الأحد، 1 نوفمبر، 2009

السلسلة الفقرية الحلقة الثالثة (( أنا يتيم ))


السلام عليكم ورحمة الله وبركاته
اليوم بعون الله سأكتب عن أهم مراحل حياتى فى السلسلة الفقرية كلها حين بدأت كتابتها ظننت أنها ستلقى صدى واسعا لأننى لم أن أحكى أشياءا مهمة عن من قبل ربما ذكرت أننى عملت فى كلية الإعلام جامعةا لقاهرة من قبل وتساءل البعض عن عدم كتابتى للمرحلة التى تليها الآن أضعها بين يديكم تنقسم قسمين مختلفين قلبا وقالبا وموضوعا ومضمونا ,,سأدع الحكم لكم أشعر بأن رأسى يكاد ينفجر من الأفكار وتتملكنى رغبة فى الكتابة إلى أن أفقد أحد أصابعى أو تنكسر يدى أريد أن أكتب وأكتب وأحكى وأستمر فى القص عليكم حتى تخرج روحى إلى بارئها هذه المرة لن أحاول أن تكون هذه الحلقة قصيرة ولن أحاول أن ألفت إنتباهكم بأى أسلوب أدبى أو بأى شىء أثناء القص فقط سأروى الحقيقة ولا شىء غيرها لعل هذا يريح قلبى وتهدأ روحى قليلا وأرتاح
قبل أن تقرأ إذا كنت تبحث عن سطورا هزلية أو مقال يخرجك من حالة من الحزن فكن على ثقة تامة بأن هذه ليست الحلقة المناسبة للقراءة
فهذه حلقة من التاريخ الفقرى تحمل كل الحزن والفقر واليتم

تحياتى لكم
شاب فقرى
***
بسم الله نبدأ
كانت حياتى حقا تسير كالساعة أو ربما أكثر إنتظاما
فترة الثانوية العامة فى حياة كل طالب مصرى تمثل له وهم تحديد المصير و الوصول للمستحيل كما يصفونه لنا
إنسان غير عادى وحياة غير عادية وتفكير لا يمكن أن يكون عاديا
ببساطة طالب فى مدرسة الريس الثانوية بنين
مدرسة تبعد عن مقر سكنى حوالى عشرة دقائق بالسيارة و 25 دقيقة ماشيا
لا هى بعيدة ولا هى قريبة
دخلت المدرسة كانت كلها إنتظام ما شاء الله وكان يحكمها ناظره أبسط ما يقال عليها لواء من الجيش متقاعد
بس أنا كنت شقى لدرجة إنى فى مرة بنط (( قفزت )) من مكانى وخبطت فى السقف ودماغى إتفتحت ونزلت تانى زى الفل
ولا حسيت بأى حاجة ونزلت يادوب غسلت راسى فى هدوء وطلعت ماسك منديل واليوم خلص
روحت البيت نمت بالمنظر دا لحد بليل ودماغى مفتوحة أربع غرز
تقدروا تقولوا كان فيه صحة رهيبة
تهد جبل
لحد ما الوالد عرف بليل ومصدقش إنى نطيت كدا عادى زى أى بنى آدم خلقه ربنا وخبطت فى السقف :D
فين وفين على ما إقتنع وروحت خيطت دماغى وإشطة خلص الحوار
لمع نجمى فى المدرسى الثانوية فى العام التانى
طالب مجتهد وبيعشق المشاكل
مستحيل كنت أسمع كلمة من حد وأسكت
أو أسكت عن ظلم من أى شخص كان
ببساطة كنت بالرغم من التفوق إلا إنى ممكن أشتم الباشا لو فكر يبص لى بصه وحشة
ببساطة طالب مجتهد لكنه واعى بحقوقه وواجباته وعارف هوا عايز إيه وعايز يوصل لإيه
طبعا كنت علمى
ومحدش يقولى ليه طبعا
بالرغم من إنى لو كنت دخلت أدبى كان مجموعى هيبقى أكبر
إلا أنى حبيت العلمى
يعنى عندك إمكانيات مهولة تفوق الخيال فى عقلك وإنته عارف كدا كويس
ليه بقى تسيب المجال اللى إنته بتحبه
ودا بالظبط اللى حصل
دخلت علمى ورياضة
طبعا أنا لسه فى سنة تانية لا كنت حددت لا رياضة ولا احياء
ولازم يكون فى حياة كل منا حب أول
حبى الأول على ما أعتقد
كانت هى
بنوتة هادية تسكن فى نفس الشارع
طبعا مش ساكنه قدامى مش لازم أقع زى كل شاب فى حب بنت الجيران ولو حبيت بنت الجيران كانت هتبقى مشكلة
الشارع واسع أوى أوى فمكنتش هعرف أكلمها إلا لو الشارع كله دخل معانا فى المناقشة
المهم إنى كنت بحبها
مش بحبها وبس
بعشقها عشق
لدرجة غن اليوم اللى كان بيمر عليه من غير ما أشوفها مكنتش بكتبه فى مذكراتى ومكنتش بحسب إنى عشته أصلا
كانت لنا أياما كل أسبوع نلتقى فيها
لا نلتقى بالمعنى الحرفى للكلمة
ولكنى أراها من بعيد وتبتسم فى هدوء وتمر مرور الكرام
حقا كانت أعظم أمانى حياتى أن أظل أنظر لعينيها فقط
فقط
لا حديث ولا حتى إتصال بليل ولا إنى أخرج معاها ولا بتاع
كنت فى السن دا ببساطة شايف إن الشاب المحترم مينفعش يكلم بنات ولا يقابل دى ودى ويعط هنا وهناك
كانت تمر من أمام منزلى يوميا
كنت أنتظرها مش فى الشباك ,,,, لاء لاء لاء ... البلكونة :D
طبعا مش هقف فى البلكونة عالفاضى كدا
أخد الكتب والورق والكراريس والمذكرات اللى عاملها بإيديه والقلم بتاعى اللى بذاكر بيه
وأطلع أفرش فى البلكونة
وهات يا مذاكرة
وعينى عالطريق
لحد ما هى تفوت
مش عارف أقولكم كنت بعشق إبتسامتها إزاى
كنت بعشق مجرد مرورها من قدامى كدا
طبعا كنت بدخل كل يومين من البلكونة
مخلص قلم من الأقلام اللى معايه
كنت بفحت فى الكشكول ,,,, وكان عندى يوم الخميس هوا الموسم الأسبوعى
أفضل أذاكر طول النهار لازم أخلص كتاب الكيميا اللى أنا أساسا كنت ملخصه على جمب وكمان لازم أحفظ لى كام صفحة كلمات
مش بقولكم كنت دحيح كبير جدا
والحمد لله مرت السنة بكل مشاكلها بكل فواجعها
وجبت كام ياترى ؟؟؟؟؟؟
92 %
كنت الأول فى المنطقة اللى أنا ساكن فيها
تخيلوا
مفيش حد فكر يعدينى لا من قريب ولا من بعيد
معرفتش ليه غير لما خلصت سنة تالتة
طبعا أنا مكنتش باخد درس ولا نيلة
كله self study
يعنى كنت مجتهد على حق ربنا
ومر العام
وفى الأجازة حاولت البنت دى إنها تكلمنى
تخيلوا
من كتر الخجل اللى أنا كنت فيه ومن كتر عشقى ليها
وفهمى للحب بأنه شىء عظيم ومقدس وفهمى للبنت على إنها من ملائكة الدنيا
ورفضت إنها تزعل أهلها عشان خاطرى
أو تكلمنى من وراهم ولو حتى فى التليفون
رفضت الموقف أكتر من مرة ومكنتش بحاول أتقرب
يا دوبك أشوفها من بعيد كفاية عليه أوى أوى أوى أوى

أنا عارف إن الجزء اللى فات دا ممل جدا جدا جدا
بس معلش إستحملوا أنا نفسى زهقت وأنا بكتبه بالرغم من إنها يومياتى الغالية

وتيجى الإجازة والبنت تزهق وتبتدى تكشر فى وشى فى الراحة والجايه
صدقونى ساعتها حسيت بإنى إنطردت من الجنه
بالظبط بالحرف كدا
الحياة قلبت أسود معايه
بالإضافة لإنى قربت من سنة تالتة
والواحد لازم يذاكر وطبعا كل زمايلى بدأوا يروحوا درس هنا وهناك وأنا منفض بإعتبار إنى شاب دحيح آخر حاجة ومينفعش أروح أخد درس
وجاء شهر تمانية
مر الشهر فى هدوء عادى جدا
طبعا من أول الشهر كنت عمال رايح جاى على دكاترة الأنف والأذن والحنجرة
مكنتش بعرف أخد نفسى
مش عارف بقى عندى لحمية ولا إيه
ودكتور تانى شاف الإشاعة قالى دى زواذد وهنشيلها لك بعمليه
طبعا انا كنت فرحان
هعمل عمليه يا رجالة وأقعد مأنتخ فى البيت ويجيبوا لى آيس كريم
وكمان بقى نايم عالسرير والأكل لحد مكان جنابى
وقعدت أفكر أعمل العملية دى فين
فكرت ومعايه الوالد والوالدة
لحد ما خلاص حددنا الدكتور اللى هيقوم بيها وروحت كشفت عنده وتمام التمام
وبكذا ومعانا الفلوس وكل حاجة وباقى يومين
والدى فى الفترة دى كان مريض جدا
من السجاير صحته تعبت وصدره مبقاش مستحمل
وكمان عنده السكر وضغطه بقى بيوطى ويدوخ وحاجات كتير كدا
والله أنا لو قعدت احكى هوا كان عند ه إيه بالظبط
تقريبا هنتكلم نص ساعة بالميت كدا
وكمان مش هعرف أوصلكم
وجه يوم الخميس 25 /8 وصحيت أنا ووالدى وروحنا جبنا المعاش من البنك وإتمشينا شوية
مش عارف بقى إحساس إيه اللى كان جوانا
بس سمعت منه كلام ونصايح وحاجات كتير وأنا كنت إبن مطيع ومحب لأبوه بالرغم من القسوة الزايدة فى التعامل
طبعا لأنى الصغير ولازم أتعامل بشدة عشان مطلعش خيبان ومتدلع
قعد ينصحنى ويقولى خد بالك من أخواتك ومن البيت وإنته راجل وكلام كتير كدا
وروحنا وجينا بليل وتعب شوية زى كل يوم
أنا قلت عادى
قعدنا جمبه كلنا وطفينا النور وقاعدين معاه فى الأودة يمكن يطلب أى شىء
وفضلت أنا قاعد فى البلكونة جمب الأودة بفكر
ياترى يا بابا لو صحيت الصبح مش لقيتك مين هيصحينى كل يوم
ومين هيضربنى لما أغلط وأتغابى زى ما بعمل على طول فى حاجة وأبوظها
ياترى مين اللى هيعمل وهيعمل وهيعمل
وعيطت
وبعدين قالنا قوموا ناموا انتوا ربنا يسترها معاكم وأنا ربنا يسهل
وصحيت تانى يوم
الجمعة 26-8
فطرت ونزلت روحت البيت اللى جمبنا بيت الحاجة جدتى
قعدت أنقل معاها شوية حاجات
وأنا واقف فجأة سمعت صوت بينده بفزع على إسمى
يا كريم يا كريم
جدتى قالت لى حد بينده
قلت لها مفيش حد عندنا بينده كدا وسكتت
وبعدين بصيت من البلكونة
لقيت والدتى واقفة بتعيط وبتقولى
(( إلحق يا كريم أبوك مات ))
مش فاكر أى حاجة غير إنى لقيت نفسى جمب أبويا فوق عالسرير وبعيط
وبحاول أحركه وبعيط
ومش مصدق إنه خلاص راح منى وإنى خلاص لوحدى فى الدنيا دى
ومش متوقع إن دا الموت وإنه بيبقى سهل كدا
ومش عارف أعمله إيه تانى عشان يقوم
ومش مصدق نظرة الموت فى عنيه
مش متوقع إن دا هوا الموت
عيطت دقيقتين وأنا بقوله أنا اللى مكنتش مصدق كلامك
وبعدين فجأة قمت من مكانى
ومسحت دموعى
وفكرت دلوقتى العمل إيه
تناسيت كل شىء
تناسيت حالة الوفاة اللى فى بيتنا ووالدى اللى مش هعرف أكلمه تانى
ونسيت ساعتها إنى طفل محتاج الحنان من أبوه بأى شكل
ومحتاج أبوه يطبطب عليه زى زمان
وخرجت من الأودة وأنا بتحرك بسرعة زى الصاروخ
طبعا الموضوع دا كان الساعة حداشر وتلت تقريبا
طبعا الوقت بيداهمنا
قبل صلاة الجمعة كان كل شىء إنتهى
إستخراج شهادة الوفاة
والغسل والكفن وكل شىء
وصلينا الجمعة وصلينا عالوالد
وأنا رايح الجامعة كنت بتقطع
لأن كل جمعة كنا بنصلى سوا وأنا اللى بسنده وبمشى جمبه
ودلوقتى انا شايله وهوا خلاص مش هيروح معايا ولا يقعد معايه تانى
خلصت الصلاة وخلص كل حاجة
سافرنا البلد وتم الدفن وإنتهى كل شىء
وبدأ العزاء
وأنا فى قمة إنهيارى ثبتت أيضا وقت العزاء
لا دموع ولا ضعف ولا شىء
فقط إنى باخد العزار فى صمت
الناس على قد ما كانت بتعزينى كانت مبهورة بيه
ومبهورة باللى بعمله وإنى لوحدى فى بلد تانية وعملت كل حاجة وخلصت
وخلص اليوم وإنتهى على خير
وأنا بعد نهاية اليوم بكيت
بكيت مر البكاء
دقائق
وسكتت دموعى
وحتى الآن لم أبكى مرة أخرى
بالرغم من مرور سنوات على ما حدث
ولكن لم أستطع البكاء على أى شىء
خسرت كثيرا وودعت العديد من الأحبه ووارى التراب العديد منهم ولم يتحرك قلبى
ولم أبكى مرة أخرى
نقدر نقول إنى موتت فى اليوم دا أو قلبى مات
مبقتش بحس لا بحب ولا بحنان من أى حد
خلاص
وبعد عودتى للبيت وفى نفس الأسبوع وفى يوم الجمعة اللى يليها
عملت العملية والحمد لله
مكنتش متخيل أثر المخدر بينتشر فى الجسم بالسرعة دى
مجرد ما لمست الحقنة إيدى
كنت روحت عالم تانى
وصحيت وأنا وشى متكتف وحاسس بيتم الدنيا كله
حاسس إنى محتاج والدى فى اليوم دا
حاسس غنى محتاج حد يطبطب عليه زى ما كان بيعمل معايه بالظبط
محتاج ألف حاجة
روحت فى اليوم دا وفى خلال ساعة كنت زى الحصان
كنت صحة وجامد
ومر يوم والتانى
وجه وقت فك الشاش من على منخيرى
روحت لنفس الدكتور
وهوا بيفك الشاش كان الشاش بيقطع فى لحم منخيرى
دا اللى حصل ببساطة
فضلت منخيرى تجيب دم ساعتين ونص
ويمكن أكتر
لحد ما أخدت فى النهاية حقنه لوقف النزيف
ومشيت من العيادة الدكتور وصلنى
ووصلت البيت فى أمان
وهنا بقى نقدر نقول
تداعت صحتى تماما
روحت فى داهية
مبقاش فى صحة ولا حتى ربع زمان
مش عارف دا بقى إحساس نابع من وفاة والدى ولا من العملية ولا من النزيف ولا إيه
ولكن بقيت حاسس بكدا على طول
بحالة من الضعف
وبدأت الدراسة
على ما فقت مكنتش لا بقيت فى أى درس ولا اتفقت مع أى مدرس
فضلت شهرين بذاكر لوحدى
فاتنى كتير وحسيت إنى مش فاهم
بدات اروح درس
فيزيا ورياضة
والباقى طنشته لانى عبقرى فيه بالفطرة
طبعا كنت وصلت لدرجة إنى بحل مسائل المدرسين حبايبى بيفشلوا فى حلها
كنت عبقرى فى الرياضة بكل ما تحمله الكلمة من معنى
لحد نص السنة
وفى المدرسة بقيت هادى ووديع ولا بهش ولا بنش
هااااااااااااااادى تماما لا بكلم حد ولا بصاحب حد
ربنا كرمنى بتلاتة أصحاب وشكرا على كدا
بقيت بقول رضا وبس
وعلى النقيص بقى كنت فاشل فى الفيزيا
وإتطردت من الدرس تلات مرات
أيون تلات مرات
بس المدرس كان بيحبنى شوية
فكان بيرجعنى كل مرة
مكانش بياخد منى مبلغ يعنى عشان يرجعنى الدرس
بقى مسيطر عليه إحساس رهيب باليتم
بالرغم من إنى حاسس إنى بقيت راجل البيت وحاجة تفرح وزى الفل
بس برده مين فينا يقدر يستغنى عن أبوه ؟؟؟؟
ومرت الأيام وفى نص السنة بدلت الإهتمام بقيت بذاكر فيزيا ونفضت للرياضة
وهنا كانت المشكلة
فى عندى مواد تانية مش مذاكرها ولسه الفيزيا
بدعت فى الفيزيا وبقيت متذبذب بين دى ودى ودى
طبعا البنت اللى بحبها مبقتش حتى بتبص فى وشى
مش عارف ليه ؟؟ وليه القسوة ؟
وبقيت بتصرف تصرفات غريبة
يعنى بقيت بروح من المدرسة ماشى
ولا حد بيعرف ولا بينيل
وبقيت وحيد جدا
وبقى مليش صحاب
ولو ليه صحاب فبيستغلونى فى هدوء
بقيت حالة تقدروا تقولوا معقدة إلى أقصى درجة
وخلصت السنة الدراسية
ومجموعى فى السنتين وصل 87.8 %

وخلصت وكتبت الرغبات والحمد لله جالى كلية زى الفل

حقوق حلوان إنتساب
وأنا علمى رياضة و 88 فى المية
وطبعا لغيت فكرة إنى أروح اى معهد أو كلية خاصة
لإحساسى بالفقر
إن مفيش فلوس
بالرغم من إن الحالة ميسرة ومستوانا كويس جدا
ولكن إحساسى باليتم نبع منه كل حاجة تانية فى الدنيا دى
عالعموم
طبعا أنا رفضت وشجبت وروحت حولت ملفى لكلية تانية

حولت على فين بقى

إنها حلقة اخرى
خالص التحية والتقدير
شاب فقرى

هناك 68 تعليقًا:

شاب فقرى يقول...

التعليق الأول محجووووووز

لفتاة

بنوتة

هادية

تتقن لغتى الوحيدة

واحدة وخلاص

Saso يقول...

اول تعليق يارب اول تعليق
ماكلتش شيكولاته بقالى كام يوم
راجعالك بعد القرايه

Saso يقول...

شاب فقرى
امام الموت لااجد سوى ان اصمت.

أميرة علي كوكب مهجور يقول...

كريم انت بجد خلتني اعيط :( مش عارفة هي الدنيا اللي عامله تغمق والا العيب فينا :(

والموت ده غريب اوي بياخد ناس في ثاتية بتلقا واقف مش فاهم ومش عايز تفهم ايه اللي حصل انا قاكرة لما قالولي ان خالو توفي انا قولتلهم بطلوا هزار يا جماعة كنت بضحك وبعيط في وقت واحد

الدنيا دي غريبه اوي بجد بس ربنا موجود واكيد هو حاسس بينا ومعانا بكرع اكيد احلي ان شاء الله

Saso يقول...

من بعد ماقريت البوست وانا بفكر
انا ممكن اقولك ايه
لكن لااملك سوى الصمت فهو ابلغ لغات الدنيا للتعبير عما بداخلنا

'' حطام (ك) بقايا '' يقول...

والله العظيم انا مش عارفة اقول ايه و لا اعلق ارد بايه و لا اي حاجة
انا بكتب و دموعي مغرقة خدي
مش عارفة ليه حسيت نفسي معاك في كل المواقف
خصوصا موقف موت والدك
بجد مش عارفة اقولك ايه

أميرة علي كوكب مهجور يقول...

انا اسفه اني قولت الاسم والله مش اقصد كنت بقول بجد خلتني اعيط اه والله :( انا مش عارفة الدنيا هي اللي عامله تغمق ولا العيب فينا احنا

الموت ده غريب اوي بياخد حد بتحبه اوي وبسرعه اوي بجد مش مفهموم ومش عايز تفهم يوم لما قالولي خالو توفي قولتلهم لا بطلوا هزار انا كنت بضحك وبعيط في نفس الوقت

يعني ايه تفضل تكلم ع حد كتير وفي اخر كلامك تقول ربنا يرحمه اصله مات

اما في الحب بقا لما تلاقي حد اتغير في معاملته فجاه وبدون مبرر برضه مبفهماش طيب ليه متعرفش


بس في الاخر ربنا معانا واكيد كاتبلنا الخير واكيد لسه في حاجات حلوة جايه ربنا موجود والحمدلله

الشعب لابد له من حكومه تشكمه يقول...

متابعه للاخر..

شاب فقرى يقول...

التعليق :

(أميرة علي كوكب مهجور)

انا اسف انى منشرتش التعليق

بس خلاص رجعت نشرته تانى

بجد زعلت عشان قلتى عيطت

دا حال الدنيا

حاجات كتير بتحركنا وبتأثر فينا

وإحنا لا نملك سوى الصمود أو الإنهيار

شاب فقرى

شاب فقرى يقول...

saso

شكرا للمتابعة والتعليق

:)

لكى تحياتى
شاب فقرى

بنت قلبى يقول...

انا بقرأ البوس دا
ورفعا حجبى كنت مفكره انى مافيش اى حاجه بجد تغير البنى ادم بالموت الا انا
فضلت دقايق متنحه انى ارد بايه مش عارفه
وقلت فى الاخر الله يرحم الجميع يارب
لاننا مش بنحس بقيمه الشخص الا لما يبعد عننا
حتى انا كنت بدعى كتير اووى على بابا(لا تعليق)
ودلوقت بندم ندم عمرى وبتمنى بس نفسه فى البيت
بجد الموت لشخص احنا حتاجينه احساس كبير اوى وغريب اوى
وصح هيا دى الدنيا على ما تديك على قد ما بتاخد وباخد وباخد
بس الاهم اننا نرضى بالا ربنا كتبه
بجد اتمناللك حياه تعوض كل ثانيه عدت عليك وانت محروم من اشياء كتير
من غير حتى ما اعرف الا حصل بعد كده

أميرة علي كوكب مهجور يقول...

اسف ع ايه عادي ولا يهمك المهم فرفش كده واضحك وان حسيت انك مبقتش قادر قول يارب من قلبك بجد قول يارب وانت حاسسها اوي هتلاقيه بجد معاك

وادي نكته كمان
واحد اول مره ياكل لبان فحلف انه ماينامش الا لما يخلصها

يلا فرفش كده انا عارفه انها نكته رخمه بس معرفش غيرها:)


لو مقدرتش تضحك مدمعش و متبكيش وان مفضلش معاك غير قلبك مش هتموت هتعيش

الشعب لابد له من حكومه تشكمه يقول...

اممممممم لقيت كومنتى بايخ..
بس انا مش بعرف اقول ايه...
هقولك متزعلش,لازم تزعل.
هقولك معلش...كلمه مالهاش معنى..

شاب فقرى يقول...

أميرة علي كوكب مهجور

انا رجعت تعليقك تانى لانه يهمنى انى مزعلش حد تحت أى سبب وأى مسمى

المهم

الواحد فى الظروف بتاعت الموت دى بيبقى فى عالم تانى

مش عارف أوصف إزاى بس بيكون فى عالم تانى

يعنى مش بيكون حاسس بحد

بيفقد النطق والكلام أحيانا

يقدر يتكلم بس مش بينطق

أنا فى اليوم دا ناس شافتنى وكانت متوقعه إنهيارى التام

ومتوقعين طفل صغير
إتفاجؤا بتصرفاتى وباللى بعمله

شاب فقرى يقول...

شيما

الشعب لابد له من حكومة تشكمه

خليكى متابعه للاخر

انا بحب الصمت وبحب السكوت وبكره الكلام فى حاجات مينفعش الكلام فيها

:)

صباح الفل

إيه رأيك فى الحلقة ؟

شاب فقرى

شاب فقرى يقول...

أميرة علي كوكب مهجور

تسلمى يارب عالنكتة :)

ملناش غيرها فعلا

أهوه بضحك وعايش

بضحك وأفرح وأعيش وأقنع نفسى إنى أنا مبسوط قاعد مستنى الفرصة اللى تخلينى أطلع صوت

بس كدا

نورتى المدونة

وآسف لو البوست خلاكى تعيطى

انا كدا همسحه لو حد قالى بعيط تانى

:(

تحياتى

شاب فقرى

أميرة علي كوكب مهجور يقول...

ربنا يخليك يا فقري من خلال مدونتك المتألقه بوجه دعوة للشيما سابقا

جيجي حرام عليكي لففتيني كعب داير عليكي يابنتي حرام عليكي لو كنت هكلم حد في امريكا الاتنينه كنت وصلتله

هتهبل وامشي اقول حد شاف جيجي جيجي مجتش هنا يعني يرضيكي كده المواصلات دي يعني مينفعش افضل في مدونتي كل يوم اخرج ادور عليكي ينفع كده يعني :)


بصي يابنتي ابقي بس قولي راحه اللقاء ولا لاده طلبي الاخير

فعلا صدق اللي قال خير تعمل شرق الدلتا :) بهزر ع فكرة

منورة يا جيجي

شكرا ياعم فقري نردهالك في الافراح

فراشة يقول...

لا اله الا الله

دموعي مش مخلياني عارفه أقول ايه

وأصلا مفيش أى كلام ينفع يتقال غير يارب يكون ف الجنة وتتقابلوا ف الجنة ان شاء الله

شاب فقرى يقول...

بنت قلبى

أنا كنت زيك

بس بقيت بدعى لوالدى فى كل صلاة

لانى حسيت بقيمته وكان بيتعب قد ايه

وعرفت يعنى إيه أب لما شفت بنوتة زوغيرة بتقولى يابابا

بجد عشقت الدنيا وبقيت عايز اعمل عشان خاطر تبقى بنتى فعلا المستحيل :((

تحياتى لتواجدك

لا يبقى لنا من الأحبه غير الذكرى

فلنحاول أن لا ننساها

شاب فقرى

شاب فقرى يقول...

فراشة

قومى إغسلى وشك كدا وفوقى

:)

حتى فقرى بطل يعيط على اى حاجة حتى ذكرى الموقف دا

تحياتى لمرورك وإحساسك بالبوست واللى كاتبه

شاب فقرى

๓คภ๏ภค يقول...

ظروف صعبة لكن صنعت رجل بمعنى الكلمة ..

وبجد مش عارفة اقول ايه بحب اسمع وم

اعلقش احتراما ليك وانت بتحكى ..

بس هاقولك صبرا جميلا وان شاء الله ربنا

هيعوضك عن احساسك ده بالخير باذن الله

كده عرفت اسمك كريم مش احمد ولو انك كنت باين احمد خالص ههههه

ضحك ورووووق محدش واخد منها حاجة صدقنى

مستنية باقى فضفضتك معانا اعتقد ادمنتها

اسلوبك حلو ومش ممل خالص ع فكرة عكس م انت دايما بتقول

تصبح ع خير بقه

شاب فقرى يقول...

๓คภ๏ภค

شرفنى تعليقك وتواجدك

ايون كريم

الواحد اهوه مبتسم وبيضحك وعايش والحمد لله

رضا

ذكريات

ربنا يخليها لنا هى اللى دايما بتفضل معانا والكل بيفارق

تحياتى
شاب فقرى

Roqaya يقول...

حياتك فيها تغيرات كتير, وشكل الفترة دى كانت نقطة تحول جامدة أوى فى حياتك,
وخاصة موت والدك (ربنا يرحمه)
هو فعلا اللى غير كل حاجة, خاصة فى سنة تالتة اللى بتحدد مصير اى حد للأسف.
بس أكيد القوة اللى بتتكلم عنها انها اختفت دى كانت مجرد حالة اطمئنان لوجود والدك وهو دة اللى بيخليك تحس بالقوة.. بس المفروض ان القوة دى جوانا احنا ولازم نحاول منفقدهاش بفقدان حد.
تانى حاجة ربنا يعينك على موضوع رجل البيت دة عشان أكيد دى مسئولية بس كدة كدة ان شاء الله هتبقى مسئول فى يوم عن بيت.. بس الموضوع بدأ معاك انت بدرى شويه :) اعتبره على سبيل التجربة :)
والبنت اللى انت حبيتها كان طبيعى أوى الصراحة انها تتغير, عشان النظرات مش كفاية انها تديها وعد بأى حاجة تخليها تستنى كدة
اسفة على الاطاله
بجد رغم ان البوست طويل بس مفيهوش اى ملل بالعكس اسلوبك ممتع جدا.. ومستنيين الباقى. يا ريت متتأخرش :)

بيطرية ومش بايدى يقول...

انا كنت ناوية اكمل قراية البوست كله
بس قريت المقدمة بس
ولقيت الببش نازل عليا بيتنسل
قولت اقوم احسن
سلام

همســات عــلى ضــوء الــقمر يقول...

صباح الخير يافقرى

ههههههههههه
حلو التعليق الاول دا

همســات عــلى ضــوء الــقمر يقول...

ايدا يابنى مش لما نلحق نقرأ بوست نظرة

هههههه

انت لحقت

وكمان الله اعلم هكون التعليق الكام
لالا

كدا خلاص لو سمحت انا هلغى الاشتراك

همســات عــلى ضــوء الــقمر يقول...

لان شكل الموضوع كبيييير

وانا مشغولة جدا جدا


انا جيت اصبح بس

واحجز مكان :)

واكيد هقرأ لما افضى
ودعواتك

بس اوعى تحط بوست جديد
:):)

همســات عــلى ضــوء الــقمر يقول...

وصدقنى ممفيش احباط
انا هقولك على حاجة اتعلمتها فى الجرنال
كان يوقولى ايه

اكتبى اللى انت عايزاه واوعى تقفى خلصتى

اقرى بعدها تذوقتى الموضوع هاتيه وانشريه
وقفتى فى كلمة واحدة وحسيتى ان فيه حاجة غلط
او حسيتى ان الموضوع مش مفيد او سألتى نفسك سؤال او حاجة مش واضحة تأكدى مليون فى المية ان القارىء هيكون كدا

فانا كتبت الموضوع وبعتهولك على طول بعديها قريته حسيت انه ملوش لزمة
دا اقعد احكيه على المصطبة مع ستات الحارة بتوعنا :) هما بيحبوا الحكاوى دى

عشلان كدا كنت متوقعة انك هتقول كدا

لكن ولا يهمك عادى يعنى

وبجد انا حاسة انى تقلت عليك وحاسة انى تعديت حدودى مش عارفة ليه

بس ربنا يديم الاخوة بينا
واوعى تضايق انى برغى كتير :):)

بس تعالى هنا
كريم وفقرى مش ماشين على بعض :):)

بس هنمشيها فقرى برضو علشان ساسلتك الفقريى دى :)

الست فرويد يقول...

اديك خدت بثارك يا كريم

وحركت دموعى

:)))))

كده نبقى خالصين

ربنا يجعل مثواه الجنة ان شاء الله

انا اكيددددددددد فى انتظار باقى الحلقات

طريقتك فى الحكى مشوقة جدا ربما لانها صادقة ومن القلب


تحياتى

همســات عــلى ضــوء الــقمر يقول...

يخرب بيت كدا

هيتقرى هيتقرى

فنروح نكمل ونرجع ونبتدى بالبوست الرومانتيكى للى تحت

شكل التعليق الاول محجوز لها :):):)

همســات عــلى ضــوء الــقمر يقول...

كلامك حلو اوى يافقرى

واحساسك فيه جميل

ومتقولش عيها احلام ضائعة لانها هتتحقق ان شاء الله لكن وقت ميعلموش غير ربنا

وهتيجى تقولك بحبك وبعشقك
وهتاخدك بين اديها وتمسح على راسك
فلازم هيتحقق حلمك

اصلك مش هتتجوز البواب بتاعكم يعنى :)

وربنا يسعدك دايما

نروح بقى للبوست اللى بعدوا

همســات عــلى ضــوء الــقمر يقول...

لاحول ولا قوة الا بالله
انا لله وانا اليه راجعون

ربنا يخليلك الست الوالدة
ويسعدك دايما

الله يسامحك يابنى
عليك اسلوب اصلا
وربنا دموعى نزلت
فكرتنى بأيام عمرى ماهنساها
يوم ماقالولى ان اصحابك عملوا حادثة وماتوا وواحدة فى العناية
ويوم ماحبيبة قلبى ماتت بالسرطان
ويوم مااغلى ماعندى ماتت زى امى
من يوم ماتولدت وانا عايشة معاها
حسيت انها ماتت وهى زعلانة منى ربنا يرحمها

ربنا يرحم موتى المسلمين والمسلمات

ههههه
بتفكرنى بنفسى وانا فى المدرسة
لما نطيت من على السلم ورجلى اتكسرت
ومحستش غير بوجع بسيط ونزلت حصة الالعاب ولعبنا كورة وانبسطنا وبعديها لقيت رجلى ورمت واتجبست :)

عادى العلمى للجدعان اللى بيجيبوا 90 % فى تانية وينزلوا بالمجموع علشان الفيزياء فى تالتة زى حلاتى ولو كانوا دخلوا ادبى كانوا نفعوا :)

وهو دا الصح ولانك بتحبها بجد هو دا اللى خلاك متكلمهاش اصلا

بنات اخر زمن بقى معلث اكيد كنت مبسوط برضو :)

ماهوا انت اللى اديتها الوش الخشب من الاول

هههه
والرياضة والكيمياء
عمر مافيه مدرس سألنى فى حاجة ومجاوبتش والله استاذ الرياضة ادانا مسألة وقال حلوا حلينا طبعا لاى جبانه فمودتش الكراسة لقيته بيشتم فينا وبيحل المسألة زى ماانا حليتها بالظبط
بس عكيت فى الاخر
وقال دى مسألة من اولى هندسة :)

بس بلافخر جبت فى الكيمياء 47

الفيزياء 36 :):) لانى دخلت الامتحان وانا عندى زهايمر مكنتش عارفة محور السنات من الصادات فين :)
حسيت انى دخلت مادة غير المادة

والرياضة 48
مع انى مكنتش مذاكرة الديناميكا لكن اتحلت ازاى ببركة دعى الوالدين

وجبت 88ونص %
ودخلت كلية الاداب :) انتساب
والحمد لله

ههههههه
هى دى اليوميات ولا بلاش مش الكلام اللى البت .... كان بعتاه امبارح
ياراجل كويس انك قولتلها لا

يلا اسيبك انا بقى علشان هتسوح لو قعت اكتر من كدا

وصبااااااااح الفل

خليك قوى وخليك صامد
هى دى حال الدنيا بكرة انا معاك وبكرة انا مفرقاك

وربنا يثبتك دايما وتكون سعيد مدى الحياه

بطلى رغى بقى وامشى لحسن هو شكله زهق من رغيك اصلا

والسلام عليكم ورحمة الله وبركاته

خواطر شابة يقول...

افهمك تماما لانني عشت نفس الدي عشته لكن بتفاصيل مختلفة
اليتم احساس لايعرفه ولايقدره الا من عاشه
انا ايضا عند وفاة والدي من صدمتي لم ابكي لكنني ظللت لسنوات اشكوا من ضيق في الصدر ومن صعوبة ان ابكي اياكان الموقف الدي أمامي رغم ان قلبي يكون يقطر دما لمت لادموع وصل بي الامر لزيارة طبيبة نفسية شخصت الامر على أن صدمة وفاة أبي هي السبب لم ينتهي الامر الا السنة الماضية عندما توفيت جدتي أم أبي وتكرر المشهد امامي وقتها ظللت طوال اليوم متماسكة كما أنا دوما لكن مساء لاأدري ماحصل في لحظة واحدة ظللت أصرخ وأبكي وأبكي الى أن أغمي علي ومن يومها الحمد لله احس أن دلك الضيق في صدري و الدي استمر 19 سنة قد انتهى.
أسفة ان كنت أطلت في تعليقي لكن حكايتك أثارث شجوني
مع تحياتي وفي انتظار الباقي ان شاء الله

همســات عــلى ضــوء الــقمر يقول...
أزال المؤلف هذا التعليق.
همســات عــلى ضــوء الــقمر يقول...
أزال المؤلف هذا التعليق.
شاب فقرى يقول...

Roqaya

شكرا للنقد للبوست

هوا فعلا بقيت حاسس فى حياتى بقوة خفية بتحركنى

مش أعرف مصدرها

وهى اللى خليتنى بعد كدا انى انزل واشتغل وافكر اعمل اكتر من حاجة فى نفس الوقت

تحياتى لمرورك وتواجدك

شاب فقرى

شاب فقرى يقول...

بيطرية

والله صدقينى حاولت أفهم حاجة من التعليق معرفتش

:(

الظاهر النهارده إنى فاصل تماما

عالعموم تحياتى لتواجدك وبإنتظار تعليقك عالبوست

شاب فقرى

شاب فقرى يقول...

دموع القمر

صباح النور أولا :)


ولا يهمك المدونة موجودة واقرى براحتك


مش لازم اخر بوست يكون الأولانى :)

ولا إيه ؟؟

النصايح اللى قالوها لك فى الجورنال صح

ولكن

اليوميات لما بتتنشر مش بيكون عليها مشاكل

يعنى كل واحد حر يكتب ايه فى يومياته

وأنا عن نفسى بدون لذاتى ونفسى

وبيها بفتكر حاجات كتير مهمة

هوا مش رومانسى أوى

دا حلم مش أكتر

وصراحة ,,,, معندناش بواب :D

ولا تقلتى ولا حاجة

عادى

انتى عارفة يعنى

والله بعد ما كتبت اسمى قلت اشيله وشيلته

بس كان فى ناس قرت الاسم اكتر من اتنين

والسر ان خرج عن واحد ميبقاش سر

فقلت اقوله بقى ومش تفرق

بس لسه شاب فقرى

من كتر اللى قالوا انهم عيطوا فى البوست

والله انا خايف اقراه ارجع اعيط زى زمان تانى

بس مستحيله خلاص

درجاتك شبه الدرجات بتاعتى لدرجة كبيرة

فى ما عدا مادة واحدة

يلا

كل سنة وانتى طيبة

شاب فقرى

شاب فقرى يقول...

الست فرويد

تار إيه لاء أبدا والله :$

عالعموم انا اسف عشان خليتك تعيطى ولكن البكا بيريح والله :)

أنا من كتر ما كان كل ما تكتبيه فى المدونة بيأثر فيه مكنتش بقدر أكمل البوست والله

بخاف لا فى الاخر اعيط ولا حاجة

بس كلماتك اجمل طبعا

دخلت الفترة اللى فاتت وقعدت أقلب فى البوستات لقيت فى حاجات رومانسية وحالمة وهادية كدا حلوة اوى عجبتنى

بس مقلتش رأيى ومشيت فى صمت بإعتبار إنها بوستات قديمة ورأيى هيكون جه متأخر ومش هيلاقى رد :$

شكرا لرأيك فى الأسلوب الخاص بى

اللى انا حسيت فى الحلقة دى انه ملعبك ومش مترابط أوى :$

بس آرائك بتشجعنى

خالص تحياتى وتقديرى

شاب فقرى

شاب فقرى يقول...

خواطر شابة

أهلا وسهلا بيكى فى المدونة

من المواقف اللى غيرت حياتى بشكل تام

والحمد لله انها حصلت لانها هى اللى صنعتنى

بس مش متصور انها هتفضل معايه 19 سنة

تبقى كارثة

وكمان فكرت ازور طبيب نفسى ولا حاجة

قلت لاء

انا طبيب نفسى لنفسى

:)

والحمد لله عالجت نفسى وبقيت تمام :)

وتمضى الأيام

شاب فقرى

reem يقول...

السلام عليكم ورحمة الله


حسيت بكل كلامك لانى كمان عرفت معنى فقد عزيز وازاى بيأثر اوى

الحياة فيها مواقف كتير بتغيرنا

بس شفت في كلامك قوة شخصية وقدرة على مجابهة الموقف مهما كان صعب ودا حلو اوى

في انتظار البوست القادم

تحياتى لك ولاسلوبك الجميل

reem يقول...

السلام عليكم ورحمة الله


حسيت بكل كلامك لانى كمان عرفت معنى فقد عزيز وازاى بيأثر اوى

الحياة فيها مواقف كتير بتغيرنا

بس شفت في كلامك قوة شخصية وقدرة على مجابهة الموقف مهما كان صعب ودا حلو اوى

في انتظار البوست القادم

تحياتى لك ولاسلوبك الجميل

Angel يقول...


إيه ده

دي الكلمة اللي نطقتها وانا بدوس على التعليقات
عشان لمحت بوست نظرة

نزل امتى ده هو أنا نمت كتير ولا إيه (:
هروح اقراه الأول معلش وارد كمان

(:

Angel يقول...


باااك ..

مساء الخير يا كريم (:

بداية كلامي البقاء لله في الوالد
ويعلم الله لم يحزني أي جزء في مذكراتك سوى هذا الجزء
.......
سيبك بقى من المواقف الكتير اللي كانت بتحصلك ودماغك اللي اتفتحت يا حرام والبنوتة اللي مكانتش بتعبرك
(:

بس بجد عجبتني المذكرات
ومستنية الحلقة التانية والتالتة ..إلخ

.........
تعرف أكتر حاجة حبيتها أوي واتبسطت عشانها أني عرفت اسمك ( كريم )

عاشت الأسامي يا كيمو

Angel love

بيطرية ومش بايدى يقول...

اقولك انا ياسيدى التعليق الاول اللى انا كتبته
كنت ناوية انى اقرا البوست من بدرى يعنى واعمل احتلالات من تحت وكده
اشتغالات البيطرية دى
بس لاقيت ماماتى وباباتى واقفين لى بالمرصاد كل شوية ماما تهددنى انها هتفصل النت عليا
وكده يعنى

بيطرية ومش بايدى يقول...

بص بالنسبة للبوست
هاقوله حاجة
عندما اعجز عن سماع صوتك وتعجز عينى عن رؤيتك لا يعجز قلبى عن الدعاء لك
رباه بعدد من سبحك ف الليل والنهار ادخله الجنة من اوسع ابوابه واجعل قبره روضة من رياض الجنة واجعل ابنه سببا ف دخوله الجنة اللهم آآآمين
بس خلاص
مش عارفة اقول ايه كمان
لو عرفت هاجاى واكمل انا عارفة انك زهقت منى ومن( لاتعليق) بتاعتى

بس عارف اللحظات الحرجة دى بتبقى عجيبة متعرفش انت بتعمل فيها ايه
انا كنت حاجة زيك كده بس على اقل طبعا لانى ساعتها كنت فى 3 اعدادى وكان صاصا رايح امتحان عربى بتاع اخر السنة فى اولى ثانوى
ساعة ما اختى الكبيرة توفيت
هييييييييه
بص سيبك من تقليب المواجع وربنا معاك بجد
عارف يا فقرى احلى حاجة بتعجبنى فى شخصيتك ايه
انك مش عادى بحس انك بالرغم من انك فقرى بس عندك صبر وتحمل جامد اوى
ربنا يحفظك بجد خمسة وخميسة فى عنيا
ده الى جانب انك شخصية محترمة جدا جدا جدا انا شايفة انك دمااااااااااغ
ودماغ عالية كمان
حفظك الله ورعاك وحميك من كل سوء

بقولك ايه علق خرزة زرقة على التعليق ده وبعدين انشره
عشان الحسد والقر وانا عليا البخور

سلام يا اجمد فقرى عرفته

بيطرية ومازالت مش بايدى

عاشقه الرومانسيه يقول...

قلبت عليا المواجع
:(

عاشقه الرومانسيه يقول...

http://mero200528.blogspot.com/search/label/%D8%A7%D9%84%D9%89%20%D9%88%D8%A7%D9%84%D8%AF%D9%89%20%D8%A7%D9%84%D8%B7%D9%8A%D8%A8
ادخل على اللينك ده هتلاقى فيه 4 بوستات اقراهم

donya يقول...

مساء الخير
جميل انك حاسس بالتغير اللي حصل لك فعلاوده في حد ذاته كويس

واليتم ده احساس صعب وخصوصا لما يكون في سن كبير مش في ايام الطفوله المبكره

هستني باقي المذكرات

*تحياتي

smilyrose يقول...

السلام عليكم

اول زيارة ومش الاخيرة ان شاء الله

لما دودو عاشقة الرومانسية

قالت لى البوست دا قلب عليه المواجع

وقريت البوست اتوجعت

وقولتلها احنا جيل كئيب وعاوز الحرق

هههههههههههههههههههههههه

بجد والله بس عارف دايما الانسان

بيحس بالوحدة لما يفقد الامان

وامانا فعلا هو اهلنا

والاب دايما بيكون رمز الامان لينا

ربنا يكرمك يارب

وتكون فعلا زى ما كان بابا بيتمنى

ولا تبكى على شئ مضى

ولكن اعمل على اسعاد من يحيطون بك

وايه اخبار اللحمية دلوقتى

اختك وردشان

سماء يقول...

السلام عليكم


انت وصفت مشاعر صعبة بمنتهى التلقائية


وعارف اصعب حاجة فى الدنيا انك تفقد شخص كان كل حياتك

بس أكيد هو موجود معاك بروحوةالطيبة

ربنا يرحم والدك ويرحم جميع اموات المسلمين

فى انتظار بقية السلسلة

Lady E يقول...

دي سنة الحياة يا شاب

هي مرحلة قاسية وصعبه وكان طبيعي انك تحس بكل المشاعر دي فيها

مفيش حد فينا مفقدش حد بيحبه

الحياه قصيرة أوي يا شاب قصيرة بجد مش لازم تضيعها في هموم وحزن ولأن كده كده الفراق مؤقت ومسيرنا في يوم هنقابل كل اللي بنحبهم واتوفوا ورحلوا عنا وهنعيش معاهم في الجنه من غير فراق

ابتسم للحياه هتبتسملك مهما كان في قلبك جراح مسيرها تطيب والجاي أحسن ان شاء الله بس قول يارب

وخليك على مبدأك في الحب لأنه مبدأ جميل أوي وراقي ونقي أوي

ponpona يقول...

اقولك انا ايه بقي دلوقتي ... بذمتك كل دا بوست ..هه؟
وبعدين انا كنت هنا يادوبك من يومين أجي ألاقي كووووول دا فاتني ، عامة حصل خير .. أنا بهزر والله انا بس جايه اسلم وارغي شويه وامشي .. ها اخبارك ايه ؟ كويس ؟ يارب علطول
تعرف ... جملة طب بشري القاهره الدور التالت دي ضحكتني قوي .. آه والله أصلها عامله كده زي لندن الدور التاني ، انت جيت الكليه عندنا قبل كده يا محمد ، لو جيت هاتعرف ليه الجمله دي ضحكتني .. أصل احنا القصر العيني دا عندنا فرح .. فرح فعلا وفيه تكوينه غريبه قوي من ناس أغرب ، طلبه علي دكاتره علي عيانين وقرايبهم وحاجات تانيه كتيييير ، تخيل انت ممكن توقف تاكسي من جوا الكليه وتروح .. باتكلم بجد والله مش هزار

شاب فقرى يقول...

reem

تحياتى لتواجدك

القوة بتيجى من مجرد تذكر الأحبه

هى اللى بتساعدنا عشان نكون أقوى ونقدر نتحمل الحياة بظروفها

تعليقك أسعدنى وكذلك تواجدك

شاب فقرى

شاب فقرى يقول...

Angel

كان نفسى اكتب لحد ما اموت

فالبوست طلع طويل

وكمان طلع بوستين اتنين

مش بقدر اكبت افكارى فى المسودات او فى البوست القادم

بطلع كل اللى جوايا على طول

البقاء والدوام لله

كلنا هنموت يا Angel

بس المهم عملنا ايه فى حياتنا عشان ربنا يسامحنا ويرضى علينا ؟؟

و ايه حكاية اللى مكانتش بتعبرنى دى

كانت بتموت فيه :$

بس انا اللى رفضت اقرب :D

فهمى للحب ليه منظر خاص

مجنون واعمى فى كل الاحتمالات

بس لما يبقى حب بجد

:)

تحياتى

شاب فقرى

شاب فقرى يقول...

بيطرية

ان شاء الله ربنا يخليهم لك

مش تزعليهم أبدا تحت أى ظرف وخدى بالك منهم

انا مش بزهق من لا تعليق

انا بزهق من كتر الغياب وقلة التعليقات وقلة الإحتلالات :D

نورتى المدونة

الله يرحمها ويغفر لها يارب

انا اسف انى قلبت عليكى المواجع

والله يا بيطرية موضوع دماغ دا ناس كتير قالته

بس محدش فهمنى برده

مش عارف ليه

نورتى المدونة

مش تغيبى تانى بقى


تحياتى واحتراماتى

شاب فقرى

شاب فقرى يقول...

عاشقة الرومانسية

دخلت وقرأت وما قرأته جدد أحزانى وأشعل النار فى كيانى :((

ليت النسيان يستطيع أن يطيب الجرح ولكن لا مكان للنسيان فى طى جراح فراقهم
فهم ليسوا كأى حبيب كان ولا كأى إنسان مشى بين البشر

هم من صنعونا

صنعوا شخصياتنا

صنعوا كياننا

موجودين دائما بداخلنا فى كل ذرة من جسدى وفى كل فكرة عابرة تمر برأسى

حقا أبى الغالى

وحشتنى

تحياتى لمرورك وآسف لتقليب المواجع عليكى

شاب فقرى

شاب فقرى يقول...

donya

دنيا

شرفنى تعليقك وتواجدك

البقية تأتى قريبا بعون الله

تحياتى لكى

شاب فقرى

شاب فقرى يقول...

smilyrose

وردشان

فعلا جيل كئيب

مكبل بالماضى والذكريات

مش قادر ينسى اللى فات ولا يطوي صفحة الماضى ويخليها تمر

صعب والله النسيان

وبالذات لحد موجود فى كل ذرة فى كيان الإنسان

لسه عاملة لى مشاكل اللحمية للأسف

بس بحاول أعيش

مش بعرف أخد نفسى بس الحمد لله بتناسى وعايش

نورتى المدونة

يارب متكونش آخر زيارة

تحياتى ليكى

شاب فقرى

شاب فقرى يقول...

سماء

صعب الفراق

بس الواحد بيتعود وبيحاول يصبر نفسه وبيعتمد على نفسه

اللهم إرحم جميع أموات المسلمين يارب

بقيت السلسلة تأتى لاحقا

تحياتى لتواجدك

شاب فقرى

شاب فقرى يقول...

Lady E

فعلا الحياة أقصر من أن نقضيها فى حزن

بس لما الواحد بيفتكر أحباؤه لازم يبكى ويحزن لفراقهم

والحمد لله الحياة مستمرة

:)

بس محدش فاهم المبدأ دا

ربنا يهدى الجميع والناس تقدر تفهمنى او أقدر وأصبر على توصيل فكرتى ليهم

ألف سلامة ليكى ويارب الحادثة مش تتكرر ويارب خير بعد كدا على طول يارب

ربنا يسترها معاكى يارب ويحفظك ويعزك

تحياتى

شاب فقرى

شاب فقرى يقول...

ازيك يا منى

انا روحت مرة واحدة بس طب بشرى القاهرة وكان الدور الرابع تقريبا

وكنت بعمل منظار

مش انا اللى بعمل المنظار ولا كان بيتعملى

دا كان لوالدة واحد صحبى

وكنت مطبق وحالتى بلاء

لو كنتى قريتى البوست كنتى هتعرفى ان شاب فقرى إسمه كريم مش محمد :$

صباح الفل

فقري يتحدث :D

الحمد لله تمام وبخير وزى الفل

المهم شدى حيلك فى الكلية

المهم

خدى بالك من نفسك وإبقى تعالى أقرى أى بوست كدا وطلى علينا

تحياتى

العنوان :
طب بشرى / القاهرة / الدور التانى
بعد كوبرى الجلاء على شمال محظة البنزين فى الشارع اللى فيه البوسطة وعم عبده البقال :D

شاب فقرى
كريم

ميرام يقول...

كان عندي أمل ):
أكون صاحبة التعليق الأول ..
بس مشروع الديزاين ( الله يسامحه ) منعني
):
وكان عندي أمل ارد بالتفصيل على البوست ..
بس مشروع التخطيط ): ): اللي مسهرني لو ضيعت دقيقة من غير شغل فيه مش هلحق أسلمه ):
ان شاء الله متواجدة بكره هنا ..
مالم يغمى علي بعد المشاريع دي (:
اثبات حضور ..
وتحية

شاب فقرى يقول...

ميرام

أفرحنى تواجدك وتسجيل حضرك

ياترى عملتى إيه فى التصميم يا باشمهندسة

:)

يارب تطلع تمام

كنت زمان دخلت إختبار القدرات ورسمت محطة قطار بالرصيف والقطر جاى من بعيد

والله العظيم حتى الآن مش عارف رسمتها إزاى علما بأن المدرسة بنت الحلال مكانتش ظبطت ورق الإمتحان وفضلنا نلف ساعة ونص تقريبا عشان نظبط الورق ونمتحن

مش فاكر إزاى

بس الزملاء ألهمونى :D

اه والله

ربنا معاكى يارب ويوفقك ويعينك
:) :)
وإن شاء الله بكره تخلصى كل التصاميم والمشاريع اللى معاكى وتاخد score عالى كمان

تحيتك وصلت :)

شكرا للتواصل والتواجد

شاب فقرى :)

سومه...مجنونه فى بلد عاقل يقول...

يااااااااااااه على كدا انا فقريه من الدرجه الاولى زيك بقى :)
بالله عليك يا شيخ متكلمشى تانى فى الثانويه ومجموعها لحسن بحس انى هبللللللللللاااااااااا
ومش فقريه لا نحسسسسسسسسسس
طيب سمعنى كتاب حياتى يا عين الله يكرمك

شاب فقرى يقول...

سومه...مجنونه فى بلد عاقل

يا أهلا وسهلا بيكى فى الجمهورية الفقرية

كلنا فى الفقر سوا سوا

الاغنيه كتاب حياتى يا عين مش عندى حاليا

ممكن نسمع :

السلام الوطنى الفقرى طيب :D

تحياتى لتواجدك

شاب فقرى

ميرام يقول...

مبدأيا ...
العنوان ماعجبنيش ..
الكلة مؤلمة قوي ...
بس لانها الواقع مش هي الي دايقتني بقدر ماحسيت بشبه انكسار فيك
البوست ده من الادراجات الي مابحبش أعلق عليها ..لأني بحس ان الصمت هنا بجد أبلغ ..
بحس ان الكلام فيه هيبقى معاد ..
مش هقدر اقولك خليك قوي وادعيله و ....,و ...
لأنه كلام انا واثقة انك في غنى عنه

لذيذة مغامرات الطفولة دي (:

بالنسبة للبنوتة ..
طبيعي جدا الي حصل .. لأنك ماخدتش خطوة ...تضعك وتضعها على أرض الواقع ويبقى كل واحد على الأقل عارف موقعه ايه في حياة التاني

كنت حاسة من غير ماتحكي انك شخص مجتهد قوي وذكي .. وللأسف .. بتحب الرياضة (: (: (:
طبعا هتستشف ان دي اكتر مادة بكرهها في حياتي ..(:
أنا جبت 98.7 وكل الي نقصته كان في الماث (:

الجزء الي فيه وفاة والدك اله يرحمه أثر فيا قوي ..
يمكن لأني عارفة يعني ايه غياب حد مؤثر في حياتك فجأة .. ):
ربنا يرحمة ويسكنه فيح جناته

وصل 87.8 ...
ازاي المجموع ده يجيب حقوق !
على فكرة أنا بحب كلية حقوق بجد (:
هستنى اعرف الكلية الجديدة ..(: بعد التحويل
غالبا هتبقى تجارة ... انتساب (:
ياترى ان صح ؟
في كلام كتير كنت عايزة أقوله بس حاسه ان الخلايا الحيوية في جسمي بتنهار وبتنادي بحقها لطبيعي في النوم (:

شاب فقرى يقول...

ميرام

أنا ممن يعشقون الحقيقة

ولا أستطيع التزيين ولا الخداع فيها

فلا يمكن لليتيم أن يقول سوى أنا يتيم

لن يفيده أى شىء آخر ولا أى مصطلح آخر ليعبر عما يخالج نفسه

مهما كانت قسوة الحقيقة فعشقها وتقبلها فن وقوة لا يعرفهم الآخرون

طبعا أنا فى غنى عن الكلمات التى قلتى أنى فى غنى عنها

ولكن أحيانا

يخالجنى التعب

أحتاج إلى كلمة تريح أعصابى

وليست من أى شخص

وليست ككل الكلمات

------ نقطة توقف ---------
إزاى يعنى هاخد خطوة
الحب الطاهر لا يمكن إلا أن يكون طاهرا
فلا أستطيع أن أغير نظرتى لها بأى خطوة كانت
ولم أكن أستطيع فى ذلك الوقت أن أعدها بأى شىء
ولا حتى أستطيع أن أقول لها الكلمة المشهورة فى الحب (( بحبك ))
فى حاجات مش وقتها ومينفعش بس الناس مش بتدرك كدا وبتبقى عايزة الأمور تمشى بوجهة نظرها هى
ولا أستطيع أن اكون معها بدون أى علاقة رسميه وشرعية يرضى عنها ربنا
ولا أستطيع أن أجعلها تخون أهلها فتحادثنى من وراءهم
أدرك أنه كلاما مكررا
ولكن
إنه الحقيقة التى أعشقها
وأكيد فاهمانى
--------- إنتهت نقطة التوقف ----------

نقصتى خمس درجات ونص فى الرياضة

يااااااااه

أنا كمان نقصت أكتر من كدا

بس كنت بحبها
حصل حاجات تخلينى أخسر
مكنتش لسه على هيئتى الحالية التى تصنع المستحيل :((

طبعا لازم يكون يجيب حقوق

لأننى صراحة لم أكتب بنفسى إستمارة الرغبات

وكمان كل الرغبات التى كتبتها كانت مثل بترول وتعدين

فكان لازم تجيب حقوق آخر واحدة وأقرب واحدة الرغبة تمانية وأربعين
:)

انا بعشق القانون وكلية حقوق

المادة الوحيدة اللى ذاكرتها تلات ساعات ودخلت الإمتحان جبت جيد :D
ولا تسألينى كيف حدث
فهى فى شرايينى
:$

غالبا سأرد على تخمينك لاحقا

ولكن ما قلتيه صحيح تماما

الف سلامة وربنا يقويكى يارب فى الكلية وفى حياتك

:)

يارب يكون النوم وسيلة للراحة ولا يكون مثل نومى وسيلة للعذاب

دوما تحيااتى :) :) :)

شاب فقرى