الثلاثاء، 15 سبتمبر، 2009

أكتر حاجة تطلع عينى




أكتر حاجة ممكن تغيظنى فى الحياة حاجتين مش عارف ألاقى لهم حل لحد دلوقتى
1- إنى أصحى على صوت خناقة أو زعيق أو مشكلة أو صوت الموبايل وعميل بيقولى ( أستاذ فقرى أنا عندى مشكلة ) وكأن مشاكلهم مش هتتحل غير لما أصحى والطبيعى إن المشاكل بتكون منهم هما
اكيد حد هيقولى إعمل الموبايل صامت
عمرى فى حياتى ما افتكرت اعمل الموبايل سايلنت غير تلات مرات بس وكل مرة فيهم صحيت لقيت حوالى 25 ميسد كول
وعمرى ما بفتكر قبل ما انام انى اعمل الموبايل سايلنت
مش عارف ليه يمكن نفسى إنى ألاقى حد بيتصل بيه ويصحينى ويقلق منامى ويقولى اهلا ياشاب إزيك عامل ايه وحشتنى وبس
مش يقولى عندى مشكلة او عايز منك طلب أو خدمة أو انا محتاجك تصحى لسبب
نفسى حد يقلقنى بهدف إنه يطمن عليه ويسأل عليه ويشوفنى عامل إيه حتى لو هيطلع عينى وأصحى من النوم
الموضوع دا قالقنى لدرجة انى وانا نايم بقيت بتخيل الموبايل بيرن وامسك ايدى وارد وكانى ماسك الموبايل :$ وفاكر إن فى حد بيتصل يتطمن عليه
عشان كدا ياريت اى حد عايز يسلم عليه ياريت يتصل بيه وانا نايم بالذات


2- إنى وأنا نازل عالصبح من البيت أشوف حد مكشر أو مدايق أو مأنب أو باصص للحياة نظرة تدعو للتشاؤم
ببقى عايز أقتلهم لانى ببساطة يومى بيتلعبك تماما وبيبوظ لو حصلت حاجة زى دى
وما بالك بقى كمان لو كنت صاحى على مكالمة أو صوت منبه رخم
انا عن نفسى أقسمت إن أودتى مش هيدخلها أى منبهات
حتى لما حد بيحتاج يصحى بدرى بطبق أنا بداله وبفضل صاحى وبصحيه فى ميعاده بالظبط

عشان كدا ياريت الكل يبتسم ويبقى ماشى فى الشارع بيضحك
وأى حد يعرفنى أوجه له نداء شخصى :
(( أرررررررررررررررجووووووووووووووووووووك إقلقنى وقولى واحشنى عامل إيه؟؟ ))

تحياتى

شاب فقرى

هناك 3 تعليقات:

دموع القمر يقول...

ابتسامة للزمن تكفى

ترى صمت القهر حراق

وحزارى ان تذرف دمعة

ولو النفس مجروحة

دموع القمر يقول...

هو حد يطول ان حد يتصل بيه ويشكيله همومه

دا انت تفرح كدا انك هتفرج هم عن مسلم

وتفرح انك محل ثقة

اوعى تضايق دا دى نعمة غيرك بيتمناها

انا كنت كدا فى الاول بس عرفت الصح وقولت لا لازم الواحد يتعامل معاهم كويس

دا ربنا يعتهولى علشان اخفف عنه مش ازود همه

وعلى التكشيرة دى حاجة م}كدة لما تلاقيها

يبقى انت اكيد فى مصر ههههههه

شاب فقرى يقول...

أكيد فى مصر

المشكلة يا دموع انهم مش بيتصلوا عشان مثلا عايزين يشكوا همهم

دول عملاء عندى

وبيتصلوا فى اوقات رخمة وغريبة وخاصة وانا نايم وفى عز النوم ومستمتع بالهدوء اللى عامله لنفسى

ببص الاقى دا بيتصل يقولى مشكلة فى الموقع
والتانى يقولى مشكلة فى السيرفر

وهكذا من دا كتير اووووى

فمش بحتمل

حتى الناس اللى كانوا بيتصلوا يشكولى همومهم زمان كنت بفرح لانى انا ملجأهم الوحيد

لكن دلوقتى مبقاش حد منهم بيتصل نهائى

تخيلى فى صداع رهيب فى دماغى من ساعة الاتصال دا
وكله بسبب انى صحيت من النوم على طلبات رخمه من حد مش وقته انه يتصل دلوقتى

منورة المدونة

تحياتى يا دموع :)

شاب فقرى ;)