هدية ؟

 عزيزتي وحبيبتي 

قاعد بفكر انهي هدية مناسبة أكتر مش عارف لسه ، اجهز لحاجة دهب ؟ ولا اجهز لجهاز مثلا موبايل او لاب توب او حاجة قيمة تقعد معاكي سنين وتفرحي بيها ، مخي مشغول وبعدين افتكرت ان مهما كانت الهدية مش هعرف اوصلهالك ودي مشكلة ، لان دا هيسببلي مشكلة كبيرة جدا، فبالتالي مفيش قدامي غير كتاباتي دي وشوية امنيات ودعوات وبس ، بس جه في بالي حاجة تانية ، وهي اني امنحك اعظم حاجة في الوجود وهي اني اسيبك في حالك وكأني مكنتش موجود في يوم ولا كان في بيننا عيش وملح وعيشة وحياة 

وبعدين سالت نفسي معلش يا عم كيمو براحة خالص كدا ، هوا انت عايز توفر ولا ايه ؟ هوا مش انت عملت دا اوريدي من زمان وكل فترة كنت بتحاول تصلح الامور علي اساس ان الدنيا تبقي هديت او هي فهمت او شافت الحقيقة او اي حاجة ومفيش اتغييرذ لان اللي قا فالدنيا شكله احلي ملين مر من اللي انت بتقدمه، خروجات وفسح وصحاب ودراسة وجو لطيف كدا ومعجبين ليل نهار وناس بتجري لحد ما تلاقي قبول وتهرب ومحدش قادر يبذل مجهود عشانها ، ملناش دعوة بالنقطة دي بس مش انت يا حبيبي عامل دا اوريدي وسايبها في حالها تماما ؟ ولا في اي مضايقات ولا مراقبات ولا غلاسة ولا اي ضغط باي شكل ؟ امال ياصاحبي ايه اللي هتديها احلي حاجة في الوجود بانك تسيبها في حالها ؟  انت مش نزلت فلوس مصر عشان حقوقها خلاص ؟ انت مش مشيت في محاولات الرجوع والتزمت بالحدود اللي هي حطاها ؟ وبعدت او بمعني اصح وقفت بعيد عنها في حالك بكل شكل بدون اي محاولة خنقة او ضغط ؟ من الاخر كدا يعني مش هنقول انسحبت لكن هنقول خليتك في حالك وقاعد لوحدك ؟ امال ايه اللي هتديها هدية انك تسيبها في حالها ، ما هي اوريدي في حالها وانت منسحب بكل شكل وبتحاول تنهي المواضيع بكل شياكة  في ايه بقي ياسطا مستخسر في بنتنا الهدية ليه ؟

والله مش مستخسر وموجودة وفي اي وقت وبكل شكل ولو كنت اعرف لها طريق كنت بعتهالها بس خير ، هييجي يوم واجيبهالها ولحد اليوم دا مملكش غير دعواتي وامنياتي وكلامي المكتوب وشوية افعال جنتلة و ذوق من بعيد لبعيد، لان مفيش اي طريق او سكة 

كل سنة وانتي طيبة يا حبيبتي 

المخلص دوما 

كريم

صباح النور

 عزيزتي وحبيبتي 

تقديس النور طول عمري كان حاجة متعود عليها وملتزم بيها إلتزام تام ، لاشيء آخر بالنسبة لي كان مهم او ذو قدسية زي النور ، يمكن عشان زيه زي الحق كدا والعدل إسم من أسماء ربنا ، ويمكن هو زيه زيهم من أهم الحاجات في الحياة اللي تستاهل إتباعها ، وتستاهل الدفاع عنها بكل شكل من الأشكال ، عشان مش من السهل تلاقيها او تبقي موجودة في حياتك ، عارف الفلسفة الكتير بتاعتي بتتعبك ، يمكن فعلا بتتعبك ويمكن زي زمان بتحبيها زي افلامي او زي حاجات معينة في حياتي مهمة بالنسبة لك ، معدتش عارف بصراحة وبصراحة تاني معادش هيفرق اي حاجة وانتي مش موجودة ، مهما كانت الحاجات اللي بحكي فيها هنا او بتكلم عنها الا انك واقفة مكانك ، بتلفي الدنيا مكملة في حياة علي وضع الثبات ، معرفش إيه الممتع في كدا ، لسه مظهرش الحقايق ؟ لسه معرفتيش انا بحبك قد ايه ؟ او وحشتيني قد ايه؟ ولسه مخدتيش بالك مين من اللي حواليكي حلو او وحش ؟ يمكن انا اللي حاسبها غلط ومش شايف الحقيقة اني زي ما ناسركتير بتوسوس ليا كنت مجرد وسيلة او حاجة ملهاش لزمة في حياتك ؟ يمكن الإستغناء عنها ، مش عارف ومش مهم ومش هيفرق في حاجة دلوقتي خالص، اللي بيفرق يا حبيبتي هو الفعل والتصرف والتعب واللي اتعمل عشانك ، هوا دا الاثبات لكن ياتري الحب محتاج اثبات ؟ وعود ؟ اي حاجة باي شكل ؟ الحب مش محتاج كل دا ، سنين العمر بتجري وبتقع زي ورق الشجر واحنا بعيد ومفيش جديد 

اليومين اللي فاتوا خدت قرار اني ابقي مليونير في خلال سنة ، عرفت الطريق وابتديت احط بلان واشتغل علي المخطط ، بس مش حاسس برده ان دي البلان اللي لازم امشي عليها ، الحاجات دي مش بتدوم ، معروف طبعا ، كل الفلوس في الدنيا مش بتدوم بتضيع في لحظة ، انا عملت مستحيلات قبل كدا كتير وقدرت بتوفيق ربنا اغير امور كتير وابني اكتر من حياة وءاسس لها اساس حلو ودلوقتي بقالي شهور من غير بلان ، كانت البلان الوحيدة اني اوفرلنا ولاولادنا حياة سعيدة ومستقرة و اجهزلك الدنيا كلها ، ودلوقتي بعد ما حققت كل دا بقي تفكيري مش عارف يروح فين ، بقي كل حاجة تانية بالنسبة لي سهلة ولكني رافض المشي فيها ومن كرم ربنا عليا اني قدرت اجهز كل حقوقك بكل شكل وشايلها سواء النفقة او غيره مستنيه التسليم والمحامي بيتهرب ومحدش بياخد حاجة ولا يستلم حاجة ومش عارف ليه ودا ملوش اي تفسير واضح بس مش قصتنا برده مش دا الجواب المناسب لصباح العيد ميلاد وانا عارف اني هكتبلك النهارده كتير 

انتي بتخليني التزم اكتر واتبع النور بدون صبر عليه بدون خوف منه بدون ما اضيع في اي حاجة تانية ، وجودك بيطمني ويريح قلبي ويرويني يخليني عايز حاجات كتير ، كان نفسي اكلمك امبارح وكافحت نفسي ، كان نفسي اكلمك واقولك انتي فين واجي اخدك وافسحك وابسطك واوريكي حتت جديدة ومدن جديدة ودنيا جديدة ، كان نفسي اعملك عيد ميلاد حلو ، كان نفسي تعرفي وتفهمي ان اي فرصة لقربنا من حد بيحبنا بجد تساوي الدنيا وما فيها واكتر شوية ، كان نفسي والله 

كان نفسي اسمع صوتك ، كان نفسي اصحي النهارده الاقيكي جنبي واطمنك وافرحك واجيبلك ورد ونفطر برا وننبسط للماكسيمم، كان نفسي في ونسك في حنيتك ، كان نفسي تهدي وتفكري لحظة بالعقل وتبقي هنا ،  دا صعب ومستحيل بالنسبة لي يحصل عشان القرار في ايدك ، الاختيار كل حاجة في الدنيا بالنسبة لي ، لو مخترتنيش فملوش لزمة اجري وافرض نفسي عليكي علي مكالمة تليفون او علي مسنجر او واتس او ايميل او حتي قدام بيتك او قدام شغلك ، كل دا ملوش اي قيمة طالما انتي مش مختاراني ومش عايزاني ، لكن والله ربنا يعلم لو كان دا ممكن او ينفع يتعمل والله كنت عملته عشانك بكل نفس راضية ، لو كان في طريق كنت مشيت فيه انما مقدرش ابقي البني ادم اللزقة اللي تاعبك في حياتك ، واللي واقفلك في كل حتة ، لا روحي انتي وشوفي الدنيا واكتشفي حقيقتها وفي الاخر انا مش موجود في كل اللي حواليكي لو دا يريحك ويسعدك فدا كل همي واللي يرضيني انك سعيدة وراضية ، انما كريم مش وحش ولا رخيص ولا قليل عشان يفرض نفسه علي حد او يادي حد للدرجة دي ويبقي مسببله ضرر  بانه طول الوقت بيجري وراه ، ربنا يطمن قلبك ويسعدك ويراضيكي ويهديكي ويردك علي خير ويجعل فيكي الخير 

زمان لما افترقنا كان عندي قناعة ان ربنا كاتب عنده مين هيتخلق وعارف هيتخلق امتي ومن انهي اب وام ، وان معجزة الخلق دي وعلم الغيب بتخلي موضوع الجواز والخلفة سهل وبسيط وممكن لو ربنا كاتبلك زرية من واحدة برده تتجوزها وتخلف منها غصب عن الدنيا كلها ، عشان كدا اتطمنت وهديت وعرفت انك لو مكتوبالي هتبقي هنا تاني ، مازال عندي نفس القناعة بس بسؤال واحد اضافي : ليه عمرنا يضيع في بعد وفراق وزعل وخناق ؟  نفسي في لحظة من اللحظات تفتحي عينيكي وتشوفي الحقيقة ، نفسي والله ، كان كل دا هيتغير وكان زماننا سوا دلوقتي ، وبنقضي احلي عيد ميلاد وبدلعك بكل شكل ، يارب يجمعنا علي خير 

كل سنة وانتي طيبة يا حبيبتي 

في انتظارك 

وحشتيني وهتوحشيني 

المخلص دوما 

كريم 

هابي عيد ميلاد

حبيبتي وعزيزتي ونور عيني 

مفيش مجال لأي حاجة تتقال في وقت زي دا ، كل سنة وانت طيب يا جميل ياللي بتحلي حياتي ، كل سنة وكل ذكرياتنا حلوة وكل أيامك جميلة وانا في ضهرك وجنبك وبحبك وفي عينيا ، كل سنة وانتي الفرحة اللي بتمناها وبحافظ عليها ، كل سنة وانتي اغلي عليا من بنتي وحبيبتي وكل ما بحبه في الدنيا ، كل سنة ونظرتي في وشك بتفرحني وصوت قلبك بيطمني ، كل سنة وانتي منورة ورايقة وسعيدة وبتحققي احلامك وكل اللي نفسك فيه ، اتمني كل الشر يبعد عنك ، اتمني تبقي بكل خير واتمني تبقي اسعد واسعد وانجح وانجح واتمني تحاوطك عناية ربنا ورعايته ، اتمني تبقي بكل خير وفي رضا ربنا ومحبته ، اتمني لك اللي اتمناه لنفسي واكتر شوية ، ولو كل عيد ميلاد تبقي جنبي تبقي هدية من ربنا ، اتمني لك الفرح والرضا والقبول في كل حتة والمحبة في كل مكان ، اتمني لك  قوة البصر والبصيرة والحكمة والقوة اللي تخليكي احسن تاخدي بالك من نفسك ، اتمني لك من كل نبضة من نبض قلبي تنوري كمان وكمان وتحققي امنياتك ، اتمني لك كل الخير بكل شكل في كل وقت وأوان 

بيبقي صعب علي الواحد يكتب امنياته وتفاصيل مشاعره ويمكن من رحمة ربنا بيا اني بعرف اكتب شوية ، اتمني لك تشوفيني علي حقيقتي مش بكلام الناس اتمني لك تحسي ولو للحظة واحدة بحبي ليكي واتمني تفهمي وتقدري وتستوعبي ان الواحد مش رخيص ومش قليل وانه غالي ويستاهل ، اتمني تفتحي عيونك علي حياة حلوة تشرح قلبك ، اتمني لك سواء كنتي معايا او لا قدر الله بعيد الدنيا كلها تضحك في وشك وتراضيكي وتملي حياتك وقلبك شعادة ، اتمني لك الفرح بكل شكل وطريقة وبكل تفصيلة ، اتمني لك تحسي بقلبي وتبصي في اللي فات وتحكمي بالعدل وتتفهمي موقفي وتصرفي وكل ما مريت بيه ، اتمني تشوفيني يا حبيبتي علي الحقيقة ، الحقيقة الشيء الوحيد اللي يقدر يبني مستقبل ، اتمني كل مشاكلنا تخلص واتمني تصدقي وتفهمي محبتي ، اتمني بس تاخدي فرصة تتكلمي فيها معايا يمكن في حاجة تنور بصيرتك ، اتمني تسمعيني واتمني واتمني واتمني 

كل سنة وانتي طيبة يا حبيبتي 

ويارب كل سنة وانتي بكل خير 

اتمني لك اعظم واحلي حاجة في الوجود ، رضا ربنا وتوفيقه وعنايته ومحبته 

اتمني لك واتمني واتمني 

عيد مسلادك اللي فات حولت اتصل بيكي من رقمي لقيته لسه معموله بلوك فقلت يمكن ظهر عندها لكن بعدها اكتشفت ان البلوك مبيخليش الشخص يعرف حتي انك اتصلت بيه ، خير لعله خير اكيد ربنا كاتب الخير ، شوية ثقة ويقين في الله هتنور حياتنا والله ،مش هقول ياريت ولا أفتح في اي حاجة بس بعد ما كتبت النهارده عن بلان الاجازه عايز اقولك حتي لو مكنتش قدرت اعمل دا وارتبه اي سبب دلوقتي ، كنت هحضرلك تورتة حلوة وهدية احلي واراضيكي واطمنك واشيلك زي بنتي واحتويكي بمحبتي 

يارب كل مشاكلنا تخلص ، يارب تنوري دنيتي وحياتي قريب يارب يجمع شملنا ويطمن قلوبنا ويهديها كان نفسي والله يكون في بيني وبينك باب او طريقة في يوم نتكلم بيها ونتفاهم ونحل كل المشاكل دي ، كان نفسي يكون في اي حاجة في الدنيا تجمعنا ونتفاهم ، ياريت والله ياريت

مش عارف أقولك ايه تاني 

بس انا بحبك

ووحشتيني وهتوحشيني 

وروحي لسه ساكناكي 

يارب يارب يارب 

كل سنة وانتي طيبة يا حبيبتي 

كريم