الجمعة، 26 أبريل، 2013

الإبحار إلي شواطىء غريبة

لازم تكون بتعرف تتوه كويس أوي وتضيع كويس أوي عشان تقدر توصل لمكان عمر ما حد قبلك وصله , وإلا لو كان ممكن الوصول له بدون توهان كانت كل الناس عرفت المكان دا 
بتعرف تتوه ؟
بتعرف تضيع ؟
طيب توهت قبل كدا ؟؟
مش أشطر ولا أحسن مني ولا أكتر مني .
****
- هترحل مع المد ؟؟؟
- ومين اللى قال إني بستني المد ؟أو إني لسه مرحلتش أصلا ؟
***
For certain, you have to be lost to find a place as can't be found. Elseways, everyone would know where it was.

****
عن حلم إمبارح ...


كل ما أنام أحلم ونفس الشخصيات ونفس ترتيب الأحداث 
فى تفاصيل جديدة لكن العتمة بتزيد وإحساسي بالحلم موجود 
والصورة دي كانت أهم تفصيلة فى الحلم
ويمكن كان بيدور حواليها الصراع كله 
عمرك شفت واحد نايم بيحاول يغمض عينيه فى الحلم ؟؟؟
***
عزيزتي أدمن الصفحة
العزيزة : A
مبحبش أتكلم عن الموت وإنتي عارفة النقطة دي 
فهسكت , مش لأني مش عايز أساندك 
أنا طبعا موجود 
ولكن هتكلم وإنتي هنا وأناقشك وأقف جنبك 
بس مش هقدر أتكلم عن الموت تاني 
وإنتي عارفة ليه ؟

***
مازال الكون والوجود كله بكل ما فيه لا يحمل لى أية قيمة أو أي جدوي ولا أجد شىء يستحق الحياة لأجله ...

***

كانت ماشية بترتعش وخايفة ومرعوبة 
بتقول إنها مفزوعة مش مرعوبة بس 
لحد ما قابلناه 
أول ما شافها أخدها فى حضنه 
وش كدا 
بدون أي مقدمات 
أنا عمري فى حياتي ما شفت ولا هشوف مشهد زي دا 
الشارع كله ثبت فى مكانه وحسيت بصمت فى المنطقة كلها 
وبرغم إنها أجنبية ويقال إنهم باردين 
ولكن 
شفت عينيها كانت عاملة إزاي 
شفت حالة الامان اللى دخلت فيها فجأة 
شفت روحه اللى طمنتها فى لحظة 
شفت إيديها بتمسك فيه زي طفلة صغيرة 
أنا لو عشت عمري كله أو ألف سنة فوقه مش هنسي اللحظة دي
كان عندي حق محضنش أي شخصية مهما كانت غلاوتها عندي
****
حاجة عايز أكتبها بقالى كام يوم 
عن التنين والحصان والأمير وحاجات كتير كدا 
خليها بعدين...

شاب فقري     

هناك تعليقان (2):

doaa elattar يقول...

"شفت عينيها كانت عاملة إزاي
شفت حالة الامان اللى دخلت فيها فجأة
شفت روحه اللى طمنتها فى لحظة
شفت إيديها بتمسك فيه زي طفلة صغيرة"

شوفت المشهد قدامي بوصفك له .. شفتها وهي مرعوبة واترعبت معاها واطمنت وابتسمت لما اطمنت

ممكن كل الناس اللي بتحبهم يكونوا حواليك وكل مسببات الإحساس بالأمان لكن انت مش مطمن .. عشان أمانك كلمة السر بتاعته معاه هو بس .. شخص واحد وجوده ممكن يخللي كل الضلمة "نور" وغيابه يحول أي نور لعتمة

ــــــــ

"مازال الكون والوجود كله بكل ما فيه لا يحمل لى أية قيمة أو أي جدوي ولا أجد شىء يستحق الحياة لأجله ..."

تفتكر ؟ .. بيتهيألي مادمنا موجودين يبقى أكيد لوجودنا سبب أو معنى .. حتى لو حاليًا مش لاقيله معنى .. ففي لحظة ما هتلاقي اللي يخليله معنى :)

ــــــــ

"لازم تكون بتعرف تتوه كويس أوي وتضيع كويس أوي عشان تقدر توصل لمكان عمر ما حد قبلك وصله"

متفقة معاك جدًا أوي يعني في دي :)

شاب فقرى يقول...

هوا بالنسبة للمشهد فأنا فقدت أعصابي الصراحة
وكنت منبهر بشكل مبالغ فيه
كل اللى بكتبه أو بقوله أو بوصفه لا يساوي شىء عند مقارنته بلحظة حقيقية مثل تلك

انا لا يوجد عندي شخصية كتلك
أقدر أقول الحمد لله لأني حر
وفى نفس الوقت الحمد لله لأني شايل للشخصية دي شىء مميز جدا ممنحتوش لأي حد قبل كدا

مش هحكي عن قصة البنت هوا المشهد كافي بيتهيألي
بس نقطة الأمان دي
فيها كلام كتير اوى
يمكن هوا شافت انه هيحميها من الدنيا كلها ومن الناس اللى بتخاف منهم
لاننا كنا فى منطقة فيها قلق ومظاهرات وضرب غاز وحاجات كتير تانية

---------

أكيد فى سبب للوجود يا دعاء
ولكن هل أنا مهتم بالوجود ؟
هل أنا عندي أدني إهتمام بالحياة ؟
هل يفرق معايه أي حدث لأي شىء أو أي شخص ؟
هما ليهم معني كبير سواء الوجود بأكمله أو الكون
ولكن أنا مش شايف لهم قيمة بالنسبة لي أنا
زي الحياة بالظبط
لحظة بتبقى بالنسبة لي عايزها عشان هعمل فيها حاجة لانى عايز اعمل كذا ولحظة تانية ملهاش قيمة لاني مش عايز اعمل فيها حاجة

تفتكري السبب من وجودي مهم لو انا اصلا مش فارق معايه التواجد
ولا فارق معايه الحياة او اى شىء فى الدنيا


-------
لازم تتوه عشان توصل لمكان محدش وصله قبلك

يمكن أنا شاطر أوي فى النقطة دي
برغم انى دايما عارف الطريق
وعندي الحل لكل واي مشكلة
الا إني شاطر جدا فى التوهان والتفكير الحر لايجاد طرق جديدة

المشكلة مش فى الحل ولا عمرها هتبقى فى الحل
لكن فى قدرة الغير علي تقبل الحل
وبما ان دلوقتى لم يتبقى شىء ولا احد غيري
ولوحدي وفى عزلتي التامة دي
فأنا شايف انى دلوقتى علي قدر عزلتي علي قدر ما بقيت حر عشان اقدر اوصل للى عايزه اللى هوا محدش يعرف له طريق

كان فى كتاب بقراه من يومين بيقول ان البني ادم مبيبقاش حر غير لما بيتخلي عن كل حاجة وبيبقى فى مطلق الوحده
مفيش قيد عليه
بيتهيألى الفكرة مشابهه لفكرة اديان كتير بالزهد فى كل حاجة
بس دا مش موضوعنا

سيبك إنتي

منورة :)

فقري