطة جامدة و بتوه الواحد فى التعليقات..
قصة التعليقات
أولا أنت دخلت فى الناس كلها شمال أوى...ثانيا منين بتقول أنك زعلان انك علقت لواحد كتير من غير ما يعلقلك و بعدين بتقول أنك مش لازم تعلق على كل موضوع..بص المفروض احنا مش نعد نعد للبعض...ثالثا..ممكن حد يكون شايف كلمة رائع هى أكتر كلمة معبرة للمكتوب مش بس بيخلص و خلاص..رابعا صعب أوى حتة الموضوع فوق مستواك دى ينى تقول للى كاتب لأن المفروض الهدف من لكتابة أنها تخرج من واحد عشان توصل للتانى..(توصل للناس يعنى) فلو موصلتش يبقى من الامانة تقوله يكتب ايه اللى ممكن يغيره عشان توصل أسهل..خامسا أتمنى متكونش زعلت من اللى كتبته..

Bent Men ElZaman Da !! يقول...

لما قولت اول 7 امنيات كده
قولت انت عايز تغير مصر كلها مش مجرد امنيه تحققها
لكن الامنيات اللى بعدها
من مأمور مباحث لتاجر مخدرات
اكتشفت انك عايز تعيش كذا شخصيه فى بعض اصلا :D
وحقيقى دى حاجه ياريت الواحد يعرف يعملها
يعيش حياه غيره لفتره
بجد هيبقى حوار جامد اوى تخيل بتعيش حياه غيرك يعنى بتمر بنفس مواقفه الكويس منها والوحش واللى فى الغالب هتكون عمرك ما مريت بيها فى حياتك انت
انت اول ولد اشوفه مش مهتم بالكوره كده
اما بالنسبه لميعاد الدكتور
فى دكاتره بتوصلك المعلومه بطريقه رخمه جدا حتى لو كانت معلومه بسيطه
وفى دكاتره على العكس من دول بيوصلوا كل حاجه بسهوله وبساطه
حاول تدور على واحد من دول وتروحله
اما التعليقات
يمكن بقيت حاسه انها واجب
كل واحد بيعمل الواجب اللى عليه ومستنى ليه مقابل
اسفه انى طولت :)

Ana keda يقول...

ازيك يا كريم عامل ايه؟؟
البوست مجمع حجات كتير اوى وده باين جدا ان عندك دوشة وكويس اوى انك طلعتها

اول حاجة نفسى فى ايه؟؟
انا مش بسأل السؤال ده كتير ليا غير فين وفين يعنى بس ناو يعنى نفسى ان شاء الله ابقى زوجة احسن واحسن واسعد الى حواليا وتكون امى علطول راضية عنى ونفسى اوى "بيبى" واربيه عالى انا عاوزاه يطلع عليه :)

العار ضرورى يبقى فى عرب معملوش اى حاجة غير انهم اتفقوا فعلا انهم ميتفقوش ومش فالحسن غير يقعدوا عالطرابيزة وكل واحد فى وادى تانى ومفيش اى حلم مشترك بينهم او اى حاجة تدعو للتفاؤل فى المضووع ده

من وقت للتانى محتاج تغير جو وتعمل فلترة للناس الى معاك بعملها كل فترة بجد وبتريح لان فى ناس مش بتستاهل تبقى موجودة فى دايرتك اصلا لان وجودهم زى عدمه

التعليقات دى حاجة راجعة لك انت ومش اى بلوج هتدخله هترتاح فيه ومش اى بلوج برضه هتدخله هتعجبك دماغ الى فيه
واعتقد ان الى كاتب عشان تعليقات ده يبقى مستنى حاجة تانية

سلامتك من الصداع الف مليون سلامة عليك وربنا يشفيك ويعفى عنك وتروح وترجع بالسلامة بس متتأخرش علينا :)

جارة القمر يقول...

ازيييييييييك ؟

ممكن اعلق على القصة اللى فاتت الاول ؟
انت عارف انى بعلق باحساسى مش كنص ادبى خالص

اولا انت كلامك وصل بسهولة اوى و خلانى افكر كتير بجد كتير اووووى
**طب مش هو باللى عمله دا وانه قالها تبعد أثر عليها برضو .. مش يمكن بعد موقفه دا مش يخليها تثق فى حد تانى لانها وثقت فيها وبعد كدا خلاها تبعد عنه اى كان سبب طلبه دا
**طب لما هو حاسس انه ضعيف ومش قادر و مش الشخص القوى اللى هى فكراه ليه مكملش ضعفه و طلب منها انها تكون جنبك وانه محتاجلها ؟؟ كبريائه منه ولا قوة شخصيته اللى هو مش حاسسها فى نفسه و هى حستها وكانت مؤمنة بيها و هو اللى مش واخد باله منها انها جواه

**كتير مننا بيخفى حقيقته عشان مش يبعد ناس بيحبهم عنه اعتقادا منه انهم هيبعدوا لو عرفوا الحقيقة بس هيفضل لحد امتى يمثل .. يا ترى اللى مر به بطل القصة كانت لحظة صدق ولا لحظة انفجار ؟؟ من كتر قربها منه كان عايز تبقى جواه زى ما هو بحقيقته حتى لو وحشة لانه حس انه و هو بيدارى حقيقته بقت الانسانة دى قريبة من شخص تانى غيره مش هو بحقيقته فاهمنى ؟؟

** هل الانسان ممكن يتغير عشان خاطر حد يتغير بيها و ليها .. هل التغير دا هيستمر ولا هيبقى لفترة من العمر و تعود لحظة الانفجار مرة اخرى .. انا بحس ان الطبع صعب جدا تغيره لكن ممكن نقلل منه
**هقولك تانى انا حسيت القصة يمكن الكلام اللى قلته مالوش علاقة اوى بالقصة بس دى افكار حستها وانابقراها

*******************************
البوست دا بقى هخليه فى تعليق تانى

جارة القمر يقول...

انا جيت تانى :):)

ازيك و ايه اخبارك يا كريم ؟ يارب تكون بخير يارب ربنا يكرمك و يديك اللى بتتمناه يارب

نفسى فى ايه ؟

نفسى اطمن بس مش عايزة حاجه تانية

***********
العرب و العار وجهان لعملة واحدة

************************
منعزل ... كلمة فى سرك اه حاسة انك منعزل رغم انى بقالى كتير مش اتكلمت معاك بس حاسة بكدا
كريم انت تستحق انك تكون مع الناس حتى لو بقدر قليل

********************
الاحلام : ربنا يهديك و يطهر لك قلبك يارب يا كريم ... حسيت انى عايزة ادعيلك كدا لما قريت كلام الاحلام دا

*******************
الله يكرمك روح للدكتووور احنا ناقص نعمل مظاهرات و نقول روح للدكتور يا كريم :D

***********************
التعليقات
انا بشوفها تواصل بين الناس بس تواصل على فكرة او احساس حاجات كتير
عايز تعلق عند مين و امتى و فين بترجع للحرية الشخصية ومافيش قيود عليها
لان الاصل ان اى حد بيدون عشان ياخد حرية جايز يكون مش لاقيها فى الواقع مش هتبقى هنا كمان قيود على الواحد كدا هتبقى خنقة اوى

بس برضو تيجى تعلق عندى هاااا ؟؟ ههههههههه

انا رغيت كتير اووووووووووى وانت زمانك هتضربنى يلا اجيلك البوست الجديد بقى سلالالالام يا كريم

شاب فقرى يقول...

صوت من مصر
ازاى يكون الدكتور روش ولذيذ من وجهة نظرك يا كوكو ؟
متقلقش
هبعتلك دولاب بدرة بحاله
فقرى

شاب فقرى يقول...

بسكوتيه
صباح النور
كورس اسبانى
اللهم صلى عالنبى
ربنا يزويدك يا بسكوتيه
انا بكافح بقالى كام يوم عشان اصحى بدرى وادفع فلوس كورس البرمجة ومش عارف
ربنا يقويكى بجد
زمان كان عندى عزيمة اكبر من كدا
بس خلاص بحححح
بانتظار تيجى من كورس الاسبانى
فات يومين على كتابة البوست
يارب تكونى جيتى بقى
نورتى على فكرة
فقرى

شاب فقرى يقول...

سبايدر مان
يسعدنى والله انى اسمع منك الجملة دى
انى بتكلم عنك :)
شفت بجيب فى سيرتك بالخير ازاى ؟
ربنا يستر وميتقبضش عليه فعلا
دوا ايه بس ياعم
اكتبلى حالتك الصحية كلها
يمكن نطلع نفس التعب والمرض واروح لنفس الدكتور واريخ دماغى
اشطات ؟
انا لحد دلوقتى شاكك ان اتيليكوم مدريد هوا االلى كان لابس اصفر
اه والنعمة
نورت
فقرى

شاب فقرى يقول...

مستخلص
كلنا غلابة
صلاة النبى احسن
صحيح
انته كان نفسك تطلع فرخة
انا بقى كان نفسى أبقى نسر
أو سمكة
صباح الإشتغالات يا زيكا
فقرى

شاب فقرى يقول...

بنت قلبى
عارفة تغيير العادات بييجى من تغيير الثقافات
وتغيير الثقافات بييج من توحيد الطبقات من خلال اعلام واعى يقود المسيرة وتعليم راقى يرقى بعقول ابناء الامة فيساوى بين الجميع وتتاح الفرصة للمجتهدين والمتفوقين للنبوغ

فهمتينى تقريبا

كل الحاجات اللى عايزاها ترجع تانى دى
ماتت مع من كانوا يحبوننا حقا

بالنسبة للاحلام
هبقى ابعتلك الحلم فى الكومنتس
قولى يارب
نورتى يا بنت قلبى
ربنا يحفظك ويعزك
فقرى
اه صحيح
بالنسبة لتطويل الرد
لازم اعلق صح وبشكل كبير عشان اقدر الم بكل جوانب الموضوع وارد صح وافيدك عالاقل او امنحك وجهة نظر كاملة تانية مش شفتيها من قبل كدا
نورتى
فقرى

شاب فقرى يقول...

عادل بيه

كان نفسك تبقى نصاب
وانا تاجر مخدرات
او مامور مباحث
هجيبك القسم واظبطك :D

ماشى يا عادل
قال اقرا دا كله عالصبح ليه

انا مش زعلان من اللقاء يا دوله يا حبيبى
انا زعلان من موقف بعد اللقاء من بعض اللى حضروا اللقاء
فهمت يا دوله
نورت
هبقى ابعتلك النكت دليفرى
متخافش مش هنقعد نشوف كورة سوا لانى حلفت ما هشوفها تانى
فقرى

شاب فقرى يقول...

عاوز اصحى
كلامك بيريحنى
ووجودك بيسعدنى
وعلى فكرة
دى رؤيا مش حلم
طبعا نفسك فى ايه عارف كويس اوى جواك ايه وعارف ان انته نفسك فى بلكونة وكوباية شاى عالصبح
صباح الفل
فقرى

شاب فقرى يقول...

واحد وخلاص
انزل هات قزازة عصير
او ميرندا تفاح
واقف فى البلكونة اشربها
وخد نفس عليل كدا
وحس بالحياة
ارحم من الموت بكتير
فقرى

شاب فقرى يقول...

لان كل تعليق طويل جدا
فانا هقوم واجى اكمل التعليقات والرد عليها لاحقا
فقرى

سبايدرمان spiderman يقول...

^_^
ويكلم ويكلم
جيت تاني
^_^

....

لاقولي انت حاسس بايه
يمكن انا افيدك ^_^
متخفش هعرف اعالجك برضه
او على الاقل هدلك على الطريق الصح
^_^

....

احم احم
اصل انا طبيب ضغنن لسه ^_^

سمو الأميرة سارة يقول...

هبدأ التعليق بالعكس زي ما بقرأ الجورنال بالظبط من الآخر لقدام :D

التعليقات دي كانت عاملة لي مشكلة جامدة اوي
لأني بطلت اكتب ف المنتديات هروباً من ردود المجاملات وميرسي والله وشكراً ومافيش مناقشة ولا جديد
وكنت كتير اوي ما انزلش مواضيع نفسي انزلها علشان ما لحقتش ارد ع تعليقات البوست اللي قبله
او لأن في تعليق هايف سادد نفسي ارد ع باقي التعليقات

او لأني مالحقتش ازور الناس اللي ردت عليا او ماعنديش ردود ع مواضيعهم

وكترت بقى تعليقات عبارة عن انا جيت زورتك اهو تعالي زورينا فقط !! وكأن البوست كان موضوعه تعاااااااالوا زورونا :D

المهم انا بعد فترة قررت ما اجيش ع نفسي عشان حد .. قررت ما ازورش الا المدونات اللي ليا مزاج ازورها ولو مافيش وقت ما بزورش حد لأني مش وظيفتي التدوين لأ انا بعمله كهواية وحاجة جنب مليون حاجة تانية في حياتي

فقلت التعليقات عندي شوية رغم اني عرفت ان الناس بتدخل تقرا بانتظام
وبعد شوية بقيت ما اردش ع التعليقات الا اذا كان عندي وقت او كان فيها تعليقات كتيرة شدتني وعجبتني وناقشتني
وياسلام بقى لو عارضتني نفسي بتتفتح اوي لمناقشة جديدة وكتير اوي عملت تحديث للبوست برد معارض تماماً لفكرتي لأني اقتنعت بانه ممكن يكون صح وتفسير معقول للمشكلة


المهم بقى علشان حاسة انك هتطبق ف زمارتي من كتر الرغي ههههههههه

وصلت لمرحلة سلام نفسي جميلة اوي

وهي :

اكتب اي بوست يعجبني وللناس حقها ف المعارضة :)

اكتب اي عدد من البوستات مدام ليا مزاج والا اتحول الموضوع لهوم وورك

اعلق وقت ومكان ما يعجبني واللي افقه ضيق لدرجة انه يتقمص ربنا يسهل له بقى :D



بالنسبة لموضوع الحلم دا فماتخافش .. لما بيكون في حد بيعيط ف الحلم بيبقى مبسوط في الحقيقة والعكس بالعكس :)

اما بقى انا نفسي في ايه

فانا بجد نفسي في حاجة واحدة

" الأمان "

بقالي عشرين سنة بدور عليه من يوم ما طلعت من بطن أمي والأمان ضايع مني :(

شاب فقرى يقول...

star in the sky
اولا تعليقك لا هوا رخم ولا هوا غلس
بالعكس
مرحب بيه فى اى وقت
احلامك كلها سهلة وبسيطة
ماعدا الاحلام المستحيلة منها بخصوص كلية معينة
انتى اى حاجة تقدرى تغيريها وتتحكمى فيها
اى حاجة
حياتك
المهم
انك يكون عندك الجرأة اللازمة لاتخاذ القرار ويكون عندك الارادة لتنفيذه
الموضوع سهل اوى
يمكن لو كنتى وضحتى بعض المواضيع شوية كنت أقنعتك بيها مليون فى الميه
بس المرة الجايه بقى
وصدقينى
اى حاجة فى الحياة ممكن تتغير
سواء دلوقتى او بعدين
بإرادتنا أو غصب عننا
لان سنة الحياة هى التغيير
نورتى
تحياتى
شاب فقرى

شاب فقرى يقول...

بيطرية
انا لسه مستنى انى اروح
بجهز نفسى ولسه مروحتش
هوا فى حد شاف رؤية
والتانية كان حلم
ما هى اتنشرت اهيه
الله
نورتى يا دكترة
فقرى

شاب فقرى يقول...

سلمى
ولا يهمك لا إطالة ولا حاجة
أحلامك إجتماعية بحته
ودا بيقول إنك حاسه بالوحدة زى ما كنت حاسس بيها زمان
مسيرك تمرى وتطلعى من الفترة دى على خير
ربنا يحققلك كل احلامك
نورتى
تحياتى
فقرى

شاب فقرى يقول...

فراشة
مختفية بقالك زمن
فينك ياترى يا هلترى ؟
والله انتى اللى جبتى المفيد من البوست
يعنى ممكن امسح البوست واكتب التعليق بتاعك
اكيد طبعا بستنى تعليقك ورايك
حتى لو مش هيضيف
نورتى
انا كان نفسى فى كدا الاسبوع اللى فات بليل
انى ابقى بختفى برده وغير مرئى
بس صعب
نورتى يا منى
فقرى

شاب فقرى يقول...

wasf_elahsas
هوا تعليقك كل اما امشى فيه الاقى امثال وحكم قديمة وحسستينى بخطورة الموضوع
هوا انى اعيش فى بلد تانية مكانش هينفع للاسف لانها ببساطة مكانتش هتبقى مصر فمكنتش هبقى مبسوط
بالنسبة للدكتور
أنا لسه بدور على شوية حاجات قبل ما اروح
التأخير دا مبرر
مش عالفاضى
بس بكره الاطباء والدوا اوى
نيجى لنقطة تانية

انا بكره التعليق اللى مش بيضيف حاجة او بيتعمد يعارض لمجرد المعارضة
وبكره اللى بيعلق عشان اعلق له او ارد عليه لانى بصراحة صعب انى اوفر وقت لكل دا
بالرغم من كدا بزور مدونات ناس كتير وبلف كتير فى الانترنت
وتعليقك أسعدنى
نورتى
تحياتى
شاب فقرى

شاب فقرى يقول...

Mano
فى بوست كنت كتبته باسم المسحور
لو قريته هتعرف ان كلامك ممكن
انى ابلغ عن نفسى واعمل لنفسى كمين واقع فيه كمان
اه والله
معدل التوهان عالى عالى عالى عالى
احيانا بكون كدا
شفت الامانى الحلوة ؟
انته نفسك فى ايه بقى ؟
نورت على فكرة
شاب فقرى

شاب فقرى يقول...

بيطرية
يعنى كمان تعليق
يعنى راعى ربنا
كفاية التعليق الاول ال 1200 متر
تقومى تعملى تعليق تانى 6000 متر
ولا يهمك
كنت بهزر
علقى زى ما انتى عايزة
طيب ازاى هتعالجى الناس ببلاش وازاى هيبقى معاكى فلوس كتير
وبعدين ما انتى ربنا كرمك اهوه
وهتعالجى حاجة احلى من البشر
اللى بيشتكوا كل شوية
وهتعالجيهم ببلاش
يعنى مفيش كلب هيجيب لك رغيف عيش ويقولك عالجينى
لاء هيجرى وراكى ويحاول يعضك لو معالجتيهوش
هههههههههههههههههههههههههه
تطلعى ظابط
وتبقى ظبوطة ومش بإيدى
ههههههههههههههه
حلوة حكاية الالتزام دى
بس الملتزمين هما اللى بيسوؤا سمعة الالتزام
اه والله
بالنسبة للمشروع
خلصى
وان شاء الله هشاركك وهتبقى القشة معدن
بس قولى يارب
صحيح
خدى بالك
السر فى التركيز
دايما منورة
شاب فقرى

شاب فقرى يقول...

شيما
يعنى انتى قلتى تردى بانك مترديش
حلوة والله الحركة دى
هبقى اعملها
بس ييجى وقتها وهتلاقينى عملت الحركة دى
لاء متقلقش محدش بيعرف يقتلنى
الاحتمال التانى هوا اللى ممكن
اه والنعمة
على فكرة جبتى من الاخر فى موضوع التعليقات
نورتى يا حكومة
فقرى

شاب فقرى يقول...

نور
هى فعلا مسألة مزاجية بحته
والله وانا بحترمهم اوى
بحس ان دماغهم مش فاضية

ما انا مبقلقش غير من الاحلام والدعاء
اكتر حاجتين بيقلقونى الصراحة

موضوع الدكاترة انا بجهز نفسى وراحل عن قريب
بالنسبة للتعليقات
انا بفرح بتعليقات الكل
بس مبحبش الهدف المستخبى من ورا التعليق
بس كدا
نورتى يا نور
بس كدا
فقرى
لا تطويل ولا حاجة

شاب فقرى يقول...

promise

المشكلة ان احساسنا بالزمن صدقينى بيختلف تبعا للمود بتاعنا
يعنى انا حسيت مرة انى كبرت خمس سنين فى دقيقة
ومرة تانية حسيت انهم مروا بصعوبة اوى اوى اوى
احاسيس تابعة للمود برده
ما هوا انا مش بشغل بالى والله
بس بقلق من اى حد بيشغل باله
نورتى
هطنش وهعيش بعون الله
فقرى

شاب فقرى يقول...

ويلا
امنياتك جميلة
بس ايه حكاية اتعالج وخلص بسرعة وانجز دى
انا حاسس انى هنضرب
واحدة واحدة
نورتى كالعادة
فقرى
صحيح
مفيش حتت تتمشوا فيها عندكم
انما عندنا فى الكورنيش

شاب فقرى يقول...

اقصوصة
مش شايف اى حاجة مستحيلة من امنياتك
مش بتحققيهم ليه بقى ؟؟؟؟
بس ايه رايك فى الكوكتيل دا ؟؟؟
مش حلو ؟
فقرى

شاب فقرى يقول...

Rosie
بصى انا معنديش مشكلة ان محدش يعلق
او ان الناس تعلق وانا ارد
لكن بكره انى اقول تعليق هادف او مناقشة مع الكاتب والكاتب ينفض لى
دى اكتر حاجة تفرسنى
انى أوجه كلام لحد ويتنفض لى
او ان حد يبقى بييجى يعلق مخصوص عشان اروح اعلق له مش اكتر
حاجة تنقطنى برده
انما اى تعليق تانى
ينورنى ويشرفنى
تعليقك اسعدنى ونورتى المدونة وشرفنى انك اهتميتى بالرد

شاب فقرى

شاب فقرى يقول...

Bent Men ElZaman Da !!

زى ما نفسى فى القدرة عالتغيير
زى ما نفسى فى نفس ذات الوقت فى انى اعيش اكتر من شخصية
دا واضح جدا
يمكن لو اشتغلت فى التمثيل احقق الامنية دى
ولا ايه ؟
نورتى
فقرى

شاب فقرى يقول...

Ana keda


نورتى
احلامك بسيطة اوى
ربنا يكرمك ويحققها لك
انا عن نفسى
الله يسلمك ويارب يسمع منك ويشفينى
شاب فقرى

شاب فقرى يقول...

جارة القمر
سيبك من كل التعليقات والحركات دى
نورتى المدونة
عاملة ايه ؟
يارب تكونى بخير
ومختفية ليه ؟؟؟
بانتظار رجوعك مرة تانية
فقرى
تعليقاتك يترد عليها فى وقت تانى او فى اوان تانى
عشان نعرف نتناقش بعون الله
لما ربنا يكرمك وترجعى تانى
وتبطلى تختفى كتير كدا
فقرى

شاب فقرى يقول...

سبايدر مان
متخصص فى ايه
اوعى تقولى طب نفسى
لانى عايز ادرسه اوى
فقرى

شاب فقرى يقول...

يا اميرة سارة
انا افقى مش ضيق
بس التعليق دا جبار بجد
سيبك من الاحلام والتعليقات والحاجات دى كلها
نفسك فى الامان
قلبتى هرم ماسلو للحاجات يا سارة
بس على فكرة
الامان اهم من اى حاجة تانية فى الوجود
ممكن يكون حواليكى ومش عايزة تحسيه
لانك مركزة فى حاجة واحدة بس
نورتى

الا ايه هى مدونتك الرئيسية بس عشان ابقى عارف ؟؟؟
نورتى كمان مرة
شاب فقرى

سمو الأميرة سارة يقول...

:) اي واحدة يا كريم
كلهم ولاد خالتي ههههههههههه

لأ بجد الرئيسية بنوتة لاسعة بنتي البكرية :)

شاب فقرى يقول...

ماشى يا سمو الاميرة
هنضيفها للريدر
وبانتظار البوست القادم
منورة
فقرى

MSMO يقول...

الحمد لله لإن لقيت حد بيفهم زي في الكرة
مدونتك جميلة أعتقد إن سأتي لزيارة من وقت لآخر
بس قولي الأول برشلونة ترتيبها كام في الدوري المصري

شاب فقرى يقول...

msmo
نورت المدونة يا عزيزى

لا ياعم
برشلونة بيلعب فى الدورى الليبى مش المصرى
:D

تحياتى
شاب فقرى