رسالة جديدة

 عزيزتي 

بعد التحية والسلام والمحبة والأشواق 

هل أخبرتك من قبل كم أحب كتاباتك ؟ لم أطلب من قبل خطابات ولا رسائل كتبتها فقط ولطالما تمنيتها منذ تلك اللحظة التي دعوتي فيها بأن يجمعنا الله معاً ، عشقت نظرات عيناك وأوقات البوح و هدوئك الحالم و قربك الدافيء وضحكاتك الصافية

تعلمين يا عزيزتي أن الله خلقنا لنعمر الكون ولنقترب من النور حين خلق الكون ونفخ فينا من روحه روحاً ، وخلق لنا من أنفسنا أزواجا ، وتعلقت روحي بك ، رأيتك إبنتي المشاغبة أداعبها تارة وأعانقها تارة و أحبها إلي الأبد ، لم تتعلق روحي في الوجود بأحد سواك ، ربما تمردت قليلاً ولكني تعلقت بك وحدك ولا شيء آخر في الوجود يعنيني سواك 

حبيبتي إشتقت لصوتك ، ضحكاتك ، وغناءك وحديثك الذي لا ينقطع ، كل ما يخصك كان لي دوماً مقدساً عظيماً ، أحببت فيكِ كل شيء وكأنك مني ( الحقيقة أنك منيِ فعلا ) 

إنتظرت غفرانك ، إشتقت لرحمتك ، تعلمين أني خلقت من الحنين إليك غير عابيء بالدنيا وما فيها، إشتقت لعيناك والتي تأكدت حين عرفتك صدق الشاعر حين قال ( ولو أن إبليس يوماً رآك لقبل عينيك ثم إهتدي ) 

حبيبتي أنتظرك علي المدي ومرت سنون والإنتظار يقتلني ، يهلك روحي ، حبيبتي أعلم ما يفعله الحب وأعلم غضبك وقوتك وخوفك، أعرفك جيداً رجاءاً لا تحرمينني من نورك ، إفتحي الأبواب ، لا تخفي شيئاً،، ولا تختفي ، روحي معلقة بك ، لا تحرميني وجودك

قرأت كلماتك وسعدت بهاوأنارت عالمي وأيامي، لا تحرمينني منها

لا تخفيها …

أنتظرك وأحبك

في كلمة واحدة ( وحشتيني)

كريم

القمر منور روحي

 النهارده صحيت علي التلج نازل ومرضيتش اقوم من السرير خالص ولما قمت نمت في الصالة قدام التلفزيون ، النهارده كنت مقرر مش هعمل حاجة وفعليا عملت دا وهو اني معملتش حاجة شيء عظيم مش كدا ؟  والله كان دلع الدلع وانا فخور بيا ، كوكو يستاهل شوية راحة وامان 

النهارده لما قمت ولقيت التلج نازل صورت فيديوهين وافتكرت قد ايه أنا بكون دافي في التلج ويمكن دا اول تلج أشوفه السنة دي وداب بسرعه سبحان الله ، مرضيتش اقوم ابص علي الشباك جري ولا رضيت اعمل الروتين بتاع زمان،   ومبصيتش غير بعد ما قمت وفقت ، معرفش بقي 

اليومين دول بييجي علي بالي افكار كتير جدا عاملة زي العواصف الشديدة جدا بحسها بتعصف بمخي وبييجي علي بالي اكتب كتير اوي ولو قعدت اكتب هكتب في اليوم كتير اوي واقعد بقي اقلب بين فصحي وعامية 

الليلة القمر برغم انه مش بدر إلا أنه نوره منور الغرفة بقوة ، اوضه نومي مليانه بنور القمر ، مين اللي قال نور القمر مبيدفيش ، زمان كتبت بوست اسمه قمرنا واحد ، ووصفت فيه بشكل جنوني حاجات كتير جوا قلبي ومشاعري ، أنا من المعتقدين في دفء نور القمر وانه بيدفي الروح اه والله

ثواني اشغل مزيكا 

شغلت بسكاليا لراجح داود بتخطفني حرفيا ودا ملوش علاقة بالفيلم خالص لكن صوت الأرغن  او. الالات في المقطوعة وصوت بيانو بتسحر وبتشد في ناحية تانية ، القانون والكمان هيدخلوا كمان شوية ، يا الله ما هذا السحر 

اتمني دلوقتي الاقي مصباح علاء الدين بس يبقي اسمه مصباح كوكو عشان يبقي بتاعي أنا وبس واقعد بقي اقرفه امنيات وطلبات ، ياتري هطلب اتجوز ياسمينا بنت السلطان ؟ بس متملاش عيني ، لكل منا حبيبة وياسمينا ساكنه القلب وكل يبكي علي ليلاه قصدي ياسمينته

يمكن اتمني اني اطير عشان اقدر اوصل لكل اللي بحبهم بسهولة واجيبلهم حته من القمر  واقولهم ان دفاهم وعيونهم احلي من القمر واعبي لهم السحاب زي حلوي القطن كدا في علب  واقولهم ان بوسة واحدة احلي من كل الحلويات اللي في الوجود ويمكن اجيبلهم ميه عذبة من احلي مكان في الوجود ( بيتي طبعا )  واقولهم انها بتروي بس من ايديهم وانها مش بتروي زي كلمة حلوة منهم ويمكن كمان اروح آخر العالم واقدر اجيب حته تلج واجي جري اقولهم ازاي ان روحي بارده وحاسه باليتم من غيرهم  ويمكن اروح بالزمن لألف سنة ويمكن خمسين مليون سنة واجيبلهم ديناصور صغير  واقولهم اني بحارب جوا نفسي وبحارب نفسي اللي اقوي من الديناصور دا مليون مرة 

يمكن اتمني اني اغمض ويطلع حاجات كتير من حياتي كابوس او حلو واصحي علي يوم زي النهارده وبيتي سالم وآمن بدون اي حاجة واني اغير حياتي صح ، يمكن ساعتها اعرف اختار اختيارات تانية ويمكن ارجع بالزمن لابعد من كدا او اتمني الكابوس ياخد قطاعات اكبر من حياتي 

يمكن اتمني الدفا وألاقيه ويمكن الاقي الطمأنينة والسكن والراحة ويمكن اقدر اجيب ريموت يتحكم في الزمن واخلي الوقت يعدي بسرعه عشان في اوقات مش قادر اعيشها اصلا 

يمكن ويمكن ويمكن 

بس أنا مش عايز مصباح كوكو عشان احقق حاجة 

اخيراً عرفت ان حياتي في ايدي وانا المسيطر عليها واني مش محتاج جني ولا مصباح ولا اي حاجة عشان احقق احلامي ولا عشان اعيش مستريح ولا عشان انبسط 

اخيراً عرفت اني انسان محترم كويس وذوق ولطيف وحنين وحط تحت حنين دي مليون خط 

كفاية كلام في الأمور دي وخلينا نرجع المهم 

خرجت قعدت مع واحد صاحبي برا وكانت قعدة لطيفة وواحد تاني جالي البيت وعملت اكل حلو اوي عملت أكلة سورية اسمها عرايس 🤣🤣🤣

هي شوية لحمة مفرومة في عيش تورتيلا وبس يعني مفيش ابداع يعني كفته بالمصري 

عملت عصير موز بلبن وضفت افوكادو و شوية معجون لوز بيور و شوية بلح علي عسل وشربت

في ختام اليوم اقول حاسس بايه ؟ 

حاسس اني مرتاح ومطمن ودفيان

حاسس ان الحياة فيها اكتر 

حاسس اني عايز اعيش واطير واحضن السما

حاسس …. حاسس اني أنا    .. .كريم

كله كان بيقولي نفسنا نشوفك ترجع كريم بتاع زمان المهرج اللي الضحكة مكانتش بتفارقه وبيشقلب الدنيا وحكيم وناصح و و و و 

معرفش هل كنت كدا فعلا هل كنت سوبر مان ؟ معرفش 

بس اللي اعرفه اني بحبني واني حلو اوي واني مطمن واني لسه بحلم وبتعب عشان احلامي 

ولسه عايز اعيش وبحب الحياة واني بضحك 

واني بشغل كوميدي كتير واني بسمع فلسفة واني بحب اعمل اكل حلو

واني بحب اكتب واني دفا وسند لكل حد اختارني اكون في ضهره حتي لو بدون علمي 

واني في خيالات حلوة كتير بتعدي علي بالي 

وان احلامي اكبر واكبر واكبر من الوجود كله 

واني عندي ميعاد مهم قريب 🤣🤣🤣

واني عندي ميعاد مهم تاني يوم برده 

واني بنام حلو وبضحك حلو وايدي دافية وحنين 

كل دا من مراقبتي لنفسي بشكل دقيق  اليومين دول 

بس الاهم من كل دا 

اني لسه عندي امل 

عندي امل 

بس خلاص