السبت، 17 أكتوبر، 2009

عندك حق بكلم نفسى


بسم الله الرحمن الرحيم
دوما هنالك ما بين السطور
حتى وإن كان يملأها الحزن العميق فلن تخلو من الأمل
اليوم أعتبره من أسعد الأيام هذا الشهر

عدة أسباب تجعله يحصل على هذه المرتبه :

- خرجت.

أينعم خرجت وجلست فى مكان أكرهه حقا وجالست أناس لا أعرفهم ولكننى خرجت وهذا إنجاز كبير
ولكنه أفضل من أنزل إلى الكافيه و (( أقعد مع شلة كلهم .. يا .. زى ما عملت قبل كدا ))

-مشيت

فى ناس كتير أوى فاهمة موضوع المشى دا غلط
أنا بالذات شايف أن المشى اللى انا بمشيه بيعمل نوع من السلام الروحى بينى وبين نفسى
أثناء المشى دا عقلى يفكر ولا يهدأ ( فى البداية )
ثم بعد ذلك تنكشف الحلول وتجد أنك أمامها من اللحظة الأولى
ثم بعد ذلك تفكر فى أن تصل
وخاصة إذا مشيت بجوار النيل
أشعر بسلاما نفسيا يجرى داخلى بسبب هواء النيل
وأصبح قادرا على حل كل المشاكل التى يمكن أن أفكر فيها
يمكن أن أعدل من أى وضع
يمكن أن أصنع المستحيل فى أى مشكلة تطرأ على بالى
ربما لو قابلت أينشتين لأقنعته بخطأ نظريته النسبية
ولو قابلت جيفارا لجعلته يعلن فى مؤتمر صحفى المبدأ المصرى الشهير (( إبعد عن القضايا لا تتبهدل يا ضنايه ))
ربما أفلح حتى فى إقناع نفسى بما أريد
تنشأ لدى قوى رهيبة أثناء المشى
البعض يفضل اليوجا والبعض يفضل الشعر والرسم وأنا أفضل المشى
كان لى صديق مقرب جدا يجرى المسافة المذكورة وحتى منزله
دعك من أنه كان يصل فاقدا للوعى :D ولكنه كان يصل راضيا عن نفسه سعيدا بما حققه من إنجاز
وينام كثيرا حتى لا ندرى هل مات أم أنها مجرد غيبوبة
وهنا يمكننا إعلان ملاحظة هامة جدا
ولكن لا يمكن تحليل ما يسعد الإنسان وكيف يسعده
فقط " المشى يسعدنى " وبدون مقدمات أو نهايات غير مبررة
للأسف المشى كان عادة محببه لدى جدا وأقلعت عنها لأننى مش فاضى
ولكن لا تقلقى يا حبيبتى فغدا نسير معا :)

"سأظل أمشي رغم ذلك، عازفاً قيثارتي،
مترنماً بغنائي أمشي بروحٍ حالِمٍ،
متوهج في ظلمة الآلام والأدواءِ
النورُ في قلبي وبين جوانحي
فعَلامَ أخشى السيرَ في الظلماءِ!"

*أبو القاسم الشابى*


-حزنت
جاءك الحزن وسكن روحك يوما
الحمد لله أنه لم يأخذها ويطير بعيدا
الحزن عندى ألوانا وأشكالا
فالحزن عند الناس يقتلهم
يسود حياتهم
يجعلها لا تطاق
أما أنا ومن منبرى هذا أقول بأن الحزن يجعلنا نرى الأمور بوضوح أكبر
لا ذنب للحزن أن بعض الناس عندما تحزن تفقد المنطق وتفكر بسوداويه مطلقه
العيب ليس فى الحزن ولكن فيمن يحزنون

" إنِّي أنا الناي الذي لا تنتهي أنغامه، ما دام في الأحياءِ
وأنا الخِضمّ الرحب، ليس تزيده
إلاّ حياة سطوةُ الأنواءِ "
*أبو القاسم الشابى*


-فكرت


ذكرت من قبل أننى أفكر كثيرا أثناء المشى (( فى بداية الطريق فقط وحتى تهدأ روحى وأحصل على السلام النفسى المطلوب ))
فكرت فى أمور عدة
لو كتبتها هنا لأستغرقنا شهرا فى الكتابة وعامين فى القراءة
ولكن دعنا نتحدث عنها مرة أخرى

-مازلت أنتظر
لعل لقاءنا الآن يفرقنا
يهدم حبنا
تحطمه الظروف والأيام
لست قلقا من تأخرك
ولست قلقا من وحدتى
فيوما ما سنلتقى
ونذوب معا

سأظل أحبك وإن طال إنتظارى *** فإن لم تكونى قدرى فقد كنتى إختيارى
** شاعر مجهول **

- بكلم نفسى !!!
ماذا سيحدث إذا تحدثت إلى نفسى
وسألتها ما يرضيها ؟؟
وعنفتها ..
وخاصمتها..
وعاقبتها ..
وتصالحنا :)
وراضيتها .
هذا أرحم بكثير من التحدث مع الآخرين

- تأكدت من أنا
تأكدت من أن بعض عاداتى ومبادئى القديمة التى أقنعت نفسى بزوالها
مازالت متواجدة
لازلت خجولا لا أبدأ أبدا التعارف الأول بفتاة كما حدث اليوم .
لازلت صبورا قد أصبر ألف عام أو أربع ساعات لا طائل منها فى سماع كلام دعنا لا نقول أنه كله فاصى
لازلت هادئا فقد تضطرب بداخلى الأعاصير وتقع الجبال ولا يظهر على وجهى الكثير
لازلت قويا قد أتحمل أى مصيبة حتى وإن كانت فى الخصام وأتحمل ما هوا أكثر
لازلت نفسى
-لازلت أتمتع ببعض السحر بالرغم من الذقن والمنظر الذى أخرج به :P
اللى بحس فيه انى بالقبح مش عارف بيعجب الناس إزاى :$
يمكن القبح بتاعى حاجة كويسة :D
وأنا اللى مش مقدر الموهبة العظيمة دى :) أمال لو شافونى وأنا مبسوط ورايق وشافوا العادى بتاعى بقى :)



ونختتم بقول أبو القاسم الشابى :
إن المعاول لا تهد مناكبى *** والنار لا تأتى على أعضائى
أنا من الناس اللى لما بتقع الكل بيفتكر إنها النهاية
ولكن بقوم وبكمل تانى والكل بيعرف من تانى إنها بدايه جديدة
وإنه فجر جديد وستشرق الشمس من جديد وسنرتاح فى دفء آشعة القمر مجددا
إلى هنا ينتهى الكلام
تحياتى
الفقرى الكبير
----
ملحوظة : رديت عالبوست الاخير واللى قبله :)

هناك 82 تعليقًا:

نعكشة يقول...

أثناء المشى دا عقلى يفكر ولا يهدأ ( فى البداية )
ثم بعد ذلك تنكشف الحلول وتجد أنك أمامها من اللحظة الأولى


بس انا بمشى لوحدي كمان بكلم نفسى
ويعدين بغني
وبعدين بصرخ
وبعدين ببقى هادية و مبسوطة
وبعدين بجري و بحب فى الشجر و الحاجات اللى حواليا ديه

وبعدين ببقى خلاص وصلت للى انا عاوزاة من المشى

و ابدأ اس إن رجلى بتوجعنى وانى نفسى البيت يقرب بقة
مع انى ببقى مشيت بالهبل و بتعب فى اخر كام خطوة قبل ما اطلع بيتنا

.............
على فكرة الدقن ساعات بتبقى حلوة حتى لو منعكشة و شعثاء
وساعات بيبقى منظرها شبة بتوع الجن بس حلوة
سيبك انت
...........

الصبر دة شئ ملغى من عندي خالص
نفسى اتعلمة بجد
هوه انا تقريبا بتعلمه تدريجيا لا اراديا عن طريق الكلية و بلاويها بس عامة
.........
:إن المعاول لا تهد مناكبى *** والنار لا تأتى على أعضائى


انا نفسى اعرف اقول كدة على نفسى
تى لو بالكذب

خصوصا بقة لو حضرتك قريت للمتنبي
يخربيت الثقة بالنفس اللى عنده

عامة

انا بقع بالهبل برضو زى النملة
بس بكتئب شوية و بعدين اقوم

يلا ربنا يقويك

إلا صحيح عندي سؤال معوق

هوه انت كنت محبوس فى قمقم ولا اية؟؟؟

سلام عليك

شاب فقرى يقول...

انا امبارح كنت ماشى بكلم نفسى اولا
وكنت ماشى بلعب مع الشجر واضحك للنيل محاول انى اريح اعصابى
وكنت بغنى

نفس الحالة اللى وصفتيها بالظبط

بس انا لازم اكمل لاخر خطوة

مينفعش اقف مهما قربت ومهما كان من السهل انى اخد مواصلة

انا بحب اوصل للاخر فعلا

صحيح امبارح روحت البيت مكنتش قادر امسك اعصابى وكنت تعبان ومسقط ونمت وتعبت اوى

بس صحيت رايق ومفوق اوى

*****
والله انا الدقن اللى بتكلم عليها مش عارف اوصفها بس هبقى احكى الموقف اللى حصلى المرة الجايه

*****
الكلية بتاعتك دى تودى ورا الشمس والله من المجهود والتعب اللى فيها

حاجة بجد تجنن

ربنا يكون فى عونك :)

واتعلمى الصبر عالناس
هقولك طريقة
انك تتخيلى انك مكان اللى قدامك
هتبقى عايزة الناس تكلمك ازاى
وساعتها اتكلمى :)
هتلاقى كلامك مع الناس بقى حلو ومش عصبى وبقيتى صبورة اوى
الصبر بييجى من التأمل والتفكير الكتير
*****
قريت للمتنبى زمان
ايام ما كنت بحب الشعر ومهتم بيه
بجد كان بيبهرنى
ثقة بلا حدود
وبحب ابو القاسم الشابى لانه برغم رقة اشعاره يحسس القارىء بقوته فى نفس الوقت كشخصية فى وجه الظروف

*****
هوا لازم الواحد يفوق من وقعاته باسرع ما يمكن عشان يقدر يكمل فى حياته :)
وعشان محدش يشمت فيه وعشان الناس اللى بيحبوه ثقتهم فيه مش تتهز
ففلازم تقف بعد ما تقع على طول

وبعد كدا اما تبقى لوحدك او براحتك تقدر تعمل اى حاجة اى حاجة

:)

بالنسبة للسؤال اللى مش معوق وليكى حق تسألى
:

انا مكنتش محبوس فى قمقم بس المشكلة انى شغال فى النت ففى البيت ليل ونهار ومش بخرج الا للضرورة:)

تحياتى لمرورك االمنعكش :)

شاب فقرى

دموع القمر يقول...

وسسسسسسسسسسسسسعععععععع

اخصصص

اتحسدت

بس مش مشكلة

انا التاااااانى يلا

دموع القمر يقول...

بقولك ايه مابراحة علينا شوية

الواحد مبيلحقش يستريح من

البوست يلاقى التانى

دا انتحااااااار هههه

دموع القمر يقول...

صباااااااح حير طير

من مدونة دمووع لشاب نو فقرى

عندك حق بكلم نفسى
(ياخرابى انت اتجننت ولا ايه )

مش بقول حلتك صعبة

اروح اقرأ وارجع

دموع القمر يقول...

علفكرة اما ارجع هاخد الماايك

لو سمحت

ياجايب الهدية وعينك فيها

يقولى المايل دا هدية

ويرجع ياخدوا فى اول زنقة هههه

فشكووول يقول...

السلام عليكم يا فقرى

والله انا خايف اكون فقرى عشان انت بتعمل نفس الحاجات اللى بعملها.. بس انا المشى عندى عاده ومش بحب اقعد على الكافيهات خالص

اصل هواء النيل بسنفر المخ ويخليه يفكر كويس

قلت كتير وسرحت كتير وبعدين لقيتك بتمشى عشان تفكر فيها ... مش هى دى عقدة البوست

لا انت راضى ولا انت رافض

خد بالك

-مازلت أنتظر
لعل لقاءنا الآن يفرقنا
يهدم حبنا
تحطمه الظروف والأيام
لست قلقا من تأخرك
ولست قلقا من وحدتى
فيوما ما سنلتقى
ونذوب معا

لعل اللقاء الآن يفرقكم

كيف وتتمنى ان تذوبا معا

شوف بقى شعور المتناقضات جوا الانسان ..هو دايما مش عارف عايز ايه .. عايز التفرقه ولا عايز الزوبان.. هكذا حديث العقل احيانا يسير مره يمينا واخرى يسارا حتى يرسو على بر

ميرام يقول...

(:
أبدأ بابتسامة
هي دي المدونة الي انا أعرفها


(: (: (:
شحنة تفاؤل
(: (: (:

امبارح كنت حاسة انك في مشكلة وده أحبطني نوعا ما
(:

بس كلنا لها
(:
المشي احساس جميل جدااا
بعيدا عن ان الواحد بيبقى لوحده ومش لوحده في نفس الوقت
وبعيدا عن انك بتبعد سيطرة الكآبة الي بتفرضها حالة الانغلاق في البيت
بحس ان كفاية الواحد وهو ماشي يتفرج على الناس والوشوش
هتلاقي ناس سعيدة وناس بتعيط وناس مكتئبة وناس راكزة ومتزنة وناس مجنونة!
(:
الاحساس ده بقى بينسيني أي حاجة
(:
دايما بتخيل ان كل انسان وراه قصة
(: الي بيضحك ده مش عارف مستنيه ايه في بيته
والي بيبكي مش عارف ...


اقتباساتك جميلة (:
وجميل انك في حالة الصفاء دي
وجميل وهناء
(:
وتحيــــاتي

نعكشة يقول...

ماهو انا كدة كدة بكمل و إلأا هنام فى الشارع
بس اقصد انى بعد ما برتاح و بخرج كل افكاري ببدأ احس الباتعب

.............

الصبر عالناس .. انا اصلا مببقاش عارفة الناس مستحملانى ازاي .. يعني انا نفسى الناس تعاملني زما بعاملها
متصبرش عليا يعني
ومتعاملنيش كويس

بس سبحان الله

............
انا بفوق من وقعاتى عشان نفسى
ميهمنيش الناس تشمت فيا
ولا اللي بيحبوني ثقتهم تتهز
لإنى مببقاش عاوزة حد يثق فيا اصلا

........

أها

اوك
الله يوفقك

............

سلام عليك

دموع القمر يقول...

لولولولى

كويس ان جه هذا اليوم السعيد

بس نروح نشوف ايه الا حصل

كويس انك خرجت علشان تطلع نفسك من المود
وكويس انك عارف انك لما تقعد فى كافيه مع عياال .... هيبقى مصيرك ايه

بس ماهو انت برضو ممكن تقعد فى كافيه ولوحدك برضو ولا لازم العيال دول

بس ايه جلست مع اناس لا اعرفهم دى ههه

المشى دا روحى
يمكن مرضاش اركب وامشى بس يكون معايا حد
ونقعد نرغى منحسش بالطريق

واحلى مشى بقى تحت المطرة اصلى عملتها كتييير وانا باكل جيلاتى كمان

صحيح عندك حق
ساعات وانا ماشية اقعد افكر فى الموضوع دا والموضوع دا والاقى حل
واجيب ابعاد الموضوع كلها
وبتفرج والله هه
دا ساعات بيجيلى افكار جهنمية اى والله

وساعات بألف خوااطر وانا ماشية
بس لو معايا ورقة بكتب مش معايا
خلاص بتتبخر ههه

وساعات امشى اكلم نفسى اغنى وساعات لما اكون زعلانة بزعق لنفسى فى سرى واسرح
ومركزش فى الطريق خالص
بس بوصل بعون الله ههه
بس فى مرة والله وقفت فى نص الطريق
وقعدت افتكر هو انا ماشية هنا لييه
وفين لما جمعت بعد مافقت من الغيبوبة اللى كنت فيها هههههههه

طبعا دا غلط على الزلط
وحاالة خطرة
اوعى تكون كدا هههههههه

ربما لو قابلت أينشتين لأقنعته بخطأ نظريته النسبية
ولو قابلت جيفارا لجعلته يعلن فى مؤتمر صحفى المبدأ المصرى الشهير (( إبعد عن القضايا لا تتبهدل يا ضنايه ))
ربما أفلح حتى فى إقناع نفسى بما أريد

يكفى انك مفتنع ونحن ايضا :):):)

اهم حاجة انك تعمل شىء بعد انتهاءه تكون راضى عن نفسك ايا كان هذا الموضوع

ولكن لا تقلقى يا حبيبتى فغدا نسير معا :)

هههههههههههههه

مامعنى سوداوية ؟؟

بس منطقك حلو فى الحزن
انا لما احزن مبكلمش حد
واقعد فى الاوضة اقرأ حاجة او اكتب او اسمع حاجة
وانام واصحى وكأن شىء لم يكن

لكن بقى لو مشكلة
يأما انفض
ياما اقعد احللها وافصصها بس ساعتها دماغى تتفجر من التفكير ههه

حلو اوى كلام ابو القاسم

لست قلقا من تأخرك
كويس انك راضى

بص هو فيه حاجة فى دماغى مهمة وعايزة اقولها بس مش عارفة اعبر عنها هههه

بس هى حاجة شبه كدا

فى واحدة متجوزة بقالها 10 سنين ولسة ربنا مرزقاش بطفل
هى راضية تماما
وبتقول ان ربنا لسه شايفنى مش مؤهلة انى اربى ابنى على الاسلام صح واكون ام مثالية ليه
ويوم مااكون كدا
هيرزقنى

فانت بقى طبقها على نفسك
يعنى انت اكيد فيه حاجات مش مظبطة فى حياتك علشان كدا لسة كقبلتهاش
ويوم ماتتظبط هتقابلها
والحياه هتكون ميت فن واربعتاشر

لالالا
دا انت تتجنن رسمى
نظمى
فهمى
شكرى
ههههههههه
انت اتخيل واسرح زى حلاتى كدا
بس برضو كلم الناس واتعامل معاهم

اناعرفت انت مش قابلتها ليه
هى اكيد بتور عليك
بس انت عامل نيولوك
هى عارفاك من غير الذقن
وكدا
هههه

وإنه فجر جديد وستشرق الشمس من جديد وسنرتاح فى دفء آشعة القمر مجددا


جميييييييييل جدا

تحياتى لك

انا كدا اطمنت عليك يابنى قبل مااموت
:):):)

شاب فقرى يقول...

دموع القمر

التعليق الرابع والخامس والسادس

نقول ايه بس

تعرفى ان نص البوستات اللى بكتبها مش بتطلع للنور ؟؟؟؟

يعنى كدا كمان فى بوستات بتفضل فى الخفاء ومش بتطلع عشان مش وقتها

بالنسبة لموضوع عندك حق بكلم نفسى فدا مش معناه الجنون

دى كلمة فى اغنيه مشهورة وكمان انا فعلا كدا :D

انتى لما بتفكرى بتكلمى نفسك برده

:)

والميك معاكى مفيش مشاكل

انا هتكلم بحاجة تانية

هكمل تعليق على التعليق التانى كمان شوية

شاب فقرى

شاب فقرى يقول...

هتغدى واجى اكمل ردود :)

شاب فقرى يقول...

فشكول


وعليكم السلام

نورتنى زيارتك وبقالنا كتير مش شفناك

اما بالنسبة لحكاية فقرى دى

فمش عارف والله

بس انا فقرى من نوع خاص لا يتكرر عبر الأزمنة كثيرا

حالة خاصة

انا بقعد على كافيه لما اكون فاق وعايز اريح او تعبان وعايز اريح وبمشى عالنيل لما بكون عايز ارمى له همومى يحلها

تصدق والله يا فشكول هى اقل حاجة فكرت فيها امبارح

لان عندى مشاكل اكبر منها بكتير

وبعدين مفيش تناقض ولا حاجة

انا محتاجها فعلا بس لو جاتلى دلوقتى هنفترق ودى حاجة انا واثق منها

الظروف بتعاندنى كتير

شرفتنى بتعليقك

:)

شاب فقرى

شاب فقرى يقول...

ميرام

:)

زى ما قلت لك

لازم الحزن يمر علينا

مينفعش نعيش من غيره هوا ملح الحياة

هوا فعلا كنت فى مشاكل كتير
بس لما روحت ونمت وصحيت مكسر وهادى صليت وحسيت بالراحه

انا بقى مش بتحيل ان كل انسان وراه قصة

لاء انا بحكيها لنفسى كمان :) :)


وكمان انا من الناس اللى بتستمد سعادتها من سعادة الآخرين

يعنى ممكن اجيب هدية للبيت كله عشان اشوف الكل فرحان وبيضحك
او انزل اتمشى واشوف العيال اللى عالكورنيش عشان استمد من فرحتهم وحبهم سعادتى

نجتةت شوية

جميل وهناء

انا بحب ايمن زيدان على فكرة وبحب المسلسل دا
بس بقاله كتير مجاش :$

نورتى يا ميرام :)

تحياتى لتواجدك

شاب فقرى

دموع القمر يقول...

ياااويلكم ياويلكم

ياااااامين وييييلكم

ازيكم ازيكم انا جاية
اقعد شوية عندكم

على الزراعية يارب اقابل حبيبى

شاب فقرى يقول...

نعكشة

ولكم ولكم ولكم ولكم ولكم :)


ما هوا المشكلة انى وانا ماشى امبارح كنت عايز انام بس معرفتش

الناس تعاملك زى ما بتعامليها
يا ساتر

ليه بس كدا

خليهم مستمرين عالحال اللى هما فيه ناو :)

انا الناس اللى بحبهم وبيعتمدوا عليه اهم عندى من نفسى عشان كدا بفوق قبل ما يحسوا ان رمز القوة بتاعهم فى حالة ضعف

:)

اكيد فهمتى قصدى

نورتى المدونة

تحياتى
شاب فقرى

شاب فقرى يقول...

دموع القمر

انتى عماله تكتبى فى بوستات رومانسية

وجايه تقولى عالزراعية يارب اقابل حبيبى

يا ترى مالك ؟؟؟

هرد عالتعليق بتاعك حالا

دموع القمر يقول...

من نفسى

ايه الحقد دا

اصلى شايفة الدنيا كلها كإبة كدا

فالواحد بيفرفش عن نفسوا شوية

ههههههههه

ميرام يقول...

لاء انا بحكيها لنفسى كمان :) :)


أنأ كماااااان (: (:
بس مارضيتش اقول من باب الاختصار (:



انا بحب ايمن زيدان على فكرة وبحب المسلسل دا
بس بقاله كتير مجاش :$

بجدددد
(:
هو قديم فعلا .. كنت بعشق المسلسل ده
(: (:



(: (:
تحيـــاتي مجددا

دموع القمر يقول...

ههههه

هو الموضوع عويص للدرجة دى

يخرب عقل الكفرة يابت

بطلى رغى بقى
بس حلو انك تفصص الموضوع وتكتب بوضو تعليقك

وتعمل يوست لوحدك كدا فى التعليق هههههههههه

شاب فقرى يقول...

دموع القمر
ههههههههههههههههههههههههههههههههه

انا اما قعدت فى كافية واتعرفت على راجل معرفوش اتعرفت على واحد عنده بتاع 65 سنة :)

اتعرفنا على بعض واتكلمنا كتير وراجل محترم وبجد استفدت منه كتير اوى

وكمان والله انا مليش صحاب جمبى خالص

اقرب صاحب ليه موجود فى طنطا

يعنى مشوار فحت

فى ندوة ومحاضرة معرفش انا مين اللى جمبى

انا بكتب الخواطر اللى بتيجى على بالى وانا ماشى لانى ببساطة دايما شايل ورقة وقلم معايه

هههههههههههههههههههههههه

يا ستار يارب

بعد كل المشى دا ونسيتى انتى ماشيه هنا ليه وانتى فين ؟؟

لاء انا تركيزى عالى جدا جدا جدا متخافيش عليه

انا ممكن اقنعك بالشىء ونقيضه فى نفس الوقت لو عايز
وبالذات بعد ما امشى بيكون تفكيرى عالى ورايق كدا

سوداويه يعنى كلها سواد وقاتمة

ما انا بقول زيها

يمكن لو جاتلى النعمة مقدرش احافظ عليها

تصدقى ممكن تكون عارفانى من غير الدقن

بس برده هحلق الخميس الجاى :P

يا ساتر يارب

تموتى ايه بس السواد دا :P

نورتينى

ونورتى المدونة

تحياتى

شاب فقرى

دموع القمر يقول...

انا بوستاتى كلها دراما

واذهب ولا تعد

وانتهى زمانك

وطرتك من قلبى

والكلام داهههه

بس انا قولت لازمن بعد البوست الكئيب اللى حطيتوا

نحط حاجة فرفشة كدا
وخليناه فوق النجة يانفيسة نغنى ونرقص
بدل تحت الشجرة ياوهيبة

ههههههههههه

دموع القمر يقول...

ههههههه

شكلك كدا هتقووووووولى

برااااااااااا

انا خلاص همشى بس اقرأ بس الرد واجى تانى هههههه

شاب فقرى يقول...

ميرام

انا ممكن ءألف ألف رواية وانا ماشى

بس بزهق من الكتابةاالكتير

ودا طبعا ملحوظ فى مدونتى البوستات صغيرة :P

انا والله بحب المسلسل دا

بس اللى بينقطنى فيه

الست ام محمود جارتهم :D
مش عارف مكانوش بيحبوها ليه

مع انها لما خدت فلوس مرمطتهم كويس
وخبتها عنهم واتسرقت :)

وكان بيعجبنى شخصية فى المسلسل دا بتحب تركب التاكس ومتدفعش

اكيد ام محمود برده :))

تحياتى لتواجدك

شاب فقرى
:)

شاب فقرى يقول...

دموع القمر

انا على طول بكتب بوست فى كل تعليق
وبفصص البوست وبستفيد من تجارب الاخرين

بس عشان تستفيدى صح من تجربتى مش تمشى من الجيزة للبيت

لانى جسمى مكسر من امبارح ومش قادر اتحرك

وبعدين انا لازمن أخليكى تعترفى :)


مساء الخير

لاء قلق ولا حاجة

انا قايم اسافر ناو

تحياتى :)

وحتما سأعود وأكمل عالردود

البيت بيتك

ردى براحتك

شاب فقرى

سلمى يقول...

تعرف حسيت وانا بقرأ البوست بتاعك انى بقرأ قصه ما وراء الطبيعه والله والله حسيت انك رفعت اسماعيل بطل القصص دى
بجد مدونتك تحفه وان شاء الله حتابعها على طول

دموع القمر يقول...

65

انت متأكد انه كان متأكد من هويتك

شكله كان فاكره حرمة والله ههههه
علشان كدا قعد يرغى معاك وهو ميعرفكش
(اوعى تفهمنى غلط ) :) :)

بس كويس انك استفدت منه
الناس الكبيرة دى بيبقى ليهم خبرات كتير
انت هتقولى
ستى ربنا يخليهالى
بنرغى سوا لما نزهق من بعض هههههه
بس هى مش بتزهق

اه ماانا خلاص قررت من امبارح انى اشيل ورقة وقلم

لحسن والله الفت وانا فى الميكروباص خاطرتيتن
واحدة فراق
وواحدة حب
والله اكبر الاتنين اتبخروا

هههههههه
اى والله ساعات دماغى بتقف واقعد افتكر هو انا هنا لييه هههه

ايوا كدا
وان شاء الله الخميس اللى بعدوا
خطوبتك

الف مبروووووك

لووووووولووووووولىىىى
عقبال عندك يياام فاروق
لما تجوزى فاروق

وانت ياام هيثم
لما تجوزى ابتسام
وتفرحى بعيال هيثم

ههههههههه

Isolde يقول...

مش قلتلك هتصحي من النوم فريش... حمد الله عالسلامة :)

بس عموما انا معاك قلبا و قالبا ف ان الحزن بيخلينا نشوف الامور اوضح و انه مالوش دعوة خالص باللي البني آدمين بيوصفوه بيه... حبيت مدونتك يا فقري، اعمل ايه انا دلوقتي؟!

دموع القمر يقول...
أزال المؤلف هذا التعليق.
دموع القمر يقول...

شكلك عايز تنتقم منى
من الجيزة للبيت هههههه

اللى هو فى الشرقيه ههه

انا مشيت مرة من الجيزة لفيصل
ورجعت تانى

بس كانت لذيذة


لا والله لا اعتراف ولا حاجة

وربنا انا نفسى احب واتحب

بس ازاى وانا اصلا مبثقش فى اى حد يقول بحبك
بحس انها كلمة والسلام

ولو اتكلمت بقى الكلام كتير وهتقول البت دى يااما مجنونة يااما مجنونة
هههههه
زى مااصحابى بيطلقوا عليا

فتاه من الصعيد يقول...

يعجبني الصمود امام الشدائد

والصفاء النفسي والتصالح مع النفس دوما


ربنا يزيدك :)

تحياتي

موناليزا يقول...

من امتع الرحلات التى ممكن ان يقضيها الانسان رحلته بداخل ذاته
ولهذا اقول حمدالله على السلامة وعقبال كل مرة:)

على فكرة أحييك جدا على ممارستك للمشى فهى رياضة صحية مفيدة فعلا للعقل وللجسم معا

الشعب لابد له من حكومه تشكمه يقول...

الحمد لله انك كويس:)
مش ليا مزاج ارغى انهاردا:)

ليس فقيرا من يحب يقول...

السلام عليكم

يعنى مبدأيا كده باعتذر اعتذار كبير

عن التأخير والتقصير كمان لظروف غير

قهريه

اسألنى انا عن المشى اروع جاجه ممكن

الواحد يعملهاوخصوصا بقى لو ماشيه
من غير هدف ومش رايحه مكان معين ممكن افضل ماشيه ساعتين تلاته من غير هدف وبعدين طول ما ماشيه بكلم نفسى بس فى سرى طبعا دايما وانا ماشيه باتخيل حد ماشى معايا وقاعده احكى معاه او اقعد اغنى كتير وممكن كمان فى حاله لو شارع هادى كده اجرى شويه واكتر حاجه بحبها انى اكل وانا ماشيه
فى حجات كده ممكن الناس تشوفها عبيطه لكنها بتسعد الواحد بشكل غير عادى
بس المشكله انى فى خلال المشى ده عمرى ما فكرت فى حاجه مفيده ولا حليت مشكله
دايما افكر فى اى حاجه هايفه ههههههههههههههههههههههههههههههههههه

الحزن عمره مورانى المشكله بوضوح دايما لما ابقى حزينه اروح ابكى فى المرايه او اطلع على السطح فى عز الليل اناجى ربنا وببقى مستمتعه باحساس الحزن لدرجه العباطه بحس لو الحياه مشيت سلسه وبسيطه كانت هتبقى غبيه قوى وباحس اكتر ان الحزن ده بيصحى الانسان الرقيق الحالم الساكن جوانا وبيزودنا بقوة كده غير عاديه

بكره الصبر بشده مبحبش اصبر ابدا
طبعا دا لايدخل ضمن الرضا والصبر على ابتلاء ربنا لكن محبش اصبر على بعد حد عزيز عليا مبحبش اصبر على جوع مبحبش اصبر على نتيجه بيخنقنى الصبر

(عندك حق بكلم نفسى) صح كده

الجزء ده روعه جدا

-مازلت أنتظر
لعل لقاءنا الآن يفرقنا
يهدم حبنا
تحطمه الظروف والأيام
لست قلقا من تأخرك
ولست قلقا من وحدتى
فيوما ما سنلتقى
ونذوب معا
لازلت نفسى -لازلت أتمتع ببعض السحر بالرغم من الذقن والمنظر الذى أخرج به (وش مغرور )

هههههههههههههههههههههههههههههه

ربنا يسعدك دايما يارب وتفضل النظرة اللى لا تخلو من الامل والتفاؤل دى نظرتك للامور

يلا بلاش رغى كتير

فى حفظ الله

Saso يقول...

اخص عليا مليون خصايه
انا بنت تيت خالص عشان اتاخرت بس وربنا دا سببه ان الكهربا كانت قاطعه .
ماهو احنا ارياف بقى ربنا مايوريك .
عموما حبيت اضم صوتى لصوتك ونصوت سوا سوا واقولك انى برتاح كتير لما بمشى وذهنى بيصفى اوى وبوصل لحلول للى انا فيه .
وبما اننى فى الارياف فلازم عشان اخرج يكون فيه ضروره لذلك وليس فقط لمجرد المشى وهذا ياعموناااااااا مايزعجنى من العيش فى الارياف
تحياتى يافقرى بيه

العيسوى الصغير يقول...

طيب انا مش من القاهر فمفيش نيل هو فى حاجة بالنسنة للنيل تبقى ترعة وبالنسبة للترعة تبقى بحر

بس للاسف كلها زبالة اعمل ايه دلوقت بقا بصراحة انا بحسد اهل اسكندرية عندهم بحر مش نيل حتى زى القاهرة ولا فرع صغير زينا

غير معرف يقول...

ahmedsas98@yahoo يقول
والله انا خايف اكون فقرى عشان انت بتعمل نفس الحاجات اللى بعملها.. بس انا المشى عندى عاده ومش بحب اقعد على الكافيهات خالص

اصل هواء النيل بسنفر المخ ويخليه يفكر كويس

محـــتــــــــــــــارة يقول...

يا بختك

نفسي اقدر اعمل كده :(

بجد بلوجك عجبني جداااااااااا

ربنا يسعدك :)

'' حطام (ك) بقايا '' يقول...

يااااااااااااه
ده انتوا في نعمة خاااالص
يا بختكم يا بختكم

انا مبحسدش بس بقر
(اموشن بيغمز)
اسلوبك في الحكي عجبني اوي
بيشد من اول شطر
تحياتي

***.سماء.*** يقول...

اية البوست مش قادرة المة

ههههههه


بس بجد حلو

حزنت

جاءك الحزن وسكن روحك يوما
الحمد لله أنه لم يأخذها ويطير بعيدا
الحزن عندى ألوانا وأشكالا
فالحزن عند الناس يقتلهم
يسود حياتهم
يجعلها لا تطاق
أما أنا ومن منبرى هذا أقول بأن الحزن يجعلنا نرى الأمور بوضوح أكبر
لا ذنب للحزن أن بعض الناس عندما تحزن تفقد المنطق وتفكر بسوداويه مطلقه
العيب ليس فى الحزن ولكن فيمن يحزنون

عجبنى اوى الجزء دة

واحنا بأيدينا نخلى احزانا تسيطر علينا فمنشوفوش غير الجوانب السلبية او تخلينا نفكر بأيجابيا أكتر وذى ما انت قولت العيب مش فى الحزن ولكن فيمن يحزنون

وبجد رياضة المشى احلى حاجة

ربنا يديم عليك الاوقات السعيدة

دمت بكل ود

بسنت يقول...

(دا عقلى يفكر ولا يهدأ ( فى البداية )
ثم بعد ذلك تنكشف الحلول وتجد أنك أمامها من اللحظة الأولى
ثم بعد ذلك تفكر فى أن تصل
وخاصة إذا مشيت بجوار النيل)

برافو عليك كدا تأكدت انك بتفهم معنى النيل صح

--------------------------------
(أما أنا ومن منبرى هذا أقول بأن الحزن يجعلنا نرى الأمور بوضوح أكبر )

دى كمان صح جدا بس مش الكل يفعل معاه الحزن التأثير الصح دا فقط الى بيفكر فى نفسه ويحاول يتخطى احزانها

--------------------------
بالنسبه للكلام مع نفسك

دا صيانه لنفسك لان من لا يحفظ سره لا يحفظه الاخرين
واحيانا كتيره بيكون الكلام معهم اهدار للوقت نفسه

-----------------------
الشاب المكافح
الى الامام

آيوشة يقول...

البوست ده حلو جدا وقال حاجات كتير بحسها تقريبا كده اغلبه بيحصل معايا بس بخلاف الجزء الاخير هههههههههه
بحب المشى جداااا ولكل مااجى اخرج اصحابى يقضوها مواصلات طبعا دمى بيتحرق لانى بحب المشى وخصوصا جنب النيل وبحب اشوف وشوش الناس عاملة ازاى

البكاء بالنسبة ليا مطهر للنفس وبقالى فترة مبكتش وبحس ان ربنا غضبان عليا لما اقعد فترة مش بعيط تقريبا بحس ان الاحساس جوايا مات طول الفترة اللى الدموع هاربة منى



بكلم نفسى كتيييييييييييير جدا وساعات ممكن الناس تفكرنى مجنونة لانى بسرح كتير ومش عارفين انى بكلم نفسى



بوست حلووووووووو جداااااااااا

شاب فقرى يقول...

سلمى

شىء يشرفنى وصفك كتاباتى بأنها فيها من كتابات الدكتور أحمد خالد توفيق

تعليقك أسعدنى

وشكرا لمتابعتك :)

تحياتى :)

شاب فقرى

شاب فقرى يقول...

دموع القمر

أنا هعملك أبونيه هنا فى التعليقات فى المدونة

الراجل اللى كلمته طلع عارفنى وعارف العيلة وعيلة العيلة

الله يكرمه فعلا أفادنى كتير

بالنسبة للخواطر الميكروباصيه فهى مهمة جدا لازم تكتبيها كلها :P
مش بتتعوض

عبود عبود عبود
بنها بنها بنها
قليوب قليوب قليوب :$

بتبقى من وحى الواقع
:P

هههههههههههههههههه

شكرا لمواساتك المستمرة لشاب فقرى

بتنورى المدونة

تحياتى

شاب فقرى

شاب فقرى يقول...

isolde

حبيتى المدونة

يبقى تدفعى عشرين جنيه وتعملى أبونيه يومى :P فى المدونة قراءة وتعليقات فقط :D

:) :) :)

تابعينا بقى :P

تحياتى وإحترامى

شاب فقرى

شاب فقرى يقول...

دموع القمر

الحق يقال

لا يمكن الثقة فى كل من ينطق كلمات الحب

:)

وبلاش مجنونة دى لان الناس بتفهمها غلط

كنت بقول على نفسى مجنون بس بطلت

تحياتى

شاب فقرى

شاب فقرى يقول...

فتاة من الصعيد

المواقف الصعبة تصنع الرجال :)

وعشان كدا أهل الصعيد أجدع ناس:)

تحياتى لتواجدك

شاب فقرى

شاب فقرى يقول...

موناليزا

انا مشيت مسافة جبارة

دى مش تعتبر رياضة بل تعتبر انتحار :)

نورتى المدونة واتمنى تتابعينا

تحياتى

شاب فقرى

شاب فقرى يقول...

الشعب لابد له من حكومة تشكمه

شيما

صباح الفل :)


هنستنى الرغى بتاع المرة الجايه ولا يهمك :)

متقوليش رغى لأن مهما كان الرأى طويل أو مش مفهوم فبيفيد لأقصى درجة

تحياتى ليكى

شاب فقرى

شاب فقرى يقول...

ليس فقيرا من يحب

أهلااااااااااااااااااا

فينك من زمن مش بتطلى عالمدونة

حمدا لله عالسلامة :)

المرة دى كنت عارف انا رايح فين بس فى الاول مكنتش عارف امشى ازاى بس بعد كدا عرفت :)


احيانا بحب امشى فى اماكن معرفهاش
بس مش بلاقى اماكن يتمشى فيها

عشان كدا بضطر اسافر اى مكان بعيد او بلد تانية

الحزن والنكد هما ملح الحياة

:)

انا كان عندى سطح زمان وكنت بطلع ابص للسما واعمل زيك كدا بس خلاص

بقيت فى بيت مينفعش فيه اطلع السطح :((

انا بكره الصبر بس مقداميش غيره فى حاجات كتير اوى فى حياتى مينفعش اقتحمها فجاة كدا

:)

اعجبنى ان كتاباتى اعجبتك

دعواتك بجد محتاج حد يدعى لى :)

ولا رغى ولا حاجة

رأيك يهمنا

شاب فقرى :)

شاب فقرى يقول...

saso

انا اهل والدى من الارياف

وعلى فكرة الكهربا هنا فى القاهرة بتقطع برده

والفترة اللى فاتت قطعت مرتين وطلعت عينى بضمير :)

انا بحب اروح الريف أووووووووى

أسافر البلد أو عند خالتى أو فى أى مكان بعيد

بجد يا بختك :)

تحياتى

شاب فقرى

شاب فقرى يقول...

العيسوى الصغير

صراحة أى مكان تمشى فيه حتى لو فى ترعة فى مكان مجهول يبقى راحه

لان المهم هوا المشى وصفاء البال مش المنظر الرهيب الخرافة

انا مش حكيت عن الشارع اللى بحب امشى فيه

الشارع مسافته كلها اتنين كيلو والكلاب بتخاف تمشى فيه ومفهوش صريخ ابن يومين بس بحب امشى هناك

وقول يارب وربنا معانا كلنا

تحياتى

شاب فقرى

شاب فقرى يقول...

الغير معرف


تحياتى لتواجدك

شاب فقرى

شاب فقرى يقول...

محتارة

شرفنى رأيك فى البلوج

صدقينى المسافة اللى كنت بمشيها مينفعش حد يحسدنى ويقول يا بختك

تحياتى لتواجدك
:)

شاب فقرى

شاب فقرى يقول...

'' حطام (ك) بقايا ''

إحسدى براحتك ولا يهمك

هنا التصفح كله

المكان هنا مصفح ومينفعش معاه اى حاجة

:)

نورتي المدونة

شاب فقرى

شاب فقرى يقول...

البوست كان قصير جدا بالنسبة لقبل كدا

بجد نورتينى وشرفنى رايك فى المدونة

اللهم دم علينا وعليكى الاوقات السعيدة :)

تحياتى

شاب فقرى

شاب فقرى يقول...

بسنت

النيل أكتر حاجة بحبها فى مصر

بس بحب مصر أكتر منه

بفهمه اكتر من أى حاجة فيها

وكمان بحب اشكى له وامشى جمبه كدا فى صمت وساعات انزل احط رجليه فيه إن شاء الله ييجى لى بلهارسيا نو بروبلم

بسنت

أولا وأخيرا

شكرا لتواجدك وللتعليق

شاب فقرى

شاب فقرى يقول...

آيوشة

عشان أريح نفسى مش بخرج مع حد

وبخرج لوحدى
وبتحصل مصايب بالهبل

بس ببقى راضى لانى لوحدى

الحمد لله ان البكا بيطهرنا

بس للاسف مش بعرف ابكى

لو حالتك زى حالة البوست لا يسعنى القول غير ربنا معانا

:)
مش مهم راي الناس المهم ان الواحد يستريح مع نفسه وبس :$
تحياتى

شاب فقرى

غروب يقول...

بجد فلسفه حلوه اوى

عجبنى كلامك

عجبنى انك سعيد انك حزنت

عبرت عن شئ جوايا

ساعات الحزن بكيون مطلوب

يعنى مش لازم تكون الحياه كلها ضحك اكيد هنزهق

وحلو المشي مع التفكير فعلا شئ مش كنت متوقعه حد يتكلم عنه

بجد الموضوع كله جميل

شفـقــة و إحســــان يقول...

ايه يا ابنى كل ده مشى ويوجة وتفكير وحزن ارحمنا شوية وبراحة على نفسك شكلك كده جايب لنفسك وجع القلب والدماف امال ايه فقرى دى
وبعدين خف من المشى شوية لحسن بعد كده مش هتلاقى رجليك
شفقة

شاب فقرى يقول...

غروب

شكرا لمرورك الكريم

لا يوجد شىء فى هذه الحياة لا يحمل بعضا من السحر

حتى الحزن
تحياتى
شاب فقرى

شاب فقرى يقول...

شفقة

والدتى برده قالت لى نفس الكلام

وواحد صاحبى قالى هييجى لك السكر زى واحد صاحبنا فقرى زيك

ربنا يستر

تحياتى لمرورك الكريم

شاب فقرى

Saso يقول...

عاوزه اعرف يابختى فى ايه
اكيد هتقول يابختك انك عايشه فى الرف
صدقنى هو بيعجبك لانك موش من اهله وموش عايش فيه على طول لما بتروح الريف بتروح كفسحه او اجازه تقضيها هناك موش استقرار
من مكانى هنا على الكمبوتر(زى حنين مابتقول)ادعوك لتحيا هنا فى الريف يعنى تستقر هنا موش بس فسحه وبعدها نتقابل واشوف رأيك .
انا موش معنى كدا انى ساخطه او معترضه على حياتى لكن بتكلم على حاجات بكرهها
تحياتى تانى ومستنيينك وعندنا محشى النهارده .
شكلى كدا هااعزم كل المدونين على محشى ولاايه ؟
تقبل الرغى بتاعى اصل انا بعيد عنك بموت فى اللوك لوك لوك

أبــــو ضـــيــاء يقول...

يوم جميل

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

شاب فقرى يقول...

ومين اللى قال انى مش عشت هناك كتير لدرجة انه مبقاش بيعتبر فسحه

انا اهل والدى كلهم من الريف

وعندنا اطيان :D

وعندنا حمار كمان :)

وبنزل البلد وأقطعها لف

ومن يومين كنت عند قرايبى فى بنها فى الريف برده

فى ناس فى طبيعيتها بتميل للهدوء زىى فى حياتى

مهما كان

انتى لو جربتى عيشة المدينة شهرين هتكرهى العيشة واللى عايشنها

وفى مساوىء كتير اوى للمدينة

وانا من احلامى انى اعيش فى الريف

وعارف انى عمرى ما هحقق الحلم دا

بس لو حققت منه ان شاء الله يومين كل شهر ابقى حققته فعلا

وشكرا على عزومة الغدا الرهيبة دى

بس اليومين دول معدتى وجعانى جدا جدا جدا جدا جدا جدا جدا

ومش بعرف اكل كويس ابدااااااااااا

اول ما اخف هقولك :)

تحياتى لمرورك والعزومة الحلوة دى

الفقرى الكبير

شاب فقرى يقول...

أبو ضياء

أكيد رأيك يحترم :)

بس اليوم صدقنى كان صعب جدا

تحياتى لتشريفك للمدونة :)

شاب فقرى

شاب فقرى يقول...

رابطة هويتى اسلامية

تحياتى وان شاء الله نشارك

شاب فقرى

طوبه فضه وطوبه دهب يقول...

انا قريت الموضوعات اللى فاتتنى بجد بكيت عارف ليه لان حلمك هو حلم اى حد قلب ابيض وطاهر نفسه يعيش حياته نفسه يكون نفسه وحلم كل واحد مننا يلاقى نفسه ويلاقى نصه اللى يكمله ويفهمه المهم انه لما يلاقيه يحافظ عليه ويعمل اللى يريحه وما يسبهوش يضيع من اديه ربنا يكرمك وتلاقى اللى تفهمك وفعلا تقدر تكملك

إيناس حليم يقول...

:)) مدونتك لذيذة جدا
عجبتني أبيات الشعر بين كل حالة وحالة..
ملحوظة: الحمد لله انك مقابلتش جيفارا :)

تقبل مروري

Tamer Nabil يقول...

السلام عليكم


احيانا يكون راحة الانسان فى الجلوس مع نفسة حيث الراحة المطلوبة للبحث وقتها عن كل ما يعكر صفوها

مع خالص تحياتى

همســات عــلى ضــوء الــقمر يقول...

نسلم من على الباب

ونقول مساء الفن والثكر

يافقرى يارب تكون بخير

همســات عــلى ضــوء الــقمر يقول...

بالنوسبة للابونية دى شتيمة ولا كلمة حلو ههههههههه اصلى اول مرة اسمعها
اوعى تكون استغليت نقضه ضعفى فى الانجليزى وشتمتنى بالانجليزى :):)


فعلا خواطر الميكروباص لايعلى عليها

بس احنا عندنا

زقازيق زقازيق
فاقوس فاقوس
حسينية حسينية ههههههههه
وهكذا

ponpona يقول...

ازيك با محمد عامل ايه؟

بص انا فعلا عايزه آجي هنا واقرأ بس فعلا ماعنديش وقت
الكليه والمذاكره ساحبين معظم الوقت
عامة يعني وعد مني في اجازه الصيف لاني حتي ماعنديش اجازة نص سنه بس ف الصيف بقي هبقي اجي واقلب المدونه كلها واقعد اقرأ .. أوكيه

الا قولي يا محمد- مش احنا اتفقنا اني هاقولك يا محمد - انا بحب اسم محمد
قولي بقي انت بتشتغل ولا بتدرس؟
يعني لو بتشتغل بتشتغل ايه ولو بتدرس بردو بتدرس ايه؟
انا بادرس طب بشري / جامعة القاهره

طلب اخير بقي
هو انا ينفع ابقي اجي من فتره للتانيه اسلم وامشي هو هيبقي لا عارفه اقرا ولا حتي اسلم

:)

كراكيب يقول...

مشيت وفكرت وزعلت واتكلمت وقعدت وخرجت وروحت بيتكوا الحمد لله علشان تكتب البوست
فل جدا
وده كان برنامج شاب فقري في يوم من ايام ربنا وف الآخر أحب أهديله اغنية
ايديا في جيوبي.. كلمات الشاعر الجامد جدا صلاح جاهين وغناء الكينج محمد منير
وصباح الفل

miro el niro kwanirooo

جمهورية شومبونجو العربية يقول...

السلام عليكم

عزيزى فقرى

المشى دة شى جميل وبل ذات لما تكون على النيل او البحر
على فكرة انا بعمل زيك كدة

بس جرب وخد حد معاك يكون انتيمك مثلا

تشكيلة ويشكيلك
بدل ماتاخد وتدى مع نفسك على طول
ساعات بيكون افيد لما تكون لوحدك
بس الاكيد انك هتكون ملاتاح لو طلعت الى جواك

منور والله

.....
رئيس الجمهورية

شاب فقرى يقول...

طوبة فضة وطوبة دهب

أسعدنى اعجابك بالموضوعات وحزنت جدا لبكائك

المشكلة فى الاحلام كلها انها بتبقى صعبه ومستحيله وبتتعب الواحد على ما يوصل لها
مش عارف دا عيب ولا ميزة فيها
انها بتبقى كدا

بس على كل حال ربنا موجود يوصلنا للى احنا عايزينه

تحياتى لتواجدك :)

شاب فقرى

شاب فقرى يقول...

إيناس حليم

مبروك زيارتك الاولى لمدونتى :)

والله كان نفسى اقابله يمكن كنت اعرف اعقله شوية :D

ههههههههههههه

شكرا لتواجدك

شاب فقرى

شاب فقرى يقول...

تامر نبيل

إحدى متع الحياة هوا اكتشاف النفس البشرية

لانك دوما لن تعرف كل جوانبها ويظل فيها أماكن مظلمة لا يمكن الوصول إليها

والأجمل هوا إكتشاف الذات فهى تعطى الانسان قوة لا حدود لها

تحياتى لمرورك

شاب فقرى

شاب فقرى يقول...

همسات على ضوء القمر

كمان غيرنا اسمنا

ماشى ماشى

الابونية دا اشتراك شهرى او سنوى وبيتدفع له فلوس يعنى بيكون للاتوبيس او الترماى او القطر من محاقظة للتانية :D

معلومة عالماشى كدا

الابونية هنا فى المدونةبقى ب 30 جنيه فى الشهر
وتعاطفك لوحده مش كفايه

:P

شاب فقرى

شاب فقرى يقول...

ponpona

يشرفنى إن الاسم يكون (( محمد ))

:)

ربنا يعينك ويقويكى فى الكلية والجامعة :)

لانى عارف جامعة القاهرة كويس أوى :$

وبإنتظار الصيف طبعا :)

بالنسبة للشغل

انا شغال فى الانترنت

يعنى بعمل مواقع linux system Administrator & security

يعنى مدير سيرفرات لينوكس وهوا نظام تشغيل وكمان شغال فى السيكيورتى سواء للمواقع او السيرفرات

و بدرس الفترة دى كورسات ليها علاقة بمجال عملى

و ليه مجال دراسة تانى خالص غير دا وملوش أى علاقة بيه

يعنى بشتغل وبدرس :)

تنورى فى أى وقت وبدون قرايه كمان :)

بإنتظار زيارتك القادمة :)

شاب فقرى

شاب فقرى يقول...

miro el niro kwanirooo

شكرا للإهداء الجميل جدا

انا كنت بسمع حاجة تانية لمنير وانا ماشى

خايف أوعدك موفيش :$

تحياتى لمرورك ولختم البرنامج الإذاعى خير خاتمه :)

شاب فقرى