الثلاثاء، 15 سبتمبر، 2009

دماغ خيال

مش عارف
بفكر لو أنا طلعت فى فيلم تلفزيونى تسجيلى عن الشباب المصرى ياترى هقول هوايتى إيه ؟؟؟
مش عارف
يعنى غير القراءة اللى بطلتها من ساعة ما عرفت الماوس والكيبورد مفتكرليش اى هواية غير النت
حتى لما حد بيسألنى ويقولى ياعم الشاب انته ليه مش بتقعد معانا فترة كبيرة
بيكون ردى الوحيد إنى مش بطيق أقعد فى مكان واحد فترة كبيرة ( تلات ساعة :$ )
بلاقى اللى قدامى بيرد بطلاقة وكأنى زنقنى : ما إنته قاعد عالنت على طول مبتزهقش ؟؟؟
بيكون ردى الوحيد هوا إن النت مش مكان واحد
إنته جسمك عالكرسى لكن عقلك بيلف العالم مش بيسيب مكان إلا وبيدخله ومش بيقف فى حته بيلف ويدور ويشوف ويفكر
يعنى بتفتح لنفسك بوابه عالكون كله
لكن الغريب اللى إكتشفته فى نفسى من فترة إنى عندى إستعداد لهوايات كتير جدا يعنى مثلا :
من فترة عالنت لاحظت أن البعض بتكون هوايته التمثيل روحت وشفت المسرح ودخلت مسرحيات وبدأت أمثل مع نفسى وسبحان الله
كسبت جوايز كتيرجداااااااا ( فى بيتنا :D )
وزمان برده كنت من كتاب القصة القصيرة والأشعار وكنت مشروع شاعر زى أحمد شوقى والبحترى :D بس بطلت كتابة قصة قصيرة وأشعر من زماااااااااان والسبب إنى بطلت قرايه فجأة بالرغم من إنى بشترى كتب لحد دلوقتى :$ .
وبرده فترة لاحظت موجه أغانى الراب عالنت وفى كل مكان بتطلع لى بقيت مستمع كويس وبسمع أى فلو وبفهم بيتقال إيه مهما كان اللى الرابر بيقوله بسمعه للآخر وعشان كدا بحب الراب وجيت فترة فعلا وبدأت أغنى ولكن واجهتنى مشكلة كارثية خلتنى أتنازل عن هوايه الغنا .
برده فى هوايات كتير حاولت أعملها زى التدوين وأدينى الحمد لله بدون وشايف إن ليه مستقبل رهيب ( أكيد هلاوس )وزى الفل

وكل الهوايات اللى مش بكمل فيها دى بتوصلنى لجملة سمعتها مرة فى أغنيه راب
(( عندى هوايات كتير محتاج ساعات دماغ خيال ...لما بلاقى نفسى فاضى أمسك قلم وأكتب مقال ,,, مش بطال أهوه أى حاجة تخرجنى من الكبت ))

تحياتى
شاب فقرى بتنجانى

هناك 3 تعليقات:

محمود مخلص يقول...

طاب ما انت تمام اهو فقري ليه بقي؟؟ علي فكرة انا ساعات بابقي كده والنت فاتحلي دنيا تانية علي الرغم ان اهلي مش عاجبهم....

شاب فقرى يقول...

انا مصرى فقرى يا محمود

خد بالك من دى كويس

يعنى عندى امل فى بكره

وقوى بما فيه الكفاية لتغيير اى واقع

لازم اى باب يتفتح لك تخش فيه وتتعلم وتتطور

تحياتى
شاب فقرى

MSMO يقول...

في حاجة غلط أكيد
بتحب القراءة يطلتها من ساعة ما عرفت النت وأنا كمان قللت منها عن الأول كتير
ونفس الكلام عن القعاد اليوم كله قدام النت ومحدش قادر يفهم وجهة نظري في غني بلف العالم وأنا قاعد في مكاني
انا بعش ق المسرح بس أنا جربت ووقفت علي المسرح زمان وأنا طفل برئ وخدت جايزة وأنت لأ
أنا كمان كنت بكتب شعر وقصص بس بطلت شعر والقصة بكتب واحدة في سنة
مش مهم كل اللي فات لكن عند الراب واعمل ستوب
أنا مكنتش بحب الأغاني وكنت بسمع لحاجات معينة لغاية لما وصلت لراب ومبقتش اسمع تقريا غيره
مش بقولك في حاجة غلط
بس إنت قررت تكون شاب فقري وانا قررت أكون مجنون
علي العموم الدماغ اللي بعملها خلاص طلعت فوق السحاب وسلملي علي مودي راب