الاثنين، 2 أغسطس، 2010

إتصالات ومشوار إسكندرية



الموبايل بيرن للمرة الستين
برد بفارغ صبر: آلو
الطرف التانى : الحمد لله إنك رديت إزيك يا كيمو ؟
أنا : تمام الحمد لله
الطرف التانى : أمال إيه اللى وصلنى دا بس ...يابنى فوق مش تعمل كدا

أنا : آلو آلو آلووووووو ... الشبكة شكلها بتقطع
الطرف التانى : يابنى عيب الحركات دى دا إحنا دافنينه سوا
أنا : طيب فكك منى بقى ونبقى نتكلم لما أبقى كويس ... سلام يارخم

وقفلت

بعد دقيقة ونص
الموبايل بيرن تانى وفى بنت بتتصل
برد بزهق: آلو
الطرف التانى : أيوا يا كريم إزيك

أنا : كويس

الطرف التانى : إحكى لى وفضفضلى أنا عايزة أسمعك وأبقى جمبك...إيه الصوت دا إنته رجعت تدخن

أنا : وأنا مش عايز أتكلم ... وخليكى فى حالك ... سلام

قفلت بقرف

بعد تلات دقايق
الموبايل بيرن تانى
أنا : ألووووو
الطرف التانى : كوكو يا كوكو يا كوكو
من لهجته عرفت إنه لسه ميعرفش حاجة
رديت : حبيب قلبى
الطرف التانى : عامل إيه يا واد .. وحياة خالتى واحشنى يادزمة يابن ال...
أنا (( قاطعته قبل ما يكمل)) : آه يا سيس ... بتتصل ليه يابنى بقالى كتير مسمعتش صوتك ؟

الطرف التانى : عايزك فى شغل يا حوبى ... إنزلى أليكس عشان الحوار كبير وهيطول وكمان الخطوبة قربت وعايز أروح مع حد عشان مش هعرف أروح لوحدى

أنا : يا صلاة العيد .. بقيتى بتتكسفى يا بيضا ... عالعموم نازلك طالما فى شغل .. محتاج فلوس عشان أجيب كرسى شفته فى سيتى بأربع تلاف ونص ياض.. الكرسى الحالى بيكسرلى ضهرى ...عالعموم مع إنى عارف إنك واطى بس بيس طبعا نازل

الطرف التانى : أربع تلاف ونص ... بيع حشيش أحسن أو سافر الخليج
أنا : ماشى يا أبو العيال ... هفكر .. وعالعموم السفر سهل ... ليلى مبتبطلش زن عشان أسافر لها .. بس إنته عارف
الطرف التانى : ماشى يا كوتى كوتى بس تعرف والنعمة واحشنى ...هات بوسة ياض

أنا : غور يابن التيت ...

بنضحك كالعادة وبقفل فى هدوء

بعدها بخمس دقايق ..... إتصال من رقم غريب
مبردش وبعمل الموبايل عالميتنج عشان ميرنش ولا يزن
بعد نص ساعة بشوف الموبايل ... سته وتلاتين ميسد كول
برد فى المرة السابعة وتلاتين
أنا : آلو ... سلامو عليكم
الطرف التانى : وحشتنى
أنا : شكرا ...مين ؟
الطرف التانى : أنا نور يا قلبى
أنا : عايزة إيه يانور ؟
الطرف التانى : مفيش عايزة أتكلم معاك شوية .. فى شوية مشاكل ومحتاجالك جمبى

أنا : ولا متصلة عشان عرفتي إنه حصل ؟

الطرف التانى : مبعرفش أكدب .. بس عايزة أتكلم معاك .... ليك مين غيرى ؟؟

أنا : ليه ربنا .... حتى لو كل حاجة راحت وخسرتها خلاص... سلام

الطرف التانى : ونعم بالله .. بص يا كريم أنا مش هقو...

قفلت ورميت الموبايل

بعد ربع ساعة
الموبايل بيرن للمرة الألفين النهارده
أنا : آلو
الطرف التانى : إيه يابنى اللى مكتوب فى المسنجر دا
أنا : ياعم دا حوار فاكس فكك
الطرف التانى : بجد

أنا : من إمتى بكدب ياعم الرخم

الطرف التانى : ماشى يا حوبى .. هبقى أتصل بيك بقى لما أشحن عشان أنا كلمت كل الناس على حفلة يوم سبعة... وكلهم مبسوطين من ساعة الحفلة الأخيرة ... هتيجى يعنى هتيجى... سلام ناو

أنا : سلام ياعم القطر
.

مش عارف ليه مش قادر أحس بالذنب لأنى كدبت لأول مرة فى حياتى على صديق من عالنت فى الموبايل مع إنى عمرى ما كدبت على حد ؟؟؟


برمى الموبايل وبقرر مردش تانى على أى حد تانى
مش عارف ليه الناس مش قادرة تفهم إنى عشت لوحدى بما فيه الكفاية سنين وسنين
لدرجة إنى بلاقى صعوبة بالغة جدا فى التواصل مع أى حد
ووقت الشدة والمصايب والأزمات ببقى لوحدى وبحب كدا
يعنى لازم أكدب يعنى ؟
حاجة غريبة والله
*****
من مكالمتى مع صاحبى نستنتج إنى نازل أليكس يوم الثلاثاء 3 - 8
وطبعا هكون فى المكان الطاهر بتاعى عند المكتبة طول النهار لحد بليل لما الخطوبة اللى معزوم فيها تشتغل
وهقابل صحابى واللى هيبلغنى إنه عايز يشوفنى أو يتكلم معايه
إحتمال أبيت وأقضى تانى يوم فى أليكس
بس لو حصل هقضيه ماشى وأتمشى براحتى بقى
ويارب ملاقيش نفس الأسئلة بتاعت الموبايل بخصوص الناس اللى عرفت الخبر أو عرفت أى حاجة عنه
ويارب اللى يعرفنى كويس ويشوفنى ميقوليش نازل ومسافر إزاى فى الحالة دى
عشان بجد تعبت

خالص تحياتى وإحتراماتى ليكوا
شاب فقرى

هناك 19 تعليقًا:

Bassant Elsawy يقول...

بجد ساعات كتير بيبقى ده احساسي و بجد عرفت توصف احساس كامل في كلمات بسيطة :)

شاب فقرى يقول...

بسنت
نورتى
كلها حقايق وحصلت
قدرت اوصل حالى يمكن
نورتى جدا
تحياتى
شاب فقرى

شفـقــة و إحســــان يقول...

نفسى اعرف هو ايه اللى حصل وانت مالك فيك ايه؟؟

moustafa fawzy يقول...

طب مش المفروض نفهم إنت بتتكلم عن إيه بالظبط !!!!

شاب فقرى يقول...

شفقة واحسان
الحمد لله عالوحش قبل الحلو وعلى كل حال
نورتوا :)
تحياتى :)
شاب فقرى

شاب فقرى يقول...

مصطفى فوزى
يوم فى حياتى
المدونة اسمها يوميات
اللى متابعينها فاهمين البوست وعارفين كل اللى قلت عليهم
والبوست وصف ليوم ولاحداث بتحصل
يوميات
والنهاية بتقول انى نازل اليكس
وبرده الحمد لله عاللى حصل
نورت
شاب فقرى

الباحث عن السلام يقول...

استنا بأه لما اشوف اللى فات عشان مش فاهم ..!!

دموع القمر يقول...

قل اعوذ برب الفلق من شرماخلق ومن شر غاسق اذا وقب ومن شر النفاسات فى العقد ومن شر حاسد اذا حسد
انت مالك ياكريم

دموع القمر يقول...

انا لو منى منك وقاعدة فى سنترال كدا هقفل الموبايل خالص ههههه

TWEETY يقول...

ازيك ياعمو انا جيت ازورك
ومبسوطة انى هنا
هو حضرتك مبقتش تيجى تزورنى ليه
هستناك انت كمان تزورنى خلاص اتفقنا

الحب الجميل يقول...

جايز المشكله فى الناس اللى بتحبك مش بتحب تسيبك لوحدك فى وقت ضيقتك
وتحاول تقف جنبك
بس من خلال كلامك فهمت انك بتفضل تعيش لحظاتك الشده والضيق لوحدك
ربنا يعينك ويخفف عنك اى هموم
ممكن تقفل الموبايل وتخلص
بس الحوار جميل جداااا
مكتوب بطريقه تشد القارىء انه يكمل
تسلم ايدك
ومنور اسكندريه
تقبل مرورى
دمت فى حفظ الرحمن

شاب فقرى يقول...

الباحث عن السلام
نورت يا جميل
تحياتى
شاب فقرى

شاب فقرى يقول...

دموع القمر
الموبايل مربوط بالشغل
مينفعش يتقفل ولا حتى نص ساعة
:(
للأسف
نورتى دايما
تحياتى
شاب فقرى

شاب فقرى يقول...

تويتى
أكيد هزورك
منورة يا بنوتة :)
تحياتى
شاب فقرى

شاب فقرى يقول...

الحب الجميل
مفيش حد بيعرف يحب او يعرف معنى الحب
الموضوع دا اكبر من ان اى حد اعرفه وفاهمه يقولى انا فاهم فيه

انا طبعا مش العبقرى الوحيد ولا انا معقد
بس اللى حواليه مش فى نقطة بيحبونى
فى ناس لازم تسأل عشان مش تتلام بعد كدا
بتعمل كدا عشان مصلحتها وبس
كان نفسى اقفل الموبايل
بس منفعش
لانه مربوط بشغلى
فلازم اسيبه شغال ولازم استمر فى الشغل
نورت
وشكرا ليك
اسكندرية منورة باهلها
:)
تحياتى
شاب فقرى

شاب فقرى يقول...

سمسم
نورتى والله ومبسوط برجوعك جدا
قلت لك مرة عيشى حياتك الاول
وبعدين قررى تتربطى بمين بقيت عمرك
اعرفى الدنيا الاول
بالنسبة لى
اللى يبيعنى او اللى ميقدرنيش ميلزمنيش
هوا ببساطة باع مرة
يمكن بسبب الاهل او حتى اى سبب
بس باع
والبيع مفيش فيه رجوع
خلاص
اللى يبيع مرة يقدر يبيع الف مرة
الناس اللى قدرة تحملها ضعيفه
نبعد عنهم احسن
لانهم لما ينهاروا هيشدونا معاهم
وكمان اللى بيبيع مرة لاى سبب
ممكن يبيع تانى
براحتك
دى حياتك وانتى حرة فيها
ربنا معاكى يوفقك ويقف جمبك ويعينك ويقويكى ويعليكى كمان وكمان
تحياتى
شاب فقرى

شاب فقرى يقول...

سمسم
انا مش بقدر حد قدك
بس والله مش بتابع حد
لانى لابس فى مليون مشكلة
كل يوم سفر
كل يوم
كل يوم مشكلة فى الشغل
وندالة من الناس ومشاكل عبيطة وكبيرة
بس طبعا طلبك هيتنفذ
انا ما صدقت رجوعك
بقيت حاسس انى مش لوحدى فى البلوج :)
نورتى
فقرررررررررررررى كالعادة

Rosie يقول...

هو انا مش فاهمه أيه اللى حصل..بس أنه فهمت أوى حته أنا عشت لوحدى كتير لدرجة إنى اتعودت..الواحد عمره ما كان يتخيل أنه ممكن يتعود على الوحدة لكن اهو بيحصل..غالبا الناس بتبقى قصدها تساعد بس مش كله بيعرف..واحد او اتنين ده لو موجدين أصله.....
و ربنا معاك..

ستيتة حسب الله الحمش يقول...

كل عام وانت بخير يا كريم
رمضان كريم