نعمه وكدا

 الايام الهادية زي النهارده بتبقي نعمة ، مكالمات قليلة ، وش قليل ، مفيش صداع ، ولا رسايل ولا مستجدات ، يدوبك بس اتفاق قعدة القهوه ومقعدنا عشان واحد عيان ، والدنيا ماشية ، اكل حلو ، روقان بشكل او باخر ، تاجيل للبيتزا ليوم تاني ، افلام حلوة ، مشي قليل ، دفا كتير 

بتخيل هل حياتي كانت ممكن تاخد المنحني دا بدون ترتيب ربنا ؟ مستحيل ، كل شر او مشكلة او ازمة او فراق وصلني للحظة دي ، واحد بيحضر لبزنس وعنده دنيا وعالم خاص بيه وحاجات كتير بيظبطها ، عظمة حرفيا ، حتي حاليا بفكر اقعد وانعزل واكتب رواية ، الحياة رايقة بدون اي منغصات ، ماشية زي ما بحلم 

الوحدة حلوة لاني قدرت احقق فيها حاجات كتير ، شغل و حياة كاملة ومجتمعات واعدت اكتشاف نفسي بالكامل ، حاجة عظيمة يمكن مكانتش هتحصل أبدا وأبقي بالشكل اللي أنا بيه  دا لو مكنتش لوحدي 

النهارده في بنت كلمتني صديقتي من اكتر من عشرة اتناشر سنه ، كانت عارفاني في البدايات واتقابلنا من فترة وبعدها قالت أنا مليش في اي حاجة شمال قلتلها اوكي نتعرف ونشوف الدنيا هتمشي لفين ، البنت كانت فاكره كريم الصايع بتاع زمان ، اتصدمت من مشواري في الحياة ومن النجاحات اللي حققتها وخصوصا انها هي كمان شغاله في جهة امنية عليا ، قعدت فترة ترغي معايا لحد ما عرفت هي بتكلم مين كويس وبعدين اختلفنا في نظرتنا للحياة ، بكل بساطة الدنيا وقفت وقفلت الحديث ما بيننا في شات ، أنا ميفرقش معايا لا منصب ولا شغل ولا جمال ولا فلوس ، برغم ان جمالها ساحر واستايلها خرافي زي البنات اللي بتطلع في مسلسل سوتس بالعربي  إلا اني انسحبت بكل شياكة وقوة لان ببساطة أنا محدش يفرق عندي غير الحب ولو هعيش حياة عباره عن صفقة فانا هاخد الصفقة اللي تناسبني ، النهارده بعد انقطاع مش عارف كام شهر كلمتني تاني وقال عشان العشرة وحاجات كدا والعيش والملح ، بالرغم ان لما اتقابلنا مكانش في غير مشروبات بس  ولكن اشطا عادي معنديش مشكلة ، تقريبا حصل لها مشكلة في الحياة وعرفت ان نظرتي للحياة اصح او بتدور علي فرصة حلوة ، رديت بشياكة وكياسة وذوق وادب وحدود ، ببساطة كل جمالك وكل ما عندك لا يمثل لي صفر في الميه عشان اهتم بصراحة ، النار والحب والشوق لحياة حلوة فيها اتنين بيحبوا بعض واصحاب بجد هي اللي تهمني ، حد مهونش عليه يسيبني ولا يتعبني هوا دا المهم بالنسبة لي وطالما دا مش موجود خلاص احنا مش صحاب لاني مش عايز دا في حياتي احنا زمايل من بعيد  وتقريبا هي عملت لي اعادة تقييم وعرفت ان مكانش لازم تبعد عني كصديق او زميل او شخص بيدور علي حياة بيفكر يبتدي حياة بوضوح وطالما مفيش حب خلاص أنا أصلا نادرا ما بحس بحد باي شكل. وبالتالي الباب مقفول يا عزيزتي 

حد تاني برده كلمني وقعدنا نحكي شوية وناوي امنع دا لاني مبحبش حد يتواصل معايا بشكل مباشر ودي من المحظورات ، مفيش حاجة تسمح لك كأي شخصية تتواصلي معايا بشكل مباشر وترني في اي وقت ، حتي لو عشان مصلحة وبزنس صرف ، مش عايز اوقف الفيلم اللي بشوفه ولا حتي اوقف المزيكا اللي بسمعها ولا اقطع خط افكاري في وسط اليوم عشان ارد علي حضرتك ، ابعتي رسايل حتي بدون تسجيلات لاني مليش خلق ولا دماغ الله يخرب عقلكم 

في اتجاه تاني شايف لعب بشكل كبير في السوشيال ميديا ومستني بكرت يبتدي عشان اشوف التوجه رايح علي فين واقرا عن اخبار جديدة وأسيرش برده ، في حد امبارح بالصدفة شفته بيعمل سكام بشكل دولي خطير وعجبني التفكير ازاي واحد متخلف قدر يعمل كدا بس فهمت بعد شوية انه مش لوحده وان في ناس كتير بتلعب اللعبه دي وبتحرك ملايين في لحظات وقدرت النهارده اتوصل لمصدرين للمعلومات مفيدين جدا عشان ابقي مركز اكتر 

امبارح الفجر خدت قرار بعد مناقشة طويلة وفعلا كان قرار حلو وقدرت احقق منه حاجات كتير ، أنا لسه بتعلم بس مستمتع والرحلة مستمرة والروقان عالي ، تقريبا النجاح اللي حققته الفترة اللي فاتت كان صادم للبعض لكني برده مصدوم وسعيد جدا وان شاء الله مكمل ربنا يسهلي 

قدامي تسع ايام عايز اقعد فيهم اروق بالي ودماغي وابتدي من  جديد في حاجات كتيرة وبكره ان شاء الله رايح الجيم كفايه سعادتي اليوم والحمد لله بكره هتزيد ان شاء الله وارتب للحاجات اللي ورايا بعد تسع ايام واكون مستعد كويس جدا لان كل يوم محسوب وكمان أنا عارف ان التخطيط بياخد وقت لكن التنفيذ بيتم في ثانيه ولازم ابقي مخطط اليومين دول كويس اوي لاني مينفعش اعمل فيهم اي حاجة غير اني اظبط نفسي واروح مشاويري مظبوط مش عايز وجع دماغ 

يلا اليوم خلص نشغل الحاجات اللي بنحبها ونروح في النوم