حاجات وحاجات

 

عارف مقولة كما تدين تدان 

هي شغاله في الاتجاهين مش بس في اتجاه الشر 

يعني زي ما عملت خير قبل كدا هيترد لك

مش بس بنتكلم عن الشر 

يعني كنت بتحب ومخلص واصيل و جدع وعملت اللي عليك لكن محدش قدر 

ربنا هيبعتلك حد بنفس الشكل اللي كنت عليه مع الناس 

انت ونصيبك بقي 

لو انت كنت راجل محترم هتلاقي حد محترم وجدع 

علي قد طيبتك ونيتك وعملك 

كل دا بيدخل الخلاط وبيطلع لك التجربة الجديدة 

تخيل نفسك مرتبط بحد بيعمل الحلو كله بالظبط زي ما بتتمناه

بل ويمكن احلي كمان لان مش كل الناس شبهك ولا انت شبههم وكل واحد له نظرته ورؤيته في الحب والعلاقات 

فاهمني ؟ 

بالظبط كدا يعني حتي احيانا الحلو اللي عملته ربنا بيخليه أضعاف عشان خاطر في معاناة انت مريت بيها او تعب او مرض او او او او 

حاجات كتير كدا 

فالخلاصة 

ربنا بيلحقك ياصاحبي في الطريق 

بيبعت لك حاجة احلي من كل أحلامك 

دورك بقي تحافظ عليها 

دورك بقي مش بس تحافظ لكن تعرف تحديدا امتي اوان الورد 

تعرف اللحظة المناسبة اللي تبتدي فيها العلاقة لان الانتظار قاتل للحب ياصاحبي 

ومش بس كدا 

بدايتك للعلاقة في اللحظة دي تحديدا بيحافظ علي كرامتك وعلي شخصيتك وبيحافظ علي محبة الطرف التاني 

الحب لما بيرتوي في النور بيكون مختلف وكذلك لما بتلحقه من الاول مش بتستني لما الآخر يخش في تعب ويدخل في تفتيش عن عيوبك عشان خايف تكون بتلعب ويفتش في روحك عن أوجاعك وعن نقط ضعفك لانه مش حاسس بأمان 

تخيل بقي 

كل دا فجاة لقيتني في النص في قلب الحدث 

جايب بوكيه ورد احلي من حياتي و كام علبه جاتوه 

تخيل 

أنا مكنتش عارف ان الحلو مستنيني

ان ربنا لسه شايلي الشخصية المناسبة ومش بس كدا 

لا دا حياتها كلها كانت مستنيه قدوم كريم 

وفوق كل دا 

ضيف ان حبك اتزرع في قلبها وانت حبيتها برده متقدرش تنكر 

كل دا ربنا رتبه 

تخيل للحظة لو في تفصيله صغيره اوي اتغيرت في طريقة تعارفكم 

لو كنت تعبان او كسلت او حتي مخدتش بالك او مكلمتهاش واهتميت

تخيل ؟ 

انت ماشي في طريق ربنا وماشي علي صراط مستقيم وخطة ربانيه

أنا بقعد ابص لها احيانا وتسألني مالك 

أقولها امتي وإزاي ؟ حصل كل الحب والحنية والرحمة دي 

عارف 

لما بمشي بدماغي وأفكاري بنجح اوي ويمكن عشان كدا ربنا بارك في الموضوع دا 

ولسه ببص لها واستغرب 

لسه بسرح في عيونها وضحكتها وهي بتسحرني 

مبعرفش اقولها ايه بحس اني احيانا مش عايز اطلع لها كل اللخبطة علي الترابيزه لكن اول ما هي تطمني ببتدي احكي 

وهي بتسمع 

بتسمع بجد 

بتنصت 

بتفهم 

وبتتفهم الموقف 

والحالة والظروف 

بتعرف بشكل تلقائي ازاي تريح بالي 

وتشدني للواقع بكل بساطة وتخلي الواقع جنة 

بقعد أتغزل فيها كتير 

اوي اوي 

وهي بتبقي سعيدة للدرجة اللي بتخليني اسأل 

ازاي هي سعيدة كدا 

وبرده بتطمني 

بسرح كتير واسألها عايزاني ؟ بتحبيني ؟ متأكده ؟ عايزه تعيشي معايا ؟ الجواز حاجة كبيرة ؟ 

وهي بتأكد كل دا 

أنا بقولها اني محظوظ بيها 

وهي بتقعد تقولي المهم اني دبستك وتضحك للآخر وبعدها تقولي كريم يا حبيبي اه متاكدة ، وحتي لو ايه أنا جنبك ومعاك وبحبك 

بتسحرني

وبحس اني اعرفها من عشرين سنه ولسه عندي فضول ناحيتها وناحية حبها

وبقعد استغرب 

علي كل اللي بحسه معاها من راحة أمان وحب وطمأنينة 

هي بتريح قلبي 

وبطمن بيها 

وبلاقيها 

لكني بفتكر ان دا مش بس من كما تدين تدان 

لكنها رحمة ربنا ونجاته وبركته ورزقه

وهي حبيبتي 

حبيبتي

 

تصدقي 

طول عمري بشوف الناس حلوه من بعيد وأقرب لهم أتصدم بيطلعوا عادي ، إلا انتي كنتي حلوة من بعيد ولما قربتلك طلعتي احلي في كل تفصيلة وحتي احلي من كل الأحلام

علي رأي هشام الجخ 

حبيبتي أحلى من شعري 

وأحلى من الحروف كمل 

ولا بتغدر ولا بتهجر ولا بظلمها تململ 

لكني في حيرتي باستغرب 

أنا إزاي مش باغنيلها 

وهي إزاي .. بتتحمل !!

—- 

فيها الحلو كله 

بقولها يا سكرة 

هي الفرح كله

كنت فقدت الأمل في الدنيا والناس 

مكنتش متخيل للحظة ان هي موجودة

ان كل دا موجود 

ان الفرحة

لمسة الايد

كل الحلو كله 

كلها علي بعضها 

فيها الحلو 

في تفاصيلها 

في كل حاجة 

مش مصدق جت منين وإزاي 

مش مصدق ازاي 

مش مصدق ان لسه ليا في الدنيا نصيب 

الحمد لله

لسه ليا في الدنيا فرح وضحكة 

حب حقيقي 

كل حاجة حلوة 

حتي ابتسامتها 

وكسوفها 

وهزارها 

وقربها وكل حاجة 

وزي ما هي بتقولي دلوقتي في اقل من خمس دقائق أنا بحبك خمس مرات ورا بعض اهوه ♥️

وانا بحبها والله

فرحت قلبي وأيامي 

فرحت روحي 

طاير بيها والله 

ودلوقتي بقت خلاص رسمي في حياتي 

مش عايزين نكتب عشان عيون الناس 

بس غصب عننا عن قريب هنضطر نكتب 

بس دلوقتي نستمتع بالإجازة وبفرحتنا 

نفرح سوا 

وهي كل فرحتي في الدنيا 

يارب يخليهالي 

مشوار شبرا

 

مينفعش انزل اجازه وممشيش في شبرا مصر 

مشيت وقت حلو 

اشتريت حاجات كتير من هناك 

اشتريت برفانات بحبها 

وشربت قهوه بحبها 

و اشتريت دره 

مكسرات 

مليون حاجة

وكمان جبت مستكه

المهم اني انبسطت 

انبسطت اوي ومشيت سرحان مع اللي بحبهم 

كنت ماشي لوحدي ورايق وسعيد 

قلبي كان طاير 

افتكرت ايام ثانوي 

وافتكرت الخروجات اول سنتين في الجامعه 

في ٢٠٠٦ و سبعه 

ربنا كرمني والحمد لله 

كل حاجة في حياتي اتغيرت 

نجحت وكبرت 

وبقيت في احسن حال 

ولقيت نفسي وفرحت بنفسي 

كل دا بالدنيا 

الحمد لله

بكره سفريه طويله يارب يسهلها 

وبعدها مشوار الدكتور 

واحتمال يبقي في مشوار في النص 

بس ان شاء الله ربنا يعيني والاقي اللي بدور عليه في سفريتي دي 

واحقق النجاح اللي بتمناه

يارب يرضي علينا ويفرحنا يارب 

ولسه

ان شاء الله سهله

كله هيبقي حلو 

وعندي ميعاد مهم يوم الجمعه 

هشوفها يوم الجمعه 

وهنتغدي سوا كلنا 

هيكون يوم حلو 

وهيبقي يوم حلو في حياتي ان شاء الله

يارب يرضي علينا يارب 

الحمد لله اني وصلت لحد هنا 

وهيتبقي شوية حاجات بسيطة

وكله هيبقي ميه ميه

يارب 

سكر ياسكر

 

جسمي فيه مشاكل

روحي مرتاحة 

مخي فيه صداع 

روحي بتحبها اوي 

اغلي حد علي قلبي زي السكر دلوقتي 

قابلتها امبارح 

هي زي الجنة وزي البحر الصافي ابو موج طيب 

هي زي صفاء السما 

طايره

بتضحك 

بتحبني اوي

عايزاني في حياتها 

أهلها طيبين ومحترمين 

هي ذوق 

هما أكابر 

طول الوقت مبتسمه وبتضحك من قلبها 

امبارح كنت هقولها بحبك

بس مسكت لساني ميت مره 

كل ما تهدر وتضحك

كل ما تتعلق فيا وبيا

كل ما تسأل وتحلم ببيتي 

كل ما تحن عليا 

عايز أقولها 

اني بحبها 

بس سايب كل حاجة لوقتها 

هي سكر قلبي 

بقولها كدا بتضحك وتفرح 

ا

والنهارده اليوم كان صعب اوي 

مشوار وقهوه ورا التانيه

وعايش 

وسهران وبكره في مين مشوار 

مش مدايق ولا متضرر ولا زعلان

هي كانت جنبي 

بتعرف تملك قلبي 

والله 

والله والله والله

علي كل العمر والعلاقات والتجارب 

عمري ما عرفت حد طاير بيا زيها 

يا بختي بيها 

وبختها 

الحمد لله

هانت ونقعد نتفق 

بعد ما اول قعده عدت علي خير 

تاني قاعده ونتفق 

وهانت 

بس والله حسيت اني بحبها وهي بتضحك 

سكرة والله

علي قلبي زي السكر 

يد الله فوق أيديهم

 

بقعد أفكر كتير في نقطة ازاي ربنا يوفقك في حاجة واحدة وفي مليون حاجة

بفتكر الجملة دي  يد الله فوق أيديهم 

ربنا بيرمي محبتك في قلوب ناس متعرفكش

بيساعدك بدون ما تدور علي مساعده 

بيفتح لك أبواب كان مستحيل تتفتح

بيحرك الكون كله لمصلحتك 

عايز محبة وقلوب تحبك من غير ما تعرفك ؟ حاضر 

هتكون زي الاية : وألقيت عليك محبة مني ولتصنع علي عيني 

عايز مودة ورحمة ؟ حاضر 

هتلاقي ناس عمرها ما قابلتك بتحبك وبتثق فيك وعايزينك ومختارينك

وموافقين عليك وشاريينك وبيدوك بنتهم ومبسوطين بيك وفرحانين بيك

عايز رزق وفلوس و حاجات تساعدك تبتدي حياه ؟ 

هتلاقي الرزق جاي لك بكل شكل والفلوس مبتخلصش وفيها بركة

عايز بنوتة زي القمر ملهاش زي تطمن قلبك وتراضيك ؟ 

هتلاقيها وهتكون بتحبك من اول يوم وبتتمني لك الرضا ترضي 

وشارياك وعايزاك وهتديك الفرصة  بدل المره مليون مره وهتسامحك وتقف جنبك 

وتراضيك وتسألك بكل حب ايه يرضيك ؟ 

عايزها متفاهمه ؟ حنينه ؟ هادية ؟ طيبة وقلبها بينور عتمتك ؟ 

هتلاقيها جوهره تصونك وتحبك وتراضيك وتشيلك في عيونها وتفرح بيك

والاهم من كل دا تفرح بيها وتحبها وتكون طاير بيها وتقعد تسأل نفسك طول الوقت يارب أنا عملت ايه عشان تراضيني للدرجة دي 

ربنا ممكن يراضيك ويمنحك ويبارك في عملك ومالك و وقتك وإجازتك وفرحتك وحبك وفي البنت اللي بتتمناها وفوق كل دا في اهلك وهدوء أعصابك وروقانك ويشفيك ويراضيك

أنا بكتب الكلام دا كله ليه ؟ 

عشان أفضفض 

عشان عايز اوثق الفترة دي لأولادي وبناتي لما يكبروا 

عايزهم يشوفوا ويقروا ويتعلموا من اللي جرّبته و عشته في حياتي 

تسجيل حياه كامل يبقوا عايشين شايفين بابا قدامهم حتي لو مش موجود 

يلاقوا كلامي ومواقفي وأفكاري وتبقي معاهم في كل وقت 

أنا مبسوط اوي باللي وصلت له وراضي بمساعدة ربنا ليا في كل خطوة 

الخطوة كانت حلوه 

وهتكبر مع الوقت 

مبسوط بالناس 

فرحان بيهم 

وبيها 

كل حاجة ماشية زي ما بتمني وبحلم

ربنا بيحبني 

مش شايف غير كدا دلوقتي 

والحمد لله 

ربنا يتم نعمه عليا ويراضيني كمان وكمان 

وهبقي اكتب بعدين عن المقابله دي 

بس دلوقتي سهرت كتير احب فيها

لازم انام بقي عشان هنخرج بكره سوا نتفسح

يارب يفرحني ويبارك في الاجازه دي 

وكدا حلو اوي 

بس يارب أنا طمعان في كل حاجة 

كمان وكمان وكمان وكمان وكمان

ومقدرش اقول غير 

الحمد لله رب العالمين