الثلاثاء، 18 أكتوبر، 2011

صورة للذكرى


مقدرش أنكر إنى من عشاق التصوير ويمكن أقرب الناس ليا بيسيبونى أصورهم على طول يمكن عشان مفيش غيرى لكن بعد كدا بتعجبهم الصور بشكل ما وبييجى حد يسألنى الصورة بتاعتى حلوة أوى .. صورتها إزاى ...؟؟؟
أنا عندى تقريبا على الهارد النقال حوالى عشرة جيجا صور وفيديوهات ليا ولناس كتير جدا من حوالى ست سنين وحتى الآن ...
***
فاكرين الحكاية بتاعت الراجل اللى إترسم له بورتريه ( صورة ) مسحورة وكانت كل ما يعمل حاجة غلط أو يتجرح أو يكبر فى السن يبان دا فى الصورة ويفضل هوا شاب للأبد مبيموتش ... فاكرين الحكاية دى ؟؟؟
***
الصور فى بعض المعتقدات بتسرق الروح من الشخص وبتحبسها فى إطار ( أيون فى ناس بتصدق كدا حقيقة ) ودا فعلا تقريبا مشابه للحقيقة بالظبط وبالذات لو الصورة مصورها حد قريب ليك ... هفهمك إزاى الصورة تبقى مميزة
الصورة مش بتصور كيان ولا إبتسامة ... الصورة بتصور إحساس اللى مصورها قبل إحساس اللى فى الصورة ... بمعنى لو إن المصور عايزك تبان حلو هتبان حلو ولو عايزك تبان وحش هتبان وحش ولو عايزك تبان طيب وساحر وإبتسامتك ملهاش مثيل هتبان كدا
الصورة بتنقل إحساس المصور قبل أى شىء تانى من خلال المنظر العام للصورة واللى بيظهر فيها وبعدين بتنقل تفاصيل الشخص اللى صورناها ... وهنا بقى وفى ستوب جامد أوى وينطرح سؤال ( ليه بحب الصور وليه بحتفظ بيها وليه طبعت منها مرة من سنتين ؟؟؟ )
الشخص اللى صورناها بتنزل كل تفاصيله فى الصورة مهما كانت دقتها أو الكاميرا اللى صورناها بيها ... دايما فى تفاصيل واضحة فى الإبتسامة ونظرة العين ومسكة الورد والحركة واللبس والغلطات فى اللبس والغلطات فى الشكل والرمش اللى واقع والطرحة اللى متحركة والقميص المكرمش اللى نسيت تكويه الصبح والجاكت اللى كان محتاج يروح الدراى كلين ونسيت توديه عشان كنت سهران عالتليفون والمكان اللى فيه والفتارين والشوز اللى بتحب تخرج بيه والباليرينا اللى إتقطعت والبادى اللى لبسته فى لحظة حاسمة فى حياتك والميكب اللى مكانش تقيل والعيون المعجزات اللى بخاف أرفع عنيا يغضب المولى عليا والله ما انا عارفلى خوف أنا ببقى خايف ربى ولا ببقى خايفك ( دا شعر هشام الجخ يا بيبول )
:D
كدا هنقلبها شعر بقى ... هههههههه
المهم
كل التفاصيل دى بتتحدد فى الصورة لأنها بتوصف شخصية بيشوفها المصور حلوة وبتطلع زى القمر وبتوصف روح طايرة فى سعادة وبتحضن السما وإيدين شابكين فى بعض ووقفة خايفة من بكره وماسكة فى النهارده ومش عايزة تسيبه
من الآخر الصورة بتوصف شخص وإحساس و موقف و أيام وفترة ومرحلة ومليون حاجة
أجاوب بقى ليه عندى بتاع عشرة جيجا صور :D ؛( أكيد صور شخصية وصور تخص شخصيات عرفتها وتسعين فى الميه منهم صورتهم بنفسى )
الصورة لما بتصورها لشخص عزيز عليك وقريب من قلبك ومن الآخر بتحبها ... بتلاقى نفسك حطيت فيها كل الحاجات الحلوة اللى حاسسها واللى حسيت بيها واللى فى اللحظة دى واللى هى حاسه بيها وشخصيتها ونظرتك ليها وعمرك معاها وكل الحاجات اللى مش ينفع تتكتب أو تتقال ... يمكن حتى بتحط مع الصورة ذكرى لمسة الإيدين وذكرى أول ب... وذكرى أول حضن وذكرى أول كوباية شاى ( ليه الحكايات دايما بتبتدى بكوباية شاى ... هتجنن وحد يقولى ليه حكاية تانية إبتدت بمسرحية :D ) وكل ذكرى ممكن تحسها او تحطها
لما ترجع بقى كمان شهر أو شهرين وتقارن هتعرف كويس أوى الشخص دا إتغير فى إيه ووصل لإيه وبقى إيه ... أو يمكن كمان هوا أو هى كانت وحشة قد إيه ومش شفت دا ... بتعرف الشخص دا بقى إيه بالظبط دلوقتى ؟؟ وصل لحد فين ؟؟؟ بتعرف إن الذكرى فعلا ماتت ومش باقى منها غير صورة لشخص ميت ... بتبص لإحساسك حاليا تجاه شخص تانى وبتعرف إنك فعلا حاليا مبسوط وإن قبل كدا يمكن متكونش عرفت السعادة غير دلوقتى لأن حاليا إنته مرتاح ومطمن وبتعرف تنام كويس ومش قلقان ولا خايف ولا مخنوق ولا بيفوت عليك ليلة واحدة حزين ... ويمكن كمان لما تبص للصورة وبالذات يعنى لو كانت صورتك وحد صورهالك تعرف قد إيه إنته كنت فى نعمة وطردت نفسك من الجنة أو حتى ضحيت بشخص عمره ما ضحى بيك ... الصور بالنسبة لناس كتير هى عذاب ولكن بالنسبة لشخص بيشوف التفاصيل كويس اوى زى حالاتى وذاكرته حيه بشكل مستحيل زيى كدا ... فهى أحد النعم التى لا يدركها أحد غيرى تقريبا
أنا بعرف أقارن كويس وأطلع الحلو والوحش والحقيقى من التقليد ولكن حكاية الحقيقى والتقليد دى عالبوست الجديد ... أشوفكم على خير

ملحوظة : بعض الأغبياء يتخيلون أننى لا أفى بوعودى فيحلونى من كل الوعود :) ... حقا أغبياء لأننى لا أعد بشىء إلا وأوفى به مهما كانت قذارة أو سوء الشخص الذى أتعامل معه ... مهما كان سيئا ولكن ربما هوا القدر الذى أراحنا من وعود لا يستحقها من وعدناها لهم أى شىء ولا حتى كلمة أسفل صورة .
شاب فقرى

هناك تعليقان (2):

P A S H A يقول...

جامد البوست ده
:)
عجبتني جداً نظرتك للصور اسمحلي أحيي سموك بحرارة
:)

* على جنب : فيه حتة في البوست فكرتني بفيلم لسه شايفه قريب اسمه :
The Secret In Their Eyes
"ملحوظة : فيه بعض المشاهد الخارجة"

دمت مبدعاً ومتألقاً
:)
أطيب تحياتي

شاب فقرى يقول...

حبيب قلبى يا باشا :)
منور يا شريف
هوا الصور فعلا بتسرق جزء من الروح أو بتاخد ليها لقطة ... صدق واحد بيعشق التفاصيل زى حالاتى وبيقال انه بيعرف يصور ...
مشوفتش الفيلم وهنزله ويمكن أكتب عنه وأكيد هكتب لك رأيى فيه
:)
منور يا جميل ومشرفنى ومسيطنى على راى وليد :)
أتمنى نلتقى على خير عن قريب :)
أخوك الفقرى :)