الخميس، 1 أكتوبر، 2009

هلوسة أفكارية فقرية وأحلام ضايعة بالإجبار

البوست دا شخصى
لا فلسفة ولا نظريات ولا أى حاجة
اللى عايز يقرا ويعلق يشرفنى
بس يكمل للآخر مش زى التعليقات اللى بشوفها دايما
واسف للمقدمة الطويلة
شاب فقرى


النهارده جاى فى دماغى تلاتين فكرة نكد
هتلاقيهم كلهم فى البوست .....

أول حاجة ...حاجة بفكر فيها وشاغلة بالى من إمبارح
تانى حاجة ...انى السنة دى هقضيها فى البيت
أيون ...صدق أو لا تصدق
هقعد فى البيت
السبب : الأنفلونزا والإجراءات اللى إتخدتها الحكومة الحلوة اللى ربنا يخليها لنا السنة دى
السنة دى أنا كنت راسم عليها أحلام كتير أوى هعملها إن شاء الله
بس الحمد لله اتهدمت كلها بعد ما سمعت الخبر الحلو اللى هيقعدنى فى البيت
طبعا دا كويس جدا لشغلى وحاجة إشطة إن الواحد يقعد عالنت بإستمرار
بس أنا كنت عايز أخرج من اللى انا فيه
أطلع منه شوية
ألاقى أى مكان أروحه ألاقى حد أتعرف عليه بدل التركيز فى النت وبس
كنت مرتب السنة دى حاجات كتير مهمة
بس بما إنها هترسى عالقعدة فى البيت والتركيز فى الشغل والشركة اللى هتتفتح فى خلال ست شهور
يبقى الواحد يدور على حاجة كمان يشغل بيها وقته
ممكن أكسر القاعدة وأنزل شغل فى الرحاب مثلا أو مدينتى فى طاقم الإدارة
أو ممكن أقدم فى أى دراسة (( بالاضافة للكورس اللى بجهز له حاليا وهمتحن واخد شهادته عن قريب بعون الله ))
مثلا معهد التمثيل او المسرح او دراسة إخراج
ويمكن إنى أرجع أنزل سور الأزبكية تانى زى زمان واجيب كتب واقراها وابيع منها اللى مش بحبه واحتفظ بالكتب اللى ليها قيمة عندى
وكل شوية أخد شنطة الكتب الجميلة وأسافر أى مكان بعيد أقرا فيه
وأنا برجح اخر اختيار دا

تالت حاجة ...شكلى مقلتش أول حاجة
نتكلم فيها بهدوء
أول حاجة : بساطة شفت واحد صديق وعميل عندى إتجوز
هوا صراحة صديق أكتر منه عميل
وهوا تقريبا من دورى أو أصغر منى مش فاكر
لكن صاحبنا دا كان لسه مخلص الجامعة فى شهر سته
إتجوز فى شهر سبعة
واخدين بالكم
وكمان صاحبنا دا مش شغال
لا بيشتغل زيى عالنت
ولا فى أى حاجة
تقدروا تقولوا كدا جوازة اهلاوية
هوا بس إختار بنت الحلال
وداس عالزرار
وإتجوز
صباح الفل يا معلم
متسألونيش بقى أى سؤال فى النقطة دى لأنها مش موضوعنا
أنا ببساطة بتكلم فى فتاة الأحلام
اللى فكرنى بيها صاحبنا دا
يعنى الراجل والله مقصرش
لما حكالى قالى انه شافها فى فرح واحد قريبه واعجب بيها وطلعت بنت حلال وكويسة
لكن انا بتكلم فى نفسى انا
فى فتاة احلامى وفتاة أحلام كل شاب مصرى
يعنى ياترى هتكون عاملة إزاى (( متخافوش البوست مش هيقلب رومانسى ))
انا عن نفسى مش عارف أرسمها
مش طبعا لضعف موهبتى فى الرسم لانى لو رسمتها بإيدى هتطلع مازنجر أو يمكن تطلع فى الرسمة حاجة تانية خالص
انا بتكلم عن خيالى أنا وعن امنياتى أنا
فى ناس كتير كويسين
هسمع من الكل كلام بيقولك لسه بدرى والكلام الحمصى دا
الحمد لله الواحد متأخر بما فيه الكفاية يعنى أى حد هيقولى لسه بدرى وركز فى حياتك
هيلاقى منى لا تعليق
المهم
فكرت فى الجزئية دى كويس أوى
لسبب بسيط جدا
إن الواحد ياما بيشوف وبيقابل ناس كويسين
بس مش بيكون مقسوم له فى حياته مع الناس دى غير وقت معين
دى وجهة نظرى
يعنى مثلا أعز صحابك مكتوب لك تشوفه وتقعد معاه مدة معينة فى حياتك كلها
ممكن تصاحب حد كويس أوى ويسافر فجاة او يبقى على طول على غياب
فيبقى نصيبك معاه الوقت القليل اللى بتقضيه معاه
فمابالك بقى لو فتاة الأحلام
الوقت اللى مكتوب لك تقضيه معاها قد إيه فى حياتك كله
سواء إرتبطتوا أو مرتبطتوش
يمكن يكون مكتوب لك تشوفها مثلا عشر ساعات
او تقعدوا مع بعض ساعة ونص
ويخلصوا الساعة ونص
وتختفى هى من حياتك
حصلت معايه والحمد لله
واختفت
ولحد النهارده مش شفتها تانى
مش لأنها شبح لا سمح الله
لكن لانى مكنتش اعرف عنها اللى يخلينى أعرف أوصلها تانى
فكرت فى كدا تانى وانا سهران إمبارح وبحاول أكتب البوست الرائع اللى يستاهل عمود فى الجرنال دا
بس معرفتش ونمت عالكيبورد زى كل يوم ساعة وبعدين صحيت وقمت نمت على سريرى
هل ياترى مقسوم لى اشوفها واقضى معاها وقت معين وتختفى من حياتى ؟
هل لو شفتها فعلا هعرف إنها هى ؟؟؟
لأن الحب طبعا قد يقع من أول نظرة
هل ممكن أبعد عنها بسبب هوس الثقة والغيرة ؟؟؟
هل هقدر أكمل معاها لو شفتها ؟
ولا لوحصلت ظروف أو كانت الظروف مش فى صفى زى أى شاب مصرى هبعد ؟؟
أو مثلا كانت بنت السلطان؟
دايما كنت بقنع نفسى إنى أقدر أغير أى ظروف
والحمد لله غيرت كتير أوى
وعملت كتير فى حياتى
وإيمانى بالجملة دى زاد اكتر واكتر واكتر
بس هل هيوصل القدرة على تغيير الظروف للدرجة دى ؟
ولا يمكن فى المرة الوحيدة اللى متقدرش تغير فيها الظروف يكون مع فتاة أحلامك
وييجى عليك اليوم اللى ترضى فيه ب (( فتات أحلامك ))
بجد الموضوع دا تاعبنى من التفكير
ومش عايز حد يقولى مش تشغل بالك وفكر فى اخواتنا فى الدويقة واخواتنا فى القاهرة اللى مش لاقيين ياكلوا
وخليك إيجابى والكلام الجميل اللى بقول عليه بينى وبين نفسى كلام حمصى
لانى ياما فكرت وحاولت اغير ومش عرفت فى بلدنا اللى زى السكر اللى بحبها
كل الشكوك والقلق دا على فتاة الأحلام مش هيوصل لحاجة
ولا حتى هيوصل ليها
خلينا نركز فى صورة الطفل الأمور اللى أنا حاططها دى
ملقتش أحسن منها للبوست دا
لانها اكيد هتفكرنى بفتاة الأحلام وبإبنى اللى بتمناه من الدنيا
(( شفت حبيبى وفرحت معاه .... دا الوصل جميل ...حلو يا محلاه ... حلو يا محلاه ))
غناء عبد المطلب
أحسن مغنى فى تاريخ الأغنيه القديمة والمعاصرة
تحياتى ...
شاب فقرى

أوبااااااااااااا
نسيت فى حاجة مهمة جدا
تالت حاجة بقى
ساحات إبداء الرأى
يعنى بمعنى آخر إبدأ الرأى فى آراء الأخرين
من الغريب جدا والمريب والمثير للقرف إنى أشوف تعليق بيرد على حد وبيغلط فى رأى الغير
بل ويوصل لدرجة إنه ممكن يشتم عادى جدا
وكأن اللى انته قريت له دا مش بنى ادم هيتأثر بكلامك ويزعل ويتعصب ويتنرفز
بل وكمان ممكن يبطل يكتب تانى
مش عارف إزاى واحد تطاوعه نفسه يعمل كدا
ويغلط فى رأى غيره
ويغلط فى الشخص نفسه
أفتكر شفت الموقف دا حصل فى الأيام اللى فاتت
وزعلت وإتأثرت وكمان قرفت من إن فى ناس عندها كمية التجاهل لمشاعر الآخرين للدرجة دى
وإلى هنا ينتهى الكلام
شاب فقرى

هناك 48 تعليقًا:

heba يقول...

بيطرية كانت عايزة تيجى تحتل وتغلس كعادتها وتيجب القوات المسلحة بتاعة كل مرة وكانت ناوية تشرب كل الشاى والقهوة اللى عندك بس للاسف المواصلات صعبة اقصد جهازها بايظ والمدونة بتاعتك مش راضية تفتح عندها
وبتبلغك تحياتها واكيد البوست حلو من غير ماتقراة
وبتدعيلك يارب تفضل دايما مش فقرى

تحياتها ليك

بيطرية ومش بأيدى

heba يقول...

السلام عليكم ورحمة الله وبركاتة

انابقى تانى تعليق

انت خلى عندك تفاؤل وامل فى ربنا كبير ولو مكتوبلك تشوف البنت اللى انت حبيتهاومش شفتهاتانى صدقنى هتشوفها لان الدنيا صغيرة فوق ماتتخيل وبجدبتمنالك تقع فى نصيبك تانى لانك واضح أنك حاببها ويارتها تسمع الكلام دة وربنا يكرمك ويوفقك يارب

تقبل مرورى

heba

شاب فقرى يقول...

بيطرية منورة جتى فى غيابك
وشكرا ل heba سفير النوايا الحسنة :)

تحياتى واحترامى الكامل

شاب فقرى

شاب فقرى يقول...

heba

اكبد مش قريتى البوست كويس

انا مش بتكلم عالبنت اللى كانت فى حياتى واختفت :)

تحياتى واحترامى الكامل لتواجدك

شاب فقرى

GeHaD-----(male) يقول...

انا نفسي اقابلها انا كمان فتاه الاحلام بنت الدزمه دي بس مؤمن بحاجه اسمها قسمه ونصيب اه بجد والله وحاسس اني في يوم هلاقيها

اكيد كل حاجه هتيجي في وقتها انت خايف للعمر يجري بيك طب صاحبك اللي اتجوز اول ما خلص دا تفتكر انه هيقدر يتحمل اعباء الزوج

خد خبره ياعم
كلامي دا كلام حمصي ولا ايه النظام؟
تحياتى

شاب فقرى يقول...

اكيد مش حمصى

كلامك جميل يا أخ جهاد

والله هوا معاه اللى يقف جمبه

احنا معانا ربنا
:)

نورت المدونة وهننتظر نشوفك تانى :)

شاب فقرى

آه وكفى يقول...

لإقري ياضنايا
متفكرش كتير في حكاية فتاة الاحلام دي ولا ترسمها عشان هى بتكون شروة على بعضها يعني لو فنطتها هتلائي فيها كل حاجة مش بتحبها ولول جمعتها هتلائيك بتموت فيها بس امانة عليك يابني امانة عليك لو لئيتها وطلعت بنت سلطان متسبهاش عشان طلعت بنت سلطان خصوصا لو هى حبتك عشان هيجيلها صدمة نفسية لأنها اكيد اتصدمت قبلك واتسابت عشان بنت سلطان

النص التاني
ابداء الرأي

دي مصيبة يابني الناس تقريبا عاملة المدونات عشان يتقلها براااااافوووووووو وبس لكن مش عشان تسمع رأي اخر حتى لو صاحب الرأي عرضوا بطريقة مهزبة و بعدين في موضة تانية يمسحهولك ويجي يقولك انا ملئتش رد ابلغ على كلامك من اني امسحو ,, عادي كده ,, كأنو بيقوله ياريت لما تيجي مدونتي يا تقول كلمتين في حقي حلوين ياتحط فردة باتا شمال في بوءك .. شوفت الهنا اللي احنا فيه


دي حاجة تعلللللللللل

الست فرويد يقول...

مساء الخيررررررررررررر

معلش اللى تخاف منه ميجيش احسن منه

وان شاء الله السنة دى هتبقى زى الفل و هتحصل فيها احداث جميلة باذن الله

ويمكن يكون منها فتاة الاحلام
اللى يكون منها ولد احلى كمان من اللى فى صورة :))))))))

ربنا يريحك قلبك يارب

شاب فقرى يقول...

اه وكفى

نورت المدونة اولا

ثانيا

انته قلت فكرة اول مرة تخطر فى بالى

ان بنت السلطان لو حبتك مش تبعد عنها لانها هتتصدم لانها اكيد اتصدمت فى حب سابها قبل كدا لانها بنت السلطان برده فممكن تتعقد

وجهة نظر رائعة تحترم

بالنسبة للتعليقات والناس اللى بتخش ترد

انا اكتر حاجة اكرهها تعليقين
تعليق يقولى انته كويس من غير ما يقرا
وتعليق تانى يقرا ومش عاجبه ويخش يغلط فيه ويقل ادبه
ممكن تقول رايك بس بأدب وبوضوح وبصراحة ومن غير ما تزعل حد
زى ما انا بعمل لما حاجة بتدايقنى فى اى مقال او بوست اقراه

ربنا يعين الجميع وشكرااااااااااا جداااااااااااااااااااااا لوجهة نظرك

شرفتنى

شاب فقرى

شاب فقرى يقول...

الست فرويد

اهلا وسهلا

نورتى

كان نفسى تعلقى فى بوست تانى بتاع فلسفة السقوط او الرضا والسعادة وتقبل الواقع

لانى حاسس ان رايك هناك كان هيفيدنى اوى
لان وجهة نظرك وارائك اللى فى مدونتك بتقول فلسفة لوحدها

المهم دلوقتى

يارب يستجيب دعوتك والاقيها السنة دى

انما جواز السنة دى وطفل وكمان اجمل من اللى فى الصورة مستحيلللللللللل

:((

نورتى المدونة

شاب فقرى :)

THE illusionist يقول...

صباح العسل يا باشا
اول زياره عندك
الاقيك مضايق كده
على فكره الواحد مش عارف يعمل ايه فى المصيبه دى
اروح اموت فى سبيل العلم
طيب والله هيبقى موت بخساره
حاجه تقرف
متزعلش انت نفسك بس
وبالنسبه للناس اللى شتمت
احب اقولك
مش كل المدونين مترمين
ومش كل من عمل بلوج بقى مدون
وسعيده عليك يا باشا

Yusuf يقول...

بين فتاة الاحلام

وفتات الاحلام

تاهت الافكار

بص انا مبحبش ابص للموضوع من الزاوية دي وشايف ان اللي ربنا كاتبهولي هيجيلي رغم عن أي حد

وبخصوص ابداء الرأي في ناس بتفهم مفهوم الحرية علي انها الحرية في سب الاخرين

وده طبعا مش صح ودي تبقا وقاحة ومش حرية

والسلام ختام

الشعب لابد له من حكومه تشكمه يقول...

بالنسبه للشتيمه ما احنا قولنا فى ناس هوايتها القتل بالشوكه والسكينه وتقطيع الناس بدم بارد بدون ميراعو مشاعر بعض..
بالنسبه لفتاة الاحلام مش عارفه ايه ظروفها اصلى بدور على فارس الاحلام فمش عارفه الفارس يختلف عن الفناه ولا كله زى بعضيه:)
بس عموما كله نصيييييييب هيروح فييييين اول متتكعبل وتقع على بوزك هتقول هى دى جوزوهالى........
بس عجبتنى اوى فكره انك تقابل فتاة الاحلام لمده ساعه ونص او عشر سعات عجبتنى اوى اصلها حقيقيه اوى

دموع القمر يقول...

صباااااحو تفاؤل
صباااحو امل فى الحياه اللذيذة دى

وربنا طول ماانت حاطت النظارة الجميلة دى وعنيك بينط منها انا فااشل هههه
هتفضل قاعد فى البيت وكل ماتقول هعمل حاجة هيتقفل قدامك ميت باب : ) :)

ربنا يوفقك ويديلك كل اللى تتمناه

انا بحب الجملة ويمكن معلقاها عندى اللى بتقول عش كل لحظة كأنها اخر لحظة عش بالامل عش بالحب عش بالتفاؤل عش بالايمان وقدر قيمة الحياه


نيجى بقى لبنت الحلال
الحياه لسه بخيرها واكيد نصيبك جاى فى السكة بس انت عارف ازمة المواصلات بس
ربنا يكرمك ويديلك بنت الحلال اللى تسعدك

وبالنسبة بقى لابداء الراي
دى حرية شخصية واكيد لازم فيه حد هينقض واكيد الواحد مش لازم يزعل لا يفرح انه لقى حد مش بينافقه :) :) :)

بس ايه انا قصدى انك لما تنقد انقض بأدب

دا انا من كتر الطوب اللى بيتحدف عندى فى المدونة راسى اتفتحت ههههه

تحياتى لك

ميرام يقول...

طيب تدريجيا ...
ترتيبيا ..
بأي شكل من الأشكال ..
هقول
بالنسبة لأولاً
هي حاجة محيرة فعلا .....لازم تفكر فيها كويس ...
(:
ثـــانيـــا
مش مقتنعة بان في انفلونزا يبقى نقعد في البيت ..!!!!!!
ده احنا كده نبقى ماصدقنا تقريبا (: (:
أنـا مقتنعة ان لا عدوى ولا طيرة ,, وده طبعا مش معناه عدم الأخذ بالأسباب ..
لكن لو مكتوبلك انفلونزا خنازير ... هتجيلك في بيتك يعني (: (:
وده مش تفويل ولا حاجة .....
(:
لا بجد ثانيا أنا بعترض عليها بشدة وعنف

وياسلااام لو كل الشعب يفكر زيك ويقعد في بيته ... وأنزل لوحدي في الشارع ..........تبقى أجمل حاجة


نيجي لثالثا ..
الي هي أولا .. ولا مش عارفة أنا تهت ومش مركزة ولا ايه
المهم
مافهمتش تماما موقفك من صديقك مش منه شخصيا انما من موقفه
موقفك من موقفه
وان كان وصلني انك شبه معترض على الجوازة الطياري (:
أو بالأصح ماتتمناش زيها
وقد أكون مخطئة ..
المهم ان دي بجد أكتر حاجة المفروض الانسان مايشغلش باله فيها (كلام حمصي)\طيب هقولك ليه
أعرف واحد قريبي .... كان على قدر عالي من كل شيء
ومن كتر الاشتراطااات الخياليه الي كان بيحطها في فتاة أحلامه
وهي مش اشتراطات بالمعنى .. لكن هنعتبرها كده
اتجوز في ال 30
مش دي المشكلة .. المشكلة ان الكل اتصدم فيمن تزوجها
(: بجد والله النصيب بيغلب مهما كان
تكون شفتها 4 سنين ..
شفتها 10 ساعات
شفتها ساعه
مش هتفرق أبدا ....
المكتوووووووب ....
كلام حمصي تاني ..
خلاص مش هتكلم
بس انا استوقفني حاجتين
الأولى مش هقولها لاني مش فاهماها قوي
التانية بقى
بنت السلطان
هو فيه سلاطين دلوقتي بس (:
بقدر رغبتك في الشيء وثقتك في نفسك واقتناعك الكامل بما تريد
ستصل
مش كلام حمصي للمرة التاسعة




بخصوص اخر كلام
(:
عادي ..
تختلف وجهات النظر ..
وتختلف اساليب التعبير
وتختلف الثقافات وطرق التربية
(:

وبس

تحيــــاتي

طوبه فضه وطوبه دهب يقول...

3ayza aaolk ank lazm t3rf an kol shyaa nseb mktoblak tlayha wtkml m3aha aked hy7sal lazm tt7da el donya wykon kolak ayman wsaka blah ano hyktablak a7san wa7da fldonya whysarlak kol el zorof wl3kbat lo nsebak ama el da3 matz3lsh 3leh lan rbna shayl el a7san mno bs at3lm mno 3shan matkrarsh ghaltk wtfarat fftat a7lamk tany

شاب فقرى يقول...

THE illusionist
عجبنى اسمك
وكمان عجبتنى مدونة الروقان مع كوباية شاى

ما شاء الله


بس قلت كلمة عجبتنى اوى وخلتنى افكر فيها

(( مش كل من عمل بلوج بقى مدون ))
وانا الحمد لله بحاول اقدم حاجة
انى بناقش بقول راى او فلسفة معينة فى الحياة
تحياتى
شاب فقرى

شاب فقرى يقول...

Yusuf

ما هوا انا بتكلم فى المكتوب

وبالنسبة للناس اللى بتفهم الحرية غلط

دى الكارثة

كل واحد بيفهمها من منطلق مختلف تماما

تحياتى لوجودك ولردك

شاب فقرى :)

شاب فقرى يقول...

دموع القمر

المشكلة لو جت فى ازمة المواصلات دى ان العربية ميكونش فيها مكان وتمشى وتسيبنى

ربنا يستر :$


بالنسبة لابداء الرأى

انا بحب النقاش جدا

ممكن تقعدى تناقشينى ستين ساعة ومش هزهق
طالما الهدف ان احنا نوصل لفكرة تجمعنا سوا بدون مشاكل
او اننا نتوصل لحل لمشكلة
او اننا نعرف بعض اكتر
انما حد يناقشنى عشان يهزقنى
فمعنديش اى رد عليه
ومش هرد وهسيب تعليقه كمان
بس كدا
وسلامة راسك من الطوب
البسى الخوذة عشان متخديش مخالفة تدوينية

شاب فقرى

شاب فقرى يقول...

طوبه فضه وطوبه دهب

نورتنى

بس فى مشكلة بسيطة اوى قد كدا :$

انى مش بفهم الفرانكو اراب بكفاءة زى العربى

نورتنى ويشرفنى ردك

شاب فقرى

شاب فقرى يقول...

ميرام

اولا نورتى المدونة بعد غياب طويل
كتبنا فيه كتير
وكنت بزور مدونتك ومش بلاقى بوستات جديدة فمكنتش بعلق عالقديم عشان مبقاش قلق :$
لكن ملحوقة ان شاء الله

بالنسبة للقعدة فى البيت

دى قرارات الحكومة فيما يتعلق بالدراسة فى الجامعات

يعنى حاجة غصب عن اى حد وعنى

انا صحيح مكنتش بنزل كتير بسبب مجال شغلى وتركيزى التام فيه ورغبتى فى تحقيق اللى بتمناه

بس برده كان ليه رغبة فى انى انزل الجامعة السنة دى
وطبعا انا مش ذكرت انى بتكلم عالجامعة فى البوست لانى مش عايز انشر الموضوع وحد يعرف انى فى الجامعة

والله صدقينى انا مش بخاف من اى انفلونزا ولا حتى الموت نفسه
يعنى اخويا كان عيان وتعبان الفترة اللى فاتت
وكان عنده مرض فى صدره وكان تاعبه اوى
وكان اكيد ممكن يعدى اى حد يقرب منه
انا على طول كنت بقعد جمبه ومش بيهمنى اى مرض ولا اى حاجة
لانه لو حد من حبايبى جاله المرض دا
فانا طبيعى هروح اتعدى منه عامدا متعمدا
عشان يبقى مصيرنا واحد
لانى مش هقدر اعيش ببساة من غير حد بحبه والكلام هنا على أسرتى الصغيرة الجميلة

بالنسبة لصديقى
انا مش معارضه ابدا
لسبب بسيط
كل واحد وليه نصيبه ورزقه
وانا رافض يحصل معايه زى ما حصل معاه
بمعنى انا رافض ان اهلى يساعدونى حتى فى بناء شقتى لانى رافض تماما الفكرة ان حد يعملى حاجة
حتى لو قعدت عشر سنين ابنى فيها طوبة طوبة وبنفسى فانا هكون سعيد وراضى تماما

بالنسبة لقريبك اللى ذكرتيه فى الكلام
هوا انا رافض الجواز التيارى
وبرده رافض انى استنى لحد ما ارضى باى واحدة وخلاص (( حتى لو البنت كويسة جدا وممتازة بس بيتى مش هيبقى فيه المودة والألفة والحب اللى المفروض يكون فى اى بيت ))
الكلام دا مينفعنيش انى استنى واقبل باخر فرصة وخلاص

المشكلة فى المبادىء فى الحياة دى يا ميرام
انها مش بتتجزأ ومينفعش الواحد يشتغل بيها شوية ويقف شوية
انا فعلا مش شايف فتاة الأحلام دى ولا عارف مواصفاتها
بس برده بحلم بيها
بشوفها قدامى احيانا (( احلام يقظة - مجنون بقى ))
بس برجع افكر تانى وتالت واصبر
بالنسبة لموضوع بنت السلطان

(( لكل زمان بنات سلطان ))
يعنى كل زمان فيه بنات سلطان
مش شرط تكون بنت عيلة ومؤدبة ومثقفة وفعلا بنت سلطان
ولكن قد يكون اعتزازها بنفسها
قد يكون التفكير
يعنى فى حواجز كتير اوى بتندرج تحت كلمة بنت السلطان
وانا شفتها زماااااااااان ومش شفتها تانى بقالى فترة كبيرة اوى اوى اوى
غير من كام يوم
وفعلا كل انسان ربنا بيكون مقدر لنا نقضى معاه قد ايه
واتمنى انى يكون مقدر لى اكون معاها ما تبقى من عمرى لحد ما اموت وبعد ما اموت كمان
بالنسبة لتعليقك على ابداء الأراء
ففعلا الناس بتختلف فى الثقافات ووجهات النظر ودا سبب الحروب وسبب البلاء فى الكون كله

نورتى المدونة ولا تحرمينا من زياراتك
وانا قاعد فى مدونتك بشوف من الأول .... للآخر وما شاء الله شاعرة فنانة
بس مش عارف أرد
حاولت بس مش عرفت أرد على أى من المكتوب
صعب الواحد يجارى موهبة حقيقية بكلام من ذهنه ومن إلهام الآخرين ليه :)

وشكرا لردك وتفاعلك

تحياتى إحترامى الكامل لشخصك الكريم

شاب فقرى

بيطرية ومش بايدى يقول...

انا جيييييييييييييت

واخيرا فتحت

ياالله دى كانت مواصلات صعبة بشكل

ياخراشى ايه الواد السكر اللى فوق ده

لا انا هابتدى اعاكس بقى

بيطرية ومش بايدى يقول...

اقولك على حاجة سر

من غير ماحد يعرف

خااالص

هسسسس

بيطرية ومش بايدى يقول...

زعلانة اوى
بجد

بيطرية ومش بايدى يقول...

هاروح اقرا وارجع تااااااااانى

اوعى حد ياخد مكانى

المفروض انى الاولى بس يلا القطر فاتنى
:) :)

شاب فقرى يقول...

زعلانة ليه ؟؟؟

زورى المدونة دى

http://afteursunset.blogspot.com/

فيها حالة وفاة وواجب عزاء
:((

:(
:(

بيطرية ومش بايدى يقول...

ياسلام يا اخويا
مش عارف
روح شوف كتبتلك ايه عندى

وعلى كل حال شكرا

شاب فقرى يقول...

رديت

وغصب عنى

بس انا فعلا مكانش عاجبنى تعليقى فمسحته

بس كدا :)

بيطرية ومش بايدى يقول...

ماشى ياعم
سماح المرة دى

شاب فقرى يقول...

فيم ردك عالبوست بقى بعد كل الزعل والتصالح اللى حصل دا :$

رايك؟؟

بيطرية ومش بايدى يقول...

رايى اهو
انا هاقولك
انا مش عاقولك الكلام الحمصى ده لا لانه مش وقته فعلا
بس ليه لأ ما يمكن فعلا تقابلها وممكن كمان تعرفها ومش بعيد هى اللى تعرفك
ايه رايك ف الحياة البمبى دى
نخش بقى فى البلاك والفوحلقى كمان
وممكن العكس تماما انك لحد ما تروح الجنة ماتشفهاش ويتكتب ليك واحدة تانية وهى دى اللى يكون ربنا كاتبلك الخير فيها

عارف هى اوحش حاجة ف الدنيا دى
ان مش كل اللى بتتمناه يمكن تحقيقه
هيييييييه يلا بص انا مش هاعرف اقولك غير حاجة انا بقولها لنفسى
ربنا ده كبييييييييير اوى وجميل اوى اوى واكيد مش هيسيب حد

تحياتى

شاب فقرى يقول...

بالنبة للبوست انا معاكى فى رايك

واكيد الواحد لازم يتعلم يتجاهل اى رد مش عاجبه او بيغلط فيه

مع احترامى للشخص الكريم اللى بيكتبه

ونورتى المدونة

شاب فقرى

ندا منير يقول...

مش هقولك زى اللى بيقولولك فكر فى بتوع الدويقة وكدة
وصح ان الواحد يفكر ويخطط لحياته كلها مع اللى هيحبها ويرتب نفسه على كل حاجة وازاى هيسعدها ويبسطها وكدة

ولو كل واحد كان عارف نصيبه مع اصحابه ومع كل الناس اكيد مكنش حد هيبقى حزين ابدا عشان كان هيقدر يستعد لكل حاجة

وبالنسبة ان فى ناس بتغلط فى راى اللى قدامها دا بينتج عن التربية وان فى اهالى مبيعرفوش يخلوا ولادهم يحترموا اراء اللى حواليهم مها كان غلط
واحيانا بيبقى بسبب التعصب لراى واحد بس

شاب فقرى يقول...

ندا منير

مسألة النصيب بتحدد كل حاجة فى حياتنا

محدش فكر مرة فى تغيير الظروف والنصيب ؟؟؟

يمكن لان حتى لو الواحد فكر يغير النصيب فهوا هيروح لنصيبه برده

وبالنسبة للتعليقات بقى

فدى ارزاق ان الواحد ييجى له حد يقوله كلمة مش كويسة
واسف لو كان مناقشتى زعلتك


تحياتى

شاب فقرى

ندا منير يقول...

اطلاقا وبتبسط من اى مناقشة مها كانت شديدة

ومزعلتش ولا حاجة

واكيد هنروح برده للنصيب لان هو النصيب ومش هنعرف نهرب منه
مع اننا احنا اللى بنحدد نصيبنا
هى عملة مقعدة وحسابتها معقدة
بس فى الاخر هو نصيب

ليس فقيرا من يحب يقول...

السلام عليكم

بالنسبه لموضوع فتاه الاحلام

فى الاول وفى الاخر هيا نصيب

متعرفش الايام مخبيه ايه وان شاء الله

تكون مخبيه كل خير المهم فى الاخر مش شرط

الحاجه اللى انت شفتها منسباك وكنت

عايزها تبقى خير ربنا يوفقك ويسعدك

يارب

بالنوسبه للجزء التانى شيما قالتلك

فى ناس متخصصه فى تقطيع قلوب الناس

بالشوكه والسكينه

تقبل تحياتى

well يقول...

اولا تحياتى لقلمك الذى يترجم ما بداخلك الى كلمات
ثانيا ..الحمد لله لقيت شئ مشترك بنا وهو سور الازبكية (المكتبات حاليا )
ثالثا ..لازم الواحد يكون عنده خطة بديلة عشان يقدر يعيش حياته بدون توقف
رابعا ..بنت الحلال اممممممم شوف انا بجد كنت لسه بفكر فى الموضوع ده بصراحة الموضوع ده عميق هو صحيح فى الاول وفى الاخر نصيب لكن انت لو معرفتش انت عاوزها ازاى ..هو انت طبعا مش هتلاقيها زى ما انت عاوزها بالظبط بس اهم حاجة فيها ان الاساسيات بتاعتها تكون كويسة زى ما انت عاوز ومتسألنيش هى اى الاساسيات دى لانى طبعا مش عارفها ....
خامسا ..وسع صدرك لان صعب ان واحد يبقى متفق معاك فى كل حاجة اكيد هيختلف فى نقطة اقولك يا ريت لو تقرا البوست ده (http://kashkol100.blogspot.com/2009/09/differences.html )
اسمه الاختلاف هو صغير متخفش
سادسا تحياتى ....ويا رب كلامى ميكنش حمصى

دموع القمر يقول...

حصل مشكلة فى المدونة واضطريت انى احذفة واكتبه تانى

فمعذرة

بس علفكرة العيب مش فيك ياعمو فقرى

العيب فى احمد حلمى والسبايكى والنضارة ههههههههه

ميرام يقول...

علقت مرتين ):

ميرام يقول...

):
):
كلاكيت تالت مرة
وهحاول بأي شكل أختصر الكلام الكتير الي كتبته في المرتين الي فاتو
(:

أولا أنا قرأت كل الادراجات السابقة لكن ماقدرتش أعلق عليها لأني كنت مشغولة الفترة الي فاتت وكنت بدخل عن طريق الموبيل
لكن ان شاء الله هعلق فور استطاعتي



دى قرارات الحكومة فيما يتعلق بالدراسة فى الجامعات

كده يبقى انت انتساب
على العموم مش مشكلة لو حابب تنزل أكيد محدش هيقول لك لأ


لانى مش هقدر اعيش ببساة من غير حد بحبه والكلام هنا على أسرتى الصغيرة الجميلة

ربنا يخليهم لك
(:


هوا انا رافض الجواز التيارى
وبرده رافض انى استنى لحد ما ارضى باى واحدة وخلاص (( حتى لو البنت كويسة جدا وممتازة بس بيتى مش هيبقى فيه المودة والألفة والحب اللى المفروض يكون فى اى بيت ))
الكلام دا مينفعنيش انى استنى واقبل باخر فرصة وخلاص


أحييـــك


يعنى كل زمان فيه بنات سلطان
مش شرط تكون بنت عيلة ومؤدبة ومثقفة وفعلا بنت سلطان
ولكن قد يكون اعتزازها بنفسها
قد يكون التفكير
يعنى فى حواجز كتير اوى بتندرج تحت كلمة بنت السلطان


أحييك بشددة
جميل قوي انك ماعتبرتش السلطان مادة وثراء وما الى ذلك ...
جميل بجد


....
باختصار مطلق
بقدر ثقتك ويقينك في ربنا وان ما سيقع هو الخير لك بأي شكل من الأشكال
هترتاح وتشيل من عليك هم التفكير في أي شيء

بالتوفيق باذن الله
وشكرا على الاطراءات دي (:

تحيـــــــــاتي
ويارب التعليق يتنشر ):

شاب فقرى يقول...

ميرام أولا:
نورتى
والتعليق اتنشر
وليس بعد كلامك كلام

ولكم للمودة وربنا يحفظ فودافون ونت الموبايل
ياما بيحل أزمات :)

تحياتى وإحترامى الكامل

شاب فقرى

شاب فقرى يقول...

ميرام :)
بالنسبة لموضوع الانتساب فهذا حقيقة

من الاجراءات اللى هتطبق هوا ان مفيش محاضرات

وهيبقى للطلبة كارنيه أحمر

عشان مش يدخلوا الحرم الجامعى فى أى وقت

والمحاضرات هتبقى من خلال القنوات الفضائية

ودى حاجة ممتازة

مكانش ربنا رزقنا بالانفلونزا دى من زمان
عشان الناس تهتم بصحتها وتراعى ربنا فى شغلها ويحترموا بعض كبنى آدمين على الأقل

والحمد لله الحياة مش واقفة فى النقطة دى
لأنى ببساطة بدرس فى مجال تانى
وغن شاء الله عن قريب هكون RHCE
Redhat Certified Engineer
ودا المجال اللى بحبه واللى ناوى أكمل فيه

دعواتك
وعمر اللى قلتيه ما كان حمصى
كلام فى محله
تحياتى وإحترامى الكامل
شاب فقرى

شاب فقرى يقول...

ليس فقيرا من يحب
نورت المدونة
وان شاء الله ربنا يكفينا أى شر فى النصيب

محدش عارف القدر يحمله إيه

شاب فقرى

شاب فقرى يقول...

عزيزى well

أولا : شكرا لتحيتك :)

ثانيا : سور الأزبكية كان إدمانى الوحيد زمان

والان بينافسه الانترنت والعمل والدنيا كلها

ثالثا :مش لازم محطة بنزين
ممكن يكون عنده خطط بديلة ومستعد لكافة الإحتمالات ومهيأ كافة الظروف :)
رابعا :الاساسيات أكيد الدين والحياء والحب و الإيماااااااااااااان
خامسا :متقلقش على الناس اللى بتعارض
مادام حق الرد مكفول
فتأكد إنى مستحيل هرد
:)
جارى قراءة البوست :)
وردى عليه هذكره هنا :
زمان كان عندى مدرس لغة عربية
علمنى الإعتزاز بالنفس والثقة
كان إسمه عبد الخالق
فى مرة كتب الطلبة إسمه عبد الخالق ثروت فى مكان ما
ولما رآه قال هوا ليه عملتوا كدا ؟؟؟
عبد الخالق السباعى أحسن من عبد الخالق ثروت لانه مش أنا :)
هوا يمكن احسن منى تاريخيا وعلميا وماديا وكل حاجة
بس مش انا
ودى علمتنى كتير أوى الكلمة دى :)

تحياتى لتواجدك

شاب فقرى

شاب مفقوع يقول...

السلام عليكم

تحية خاصة جدا لأفقر شاب مصري وخصوصا عالبوست دا اللي خلاني اجري عالبروفايل بتاعك اشوف انت كام سنة

بس لاقيتك مخبي يا كبير


بعيدا عن جوازة صاحبك الاهلاوية ودخولا في موضوع فتاة الاحلام

اللي بسببها ماتهببتش على عيني واتجوزت لحد دلوقتي

المصيبة ان كل راجل بيحلم بواحده من غير ديفوهات

مافيهاش خدش

مافيهاش عيب

المصيبة بقى

انه مافيش واحده كده ودا اللي عمال اقنع نفسي بيه بقالي زمن

وبدأت أوصل لمرحلة الرضا ب (فتات الأحلام)

ولما وصلت المرحلة دي حتى ادنى المواصفات اللي ممكن الاقيها مقبولة من وجهة نظري مش لاقيها

شكلي بعرف عالم بلاستيك

طولت عليك

بس بجد اسلوبك روعه

اه صحيح بحييك عالبوست اللي بعد دا الخاص بفاروق جويدة

شكلنا هانبقى اصدقاء انتيخ

تحياتي ليك

شاب فقرى يقول...

اخونا فى الكفاح : شاب مفقوع ..

مش كبير أوى ومش صغير


يعنى تقدر تقول كدا حدراتاشر سنة وكام شهر :D

بالنسبة لصاحبى ربنا يرزقنا ويكرمنا ومنبقاش زيه

بالنسبة للبنت فتاة الأحلام بتاعتى مليانة عيوب لأنها طبعا إنسان مش ملاك

بالعكس عيوبها قاتلة

ومحدش يقدر يحتملها غيرى

هوا دا بقى توفيق ربنا

لما الاقيها بقى هبقى استحمل

اخرج من المرحلة اللى بتحكى عنها ودور كويس أوى هتلاقى فى حواليك اللى تستاهل بعون الله

لان خلاص يا صديقى

فاضل وقت بسيط ونعجز والعمر بيجرى

ان شاء الله نكون اصدقاء

اما فاروق جويدة

فهوا اعز الناس على قلبى فى الكتابة والكتابات

تحياتى

شاب فقرى

بسنت يقول...

كلام يزعل على فكره
لانه حصل معايا من قبل

بس هقولك على مقوله ممتازه كانت قلتهالى واحده قبل كدا
فيما معناه
ان اللى ربنا كاتب له التجمع لا يمكن لشئ يفرقه

خليك عندك حسن ظن بالله

اما عن التعليقات فلازم تعرف ان كل واحد بيكتب ويعلق بما فى نفسه لان الاناء ينضح بما فيه

فما تستغربش اى حاجه

شاب فقرى يقول...

بسنت

نورتى المدونة

وعلى راى المثل

المكتوب عالجبين لازم تشوفه العين

يعنى اللى فيه النصيب مسيرنا هنشوفه كلنا

يارب يوفقنا

تحياتى

شاب فقرى