الخميس، 28 أكتوبر 2010

إسكندرية ومسار والأرواح ورغى كتير



(الأرواح جنود مجندة، ما تعارف منها ائتلف، وما تنافر منها اختلف)
من يومين قريت قصة وعجبتنى وقريت كل التعليقات اللى عالقصة اللى فى المدونة الرهيبة دى واخدة نفس منحنى القصة ...طبعا أنا مش هقول الناس بتحب تصقف لكن لقيت حاجة حلوة أوى عجبتنى .. إن كل اللى معلقين واصلهم الإحساس لدرجة إنهم حسوا بحروف بمعنى الكلمة فى القصة أنا محسيتش بيها ... وجمل وقعت منى لأنى كنت بنجز فى القرايه عشان الشغل ودا نادر ... لقيت الناس مركزة أوى أوى مع القصة وبعدين فكرت هى الناس دى تعرف بعض ؟؟؟ وسألت نفسى تانى : هل كل دول بيمروا بنفس الإحساس اللى فى القصة ؟؟؟ هل كلهم نفس الإحساس والفكرة ؟؟ وهل كلهم مروا بموقف شبه دا ؟؟ ما هوا مستحيل يكون كل اللى معلقين محللين أذكياء ونقاد رائعين وكلهم كتاب كبار
لكن الإنترنت مقابلة بين عقول مش مقابلة بين قلوب ..ومقابلة بين فكرة وفكرة تانية يمكن بيتشابهوا ويمكن بيختلفوا وأكيد عشان فكرتين يوصلوا لازم يكون فى إحساس مشترك للفكرة نفسها عند كل واحد فيهم .. بحيث إن اللى يمس فلان يمس فلان لأن التجربة متشابهة ويمكن لأن الجوهر فيهم كلهم واحد وطريقة التفكير واحدة ...سيبكوا أساسا شكلى تهت فى الكلام...

إسكندرية ومسار إجبارى
تقريبا أنا معنديش حاجة إسمها مسار إجبارى غير فريق واحد بس بيغنى :D وهيبقى بعون الله له حفلة فى إسكندرية يوم الجمعة اللى هوا بكره وأنا نازل لهم مخصوص أهوه ...اللى من إسكندرية ويعرفنى وعايز يقابلنى ...رقمى شغال ومتاح ...الرقم اللى مبيتغيرش ...بس طبعا هيكون معايه أعز صحابى ... واللى هينفض من الإسكندرانية بقى هوا حر ..أنا قلتها أهوه :D

The Right To Ask for forgiveness Suspended
كنت لحد فترة قريبه مقتنع بأن فى ناس معاها حق إنها تطلب السماح فى أى وقت (( خد بالك انا بتكلم فى الحب )) بمعنى إن فى أى وقت يطلب السماح وغن ننسى اللى فات ونبدأ من جديد يا بركات ...المفروض إن الواحد يسامح ودا هوا الصح وانا مقتنع بدا الصراحة ..لكن فجاة جه فى بالى حاجة غريبة أوى ... إن كإنسان فإنته من حقك إن إنته تبص فى عيون حد ومتفتكرش أى جرح أو قسوة ...مش معقول قصة حبك مش هتتكرر ومش معقول عشقك ملوش زى ومش معقول إن التسعة مليار ولا السبعة مليار اللى عالكوكب مفيهومش إنسان تانى ممكن يفهمك أو يقدرك أو يقرب منك هتلاقى أكيد ولكن أحيانا بيكون عليك إنك لازم توقف حق التسامح دا عشان اللى غلط مرة يتحمل نتيجة غلطه ويعيش لوحده...أو يدور على حد يستاهله.
كنت دايما بقول إن التسامح هوا الحل لكل شىء وكل موقف عشان الطرف التانى يقدر الموقف ..لكن التسامح بيعتبر غباء لما بيصدر فى غير أهله... وعلى فكرة التسامح له أهله برده بس لازم تحدد أولا إنته من أنهى طرف فيهم وتتعامل مع اللى قدامك بطريقة تخليك تستاهل المسامحه والعطاء وتقدم المثل ويبقى فى تفاهم متبادل عالأقل مش مصلحة ولا تفكير فى شىء واحد بس خاص بيك إنته أو مصلحة تهمك أكتر من الشخص نفسه ... تذكر دايما إنك شم من حقك تخون حد أو تجرحه حتى لو خانك بس من حقك إنك تمنع عنه حق التسامح وتدور على غيره لما تبص فى عينيه متفتكرش لحظة ألم أو حزن واحدة .

جملة أخيرة :
إنته مش هتاخد نقط على انك صاحب مبادىء ..لكن هتاخد نقط فى الحياة على إنك ناجح مهما كانت الوسيلة ومهما كانت الأشياء للى نجحت بيها ... بعض الناس بيقدر يجمع أشياء بلا قيمة ويعمل منها حاجة ونجاح كبير جدا والبعض بيبدأ من تحت السفر بمراحل وبيوصل برده

كنت عايز أقول كمان حاجة كمان ... بس نسيت
شاب فقرى

هناك 4 تعليقات:

Tears يقول...

لكن الإنترنت مقابلة بين عقول مش مقابلة بين قلوب

عجبتنى اوى الجملة دى بالذات


تحياتي

Antika يقول...

مسار إجباى ده باند جميل جداا

وهايبقى اجمل لو غيروا مواعيد حفلاتهم وخلوها من الساعة 6 لـ 8 عشان الناس الـ ماينفعش تتأخر برا البيت !! D:

بس اغانيهم فعلا فيها افكار جميلة
والحاجات القديمة بيخلوها اجمل !!
---

"إنته مش هتاخد نقط على انك صاحب مبادىء ..لكن هتاخد نقط فى الحياة على إنك ناجح مهما كانت الوسيلة"

دى حاجة واقعية جدا فعلا
بس الافضل ان لو النجاح ده هاييجى على حساب مبادئك
يبقى تكون صاحب مبادئ افضل من النجاح

عشان (المفروض) سعينا للآخرة يغلب سعينا للدنيا
بس قليلين اوى الـ بيحافظوا على ده

انا شخصيا باتكلم دلوقتى عشان مش ف الموقف
بس ربنا لوحده يعرف لو جاتلى الفرصة انجح جدا ومن غير تعب .. ممكن اعمل ايه او افكر ازاى!

still-searching يقول...

انا معاك في موضوع ان التسامح احيانا بيكون في مكان غير مناسب لشخص ميستاهلش

بس أحيانا لما بتتسامح مع حد ميستاهلش التسامح بتلاقيه هو بيلين وبيعترف بخطئه
ادفع بالتي هي أحسن فإذا الذي بينك وبينه عداوة كأنه ولي حميم

لكن التسامح بصفة مستمرة بيدي انطباع بالضعف عن الشخص المتسامح

بالمناسبة
انا عايزة شوية مياه من بحر اسكندرية ومعاهم شوية رمل بقى

طالبة مقهورة ..درجة أولى يقول...

عاوزة اعلق وعيني بتقفل

بص يا كريم يا ابني
مع ان شكلك هتحدفني بالماوس بس مش اشكال انا اصلا مش حاسة بحاجة حاليا

المهم..مفيش حد في الدنيا..ممكن يخليك متسامحش
اصلك مش بتسامح عشان شخص
انت بتسامح عشان تفضل نقي من جواك..بتسامح عشان نفسك وعشان لو غلطت في يوم برضه تلاقي اللي يسمحك
ده العدل الالهي اللي كلمتني عنه

ممكن جدا نسامح اللي قدمنا بس عشان فيه حجات اتكسرت فالمسامحة مش هتصلح حاجة..بس هتريحك اكنك رفعت شعار((طظ)) وخرجت الشخصية اللي سامحتها من دماغك وطردتها شر طردة

.......
جملة اخيرة برضه
لو كسبت مليار نقطة ووصلت للقمة بناءا على مبادئك مش هتحس بلحظة راحة نفسية او سعادة في القمة..

تصبح ع خير