متغمضش

- لما بتغمض بتشوف إيه 
- رؤي عن الموت والنهايات والوجع والألم ويمكن عن أشياء غير حقيقية ومستحيلة وأصوات مألوفة ولكنها مستحيل سماعها فى اللحظة الحالية 
- بسيطة , متغمض 
- محتاج انام وأصحي بدري ورايا حاجات كتير أوي 
- يبقى إتعب فى يومك عشان تقدر تنام على طول 
- تعرف إني جربت ستاشر ساعة شغل ويمكن كسرت حاجز التمنتاشر واقف علي رجليا وبتحرك وبحسب وبفكر وبتكلم فى الفون وبخرج وبرده منهرتش الإنهيار المطلوب عشان أنام أول ما احط راسي عالمخدة 
- يبقى يا إما تطبق لحد تاني يوم يا إما تستحمل الثواني اللى بتغمض فيها 
- كان جه عليا وقت بقدر أغمض عيوني بدون وجع وأتخيل كل شىء فى الوجود 

صوت عالي من بعيد : Focus

بحاول أنطق وأكمل كلامي ...
- كان جه عليا وقت بقدر أغمض عيوني بدون وجع وأتخيل كل شىء فى الوجود وبقدر فيه أستدعي الذكري 

صوت موسيقي ( بسكاليا ) فى الخلفية

بحاول أتكلم وأخرج كل اللى جوايا ...
- كان جه عليا وقت بقدر أغمض عيوني بدون وجع وأتخيل كل شىء فى الوجود وبقدر فيه أستدعي الذكري كنت ساعتها بقدر أفكر وأتكلم واتحرك 

صوت همس ( متخافش أنا هنا )

بصرخ صرخة مكتومة بتتناسب مع حجم الوجع والخوف والغضب والألم 

- كان جه عليا وقت كنت فيه أنا 

كل شىء بيسكت فجأة والإحساس بالوجع بيزيد مع الذكري

- كنت مبسوط فى يوم من الأيام ......

صوت غريب بيعلي فى الخلفية زي دوشة وحركة وصوت عربيات وزحمة شديدة أوي وإحساس بالصداع هيفرتك دماغي

- إيه ؟؟؟

الصوت بيعلي بس مش واضح فيه ولا كلمة وكأن الزحمة كلها بتتكلم وصوت القطر عالي أوي 

- هوا أنا كام مرة كنت هموت قدام القطر ؟؟؟؟

صوت البحر بيغطي علي كل شىء عالزحمة والناس والموسيقي وعلي كل إحساس 

-هوا الهوا والبرد والوجع بيطبطب علي حد ؟؟؟ ولا هوا دا الشتا بيودعني عشان ممكن مش يقابلني تاني 

بيهدي صوت البحر وبيتبقى الصمت 

- هوا أنا ميت ولا فى الطريق للموت ؟

صوت عالي أوي بينطق بنرفزة وغضب ووجع وصداه عالي أوي وكأنه بيتصرخ من جوايا 

- قلت لك متغمضش 

ينزل الستار 

شاب فقري

المستلم مجهول

للعلم بس دي صورتي :D

أبدأ منين ؟؟
دايما بسأل نفسي السؤال دا 
لأني مش مقتنع بصراحة  إن فى بدايات ونهايات 
فى أحداث كدا كانت كدا كدا هتحصل 
( بلاش الكلام العايم دا خلينا فى الحاجات المحددة ) بس إزاي بلاش كلام عايم وهوا أصلا كل حاجة متداخله فى بعضها , خلينا نبتدي من إن النهارده كان اليوم التاني فى ( ورشة كتابة نص مسرحي فى التحرير لاونج ) اللى بشارك فيها 
ولا خلينا فى العنوان :
يعني إيه أي حد يستلم أو المستلم مجهول ؟؟
يعني رسالة مش مهم مين يستلمها 
أي حد 
سواء إتقرت أو متقرتش أو حتي إترمت فى المدونة ففي كل الأحوال هي إتكتبت وخلاص 
زي أي فيلم أو أي مسرحية أو مقال مش مهم مين يستلم أو يفهم الرسالة , المهم إنها إتبعتت وخلاص 
ممكن بقى تضيع فى البريد أو توصل لحد تاني أو تالت أو عاشر
أي حد هيستلم الرسالة يقدر يفسرها لروحه 
عادي يعني :))))
ويعمل بيها اللى هوا عايزه 
ويتصرف علي أساسها أو أي حاجة بقي :)
بس هي إنكتبت وإتبعتت دا المهم ...
معايه ناس جامدة جدا فى الورشة وبتعجبني أفكارهم ودا نادرا ما يحدث او نادرا ما أقوله أصلا :D
النهارده ( جهاد ) سألتني وقالت لى هوا إنته ليه بتركز أوي كدا 
كان نفسي أقولها أنا من الناس اللى مينفعش تقعد قدامهم أكتر من تلات دقايق 
بس رديت رد أحسن وقلت إن ( قوة الملاحظة ) شىء مش بقدر أتحكم فيه  وتركيزي فى تفاصيل كل شىء بيكون غصب عني :D وحكيت موقف بيدل علي إني فى معظم الأحيان مبفقدش تركيزي :D
فاجئني السؤال الصراحة 
كان فى تمرين النهارده عن إنك تغمض عينيك وتحاول ترسم نفسك 
واللى حواليا كل واحد رسم نفسه بشكل 
بس الناس إستغربت العك اللى عكيته دا وأنا مغمض 
رسمت واحد مكشر وبنضارة وجنبه لاب توب وفى شباك مقفول وقدامه سور وعالارض مسامير أو قزاز :D
وعنده شعره واحدة :D
تقولي بقى جمعت كل الحاجات دي إزاي فى نفس الورقة وقرب بعض ووضوح وإنته مغمض 
خيالي واسع :D
والموضوع عجبني وخصوصا بعد أول يوم روحته رسمت فيه على ورقة وأنا مفتح وكل واحد كمل الرسم بتاع التاني 
الورشة مسببة  لي سعادة لا توصف 
حضوري ورشة الكتابة دي 
مخليني فى قمة سعادتي 
وهكتب مشهد قبل يوم الأتنين 
ويارب أقدر أبدع فيه أو أقدم فيه حاجة جديدة :D
هنقل المعاناة من وجهة نظري الشخصية وبالشكل اللى ممكن تكون عليه قاسية بجنون 
بيتهيألى الموضوع مش صعب 

***

النهارده ناقشت بنت فرنسية عن موضوع الشيطان وهل أصلا موجود ولا لاء والجن ودا حقيقى ولاء وكلام كتير كدا 

مش بتكلم فرنساوي 

بس بتكلم إنجليزى كويس 

كنت مستمتع الصراحة بأقصي شكل ممكن :D

والجميل فى الموضوع لما إتسألت بتحلم بإيه قلت تلات حاجات بس :

- بحلم ألف العالم 

- بحلم أعيش مبسوط 

- وأكون أنا 

:)

وبس 

:D

***

أنا لما إتكلم قدامي شخص ما وقال إنه عايز يعيش خمسين سنة بس 

ومش عايز أكتر 

قلت له يخرب بيت كدا إنته عندك أمل 

أنا آخري 35 فقط 

وبعدها بقى اللى ربنا يريده يحصل 

:D

كلانا كاره لفكرة العجز والمرض 

ويمكن أنا بفكر فى الموضوع 

لأني مش حاسس إن فى حد هيقدر يلتزم معايه للدرجة اللى يبقى معايه فيها وانا عجوز ومريض 

لان كل الناس بتمشي ودي حقيقة ولازم نتقبلها :)

***

من يومين كنت فى لقاء عن الصدمات النفسية وكيفية التعامل معاها وتعمل إيه ومتعملش إيه وإزاي تتعامل مع الناس اللى بتمر بصدمة 
فى اليوم دا إكتشفت قد إيه أنا مليان عقد وكلاكيع نفسيه و إتقالي كلام كتير مفيش مجال لذكره هنا , لكني مريت بصدمات نفسيه كتير أوي :D , عادي  فى البطاقة مصري يبقى أكيد عندك ستين ألف صدمة نفسية :)
انا كتبت البوست بس منشرتوش :D
لأنه عبارة عن نقط نقط نقط وكمان أنا مش عايز أنشره عشان شكله مش عاجبني وهيفيد أشخاص ويضر أشخاص وفى كل الأحوال أنا مش عايز أنشره , بس إكتشفت إني من الناس اللى عندهم قدرة علي التعامل مع الصدمات النفسية بالفطرة :D

***

 بتحاور مع ملحدين اليومين دول ...

 ***

 حياتنا مغامرة 
كل لحظة فيها 
من أول ما تنزل من البيت الصبح 
لحد رجوعك 
إنت حياتك كلها عبارة عن مخاطر ومغامرات 
عايز تقنعني إنك ماشي فى طريق جانبي ومبتاخدش قرارات معينة ولا بتمشي فى سكك معينة عشان خايف 
لو كلنا خفنا 
يبقى مفيش حد هينزل من البيت 
حتي لو فشلت فى حاجة 
فدا هيعلمني كتير قدام 
وربنا هيساعدني أمشي فى الحياة وأكمل 
مش مشكلة إن البني آدم خايف 
لكن المشكلة لما يسيب الخوف يتحكم فى كل حاجة 
أنا إخترت كتير 
إخترت إني أعيش أخيرا 
وأخترت الحياة 
مش العبودية ولا الموت 
ولا الخوف 
ولا الرعب والهلع من شوية قرارات وشوية حاجات بتحصل 
أنا ليا الحق أفكر فى ربنا وهيرضي عني ولا لاء ؟
بس هغلط 
ولما أغلط هرجع تاني للطريق 
واقول يارب 
واحاول أعمل الصح من خلال تعاليم المولي سبحانه وتعالي 
وأكيد فى طريق فيه مخاطرة وفى نفس الوقت بحقق منه اللى انا عاوزه وفى نفس الوقت يرضي ربنا 
ولا إيه ؟؟

***

 مين مشي ؟
ومين جاي ؟
ومين مجاشي ؟
سيبك 
بكره الخميس 
عيد ميلاد إبليس 
بكره يوم خاص جدا 
دايما يوم الخميس بيبقى مميز عندي 
ودايما بليل الساعة تلاتة الفجر بعشق الوقت دا 
ممكن يوم الخميس دا يحصل أى حاجة وكل حاجة 
ممكن أسامح أو أنسي او أبقى طيب أو منيل بنيلة 
ممكن يحصل أي حاجة 
مين وصل ومين موصلش ؟
بلاش الأسئلة دي 
المهم إن بكره الخميس 

***

My Dark Passenger was Never wrong

تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .

Deleted

للمزيد من التفاصيل إضغط هنا

شاب فقري 

***

 بكره عيد الحب أو الفلانتين زي ما بيقولوا 
مش هبعت رسايل عالموبايل أنا 
مش زي كل عشاقك أو اللى تعرفيهم أو اللى يعرفوكي هبعت أقولك كل عيد حب وإنتى طيبة والكلام الفكسان دا 
أنا شايف إنه شىء سىء جدا جدا جدا عمل يوم واحد للحب فى السنة فى أى علاقة 
أنا عن نفسي 
شايف إن كل يوم بقضيه معاكى  ينفع يتعمل عيد 
كل تصرفاتنا وحركاتنا ونظراتنا وكلامنا ومشينا وهزارنا وخناقاتنا 
كل يوم بيننا هوا يوم فيه حب ,وفيه عيد وفيه روعة مبتنتهيش 
سواء كان يوم حلو بأحداثه أو تيت بفراق أو وجع او مشكلة 
تواجدنا فى الحياة سوا حتي لو مش موجودين سوا أو مش مع بعض أو بيننا كام ميت كيلو متر أو حتي مسافات الدنيا كلها 
كل يوم إحنا فيه عايشين هوا حكاية فيها مليون عيد حب
آه طبعا فى هدية 
قد تكون جوانتي من اللى نفسك فيه أو حتي شراب أو طرحة أو رسمة أو وردة أو فستان من اللى قلتي لي عليهم من فترة أو أي حاجة محتفظ بيها لذكري خاصة وبديهالك عشان تعرفي قد إيه أنا بحبك 
أو حتي كوباية قهوة مرة فى مكان نفسك نروحه سوا أو كوباية شاي معاها كلمتين بيختصروا الحكاية .
بس إنتي مش محتاجة دا كله عشان تعرفي 
إنتي عارفة لوحدك 
وبرغم كل حاجة 
وهنا بقصد بكلامي كل الهم والمشكلات والحاجات الوحشة اللى مطلعه عينينا 
برغم كل دا إنتي عارفة 
إني مش هقدر أكون ( عبده )
مين عبده بقى دى حكاية تانية خالص ولكن خلاصتها إني مش هبقى ( عبده )
 ممكن احبك مليون سنة ومزهقش ولا أمل ولا أحس بضيق 
ممكن أكتب عنك ميت رواية وكام ألف قصيدة علي كام مليون كتاب 
لكن ...
آسف أنا مش ( عبده )
فى مليون بروتوكول لتنظيم العلاقات بين البشر 
ومليون فكرة لتنسيق التواصل 
ومليون طريقة للحوار 
وأنا بقى فى الكام مليون دول 
مستحيل يعني مستحيل اكون ( عبده )
وبس ...

****

وأكيد مش هقعد أحكي لقراء المدونة زي كل سنة عن عيد حب كنت هجيب فيه ( يوسفندي فى شكارة ) عشان هي بتحبه وعشان مينفعش أجيبلها حاجة تانية 
بس مش السنة دي 
خلي السنة دي مختلفة :D
واللى عايز يعرف تاريخ اليوم دا معايه يقلب فى الأرشيف :D

***

 بحب الشطرنج جدا 
بس بحبه فيس تو فيس 
مش عالنت 
مش من ورا جدران 
مش من ورا مليون باب 
مش وكل واحد مسجون 
إقعد قدامي وإلعب وخد مليون خطوة وإعمل اللى يريحك 
المهم تبقى قدامي عشان أقدر ألعب معاك وأشارك فى اللعبة 
لأن ليها طرفين ...
حاجة دايما بتتنسي إن فى حاجات ليها طرفين 
مش طرف واحد 
مش أنتي وبس الحكاية فيها طرف تاني ..
ومبحبش في الشطرنج النصح من حد واقف جنبي وكذلك فى الحب يعني 
النصح فى الحب زي واحد صاحبك بيدخن وعايزك تدخن معاه 
هوا عايش فى عذاب فبيساعدك تاخد قرار مهبب عشان يقنع نفسه إنه مش غلط وإن فى غيري بياخدوا قرارات مجنونة زي دي أو ملهاش معني 
أنا مش هضيع عمري 
أنا مبستناش 

الإنتظار فعل عبودية 

والشوق فعل وجع وألم ومتعة

والحب فعل حياة 

عشان كدا مش هعيش فى إنتظار 
ولما أحس بشوق بخبط علي الباب بجنتله و هدوء كدا 
ولما بحب بخلق مليون دنيا وأعمل مليون حاجة تصنع حياة 
مش بقف أتفرج ولا بستني اللى قدامي يعمل 
أنا بنفذ بناء علي قرار مقتنع بيه الطرفين اللى انا واحد منهم أكيد يعني 

***

فى خبر لسه عارفه حالا :

صخرة وزنها 130 ألف طن تتجول 5 ساعات فوق العرب يوم الجمعة المقبل

الكويكب حجمه نصف ملعب كرة قدم ووزنه 130 ألف طن متجه الآن نحو الأرض بسرعة 29 ألف كيلومتر بالساعة، ليصل قربه منها يوم الجمعة المقبل إلى مسافة لم يسبقه إليها أي كويكب في التاريخ الحديث .. الباحثون يؤكدون : ان سقط على الارض يمكن ان يحدث دمارآ هائلآ !

لتفاصيل اكثر من اللينك دا : http://masrbook.net/2/?p=2898

وتعليقي الشخصي :

فلتكن مشيئة الله :)

***

بالنسبة للبوست اللى فات

هوا أنا رايح أتنحنح يابني ؟؟

ولو روحت أتنحنح هتنحنح لواحدة معرفش عنها حاجة ولا عمري شفتها 

وأكيد يعني مقدمة البوست لازم يبقى فيها شىء من المراعية لإحساس اللى بتكتب عنه 

مش داخل ترزع الكلام 

وبعدين لما بتكتب بإحساس حد تاني 

لازم تفكر بدماغ حد تاني 

وأسلوب كلامه 

عالعموم 

لو حد قالك إني بتنحنح 

 يبقى لعب بدماغك

أو إنضحك عليك

 لأني إستأذنت قبل نشر النص وإتقالي جميل ومعنديش مانع خالص فى النشر

وتعليقات عالفيس عندي وعالصفحة لما إتنشر والحياة حلوة خالص

لو كلفت خاطرك ياللي قلت رأيك بكل سخافة 

كنت نزلت بالماوس تحت شوية وشفت البوست اللى تحته

أو أي بوست وكان هيظهر لك يا إما فلان دا في قصة حب أو مرتبط بشكل رسمي

ولو إنته فى قايمة الفريندز عندي عالفيس هتلاقي فى المعلومات بتاعتي 

In relationship

وهتلاقى فى صورتي المنشورة عالفيس برده دبلة واضحة فى الصورة 

ولا إنته داخل ترمي بلاك وخلاص 

لو حد قالك تكتب اللى كتبته أو تعلق بمنتهي السخافة إنته واللى علقوا بعدك 

فكنت اتمني ألاقى نقد للمكتوب 

وكنت هرد عليك من أول لحظة وأحترمك جدا سواء إنته أو غيرك 

لكن كل كلامك تريقة وسخرية 

حد قالك إنك جاي تقرا لتوفيق الحكيم  ؟

أنا مدون 

لا أنا كاتب ولا ناشر أربع كتب ولا ناوي 

فنصيحة 

عايز تعمل جدع علي واحدة 

روح إتشطر فى حاجة تانية 

وأعمل فونط وبرنس فى حاجة تانية 

مش علي حسابي 

وبعدين يابني ( الذي أحبها ) 

هوا فين دا فى البوست السابق بيقول إني بحب فلانة ولا حتي بكن لها أى مشاعر ؟

إنتهي كلامي 

أما عن اللى قريته إنته أو غيرك 

محدش طلب رأيكم ولا قالك تعالي إقرا 

يلا 

روح إعمل راجل عليها وحامي الحمي فى حتة تانية 

:)

وللعلم بس 

لما سألتها قالت كل واحد حر فى رأيه وإنته حر فى الرد والتعقيب 

يعني لو هي اللى قالت لك إكتب بقى وقول اللى قلته يبقي هي اللى بتألف الفيلم 

( ما كان من قدامها من الأول تقول متنشرش يا كريم )

يعني يا إما هي بتكدب وعايزة تبان قدام الناس الفتاة اللى واحد ياعيني بيسبل لها 

يا إما عايزة تعمل عليك نمرة برده 

يا إما إنته بتتصرف من دماغك 

وساعتها تبقى بتحاول تبان راجل عليها أو بتدافع عنها 

أو فاضى ومش لاقى حاجة تكتبها 

وفى كل الأحوال 

شكرا جدا علي رأيك وكلامك 

مش هنعتب الجنة من غير ما واحد زيك يشيل من سيئاتنا شوية :)

وممكن أرد علي نقدك للبوست بس صراحة مش فارق معايه إنك تفهم أو لاء 

لا إنته ولا هي ولا غيرك

تحياتي 

شاب فقري

13-2-2013

خد بالك

طبقا لكلامهم :

فلسفتهم .......

((

إنته إنسان سعيد وتقدر تفضل علي طول سعيد

لا شىء يستحق ولا أحد

تقدر تحقق نفسك فى شىء يعوضك ويملي البرد اللى جواك بدفا ويطمنك

لو خايف من حاجة إهرب منها

متثقش فى اى شخص

تقبل الواقع واتعامل معاه

))

طبقا لعقلي ودماغي وأفكاري ومشاعري أنا واللى بتصرف علي أساسه

-إنته فعلا ممكن تبقى سعيد

بس السعادة مربوطة بمسألة إختيار وفعل يعنى لازم تعمل اللى يخليك سعيد , مينفعش تقول أنا سعيد زي العبيط وإنته مفيش أى حاجة ولا أي سبب لسعادتك

 - فى ملايين الأشياء اللى تستحق وملايين الأشخاص اللى يستحقوا

وإلا مكانش زمانك بتخرج فى عز التلج يوم أجازتك عشان تقابل ناس جايين لك من سفر متعرفهمش ولا عمرك شفتهم قبل كدا غير مرة مثلا
وإلا مكانش زمانك بتعيط بحرقة لما حد من زمايلك يتوجع أو يتجرح أو يزعل أو يكتئب وبتحاول تخرجه
وإلا مكانش زمانك بتستحمل أهلك كل يوم فى حين إنهم حابسينك ومطلعين عينك
وإلا مكانش زمانك بتضحك فى وش ناس كتير وهما عاملين غلط وإنته بتسامحهم وتفضل عارفهم
فى مليون حاجة تستحق
من هنا بييجي التقدير
فى مليون شخص يستحق
وشخص واحد بس يستاهل كل حاجة
ومن هنا بييجي الحب
فاهميني طبعا

- لو خايف من شىء واجهه

متعييش عمرك فى هروب وخوف وتعب ووجع وبرد ويأس ويمكن خذلان كمان
روح إتكلم وإتفاهم وحس بالناس وإفهمهم
متسيبش الخوف يتحكم فيك , الخوف حاجة كويسة لأنه بيسيطر عليك وبيخليك تحافظ علي حاجات كتير
بس لو ركزت معاه
هتضيع نفسك
وهتضيع مليون حاجة بدون ما تاخد بالك
وتوجع ناس كتير اوى
متهربش
أقف وواجه كل شىء
إوعي تفكر إنك لما بتهرب بتنجي من الوجع
إنته لما بتهرب بتخلق وجع جديد
وبتخلق شىء جديد يتحكم فيك ويسيطر عليك ويغير طريقك
إنته إما بتهرب بتسيب ناس واقفة تحارب لوحدها
بتسيب ناس لوحدها فى وجعها وبتخلي نفسك برده فى وجعك لوحدك
مفيش سبب للهرب
الهرب لو اللى فى صفك مش قد المعركة (( لكن الغريب انه بيستحمل وإنه قدها ))
الهروب لو اللى قدامك ميستاهلش تحارب عشانه او معاه (( لكن الغريب انه يستاهل ))
الهروب لو اللى قدامك ممكن يتخلي عنك أو يخذلك (( لكن علي مدار فترات كبيرة وسنين معملش دا ))
الهروب لو اللى معاك ممكن يكسرك (( لكن مفيش اى احتمالية لاى حاجة زي دي وعمرها ما حصلت ))
الهروب ملوش لزوم
بيوجعك وبيوجع كل الناس
مش الحل ولا عمره هيكون
وغدا فى يوم ما سيعلم الكون كله ذلك

- لازم تثق فى الناس وتقع عشان تتعلم إزاي تقف وتثق فى مين

لما تقع والناس تخذلك هتعرف كويس أوي أوي أوي مين اللى ممكن تثق فيه
ومين اللى ممكن تعتمد عليه
ومين اللى مهما عملت هيفهمك ويتفهمك ويعرف يتعامل معاك
هتعرف مين فيهم اللى بيحبك بجد وعايزك كويس
مش مجرد رفيق قعدة او شات او مكالمة او حتي مقابلة
هتعرف مين فيهم بجد كويس لما يكون بيسأل عليك عشان بيحبك وعايزك كويس
ومين بيعمل كدا عشان يسلي وقته ويلاقي حد ينصحه
مش شرط الناس تمنحك حاجة عشان بيحبوك
ممكن يكونوا بيمنحوك دا لغرض فى نفوسهم لتعويض شىء جواهم أو عشان يحسوا انهم بيقدروا ينصحوا ويوجهوا غيرهم وناجحين واصحاب عقول
ممكن يكونوا بيمنحوك اى شىء لغرض نفسي مش مصلحة
ساعتها فى وقت زي دا لما تثق وتقع ولما تنصت للى قدامك مش تسمعه وبس هتعرف كويس أوي مين الشخص اللى بيحبك ويستاهل ثقتك بجد
ومين اللى ميستاهلش

- عايز تبقى مرتاح متحاولش تعوض حاجة بحاجة تانية 

حط كل حاجة فى مكانها 
متروحش تقول أنا هذاكر أوي أو انجح أوي عشان أنسي وأبقى كويس 
زي واحد مريض بيقول أنا هروح أكل شاورمة عشان أصحي بدري 
هوا كدا بالظبط 
حط كل حاجة فى مكانها لأن مفيش حاجة بتملي مكان حاجة تانية 
والأمس مبيموتش 
والحمد لله إني أقدر أخلقه وأصنعه من تاني 
  

- اللى بيتقبل الواقع دا واحد كسول وإنته مينفعش تبقى كدا لازم تحارب وتقوم من مكانك وتتعب 

مش قصدي ثورة
لكن فى مليون حاجة تقدر تعملها
بدل ما تتوجع عشان بعيد عن فلان
تقدر تكلم فلان وتتفاهم معاه وتواجهه وتريحه وتريح نفسك
تقدر تتأقلم مع الواقع وفى نفس الوقت تحاول تغيره ولو بفكرة ولو بفعل بسيط ولو بكلمة أو مكالمة او رسالة
تقدر تحاول  وتفشل وتحاول تاني
لأن هي دي الحياة يا عزيزي
الحياة بيبقى نفسنا فى حاجات وبنمنع نفسنا شوية وبنحاول شوية وبنجرب شوية
وبنقف فى وش التيار
واحيانا بنسمح للموج يكسرنا ويكسر أحلامنا
ونرجع نبني تاني بقوة ونسنتني الموج
والمرة الجاية حتي لو كسرنا
هنحاول تاني
زي اى قصة حب يا عزيزي
تقدر تقف فى وش الموج والبعد والفراق والوجع والألم
 والموج يكسرها كلها
ولكن إرادة الأتنين وإيمانهم بإنهم soul mates  بيخليهم يرجعوا لأن ملهمش مكان غير بعض
ويبنوا من جديد ويستنوا الموج
لو كل واحد بيحب تقبل الواقع
كان الكون إنتهي من زمان
لو كل واحد بيقول أصلي هعيش وخلاص
مكانش زماننا جينا الدنيا ولا إتولدنا أصلا

****

إنتوا ماشيين غلط لأنكم متعرفوش معني الفقد زيي

ولأنكم بتتكلموا وخلاص

محدش يعرف اللى انا بتكلم فيه دا

للأسف

ناس كتير هتقرا البوست

وتقول دا بيعاند وعايز يمشي الكون علي مزاجه ويتحكم فى الناس

ومش عايز الناس تهرب منه وهوا وحش وزي الزفت

أيوا

أنا وحش وزي الزفت

ومعنديش مشكلة فى دا

ومبسوط بدا

وراضي جدا

بحاول أطور وأصلح من نفسي كل يوم وكل لحظة

ومش بزهق ولا بتعب ولا بكل ولا بمل ولا بيأس

مش بقدم مبررات ولا تفسيرات ولا عايز

ولا ناوي أقول حاجة لأي حد

أنا مش عايز أعاتب وألوم ولا عايز أفهم ولا عايز أوصل لحقايق

أنا السنة اللى فاتت دي فى آخر كام شهر قدرت والحمد لله إني أنتصر علي أكتر جانب وحش فيا

مش مرة واحدة ولا مرتين

والحمد لله زي ما بقول انا وحش وزي الزفت

ومش عايز احرك الكون علي مزاجي

ومش عندي مشاكل فى ان الناس تمشي او تهرب او تجري او اى حاجة من الحاجات دي

كل واحد بيعيش حياته طبقا لمجموعة من إختياراته

ومحدش هيعيشها بداله

حياتك هي السجن الكبير لنتيجة إختياراتك يا عزيزي

وأنا علي سلام وصلح مع نفسي وبحبها جدا

برغم كل الشرور

أما أصحاب الفلسفة اللى فوق فهما كمان أحرار فى قناعاتهم وإختياراتهم

ولكن واجب عليا أوضح وأتكلم

حتي لو عارف إن دا مش هيغير أي حاجة والبوست دا ملوش أى تلاتين لزمة

بس أنا بواجه 

وبقف وبحارب 

ومش بهرب 

ومش بتخلي ولا بخذل 

أنا مش إنتوا 

ولا عمري هكون 

ولكني هحترم حرية كل إنسان آخر 

وللعلم :

أنا بقدر أصلح اللى إتكسر لأني برده مش زيكم 

مش برمي الشىء ولا الشخص تحت أي ظرف 

     

أنا تعبت من الكلام

باقى بوست تاني كاتبه من يومين فكرته حلوة أوي وجميل أوي أوي أوي

هحاول أنشره

إن إستطعت

بس مظنش إني هفتح قلبي وعقلي للناس للدرجة اللى تخليني أنشر بوست زي دا

بس هجيبلكم مقطع منه

**** مقطع من بوست جديد : كلمة واحدة بس ****

كلمات كلمات كلمات
كل ما كلامك بيكتر
كل ما بتزود الحروف وتاخد نفسك بين السطور
كلام كلام كلام
وفى الآخر
ببقي حاسة إن فى كدب
المرة دي مسموحلك ترد
بكلمة واحدة بس علي كل سؤال
بدون اى اضافة
لو مقدرتش تترد بمنتهي الصدق من خلال كلمة
لو مقدرتش توضح بدون تبريرات وشرح مقالات وامثلة
لو مقدرتش تقول الحقيقة بمنتهي الصدق وبدون أى إخفاء لأي تفصيل
ساعتها بس هقولك كل حاجة إنتهت
أنا أعرفك كويس جدا
أكتر مما تعرف نفسك
أنا الطفلة اللى سكنت جواك
حبيتها وعشقتها وأصبحت هي حياتك كلها وإتلخصت فيها كل البنات
إتلخص فيها الحل لكل العقد اللى جواك
إتلخص فيها المنطلق للجنون والحب والعشق والفرح والشوق
دلوقتى عرفتني ؟؟؟
أعرف عن اللى جواك كويس أوي
عن كل حرف عشته
عن كل بنت كلمتها
عن كل حيلك
عن كل ألاعيبك
عن إنك قدرت تعلم شخصية مبتقدرش تنطق إسمها من غير كسوف إزاي تكدب
أعرف كل إنتصاراتك
أعرف كل هزائمك
أعرف روحك من جوا فيها إيه
أعرف بتدور علي إيه
ومعني اللى بتدور عليه إيه
أعرف كل نظرياتك وكل إثباتاتك ومبادئك وقوانينك
أعرف سر الصندوق
أعرف إيمانك مخبيه فين ؟؟
أعرف قلبك حفظته فين ؟؟
ودلوقتى جه وقتى أسألك ...
جاوب بكلمة واحدة بس علي كل سؤال بدون أى إضافة
إتفقنا ؟
 - متفقين

***

هي : إنته فين ؟؟
أنا : عزلة

هي : ليه ؟
أنا : وجع

هي : فين اللى بيحبوك ؟؟؟
أنا : بعيد

هي : ليه ؟
أنا : غلطاتي

هي : ومين اللى بيحبوك
أنا : بنت

هي : مين ؟
أنا : أروي

هي : إشمعنا ؟
أنا : بريئة

===========

يتبع دا لوقررت أنشره بقى 

أوعدكم الأسئلة هتبهركم ...

والرد كذلك 

منفسيش فى حاجة

تصبحوا علي خير

ربنا فى ست أيام خلق الدنيا 

وإنتي فى ست إيام عملتي حاجات كتير قوي
 (( مش هوصفها هنا ولا هقولها ))

لذلك فأنا شاكر لك جدا 

مع السلامة

شاب فقري

6-2-2013 

P.S : بكره برده رايح المسرحية وزي ما كتبت فى البوست السابق وهروح وهستني زي ما قلت بالظبط ودا بدون ما أسبب إزعاج أو قلق لأي شخص ولا أزعل أي حد , أو أكون مصدر ضيق لأي شخص .

أنا بلتزم بكلامي ووعودي  

العرض الأخير لعزازيل

بسبب مشاكل فى العرض بين الفرقة ودكتور يوسف زيدان 
فهيكون دا العرض الأخير 
مفيش عروض تانية لعزازيل خالص , يعني مش هتنزل من البيت وتشوف أحمد صبري وهيبا  وهيباتيا و أوكتافيا وعزازيل ذات نفسه غير فى اليوم دا ...
بكرة على مسرح الهناجر .. آخر عرض لعزازيل . في افتتاح آفاق مسرحية .
في السادسة مساءً .. الدخول مجاناً .

***

إنتي معزومة مفيش كلام 
:)
بكره الساعة خمسة بالدقيقة والثانية هكون مستني هناك 
ممكن أستني لحد خمسة ونص عادي 
بس لو هتتأخري هستني لحد تسعة :)
العرض الساعة ستة ويارب مش نفوته 
بكره فى نفس المكان فى أول مكان سمعتي فيه كلمة ( بحبك ) مني 
فى نفس المكان الى بستني فيه واللي بتجري فيه زي العيال الصغيرة :P
You are Waiting For a Train 

دا إيفنت المسرحية 

كدا علي طول بدون أى مقدمات ...

:)

شاب فقري 

6-2-2013

به و بدونه

البوست الرابع فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

البوست بالكامل من وحي الجملة دي من عند دعاء العطار صاحبة مدونة كلمتي  وأنا بفتش فى المدونة وبقلب فى مدونات الناس كالعادة المقيتة بتاعتي :D
نكتب الجملة بقى : 

هي معاه كانت أوقات بتزعل .. بس من غيره مبقتش عارفة تفرح :(

به وبدونه

كانت وهي معه تشتكي البكاء فى الشوارع بسببه وتشتكي الوجع الذي تشعر به كلما تذكرت أوقاتهما معاً ولكنها بدونه لا تعرف للفرح طريق سوي أن تظل تبحث في كلمات من حولها عن الرضا عنها والذي لا يأتي أبدا وتظل تبحث فى عيونهم عن معني أو فرحة ما أو سببا يدعو للسعادة لكن ... السعادة كانت فى البكاء معه وفى لحظات قضتها بين يديه وفتحت أبواب روحها له لكي يصلح ما تكسر ويبني ما ضاع منها فى سنين العمر السابقة  , بدونه هي مازالت تبحث بداخلها عن حلم للغد , مازالت تفكر كيف سيكون غداً ؟؟؟ لا طاقة للحلم ولا طاقة للراحة ؟ تسأل نفسها كل لحظة إلي أين أنتمي ؟؟ وأين أنا ؟؟ ربما مكاني بجواره ؟؟ لكنها دوماً ما تخبر نفسها أنها غير مستعدة لتلك المحادثات المتعبة والتفاصيل الموجعة والحقائق المرة , تري كيف يكون هوا حياتها بكل نقائصه ؟؟ اهذا هوا الحب ؟؟ أسيظل يتحمل حماقاتها وتناقضاتها ؟؟؟ وإلي متي ؟؟؟ تتذكر رده علي ذلك السؤال حين قال (( وحتي تحترق النجوم يا حبيبتي )) , تسال نفسها فى سذاجة وهروب من الكلمات ومعناها  : وهل سنظل نحيا إلي أن تحترق النجوم ؟؟؟ وهل هوا بهذا الوفاء ليظل يحبني هذا العمر كله ؟؟ وهل أنا أستطيع الحياة معه ؟؟؟ ترد علي نفسها بأنهما من عالمين مختلفين ولا يمكن أن يجتمعا أبدا , تبكي بحرقة وتشعر بالبرد يعصف بكل خلايا جسدها تحاول أن تهدأ بلا جدوي ولذلك تحتضن وسادتها وربما تنظر إلي سقف الغرفة وتنام منصتة إلي دقات الساعة .

كانت به تعرف للوجع معني وبدونه عرفت للأوجاع معاني كثيرة , كانت به لا تميز الفقد ولا تعترف به وبدونه صارت لا تعرف سواه بداخلها كالثقوب السوداء التي تبتلع أي فرحة مهما كانت بساطتها, به عرفت أن الروعة تسكن كل شىء فى الحياة مهما كان هذا الشىء وبدونه أدركت أن هنالك الكثير من الأشياء التى تحمل الشقاء بداخلها والوجع وتبدو رائعة رغما عن شقائها وكأنه تمويه الطبيعة لها بأن تحمل الشقاء والفقد والألم فى غيابه .

تطيل الغياب وبدون ذكر تفاصيل الوجع والجنون والألم التي قامت بها ولم تلحظ فى غمرة إصرارها بما قررت عند الرحيل أفعالها .تعرف حد اليقين أنه سامحها دون مقدمات , تحاول التماسك أمامه ولا تصرخ بسؤالها : لماذا ؟؟ , بدون تفكير تستدعي ذات الذكري حين قال : سأحبك وحتي تحترق النجوم .

شاب فقري

4-2-2013

الدفء

البوست الثالث فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

إحساس غريب ينتابني الليلة برغم كل ذلك البرد الذي يشكو كل من أعرفهم ومن لا أعرفهم منه إلا انني دافىء وبشدة 

ربما لأنني جمعت كل أجزائي وأشلائي المبعرة بين المقابر وتحت أطلال القصور وفى كل قرار عميق 

ربما لأنني جمعت نفسي وكل ذلك الليلة لأجلك 

الليلة ها أنا ذا 

أنا الدفء ولا دفء غيري ...

أرتدي ملابس الصيف و أفتح كل النوافذ التي تعلوها أتربة الوجع والأبواب الصدئة من الفقد وأستسلم للبرد لأدعه يحاوطني من كل إتجاه ولكني لا أشعر به , الليلة أنا موجود , لم أشعر بذلك منذ سنوات ولكنني حقا وبصدق وبرغم صدق كل تعبيراتي وكل الجمل التي كتبتها ( عن الأبواب والنوافذ ) أشعر بأنني دفء الوجود كله ...

***

أتذكر كلمات الرجل العجوز : 

لا قيمة لدفء يا ولدي دون أن يكون هنالك من يجالسه أو يؤنس به 

مثل النور ما قيمته إن لم يتواجد من يري به 

لكل شىء سبب

***

أتذكر كلمات المسافر عن الأوطان والأوجاع وعن الترحال 

وأحاول الهروب حتي من تسجيلها أو كتابتها   

***

تري 

متي ينتهي الإنتظار ؟؟

متي ينقضي الليل ؟؟

متي أتحدث ؟؟؟

متي أرتاح ؟؟؟

متي ...؟؟ 

شاب فقري

3-2-2012

مكانك :)

البوست الثاني فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

تقف فى الزحام وحيدة بمفردها 

تشعر بالبرد بلا حدود 

كل الطرق تحاول جذبها إليها 

تبحث عن مكان 

مكان ما 

فقط مكان واحد يختفي فيه كل هذا البرد وهذا الألم

مكان تختفي فيه ثقوب الوجع السوداء التى تلتهم كل شىء 

ولا يعرف للفقد معني ولا للخذلان تعريفاً

مكان 

 تنتمي إليه وبشدة 

لا يحاصرها بملايين الأسئلة 

لا يحاول كشف أوجاع روحها وآلام اليوم الطويلة التي لم تنتهي بعد 

يتقبلها بكل تناقضاتها 

مكان 

تجد فيه ملابسها المفضلة 

الكوفية الحمراء القاتمة بلون الحنين 

والفستان الوردي بلون الحب 

والعباءة البيضاء بلون طهر روحها 

و حوائط ملونة باللون الأخضر والسعادة الأبدية 

لون الغد 

مكان 

يضمها دون حديث

ويحتويها دون جدال

ويتفهمها دون نقاشات سخيفة 

ويملؤها دون خطيئة 

يقترب دون وجع 

تمسك هاتفها فى عتمة ليل غرفتها وفى شدة البرد القاتل الساري فى عظامها 

لا شىء يرحم 

تأتي علي ذهنها فكرة واحدة 

تمسك هاتفها 

تحادثه 

تتنهد لتفكر فى عبارة واحدة 

( أنت مكاني وعلي مقاسي )

تمت ,,,

شاب فقري 

2-2-2013

للبوست تكملة الليلة إن شاء الله 

بس أنيم الحاجة وآجي لكم :)

مقدرتش أكمل ..
بس خلاص