الحمد لله رب العالمين

 الحمد لله رب العالمين

Day 1001

 مخي مشلول ،الهدية وصلت ، مخي هينفجر ، فجاة هدوء شديد ، فجاة تعب، فجاة مبلم، مش عارف ازاي كل دا حصل ،مش عارف في ايه، مش عارف ليه،متخلف او غبي او اهبل يمكن ، كنت فاهم غلط ، كل حساباتي باظت، كل حاجة باظت، اليوم بلا وطن بناء علي مكالمة جاتلي، اليوم في حاجات بتعافر فيا عشان تعيش من ضمنهم الامل، بس مظنش عاد في امل ، معرفش ، عمري ما حكيت ولا شكيت لحد،عمري ما دخلت حد حفاظ علي بيتي وسر بيتي ، النهارده مفضوح وسري مكشوف وقلبي مكسور ، معادش في اهل تاني يعني خلاص …؟ معادش في امي ابوس ايدها واحضنها؟ طيب معادش في دفا بيتنا؟ معادش في نيل ؟ معادش في فايده؟ معادش في حب بيقهر الزمن والزعل والخصام والقضايا، كنت بجري زي المجنون فاكر ان كل دا هينتهي وانها زعل وهيخلص وقلبي بينط من صدري مع كل محاولة

معادش في حاجة كدا خلاص ؟ مش قادر اكتب تاني ، يمكن دا أسوأ عيد ميلاد وأسوأ يناير عدي عليا في حياتي مفيش أسوأ من كدا ، تقريبا كدا متبقاليش غير شوية الحاجات اللي هنا ، معادش في غير اني اشتغل زي الحمار واعيش والسلام، مفيش ونس ولا بيت ولا اهل وا فرصة ولا اي حاجة

طيب 

كنت هموت ونتكلم ونتفاهم ولو حتي باي شكل 

بس معادش في فايده اظن كدا خسرت كل حاجة

لسه عارف دا النهارده

خير

Friend

 My best is finally back  aand here ❤️

Than you love 

مكانش ممكن  من غيرك ياجميلة ❤️

لسه عندي يقين وقناعه ان اي حد في مقارنة معاكي مظلوم ومينفعش يدخلها عشان هيتظلم والله

شكرا علي قلبي اللي بينور بعيونك وانتي بتقولي بحبك ليه

Hands

 There are hands 

And

the hands that guide the hands

مكالمة من معرفة

 حد مهم بحترمه جدا واليوم دول بنبعت لبعض كتير في هواية بنحبها كلمني امبارح قالي اني ماشي اتكلم علي الناس ودا عامل مشاكل وبيتقال عليا اني بتكلم من ناس يعرفهم ان في ناس قالت لهم عليا اني ماشي اتكلم عن حد 

طيب انا اعرف مين او علي تواصل مع مين ؟ 

حرفيا محدش ، قفلت كل علاقاتي علي شخصين بعيد تماما عن كل الناس محدش يعرفهم ومش بحكي معاهم في اي حاجة 

قلتله لو في حد نطق عرفني هوا مين وانا اديله بالجزمة ، اي حد يتكلم عني او عن اي حد يخصني او كان يخصني حتي عرفني مين بيتكلم

انا مش بحكي مع حد في اي حاجة وقافل علي نفسي تماما من سنة ونص ومش بنطق ولا حتي بكلم اي حد باي شكل ، بس هوا كدا الناس في كل الاحوال هتتكلم ، اخلاق القرية اللي الناس عايشة بيها هنا ، مجتمع الفلاحين اللي بيتحشر في كل حاجة وبيولع الدنيا ودا خلاني اشوف شوية حاجات : 

- هي فاهمة غلط او فاهمة صح بس شايفه كريم وحش ومش راضية

- الاهل مشاكل شديدة وبرده مش راضيين 

- الناس في النص سوس وشياطين حرفيا بيخترعوا كلام وبيولعوا النار كمان وكمان و الواحد اصلا منعزل عن كل الناس 

- محاكم ومشاكل في النص 

كل دا ممكن يتحل لو كنا قعدنا سوا لو كان في بيننا طريق او سكة او اي حاجة نقدر من خلالها نتكلم او نتفاهم ونحل مشاكلنا ونتكلم بصدق لكن دا مش متاح لان المفروض كريم وحش وبيتعاقب عقاب ابدي وكأنه كفر ، وبالتالي مفيش قعدة ولا كلام وحتي لو كلمت اي حد من الاهل محدش بيدي رد نافع او بيحاول يصلح 

كله خربان ومن كل ناحية ، مفيش صاحب في النص عشان يحل ولا في حتي سكة ولا في اي وسيلة ولو قعدنا كدا في نفس الحال والله لو الف سنة طالما كل دا زي ما هوا كالتالي : 

- طول ما في اصحاب سوس وشياطين وفلاحين في النص تسخن الدنيا 

- طول ما كريم متشاف وحش وكل حاجة عملها وحشة ومنفتكرلوش اي يوم حلو وحد مينفعش نتعامل معاه ولازم نحتقره ونعاقبه

- طول ما الاهل واخدين فكره اني وحش وشيطان برغم ان محدش شاف مني حاجة وحشة

- طول ما هي فاهمة علط وانا عايش عالاشارات والتفسيرات لحاجات ملهاش معني وعايش في الوهم مع نفسي كدا 

- طول ما  هي مش بتحب كريم او مش عايزاه، لان اللي بيحب حد مبيستحملش حاجة عليه

كل السكك واضح انها مقفولة ومفيش فايدة ولا حل حتي لاي مشكلة محدش راضي حتي لو الواحد خسر اعز صحابه وناس كتير ملهاش حصر وسمعته ونفسه ونفسيته وصحته ، وبرده مش كفايه

بطلت اسال واقول ليه كل دا انا عملت ايه مهما كان الغلط اللي عملته ميستاهلش كل دا ، ودلوقتي يتم اتهامي اني بتكلم في كل حته علي حد 

وانا كاتم كل حاجة واشتغلت علي كل المشاكل حليت مشكلة الدبريشن والانكزايتي وحليت مشاكل الشغل والاقامة والفلوس وكل حاجة وحتي الحب اتضاعف مليون مرة ، بس مفيش فايده 

انا حزين اوي علي الحال دا اللي مكانش هيكون كدا لو كان في اي طريق او اي سكة مفتوحة

بس معلش عادي 

المهم ان في رضا ربنا واي فعل بعمله هتحاسب عليه قدام ربنا مظلمتش حد غير نفسي 

طول ما في ناس في النص متتوقعش ولا تفكر في اي خير عشان مستحيل وطبقا لكل شروط الواقع مستحيل تماما ، محتاجين معجزة حرفيا 

تخيل محتاج معجزه عشان تتواصل مع حد ؟

عشان كدا مفيش امل وعشان كدا مفيش حل وعشان كدا لازم نعيش وبس 

نكمل في حياتنا ونبص قدامنا ونعرف هنعمل ايه والحل لحياتي ايه بدون ما ندور علي حلول عند حد 

نستقر ونهدي ونروق ونبص لبكره ونبني من جديد 

يابني …

 …

كريم …

 …

قعدنا وكدا

 قعدنا نضحك من شوية في الكوول وانا عمال اقول الحياة بسيطة 

اتضح اني كنت عايش في اوهام كتير 

متكلمناش فيها كلها بس اكتر حاجة افتكرتها بيني وبين نفسي  ضحكتني اني مثلا زمان كنت واخد بالي ان المسافة كلها كليك ماوس 

او ضغطه في زرار الموبايل او اوبشن عالفيس او المسنجر 

ولكني كنت علي حق في ان المسافة قريبه جدا وسهله العبور 

وفي نفس الوقت صعبه ومستحيلة عشان محدش عايز يعدي 

الحمد لله والله

الموضوع بسيط والحياة بسيطة 

وسهلة

زمان كنت بستغرب من فلان بيحب مراته وعياله بس قليل الاختلاط 

وبستغرب من فلان  قافل علي نفسه ومركز في مراته وبيحبها اوي برغم انه واضح انها مش جميلة ولا فيها اي ميزه ولا حتي اسره كبيره ولا اي حاجة بيحبها علي ايه

اتضح ان اللي بيشتري رضاك وبيجبر بخاطرك وبيراضيك  تديله قلبك وعمرك ومشاعرك ومالك وكل حاجة وانت متطمن انه امين عليهم علي حياتك ذات نفسها 

الحمد لله رب العالمين

انا دلوقتي مستعد للخطوة الجاية 

نرتبلها علي الهادي بدون اي حسابات اخري وكله هيبقي زي الفل 

يارب 

يناير والدكتور

 الحمد لله بشاير يناير بتهل علينا 

دا كرم كبير من ربنا وفرج ملوش  حصر 

الصحة بتتحسن وزي الفل وكل الادوية هتبقي قريب مجرد ذكري 

مكنتش قادر استني لحد ما اروح عشان اسجل الانجاز دا 

الحمد لله رب العالمين 

اخلص شوية  الاجاعات اللي ورايا واقعققد اروق واركز في الجاي  

نعمل احلي بلان واقعد  اكتب واقرا شوية

يومك زي العسل يا حلو 

مبروك

ما بين المنح والمنع

 من العالم الآخر 

مبدئيا انا عارف ان دي تقريبا اخر مرة اتكلم فيها في اي حاجة تخص السيرة دي باي شكل بس عايز اطلع كل اللي في دماغي عشان ابص علي بكره وانا مطمن ومرتاح ومش عايز افضل احارب في طواحين الهوا وفي المفيش كتير 

لان مفيش حاجة تستاهل بني آدم يعيش في كل العذاب والبؤس والتلاعب والانتظار 

لان حياتنا أثمن وأغلي قيمة من إننا نضيعها لاي سبب سواء كان مشاعر او حتي افكار عن الماضي 

وعشان يمكن في يوم من الايام الكلام دا يهديني ويفكرني ايه بعد سنة ونص عملت كل دا 

قبل اي حاجة : 

- الحب قبل كل شيء والحب مش عيب ولا غلط ولا يستاهل اي قسوة او جحود ومينفعش يتقابل باي حاجة وحشة

- انا لسه فاتح قلبي وروحي ومقفلتش ودا مش عشان حاجة غير زي ما قلت الحب 

اتنين عايشين بيحبوا بعض ، علي فرض يعني 

لكن : 

- طرف بيعاني من الاكتئاب والانكزايتي والديون ومطلوب منه دائما فوق طاقته ومهما عمل هوا وحش ومقصر وحرفيا بيحارب عشان يبني مستقبل ومش واخد باله حتي من ان صحته بتروح او بيعاني وعمال يحاول بعزم ما فيه يساعد الكل سواء صحاب او قرايب او معارف او حتي ناس تانية 

- طرف تاني بيعاني من تروما الحياة 

- ايه دا هوا انا عليا مسئوليات ؟ 

- ايه اللي جابني هنا ؟ 

- مشاكل نفسية من اللي حصل في العمر كله وضيف عليها من الناس وضيف عليها من الطرف الاول وضيف عليها حاجة تعتبر مصيبة كبيرة زي السوشيال ميديا والشغل وفي مصيبة اعظم وهي الناس الكتير 

- كل الناس بتصقف لك : انت شاطر انت حلو انت كويس انت تستاهل اكتر  انت جامد جدا انت ازاي راضي بكل دا انت تقدر تاخذ اكتر دا غير تجارب الناس دي سواء منبعها الحب او منبعها علاقات مشوهه بتأثر عليه ، شلل صحاب في البلد والشغل والسوشيال ميديا والاهل والصحاب والماضي ، في دائما input رهيب عظيم يشكك في نفسك وفي الطرف الاول 

- سواء هدفهم الحب او الاحسن او الغيرة منك عشان في ايدك حاجات يحلموا بيها ( زوج بيعظم فيها ويبوس ايدها قدامهم حتي لو زعلان منها ، محبة اوفر وحنية اوفر وحد عنده استعداد يبيع نفسه عشان يرضيها بس ، شغل او فلوس او اي حاجة ، امل في مستقبل احسن و ضحكة حلوة وشكل حلو ، كل حاجة كانت بالنسبة للناس ازاي فلانه معاها كل دا ، نسلطها علي جوزها عشان ازاي تبقي عايشه برا ، ازاي تبقي لاقيه واحد بيستحملها للدرجة دي ، ازاي في حد حنين عليها ، ازاي جوزها بيقولها كلام حلو او حتي بيعلي بيها ) مليون input كل يوم وياعيني الطرف دا متخبط اصلا بمشاكله ومشاكل الماديات ومشاكل البيت العادية

- كل حاجة بسيطة بتتحول لمشكلة كبيرة 

- فاكر لسه مسلسل امل فاتن وانا بتهزأ برغم اني معملتش كل دا : لا سرقت فلوس ولا ضربت حد ولا شتمت حد واتطردت واتبهدلت عادي جدا وشفت الذل بعيني اكتر من مرة 

طرفين كل واحد فيهم تايه عايزهم يبنوا بيت ازاي ؟ 

افتكر كدا اول تلات ايام سوا او اول فتره سوا افتكر كان في مشاكل ولكن كان كله سهل ، دخول الناس والوسواس والشيطنة لكل افعال الطرف التاني خلت كل حاجة بيعملها الطرف الاول شر زي : 

- جابلي هدية 

- خروجة

- فسحة

- سفرية

- كلمة حلوة 

- اي طلب او اي كلمة كويسة 

كل دا بقي شر 

ليه ؟ 

عشان ال input الداخل من الدنيا كلها : جروبات صحاب وقرايب واهل ومعارف و اذي كتير بكل شكل 

في الحالة دي احنا هنجرح الطرف الاول وندوس عليه ولو مش عاجبه او لو رد علينا ساعتها يبقي وحش 

طيب فين سر البيت ؟ 

طيب ليه نفضح نفسنا ؟ 

طيب ليه نحكي للناس ؟ 

طيب ليه نسمع كلامهم ؟ 

طيب ليه نأوي الراجل دا ؟ 

عشان شتمنا ؟ طيب ما احنا شتمناه هوا واهله بدل المره الف 

عشان مش عايز يجيب او بيطلب فلوس ومبياخدهاش اساسا لو اتعرضت ؟ 

ولا عشان مزنوق وحالف يفلح في الدنيا ؟ 

عشان مريض وبيتعب وعنده قلق شديد ؟ 

ليه كل دا ؟ عشان في واحد غلط ؟ 

طيب خلاص خلينا نستني وناخذ قرارات ونسيب البيت ونمشي ونعمل مليون حوار 

وبعدين ؟ 

ايه دا الجدع دا اتخلي عننا ؟ 

طيب مش هنعبره ولا نرد عليه

ايه دا هوا بعد بعيد يصلح حياته ؟ 

طيب خلاص هنهزقه اكتر ونحرمه من حقه شرعا وقانونا وهندوس عليه

ويستمر المسلسل 

الناس تتكلم وتسخن وتقوم الدنيا وكل واحد بيتكلم في حاجة مايعرفهاش اصلا 

الفتره اللي فاتت بس عرفت  واتاكدت ان مفيش حاجة هتتصلح 

ان كل حاجة هتفضل غلط طالما محدش قال الصح فين ، طالما في ميت حد بيتكلم 

مين كل الناس دي ؟ 

كانوا فين زمان اول تلات سنين ارتباط ؟ كانوا فين في اول سنة سفر ؟ 

اه معلش احنا حاضرين في الصور والكلام عشان بس المنظر حلو 

في ناس كتير موجوده عشان ملهاش مكان تاني 

اللي قاعد يشتكي ليل نهار او يضيع اللي قدامه او يوقع اللي قدامه في دوامة 

واللي مش عايزك احسن منه 

عارف ان دي نظريات مؤامرة لكن علي ارض الواقع مش دا اللي حصل ؟ 

اللي بيحبك هيبقي عايزك مع حد يقدرك 

اللي يتمني لك الخير بجد هيبقي عايز حد كويس جنبك ويحاول ينسيك الوحش ويعرفك الصح من الغلط ويعاديك عشان تمشي علي شرع ربنا وتقف جنب حد كويس يستاهلك 

لكن هل حد عمل كدا ؟ حد قالك اللي عملته صح ولا سخنك اكتر ؟ 

دا كان المعيار الحقيقي ومازال 

الصديق الحقيقي او الانسان الحقيقي في حياتك هيبقي عايزلك الخير مش هيبقي عايزك تعيش في وحدة وتعاسة

وزي ما قلنا كل الجروبات وتجاربهم والصحاب والمعارف والعلاقات الكتير خربت الدنيا 

دا غير نظام انا واقف لك علي الواحدة ومستني ام غلطة : اللي هوا انا هسجل كل حاجة 

طيب هوا ربنا قال كدا 

دا ربنا ذات نفسه بيسجلنا ويمسح ويعفو ويصفح ويغفر 

لكن غلطات كتير بسيطة وكبيرة ويلا نهرب من الشخص دا بالرغم ان الشخص دا اكتر حد بيراعينا 

هل انا كنت ملاك ؟ 

لا طبعا 

لكني في كل الاحوال كنت بسعي لاني اعمل الحاجة اللي تبني بيت سليم

بصيت لبكره ولقيت ان المستقبل تيت 

هييجي طفل يلاقي اهله في خناقات ومفيش احترام ولا في تقدير وفي تهزيق وزعيق بسبب كل اللي اتقال دا 

هيكبر ازاي ؟ هيشوف اهله ايه في وسط مجتمع زي دا في الغربة ؟ هيروح فين ويبقي ايه وهيعمل فيهم ايه 

دي مش حياة سليمة لابد من وقفة تخلي كل واحد يعرف ان كل حاجة ممكن تضيع في لحظة وان وجودنا سوا نعمة 

دا كان الحل الوحيد عشان كل الحلول التانية حاولت فيها  

نقاش : لا دي دروس وانت بتنكد 

تفاهم مع الاهل : يقولوا عندك حق مره ومره لا بنتنا تعمل اللي عايزاه ، طيب فين انصر اخاك ظالما او مظلوما بان تمنعه عن الظلم ؟ 

تفاهم من خلال صحاب ( ودي كانت غلطه برده ) : بوسوا راي بعض وحبوا بعض يا جماعه ويلا نكنس مشاكلنا تحت السجادة

تخيل مفيش طريق او باب الا وخبطت عليه

تخيل مفيش حد كلمته الا وسمعت منه ما اكره 

تخيل مفيش حد كان موجود الا و مسعاش في صلح وسعي في خراب وبس 

هل واحد زي حالاتي يستاهل كدا ؟ 

لا 

هل افعالي مهما كانت تستاهل كدا ؟ 

برده لا 

هل الطرف التاني ينفع يعاملني بالقسوة والعزلة والجحود دا ؟ 

لا برده 

امال ليه كل دا بيحصل ؟ 

إرادته 

الحمد لله 

انا كنت فاكر المشكلة في الفلوس فاشتغلت 

وفاكر المشكلة في الحب والسعي ورا اللي بتحبه وبرده سعيت كتير فشخ 

وفاكر المشكلة في ميت حاجة تانية 

حليت كل حاجة ووقفت علي رجليا علي امل اني اقدر اقدم حاجة تصلح كل دا 

لكن 

الحياة مش بتمشي زي ما احنا عايزين : 

- عشان إحنا مش آلهة 

- عشان مش من حقنا نخلي الناس تعمل حاجة عشان خاطرنا او عشان نفسنا فيها 

- عشان معدناش اطفال 

دور بابا كريم اللي بيستحمل ويحب حب صافي اللي بيجري ويتشقلب دا 

الحمد لله فقت منه 

كان عندي مشاكل كتير والحمد لله ربنا حلها 

وبقيت في دنيا تانيه ومكان تاني 

وارادة ربنا محاوطاني برده 

وبرغم اي تقصير قصرت فيه اعتذرت

لكن محدش عايز يسمع ولا يسامح 

معادتش مشكلة 

كل واحد سبب الضرر للتاني واللي حصل حصل

الخطوة الجاية انا عارفها كويس بس مش وقت الكلام عنها دلوقتي او مش النهارده تحديدا 

ليلتك سعيدة يا كيمو 

ليلتك سعيدة يا حلو 

الاحد وسفرياته

 في العادي السفريات كلها بتبقي السبت لكن بقالي فترة الاحد بالنسبة لي ميعاد مهم لكل سفرية مليانة حاجات حلوة 

اليوم هيبقي طويل وهيبقي ورايا حاجات كتير اوي وحرفيا مكسل جدا 😂

بس هنرتب البيت ونظبط الدنيا اكل وشرب وناخد معانا سناكس حلوة للطريق ونطير بقي 

ربنا يجعل ايامنا كلها حلوة بقي 

محضر كام حاجة حلوة للمشوار جنب السناكس بس اهم حاجة نحجز الاول 😂

يلا يسعد صباحك يا كيمو ياعسلية 

الباب والطريق

Yes 

الحمد لله رب العالمين

 الحمد لله رب العالمين

فضل ربنا واسع وكبير 

مكنتش أحلم بكل دا 

هحكي بعدين 

بس الحمد لله

كريم ليه

 النهارده خلصت شغلي وروحت اليوم كان طويل جدا ومتعب بس الحمد لله عدي علي كل خير والحمد لله علي كل أحداثه، هبقي احكي يوما ما عن التواصل بالمشاعر بس مش دلوقتي لان دا في حكايات كتير يعتبر جنون ، انك تحس بالناس والناس تحس بيك ، بس مش قصتنا دلوقتي بس جه في دماغي فكرة وانا مروح والجو ساقعه وايديا دافية وقعدت اقول لنفسي اشمعنا كريم او ليه كريم او ايه الحلو هنا او ايه المميز يعني فجه في دماغي شوية حاجات اسجلها من اجل رفع المعنويات وعشان متتنسيش 

- الدفا في عز الساقعه حرفيا ببقي مركز إشعاع نار وحرفيا بتدفي في ايدي وكل جسمي ومش عارف الاقي سبب لحد دلوقتي 

- الحنية الزيادة الي مش هينفع يتقال عنها غير كل خير بس يمكن دي اعظم منح ربنا ليا 

- الحب عندي حقيقي وقوي زي الموت

- بعرف ادفي واحضن كويس بشل الانسان هيلا بيلا كدا ويقعد  في حضني متقوقع كدا ويمكن عشان كدا اطفال كتير بتحبني 

- العصبية اللي بتنزل علي مفيش ، مهما اتعصبت بهدي بسرعه وكله بينزل علي الفاضي 

- الطيبة ، اني مبعرفش ءأذي حد 

- الصبر وقوة التحمل الزايدة ، بتحمل بلا نهاية دايما وبحاول اكمل في الشيء مهما كان فوق طاقتي او بيتعبني 

- بتأسف بسرعه اذا كنت صح او غلط لان طالما الحاجة زعلت اللي قدامي فأنا بعتذر للمحبة والمراضية والحنية ، مهما كان بعتذر عشان بحب بجد 

- الحب الصافي اللي تحسه طالع علي ضحكة حلوة كأنه قلب طفل صغير 

- بعمل مفاجآت صغيره وعبيطة بس مهما كانت صغيره بعرف افرح اللي قدامي 

- ضحكة حقيقية بتنور المكان وتنور قلوب اللي بحبهم 

- مخلص وملتزم بشكل تام تجاه اللي بحبهم 

- محاولاتي الكتير في اي حاجة وكل حاجة عشان انا مش بسيب حد بسهولة وبتمسك جامد ودي ميزة

- بحب بيتي وبحلم باولاد وبحلم وبتعب كل لحظة عشان اعيشهم احلي دنيا 

- بتكسف ودا بيحرقني وبيخليني مقدرش اقول حاجات كتير عشان مش عايز اوجع اللي قدامي 

- بحط نفسي مكان الناس وبتعاطف معاهم ودا بيخليني احس بالشخص بشكل تام

- براضي اللي قدامي مهما كان التمن ودا بيوديني في داهية بيخليني اوعد واقول حاجات تعب في تحقيقها 

- مش مزيف ، كل كروتي علي الترابيزة ، مبقولش حاجة غير الحق وبس مش بلاوع ولو غلط بتراجع زي ما قلنا 

- بقدر قيمة العمر والايام وبيبقي همي كله نعيش وقت حلو وكويس وسعيد مع اللي بحبهم 

- بعمل المستحيل عشان اللي بحبهم وبتعامل بالمحبة والفضل قبل العدل والحقوق ودا اكتشفت انه ميزة عظيمة بعد ما سمعت ياسر الحزيمي 

- عندي امل وبعرف اعمل بلان كويسة وبحققها مع الوقت بتوفيق ربنا 

- مشاعري حلوة وحقيقية

- خيالي واسع وبعرف اسعد اللي قدامي 

يمكن دي حاجات كتيتها عشان خاطر ابقي بيني وبين نفسي عارف اقدر اقدم ايه من ناحية الحب عشان لو تهت اعرف انا ايه الحلو اللي فيا ومخسروش مع الايام لاني بحاول بكل طاقتي افضل زي ما انا مسيبش الايام تغيرتي 

مش عارف اكتب عنها بحبها قد ايه ياما كتبت ولا عارف اقول وحشتني قد ايه ولا عارف حتي لو كنا سوا في يوم هوعد بايه او هقول ايه كله ملخبط لكن الحقيقة ان المحبة والشوق حقيقيين واني فعليا بحاول بكل ما فيا وبكل صفو نية

والله خير معين 

كله بأوانه

 كل حاجة في الدنيا لها وقت وأوان 

أتمني ان الوقت يكون جه وان الحال يتعدل 

اتمني يكون في فرص حقيقية 

اتمني يكون في أمل 

أتمني يعدي الوقت وأسمع أخبار حلوة 

أتمني اشوف واعيش وارسم مستقبل حلو ليها ومعاها 

اتمني يكون الحب كفاية  عشان الاحوال تنصلح وتتغير 

اتمني يكون الوقت مناسب لعيشة حلوة تستاهل 

اتمني وبدعي 

ويارب يجبر بخاطرنا ويراضينا 

يارب 

النية صافية والقلب راضي ومستعد ومستني وقادر ينور الكون كله بس لو ياخد الفرصة

اتمني ان نعيش سوا ونفرح سوا وانا هعمل كل حاجة حلوة

اتمني بعد ما غيرت كل حاجة وحشة اني ابقي كفايةواقدر اراضيها 

اتمني 

عارف يا كيمو

 هتفضل متوتر ومتعلق وقلقان وحيران 

اكيد مش زي زمان لما كان المرض بياكل في جسمك لكن برده هتفضل في نفس الحالة بدرجة ما 

هتفضل تفتكر حاجات حلوة وتحلم وتتمني الزمن يرجع وتتمني تغير حاجات كتير وتتمني تصلح وتحلم بانك وصلت لها وبان النور قريب وان الفرج قريب وهيفضل الامل ياكل في روحك

يوم بعد يوم 

هتنشر بوستات وتبين علامات وترفع بلوكات وتحط صور وتحاول تبين وتظهر عشان الشهر دا مهم بالنسبة لك وبتنور فيه وكله ذكريات حلوة ، هتفضل تحلم 

واحلامك بعيد عن ايدك 

تتمني باب مفتوح وتقعد تغرق في التفسيرات وتحاول تحاوط نفسك بهدايا وحاجات تجيبها وتجهزها لليوم الموعود 

هتجيب هدايا من دول تانية وتدور علي كل ما تتمناه وترتبهولها حتي نمط الحياة والعيشة ذات نفسه وتقعد تحط في افكار ازاي تراضيها وازاي تسعدها وازاي تبقي معاها وهتفضل تغير في نفسك وتبقي احسن واحسن واحسن وتقعد تتمني 

بس عارف انك برغم كل مجهوداتك دي لوحدك

برغم انك بتحلم بس مش طايل 

برغم انك نفسك في مليون حاجة وكلها ترضي ربنا بس هتفضل لوحدك

عارف ليه ؟

لان معادش في ايدك حاجة تعملها ، انت عملت كل حاجة تقدر تعملها ، اتصلت بكل الناس وحاولت توسط ناس وحاولت تسعد اللي قدامك بكل الانجازات والحاجات اللي تثبت انك خلاص مش هتجيب وجع او زعل تاني 

حاولت تظهر بكل شكل انك اتعلمت الدرس ، وانك غلطان ، وملناش دعوة مين غلط ومين صح يا كريم لكن لينا علاقة بالواقع

هتصحي من النوم هتلاقي في يوم العمر جري والسنين فاتت ، فات سنة ونص ، عايز ايه تاني ؟ قلبك لسه متعلق ؟ مش بايدك انا عارف بس هتيحي ايام تلاقي نفسك لوحدك كمان وكمان

ومهما بلغ محبتك وصدقك ورغبتك في انك تغير الحال وتصلح 

ممكن تفضل لوحدك

قابل المخاطرة؟ يبقي ربنا يهون عليك

لو هي دي الحياة فانا قابل 

وعارف كويس اوي ان ربنا كاتب عنده كل حاجة ومفيش حد بياخد حاجة مش بتاعته 

كله بأمر الله

ونعم بالله ربنا يهون عليك ويسعدك ويرضي قلبك وينور بصيرتها ويهديها ويجمعكم علي خير يارب 

تصبحوا علي خير 

بالرضا

 نعمة… رضاك علينا نعمة

اي حاجة بالرضا حلوة

كل حاجة في ايدي عملتها، ولو كان في ايدي حاجة تتعمل كنت عملتها

بس من كتر ما سعيت وبذلت مجهود في الطريق فالموضوع معادش في حاجة تانية تتعمل 

كل حاجة دلوقتي في إيد ربنا 

مقلب القلوب بين يديه

وكل ما هو متروك لله مضمون

ياريت كان في طريق او وسيلة او حاجة

ياريت الشهر دا بكل ذكرياته وايامنا الحلوة فيه بيمثل اي حاجة او يقدر يغير اي حاجة

كله في ايد ربنا 

ونعم بالله

تعبت من كتر ما لمحت وقلت ولو صعبة عليكي السكة شاوري لي وانا اجيلك

وتعبت من كتر الانتظار والمفيش 

وتعبت من كتر ما سعيت وحاولت

كله في ايد ربنا دلوقتي 

TAM

 متسألنيش مفيش أسرار 

خروج الدم لو يفدي 

في صفك يلا صفيني 

دا صوتي عبال ما يوصلك 

أكون بالموت طلع ديني 

بحبك غير جميع الناس 

ودا تقرير عليه سري 

متستاهليش يموتوا الناس 

عشانك وانتي بتسيبي 

* من ديوان العشق السادي لأحمد العايدي

***

- بتحبها ؟

= أكتر من روحي وأكتر من بنتي 

- والدنيا ؟ 

= متسواش 

- والناس وكلامهم ؟

= يولعوا بجاز , كل واحد هيروح بيته آخر اليوم وهنفضل لوحدنا وكل واحد هينصح من وجهة نظره لكن الصح ميعرفوش والخير بتاع ربنا وفي ايده ربنا مبيعملش حاجة وحشة

- وروحك؟

= روحي سكناها لحد آخر العمر 

- نسيتها ؟

= منسيتهاش 

- الحق نفسك هتموتك 

= وليكن، مش فارق الروح بأمر الله

- تسامح وتنسي ؟ 

= اسامح وانسي لنفسي الاول وبعدين هي كدا كدا فداها عيوني اسامحها وانسي لي اي حاجة

- غفرت ؟

= بلا حدود وبدون قيود 

- هي تستاهل ؟

= في عيوني ، خدوا عيني شوفوا بيها 

- هتكسرك 

= بأمر الله كل شيء 

- يابني عيش ، والله هتعيش 

= عايش وخفيت وبقيت أحسن نفسيا وجسديا وبكل شكل ، وشغل وحياة وكل حاجة بقيت سوبر كريم والحمد لله

- خد قرار 

= واخد قرارات لنفسي في حياتي بسبس مش هتحرك في اتجاه يأذيني 

- روح لها 

= اديها روحي والله بس الباب مقفول  في وشي 

- وابوابك ؟

= فاتحلها كل الابواب ولو صعبة عليكي السكة شاوري لي وانا اجيلك

- خلاص خليك في حالك

= اوريدي في حالي 

- حبيت قبلها او بعدها ؟

= عمري والله من اول لحظة عرفت وشفت حياتي بالكامل معاها وشوفتها تاني من كام يوم

- الحل ؟

= بإيد ربنا انا مش في ايدي حاجة تتعمل عملت كل حاجة 

- عايز ايه ؟ 

= نعيش وننبسط بالحياة

- لسه نفسك في اطفال ؟

= نفسي اوي اوي اوي واكتر من اول يوم 

- مش خايف ؟

= متأكد ان كل واحد اتعلم وهيراعي ربنا فيهم ويحافظ عليهم 

-كريم انت كويس 

= جدا

يتبع لاحقا

احلام سعيدة

 ❤️💃🏼💃🏼🌹

في رحاب ال

عزيزتي 

بعد التحية …

تنتهي الأجازة سريعا، لم يبقي منها شيئاً ويناير مازال حاضراً ، هنالك الكثير من الأشياء العالقة ، حققت كل الأهداف المنشودة علي بعض المستويات ، اليوم أعود من جديد إلي صالة التدريب ، أنفض غبار الكسل والتعب ، أمارس هوايتي المفضلة في الإنصات إلي عقلي وخيالاتي وأفكار كثيرة تعدو في مخيلتي ، لا أبحث عن اليقين كما أخبرني البعض ببحثهم عنه، ولا أبحث عن الحقيقة لأني أشعر بها ها هنا بين ثنيات عقلي ، ولا أريد شيئاً ، لا أدري حقاً متي تخليت عن كل شيء ، عن كل الأحلام والأموال والطموحات ، لا شيء يبدو ذات قيمة في عيني اليوم ، ربما هو الطقس السيء أو ربما هي عادتي في الحياة بالتخلي عن الأشياء وقت المرض والألم ، هنالك الكثير من الأشياء اللي تدور في مخيلتي ، ليست طموحات ولا أحلام فكما ذكرت هي المخيلة فكلها خيالات باهتة ، لا أدري هل عشت ما مضي حقا ، هل مرت علي كل تلك الأحداث ؟ هل تعبت لهذه الدرجة ، أظن أن هذا ما يجعلني رائعاً ومناسباً لمستقبل سعيد ، هو التخلي عن الذكريات السيئة والعدو نحو المستقبل ، اليوم أعدو ولا أعلم إلي أين يكون العدو وأين الهدف وأين حتي الطريق ، كمن يعدو في الظلام باحثا عن أشياء لا يعرف مكانها ، تنتابني الآلام كثيراً ، فراق الكثيرين والوحدة وحديث الحمقي من الناس من خلف ظهري و غباء الآخرين وحقد البعض و أشياء لا أدري هدفها سوي أنهم جميعا يعانون من الفراغ ، اليوم أعدو نحو المستقبل ، يناير ينادي علي قلبي كالعادة ويفتح أبواب لم أحلم بطرقها يوما ما، أنا سعيد يا عزيزتي بالروتين والحياة البسيطة وبالأسفار والعائلة، لا ينغص بالي خيانة بعض الأصدقاء ولا حتي حماقتك أنت شخصياً ، لا ينغص بالي الزمن ولا أي شيء طمحت إليه ولم أناله، اليوم ياعزيزتي برغم تخبطي إلا إني سأكون في قمة سعادتي بالروتين البسيط الذي أحلم به، الحمد لله رب العالمين علي هذا الهدوء ، حياة بلا رفيق ولا ونش ، فقط خيالات والوحدة تؤنس روحي ، حتي لم أعد أتذكر أحلامي ،لعله خير بل هو الخير ، وختاما لا أطمح سوي في السلام والهدوء والراحة بلا منغصات 

دمتي ودامت أيامك

كريم

عدي اليوم

 الحمد لله كان احلي عريس في الدنيا والدهب كان حلو والميعاد ظبط وانا طايرله وفرحان من السعاده وعملت كل اللي اقدر عليه وزياده لكن مفيش مكالمات فيديو ولا حد فرجني ولا فرحني ولا اي حاجة تقريبا انا في اخر العالم بعيد عن كل حاجة ، مش مهم انا مش ليلتي ولا قصتي ولكن يناير بيجيب حاجات حلوة ، يمكن في يوم ما او لحظة ما ينتهي السنجلة بتاعتي دي يمكن السعادة والفرحة والونس والبيت ينتظرني في مكان ما يمكن اتبسط يوما ما يمكن افرح يمكن يكون لي مركبة وحضن وصبيه يوما ما ، يمكن يبقي في فتحة خير وسعاده تفرح قلبي يمكن انبسط يوما ما ، صحيح رتبت لليوم دا كتير وساعدت وعملت كل اللي في طاقتي يمكن يكون لي وليف يمكن في حد يونسني يمكن احقق حلمي في يوم يمكن ويمكن ويمكن مين عارف لكن النهارده مش عني ولا يخصني النهارده يوم عريس كان زي القمر منور ومبسوط وفرحان وسعيد ودا عندي بالدنيا والف دنيا 

عقبال يومي 

عقبال ما تخلص حالة السنجلة دي ، يمكن في يوم القي البر والبيت والعيله والونس ، يمكن في يوم يطلع من عتمتي قمر يمكن في يوم حد يفهمني يمكن في يوم ارتاح يمكن ابطل اعيش في خيالي يمكن ابطل اعيش لوحدي يمكن في يوم الاقي اللي بحلم بيه وبتمناه وعندي استعداد ابيع روحي عشانه 

يمكن 

بس اليوم عدي وخلص ومكنتش موجود باي شكل ولا حتي حد اهتم اني ابقي موجود للدرجة دي بقيت غريب 

مش مهم 

المهم انه مبسوط وفرحان وسعيد ودا بالدنيا 

ليلتك حلوة يا كيمو بدون دموع وبدون وجع او تعب 

ليلتك حلوة زي قلبك الطيب وعيونك 

من بلاد غريبة

 الطريق للخروج والسفر لبلد تانية علي قد ما هوا شاق بس ممتع بصراحة واتبسطت بكل لحظة في الطريق ، وقاعد بسمع اغلني واشحن الباور عشان لسه الطريق طويل ، تجربة حلوة واكيد هفضل اتدلع كل اسبوع كدا الموضوعرلذيذ اوي ، اكتشاف حياه تانية ودنيا تانيه احلي بكتير  ، ياتري فعلا في حياة جديدة تنتظرني في مكان ما وكل حاجة فيها زي احلامي جميلة وطعمها حلو ؟مش عارف لسه لسه يناير مقاليش حاجة بس انا مبسوط ويمكن بعد سفرية راس السنة اشكر ربنا واحمده علي كل النعم دي ، تقريبا مكانش في فترة في حياتي فيها حاجات حلوة واستقرار للدرجة دي غير الفترة دي ، بحقق كل حاجة ومستمتع بالطريق ، اينعم احيانا بييجي حد اهبل يدايقني بس الحمد لله اجتسبت مناعة وبقيت اقوي مليون مرة ويناير هيجيب الخباصة ومسيره يخلص وتنقفل شبابيك الشتا والفرحة ونرجع تاني للنمط العادي بتاعنا ، وبرده في النمط دا اتعلمت ازاي افرح وابسط قلبي بكل بساطة 

كرم ربنا ملوش حدود 

هروح اكمل رحلتي بين البلاد بقي 

بيس 

Sweet kiss 

احكي لي حدوتة

 - كريم 

* احكي لي حدوتة 

- ياه عيوني بس كدا

* بس مؤدبة مش قبيحة

- ماشي ينفع برده بس هتدفعي ؟

* لعينيك هدفع

- اذا كان كدا ماشي 

###

كان ياما كان وما يحلي الكلام الا بذكر النبي عليه الصلاة والسلام ، كان في ملك بيحكم مملكة ، علي مد البصر ، وكان كل  يوم يخرج يفتح بلاد جديدة بسيفه وقوته وعزيمته بدون جيوش ، كان مشهور في الحرب والقتال وبيتضرب بيه المثل ما طبعا هوا قدر يوحد ممالك كتير بضربة سيفه  ورمحه وقدر يسافر لاقصي الغرب والشرق ويسيطر بدون معارضة علي بلاد كتير ومحدش اتظلم من سيفه او اتقتل غدر ، الملك كان بيحارب بشرف وكرامة و نزاهة ، لاعمره ظلم حد ولا عمره افتري ، كان بيدخل البلاد ويعلن نفسه حاكم ويسلم له اهل البلد الهدايا مقابل فرضه العدل والرحمة والحماية ، وكان عنده كنوز في كل مكان وكان بيشتهر بانه مبيخافش من إنس أو جان وبيحارب لحد آخر نفس ، قرب من الموت كتير ومتأسرش أبدا ولا عينه انكسرت أبدا 

- وبعدين 

وفي ليلة من الليالي بيخرج الملك علي حصانه بعد استلامه رسالة من بنت فقيرة وغلبانه  بتطلب منه ينقذها وتسترجي حكمته وعطفه ومحبته وقوته ولان الملك كان يتيم وبلا اولاد ومفيش في حياته حب او حنان ، سافر لاخر المملكة وعلي حدود ارض السحر اللي عمره ما حارب فيها وقابل البنت الفقيرة ، كانت جميلة لابسه فيتان اسود ولسه في بداية الشباب وسحر عينيها ياما وقع ممالك وخرب بلاد ولكنها بتركع قدامه وتطلب منه زي ما قلنا الحماية والحكمة والأمان ، بيرفعها من علي الارض ويحارب عشانها كل الاراضي المحاوطة لارض السحر ويمنحها من حكمته وقوته بدون حساب لكن بعد يوم واتنين وتلاته في ارض المعركة كانت البنت هي ملاذ المحبة والامان وبيحبها الملك وبيقع في غرامها وبيحلف لها بشرفه وسيفه ورمحه ان محدش يدخل قلبه غيرها وبيطلب ايدها وهي بتوافق ولكن بشرط تشرب من ايده  المجروحة شربة ميه مخلوطة بالدم وبيوافق الملك عشان كان قلبه اتعلق بيها وبيشرب من ايدها كمان وبيتعلق روحه بيها وبتسكن فيها ويتجوزها وتسافر معاه لاخر البلاد لقلب قلعته وقصره ومملكته وبيعملها ما اتعمل لحبيبة او عشيقة او زوجة قبل كدا من الانس او الجان ، بيسخر لها عبيد و ارض الشمس نورها بيطلع عليها في ايام وايام ويمنحها من كنوز الفترحات لكن الاميرة بعد اول شهر بتطلب منه طلب  غريب انه يسافر ويحارب وميبطلش فتوحات وبتحلف انها هتراعي المحبة وتصون القصر والبيت والمملكة ، بيكون الملك اصلا تعب من كتر السفريات لكن بيسافر وبيرجع لها منصور وفي المره دي بيجيبلها هدايا من الولي والياقوت ويركع قمها والدم مغرق ايديه وكل جسمه من المعارك والفتوحات وبيطلب منها وقت راحة وبتستجيب وتطلب تشرب من كفة ايده التانية نفس شربة الميه المخلوطة بالدم 

بيوافق الملك وتشرب الملكة من ايده ويعيش جنبها في تبات ونبات لكنها بيلاحظ قوتها بتزيد علي شعبه ومملكته ومش مهتمة بانها تجيبله وريث يحكم من بعده ولا مهتمه براحته ، بيزعل الملك ويتقهر ويفكر يطلع همه في الفتوحات لكن للاسف قوته بتكون خارت وصحته بتكون ضعفت بسبب وبدون سبب ومعادش قادر يحارب ، وبيخسر الملك مع الايام محبة الشعب وقال ايه بيتقدم للملكة فرسان وعرسان وهي لسه زوجته وهوا مقهور لانه اصبح صوره بدون كيان  وبتظل الملكة مسيطره علي الشعب والبلاد وبعدها بيخسر كل ملكه قدامها ويبقي مجرد صوره وبيطلب منها كل شيء وهي قاسية وجبارة عليه ودا بيحز في نفسيته ويقهره ، معقوله كل دا كان عشان الملك ؟ عشان العظمة والقوة والامتلاك ، بيقعد يبكي الملك لكنه بيصحي الصبح يقرر يهجر الملكة ويبعد عن المملكة ويرجع يعيش يتيم في الكهوف بدون شعب او صحاب او وزراء او حتي انسان ، بتبصله الملكة وتلعنه بلعنه الدم وتقوله عمرك ما هتنسي ولا تقدر ترتاح وهتعيش لوحدك في كهفك ومفيش من بعدي نجاح ولا فلاح وهتلعن اللحظة اللي ركبت فيها وسافرتلي وقابلتني وشربت من ايدي ، وفي لحظة اللعن بتههجره الملكة وبتامر الحرس يطردوه ويبينكسر سيف الملك وبياخد بقاياه ويروح يعيش في الكهف وفي ليلة اللعن بيلاقي الملك نفسه متكبل بحديد في كل ايد  وسيفه المكسور مرمي قدامه علي الارض وفي غريشة حديد في كل ايد تقيله ما يقدر يرفع الملك ايده ويتحرك بسببها 

بتضعف صحته وقوته وبيهجره الكون كله ، لحد ما ربنا بيبعتله طاقه نور متمثله في حكيم بيقوله ان الملكة ساحرة وان اتملكتها شهوة الامتلاك وانه عشان يشفيها لازم يرجع قوي زي الاول ويحارب ويفتح بلاد وان ضعفه مش من سحرها ولكن هي مريضة زيه بالظبط ولازم يتعالج ويحارب ويقدر ينقذها من المرض ولعنه الدم والقسوة هي كمان وان الفرسان حواليها سمموها وتعبوا صحتها وعقلها وصارت مجرد سيره علي كل لسان ومعادش فيها قوة لا تحكم ولا تبني بيت ولا ملك وان الدوا هيكون في ايده وقت ما يسترد قوته ، وبتختفي طاقة النور والحكيم

بيقعد الملك يفكر في كلام الحكيم وانه لازم ينقذ نفسه وملكته وانه خلاص معادش له غير نفسه وبعدها يمنحها من قوته ، وبالتالي بقي يتدرب الملك كل يوم ويخرج بقطعتين السيف يحارب وينهزم لحد ما ربنا كرمه ويقدر يلاقي حد يلحمله السيف ولكن بيطلب منه جزء من روحه وبيوافق الملك وبيدفع بقلب راضي ويكمل حربه ويكسب في كل معاركه ويعود لمملكته رافع الرايات بنفسه ويستقبله الفرسان يدبحهم علي خيانتهم وعلي جرحهم للملكة ويمشي لحد باب القصر ويكسره برجليه ويدخل علي الملكة اللي بتكون ضعفت ووهنت قوتها ويقولها انها وحشته وانها نوره وناره وجنته وانه هيساعدها تتشفي ، بتعاند الملكة ومبتصدقش انها مريضة لحد ما يمسك الملك ايدها ويبوسها ويصب عليها ميه ودم وساعتها بينور وش الملكة وترجع سنين في العمر وينور قلبها وروحها وتحضنه وتوعده ما تجرحه تاني ابدا ولا تبعده ولا تهجره ولا تزعله وبيوعدها الملك ان قلبه دايما ملكها وروحه ومملكته وعمره كله وبيعيشوا في تبات ونبات ويخلفوا صبيان وبنات لاخر الزمان في سعادة وهنا 

خلصت الحدوته ، حلوة ولا ملتوته ؟

* والله انا بحبك 

- يارب ينور قلبك ويخليكي ليا

الطريق والهدف

 لا الطريق باين ولا الهدف واضح

الله أعلي وأعلم

يناير

 يناير ✅

الدهب ✅

الميعاد ✅

الترتيبات ✅

يارب يملي الحياة فرح وهنا ويعديها علي خير 

في يناير بتحصل كل حاجة حلوة 

يارب راضي قلبي وراضيني 

والحمد لله رب العالمين