الأحد، 4 أكتوبر، 2009

عشق الصمت بين يديك



من أول ما فتحت المدونة وأنا مقرر إنى مش هتكلم عن الحب وأبقى كل شوية أكتب بوست رومانسى
بس الأفكار فى دماغى الفترة دى مركزة فى حاجات لازم أوصل ليها لحل أو أناقش حد فيها أنا فعلا واخد فيها موقف بس عايز أشوف الناس بتعمل إيه وطبعا دا مش هيغير من موقفى ممكن يخلينى أفكر تانى بس مش هغير موقفى نخش فى البوست بعد المقدمات الطويلة دى

***

فى أثناء تفكيرى العميق فى الحياة والحب والناس
شفت جملة جت فى وقتها
الجملة بين واحد وواحدة المفروض انهم كانوا بيحبوا بعض وافترقوا وهوا رايح يكلمها
فقالت له
(( انته جرحتنى لدرجة ان قلبى نسى كل المساعر اللى كانت ليك ))
هل فعلا فى حد ممكن يتجرح والجرح دا ينسيه الحب بالكامل
من وجهة نظرى
ميبقاش حب
لسبب بسيط جدا :
إن اللى بيحب دا بيبيع روحه للى بيحبه وبينتمى فى نفس اللحظة للإنسان دا
يعنى هوا بيتنازل عن كل حاجة
الكبرياء والعناد والغرور والأقنعة والبعد الغير مبرر عن الناس وأى شىء
والمقابل حب صافى من الطرف التانى
حقيقة خالصة من الحب النقى
هل دا فعلا كفاية ؟؟
هل الإنسان فعلا بيكون محتاج لحب حقيقى عشان يتنازل فى المقابل عن كل حاجة عشان خاطره ؟
طيب هل الواحد بيعرف إمتى بيكون دا حب حقيقى ؟؟؟
انا عن نفسى بؤمن بوجود الحب الحقيقى فى الحياة وبؤمن بأن فى ناس بتقدره
مينفعش الواحد يتكلم عن الحب وهوا غير مقتنع بيه
ومينفعش يحكى عن التغييرات اللى بيعملها الحب وميكونش عاشها
ولا يحكى عن الألم اللى من الحب وميكونش شافه بعينه وحسه كويس أوى
والآن مع فاصل بسيط من كلماتى :
(( خواطر أو شعر أو حتى نثر أو حتى مقال ...مطلوب الرأى من الجميع ونقد على كل شكل ولون ))
***
تركتينى ورحلتى
ومازلت بمقعدى الصغير
أبكى مع حلمنا القديم
وأشتاق إليكى من جديد
أنا وروحى بالتحديد
نجلس مع طيفك الرقيق
لا نحكى إلا عنك
ونتساؤل فى صمت
هل أنتى الحقيقة ؟
لعلك أنتى المستحيل ؟
وبلا إجابات
أقرر فى هذا اليوم
إنكى ستكوني حياتى
سيدتى ومولاتى
عمرى القادم
من يعلمنى إطفاء شموع وحدتى
ينتشلنى من غربتى
مع ذاتى
من يودع معى آهاتى
يجعلنى أشتاق
أنا اليوم يا مولاتى
لا أتطلع إلى المستحيل
أرجو من الدنيا لقياك
أهفو إلى تلك الكلمات
أشتاق لهذى النظرات
تسألنى بشغف الدنيا
من أنت يا حبيبى ؟؟
***
نكمل بهدوء
البوست طويل (( إعمل شاى وتعالى كمل ))
ننتقل لنقطة تانية هى الإقتناع
سواء الإقتناع بالحب أو بالطرف الآخر
يعنى إيه ؟
يعنى فى ناس كتير جدا مش مقتنعين بالحب لأنهم مش فاهمينه بمعنى أصح
أو مش قادرين يحسوه بالرغم من وجوده فى حياتهم
دا بيكون مثلا لقوة الشخصية أو للشك فى كل اللى حوالين الواحد طبعا بخلاف أهله
يعنى مثلا شاب شخصيته قوية جدا
ورافض بقى يشوف أى حاجة جمبه أو حواليه
مهما جابوله من بنات بيرفض
بيقول مستنى النصيب
والنصيب فين ... راح يجيب ورقة بوسطة زى أمينه بالظبط
وهيرجع لما الواحد يعدى التلاتين
أو مثلا تلاقى واحدة عندها كبرياء
كبرياءها دا بيمنعها من الإعتراف بالحب
أو حتى الإحساس بالمشاعر دى من أى حد
مهما الحد دا حاول يقرب
ودى فى حد ذاتها مشكلة
أنا شفت كدا قبل كدا
وشفته الفترة دى
ودى فى حد ذاتها كارثة رهيبة
والمشكلة إن الشخصيتين المذكورين دول
ممكن يقروا الكلام اللى أنا كاتبه دا
ويقولك لاء دا مكتوب عالناس الوحشين
دى المشكلة فينا كلنا
إن الواحد ممكن يشوف كلام وحقائق ويقولك لاء
دا أكيد مش أنا :$
دى أكيد واحدة تانية .. دا انا طيبة موت وغلبانة اوى

ونرجع تانى نروح فاصل بس المرة دى للشاعر فاروق جويدة
ومن أجمل ما كتب بعنوان : وسط الزحام
***
قد نلتقي يوما هنا رغم الزحام
و نعود نحمل من عيوني الفجر
خيطا.. من ضياء
و نعيش نحلم.. باللقاء
في كل يوم تلتقي روحانا
ستظل في دنيا الهوى ذكرانا
لو قال كل الناس شعرا
لن يكون.. كشعرنا
لو ذاب كل الناس حبا
لن يحبوا.. مثلنا
***
نخرج من الغرور ونطلع على عدم الإحساس
ياترى إيه اللى بيخلى الناس مش بتؤمن بالحب
هل هوا مثلا عدم اقتناع الشاب بالفتيات ككل
يعنى يقولك فلانه وعلانه بتمثل وبتحور ومن هنا لهناك وبتكلم وبتعرف كتير
مش فاهم برده
بسمع حاجات بصراحة غير مترابطة
وتيجى تشوف البنت اللى مش مقتنعه بالحب
تلاقيها بتقولك حب إيه
الحب دا ملوش أمان
الشباب أو الرجاله بصفة عامه عينيهم زايغة
بشوف دى تعجبه ودى تسحره ويفكر هنا وهناك والحياة أخر جمال
ولا كأنه مرتبط
طبعا واحدة زى كدا أكيد صدمت نص شباب مصر لو حاولوا يحبوها والنص التانى لسه مش قابلها
بس صراحة أنا بتعجبنى الشخصية دى
بالرغم من إنها دوما مجنونة
بس الحياة من غير جنون متبقاش حياة
يعنى تعمل اللى انته عايزة بالشكل اللى يناسبك إنته وبس
يعنى ليه أركب لنفسى قيود وأقول إنى أنا لازم أتصرف دايما بطريقة معينه
عشان البرستيج والبتنجان المخلل والحاجات العبيطة دى (( صحيح لكل مقام مقال ..لكن مع اللى بتحبهم لازم تبقى على طبيعتك ... ومش تقولى انا طبيعتى وحيد وتقعد لوحدك وتسيبها هى عالنيل لوحدها ))
دى حياة وأنا اللى هتحاسب عليها مش حد تانى وبعدين مش بتعمل حاجة غلط
(( عارف إننا خرجنا عن الموضوع ))
نرجع لموضوعنا
الشخصية اللى مش بتؤمن بالحب دى من وجهة نظرى قد تكون مؤمنة بأى شىء مضاد للحب
يعنى المادية والواقعيه (( بالرغم إن الحاجات دى مش عكس الحب ))
وفى مشكلة تانية وهى الواقعية الزيادة عن اللزوم
يعنى يقولك كل قصص الحب دى هتفشل
ما هى فعلا هتفشل لو الحب مش حقيقى أو احد الاطراف مجنون والتانى بارد
أو هتفشل لو فى طرف من الطرفين أى كلام
ناخد فاصل تانى مع كلماتى :
*** حبيبتى أخشى عليك من الكلام
به تبنين جدرانا و جبالا
حواجز عقبات
.. صعوبات
تصدمنى
... تكسرنى
تكبت ذاتى
... و تحطمنى
تخرجكى لحدود مملكتى
تقفين بين رعيتى حاثرة
تشعرين أنك هنا خاسرة
تشتاقين أكثر للرحيل
فجأة تنسين أنكى ملكتى ومولاتى
تنسين مملكتى
وما لكى هنا
لعلك تتناسين
وتهمين بالرحيل
تنسابى من بين يدى
تضيعين
لكن
حتما ستعودين
فهنايا سيدتى
آخر ممالك الحب من الزمن القديم
***

نيجى بقى للنقطة التانية وهى عدم القدرة على الإحساس بالآخرين
ودا من وجهة نظرى الشخصية قائم على عدم الإقتناع بالآخر
يعنى بنت مش مقتنعه بالطرف الآحر
إزاى تتقبل منه الحب أو أى شىء ؟؟؟
والنقطة دى بقى ملهاش حل
فالشاب هنا هوا اللى بيودى نفسه فى داهبه بكلامه وتصرفاته وسجايره (( لو كان مدخن )) وكل حاجة
وكما قال المثل (( وجنت على نفسها بكيزة ))
وهنا عن نفسى أفضل السكون والهدوء والسكوت
الصمت لغة لا يجيدها إلا من تعبوا من أكاذيب الآخرين وأمنوا بصدق لغة العيون
وإلى هنا إنتهى الكلام
وخلونا ساكتين

شاب فقرى

هناك 23 تعليقًا:

ميرام يقول...

أنــا كنت فاتحة عشان اشوف التعليقات اللي عندي
واقوم عشان أروح الكلية
لكن قررت أعلق بقى (:

البوست كبيييييييييييير ... وملياان ودسم

بس هبدأ كده من الأول

( جرحني لدرجة ان قلبي نسي كل المشاعر)
ده تهريج (: (:
مفيش كدة
(:
بس هي الفكرة ان الحب مراحل وتطورات
في مرحلة بيبقى الدافع فيها القلب .
في مرحلة تاني بيشارك القلب والعقل
بيبدا الواحد يفكر ان الشخص ده هو أمثل حد ليا ... دي بقى أصعب مرحلة للي يوصلها ..
لأن لما تبدأ تبقى في مشاكل وما الى ذلك
بيفضل القلب مؤيد العودة .. لكن العقل معترض
العقل والقلب لما يختلفو كل واحد منهم يحاول يؤثر سلبا على الآخر
ولأن العقل منطقي أكتر .. تلاقيه بيقدم أدلة وبراهين ...
بيحبك ازاي وهو عمل كذا وكذا وكذا ..
بتحبيه ازاي وتعيشي معاه وانتم كذا ..
فيبقى التراجع عن القضية نتاج طبيعي للموقف



يعنى هوا بيتنازل عن كل حاجة
الكبرياء والعناد والغرور والأقنعة والبعد الغير مبرر عن الناس وأى شىء


لأ
....
أو يمكن ... مش عارفة
بس أنـا شخصيا مش مقتنعة بكده ..
مش شايفة ان التنازل هو الحل للوصول
\الحب بالنسبالي أرض مشتركة تجمع اختلافات
لأم منطقي جدا لما هتقابل شخص انت عندك 20 وهو عنده 20 او 25 او 30 ..
وكل واحد اتربى بطريقة وفكر ومع ناس متخلفة
طبيعي ان هيبقى في اختلاف كبير في الشخصيات
مش بالضرورة طرف يتنازل عشان الطرف التاني يرضى
لكن الاتنين بينزلو سوا لحاجة تجمعهم ...عشان خاطر الحب


الجزء ده حلو جداا
من يعلمنى إطفاء شموع وحدتى
ينتشلنى من غربتى
مع ذاتى
من يودع معى آهاتى
يجعلنى أشتاق
أنا اليوم يا مولاتى
لا أتطلع إلى المستحيل
أرجو من الدنيا لقياك

..............
نيجي بقى للنقطة الثانية
الاقتنــــاع
أنــا شخصية كنت مقتنعة بشدة
ان الحب اختيار
ومازلت ...يمكن مش بنفس الدرجة
لكن مازلت مقتنعة ان مفيش حاجة اسمها حب عميق من دون مشاركة الشخص في اتخاذ القرار
بمعنى ..
الحب مابيبدأش اذ فجأة ..
ممكن في المرة الاولى يكون اعجاب أو تعلق ..
في المرحلة دي بيكون بايد الشخص أو انا شايفة كده انه يحسبها بعقله ويااما يقطع أسباب الاعجاب يااما يكمل
يعني ايه ..
يعني واحد شاف واحدة .. قال انا حبيتها ..من اول لحظة ده بيهرج (: (:
هو شافها أول مرة ... أعجب بيها
استناها تاني يوم عند المدرج .. طنشته
زاد اعجابه ..
تالت يوم كذلك .. والرابع والخامس .. لحد ماشغله التفكير فيها وتمكن من قلبه وعقله ... يعني أوجد المبررات لهما عشان يحبها ...


ودى فى حد ذاتها كارثة رهيبة
والمشكلة إن الشخصيتين المذكورين دول
ممكن يقروا الكلام اللى أنا كاتبه دا
ويقولك لاء دا مكتوب عالناس الوحشين
دى المشكلة فينا كلنا
ههههههههههههه
لا الكلام ده مش على الناس الوحشين ..
أنــا واحدة من الناس دول ..
بس أنـا بعتبر ده من حسن حظي !!
لما بشوف كمية التفاهات الي بتحصل باسم الحب ..
وبشوف صاحباتي .. والناس والي بيحصل ..
بقول الحمد لله ان تفكيري أكبر من كده
حتى وان وصف بالكبرياء أو بالغرور
الفكرة ان كل واحد ليه تطلعات ..
قد تكون كل تطلعات فتاة في شخص يجيبلها وردة ويقولها بحبك (: وشوية بقى على الكورنيش

بالنسبالي أنــا بشوف ده تقليل من قيمة الحب واستخفاف وووو ......
خاصة اذا خرجت الأمور عن صفتها الشرعية ..
وهكذا ..
كل شخص بتفكيرة وتربيته ودينه و ..و ..

بالمناسبة حلوة الزحام لفاروق جويدة ...
(:
أنشر الكومنت واجي اكمل على الباقي

ميرام يقول...

ايه الي بيخلي الناس تبطل تؤمن بالحب
(:
أنــا واحدة من الناس مؤمنة بالحب جداا
لكن مش مؤمنة بالمحبين
(:
حاجات كتير قوي بعترض عليها بيعتبرها الناس مكملات حب (: او يمكن أساسه


يعني وعلى سبيل المثال لا الحصر
ازاي تخرجي تقابليه من ورا أهلك ..
ازاي يكون بيحبك ويرضى يحطك في الموقف ده ..
_ مهو انا عملت كده عشان بحبه وهو عشان بيحبني ....

(:

الشخصية اللى مش بتؤمن بالحب دى من وجهة نظرى قد تكون مؤمنة بأى شىء مضاد للحب
يعنى المادية والواقعيه (( بالرغم إن الحاجات دى مش عكس الحب ))

(: (:
بص أنــا مقتنعة بحاجة
هي كلها على بعضها باكيدج بتتاخد
بوكية مشكل ..
مادة على تفكير على حب على عائلة على أي حاجة

الفكرة انك تتقتنع بالباكيدج دي على بعضها .. (: وتكون شايف انها متناسبة ومتناسقة
لو نقصت منهم حاجة هتبقى مشكلة ..
لو أمكن تعويضها وزيادة الورد الناقص يبقى جميل ...
ما أمكنش تبقى مقتنع برضه ان الباكيدج دي أحسن عرض اتقدملك ..
حتى لو لقيت أوفرر تاني بيتكلم على باكيدج أكبر .. ومستوردة مثلا (: (: (:



طبعا طبعا طبعا
البنت لو مش مقتنعه بالشخص مش هتتقبل منه أي مميزات وان كثرت
والعكس كذلك ..

الصمت لغة لا يجيدها إلا من تعبوا من أكاذيب الآخرين وأمنوا بصدق لغة العيون
ياسلاام ... ختامها مسك

ألحق أروح كليتي انا بقىىى
تحيـــــــــاتي

آه وكفى يقول...

خلونا ساكتين امال لو كنت اتكلمت كنت عملت فينا ايه كان زمانا مبيتين عندك في المدونة
المهم انته اخبارك ايه
على فكرة انا قريت البوست كلو بس توهت كده منك في النص
وبعدين انا على راسي بطحة ,, لألألأ بطحاااات قال تقولي محدش عندو ثقة طب والنبي هتيجي منين الثقة لوحدة زيي يعني وملكش دعوة زيي ازي .. زيي وخلاص

عارف مرة كنت ماشية عادي بالعربية في شارع لا داعي لذكر اسمو كأي مواطن عادي وولد في العربية اللي جنبي بيتكلم في الموبيل و بيزنق عليا والدنيا كانت زحمة ودخلت الجامعة دخل ورايا وكان حوار يعلم بيه ربنا كده وفي الاخر طلع كان وهو بيزنق عليا بيكلم حبيبتو اللي بئالها معاه سنتين .. ده بئى مش يتقالو غير::
هه ههه ههههه نياهاهاهاهاهاهاااااااااااااااي

ولا انته لك رأي تاني
بص يابني كلمة أبرك من 10 الحكاية دي متعبة اوي و ملهاش مقياس لدرجة اني ساعات اتفلسف بئى واعمل كوباية شاي واقعد في البلكونة أحط رجل على رجل و اقول ايييييييه الواحد بئى يحب راجل كده عندو 40 سنة يكون الزمن كل على أفاه وشرب وعاش حياتو وصاع زي ما هو عايز وأتهد .. في حين اني 20 سنة (غباوه) قال يعني الاستهبال له سن

وبعدين انتو يافقري مش بئى عندكو ثقة في البنات من كتر اللي بتهببوه برضو انتو غلطانين انتو كمان اه معاك ان في بنات عيزة الحرررررق بس برضو في الكويس وانته وضميرك بئى

وبعدين اللي عايز حاجة يبدأ بنفسو صح ولا مش صح خليك انته كويس ربنا هيوقفلك ولاد الحلال

على فكرة صحيح حاجة كمان قبل منسى دي::
(( انته جرحتنى لدرجة ان قلبى نسى كل المشاعر اللى كانت ليك ))

بص انا ليا رأي في الحكاية دي انا بشوف ان اي اتنين صحاب حبايب جيران بتنجان مخلل بيكون كل واحد فيهم له رصيد عند التاني بمعنى انه ممكن يعمل حاجة تقلل من الرصيد ده و يعمل برضو حاجة تضاعفو لكن في ناس مش بتاخد بالها من الحكاية دي وتفضل تجرح و تقل في ادبها وكده معتمدة على ان ما الطرف التاني بيحب و متدهول لكن بيجي الواحد في لحظة يصعب عليه نفسو اوي ويقول مهو لو بيحبني مش هيرضى يتعبني معاه ولا يجرحني ولا يعذبني فمن جواه اه ممكن برضو بيحبو بس حاسس انو هزق نفسو اوي فبتكون دي لحظة عفواً لقد نفذ رصيدكم!

انا رايحة أشحن بئى عشان رغيت كتير

آه وكفى يقول...

كل ده رغي .. انا لو منك انفضلي :))

adel يقول...

الحقيقة معنديش رد
مش ضعف حجة بس عاجبني قوي الكلام و دي حقيقة

بس حكاية جرح المشاعر
دي في الضياع
في ناس اتبهدلت من حبيبها و مش بيفتكروهم الا بالخير ...لان الحب في وقت كان فعلا صادق من الطرفين بس تتدخل الظروف و تقفل كل ده

---
اول فاصل ...حلو بس عاوز تظبيط في بعض النهايات :):)

جويدة حبيبي وش يعني

اخر فاصل قريته اول مرة غلط :):)
قرتها حبيبتي اختشي
ههههههههه

بس الموضوع عاجبني فعلا ...رغم طوله بس نقلت بسرعة من نقطة لنقطة و ده بيعمل جو

ليس فقيرا من يحب يقول...

يلهوى عليك يا فقرى (مش باشتم وربنا)

انت رغاى كده ليه يا عم

بالنسبه للعبارة دى

( انته جرحتنى لدرجة ان قلبى نسى كل المشاعر اللى كانت ليك ))

بص انا هاقولك حاجه اللى بيحب بيعدى
حجات كتير وبيدوس وبيلتمس الاعذار لحبيبه شويه ممكن يكونو كتار لكن الحب
ده فى منطقى على الاقل نبته بتبدأ صغيرة اوى وعلشان تكبر لازم تراعيها
لو مرعيتهاش احتمال تصمد وتتحمل شويه
بس بعد كده هتتدبل وتنطفى وحتى لوفصلت مغروسه فى الارض بس هتنشف
اهو بالظبط كده طرف هيجرح التانى هيتحمل شويه شويتين بعد كده احتمال كبير ينسى وميبقاش غير اشباح الذكرى ندوب(جروح يعنى ههههههه) فى الروح بس مش بتنزف ولا بتوجع
فاهم ازاى

وبعدين الحب ده سر من الاسرار محدش
يعرف وقته ولازمانه ولا سببه هو حاجه
كده تلطشك ومتعرفش ازاى
انا شخصيا مؤمنه بالحب بشده ومؤمنه انه حاجه كده بتكلبش فى القلب من غير مقدمات ولانتائج وحتى من غير العقل ميشتغل وبجد باتخنق لما يحد يقولى فكرى بقلبك وحبى بعقلك الحب مجنون ومش بنفصل اللى روحنا ومشاعرنا جريت عليه بالمقاس بس ارجع واقول ده مع محاوله الطرفين انهم يحافظو عليه ويكبروه

المهم انا رغايه وكمان حسه انى افكارى متشتته ومش فاهمه حاجه بس بما انك رغاى اكتر منى فاكيد هتتحمل رغيى
وبعدين
ونتساؤل فى صمت
هل أنتى الحقيقة ؟
لعلك أنتى المستحيل ؟
وبلا إجابات
أقرر فى هذا اليوم
إنكى ستكوني حياتى
سيدتى ومولاتى
عمرى القادم
من يعلمنى إطفاء شموع وحدتى
ينتشلنى من غربتى
مع ذاتى
من يودع معى آهاتى
يجعلنى أشتاق
أنا اليوم يا مولاتى
لا أتطلع إلى المستحيل
أرجو من الدنيا لقياك
أهفو إلى تلك الكلمات
أشتاق لهذى النظرات

بجد كلمات رقيقه وجميله بس نقد نقد مقدرش افتيك لانى باكتب حجات هبله ومبقدرش انقد نفسى فصعب انقد

المهم يبقى كل الكلام اللى بنقوله ووجهات النظر اللى بتتعرض كلام نظرى لحد ماالواحد يقع فى الحب ساعتها ممكن مفاهيم كتيير اوى تتغير

طب انا هامشى بئه يا اخويا
اقعد بالعافيه

شاب فقرى يقول...

ميرام
أولا إعذرينا عشان أخرناكى عالكلية
نورتى المدونة
نتكلم فى التعليق الأول :
احيانا يا ميرام فى جروح ممكن تخلى الواحد ينسى أى حاجة زى الخيانة مثلا أو إن الطرف التانى مش مهتم او بيفضل حاجة تانية على الحب أو عنده هوس بحاجة تانية (( ودا اللى حصل فى الفيلم اللى سمعت فيه الجملة ))
فعلا الحب مراحل وتطورات
وبيبدأ فعلا بالإعجاب
يعنى هى تشوفه وتعجب بيه أو العكس
عارفة
انا كنت زمان عندى مبدأ إسمه الإيمان
المبدأ دا مكانش مخلينى مقتنع بأى حد لأنه بيقول ان الحب الحقيقى بيكون لما بيكون البنى آدم مقتنع بالطرف التانى دا بقلبه وعقله
يعنى لو زعله فى حاجة قلبه يقوله لاء دا انسب واحد ليك ويقنعه بالبراهين
واذا عقله قاله دا مش كويس عشان كذا قلبه يقوله لاء دا حبيبنا اللى مينفعش نستغنى عنه
وهنا المصيبة بيكون البنى ادم واقع تحت سطوة الحب بشكل كبير جدا جدا جدا

هوا الصراحة الواحد فى الحب بيفكر برده فى النقطة اللى ذكرتيها
هل هوا أنسب واحد ليه
بس فى ناس بتفكر بالقلب وناس بتفكر بالعقل
لو فكرنا بالعقل هتبقى مصلحة
لو فكرنا بالقلب هتبقى ضعفوإحتياج للطرف التانى
وكمان لو الموضوع فيه مشاكل
هنا بقى بتظهر قوة الحب
بمعنى انه لو بيحبها مثلا وفى مشاكل كتير بتقابله سواء من اهلها او حتى لأى سبب تانى فهوا المفروض يتحمل والعكس صحيح من وجهة نظرى
يفكر ويتحمل
لان لو قلنا يتحمل على طول كدا نبقى بنظلم أحد الأطراف ودى غلط

--------
بالنسبة للتنازلات
أنا شايف إن التنازلات دى زى ما قلت البوست اللى فات فى البدايه
الواحد بينزع عن نفسه أى قيد يمنعه من التقرب للطرف التانى
وفى نفس الوقت بيشيل أى حدود تخلى تصعب عمليه المعرفة الحقيقية عالطرف التانى
يعنى الواحد بيحاول يقرب
مش بيتنازل بمعنى انه بيلغى شخصيته

وفعلا الحب فى البداية بيكون إختيار لكن بيوصل لمرحلة مبيبقاش فيها أى نوع من الإختيار لأن خلاص بيكون الواحد أقنع نفسه بالحب دا وبالذات لو عقله واقف معاه وبيقنعه والطرف التانى فعلا يستحق
ساعتها بيخرج من مرحلة الإختيار

بالنسبة للى بيحصل بإسم الحب فى هذا الزمان فهى كوارث وبلاوى
أنا عن نفسى واحد بيحكى لى فى مرة عن إتنين بيحبوا بعض
وبيقولى اللى بتشوفه دا مقدمات للحب وحاجة اساسية فى الحب
قلت له انتوا بتستهبلوا
نسيتوا ربنا
لان اللى بشوفه صراحة مش كويس
اللقاءات والخروجات والحاجات دى كلها
والسهر والمكالمات وغيررررررره
كل دا بيضيع الحب حتى لو كان بينهم حب حقيقى وبيخليه سهل عليه انه يسيبها وبيخليها مش عندها إحترام لذات الطرف الآخر .... هتكمل معاه إزاى ؟؟؟؟

وأحييكى على أنك من الشخصيتين اللى ذكرتهم وانا عن نفسى مقتنع بالشخصيتين اللى بيستنوا دول
لانى من وجهة نظرى زى ما قلت فى بوست قبل كدا
ان الواحد ممكن يستنى نصيبه
مش لازم تبقى ميه ميه
بس هى دى النصيب وهى دى الحب

وانا كمان مش بتقتنع باللى بيحصل اليومين دول باسم الحب ومش بتقبل باى حد وخلاص
وعجبنى اكتر ان فى ناس لسه فاكرة الصفة الشرعية
تحياتى وهنكمل فى تعليق تانى :):)
شاب فقرى

شاب فقرى يقول...

ميرام

فعلا المحبين هما اللى بيشوهوا صورة الحب وبيبهدلوه تماما
يعنى تصرفات الناس وافعالها
ومش كدا وبس بل كمان بيعتبر اى غلط بيحصل من مكملات الحب او من ضرورياته
وزى ما قلت فى التعليق اللى فات
دا هيرخصها فى نظره
ومش هيخلى البنت تحترمه

عجبنى اوى موضوع البكدج دا
ههههههههههههههههههه
بجد طريقة حلوة للتفكير
بس المشكلة ان الناس بتتردد بين باكدج والتانية
الولد بيحتار يختار انهى بنت والبنت مش عارفة تعمل ايه وتختار انهى شاب
الا اذا كان كل واحد عارف بالظبط هوا عايز ايه
ودا مش بيحصل فى هذا الزمان :$
التردد بقى صفة سايدة
وبرده فى حاجات لو نقصت فى الباكدج مينفعش تتعوض باى حاجة تانية

انا كدا بقيت حاسس ان كلمة باكدج معناها عريس
وفعلا المهم من الطرف التانى هوا الايمان بالبكدج دى
تماماااااااااااااااااا
ودا اللى بيقلق اى باكدج(( شخص )) فى الدنيا انه يبقى فى حد تانى او بكدج تانى احسن منه فى حاجات هوا ملوش ذنب فيها ولا ليه إرادة فيها
زى ان الباكدج التانية مستوردة (( فيها مميزات اكتر ))
او مثلا يكون ناقص فى الشخص دا حاجات ربنا بعده عنها
يعنى محدش إختار هوا يبقى مين
ولا حد اختار العيلة اللى هوا منها
ولا حد اختار هوا ثرى ولا لاء
ففى ظروف احنا بنتخلق فيها
دى بتاعت ربنا
احنا بقى المفروض اللى نغير او منغيرش
بس الناس مش فاهمه النقطة دى


وفعلا لو البنت مقنعه بالبكدج هتنسى اى حاجة واى عيوب فيها ومش هتشوفها وهتعتبرها مميزات

ودا شىء نادر فى هذا الزمان

نورتى المدونة

:)

أحييكى على تعليقك ووجهة نظرك

كان نفسى اشوف رايك فى الكلمات

إن شاء الله التعليق القادم

تقدرى تنقدى كما تشائى

ونورتى المدونة :)

تحياتى و إحترامى الكامل لذاتك الكريم

شاب فقرى :)

شاب فقرى يقول...

اه وكفى

اهلا بيكى فى المدونة
رايى معاكى

دا واحد بيتسلى ومش فارقة معاه وفى ناس كتير اوى اوى كدا بس مش عايزين يعترفوا انهم بيتسلوا ويقولوا دا حب

فعلا النزوات والجنان ملوش سن
يعنىحتى اللى بتتجوز شخص كبير او بترتبط بيه

وفعلا انا بدأت بنفسى

عدبنى جدا التشبيه الخاص بالرصيد

لانى صراحة كنت بفكر كدا زمان
بس مش فى الحب
فى العلاقات العادية الصداقة والزمالة

كل واحد مسموح له غلطات على حسب رصيده عندى
ولما لقيت الغلطات بتكتر وبتتكرر والناس رصيدها بيزيد
قلت لاء
اللى ميقدرنيش ميلزمنيش
واللى يغلط فيه مرة بالسلامة
والحمد لله ان المبدأ دا مش بطبقه فى الحب

تحياتى لتواجدك
نورتى المدونة

شاب فقرى

شاب فقرى يقول...

اه وكفى

وماله

حق إبداء الرأى مكفول

وهنا مستحيل ننفض لحد :)

ولا نمسح رأى حد

نورتى المدونة

شاب فقرى

شاب فقرى يقول...

عادل

دوله حبيبى ماى دارلنج أخيرا نورت المدونة

الظروف هى المشكلة الأبديه يا صاحبى
لأنها هى اللى بتشكلنا وبتطوعنا للى شايفاه

عشان كدا انا عمرى ما بسكت تحت الظروف
بحاول أغيرها قلبا وقالبا
والحمد لله نجحت كتير

تظبيط النهايات فى الفاصل الأول إزاى ؟

الشاعر الكبير فاروق جويدة حبيب كل حبيب وكل محب سواء لبلده أو لحبيبته

متقراش غلط تانى لان انته كدا بوظت المعنى :P
بس ولا يهمك
مشيها اختشى ومشيها اللى تشوفه :)

تحياتى يا جميل

شاب فقرى

شاب فقرى يقول...

ليس فقيرا من يحب

اهلا وسهلا ونورت المدونة

فعلا مفاهمي كتير بتتغير أول ما الواحد يقع فى الحب

عشان كدا بفكر تانى

وانا كمان مقتنع ان الحب مفاجىء
بس اول ما الواحد بيحس بيه بيكون فى مرحلة اختيار

واحيانا لازم نفكر بالشكل اللى الناس بتقولك عليه دا بالرغم من انه غلط

لان ممكن يكون الطرف التانى مش فى باله اساسا
وبيحب وخلاص
عايز كذا وخلاص

وفعلا الحب زى وردة او نبته صغيره لازم الواحد يراعيها :)

نورت المدونة
الرغى دا مبدأ من مبادىء المدونة
نكتب ما نريد
وننتظر النقد :)
تحياتى لردك وتواجدك وصبرك عالبوست الكبير والرد

شاب فقرى

الشعب لابد له من حكومه تشكمه يقول...

امممممممممممممم شكلى هكون اول كومنت يختلف معاك ويختلف مع كل اللى علقوا:)
شوف اولا:

(( انته جرحتنى لدرجة ان قلبى نسى كل المشاعر اللى كانت ليك ))

صح جدااااااااااااا وشايفه ان الجمله دى صح اوىىىىىىى,عارف ليه على اد الحب على اد مابيكون الاحساس بالجرح..بمعنى انا دلوقتى بحبك شويه صغيرين وبحب حد تانى اكتر شويه تفتكر لو انتو الاتنين جرحتونى جرح مين هيكون اكبر؟؟
جرح اللى بحبه اكتر لانى بكون مش متوقعاه منه ولا مستنياه..ومحدش بيتجرح اوى الا اذا كان بيحب اوى..
هقولك مثال ليا واحده صاحبتى قعدت تحب واحد9 سنين اه والله وكان فى السنه يعرف عليها بنتين دا معدل تقريبا كان حطه لنفسه وبعدين يرجع ليها ندمان ويقولها انا مش عارف بعمل كده ليه بس والله بحبك وفى الاخر انا ليكى انتى.!!!
استحملت وعدت وطنشت مع انى كنت دايما اقولها انتى هبله فين كرامتك؟؟كانت تقول زى حضرتك كده مبتقول مفيش كرامه بين اللى بيحبوا بعض ودا غلط جداااااا..
لحد من كتر الجرح وتتجرح وتتجرح كرهته,كرهت تكلمه كرهت تشوفه كرهت انها عرفته فى يوم من الايام وفجاه لقت نفسها بات مش بتحسه بأه عادى عندها بعد دا كله كلمته وقالتله كفايه كده انهار وقالها متسبينيش هتسبينى ليه؟
قالتله بكل هدوء عمايلك مخلتش جوايا حب يخلينى استحمل زى الاول....

كتر الاسيه بيعلم البكا..ازاى حد يقعد يعذبنى ويجرحنى ويضايقنى وتقولى اكون لسه بحبه؟ ازاااااااااااى؟
حتى لو كان جرحه مره واحده ممكن المه يكون ابشع مماتتصور.

*البت المشمشية *حلوة بس شقية * يقول...

البوست طويــــــــــــــــــــــــــــــــــــــــــــــــــــــــــــــــــــــل
بس مش ع الفاضى
مليان حاجات جامدة جددااا

الحب ده احلا حاجة فى الدنيا
لو التفاهم والاخلاص والحب الحقيقى موجود
بين الطرفين
بس خلاص

بيطرية ومش بايدى يقول...

قولت اجاى اطل واسلم
معلش اعذرنى لسه ماقريتش البةست اللى فات ولا ده كمان
انا اختلست نص ساعة من الوقت اللى فاضى بما ان النهاردة اجازة يعنى
المهم انا جيت عشان اقولك اولا ازيك؟ مين بيغلس عليك ويحتل اكيد طبعا مفيش حد اغلس منى صح ؟
وثانيا اوعى تسانى يا فقرى وادعيلى والنبى يحسن الكلية شكلها جامد اخر حاجة والتشريح ابتدا من امبارح وربنا يستر
هابقى اكتب يوميات البيطرية ف الكلية بس ف الاجازات برده
تحياتى لك دوما
وماتنسانيش بالدعاء
سلامات بقى

شاب فقرى يقول...

الشعب لابد له من حومة تشكمه

اهلا وسهلا نورت المدونة

وكتر الاسيه بيعلم البكا

بس ليه بينسى الحب

المفروض والطبيعى فى كل مكان ان الحب دا بيصمد رغم كل شىء

الا اذا كان الطرف التانى ميستاهلش

تحياتى

شاب فقرى

شاب فقرى يقول...

البن المشمشية حلوة بس شقية

اهلا بيكى فى المدونة

الحب هوا الحاجة الوحيدة اللى تصبر الإنسان على بلاوى الدهر

لكن انا هنا كنت بتكلم عن الناس فى الحب والطباع بمفهوم معين

تحياتى لتواجدك

شاب فقرى

شاب فقرى يقول...

بيطرية ومش بإيدى

أهلا بيكى فى المدونة بعد طول غياب

حمدا لله عالسلامة لوالدك ووالدتك

لا غلاسة ولا حاجة انتى بتنورى المدونة :)

دعواتنا معاكى ربنا يعينك ويوفقك

شدى حيلك

الكليات أصعب من كدا كمان

بس لو ذاكرتى وشديتى حيلك مش هتلاقى اى صعوبة

لان الواحد طول ما بيعمل الحاجة اللى بيحبها خلاص تبقى اسهل حاجة على قلبه واجمل حاجة
تحياتى يا دكتور :) :)

شاب فقرى

Angel يقول...


شاب فقري ..

وجدت هنا ..

ألم مغلف بأوراق الحب والشوق

مفعم بالحب المرفوض

أنا كنت ممكن اتفق معاك في أن اللي بيحب بجد مهما انجرح ده ميخليهوش ينسى كل المشاعر اللي كان بيكنها للشخص الأخر

بس صدقني جرح عن جرح يفرق في جراح صعب تتداوى ..
بس بقى في ناس ( بتتلكك )) عشان تنسى المشاعر اللي جواها دي
ولا ايه (;

>>>>>
عزيزي

همساتك كانت صراخاً
يزيدنا لهفةً وشوقاً إلى جديدك

سأترك شيئا للذين بعدي ليتذوقوا جمال ما نزفت

Angel love

شاب فقرى يقول...

الهادئة Angel

كلماتك أوجعتنى صراحة

وحسيت فيها بجرح إنسان

ولكن الحب فيه جرحى كثيرون

ولا نتمنى لأحد أن يكون منهم

تحياتى
شاب فقرى

بسنت يقول...

بدايه انا مختلفه معاك ان اللى يكتب عن الحب لازم يكون جربه
اعتقد عقل الكاتب قادر على الاحساس بالاخرين والنفاذ لداخلهم وتقمص كل شئ فيهم
(دى وجهه نظر اعتقد انها حقيقيه)

حاجه تانيه
انا معاك ان الحياه من غير جنون مالهاش لزوم

والحب فى نظرى شئ عادى ( خلينا واقعيين)
المهم هو ه عمر وجوده واستمراره
ودا بشهاده الكثيرين( انظر فى الجرائد وحواليك) بينتهى زى ما كل حاجه وليها وقت وبتخلص

بس دا ما يمنعش انه شئ اساسى للارتباط فى هذا الزمن الصعب شديد الماديه
لانه باختصار اكتمال الصوره الجميله
لاحلامنا لا اكثر

دمت بخير

شاب فقرى يقول...

بسنت

انا فعلا جربت الحب مش بحكى من فراغ

وفعلا الحب الحقيقى هوا اللى بيدوم

وفعلا فى ناس تستاهل الحب وبتقدره مهما مر من الزمن على فوات الاوان

الحب شىء مش عادى

لانه مش زى بقيت القيم بتعتمد على المثالية وخلافه

الحب احساس قبل ما يكون اى حاجة تانية

واحساس قادر يخلى شخص واحد فى السماء

او يخسف بيه الارض

بس كدا

تحياتى لتواجدك

شاب فقرى

توتة الشقية يقول...

كل ده رغى ده انا بقول ان الموضوع طويل ابص هنا برضه الاقى التعليقات طويلة يعنى الواحد على كدا يكتب مقال
بما ان دى اول تعليق ليا انا هعلق على مدونتك وكلامك مدونتك جميلة جدا وانا دخلتها عشان عجبتنى وموضوعك ده برضه حلو والحب بيجى للواحد من غير ما يعرف الواحد يكون قاعد فى حاله والهم يجى يخبط بابه سعات يكون حلو وسعات تانى وحش اوى بس احب اقول ان الانسان اللى بيجرح ده صدقنى مش انسان ولا عنده قلب يلاه بقا عشان مش اطول واكون رغاية اصلى بصراحة انا رغاية هههه