الثلاثاء، 9 أغسطس 2011

ألف مبروك يا صاحبى

مش عارف ليه بهنيك هنا وإنته عمرك ما هتزور المدونة
ومش عارف ليه بقالى كام يوم مش عايز أفضى نفسى وأكتب كلمتين
ومش عارف أصلا إزاى حاسس إنك إتخطفت منى ف حين إن بقالنا سنين مفترقين
ومش عارف ليه حاسس إن كان لازم أكون موجود من أول ثانية
مش عارف ليه حاسس إنى عمرى ما هتجوز ولا هفكر فى خطوة زى دى
مش عارف ليه معارض الفكرة تماما ومش عارف هكلمك ولا أقولك رأيى إزاى ؟
تصدق .... ألف مبروك وربنا يتمن لك بخير ومن كل قلبى
كان لازم أكتب لك هنا لأنك أهم شخصية عرفتها فى حياتى حتى هذه اللحظة
الشخص الوحيد اللى كان صديقى بجد وفهم معنى الصداقة
الشخص الوحيد اللى كان عارف بفكر فى إيه من غير ما أتكلم
الشخص الوحيد اللى كان بيعرف يضحكنى من قلبى
الشخص الوحيد اللى يعرف عنى كل كل كل حاجة
الشخص الوحيد اللى بجد ... يستاهل إنى أعرفه أو اكلمه
وهكرر المقارنة للمرة المليون .... كل الدنيا دى فى كفة
وإنته أهم من الدنيا والميزان ولو أى حد وقف بينى وبينك فهخسره مهما كان قبل ما أفكر أخسرك
تصدق نسيت إنى ممكن أكون أنا اللى يقف بينا
يمكن أنا عارف إجابة كل الحاجات دى وبحاول مفكرش
ربنا يوفقك ويسعدك فى حياتك يا صاحبى
كيمو
كما كنت تنادينى منذ سنوات

هناك 3 تعليقات:

wella يقول...

على الاقل هنيت صاحبك بينك وبين نفسك

تصدق نسيت إنى ممكن أكون أنا اللى يقف بينا
يمكن أنا عارف إجابة كل الحاجات دى وبحاول مفكرش


ابقى حاول تفكر

ربنا يخليللك صاحبك ويوفقة فى حياتة

فتاه من الصعيد يقول...

يب كاتبهاله في مكان مش هيزوره ليش ؟ :) .... ابعتله اس ام اس :))

sara adel draz يقول...

مفيش حاجة احلى من المشاعر الحقيقية

الصداقة دى حاجة نادرة بس موجودة

حافظ حافظ حافظ عليها

وربنا يخليكم لبعض يارب

ودمت بخير