حبيبتي

 

تصدقي 

طول عمري بشوف الناس حلوه من بعيد وأقرب لهم أتصدم بيطلعوا عادي ، إلا انتي كنتي حلوة من بعيد ولما قربتلك طلعتي احلي في كل تفصيلة وحتي احلي من كل الأحلام

علي رأي هشام الجخ 

حبيبتي أحلى من شعري 

وأحلى من الحروف كمل 

ولا بتغدر ولا بتهجر ولا بظلمها تململ 

لكني في حيرتي باستغرب 

أنا إزاي مش باغنيلها 

وهي إزاي .. بتتحمل !!

—- 

فيها الحلو كله 

بقولها يا سكرة 

هي الفرح كله

كنت فقدت الأمل في الدنيا والناس 

مكنتش متخيل للحظة ان هي موجودة

ان كل دا موجود 

ان الفرحة

لمسة الايد

كل الحلو كله 

كلها علي بعضها 

فيها الحلو 

في تفاصيلها 

في كل حاجة 

مش مصدق جت منين وإزاي 

مش مصدق ازاي 

مش مصدق ان لسه ليا في الدنيا نصيب 

الحمد لله

لسه ليا في الدنيا فرح وضحكة 

حب حقيقي 

كل حاجة حلوة 

حتي ابتسامتها 

وكسوفها 

وهزارها 

وقربها وكل حاجة 

وزي ما هي بتقولي دلوقتي في اقل من خمس دقائق أنا بحبك خمس مرات ورا بعض اهوه ♥️

وانا بحبها والله

فرحت قلبي وأيامي 

فرحت روحي 

طاير بيها والله 

ودلوقتي بقت خلاص رسمي في حياتي 

مش عايزين نكتب عشان عيون الناس 

بس غصب عننا عن قريب هنضطر نكتب 

بس دلوقتي نستمتع بالإجازة وبفرحتنا 

نفرح سوا 

وهي كل فرحتي في الدنيا 

يارب يخليهالي 

مشوار شبرا

 

مينفعش انزل اجازه وممشيش في شبرا مصر 

مشيت وقت حلو 

اشتريت حاجات كتير من هناك 

اشتريت برفانات بحبها 

وشربت قهوه بحبها 

و اشتريت دره 

مكسرات 

مليون حاجة

وكمان جبت مستكه

المهم اني انبسطت 

انبسطت اوي ومشيت سرحان مع اللي بحبهم 

كنت ماشي لوحدي ورايق وسعيد 

قلبي كان طاير 

افتكرت ايام ثانوي 

وافتكرت الخروجات اول سنتين في الجامعه 

في ٢٠٠٦ و سبعه 

ربنا كرمني والحمد لله 

كل حاجة في حياتي اتغيرت 

نجحت وكبرت 

وبقيت في احسن حال 

ولقيت نفسي وفرحت بنفسي 

كل دا بالدنيا 

الحمد لله

بكره سفريه طويله يارب يسهلها 

وبعدها مشوار الدكتور 

واحتمال يبقي في مشوار في النص 

بس ان شاء الله ربنا يعيني والاقي اللي بدور عليه في سفريتي دي 

واحقق النجاح اللي بتمناه

يارب يرضي علينا ويفرحنا يارب 

ولسه

ان شاء الله سهله

كله هيبقي حلو 

وعندي ميعاد مهم يوم الجمعه 

هشوفها يوم الجمعه 

وهنتغدي سوا كلنا 

هيكون يوم حلو 

وهيبقي يوم حلو في حياتي ان شاء الله

يارب يرضي علينا يارب 

الحمد لله اني وصلت لحد هنا 

وهيتبقي شوية حاجات بسيطة

وكله هيبقي ميه ميه

يارب 

سكر ياسكر

 

جسمي فيه مشاكل

روحي مرتاحة 

مخي فيه صداع 

روحي بتحبها اوي 

اغلي حد علي قلبي زي السكر دلوقتي 

قابلتها امبارح 

هي زي الجنة وزي البحر الصافي ابو موج طيب 

هي زي صفاء السما 

طايره

بتضحك 

بتحبني اوي

عايزاني في حياتها 

أهلها طيبين ومحترمين 

هي ذوق 

هما أكابر 

طول الوقت مبتسمه وبتضحك من قلبها 

امبارح كنت هقولها بحبك

بس مسكت لساني ميت مره 

كل ما تهدر وتضحك

كل ما تتعلق فيا وبيا

كل ما تسأل وتحلم ببيتي 

كل ما تحن عليا 

عايز أقولها 

اني بحبها 

بس سايب كل حاجة لوقتها 

هي سكر قلبي 

بقولها كدا بتضحك وتفرح 

ا

والنهارده اليوم كان صعب اوي 

مشوار وقهوه ورا التانيه

وعايش 

وسهران وبكره في مين مشوار 

مش مدايق ولا متضرر ولا زعلان

هي كانت جنبي 

بتعرف تملك قلبي 

والله 

والله والله والله

علي كل العمر والعلاقات والتجارب 

عمري ما عرفت حد طاير بيا زيها 

يا بختي بيها 

وبختها 

الحمد لله

هانت ونقعد نتفق 

بعد ما اول قعده عدت علي خير 

تاني قاعده ونتفق 

وهانت 

بس والله حسيت اني بحبها وهي بتضحك 

سكرة والله

علي قلبي زي السكر 

يد الله فوق أيديهم

 

بقعد أفكر كتير في نقطة ازاي ربنا يوفقك في حاجة واحدة وفي مليون حاجة

بفتكر الجملة دي  يد الله فوق أيديهم 

ربنا بيرمي محبتك في قلوب ناس متعرفكش

بيساعدك بدون ما تدور علي مساعده 

بيفتح لك أبواب كان مستحيل تتفتح

بيحرك الكون كله لمصلحتك 

عايز محبة وقلوب تحبك من غير ما تعرفك ؟ حاضر 

هتكون زي الاية : وألقيت عليك محبة مني ولتصنع علي عيني 

عايز مودة ورحمة ؟ حاضر 

هتلاقي ناس عمرها ما قابلتك بتحبك وبتثق فيك وعايزينك ومختارينك

وموافقين عليك وشاريينك وبيدوك بنتهم ومبسوطين بيك وفرحانين بيك

عايز رزق وفلوس و حاجات تساعدك تبتدي حياه ؟ 

هتلاقي الرزق جاي لك بكل شكل والفلوس مبتخلصش وفيها بركة

عايز بنوتة زي القمر ملهاش زي تطمن قلبك وتراضيك ؟ 

هتلاقيها وهتكون بتحبك من اول يوم وبتتمني لك الرضا ترضي 

وشارياك وعايزاك وهتديك الفرصة  بدل المره مليون مره وهتسامحك وتقف جنبك 

وتراضيك وتسألك بكل حب ايه يرضيك ؟ 

عايزها متفاهمه ؟ حنينه ؟ هادية ؟ طيبة وقلبها بينور عتمتك ؟ 

هتلاقيها جوهره تصونك وتحبك وتراضيك وتشيلك في عيونها وتفرح بيك

والاهم من كل دا تفرح بيها وتحبها وتكون طاير بيها وتقعد تسأل نفسك طول الوقت يارب أنا عملت ايه عشان تراضيني للدرجة دي 

ربنا ممكن يراضيك ويمنحك ويبارك في عملك ومالك و وقتك وإجازتك وفرحتك وحبك وفي البنت اللي بتتمناها وفوق كل دا في اهلك وهدوء أعصابك وروقانك ويشفيك ويراضيك

أنا بكتب الكلام دا كله ليه ؟ 

عشان أفضفض 

عشان عايز اوثق الفترة دي لأولادي وبناتي لما يكبروا 

عايزهم يشوفوا ويقروا ويتعلموا من اللي جرّبته و عشته في حياتي 

تسجيل حياه كامل يبقوا عايشين شايفين بابا قدامهم حتي لو مش موجود 

يلاقوا كلامي ومواقفي وأفكاري وتبقي معاهم في كل وقت 

أنا مبسوط اوي باللي وصلت له وراضي بمساعدة ربنا ليا في كل خطوة 

الخطوة كانت حلوه 

وهتكبر مع الوقت 

مبسوط بالناس 

فرحان بيهم 

وبيها 

كل حاجة ماشية زي ما بتمني وبحلم

ربنا بيحبني 

مش شايف غير كدا دلوقتي 

والحمد لله 

ربنا يتم نعمه عليا ويراضيني كمان وكمان 

وهبقي اكتب بعدين عن المقابله دي 

بس دلوقتي سهرت كتير احب فيها

لازم انام بقي عشان هنخرج بكره سوا نتفسح

يارب يفرحني ويبارك في الاجازه دي 

وكدا حلو اوي 

بس يارب أنا طمعان في كل حاجة 

كمان وكمان وكمان وكمان وكمان

ومقدرش اقول غير 

الحمد لله رب العالمين 

مودة ورحمة

 

بيقولوا الحنية اساس كل حاجة

بس الحنيه من الرحمة 

انك ترحم ضعف حد قدامك عشان بيحبك وبتحبه

انك لا تتحمل عليه الاذي باي شكل 

انك تراعيه في حضوره وغيابه 

انك تكون معاه ارحم بيه من نفسه 

لان مش كل الناس بتراعي نفسها او حنينه علي نفسها 

أنا خدت وقت طويل اوي بفهم في مفاهيم بالنسبة للناس كلام بيتقال 

الحب والرحمة والحنية والدفا والأمان 

خدت وقت مع كل المفاهيم دي 

خدت وقت عشان افهم نفسي كويس وابقي مالك زمام امري 

خدت وقت عشان اعرف اقعد اتكلم مع قلبي وأسمعه وابطل أعاند فيه 

اعرف ايه يتعمل وأعمله 

اكون حنين وطيب علي قلبي وعلي نفسي وعلي روحي قبل ما اكون حنين علي الناس 

العالم علي رأي صديقة قديمة مكان قميء ومزري من غيري 

حنيتك علي نفسك ودعمك ليها وتشجيعك ليها اهم 

أوقات وانا ماشي بخطط للمستقبل وخطة التلات سنين 

بتخيل نفسي عندي جناحات ويفردها في الهوا وبحس بالهوا بيلمس كل حته فيا

بتخيل لو أنا طاير ولو قلبي بينبض بعنف عشان يرتفع فوق في السما ويحس بالدفا قرب الشمس 

واحيانا بتخيل نفسي فوق البحر طاير ويمكن أوقات تانيه في عز العتمة

بليل تحديدا 

التلات ايام اللي فاتوا سافرت عند صاحبي وعشت عنده تلات ايام وسط عيلته واهله

يمكن احلي تلات ايام في حياتي كلها 

الدفا. الأمان الحب الحنيه محسيتش بدفا العيله دا عمري 

أنا بحب صاحبي دا اوي وبحب عيلته وبلده 

تفاصيل كتير وأشخاص اكتر وقلوب اكتر حنينه علي بعضها 

ساعتها حسيت وفهمت وعرفت أنا ازاي بحب نفسي 

وعايز حياتي تبقي عامله ازاي 

أنا عارف اني شاطر و هقدر أحقق هدف الخطة وفي خلال تلات سنين 

هكون بطير بجد وقت ما احب واكون حر وطليق وبراحتي ومالك نفسي وزماني 

متعه الحب 

انك تلاقي اللي يحبك ويستحملك ويحتويك بجد ويعملك كل حاجة بكل حب الدنيا 

حتي علي رأي واحد صاحبي تاني 

كوبايه الميه بتتناول بحب 

في فرق في الحياه بين وبين

أنا سعيد وراضي والحمد لله

فضل ربنا عليا واسع 

ويمكن بالمناسبه دي اتكلم عنها 

اقل من اربعه وعشرين ساعه هكون بطلب إيدها وفي بيتها وهي بتناولني العصير 

أنا حبيت وجودها اوي 

حنيتها عليا عامله زي نسمة الهوا اللي بتيجي في عز الرطوبة والنار 

زي نفس في عز الشتا والتلج يفتح قلبك

صبرها عليا وسماعها ليا 

ويمكن كمان معلش يعني نظره عيونها ليا 

قربها مني وهزارها وضحكها 

الدفا

كل حاجة 

أنا حبيتها تقريبا 

بتمني منها كل حاجة 

من كام سنه عرفت اني مريض من نمط محبتي لشخص بياذيني وقاطعته وبعدت عنه تماما 

دلوقتي أنا سعيد وراضي ومبسوط وحاسس بالحب وحاسس بالفرحة 

أنا عارف ان دا هو عوض ربنا ليا علي كل ايام التعب والشقاء 

عارف ان ربنا هيراضيني علي صبري ودعايا 

علي كل اللي شفته من تعب وظلم وسرقه وخيانه وغدر وغيره 

عارف وحاسس برحمة ربنا جايه لي 

وهي دي اهم حاجة عندي وليا 

أنا كنت زمان كل ما بسيب علاقه بلاقي في العلاقه اللي بعدها كل الحلو اللي عملته راجعلي تاني لدرجة حتي الكلام والضحك والصبر 

يمكن ربنا هيرزقني بكل الحلو اللي عملته قبل كدا ومتقدرش

اكيد ربنا حنين علي قلبي لاني عمري ما ظلمت حد 

وكمان دي فرصتي الحلوه في حياه حلوه 

رحمة وحنية

موده وحب 

حرية وسعادة

دا شعار المرحلة دي 

يكفي اني اقول ان ربنا بيحبني اني لقيتها 

واحيانا بسال نفسي زي الأستاذ علي الحجار انتي طلعتي لي منين ودخلتي حياتي ازاي 

هي سبب سعادتي وفرحتي في الحياه دلوقتي 

الحمد لله

حتي وهي طايره بيا ومتعلقه بيا

حتي وهي عماله تزن

وهي بتختار أسامي الأولاد 

وهي بتبعت رسايل وانا نايم عشان اصحي الاقي كلامها الحلو 

هي وهي وهي وهي 

رحمة ربنا سابقه

ونجاته جايه

الناس بتكذب في الدنيا عشان سهل تغش الميزان في الدنيا ( حتي لو الغش دا بينفضح في يوم ) لكن رحمة ربنا وميزانه وعدالته غير اي حاجة 

مش بتصدق اكاذيب البشر وبتشوف النوايا وبتعرف كويس اوي تنصف المظلوم وترد الحق وتخسف الارض بالظالم

أنا واثق فيك يارب 

شكرا علي محبتك ليا

شكرا علي كل محبتك

شكرا علي الحلو كله

شكرا علي العوض

شكرا عشان خليتني احب نفسي 

شكرا يارب 

والحمد لله رب العالمين

بكره ان شاء الله هاخد اول خطوه في الحياه الجديدة 

وهقعد معاها في بيتها 

وناكل الجاتوه سوا ونشرب عصير ونشرب قهوه ونهزر ونضحك 

يارب يجعله خير يارب