رجعت

 عدت من المعارك 

راضي 

عملت كل اللي في وسعي 

مفيش باب مخبطتش عليه 

استحملت كل الاذي بما فيه السجن اللي مكنتش استاهل فيه حكم واهانة 

حاولت كل المحاولات 

كفرت عن اي ذنب وبذلت كل مجهود 

عدت راضي ، دا مش نصيبي لو كان نصيبي كنت خدته زي اي شغل او فلوس او رزق ، طالما مخدتوش يبقي مش بتاعك

عمل كل حاجة وقرت كل لحظة حلوة واشتريت كل الناسباغلي ما املك ، سنين انتظار 

خلاص 

معادش في حاجة تتعمل ، معادش في وسيلة ، معادش في مودة ورحمة معادش في ذكري حلوة او عشم 

طهرت قلبي وحياتي 

كان لازم يحصلي كل دا عشان ارضي واتنازل ، كان لازم اكلم الاهل نفر نفر ، كان لازم اتنازل كان لازم اضحي كان لازم احاول عشان مجيش قدام اقول معلش الغلط عليا اصلي محاولتش ولا اندم علي حاجة 

مفيش حاجة ممكن يعملها انسان الا وعملتها وبكل قلبي ومشاعري وجوارحي ولكن مكانش في نصيب 

الطرف التاني كان عنده حاجات اهم من البيت وحياة مستقره واسره 

حرية وهم مش حقيقية في مجتمع مليان نفاق 

فلوس وشغل واقامة في بلاد التلج 

منظر وقيمة وحاجات ملهاش لزمة

اللي له قيمة فعليا اللي هيقف قدام الدنيا عشانك واللي هيضحي ويتعب سنين عشانك ويصالحك ويراضيك ويسايسك ويحبك ومتهونش عليه وبرده يفضل يراضي فيك ، التقدير الزايد والمحبة الزايدة والحنية الاوفر عملت فيا كل دا 

هل انا غلطان في دا ؟ لا 

لان كل دا حلو مع اللي يستاهله ويقدره ويحافظ عليه ،

اللي ميرضاش يشوفك تعبان ويقف مكانه واللي ميرضاش يشوفك بتترحل او بتعاني او في مستشفي او في ازمة او في مصيبة 

اللي ميرضاش عليك كلمة وحشة ويصون العيش والملح ويذكرك بالخير حتي لو مبهدلين بعض 

زمان كنا بنبقي متخانقين واشكر فيها قدام الناس ويتقالي دا نفاق ومنظره متعرفش ان دا الصح ان دا اصل وتقدير ومراعاه للعشرة

انا الحمد لله بعد كل مجهوداتي دي فهمت ان البعد والقسوة كان هدفها البعد فعليا مش دلع ولا عقاب ولا تعزيز ورفع قيمة ولا حتي لعبه عشان تنتصر فيها 

مفيش حد بيحب حد ويسجنه او يفضحه قدام الناس او حتي يقول عليه كلمة وحشة او يدوس علي كرامته ولو حتي بينهم وبين بعض 

الحب مفهوم كبير اوي وانا للاسف كبرته فوق قيمته بكل شكل 

والله ما زعلان ولا ندمان ولا حزين ولا حتي لحظة واحدة علي كل المجهود دا ولا علي الانتظار ولا علي الصبر ولا علي اي حاجة حصلت لي باي شكل والله خالص 

بالعكس 

يعلي قيمتي في نظر نفسي محبتي لبنت اعرفها من سنين من ايام ما كانت كتكوتة وكنت بعلمها كل حاجة لحد ما كبرت عليا انا واتكبرت عليا انا ونسيت سنين وسنين 

عقلي كان واقف قدام البنت اللي شفتها اول مره وحافظت عليها عقلي كان عاجز ومش راضي يفهم ان الناس بتكبر وتتغير وتتطور واقول لنفسي يمكن تتغير ما انت اتغيرت 

في فرق بين انسان عنده انك زايتي وديبريشن بيخف زي حالاتي كدا وانسان مفاهيمه غلط و افكاره بتعتمد علي الناس والسوشيال ميديا والمظاهر وكدب ونفاق اللي حواليه 

والله العظيم ما زعلان بالعكس 

هتبقي قصة حلوة احكيها لولادي في يوم في بيت هادي ومشتقر وزوجة طيبة وحنينة بتصدقني ومآمنه فيا وشارياني وعايزاني وبتدعمني وتحبني بجد بدون اي تدخل من اي حد ، وهيبقي بيت جميل وونس يدفي ال وح ويريح القلب ويتعافي كل جروح القلب 

هقولهم يا ولاد حبوا وعيشوا الحياه بصدق متخلوش الحياه تكسركم ولا معادن الناس وافعالها تغيركم ، هقعد احكيلهم واضحك مع امهم علي سنين التوهة والمرض واحكيلهم ازاي نجحت في ظل ظروف زي دي 

هقولهم يا ولاد العشره والعيش والملح والاصل وهيبقي بيت علي ارضي الجميلة بيطل علي جنينه زي ما بحلم وفيه شجرة زيتون ومانجو وبرتقال وليمون وكل الشجر المعمر اللي بيقول ان البيت دا فيه دفا وامان وحنية وحب وعشرة ومودة ورحمة

كل اللي فات خد مني سنين فاتت لكنه مش هيعرف ياخد الجاي لا بالاثر ولا التأثير ولا حتي باي شكل 

خسرت شوية حاجات مش مهم وكل حاجة هتتدفع في ميعادها وخلاص هيبقي حياتي ملكي الشخصي انا ومراتي وبيتي مش ملك حد تاني مش راسم لي حتي خطوه في خطته 

الناس بتتعب وتسافر وتعاني وتعدي بلاد عشان حب زي دا وانا ابقي حمار لو اديت فرص او رميته علي الارض لحد مش فاهم اصلا ولا مثدر ولا شايف 

عارف اني عندي عيوب لكنها زي اي حد فيه عيوب عادي بتتصلح وبنتعايش ومره نعدي ومره نصالح ومره حضن ومره كلمة خلوة والحياة بتمشي 

مش زعلان علي العشرة ولا علي كل التعب ولا كل الذكريات ، كنت في غيبوبة وفقت واوقات التعب والوجع الشديد عندي ناس تقف تطمني وتطبطب عليا وتسندني واعدي كل دا ، صحيح تعبان بس بخف وكلها خلاص كام يوم واحتفل باعظم حدث في السنتين دول 

انا اشتريت كتير وقدرت كل حاجة فوق الوصف وعملت كل اللي في طاقتي وقدمت كل عروض الصلح وتعبت عشان اشتري بس خلاص 

مفيش فرص تاني 

مفيش امل تاني في ان الميت يصحي ولا ان حد يقدر الحب والشخص النقي اللي قدامه 

زمان كنت عبيط فاكر ان لما يبقي معايا فلوس مش هيبقي في مشاكل وكل حاجة هتتحل لكن الحقيقة ان المشكلة مكانتش في فقري ولا في ضيق الحال بالرغم اني كنت بجيب وبعمل كل حاجة ومش بتحشر في رزق حد لكن اتضح لي ان التواصل والتفاهم والتقدير والحب والمودة حتي في الخناق ضرورية

انا كنت مريض بالموضوع دا عشان بقاله سنين وسنين 

لكن ربنا رحمني ورحمته واسعه واعطاني كل العمر الجاي وكل الرزق الجاي عشان ابني بيت جديد وانبسط واعيش 

فلوس كل حاجة موجودة ومرصوصة ومحطوطة وجاهزه للتسليم في يوم الدفع ودي حاجة مش قلقاني وفي قد كدا اضعاف والحمد لله كرم ربنا واسع 

انا في نعمه عظيمة اسمها الفوقان وتقدير الذات 

مينفعش اتحايل علي حد عشان يفضل في حياتي او يكون معايا 

مينفعش اضحي لحد مش شايف 

مينفعش اقدر حد مبيقدرنيش 

مينفعش اجري ورا حد مش فاهمني ولا فاهم انا بتحرك ليه وعشان ايه

انا دلوقتي عندي امل في بكره بدون كل اللي فات في مستقبل في بيت دافي وناس بتحب بعضها فاهم مع بعض 

دلوقتي بس ادركت نعمة ربنا عليا 

الحمد لله

انا في نعيم وقفلت الباب ورضيت يارب وسلمت امري ليك ووالله يارب وعزتك وجلالك راضي جدا ومش هسمح لحد تاني يدوس عليا او يلاعبني او يلعب بيا و يضحك عليا او حتي يدوس عليا 

والله يارب هحافظ علي نعمتك وهطلع جري علي بيتي واولادي وزوجتي وابني لهم المستقبل والحياة والدفا والامان

وهي دي اهم حاجة في الوجود 

الباقي كله زايل 

والحمد لله علي نعمة البصر والبصيرة والرزق الموجود عشان اسدد الدين دا واخلص منه 

بقالي سنة ونص مستني اللحظة دي اللحظة اللي اسدد فيها فيخلص كل دا واقدر ابتدي حياه بسهولة واعرف ان اللي فات خلص وخلاص معادش في امل ولا فايدة والحمد لله ربنا كرمني وحصل وعرفت ان كل حاجة انتهت ودلوقتي مش هعرف الوم علي نفسي ولا اشتكي ولا اقول الناس بوظت موضوعنا ولا اقول الحب هينتصر ولا اقول هي راجعه ولا اقول بتحبني 

دلوقتي هقفل كل باب وانا متطمن اني عملت اللي عليا وزياده وضيعت سنتين تقريبا بحاول استعيد الموضوع ولكن علي راي حد قالها مرة ، كل اللي فاتك مش رزقك فالحمد لله انه معادش رزقي وهقبل وارضي وابني من جديد ونقطة ومن اول السطر