ملخص يوم العيد

 يوم جميل 

صليت العيد 

عملت ميتنج حلو 

رتبت خروجة حلوة

خرجت مع صحابي وشوينا لحمة في الجنينة مع ناس زي العسل وطيبين وولاد حلال 

سعادة وبيت وامان ودا بالدنيا 

وروحت واتمشيت شوية وسمعت مزيكا حلوة

ودعيت ربنا واستجاب لي 

الحمد لله رب العالمين 

احلي يوم عيد دا ولا ايه 

في كل حاجة بتحصل عبرة عشان نتعلم وربنا يحمينا وينجينا 

ربنا بيحبنا ودا بالدنيا 

ليلة العيد يا حبيبتي ٢٣

 يا سلام 

بعد سنين وسنين بنرجع نكتب علي عوايدنا البوست بتاع كل سنة 

ليلة العيد يا حبيبتي 

الحلم والامنية والرسالة للبنت اللي هتعيش وتحلم معايا وتكمل بقية المشوار معايا 

لحد دلوقتي معرفش هي مين بالرغم من وجود ناس كتير وضغط من كل حته وناس كتير بتجري ورايا وناس تانية بتعمل حوارات وناس تالتة وعاشره بيحاولوا يقربوا 

بس انا الحمد لله لسه فاضي من كل دا 

سنجل 

ولذلك هكتب بكل حب وامل 

احلامي واللي بتمناه وقلبي اللي بين ايدين ربنا بيمحي منه كل وجع وبيعالجه ويراضيه وثقتي في ربنا تفوق اي ثقة تانية 

اعزيزتي وحبيبتي 

نفسي نتجمع بقي ، طال البعد وتقريبا كدا طبقا لكلام الناس فالعمر بيجري لكني والله واثق اني هقدر اعملك كل اللي تتمنيه وزيادة واحققلك كل احلامك طبعا مش هبقي جني المصباح لكني بكل بساطة هعمل اخر ما عندي واكيد من كرم ربنا عليا انك هتقدريني وتقفي في صفي وتعرفي اننا واحد مش اتنين وان المهم وجودنا سوا وان خربوش شاي بالنعناع بليل سوا سوا قدام التلفزيون بالدنيا وما فيها ، معنديش استعداد امسح عمري كله قبلك لكني عندي استعداد اركز بكل قوتي في الجاي وقادر ان شاء الله اخليني مصدر فخر ليكي قدام الدنيا كلها ، مش هحكي لك تعبت ازاي فالسنين دي ولا في اخر تمان شهور ولا حتي في المرض ولا حتي في الضغوطات لكني هقولك اني كلي معاكي وملكك وبامكانك ياعزيزتي تمدي ايدك وتلمسي روحي بس خدي بالك الموضوع دا بيمشي في الاتجاهين لما بنلمس روح حد بيلمس روحنا برده ،عزيزتي وحبيبتي انا مش عارف بالظبط اقولك ايه غير اني جايب بطيخ وفاكهة كتير للعيد ورايح كمان بكره اشوي واقضي يوم حلو مع صحابي وانك لو هنا والله العظيم هدلعك واجيبلك لبس للبيت في العيد ولبس للعيد الصبح ولبس لبعد الضهر ، مش هتعامل معاكي كانك بنتي عشان دا غلط لكن هتعامل معاكي باللي يفرح قلبك وهاخدك نتفسح كمان بعد المستنج بتاع بكره ونحتفل بالميتنج سوا ونحتفل مع صحابنا سوا ونلعب بعيالهم الحلوين ، انا مبسوط اوي اني رجعت اكتب الكلام الحلو دا تاني واتخيل وعلي راي حد الكتابه بتساعد جدا عشان تبقي احسن وانا مكمل ، المهم بقي العيد كان هيبقي حلو واحتفالات وشوي وهيصة ويمكن كمان كنت هاخدك ونسافر عند اهلك واهلي ونتفسح في شوارع القاهره ، الحمد لله اخيرا ربنا كرمني وبقي عندي الامكانية اعمل كل دا ، يمكن كنا نزلنا مصر حتي وروحنا الساحل 

انا سعيد باللي ربنا وصلني ليه وسعيد بميتنج بكره وسعيد بصحابي وسعيد بالاحساس الحلو اني عايش واكيد ربنا هيطمن قلبي كمان وكمان مع الوقت ودا بالدنيا 

كل سنة وانتي طيبة ياحبيبتي واكيد والله هشيلك العيدية وهديهالك ان شاء الله مع دبله خطوبتنا وهفرح قلبك عالاخر 

كل سنة وانتي حبيبتي ويارب يديمها نعمة ويرزقنا سوا الذرية الصالحة والله دعيت با النهارده

صحيح لسه معرفكيش ولسه مش موجودة لكني واثق في عوض ربنا وقادر اختار صح وقادر ان شاء الله بعون الله اكفيكي وارضيكي وابني بيت يرضي ربنا 

المخلص والمحب دائما وابدا 

كريم 

وكل سنة وانت طيب يا كيمو يا حبيبي وعيد سعيد عليك ❤️❤️❤️

زمن المعجزات

 خليني اقولك يا عزيزي ان مفيش حد خد خطوة ضدي الا وكانت في صفي 

مهما كانت 

دايما اي خطوة في صفي 

ودا مش ذكاء مني ولا عبقرية ولا عشان اانا عبده الفشيخ ولا احسن واحد في الدنيا

ومش عشان انا العابد المذهل اللي بيعمل كل الخير عشان ربنا يباركله 

ولا عشان ليا معارف ولا اصحاب لاني اتخليت عنهم كلهم من زمن لما اذوني 

ولا عشان انا مش سهل ولحمي مر والهري دا 

لكن عشان قلبي دايما شايل الخير ونيته خير وبيسعي للخير ومفيش لحظة شيلت فيها شر لحد ولا خدت رد فعل شر لحد 

عشان مهما حصل بحاول احافظ علي روحي نقية متشيلش شر او غل او حقد او ضغينة لاي حد خلقه ربنا 

دا لوحده كفيل بتطهير اي شيء 

انا عامل زي الراجل اللي دعا ربنا من جواه يبني جامع كبير ولكنه فقير ومات قبل ما يشتري حتي متر ارض 

لكن ربنا بعظمته وجلالة قدره تقبل النية وجعلها عمل صالح بسبب صدق النوايا 

عندي مشكلة في التعبير لكن معنديش مشكلة في النوايا نع الخالق 

مبعرفش اعبر واحيانا بلبس خوازيق من طوب الارض 

لكن 

ربنا رحمته سبقت اي شيء 

ربنا مطلع علي قلوبنا 

لذلك بعتبر ميتنج النهارده دا هدية من ربنا 

كأنه بيقولي الشر هيصيبك لكني هجعله خير والحقد هيطولك لكني هخليه علي قلبك بردا وسلاما 

لا اطمح سوي في ذلك 

عمري ما ضريت حد بقصد او حتي بنية شر ولا حتي حبيت الشر لحد 

مهما بلغ غضبي ومهما كان كلامي فدايما ربنا بينجيني لسبب واحد 

اني بطلع بطلع وبنزل علي مفيش عشان انا مقدرش اجرح او اضر حد 

عايش في المدينة الفاضلة فاكر كل الناس افاضل زي حالاتي وبتعامل مع الحياة بروح طفل صغير 

وقلب نقي 

عشان كدا مهما حصل ربنا واقف في صفي عشان نيتي خير وحتي لو الشر وصل لحد باب بيتي و شغلي او حتي حياتي 

ربنا بيرفعه بكل سلاسة وبيقولك هديلك بداله نور وهخلي الشر دا يكون سبب في خير كبير اوي وعظمة وفرحة وراحة وسلام

دا اسمه اليقين 

اليقين دا بينيجيني 

يقيني بالله يقيني 

الحمد لك يارب 

انا مش عارف انام والله من فرحتي وفي نفس الوقت عندي شوية قلق من ان الوقت ضيق عشان اظبط كل حاجة

لكن الحمد لله والله كنت بتمني وبحلم وبقول ياريت ومش متخيل اني ممكن اوصل لكل دا 

الف حمد وشكر لك يارب 

اكرمتني وكسرت قلبي بدل المره الف عشان تنجيني  وتنقذني 

ورحمتني من الف شر بكسور في قلبي وجيت جبرته كل مره اتكسر فيها 

عشان انت العالم اني نيتي خير وعمرها ما كانت غير خير 

تصبح علي خير يا كيمو وقلب نقي وصافي وحياة حلوة وميتنج اجمل وفرحة تساع السما والارض 

الحمد لله

والله الحمد لله والف حمد وشكر 

نفسي افرح بس مش لاقي حد افرح معاه دلوقتي كل حبايبي واصحابي ناموا 

الحمد لله ❤️❤️❤️

يكره نفرح كمان وكمان مع كل خطوة

تم علي خير

 الحمد لله والله والف حمد وشكر لك يارب 

الحمد لله

نقطة فاصله في حياتي وتغيير كبير 

الف حمد وضكر لك يارب 

النجدة جاية في وقتها ❤️❤️❤️

في انتظار الميتنج

 مش قلقان ولا متوتر ولا خايف 

لكني عايز اوصل للنقطة الزمنية دي واعرف هيحصل ايه 😂😂😂

باقي بتاع تلات ساعات 

ربنا يعديها علي خير 

هنزل دلوقتي اشتري لحمة للشواء في العيد 😎

واجهز لحمة العيد واكل العيد 

وربنا يتقبل يارب 

وحتي لو ايه

الخلاصة : 

دلوقتى هاقدر اقولها بكل ثقة حتى لو هاموت لوحدى مش هاكون مرعوب زى ما اكون باتنازل علشان ا 

fit in

 قصة مش بتاعتى وناس مش شبهى او مقدرين وجودى لذاته

اعظم ما قيل اليوم في محادثاتنا ❤️

نايس عزومة

 المرة دي كان الكل متجمع عندي بصفتي العازب الاوحد 

جالي الحبايب كلهم وقعدنا نرغي سوا وكنت محضر شوبينج حلو اوي 

فواكه وتسالي و كوارع ولحمة وشوربة مواسير و كبده ولحمة ريش 

كانت حاجة فخمة وعظيمة

الاكل كان حلو لدرجة خيالية والحمد لله

كلنا علي مرتين مره في بداية اليوم ومره في اخره 

الاهم من كدا اننا اتبسطنا 

في كم رهيب من السحر في قلوب بتحبك بجد وخاصة الواد منسا 

القعده حلوة وخرجتهم يتمشوا في الشوارع 

واحنا بنتنشي سوا واحد فيهم قالي يا كريم خد بالك انت مرديتش عالبنت ليه ؟ فبقوله بنت مين

قالي اللي هدت من جنبنا مركزة عليك ومتنحة لك وبتبتسم ومستنيه تبص لها 😂

قلتله والله ما خدت بالي انا مش في دماغي ولا ببص علي حد حتي 😂

تقريبا لما وشي ودماغي بقوا اصفي بقي الناس بتشوفني 

ولما استايلي ظبط وبقيت بخرج مستريح في لبس بحبه بقي كل حاجة احلي 

معرفش بس مفرقش عندي بصراحة 😂

قضينا يوم حلو وبعيد عن العالم في اكلنا وهزارنا وطبخنا وضحكنا ودا شيء عظيم 

طبعا معرفتش اذاكر لحد امبارح الماني ولا اساسا عرفت اكلم اي حد خالص 

بس الموضوع تم تقبله بصدر رحب من صديقتي ومعندهاش مشكلة وبتعرف تتعامل

سعادتي بحب الناس وبالطمأنينة والعطاء بتفرح قلبي 

معدتش غير متزن وقلقان زي زمان ودي حاجة عظيمة

فرحان بنفسي والله 

خلينا نشوف هنقضي النهارده ازاي ونفرح باللي اليوم هيجيبه

بس انا النهارده لاحظت حاجة غريبة

اني بسمع شارموفرز و عزيز مرقة 😂😂😂

ومش عار دا حصل امتي تحديدا ولا ازاي بس انا فعليا تقريبا بقيت بسمع اغاني كلها حب وزاج رايق وعالي 

بتنفس بشكل احلي 

مبتكلمش في حاجة تدايقني مع ناس مش هتفهمها 

عامل حدود حلوة ومحافظ عليها 

وببعد عن الشر ومريح اعصابي 

ودا شيء عظيم

انا سعيد بنفسي و باللي وصلت له

وبكره عندي ميتنج مهم بردهودي حاجة تسعدني 

خلينا نكمل يومنا وننبسط 

يومك حلو وزي العسل علي قلبك يا كيمو ❤️❤️❤️

علي القهوة بكل هدوء

 

النهارده اتاكدت بما لا يدع مجالا للشك وطبعا دا كنت عارفه من زمان بس شاكك فيه ان في حد معين بيسعي في خراب البيوت والوسوسة وان اهم حاجة عند الشخصية دي ان محدش يستريح

قعدت فكرت مع نفسي ايه اللي يخلي حد زي كدا يحسدني ؟؟

وكلمت صديقتي وسالتها قلتلها انا مكانش عندي شيء ممكن يحسدوني عليه او حاجة مش عندهم او حتي محرومين منها ، 

اولاد معنديش 

جنسية مفيش 

اقامة دايمة برده مفيش 

سفر برده لسه وضعي كان طالب 

فلوس مفيش كتير لكن في اللي يكفي عادي جدا زي كل الناس 

في حين ان الناس دي عندهم كل دا ،

قلت لصديقتي انا لا املك من الدنيا سوي قلبي وحتي دا مكانش معايا كان متعلق بحد 

صديتق ي سكتت شوية وقالتلي بالظبط كدا 

هما حاسدينك علي قلبك وحنيتك وطريقتك واسلوبك والحب اللي بتقدمه ،

قلتلها بس الناس دي برده عندهم الحب 

قالتلي ان الحاسد مبيملاش عينه حاجة وان حتي لو عندها عشر رجالة مش هيملوا العين وهتستمر في الوسوسة والتوقيع 

لانها مش عايزه حد معاه شيء مش معاها او ان حد يملك شخص كويس زيك بيحب بصدق وبجنون وبيأفور في الحنية والطيبة والحب 

وان مهما كان فوجودي والحب اللي بقدمه وبجاهر بيه والحنية اللي عندي اكتر حاجة تسبب الحسد والسعي في خراب البيوت 

انا مكنتش مصدق بصراحة 

قعدت اقولها والله ما مهم عندي اي حاجة فاتت ولا اي حاجة خسرتها 

لكن لو انت بتكرهني ككريم او شايف ان عندي كتير من الحب لحد او حاقد علي حد عشان يملكني وبتمشي توقع بيني وبين الحد دا فالابسط ليك هوا متقابلنيش 

قالتلي مينفعش ، هي خلاص شافتك وشافت انت بتحب ازاي وبالتالي هي هتبقي عايزه كريم دا محدش يملكه ، مش عشان هي عايزاك لا سمح الله لكن عشان مستخسرة دا في حد وهي مش طايلاه بالشكل اللي يرضيها 

انا بصرحة كلامها كان صادم 

بعض مواقف الحياة بقف قدامها زي طفل صغير بيحاول يقرا خط فرعوني مفعكش مكتوب من الف سنة ومنقوش برجل حمار 

وببقي تايه ومش مصدق ان في حد يمكن يكون جواه كل الشر دا لبيتي بالرغم من اني والله عمري ما بصيت لحاجة في ايد حد ولا اذيت حد

انا مش ببرأ نفسي اكيد انا غلطت في حاجات واكيد في حاجات كان لازم اتعلمها بالظريقة الصعبة 

بس مش قادر اتخيل حد يعيش بكل السم دا بيجري في عروقه ويسعي في خراب بيتي 

انا مش زعلان والله علي خسايري لان دا قضاء ربنا ولان البكا عالفايت نقصان من العقل والحمد لله كل حاجة انتهت

لكن مستغرب شوية وعقلي في حالة من الذهول 

للدرجة دي ممكن حد يكره الخير لحد المتمثل فيك ؟ 

لسه فاكر نفس الشخصية دي لما جالي قرار الترحيل وطلبت نصيحتها وقلتلها ساعديني وقالتلي : دور علي واحدة المانية اتجوزها 😂😂

لسه فاكر كلام كتير زي السم كان من تحت لتحت وفاكر مواقف كتير 

الفرق الوحيد اللي حاصل دلوقتي اني مشاعري خلصت وان الوجع انتهي لكن عقلي كان رافض يصدق ان الواقع قذر للدرجة دي وفي ناس عايزه خراب بيوت غيرها 

انا مبسوط باللي شفته وبالي وصلت له 

ويمكن بكتب الكلام دا في يومياتي عشان منساش النهارده وحالة الروقان والهدوء والتركيز دي متروحش وبرده كلام صديقتي ميتنسيش لان في ناس حرفيا بتنطق الحق والدرر ودي نعمة من نعم ربنا ملهاش حد ولا حصر ولا مقدرة لينا حتي علي شكرها 

متنساش دا يا كريم 

ايمانك بالخير يابابا مش معناه ان الخير في كل الناس 

وعدم تصديقك بوجود الشر والحقد مش هيغير من حقيقة وجودهم في نفوس بعض البشر 

احمد ربنا وعيش سعيد 

واحمد ربتا علي كل نعمة انت فيها دلوقتي 

الحمد لله ربنا كرمني النهارده وعملت بلوك للشخصية دي وكل عيلتها

مقدرش اصدق والله اني قابلت الناس دي او كلت معاهم او في بيتهم في يوم وهما في نفس اللحظة كانوا بيطعنوا في ضهري 

الحمد لله رب العالمين

يارب والله مع كل شر بتبعده عني بشكرك وببوس ايدي وش وضهر وقلبي بيناجيك كل ليلة بالحمد والشكر علي كل خير بتبعتهولي 

ومع كل عطاء وكل حرمان قلبي بينور 

***

الخميس والجمعه كانوا يومين مشغولين اوي 

الخميس صحيت بدري وفضلت اتمرقع وانا عارف ان عندي ميتنج في اللوكيشن مهم جدا 

فطرت وروقت علي حالي وخدت بعضي ولبست البدله وخدت الشمسية عشان المطر اللي مفترض هينزل وروحت اللوكيشن والحمد لله وصلت ايسن بسلام واتمشيت لحد المكان 

رنيت الجرس وطلعت وبلغت السكرتارية تبلغ المدير ان هير زايده هنا 😂😂😂

دخلت علي المدير بشنطتي والشمسية قالي كريم احنا فالصيف 

قلتله النهارده هيبقي مطر وابتسمت 

وطبعا كان محضرلي خازوق محترم 

بس الحمد لله قعدتا نرغي ساعة ونص بدون فواصل 

كان بقالي زمن مقعدتش احكي مع حد بالالماني كدا 

خلصت معاه وسلمت عليه ووصلني للباب واداني نوت بوك وقلم وكشكول وشوية حاجات دمها خفيف كهدية 

وبعدها خرجت 

قعدت اتمشي فالشتادت في ايسن وانا سعيد وقلبي راضي ومبسوط والحمد لله ماشي قلبي متطمن

لان الميتنج كان لطيف برغم اني اساسا والله وصلت بقدرة ربنا عشان مفيش ولا قطر اتلغي وكمان عشان لقيت المكان بسهولة لان الشتادت علي الرغم من سهولتها بس احيانا صعب تلاقي مدخل العمارة

ركبت القطر ورجعت اوبرهاوزن واول ما وصلت احتفلت بمج قهوه زي العبيط بالرغم من اني المفروض مشربش قهوه عشان التوتر 

روحت ميعاد تاني قابلت حد مهم وبعدها عالبيت وبدات المطرة 😂

وطبعا خرجت فالمطره تاني بالشمسية وقعدت اتمشي بالشبشب في المطر وكان جو حلو خالص 

وبعدها عشا وفيلم حلو ونوم 

النهارده الجمعة صحيت متاخر بس رايق 

وصلني رسالة من واحد زميلي ان لازم نعمل ميتنج تاني 😂

كنت هتنقط بصراحة بس عادي 

وبعدها قلت اشطا وابتديت شوبينج عشان بكره هناكل كوارع مع الشباب فالبيت عندي 

عشان خلاص معادش في حد عازب وعايش لوحده غيري ودي ميزه خطيرة

اشتريت حاجات حلوه اوي اوي اوي اوي اوي اوي اوي 

توابل وفواكه وعصاير وتسالي وخضار وفاكهه وكل حاجة 

افتريت حرفيا 

بس كنت سعيد 

وخدت بعضي وقعدت عند النافورة وقفلت موبايلي وقعدت اتنفس بهدوء منعزل عن العالم نص ساعه

كانت من احلي الاوقات اللي قضيتها 

الموضوع كان صعب اني اقفل الموبايل عشان الايميلات والرسايل وصحابي ولكن 

الوقت عدي بسلام غريب 

اكتشفت النهارده ان وشي بقي اروق ومخي بقي اهدي بكتير 

علي راي صديقتي انت الظاهر كدا فرمتت الهارد فجاة 😂

بس الحمد لله وشي اروق بكتير ويمكن لاول مره من سنين طويلة تزيد عن العشر سنين افهم نفسي للدرجة دي وعقلي يسوق ويبقي واعي ومدرك ورايق للدرجة دي 

عايز اشكر كل حاجة ساعدني في دا 

واحمد ربنا علي كل نعمه والله وفضله الكبير عليا 

الحمد لله

دلوقتي اقدر انام مستريح بعد فيلم حلو وسهره حلوه واكله حلوة وقلب رايق وسعيد 

فعلا كل دا يستاهل التسجيل والله 

ليلتك زي العسل يا كيمو استمتع بالويك ايند وعقبال الشوي فالعيد ❤️

احلام سعيدة ياحبيبي ❤️

خلص اليوم

شرحت الماني 

كلت كويس 

عملت جبنة بزيت الزيتون ومليت البرطمان 

عملت شوبينج ومليت التلاجة 

شغلت فيلم حلو جدا

عملت محادثات لطيفة ولفيت في الفجالة في مصر وسمعت صوت الاذان  وصوت البياعين 

اكتشفت صبوره حلوة اوي هتساعدني في تنظيم اليوم وتنظيم افكاري وهدور عليها علي امازون واجيب واحدة زي اللي هي اشترتها

اتريقت وهزرت لحد ما عيوني دمعت 

روقت البيت ورميت حاجات كتير وروقت كوم ورق كبير اوي ورتبت ضلفتين النهارده

ضحكت وفرحت من قلبي وحد دعالي من القلب 

سهرت وفرحت

اتبقي ايه تاني ؟

اه 

شويت فراخ فالفرن 😂

ممكن تبقي كلها حاجات بسيطة بس قيمتها عندي كبيره جدا 

اه ونضفت الحمام كمان وخليته بيبرق 

كل دا مهما كان بسيط بس فرح قلبي وبالذات بعد ما حسيت اني اقدر اطير 

زمان اقرب الناس ليا قالولي انت عامل زي الحصان البري ، محتاج قيد لان لو اتسابت او قيدك اتفك او هربت فمحدش فالدنيا هيقدر يمسكك تاني ، متهور واهوج ومجنون ، كل حاجة عندك للماكسيمام الفرحة والشوق والحب وحتي السكس 

مفيش ليك قيود 

ويمكن دا اللي حاسه دلوقتي 

بكره ان شاء الله هبقي اكتب عن احساسي بشكل الطف من كدا 

بس بعد ما اعمل مشاوير مهمه

خير 

حب كتير وتصبح علي الف خير يا كيمو ❤️

الايام رايحة جاية

 النهارده صاحي متاخر من التعب زي الاوفر دوز سعادة كدا 

صاحي من بدري جدا ولكن كل شوية انام ودا حلو من شدة الهدوء

اليوم انا عارف ممكن يقلب في اي لحظة من القعدة لوحدي ومن مشاكل كتير بس الحمد لله شربت قهوتي ولسه هفطر 

والنهارده وصلني خطاب المستشفي من امريكا 😂😂😂

شكلنا رايحين في سكة ربنا بس اللي يقدر ينجينا منها كالعادة

الحمد لله

الاكل جاهز في التلاجة من امبارح 

وفي اتفاقات علي ميتنج جديد تاني وتالت ودي حاجة حلوة

ومش عارف حاسس اني تعبان بس اكيد الوقت هيبقي تمام وكله هيعدي كالعادة

It’s just a matter of time 

هروق علي نفسي بفطار حلو بيض وبسطرمة من بتاعة مصر 

وهقعد اشغل حاجة حلوة وابعت شوية ايميلات 

وشوية وهقعد احكي وافضفض واهزر الدنيا هتعدي واليوم هياخدنا خطوة احلي في طريق احلي 

هوا دا المطلوب في الايام الصعبة 

متبطلش تجديف في بحر الحياة وتبقي قوي كفاية انك تعترف انك تعبان في مناخ امن وصادق 

ودا بالدنيا

يسعد صباحك يا كيمو ❤️

حينما لا يكون هناك نور

 

النهارده اليوم لطيف 

صحيت متأخر بعد مشوار البهدلة بتاع إمبارح رايح جاي ميونخ في نفس اليوم 

والحمد لله لقيت الميتنج اتلغي 😂 ودا شيء عظيم 

بالغلط طبعا واتبعتلي اعتذار بعدها 

فكرت في حاجات حلوة كتير للفترةالجاية

لبست احلي طقم ونزلت اجيب بيض وزبده عشان ابقي 

عالسريع كدا كان فطار حلو مع شوية البسطرمة اللي جبتهم من اخر اجازه في مصر 

كانت اجازه حلوة والله 

لف واكل ومشاوير وفسح كل يوم واوبر 😂😂

حياة مختلفة تماما عن قبل كدا 

وكنت زعلان وانا ماشي بس لحقت ايام في رمضان وقضيت العيد وانبسطت 

اشتريت الحاجات وطلعت البيت 

الشقة كلها خدتها كنس ومسح لحد ما بقت بتبرق ونضفت المطبخ ورميت كراكيب كتير 

ابتديت فعليا ارمي  حاجات كتير واروق بس شايف ان اي حاجة مبلمسهاش مدة اكتر من اسبوع لازم تترمي 

وحطيت عطور جديدة فالشقة و ابتديت اجهز للغدا 

وفوق كل دا قاعد بشوف عرض مسرحي شغال في مصر 😂😂😂

اينعم مكنتش متخيل ان حد ممكن يعمل كدا لكنها هدية حلوة مقبولة 

حتي لو مش سامع كل حاجة بس مجهود الهدية كفاية

بس المسرحية حلوة ووحشني العروض المسرحية اللي زي دي 

كنت زمان بمثل وكانت ايام جميلة جدا واتعرفت فيها علي ناس حلوة كتير 

***

جبت هدايا كتير للناس واتمتعت كتير في سفرية مصر 

بس مكانش في أحلي من الهدية اللي جاتلي دي 

الفانوس الصغير الجميل 

لما جالي وكنت لسه تعبان شوية اتقالي جملة بحبها وانا كملتها : ليكن هذا نورك حينما لا يكون هناك نور 

الفانوس شمعته دي بتتحرك وبيشتغل بالحجارة ودي حاجة عظيمة 

ديكور جميل بشغله في وقت الستريس عشان ابص عليه يخطف بصري بعيد عن الشاشة وعن اي حاجة بتتعبني بيفكرني بالاجازة والوقفة العظيمة فيها 

***

النهارده سمعت جملة حلوة من اقرب صحابي واتبسطت وهي بتقولي كريم فيك حاجة مختلفة بقالك يومين انت اتغيرت تماما 

كانك عملت فورمات للهارد

قعدت اشرحلها كتير وهي بسم الله ما شاء الله بتسمع وتقول طيب اممم طيب اممم وتشجع في الاخر 

النهارده لسه مشرحتش الماني بس يمكن كمان ساعه ولا حاجة

انا مبسوط جدا اني رجعت اكتب كتير زي زمان ودا بيخليني افتكر الايام وفوق كدا افتكر عملت ايه وفكرت في ايه وبيراقب تطوري مع نفسي وراحتي النفسية وبيمنحني البراح اللازم عشان ابقي احسن

الحمد لله والله

من امبارح الصبح بسمع المزيكا الجديدة اللي اتبعتتلي هدية برده

شوية شوية بلاقي في نفسي حاجات حلوة بتظهر للنور مع اختفاء الضغط والتعب 

ويمكن دي احلي حاجة

ويمكن دا هو النور اللي بدور عليه 

انه يكون موجود في نفسي وينور الدنيا كلها من جديد زي ما اتقالي وانا مبسوط بقدر افرح الدنيا كلها

الحمد لله الغشاوة بتتشال عن عيني وقلبي بيتطمن ومش عارف كل حاجة والله راحت فين

تقريبا يمكن دين ودفعته او دي رحمة ربنا 

بس محدش يقدر يميز انا كويس ولا لا اكتر من الشخصية دي 

عالعموم الطريق حلو وكل شوية بنفرح اكتر 

خلينا نفرح للآخر وقوم كمل الاكل وكمل العرض المسرحي اللايف دا ❤️

حب كتير يا كيمو ❤️

يارب ينور قلبك

 اليوم خلص 

لبسنا حلو 

علي ذوقي جدا 

وسافرت لاخر الدنيا صد رد 

وخلصت من هم تقيل عالقلب 

كنت هقع في نص اليوم

لولا ان جتلي حته مزيكا تحفة فيها كمان وناي 

وفوق كل دا خلصت منضغط واستريس شديد لما روحت مسونخ وسلمت الحاجات وجيت

الحمد لك يارب 

شربت قهوه في مكان حلو كذا مره وكلت طوفي حلو اوي 

وكنت جايب سندوتشات وعصير 

وكمان قعدت اشرح الماني 

وفوق كدا دا بقي 

نزلت اشتوري ومسحتها 

اللي حصل ان القطر وانا راجع اتاخر واضطريت انزل بعيد واتمشي لحد البيت 

بس كل دا مش مهم 

المهم واهم حاجة في اليوم هي الدعوة الحلوة دي 

يارب ينور قلبك بونس من روحهمتتوهش معاه ابدا 

دي هي اللي قفلت اليوم صح وطمنت قلبي وراضتني 

بحب الدعوات الحلوة والناس الحلوة اللي بتدعي من قلبها 

الدعوه خلتني رايح في دنيا تانية 

للدرجة دي كلمة حلوة بتفرق وبتشكل اليوم والحياة كلها 

مش عارف اقول ايه والله بس مبسوط يارب 

وانا بتمشي لحد البيت افتكرت انها ايام مفترجة ودعيت ربنا وعيوني دمعت وانا بدعيه بالشفا 

الحمد لله الشفا جاي في الطريق وانا ماشي مظبوط 

بحول اخفف كل ستريس 

والحمد لله ميتنج بكره متاخر فهقدر انام براحتي 

انا لازم انزل اشتري اكل عشان بقالي كام يوم باكل برا ووزني ثابت 

ودي علامة مش كويسة

بس الحمد لله محافظ علي الوزن المثالي 

بس لازم نجيب اكل كتير عشان تقريبا التلاجة فضيت ومحتاجين نعمل فطار وحاجات كتير شوية جبن

وعندي جبنة رومي ورنجة و حاجات حلوة تبسطني علي شوية عيش وفراخ ولحمة مفرومة فهيبقي اسبوع دلع نريح فيه 

لحد ما نشوف هنروح فرانكفورت امتي عشان  الميتنج الجاي يارب يعجل بيه

وغير كدا بقي الاهم هوا ان اليوم برغم اني حسيت فيه بشوية حسد ومسحت استوري بعد ما نزلتها بساعه 

الا اني سعيد والله 

مش مهم الحسد حتي لو لو من مين 

لو كل يوم هحس بالدفا بدعوه حلوه زي دي فانا راضي يارب 

لو كل يوم هحس بحنيه وحضن يضمني بدون ذنوب بمجرد كلمة طيبة ودعوه طيبة فانا راضي يارب 

لو كل يوم هلاقي الدفا والامان اللي بدور عليه ومش هبقي شايل ذنب حد او حاجة 

فوالله يارب انا مبسوط 

صحيح النهارده برده عملت لسته جديدة علي ساوند كلاود 

عشان عالرايق كدا نتدلع واحنا بنركز بمزيكا حلوة

الموضوع دا بيفرق معايا جدا 

النهارده شرحت الماني حلو اوي كالعاده وقعدت ارغي 

والحمد لله قلبي نور كذا مره 

لحد اخر لحظة في اليوم 

بكره هصحي انضف الشقة واعمل اكل حلو واشتري اكل احلي واقعد مع نفسي كدا ارتب للاجتماع الجاي واتدلع 

وربنا يسهل 

انا بقالي زمن مكتبتش كتير اوي كدا 

ايه العظمة دي واقسم بالله 

المزيكا فعلا فرحت قلبي 

يا الله 

كل يوم وانت قلبك منور ويارب يستجيب الدعوة الحلوة 

الصدق والحلال اكتر حاجة تخلي الدعا مستجاب 

يارب استجيب دعاءنا

احلام سعيدة يا كوكو 

 

عشان إبتسامته حلوة

 

قاعد مستني القطر عشان اروح ميونخ فقلت اخد الصورة دي و فكرت في محادثتي امبارح علي المسنجر وقلت ايه بقي 😀وقلت ليه مكتبهاش هنا بوست يتحفظ يفكرني دايما باللي عايزه لاني نادرا ما بتكلم مع حد كدا بس دايما اقرب الصحاب واقرب الناس بيكونوا ونس حقيقي وهي طمنتني شوية علي الاقل 

ودي حاجة حلوة 

نبتدي بقي : 

البوست : 

انا فاشل في الكتابه مش بعرف اكتب زيك

انا بحكي كويس

ومش مع اي حد

لو حد قابلني بس

ودا نادرا

غير كدا عك

انا طبيعي وهاخد الدنيا بالحضن

عادي 

لحد ما ابقي كويس وتمام وقادر اتكلم واعبر كويس

- ما انت بتتكلم كويس مالك؟ 

مش انا

عايز حد احس معاه انه انا اللي بتكلم

عقل هادي مش مضطرب عمال يحدف يمين وشمال

انا العادي بتاعي كله مش اللي عايزه

عايز عقلي يركز ويبقي عادي

يبطل جري

عشان يكمل معايا

عشان منقعش من بعض في السكة

انا محتاج ازرع في ارضي

انا محتاج ازرع في قلبي خير وطيبة اكتر

وازرع في عقلي خير

بدال الوجع 

وازرع في حياتي مستقبل حلو

مش فرصة او اتنين بجري وراهم 

محتاج اختار بحرية

وعايز حد ارض تكفيني

ارض انام فيها مخافش

ولا أقلق 

ولا أحلل 

ولا أتعب في الكلام

وأبقي بجري طول الوقت

عايز حد يمشي معايا ساكت 

ويبقي واصل بقلبي بمسكة إيد 

مش عايز تفاهم وخلاص 

عايز أسكت شوية

مش عايز أبقي سوبر هيرو 

ولا عايز أبقي ضعيف 

عايز أبقي شخص عادي 

مش عايز حد يحط أحلام وطموحات 

ولا عايز غير إني أعيش أنا 

عايز حد جسمه بيتكلم زيي

عايز حد يراضيني عشان إبتسامتي حلوة

-هى حلوة فعلا وبتنور المكان واقل قلق بيشوش عليها

مش عايز أي حاجة مني أو أي شيء 

عشان إبتسامتي جميلة وتطمن وحلوة 

عايز حد أجري عليه بالحضن كأني دخلت بيتي 

مجرد بيت عادي مش أسطوري 

- يعتمد عليك وقت الشدة وطفل رايق وقت الهلس 

- انت اسطورى بمقاييس كتير

عايز اعيش مجرد اني اعيش

بدون أي حاجة صعبة أو مستحيلة 

حد يديني الشيلة ويشيل معايا 

مش عشان تقيلة 

بس عشان ونسي حلو 

ولو تقيلة مندخلهاش

عايز حد عادي بدون طلبات او طموح او ضغط 

عايز إيد تطبطب علي قلبي قبل ما أنام 

عايز حد جنبي أنا وبس 

عايز حد يشوفني زي ما أنا حلو 

وجميل

بدون قص شعر وبدون دقن وبدون لبس

وبدون فلوس وسفر 

كريم حلو عشان إبتسامته حلوة

مش عشان أي شيء تاني 

عايز حد يمسك في إيدي عشان أماني وأمانه

في نفس الوقت 

عايز ونيس تاني يشاركني في الأحلام 

وادينا بنتعامل

 

عارف ان الصوره من امبارح وشكلي تعبان بس الحمد لله النهارده ربنا كرمني وروحت العيد ميلاد بنفس الطقم 

وبقيت بعرف اطقم والبس ودي حاجة فخور بيها جدا ومعرفتش احققها بسهوله غير بمساعده ناس كتير 

كنت حلو اوي وسعيد وطاير كدا بهدوء في وسط اصحابي واولادهم وزوجاتهم 

ناس محترمة وقلب طيب يساع الدنيا 

النهارده بالخصوص ربنا كرمني كمان باني قدرت احرك حاجة مهمة جدا فالبيت من مكانها او تحديدا حاجتين 

ماشي وبسمع الكلام زي الشاطر وباخد خطوات 

انا فخور بنفسي برغم ان بكره تقيل علي قلبي زي السم عشان سفرية ميونخ 

ومش عايز اروح بس مجبر 

لعله خير 

النهارده انا سعيد وهادي وكل حاجة في مكانها الصحيح وربنا بيحبنا 

يبقي ليه منفرحش ؟ 

النهارده قعدت لعبت لعبه حلوة اوي اوي وي مع عقلي وكنت سعيد بالنتيجة لقيت اني اقدر اغير واتحرك واحرك حاجات كتير بقالي زمان ملعبتش كدا 

بس سيبك انت الطقم واكل مني حته بالشورت دا 😂😂😂

يلا ليلتك كلها حب وسعادة ياكيمو ❤️

عيد الميلاد

 النهاردة عيد الميلاد ولازم ابقي مشتعد 

حضرت الهدوم الجديدة واخدت الشاور التمام ورايح اقابلهم واقضي اليوم 

وبكره نطلع علي ميونخ

مشوار طويل هجهزله من دلوقتي بس الحمد لله ان كل حاجة مترتبة

مبسوط اني هقعد مع ناس كتير النهارده وصحاب طيبين وجدعان 

الحمد لك يارب 

ايامنا الحلوة يارب بارك فيها وطمن قلوبنا واجبر بخاطرنا واسعدنا بكل شكل 

وكل سنة وتيا الصغنونة بخير 

بالرغم من انها بتخاف وتعيط لما تشوفني 😂😂😂

بس سهله

كله مقدور عليه 😂

مبسوط باخواتي واصحابي والناس الحلوة دي 

الحمد لله

جناين

 مش عارف ازاي مكنتش بروح اشوي في الجناين قبل كدا 

بصراحة تجربة الوهارده تتدرس والله 

راحة نفسيه وها عليل وشوايه واكل وناس حلوة

حقا حاجة تبسط وتفتح النفس علي الحياة 

مكنتش بلاقي حد فاضي زمان وكمان في حاجاات مكنتش اعرفها ومحدش كان فاضي لي 

دلوقتي والحمد لله كله في مكانه

بدايات سعيدة وايام دمها خفيف  وناس مبهورة بيك وسعداء 

دي اهم حاجة 

الحمد لله

نقطة وداع

 مبروك 

للذكري وللتاريخ 

اليوم دا لازم يتسجل 

معادش في حاجة نمنع نفسنا عنها تاني 

دلوقتي اقدر اطير بدون ما احس بالذنب او ب يا خسارة العشرة 

او ياعيني علي الايام والتعب والمجهود 

الحمد لله حصلت علي الكلوزر اللي منتظرها 

من رحمتك بيا يارب 

لا بيت ولا اطفال ولا طموح تاني في الطريق دا 

الحمد لله رب العالمين 

ربنا سبحانه وتعالي نور طريقي 

وساعدني اشوف الحقيقة 

واعرف ابتدي من جديد 

ومفيش احلي من كدا 

مفيش احلي من انك تعيش حياة جديدة وتدور علي ذكريات جديدة وحد جديد يساعدك تبقي انت 

انا بحب اسجل يومياتي هنا 

وبحب اكتب حاسس بايه 

سنة راحت عالفاضي والحمد لله 

دلوقتي مش هستني واسيب كل حاجة في مكانها لا خلاص انتهي 

هقدر اتحرك واعيش حياتي 

الحمد لله رب العالمين

اللي باعني خسرني 

خسر حنيتي ومحبتي وقلبي اللي بيغفر ويسامح ويحب بصدق 

كل سنة وانت طيب يا كيمو واحلي ذكريات هتبقي هي ذكريات الأيام دي 

الحمد لله

ضحيت وتعبت سنين واكيد ربنا هيعوضني خير 

تعبت واتبهدلت سنين واكيد ربنا كرمه واسع عالم بقلبي ونيتي 

مش فارق معايا السنين ولا ايام الحب في مصر ولا ايام الشغل في المانيا عشان ابني حياه ولا حتي ايام الجواز 

اكيد كل دا عند ربنا واكيد ربنا عالم بيا وهيساعدني 

بس للاسف انا مستاهلش اتباع بالرخيص كدا 

الحمد لله اني طلعت اغلي من كدا

تتفق او لا تتفق

 تتفق او لا تتفق في قدر الله لا هروب 

محدش بيهرب من نصيبه ياصديقي 

سينما ؟

حاجات كتير

 وحشني حاجات كتير معاها 

اشوف مسلسلات ونتمشي ونغلس علي بعض ونزق بعض كتير 

وحشني كتير والله

الحياة ابسط من كل داوالله

ولسه الحلم

 ولسه الحلم عايش ومتهزش 

ولسه بحلم بعيونك ومسكة ايديكي 

احيانا بسال نفسي مين الغلطان 

لكن بقول لنفسي مش هتفرق ومش مهم 

عامل زي واحد بيفكر في العشا والبيت بيولع قدامه 

الاهم هوا البيت

لو غلطان هعتذر عادي وهراعي في الجاي 

لكن مش هتفرق اي حاجة طول ما كل واحد بعيد عن التاني 

يارب ياكريم

كريم يارب 

الباب مفتوح

محدش عارف ليه

محدش عارف ليه بحبك

ولا بسامح بكل طاقتي وفوق طاقتي في اي شيء 

ولا حتي الحنية المفرطة او الدلع الشديد 

وا حد عارف قلبي ازاي كدا 

مش مهم كل دا 

المهم انه لها 

اني بحس اني مكاني معاها وجنبها واي حاجة تانية مش مهمة

مش فارق اي حاجة في الدنيا 

وهفضل احب واسامح واغفر واتساهل وادلع وابقي قلبي ملكها 

مهما حصل 

حتي لو ايه 

هيفضل قلبي بينتمي ليها 

عشان بحس ان دا مكاني ومكانها هي وبس 

واي حاجة تانيه مش مهمه

مهما كنت علي حق

 مهما كنت علي حق محدش هيصدقك ولا هيقف معاك

طول ما انت مش الاحلي  

طول ما انت مبتعرفش تحكي  وتصيغ الموضوع 

طول ما انت مش بتعرف تعيش دور المظلوم 

طول مانت خايب ملكش في العلاقات مع الناس 

طول ما الناس مقتنعه ان حقهم يغلطوا وانك ملكش حق عليهم 

طول ما انت متقدرش تستغني عن اللي بتحبهم ولا ترحل ومحدش يقدر يوصلك

طول ما انت بتقعد تحكي ومحدش بيفهم منك حاجة ولا حد عايز يحاول يفهم عشان انت الحكي بتاعك تقيل عالقلب 

طول ما في حد قادر يسيطر عليك ويتحكم فيك ويضغط عليك ويكسر فيك وانت بتستجيب زي العبيط وامك عارفة

طول ما انت مش فشيخ ومغلي نفسك زي الناس وطيب ومتواضع وبيتضحك عليك بكلمتين

نقطة انك حساس وبتاخد الحاجة علي مشاعرك وليك سقف في الغضب وبتمسك نفسك عن اذية الغير هتبقي ضدك مش في صفك

بس تفتكر الموضوع معركة؟ 

عمرها ما كانت معركة لان ربنا مطلع علي كل حاجة 

انا عمري ما كسرت اللي بحبهم وكنت دايما برخي الحبل عشان اراضيهم حتي في الاهانات المباشرة 

طول عمري لو مش في ايدي الحاجة بقول مش في ايدي بس محدش بيصدقني 

كان نفسي اتقدر وحد يتمسك بيا ويقف جنبي ويسندني ويفكر اننا صف واحد مش صفين واننا واحد مش اتنين

كان نفسي اعيش بني ادم له احترامه وكرامته وطيبة قلبه وحنيته اللي بتساع الدنيا كلها 

لكن زي ما قلنا انا عبيط وامي عارفة وهفضل حنين وبزيادة حتي لو الدنيا قطعت مني حتت

لان دي الحاجة اللي مقدرش اعيش من غيرها وهي الرحمة 

واكيد ربنا حنين وارحم عليا من الدنيا كلها

فوضت امري وقلبي اليك يارب وسلمت امري ليك

كان زماننا عندنا اولاد وكان زماننا سوا بنسافر ونعيش ونفرح ونعيش 

 لكن هي ارادة ربنا

زمان كنت بحكي اني خايف عليها زي زميلتي اللي اتجوزت واحد او اتخطبت لواحد مبتحبوش عشان تداوي جرح حبيبها والدنيا جت عليها جامد وحكيت القصة كاملة

وساعتها سالتني ليه دا كله

قلتلها عشان بحبك واغلي عليا من بنتي 

وساعتها عينيها عيطت وقالت بحبك

للدرجة دي الحنية بتخليك تتأذي يا كريم

وللدرجة دي محدش بيفهم افعالك لانك مش بتقول لكن ربنا عالم

بسم الله

 احبك وانت بتقول بسم الله

مفيش مشكلة

 مفيش مشكلة لو بكلم نفسي وبكتب لنفسي وببوح بلحظات بالدنيا وحلوة بالحياة كلها 

معنديش مشكلة اتعب ولا ابقي مرهق ولا متالم من الفراق وغرقان في الحب لشوشتي زي اول يوم 

معنديش مشكلة اني افضل احب مع نفسي 

في الاخر محدش بياخد غير نصيبه 

وكل واحد ربنا بيبعتله اللي علي قد نيته وبيرزقه باللي يستاهله

يارب خليك معايا وقويني 

وقوي قلبي يفضل يحب بدون تمييز ولا تفكير 

دا بالدنيا لحد ما اشوف عينيها وتبقي جنبي ودا بالدنيا والله

تلات سكك

انا بحب احكي حواديت ، فاكر زمان لما حكوا لنا حدوته عن ملك عنده تلات اولاد وكل ولد خد طريق 

واحد خد سكة السلامة

والتاني سكة الندامة

والتالت سكة اللي يرح ميرجعش 

ادفع اي حاجة بس اعرف الحدوته دي كاملة

مخي برغم قوته في استعادة الاحداث والتفاصيل الا انه يقف عاجز مش عارف تكملة الحدوتة

عندي فضول اعرف نهايتها

وعندي فضول اقعد معاها واحكي لها الحدوته واشوف هتقولي ايه

وحشتني جدا ووحشني احكي لها حواديت ووحشني ابوس راسها واطمنها 

الدنيا دي غريبة بشكل 

وبخاف عليك

 

وبخاف عليك وبخاف تنساني 

اه والله

عشان روحي لسه سكناكي

ليه بتحبها؟

 يكفي ان يداها تجيد حياكة ثقوب قلبي 

واغلي عليا من بنتي 

وعشان مش ضروري يكون في عشان 

ياريتك مش رايح ياريتك تبقي 

تبقي علي طول 

😘❤️😍

 

ياصاحب الخطوة

 

خطوة ياصاحب الخطوة

خطوة إمشي لي لو خطوة

ياعين النور 

خدني علي بلادي

 - بحبك 

- بتقولها كتير 

- عشان خاطر خايف ييجي يوم يبقي نفسي اقولهالك زي قبل كدا وملاقيكيش فابقي قلتهالك وتفضل معاكي ، لوقتها 

عشان كدا بقولها كتير مش ضامن بكره ولا عارف ممكن يحصل ايه

انتي وطني اللي مش بشبع منه واللي بنتمي له وبينتمي ليا

، روحي ساكنة جواكي ، روحي فيكي ، في قلبك هنا ياطمطم

وعمري ما أشكي

 - كريم اصحي 

- مالك ياحبيبتي بتعيطي ليه ؟

- البطل مات 

- مصحياني من احلي نومة عشان البطل مات ؟ 

- اه

- حقك عليا يا حبيبتي وعلي عيني وراسي وقلبي ، معلش ياروحي وادي عينيكي ودموعك ابوسها ، تعالي هنا جنبي  وفي حضني ، انا هنا جنبك وبحبك 

وعمري ما أشكي من حبك مهما غرامك لوعني 

الحنية اللي ملهاش حدود لعيونها هي وبس  ❤️

وأفتقد الحبيبة

 الشاب الحنين اللي يبوس دموع عينيكي وقت البكا 

يشيلك ويحضنك زي طفلة صغيره ويحتويكي بكل ما فيه

يسمي وهو بيحضنك

وافتقدك

علي الاشياء والاشخاص

 علي الأشياء (والاشخاص والاحباب والاصدقاء وحتي علي حب حياتي )التي لطالما حكمت قبضتك عليها وسعيت نحوها وتمسكت بها أن تسعي نحوك أيضا ، 

يمكن انا احن شخص خلقه ربنا علي قلوب اللي بحبهم 

لكني في نفس ذات الوقت محتاجهم هما كمان يبقوا عارفين او شايفين او حاسين بيا وحنينين عليا

فطوم

يافطوم

Didn’t we fought enough ? 

السكة

 ولو صعبة عليكي السكة شاوري لي وانا اجيلك 

HBD

❤️

More than life itself 

صباح شريف 

صباح جميل

صباحك ياللي علي بالي

صباح الواحد من ستة

هغني لك وتبقي قبالي 

وتمشي مع قلبي السكة

صباح النىو 

علي البنور 

عيون الحور  

واعدي البعد والمسافات 

واقول للحلو اطمن

دا مهما كان بكره بعيد 

قلبي صابر ويتحمل 

وحشتيني