كلافيلا :D

بكتب عشان الكتابة بتريحني 
عشان لما بفتكر وبفكر بكون أحسن 
عشان دا شىء بيجيبلي سعادة مش عشان بنادي أو بدور علي حاجة 
بكتب عشان أنا عايز كدا ومختار كدا 
عشان التفاصيل اللى بشيلها جوايا بتسيب حاجات حلوة 
مقدرش أنكر حبي لناس كانوا هنا واحترامي ليهم 
مهما كان فعلهم 
فطالما كتبت عنهم يبقى اكيد لسه بحترمهم وبقدرهم 
برغم كل غلطاتهم الشنيعة 
مش بكتب عشان اتخلي عنك ولا عشان ازعلك ولا عشان ادايقك 
بكتب عشان تعرفي فيا ايه لان احيانا الكلام بيتقال ومبيتاخدش البال منه خالص 
أنا مبسوط لأنك هنا ومبسوط لأني مني 
بعد كل اللى شفته وعشته أكيد مبسوط بيه لأنه وصلني للنقطة دي 
وعرفني كويس أوي إزاي أحافظ عالناس وأقدر قيمتهم فى حياتي وإزاي أقدر حبهم وأدافع عنهم كويس 
يمكن أنا مبرضاش أدافع عن نفسي أحيانا ( ويمكن دا من أعظم عيوبي لأني قوي وأقدر علي مليون حاجة وإنتي عارفة وغيرك عارف كويس ) وبيصعب عليا الناس أوي وبفضل أقولك إنهم طيبين وإنهم فى مأزق ولازم أبقى جنبهم 
وحاجات كتير زي مبادئي فى النقطة دي واللى بتدايقك 
أنا كل اللى عايز أقوله دلوقتى إني بحبك 
ومش عايز من الدنيا أي حاجة تانية 
ومش عايز أكون فى أي مكان تاني غير هنا 
تذكري دوما إني هنا 
وإني هفضل موجود مهما جري 
كوني سعيدة ومتقريش حاجات ملهاش لزمة كتير لأنك أكتر واحدة فى الدنيا عارفة أنا بكتب ليه 
كوني سعيدة ومتخافيش 
الحاجات الحلوة بتعيش والحاجات الوحشة بتموت لأنها ملهاش مكان جوايا 
لو كنت بعرف أكره أو أعمل فى حد حاجة وحشة كنت إنتهزت الكام مليون فرصة اللى جولي للانتقام من ناس متستاهلش 
لكن حتي اللى ميستاهلوش بقدر وقفتهم جنبي مهما كانت الوقفة دي عبارة عن كدبة أو إحتياج أو وهم أو حتي إتفاق أو حتي حاجة تافهة جدا زي كلمة اتقالت ومتنفذتش 
انا طبيعتي كدا 
يمكن فى يوم اتغير واقدر ادافع عن نفسي تجاه ناس كتير بتأذيني 
بس أنا مش فى بالى ولا هيفرق عندي حد ولو كان بيفرق عندي حد مكانش زماني بقيت هنا 
تذكري دائما : حبك 
بس خلاص 
تصبحي علي خير 
يلا ننام بقى :D

شاب فقري 

صورة الكلافيلا ( الكلافيكل ) دي عشان إنتي بس بتحبيها :D

وبس خلاص :D

في غير الزمان

هي كانت المشكلات البسيطة بالنسبة لى حاجة كارثية 
ممكن مشكلة زي اللى مكتوبة فى جوجل دي تدخل وتدور علي حل لها عالنت 
ممكن لو الجو مش حلو شوية تتخنق وتفكر إزاي ممكن نسيب الكوكب 
ممكن جدا إن رسمة بسيطة علي جدار تخليها فى غاية السعادة وتوصلها لأحد حدود الجنون والتنطيط من الفرحة 
ممكن برده إن ضياع الشراب منها يسبب لها أزمة وجودية تسبب إكتئابها وعزلتها 
ودي مش تفاهة 
ولكنها كدا 
بطبيعتها كدا 
بترتبط بأبسط الأشياء مهما كان تفاهتها وبتستمد منها طاقتها وبتفرح لما بتلاقى الحاجات البسيطة الحلوة دي حواليها 
هي صاحبة أحلام عظيمة وبتدور دايما علي إنها تبقى فى المركز التاني وقابله دا جدا 
هي صاحبة حلم جميل ودنيا هادية وكان كلامها بيخليني هادي لسنين قدام وبتعرف تشدني غصب عني للحاجات اللى بتحبها وتخليني احبها 
هي كانت مصرة تجيبلي ( قطرة ) عشان عينيا حالتها كانت تيت  وكنت محتاج عملية وبكابر 
هي كانت السبب إني قدرت والحمد لله علي حاجات كتيرة 

أنا كنت شاغل بالي بمشكلات عظيمة وأزمات مستحيلة الحل 
بتوصل دايما للحل بعد تفكير لوحدي ومبحبش حد يشاركني التفكير في أوقاتي الحلوة دي 
ممكن جدا تحصل كارثة ملهاش حل فى حياتي وتلاقيني داخل علي طول بالحل عليها وعلي وشي إبتسامة لطيفة كدا 
أنا معنديش مشكلة فى المواجهة وبحبها ومستحيل أهرب منها مهما جري لأن بالنسبة لى المواجهة هي الحل 
الحزن بالنسبة لى مش أزمة ولا الكآبة ولا حتي أقصي حالات الإكتئاب 
ببساطة شديدة بقدر بسهولة جدا أعدي الأوقات اللطيفة دي بأدني قدر من الخسائر 
بقدر أنتقل بسهولة من أقصي درجات الحزن لأعلي درجات السعادة بكلمة 
بقدر أشدها من مشاكلها الوجودية الخطيرة اللى كتبت عنها فوق وألاقى لها الشراب وأجيبلها ورقة صغيرة كدا تجيب سعادة أبدية 
الحاجات اللى الناس بتشوفها تافهة بتسد نفسي برده 
مبحبش المكان الفلاني عشان فلان مشي منه من سنتين 
وبكره المشروب الفلاني لأني بيفكرني بحاجات معينة مبحبهاش 
وبكره الأكل الفلاني عشان خاطر الأكل دا فى يوم وأنا صغير كلته وكان شكله مش عاجبني فلحد النهارده بكرهه ومباكلوش 
احلامي ملهاش حد ولا مثيل 
عملي وبفكر وبنطلق وبوصل بسهولة لأني دايما عندي طاقة لا نهائية 
أوقات بنطفي زيها 
هي بتعرف تنور الدنيا من جديد وتخلي الشمس تطلع كالعادة 

- هي سنو القاهرية
- وانا هيرو :) قاهري برده 
-- بنتشارك فى الأصل :)
بس دا سر محدش يعرفه ... :D

بحب البنفسج بس هي مبتحبوش 
يمكن لأنه فعلا حزين :(

هي قالت #أحببتك من قبل ميلادي وأحببتني فى غير الزمان :)

وأنا قلت #بكره الشتا يجيبك

فى حاجات كتير بفتكرها بتزعلني وحاجات أكتر بتفرحني 

حاجات بعرفها بتسعدني وحاجات بتصيبني بالكآبة 

أنا مش عارف باقي لي قد إيه 

لكني واثق  ومتأكد إن قريب أوي هتبع أقدم وأول قاعدة فى كتابها 

عادي يعني

فى حاجات بتعيش 

وفي حاجات بتموت 

والحمد لله 

إن اللي بيعيش هي الحاجات الحلوة 

تصبحي علي خير 

شاب فقري

مفاتيح حياة مريحة

شعرة 

ثانية 

خطوة 

لمسة 

نظرة 

فكرة 

Pause

هي دي الحاجات اللى بتغير حياتنا بجد 

شعرة واحدة بين قرار والتاني وبين كونك إنسان كويس أو كائن وسخ وشمال 

ثانية واحدة اللى بتفرق بين كونك إنسان حنين وبتقدر اللى بيحبوك وبين كونك قاسي متستاهلش محبتهم 

خطوة واحدة بتفرق أنت النهارده فاشل ومش عارف تبطل غلط ( سجاير - كآبة - جنس - مخدرات ... إلخ أياً يكن ) وبين إنك شخص قادر تغير فى نفسك وتتحدي العالم كله وتقولهم دا أنا وأنا أقدر أسيطر علي نفسي 

نظرة واحدة بس هي اللى بتفرق وبتغير حياتك لو إنطبعت فى ذهنك عن شخص معين بطريقة حلوة وبتعلقه وبتعلق محبته للأبد جواك 

فكرة هي كل اللى محتاجه عشان تبتدي تغير العالم وتغير نفسك وتبقى أنت بجد مش كل الحاجات الوحشة اللى الناس خلوها تطلع عليك أو تبان عليك وهي أصلا مش فيك ولا حتت منك .

Pause :هوا كل اللى محتاجه عشان تقف تفكر فى منطقية المكتوب دا وفى منطقية خط سير الأحداث وهل أنت صح ولا غلط وهل تصرفك الحالى ينفع ولا لاء ؟ وهل اللى قدامك يستاهل منك خير ولا لاء ؟ وهل دا جزاء ثقته فيك ؟ وهل دا جزاء كل حاجة حلوة عملها لك وكل مرة وقف جنبك ؟ هل انت كويس فعلا ؟ هل السكة اللى ماشي فيها هي طريقك ولا أنت أحسن من كدا مليون مرة ؟

***

أول ما اللاب بيبوظ بتبعته الضمان 

وأول ما صاحبك بيزعلك بتشتكيه لحد بيرعي صداقتكم 

ولما المدام بتزعلك بتبعتها بيت أبوها عشان تعقلها

ولما أي حاجة بتبوظ بترجعها لمصدرها عشان اللى صنع الشىء دا هوا الوحيد اللى يقدر يصلحه ... وبكفاءة تامة 

***

بغض النظر عن وجهة نظر ناس كتير إلا إني عمري فى حياتي ما إتمنيت الشر لحد ولا أتمنيت الأذية لحد عشان أطلع صح وأقول مش قلتلكم ... اللى هوا الحمد لله مبعملش كل دا عشان كدا ربنا دايما بيكرمني :)

شاب فقري

أنا وصديقتي وأشياء أخري ...

الشخصية اللي مش عارف لا خبطت فيها إزاي ولا بقينا أصحاب إمتي ؟
الشخصية اللى فيها ما يميزها عن كل الناس اللى فى حياتي واللى كانوا فيها بلا إستثناء ... هل أنا ببالغ ؟؟؟ بيتهيألي بالغت كتير لحد المرحلة دي والنقطة دي من حياتي فأنا مش ببالغ :D
نقدر نوصف صديقتي بكلمة واحدة  " بتفكر "

بعد خمس دقايق حكي من الكآبة والزهق والخنقة كانت النتيجة الإتفاق علي شوية نقط هكتبهم هنا عشان منساهمش :
- التغيير مهم جدا ودا اللى بنسعي له فى المرحلة دي
- متستناش إتحرك علي طول مش لسه هتستني أكتر من اللى فات .
- تغيير الأتموسفير بيفوق مش بيزهق , الزهق عشان أنت فى مكانك 
- خطواتك إمتي ؟ طيب الخطة واضحة , متتخنقش ...
- غيرك مش أنت ... كل واحد نمط حياته مختلف وطريقته مختلفه ومحدش أنت 
-الدنيا مش ماشية خط مستقيم كده ..هاتوصل لدا بس عشان توصله لازم "وقت" يعدى ..مفيش حاجة بعصاية سحرية يعنى .انت عارف دا اصلا
- انت ماشى منطقى و بشكل متسلسل ..ليه عايز تعك ؟ وليه مضيع على نفسك انبساطك بانك  هتعمل كذا ؟؟
- متضيعش وقت ولا تفكر أكتر , إتعب فى اللى محتاجه أكتر وبس 
- إتأقلم .

صديقتي عارفة إني عارف كل اللى إتفقنا عليه وراسي عليه من جوايا لكني محتاج شوية ثقة , شوية حد يحكي ويتكلم معايه , محتاج اللى يفكر ويفهم اللى محتاجه فعلا فى المرحلة دي 
صديقتي كنز كبير لأننا بنتشارك نفس الرؤية والفكر والحلم 


كل ما بفتكر إني قدامي سنين وسنين علي ما أوصل للمكان اللى بحلم بيه أعصابي بتتعب وبحس إن الناس اللى جوايا والحماس والحلم ممكن ميكملش معايه , الموضوع صعب ؟؟ دي حقيقة طبعا وبيندرج تحت قائمة المستحيل مش الصعب كمان , بس السؤال الأهم هنا : هل دا سبب لأني أتراجع أو أتخلي عن حلمي ؟؟ Never :D

أنا مش هفكر فى بعد المسافة وإني لسه بجري تحت الصفر وعمال أتنطط علي درجات السلم عشان أقف فوق الصفر وأقول أنا نجحت يا بشر ... تخيل معايه كدا بعد قد إيه هبقى واقف فوق الصفر ؟؟؟ تقريبا نقدر نقول :D أيون :D كمان كام سنة :D

أنا مكمل لأني عايز أبقى أنا وأعيش أنا مش حد تاني , مش عايز أعيش فى صندوق قزاز رسمه المجتمع أو اللى حواليا أو حكم مبدئي من الآخر عليا بمجرد إنه بيعرف أنا خريج إيه أو كام سنة أو حتي بشتغل إيه ؟ 

أنا مكمل لأني عندي حلم وعايز أحققه بعيد عن المعرضين واللي بيلحسوا الأيادي واللى بيمثلوا وبيجروا ورا الغرب بقناع زائف واللى أصلا معندهمش مبادىء والأغبيا وبتوع مصالحهم , أنا مكمل لأن كل دول مش هيسبقوني بوساختهم وأنا هتأخر بمبادئي , أنا هوصل بإيماني بنفسي وباللى عايز أعمله 

أنا هكمل وهمشي فى الطريق عشان عايز أعيش ومش عايز أبص ورايا ألاقي بكل بساطة العمر فات فجأة بدون ما يكون ليه أى عائد يرضيني ؟ لو عالفلوس ف طز فى الفلوس , الحمد لله إني مش هجري ورا شوية ورق ملون , العائد الحقيقي اللى بحلم بيه بيختلف عن عائد زائل بيضيع مع الوقت .

أنا مش هكمل كلام أكتر من كدا لأن الوقت إتأخر وأنا تعبان لكن هقول جملة أخيرة ...

أنا هكمل وهوصل لأن دا إختياري من الأول ومازال .

شاب فقري

I have a new destination. My journey is the same as yours, the same as anyone's. It's taken me so many years, so many lifetimes, but at last I know where I'm going. Where I've always been going. Home. The long way around.

‪#‎new_destination‬
‪#‎dream‬
‪#‎home‬
‪#‎where‬

مين قالك ؟

عارفة يا عزيزتي
برغم تأكدي بنسبة مليار فى الميه إن جوابي دا مش هيوصل
كان فى أيام قبل ما بكتب البوست هنا بنكون سهرنا سوا وقعدت أحكيهولك وأناقشك للصبح وكنت بحس إن عقلي بينور من مجرد وجودك وإني بفكر أحسن وفيا طاقة أكتر ودي حقيقة وحتي الآن طبعا :)
وطبعا بتكوني تعبتي وصابك التعب اللى يخليني أقعد أحكي لك حواديت بعد الفجر وصوت الجامع عالي أوي
وأنا بعد ما أحكيلك بقعد أغني
فبعد ما تنامي بترجعي تصحي تاني :)
فات كام سنة ؟
مش عارف والله
أنا فقدت العدد يا عزيزتي
فاكرة لما فى مرة وإنتي نص نايمة قعدت أعد الأرقام وأقولك واحد : بيفكرني بكذا واتنين هوا كذا وعديت لك لحد 37 وكل رقم كان ب ( سر ) وفى الآخر طلعتي صاحية :D وساعتها إتدايقت حبتين بس اللى هون عليا هوا نقطة إنك عرفتي اللى يقربك
وقعد أقولك بحري والقلعة وكثير من الرغي عن محطة الرمل
فاكرة أيام الحكي دي ؟؟؟
بس مش هتقري الجواب دا وأنا إحتمال بعد ما أكتبه منشروش وأنفضلك عالواتس :D
وأرجع تاني أقول بيني وبين نفسي إنك عندك علم وعارفة كويس جدا إيه اللى هيريحني
وأنا ببساطة هاخد نفس الموقف و هكرر نفس الجملة الملعونة : إني عارف إنك أكتر بنت فى الدنيا دي ممكن تريحني بس مستحيل أبقى معاكي .
عارفة الجو دا إنتي طبعا وعارفة اللى جاي
حد يقدر يقرا الفيوتشر زيك ؟
:D
أنا بقراه أحسن علي فكرة
بحب قرايتك للمستقبل وبكرهها وبحب فهمك وأحيانا فرضك لفكرة معينة علي اللى جاي :)
رجل التناقضات متعودة مني علي دا لا جديد :)
خلي بالك منك يا عزيزتي
وحشني أشوفك بتكتبي من جديد ووحشني أكتر أشوفك بتكتبي عني :)
لسه فاكر لما كتبتي عني مرة  :)
إمممممممممممم
و
بس بيتهيألي :D
انا بكتب كل دا ليه ؟
عشان شغلت أغنية مركونة عالجهاز من سنين من زمان فحت :D
وإفتكرتك
بس كدا
الأغنية أهيه :)

ونلتقي عما قريب إن شاء الله :)

شاب فقري 

أميليا

- لما بيحاولوا يولدوا طاقة من مصدر معين زي الفحم مثلا وبعدين يكتشفوا إن الطاقة الناتجة غير كافية أو إنها ببساطة متنفعش لتشغيل شىء معين بيعملوا ساعتها إيه ؟

- مستحيل أتخلي عن أربع شهور عشان خاطر خمس دقايق , لو فاكر إن دا ممكن يحصل عشانها يبقى مستحيل .

(رسالة مسجلة )

- النار أهم من أي حاجة تانية 

( الأهم فعلا هما التلاتة دول )

***

أنا وصديقتي بقينا بنبعت مسدجات عالموبايل بالظبط زي العبط 

هي زعلانة أو أنا مخنوق ومدايق منها 

وهي مش واخدة بالها وأنا معنديش إستعداد لا أوضح لها ولا حتي أبوح لها 

خلي السور دا موجود لحد ما تاخد بالها لوحدها 

وخليني بسأل من بعيد 

***

إيه اللى هيفرق ؟؟؟

دا السؤال اللى يهم 

لو هنا حلو إيه يوديني هناك ؟

ولو هناك حلو فليه منركزش فى إحنا رايحين هناك ليه ؟ وساعتها هنغير تفكيرنا وننزل قبل ما نوصل هناك عند مكان تاني 

طيب هل المكان التاني هيريح؟

يبقى ليه منركزش فى هناك ونخلص 

وبعدين هوا هتفرق أصلا أي حاجة 

المهم الهدف 

ونلف فى دواير .

***

يومياتي العزيزة 

أميليا فعلا تحفة 

وحقيقة إنبهرت كثيرا ب اللى جري منها 

وكمان فعلا اللى اسمهم أميليا بيبهروك 

وكمان كان أروع ما سمعت عن ال  Fighting من سنة 

أو يمكن فى حياتي كلها

شاب فقري

ليكن الله عوناً لهم

مبحبش ابتدي أحكي بفضل أتوه من الأول للآخر 
الحكي شىء متعب نفسيا بالنسبة لي فى بدايته 
دايما كنت موجود فى أكتر اللحظات عتمة فى حياتهم 
وكنت ببقى دايما بشدهم للنور حتي لو انا عارف اني بعيد عنه 
كنت بحاول دايما اخلق لهم الجو المناسب وأهيئ لهم المناخ المناسب عشان يبقوا كويسين 
كنت بمنح الوعود وبلتزم بيها
كنت بفضل دايما زي الحارس اللى علي حياتهم اللى لا بينام ولا يرتاح ولا يغفل له جفن إلا أما يشوفهم مرتاحين 
الحاجة اللى بتصبرك بقت الكابوس اللى بيقتلك 
الاشياء اللى كانت بتهون عليا وكانت بتخليني مبسوط ولو لدقيقة بقت هي السم اللى بيجري فى دمي 
الناس اللى تعبت عشان يبقوا كويسين بقوا هما الناس اللى اصبح احد حقوقهم المكتسبة إيلام الواحد وإنهم ييجوا عليه 
بقي من حقهم يعملوا ما بدالهم 
بقى من حقهم القسوة والبعد 
ومش فاهمين إن وجودهم مش هيكلفهم أي حاجة 
بفكر دلوقتى فى أوقات ما كنت بقف فى الفجر ساعتين والتلج بيفتت عضمي وبستني حد يفتكرني ويسلم 
بفتكر أشد لحظات حياتي ظلمة وقولتي إنها هتهون 
بفتكر رغبتي إني أبطل سجاير عشان ليا حاجات حلوة فى الدنيا أعيش عشانها بالرغم من صعوبة دا وإن دا مش واقعي أبدا 
أصبحت كل الحاجات اللى بتميزني وتعيشني وانا واخد بالى كويس من اللى عايش عشانه 
أصبح كل دا هوا اللى بيتعبني نفسيا 
قوة الملاحظة بقت سم 
ومجرد التواصل مع الناس بقى مؤلم جدا 
فاكر لما كنت بقول للبنت اللى اكبر مني إني تعبان 
وتقولي يا كريم سيبك من الناس 
من الواضح ان الحل فعلا فى العزلة 
لكن العزلة حتي عن الذات 
الواحد يعيش منعزل عن الوجود بالكامل 
فاصل نفسه ومنسلخ عنها 
بحيث أقرب إنسان ليك وهوا انت يبقى فى أبعد نقطة فى الوجود 
فما بالك ب بقية الناس 
آه لو أقدر أنام وأصحي ألاقى مفيش حاجة حصلت والزمن رجع كام سنة 
وأعيش تاني كل العقبات دي 
يمكن الكنز فعلا فى الرحلة 
لكن الرحلة طولت أوي وأنا تعبت
بجد تعبت 
وفى عز وقت التعب دا مبلاقيش حد 
ليه ؟
يمكن لأني كنت عبيط فعلا 
***
ليكن الله فى عون هؤلاء الذين يحملون ديناً لهذا الرجل
إذا أتي ذلك اليوم الذي يحتاجهم فيهم فلا يجدهم 
ليكن الله لهم عوناً