ليلة العيد

 متعود كل عيد اكتب بوست كله حب وغرام ورومانسية اسمه ليلة العيد يا حبيبتي 

السنة دي مفيش غير ليلة العيد يا كيمو 

ربنا انعم عليا كتير اوي الشهر دا والسنة دي 

امان وشفا وطمأنينة و راحة بال و نجاح و سلام نفسي 

كل حاجة حلمت بيها وطلبتها من ربنا حققهالي حتي الفرصة في حياة مستقرة هادية

أنا يارب بشكرك كل انك فرقتني من أوهامي 

بشكرك علي انك بردت نار قلبي 

بشكرك علي انك سندتني وساعدتني 

بشكرك علي انك دايما في ضهري حتي في اسوا الاوقات

بشكرك علي التراويح 

وعلي الصحاب والونس 

وعلي الدفا 

والفرص 

و الفلوس والنعمة 

والخير اللي غرقان فيه

وراحة البال 

والمليون باب المفتوح قدامي 

بشكرك علي كل حاجة وبحمدك من كل قلبي 

كل عيد وانا طيب وحبايبي بخير وطيبين

وان شاء الله العيد الجاي اكون حققت احلامي ونجحت في وظايفي ومشاريعي وحققت كل ما يتمناه

بشكرك يارب لك كل الحمد والله بكل شكل 

ليلة العيد يا كيمو 

هانت وبكره يكون في بيت وأولاد 

وحتي لو مفيش 

كفاية ونسك يارب 

نهاية المعارك

 معدتش عايز احارب تاني عشان خاطر حد ولا حتي حب قديم أنا ذات نفسي معدتش فاكر تفاصيله وحياة راحت أنا ذات نفسي ( وانا يعتبر نفسي من الناس اللي ذاكرتها قوية ) بطلت ونسيتها 

معادش عندي استعداد احارب شياطين جوا دماغ بنت حبيتها ولا مخاوف ووحوش في ذهنها ولا حتي قناعات وهمية بيقنعها بيها الناس انها علي حق او حتي لها حق برغم انها اتنازلت عن الحق وحتي لو هتاخده فهتاخده زي ما انكتب مش زي ما هي عايزه وعلي كيفها عشان تحقق الانتقام 

معادش عندي استعداد اخش في معارك ومكالمات و رسايل مع اشخاص بتكذب وتزور عشان خاطر شوية ورق ملون ملوش لزمة حتي مش هيكون موجود في جهنم عشان يولع فيهم ويعذبهم ويطهرهم من ذنوبهم اللي ربنا وحده بس اعلم بيها 

معادش عندي رغبة اجمع اخبار او اتابع او اقرا او حتي ابعت رسايل او مراسيل لاي شخص ولو حتي بنت حبيتها في يوم وعليت بيها وعملت المستحيل عشان خاطرها وبرده اتنست في دوامة الحياة والمرض 

معادش عندي استعداد حتي ارد علي حد او حتي استقبل رسايل او اقتراحات او عروض او حتي تفاوض باي شكل في قصص منتهية ومواضيع ميته وبفتكر كلام حد حكيم في مره قالي ( متقلبش في اللي مات عشان هتبقي ريحته عفنت زي القبر وهتلاقي ما يصدمك كأنك بتفتح قبر وتخرج جثة ميت وتقعد معاه ) وفعلا عنده حق 

مبقاش عندي استعداد ولا حتي رغبة في محامين ولا تفاوض ولا اهل ولا قرايب ولا حتي مكان لحد ييجي يقول معلش او حتي يقول مكانش قصدي او حتي يلعب بيا عشان تحقيق اطماع ومصالح شخصية وعشان شوية مكاسب ملهاش في عيني قيمة زي نزولي مصر اللي اخيرا استريحت منه ومبقتش مجبر عليه وبقي عندي عذر اقوله لاهلي عشان محدش يقولي انزل 

مبقاش عندي استعداد اتداري واهرب من القسوة  والقوة اللي جوايا باني اجري واستغل ضعفي بحجة ( ان ضعفي ومشاعري هي اللي بتخليني إنسان ولو مش هسيب نفسي امال هعيش حياتي جماد ؟ ) حتي دا مبقتش عايزه بقيت عايز اخد قسوتي وقوتي بالحضن وابطل افتكر وابطل اخزن صور عشان عمري ما هقعد مع حد افرجه علي الصور ونضحك علي الايام دي ، بقيت مش عايز غير اني اعيش نفسي الحقيقة مش الكذبة الهبلة بتاع الضعف والحب المستحيل لانها مش حقيقية وكان بايدي اخرج نفسي من السجن دا من بدري اوي لكن تكلفة الفرصة الضايعة وكلمة ( او ) وقصة الحب اللي وهمت نفسي بيها انها أسطورية هي اللي منعتني 

اوقات بقعد اقول لنفسي أنا ضيعت الوقت دا كله مستني مين ؟ مستني حد قاسي عليا ؟ حد مصمم يكسرني ويفضحني وياذيني ؟ حد مينفعش يكون امان او حتي اديله الامان علي اي حاجة في حياتي ولا اسرة ولا تربية ولا اولاد ؟ ضيعت دا كله من وقت ليه ؟ يمكن عشان الاكتئاب والمرض ويمكن عشان كنت دايما فاكر ومستني الرفقة اللي تكمل الدرب معايا وخايف من الوحدة وبتقطع منها 

لكن دلوقتي أنا عندي القوة والقسوة والشجاعه اني اعيش 

بدون كل دا بدون كل الحاجات اللي معنديش استعداد ليها 

اخيرا نقدر نقول اني فقت ووعيت وعرفت الاول والاخر 

وبقيت نفسي 

وبس خلاص 

المهم بقي استنضف في اللي جاي 

بس خلاص 

ليلة

 كل الكلام عن ليلة القدر بصدقه لكني عمري ما توقعت اني أطولها واني بكل بساطة ربنا يستجيب دعايا

أنا شكلي دعايا تم استجابته والله

في اختلاف 

في حاجة أسطورية حصلت

في معجزة حصلت

مكنتش متخيل في يوم انها تحصل او تجري باي شكل 

أنا شكل دعايا ربنا استجابه

أنا والله لو مطلعتش من رمضان او من التلات سنين غير بالدعوة دي

فانا واقسم بالله راضي يارب 

والله يارب أنا راضي 

انك تشوف المستحيل وتحسه وتلاقيه بيحصل 

واقسم بالله أنا راضي بالدعوة دي جدا حتي لو مجاش غيرها 

ربنا يستجيب بقية دعايا 

وينور طريقي وبصيرتي وقلبي وعقلي 

والله يارب أنا مبسوط

الف حمد وشكر لك يارب 

لقوا العروسة

 كل يوم بيعدي ورايا ميت حاجة تشغلني وبكلم اهلي قليل ومش عارف بيجري ايه من ورايا ، خلينا نتكلم في المهم بدل ما نقعد نحكي في المفيش 

أنا مشغول بترتيب ظروف المشروع الجديد والدنيا كلها فوق دماغي بعمل صداقات وعلاقات وبرتب الدنيا بكل شكل وفي نفس الوقت مستني ورق كتير يخلص ومش فاضي 

هما بقي بسم الله ما شاء الله لقوا بدل العروسة تلاته واستقروا علي واحدة من العيلة 

في البداية قلت مش مهم ومش فارق ومش في دماغي وسيبهم يلعبوا لاني الجواز مش في اولوياتي ولا حتي الحرام هعمله ولا الحلال وحرفيا مليش مزاج ولا دماغ 

لكن كانوا وروني البنت من فترة وزاروها من كام يوم في وفد حلو بحجة عبيطة وشافوها و اطمنوا لكني طبعا مش فارق عندي ولا في دماغي 

لكني فكرت ماذا لو كل العيوب اللي شايفها زي فرق السن مثلا ميزة بنت اصغر منك باكتر من عشر سنين وحافظة القران وهادية وملتزمة وفاني جدا وتفتح النفس علي الحياة وصحبتها حلوة 

وفي كدا من دمي 

ماذا لو حصل واتجوزتها وجبتها في خلال كام يوم بكل سهولة وخصوصا ان وضعي بقي يسمح بدا و ليا ابن خالة اتجوز بنفس الطريقة وعايش مرتاح 

الفكرة انك بتدخل لمجال اكبر منك مليون مرة ولاول مرة هيبقي كل حاجة واضحة من اول ثانية لان الوضوح هوا الجرأة الأقدس والاهم زي ما بيقولوا 

ماذا لو اتجوزتها ؟ وجبتنا وعشنا سوا واديتها وقت ومساحة وطاقة ومجهود تحبني قبل ما يكون في بيننا اي حاجة 

ماذا لو عاملتها بفترة خطوبة تلات شهور لما تيجي ؟ 

ماذا لو اتجوزتها وخلفت وبقي عندي أطفال زي ما بتمني جنب مشروعي اللطيف 

ماذا لو كل حاجة مشيت بالمظبوط وخصوصا انها عارفة ربنا وحرفيا تربية العيلة 

ماذا لو 

كل ذا جه في بالي امبارح بعد ما خلصت التراويح 

ايه اللي هيحصل ما عادي هيكون عندي بيت واسرة ودفا وعيلة 

ماذا لو 

أنا مليش نفس للجواز لكن إن حد يكون ونسك في الغربة ويكون من دمك ويخاف عليك ويحبك بصدق اكيد هتفرق 

أنا راكن كل حاجة علي جنب ومش مهتم 

حتي لو من قرايب القرايب ومن العيلة وبنت خالي ولو 

أنا راكن كل حاجة لاني معنديش طاقة غير علي قد مستقبلي ومشروعي دلوقتي 

أنا مبسوط بنفسي ومستريح وعايش حياتي مطمن وبالي مرتاح 

مبقاش في نوبات فزع ولا قلق ولا توتر ولا حتي خوف ولا اي حاجة 

ومفيش حاجة في الدنيا بقت بتاثر فيا لاني عامل حسابي دايما لاسوا سيناريو 

وبعمل اللي يرضي ربنا بكل شكل ويمشي حرفيا بما يرضي ربنا 

ياتري ربنا هيعوضني فيها ؟

مش عارف بصراحة 

مش شاغل بالي دلوقتي غير اني اعيش 

حتي لو هما ماشيين في الموضوع وانا مطنش ومش حتي باخد اي رياكشن 

يهمني اكمل في طريقي 

وساعتها وانا ماشي اكيد هييجي يوم قريب ربنا هيسهل فيه الحال واقدر اخذ الخطوة دي وحتي لو تجاهها فانا عندي كتير جدا جدا امنحه وعارف بقدم ايه كويس جدا 

الحمد لله علي راحة البال ويارب يكملها بالستر 

كل حاجة هتبقي وقتها برغم الرغي كتير عن اوعي تضيع الفرصة وشوف حياتك وشوف نفسك وانبسط حتي لو ملكش نفس وجرب ولو زهقت في مليون حل عالاقل هيكون في زوجة واطفال وبيت وونس 

ربنا يجعله خير 

أنا محتاج انام عشان سفرية ربنا 

ربنا يجعله كله خير 

في الاخر الرضا والسكينه اهم من اي حاجة وكل خطوة ربنا كاتبهالي هتيجي علي مهلها 

سويت دريمز يا كيمو  

معدتش

 معدتش عايز حياة الراهب دي ، اول ما الورق يخلص هطلع الرحلة اللي نفسي فيها 

ولما اشوف الملاك في المحل تاني هكلمها

ولما الاقي فرصة هستغلها

لو حتي زواج إسلامي او من المعارف اللي بنيتهم

العمر بيجري ويعدي 

وانا مرهق بصراحة 

النهارده شوفت فيديو من فرح 

واتمنيت حبة فرح وحبة دلع وحبة حنية

معادش في اسباب للانتظار 

بس اهم حاجة الورق يخلص 

وهطلع الرحلة افصل من العالم شوية 

وهكلم البنت 

وهشوف لو في زواج منها او حتي زواج إسلامي  بعيد عن مجتمع المصريين ومشاكلهم ويكون حد بعيد عن كل دا بحيث محدش يقدر يوصلها ولا يأثر عليها

في ناس كتير بتديني امل 

ربنا يخليهم ويبارك فيهم

نفسي في بيت وطفل وحياة هادية فيها حنية وامان 

مش عايز صراع ولا مشاكل تاني 

بس خلاص 

السكن

 من المعروف عني اني بقرف جدا وعامل حدود قوية جدا لاي شيء او شخص ممكن ألمسه ودا بيخليني معظم الوقت اعمل حدود في التعامل وعندي فوق كدا حدود نفسية وحدود واضحة في الكلام والتعامل مينفعش حد يعديها 

فكرة البحث عن سكن مرهقة لكن بتحتاج شوية اعتبارات :

أولها يكون مكان يحتويك يعني ميكونش مكان انت عايز تروح منه او تمشي منه وعندي استراتيجي اني لو بصيت في الساعه وانا في صحبة شخص او في مكان ما بمتنع عن التقرب من الشخص او من المكان تاني ، ما لو مش هيحتويني هسكن فيه ليه ؟ الشارع والوحدة حلوين ومش شرط احس بالدفا بليل يعني مش شرط يكون في سكن طالما صحبة الشخصية غير مقبولة بالنسبة لي وهيجي وقت افكر فيه اني عايز امشي او اختفي 

ثانيهم : ان السكن يكون مناسب بمعني ان مينفعش اي مكان يصلح سكن لازم يكون يليق بيا ، ممكن يكون فيه عيوب لكن عيوب بتركب مع عيوبي وحاجات بتنفع معايا ، بحيث انها متبقاش عيوب 

ثالثهم قدسية المكان والشخص بمعني ان مينفعش تشرب من بير بيشرب منه اي حد لازم يكون المكان خاص بيك ومش اي حد يقدر يدخل ويبيت جوا يومين والا مكنتش هسكن هنا ببساطة لان بدون امان وثقة فالشخصية والمكان في عيوني لا شيء 

رابعهم الوضوح يكون كل أبعاد المكان والشخصية واضحين وميكونش أنا قاعد طول الوقت بتعامل بنفسي والطرف التاني مدخل قبيلة من عنده وبالتالي كدا مفيش علاقه أصلا لان طالما في اي اثر خارجي بالموضوع فالموضوع بايظ من اول دقيقة 

خامسهم ان يكون المكان او الشخصية روحهم حلوة مش عايز حد يكون شرير ولا حد يكون بيقتل فيا الطفل اللي بيلعب ويهزر ويضحك طول الوقت ، باختصار حد يضيف بهجة للمكان 

أنا شخص إنتقائي جدا وعارف بقدم ايه كويس علي اي ترابيزة وعارف اني بحاول لحد آخر نفس فيا وروحي طيبة وقلبي نقي وعبيط وبيسامح 

يتبع 

تظبيط لابد منه

 اليوم كان هادي وجميل لاني قدرت العب في السحور براحتي ودا خلاني قدرت اظبط معدلات الجوع والعطش والسكر في دمي بطريقة تخليني متعبش ، صحيت براحتي علي الاخر ولبست وروقت علي نفسي وخرجت 

كلمت اهلي وبعدها روحت لصاحبي عشان افطر مع الرجالة والدنيا كانت رايقة وعرفت قيمة البشاميل اللي بعمله تحفة فنية والله غير اللي جالي النهارده 

ظبطت الدنيا علي الاخر وروقت نفسي و قضيت وقت ظريف وجربت التمر الإيراني والدنيا كانت حلوة وروحت بدري النهارده وقعدت اتفرج علي مسلسلي المفضل وبعده شوبرناتشورال 

مش عارف هعمل ايه للسحور لكن الدنيا هادية اوي ومزاجي صافي برغم اني اتخضيت وانا نايم امبارح بحلم غريب بس الحمد لله 

اما كلمت اهلي اديتهم شوية نصايح وظبطت الدنيا و كملت يومي زي العسل رايق وكلمتهم تاني وانا مروح ونفسيتي هاي خالص ودي حاجة تنضاف لرصيد رمضان وعرفت السر في يوم هادي بييجي منين

الحمد لله احلامي ومخططاتي فيها شوية تعديلات بسيطة بس رايقة جدا جدا ودا نعمة من ربنا وقدرت اعرف الخطوات بشكل مختلف و اتحركت كتير والحمد لله هانت باقي علي الحلو كام خطوة 

الحمد لله رب العالمين ربنا يديم نعمه علينا 

احلام سعيدة يا كيمو يا حبيبي بعد السحور 

♥️♥️

محضر علي البيت

 النهارده جالي محضر تنفيذ علي البيت 

بعد استنفاذ كل الطرق في الصلح والتواصل والكلام وتخليص الحقوق والرجوع والحب والكلام وكل حاجة في الدنيا جالي محضر علي البيت 

حاجات كتير اتغيرت منها استقراري وسلامي النفسي الأوفر اللي وصلت له 

هدوئي الشديد وروقاني الدايم 

ورغبتي في الحياة و انفتاحي علي العالم وعدم توكلي علي اي شخص

عدم توكلي علي اي شخص يحل لي ازمة

عدم توكلي علي اي وسيط ورفضي للوسايط 

لان لو فضلنا في قصة الوسايط هنفضل في نقل الكلام وناس تعمل مشاكل وفضايح علي الفاضي ومفيش وسيط حتي صالح يراعي ربنا هدفه عمار البيت

عدم توكلي علي اي جهة قضائية او رسمية 

عدم توكلي علي اي حد 

توكلي علي الله فقط 

رحمة ربنا سابقة 

كان نفسي يكون في باب مفتوح نقعد ونتكلم يا اما نصلح ونحل يا اما يتاخد الحق

لكن للاسف كل الطرق مقفولة و مجبر علي الغربة ومجبر علي الوحدة ومجبر علي المشاكل والفضايح

كان نفسي اعرف اتصل واقول كلام كتير واحل المشاكل بس وصلني تحذير قبل كدا بعدم التواصل ومينفعش اتواصل نهائي بعده ومن ساعتها سكتت غصب عني 

وحتي لما حاولت اصلح مع عبد الله ربنا مأرادش والموضوع عطل بعد الصلاة 

لعل ربنا يفتح باب 

لعل هي تهتدي وتفتح باب للتواصل 

لعله خير بس يقيني في الله بيقول ان هو الخير 

كله هيعدي وكله علي الله 

يومي كان طويل ومحتاج ارتاح واتمني بكره يكون فيه الخير 

كل الابواب مفتوحة وكل الفرص متاحة 

والباقي علي الله يهدي الطرف التاني 

تصبح علي خير يا كيمو واحلام سعيدة 

قضي الأمر

 الحمد لله

طويل الليل

 طويل الليل 

مواقف بسيطة

صدف

قرارات عظيمة

حياة شخصية

حياة عاطفية

تعب

صداع

ارهاق اليوم 

تعب الغربة

الوحدة

الليل طويل

بيفوت الليل 

ربنا بينور الطريق

بيعلمني الدرس بأصعب طريقة

الدرس بيعلم 

الحياة بتمشي

ارهاق الموقف واللحظة

صداع اليوم 

الدوا

المواعيد 

الذكري 

الحقايق

الصدف

ربنا بينور الطريق 

الصحبة خير 

بنعيش

حاجات بسيطة بتغير حياتي بالكامل 

محبة الرحمن

سعادة 

هدوء

صبر 

نوم واحلام عشان بكره

ولسه بيجري ويعافر

رحمة ربنا سابقة

مواقف بسيطة وحقائق صغيرة وقرارات عظيمة

رسايل بتتكتب

بنعيش

سيبني انام

تفاصيل

 التفاصيل هي اللي بتصنع الحياة ومبتشوفهاش غير لو خذت الحياه علي الهادي ودققت براحة في الصورة هتشوف كل حاجة

كل نقطة وكل تفصيلة وكل حاجة لها معني وطعم 

كل حاجة مهما كانت بسيطة وتافهة 

نظرة عين ابتسامة مسكة ايد طبق شوربة شوية بشاميل خروجة تمشية هزار وضحك مسلسل مصري لعبة تافهه ضحك وزغزغه 

فما بالك بالحاجات العظيمة مش بس التفاصيل 

مفاهيم كبيرة بيصنعها التفاصيل زي الامان والدفا والراحة و الحب 

وبرده حاجات اهم بيصنعها الوجود والتواصل والتفاهم حاجات كتيرة 

كتيرة اوي 

أنا مرهق شوية

بس في نهار رمضان ببقي سوبر أكتيف ببقي بتحرك وبتكلم كتير 

النهارده كلت بقية صينيه البطاطس بس عملت بلح حلو اوي اوي اوي 

وجبت نوع بلح جديد وجميل 

الموضوع هايل وعظيم وبالذات اكتشاف حاجات جديدة ورايقة

الحياة حلوة بس يارب تتملي تفاصيل صغيره وكبيرة 

نفسي في حاجات كتيرة بس تصدق حاسس اني ممكن ملحقش 

النهارده اكتشفت مشكلة في جسمي  ودايقتني جدا بس عادي يعني 

كله بيعدي 

لسه كل الخطط ماشية مظبوط 

لسه كل تفاصيل حياتي حلوة وهادية

لسه بجري وبتمني بكره يبقي احلي واحلي واحلي 

خير ان شاء الله

يارب بكره اصحي علي اخبار حلوة

يارب يطمن قلبي 

يارب يريح بالي 

يارب كل حاجة تبقي كويسة وحلوة وهادية زي ما يتمني 

يارب … يارب 

احلام سعيدة يا كيمو 

بس نخلص السحور ونشوف المواضيع دي 

حب كتير 

الخط المستقيم

 أقصر طريق بين نقطتين هو الخط المستقيم 

النهارده افتكرت دا وانا بلف علي السوق وبكره هلف تاني عشان اخلص شوية حاجات واركز في اللي المفروض اعرفه وأعمله 

النهارده مشيت شوية حلوين وامبارح بليل اكتشفت تنميل في نص دماغي اليمين لما حاولت اسرح شعري وكان الموضوع مزعج ويخوف شوية 

الحمد لله كله تمام وبخير واليوم عدس حلو ووصلت البيت ساعه الا ربع قبل الفطار وعملت صينيه بطاطس باللحمة و العصير والرز وبابا غنوج

سريع بس كفاءة والاكل كان هايل 

بكره ناوي اطبق القاعدة دي في يومي وربنا يسهل 

الحياة حلوة ربنا يحليها كمان وكمان ويقصر المسافات وينور الطرق ويوصلنا لاهدافنا يارب ويعدي الفترة دي علي كل خير وباعلي نجاح

تعليم الحاجات دي مش بالساهل 

بس اللي معاه ربنا يمشي علي الميه 

احلام سعيدة يا كيمو 

تصبح علي خير يا حبيبي 

اول يوم

 للأسف متسحرتش امبارح وكنت راجع تعبان جدا من مشاوير كتير مع صاحبي وفي المحل وميت حوار وكنت مش شايف قدامي لولا واحد صاحبي تاني فات عليا بعد التراويح وقعد معايا مكنتش كلت ، كنت بصراحة تعبت اوي ولما جالي قمت كلت وشربت وجربت كيك البرتقان ونمت فجاة 

ملحقتش اتسحر 

المهم بقي النهارده صحيت رايق والصيام هادي وروحت قابلت صاحبي وروحت المحل اطمن علي الدنيا هناك وبعدها روحت افطر عند حد معزوم عنده 

يمكن اللي فطرت عنده دا اكتر شخص بيديني امل في الحياه وبيعتبرني من اهل بيته 

فطرت مع اهل بيته ومعاه وحسيت فعليا اني ليا بيت واهل 

وبعدها قعدنا قعده لطيفة وروحت تاني اطمن علي صاحبي في المحل وبعدها روحت 

اليوم كان حلو وخفيف اوي ولطيف 

وكنت جايب اناناس في برطمان حطيت منه علي الزبادي وكمان عسل نحل وبعدها شوية موز جنب الفول والبيض بالسجق 

خدت فيتاميناتي 

روقت بالي وسهرت حبه حلوين اهوه 

وشوية وانام 

عندي امل لما يشوف الأطفال 

عندي امل لما ببص علي الحياه الهاديه المستقره 

عندي امل كبير بكل شكل والله

ودعيت كتير علي الفطار كتير اوي 

دعيت لكل حبايبي وكل اللي بتمناه 

وفوق كدا بقي 

كان عظمة الموضوع اني معايا ونس ناس بتحبني بجد 

كلمت امي واخواتي  واطمنت علي كله 

اليوم حلو يارب يخلي بقية الشهر خفيف 

وعملت مكالمات تانية مهمه 

والحمد لله

امي وحشتني وحاجات كتير في مصر بس لعله خير 

وفوق كدا في حاجات كتير اوي وحشتني من اول فطار لينا في رمضان والذكريات الحلوة كلها 

الحمد لله ربنا يقدرني علي الحياة وعلي الفرح ومسير الفرح جاي 

ليلتك سعيدة يا كيمو يا حبيبي 

تصبح علي خير 

مسير الغايب

رمضان وكدا وايام حلوة والغربة حلوة بس لوحدك

الجنة من غير ناس ما تنداس 

الحياة والحمد لله حلوة والواحد بيخطط وبيجري وبيتصرف وبيعمل كل اللي في طاقته والواحد تعب والله 

من بين كل الحاجات اللي بتوجع ان الواحد بقي محروم يشوف اهله او يفطر معاهم ، مش كان السجن ست شهور اكرم من العيشه دي ؟ 

محروم من المحبة والحنان ولمة الفطار وخناقات رمضان و الجري ورا الفطار وحاجات كتير 

أنا بطلت اطبخ من شهور والحمد لله لسه بصحة جيدة وكله تمام 

بس الواحد تعب شوية عادي يعني ما العزلة والوحدة وحشة

بدور كل يوم علي حاجة تتعمل او مكان يتراح عشان الواحد يقضي وقته وينشغل باي حاجة 

بجري عشان افتح مشروع وأخلص ورق واخلص ميت حاجة 

والواحد بيقول الحمد لله 

رمضان جه والشهور عدت وفاتت الايام ، مش عارف ازاي مر كل الوقت دا بس مر بمرارة شديدة وساب علامات كتير حتي لو هديت واستريحت وبقيت كويس والحمد لله بشكل كبير في خير حال 

بس زي ما قلنا أنا بقالي سنين لا فطرت مع اهلي ولا قضيت معاهم وقت حلو 

مرهق اوي من الغربة وعايز انبسط واتفسح واعمل مليون حاجة 

قطعت كتابه البوست عشان واحد صاحبي جالي

اتغديت وكلت وحليت وهزرنا وضحكنا وانبسطنا جدا 

اليوم حلو دلوقتي 

الغربة اهدي والواقع احلي 

اكيد هي وحشتني ووجودها فارق وذكرياتنا في رمضان كتير اوي بس الحمد لله كله رضا 

أنا مبسوط وراضي والحمد لله 

نفسي في وجود ناس كتير ونفسي كل دا يتحل ويبقي كويس 

بس هي إرادة ربنا سابقة كل حاجة 

الحمد لله

رمضان كريم وكل سنة واحنا طيبين 

ويارب يسعد الجميع يارب في كل مكان وفي كل نصيب وفي كل قدر سواء معايا او من غيري 

الحياة ابسط وأسهل والله من كل دا والله 

يارب يصلح الحال والاحوال ويهديها ويهدي قلوبنا 

لسه فاكر رمضان وحلاوته 

خير 

ايام رمضان نهار وليل كانت كلها سكر والحمد لله 

ربنا يديم الفرح علي الحياة ويسعدنا في كل الاحوال 

دلوقتي ببتسم وراضي وسعيد لاني عشت كتير وسعيد والحمد لله 

وحققت وبحقق كل احلامي وأمنياتي في مليون حاجة 

رضا من ربنا 

خلينا نقول كله علي الله والباقي علي الله

هستني أتسحر واكل كيكة البرتقال بتاع ليدل بعد ما عصرت عليها برتقاله وليمونه وبقت حلوة اوي وينفع تتاكل ويتحط منها علي الزبادي 

ربنا يوسع علينا حياتنا ويسعدنا يارب 

الحمد لله رضا 

كل سنة واحنا طيبين يارب 

ومسير الغايب يعود وتلمس ايده الحيطان ♥️♥️

مسيري اشوفك تاني يا امي