خير وبركات

بعد كل المحن  والأزمات بنخرج صاحيين فايقين 

بعد كل المعارك 

القضايا 

المشاكل 

بعد كل الشقا

وبعد كل السنين 

بعد كل حاجة 

بييجي يافطة النهاية

المشوار كان طويل 

مشوار الجنسية كان طويل بس خلص 

مشوار مشاكل الطلاق كان طويل بس خلص 

مشوار التعب والمرض كان طويل بس خلص 

مشوار الديون كان طويل بس خلص 

مشوار الحلم والحاجة اللي كان نفسي فيها كان طويل بس برده خلص 

كل المشاوير كانت متعبه وطويلة بس خلصت 

الموضوع كان طويل للدرجة اللي خلت الواحد يفقد الامل في كل حاجة إلا في أهدافه وأحلامه 

مشوار الجري والمراقبة والملاحظة ومحاولة الوصول لها كان طويل بس خلص 

مشوار الشوق والمحبة والمحن والضعف والخوف والقلق كان طويل بس برده خلص 

كل حاجة خلصت

بنحضن يافطة النهاية 

بنقف نبص علي المستقبل

بتفوق 

بن move on 

بنقف نختار ب راس مرفوعه

بنقف قدام نفسنا راضيين 

اننا عملنا كل حاجة بكل شكل وبكل طريقة وخبطنا كل الابواب ومتبقاش حاجة

مش هقدر ألوم نفسي ولا اندم بعد النهارده 

مش هقدر اقول كان في ايدي كذا يتعمل 

مش هقدر اقول لنفسي انت الغلطان 

مش هقدر اشيل الذنب تاني 

هاخد حريتي واختار بكل شكل وبكل طريقة ممكنه كل ما اتمناه 

نقول الحمد لله 

ونمشي في طريق الخلاص

علي خيرة الله 

نبتدي حياة جديدة بكل شكل

شغل

سفر 

راحة بال

متع بكل اشكالها

كل حاجة

بحث عن فتاة الاحلام

كل الرسميات والغير رسميات

وأوعد نفسي اعيش وابص قدامي وكفايه متابعة وبص ورايا 

والحمد لله رب العالمين

الحمد لله كمان مرة

 وَلَقَدْ أَوْحَيْنَا إِلَىٰ مُوسَىٰ أَنْ أَسْرِ بِعِبَادِي فَاضْرِبْ لَهُمْ طَرِيقًا فِي الْبَحْرِ يَبَسًا لَّا تَخَافُ دَرَكًا وَلَا تَخْشَىٰ 

الحمد لله رب العالمين

فضل ربنا واسع يارب يتمها علي خير دايما 

٨ سنين

الحمد لله

0

 بتاريخ ٢٦-٨ 

سجل فات عشرين سنة 

بقيت حر 

بقيت أنا

الحمد لله رب العالمين

ولسه

احلامي تصلب لي ضهري 

-1

 عن الخيط الاخير اللي بقطعه

عن الامل في حياة جديدة

عن الأرق من شدة الشوق لبكره 

عن الأصل الطيب والمباديء والخلق 

عن التكوين

عن كريم 

-2

 عن اليأس والإحباط

عن المعافرة

عن التحدي لكل الظروف 

عن السفر لبلاد بعيدة

عن البلاد اللي عديناها

عن التعب اللي تعبته

عن السهر وقلة النوم

عن الدموع 

عن القهر والفشخ

عن الشكوي اللي مطلعتش

عن الإرهاق المبالغ فيه

عن التعب والمرض والدوا

عن الحاجات اللي عملناها في السر 

وعن الحاجات اللي عملناها في العلن

عن المصايب التي لا تنتهي

عن الانتقام اللي حصل فينا

عن اللي ضاع

عن كل حاجة حلوة شفناها 

عن الصحبة والصحاب 

والفجر في الخصومة 

والغدر 

عن الصبر علي البلاء 

عن الجري ليل نهار 

عن تحقيق اي حاجة صعبه ودفع تمنها سهر ودم ويأس وقلة قيمة

عن كل حاجة سلبية

عن كل حاجة ايجابيه

عن الهجر 

عن الفراق 

عن الشوق اللي بيحرق الجسم زي سم بيجري فيه

عن الحنين

عن السكر وطعم السكر 

عن الحنية

عن الفرص اللي ربنا بعتهالنا عشان نعيش من جديد 

عن الحلوة اللي هشوفها

عن رفاق الدرب 

عن الحب 

والزعل 

والفرح

عن كل حاجة من دي 

عن كل يوم عشناها في الغربة

عن كل يوم عشناه في تعب وبذلنا فيه كل مجهود 

عن اللي حققناه وضاع

عن الدعاء

عن الامل 

عني

عن كريم

-3

 -3

عن الإبن التالت 

عن الغربة في الصغر 

والحياة اللي دايما بنبنيها من الصفر 

عن المشاكس

بتاع المشاكل 

المغامر 

الطموح 

اللي مش بيهمه حاجة 

عن العنيد 

عن اللي بيحب البنات

والبنات بتحبه

عن الشقي 

اللي بيضيع شنطته وشرابه لو لزم الامر في المدرسة

عن المفكر 

الحالم

الطموح 

اللي شايل مليون حكاية 

اللي بيحب القصص 

وبيحكي حواديت

عن اللي مش بيبطل محاولة 

عن اللي مش بييأس أبدا

عن اللي عنده جيوش جوا نفسه

عن الشرس 

القوي 

الضغيف

المربوط بالحنين والعاطفة 

عن اللي لف الدنيا ومخافش

عن اللي غامر بكل حاجة عشان صدق 

عن اللي بيحول أحلامه لحقائق 

عن اللي مش بيبطل سعي 

عن صاحب المخططات 

والعقل الرهيب 

والأفكار المجنونة

صاحب القلب والحب والحقيقة

عن الإنسان اللي ضحي بكل حاجة 

وغامر بكل حاجة 

وانتصر

عن كريم

وبس

سجل ، عشرين سنة

 سجل ، عشرين سنة

امبارح والنهارده

 التلات ايام اللي فاتوا كانوا ذروة المعارك

ايميلات مكالمات رايح جاي اربع جبهات مفتوحة في نفس الوقت

استني كدا … خمسة

كل اتجاه فيهم بياخد حاجة 

بياخد حته من التركيز 

سوري 

سته مش خمسة

كل دا ورا بعضه 

قابلت فيهم التعنت والمشاكل والضغط والتوتر وكل حاجة 

واخيراً خلصوا النهارده الساعه اربعه ونص مع آخر ايميل 

مكانش في اي معلومة مفيدة 

بس الحمد لله 

وصلنا لنقطة مهمة 

مينفعش الايام دي متتسجلش هنا 

مينفعش منقولش حاجة عنهم 

أنا عديت بالايام دي 

فخور بنفسي جدا في وسط ست جبهات يحارب وينقذ وبأدي وباعلي مستوي 

النهارده كان يوم مهم

يارب يتم كل حاجة علي خير يارب 

الحمد لله

انتهي تسجيل الحدث 

مبقتش

 في مشكلة بسيطة للأسف وهي أن الحياة بقت ضيقة اوي عليا

مش عارف بس مبقتش حاسس نفسي هنا 

كل ليلة بحلم باني مهاجر لبلد تانية وعايش هناك بعيد عن كل دا 

كل ليلة بحلم نفس الحلم بشكل مختلف 

مش عارف 

بس الحياة هنا مبقتش علي مقاسي 

الحياة هنا بقت مختلة ومقرفة 

وبصراحة كدا متنفعش

بفكر في حياة وعالم جديد 

في آخر الدنيا هناك عند الشمس 

بصراحة كدا بفكر في اني انهي المأساة دي 

هوا أنا جيت هنا ليه ؟ 

عايش ليه ؟ 

النهارده دخلت في نقاش قوي وقت طويل دايقني جدا 

أنا مش مستعد لاي حاجة حاليا

ولا عايز امشي في اي اتجاه

عايز اغمض عيوني وانام يمكن 

ويمكن عايز اعيش 

معرفش 

النهارده كان يوم طويل اوي اوي اوي 

مش عارف اقول ايه تاني 

بس دي مش حياتي 

ليلة العيد

 متعود كل عيد اكتب بوست كله حب وغرام ورومانسية اسمه ليلة العيد يا حبيبتي 

السنة دي مفيش غير ليلة العيد يا كيمو 

ربنا انعم عليا كتير اوي الشهر دا والسنة دي 

امان وشفا وطمأنينة و راحة بال و نجاح و سلام نفسي 

كل حاجة حلمت بيها وطلبتها من ربنا حققهالي حتي الفرصة في حياة مستقرة هادية

أنا يارب بشكرك كل انك فرقتني من أوهامي 

بشكرك علي انك بردت نار قلبي 

بشكرك علي انك سندتني وساعدتني 

بشكرك علي انك دايما في ضهري حتي في اسوا الاوقات

بشكرك علي التراويح 

وعلي الصحاب والونس 

وعلي الدفا 

والفرص 

و الفلوس والنعمة 

والخير اللي غرقان فيه

وراحة البال 

والمليون باب المفتوح قدامي 

بشكرك علي كل حاجة وبحمدك من كل قلبي 

كل عيد وانا طيب وحبايبي بخير وطيبين

وان شاء الله العيد الجاي اكون حققت احلامي ونجحت في وظايفي ومشاريعي وحققت كل ما يتمناه

بشكرك يارب لك كل الحمد والله بكل شكل 

ليلة العيد يا كيمو 

هانت وبكره يكون في بيت وأولاد 

وحتي لو مفيش 

كفاية ونسك يارب 

نهاية المعارك

 معدتش عايز احارب تاني عشان خاطر حد ولا حتي حب قديم أنا ذات نفسي معدتش فاكر تفاصيله وحياة راحت أنا ذات نفسي ( وانا يعتبر نفسي من الناس اللي ذاكرتها قوية ) بطلت ونسيتها 

معادش عندي استعداد احارب شياطين جوا دماغ بنت حبيتها ولا مخاوف ووحوش في ذهنها ولا حتي قناعات وهمية بيقنعها بيها الناس انها علي حق او حتي لها حق برغم انها اتنازلت عن الحق وحتي لو هتاخده فهتاخده زي ما انكتب مش زي ما هي عايزه وعلي كيفها عشان تحقق الانتقام 

معادش عندي استعداد اخش في معارك ومكالمات و رسايل مع اشخاص بتكذب وتزور عشان خاطر شوية ورق ملون ملوش لزمة حتي مش هيكون موجود في جهنم عشان يولع فيهم ويعذبهم ويطهرهم من ذنوبهم اللي ربنا وحده بس اعلم بيها 

معادش عندي رغبة اجمع اخبار او اتابع او اقرا او حتي ابعت رسايل او مراسيل لاي شخص ولو حتي بنت حبيتها في يوم وعليت بيها وعملت المستحيل عشان خاطرها وبرده اتنست في دوامة الحياة والمرض 

معادش عندي استعداد حتي ارد علي حد او حتي استقبل رسايل او اقتراحات او عروض او حتي تفاوض باي شكل في قصص منتهية ومواضيع ميته وبفتكر كلام حد حكيم في مره قالي ( متقلبش في اللي مات عشان هتبقي ريحته عفنت زي القبر وهتلاقي ما يصدمك كأنك بتفتح قبر وتخرج جثة ميت وتقعد معاه ) وفعلا عنده حق 

مبقاش عندي استعداد ولا حتي رغبة في محامين ولا تفاوض ولا اهل ولا قرايب ولا حتي مكان لحد ييجي يقول معلش او حتي يقول مكانش قصدي او حتي يلعب بيا عشان تحقيق اطماع ومصالح شخصية وعشان شوية مكاسب ملهاش في عيني قيمة زي نزولي مصر اللي اخيرا استريحت منه ومبقتش مجبر عليه وبقي عندي عذر اقوله لاهلي عشان محدش يقولي انزل 

مبقاش عندي استعداد اتداري واهرب من القسوة  والقوة اللي جوايا باني اجري واستغل ضعفي بحجة ( ان ضعفي ومشاعري هي اللي بتخليني إنسان ولو مش هسيب نفسي امال هعيش حياتي جماد ؟ ) حتي دا مبقتش عايزه بقيت عايز اخد قسوتي وقوتي بالحضن وابطل افتكر وابطل اخزن صور عشان عمري ما هقعد مع حد افرجه علي الصور ونضحك علي الايام دي ، بقيت مش عايز غير اني اعيش نفسي الحقيقة مش الكذبة الهبلة بتاع الضعف والحب المستحيل لانها مش حقيقية وكان بايدي اخرج نفسي من السجن دا من بدري اوي لكن تكلفة الفرصة الضايعة وكلمة ( او ) وقصة الحب اللي وهمت نفسي بيها انها أسطورية هي اللي منعتني 

اوقات بقعد اقول لنفسي أنا ضيعت الوقت دا كله مستني مين ؟ مستني حد قاسي عليا ؟ حد مصمم يكسرني ويفضحني وياذيني ؟ حد مينفعش يكون امان او حتي اديله الامان علي اي حاجة في حياتي ولا اسرة ولا تربية ولا اولاد ؟ ضيعت دا كله من وقت ليه ؟ يمكن عشان الاكتئاب والمرض ويمكن عشان كنت دايما فاكر ومستني الرفقة اللي تكمل الدرب معايا وخايف من الوحدة وبتقطع منها 

لكن دلوقتي أنا عندي القوة والقسوة والشجاعه اني اعيش 

بدون كل دا بدون كل الحاجات اللي معنديش استعداد ليها 

اخيرا نقدر نقول اني فقت ووعيت وعرفت الاول والاخر 

وبقيت نفسي 

وبس خلاص 

المهم بقي استنضف في اللي جاي 

بس خلاص 

ليلة

 كل الكلام عن ليلة القدر بصدقه لكني عمري ما توقعت اني أطولها واني بكل بساطة ربنا يستجيب دعايا

أنا شكلي دعايا تم استجابته والله

في اختلاف 

في حاجة أسطورية حصلت

في معجزة حصلت

مكنتش متخيل في يوم انها تحصل او تجري باي شكل 

أنا شكل دعايا ربنا استجابه

أنا والله لو مطلعتش من رمضان او من التلات سنين غير بالدعوة دي

فانا واقسم بالله راضي يارب 

والله يارب أنا راضي 

انك تشوف المستحيل وتحسه وتلاقيه بيحصل 

واقسم بالله أنا راضي بالدعوة دي جدا حتي لو مجاش غيرها 

ربنا يستجيب بقية دعايا 

وينور طريقي وبصيرتي وقلبي وعقلي 

والله يارب أنا مبسوط

الف حمد وشكر لك يارب 

لقوا العروسة

 كل يوم بيعدي ورايا ميت حاجة تشغلني وبكلم اهلي قليل ومش عارف بيجري ايه من ورايا ، خلينا نتكلم في المهم بدل ما نقعد نحكي في المفيش 

أنا مشغول بترتيب ظروف المشروع الجديد والدنيا كلها فوق دماغي بعمل صداقات وعلاقات وبرتب الدنيا بكل شكل وفي نفس الوقت مستني ورق كتير يخلص ومش فاضي 

هما بقي بسم الله ما شاء الله لقوا بدل العروسة تلاته واستقروا علي واحدة من العيلة 

في البداية قلت مش مهم ومش فارق ومش في دماغي وسيبهم يلعبوا لاني الجواز مش في اولوياتي ولا حتي الحرام هعمله ولا الحلال وحرفيا مليش مزاج ولا دماغ 

لكن كانوا وروني البنت من فترة وزاروها من كام يوم في وفد حلو بحجة عبيطة وشافوها و اطمنوا لكني طبعا مش فارق عندي ولا في دماغي 

لكني فكرت ماذا لو كل العيوب اللي شايفها زي فرق السن مثلا ميزة بنت اصغر منك باكتر من عشر سنين وحافظة القران وهادية وملتزمة وفاني جدا وتفتح النفس علي الحياة وصحبتها حلوة 

وفي كدا من دمي 

ماذا لو حصل واتجوزتها وجبتها في خلال كام يوم بكل سهولة وخصوصا ان وضعي بقي يسمح بدا و ليا ابن خالة اتجوز بنفس الطريقة وعايش مرتاح 

الفكرة انك بتدخل لمجال اكبر منك مليون مرة ولاول مرة هيبقي كل حاجة واضحة من اول ثانية لان الوضوح هوا الجرأة الأقدس والاهم زي ما بيقولوا 

ماذا لو اتجوزتها ؟ وجبتنا وعشنا سوا واديتها وقت ومساحة وطاقة ومجهود تحبني قبل ما يكون في بيننا اي حاجة 

ماذا لو عاملتها بفترة خطوبة تلات شهور لما تيجي ؟ 

ماذا لو اتجوزتها وخلفت وبقي عندي أطفال زي ما بتمني جنب مشروعي اللطيف 

ماذا لو كل حاجة مشيت بالمظبوط وخصوصا انها عارفة ربنا وحرفيا تربية العيلة 

ماذا لو 

كل ذا جه في بالي امبارح بعد ما خلصت التراويح 

ايه اللي هيحصل ما عادي هيكون عندي بيت واسرة ودفا وعيلة 

ماذا لو 

أنا مليش نفس للجواز لكن إن حد يكون ونسك في الغربة ويكون من دمك ويخاف عليك ويحبك بصدق اكيد هتفرق 

أنا راكن كل حاجة علي جنب ومش مهتم 

حتي لو من قرايب القرايب ومن العيلة وبنت خالي ولو 

أنا راكن كل حاجة لاني معنديش طاقة غير علي قد مستقبلي ومشروعي دلوقتي 

أنا مبسوط بنفسي ومستريح وعايش حياتي مطمن وبالي مرتاح 

مبقاش في نوبات فزع ولا قلق ولا توتر ولا حتي خوف ولا اي حاجة 

ومفيش حاجة في الدنيا بقت بتاثر فيا لاني عامل حسابي دايما لاسوا سيناريو 

وبعمل اللي يرضي ربنا بكل شكل ويمشي حرفيا بما يرضي ربنا 

ياتري ربنا هيعوضني فيها ؟

مش عارف بصراحة 

مش شاغل بالي دلوقتي غير اني اعيش 

حتي لو هما ماشيين في الموضوع وانا مطنش ومش حتي باخد اي رياكشن 

يهمني اكمل في طريقي 

وساعتها وانا ماشي اكيد هييجي يوم قريب ربنا هيسهل فيه الحال واقدر اخذ الخطوة دي وحتي لو تجاهها فانا عندي كتير جدا جدا امنحه وعارف بقدم ايه كويس جدا 

الحمد لله علي راحة البال ويارب يكملها بالستر 

كل حاجة هتبقي وقتها برغم الرغي كتير عن اوعي تضيع الفرصة وشوف حياتك وشوف نفسك وانبسط حتي لو ملكش نفس وجرب ولو زهقت في مليون حل عالاقل هيكون في زوجة واطفال وبيت وونس 

ربنا يجعله خير 

أنا محتاج انام عشان سفرية ربنا 

ربنا يجعله كله خير 

في الاخر الرضا والسكينه اهم من اي حاجة وكل خطوة ربنا كاتبهالي هتيجي علي مهلها 

سويت دريمز يا كيمو  

معدتش

 معدتش عايز حياة الراهب دي ، اول ما الورق يخلص هطلع الرحلة اللي نفسي فيها 

ولما اشوف الملاك في المحل تاني هكلمها

ولما الاقي فرصة هستغلها

لو حتي زواج إسلامي او من المعارف اللي بنيتهم

العمر بيجري ويعدي 

وانا مرهق بصراحة 

النهارده شوفت فيديو من فرح 

واتمنيت حبة فرح وحبة دلع وحبة حنية

معادش في اسباب للانتظار 

بس اهم حاجة الورق يخلص 

وهطلع الرحلة افصل من العالم شوية 

وهكلم البنت 

وهشوف لو في زواج منها او حتي زواج إسلامي  بعيد عن مجتمع المصريين ومشاكلهم ويكون حد بعيد عن كل دا بحيث محدش يقدر يوصلها ولا يأثر عليها

في ناس كتير بتديني امل 

ربنا يخليهم ويبارك فيهم

نفسي في بيت وطفل وحياة هادية فيها حنية وامان 

مش عايز صراع ولا مشاكل تاني 

بس خلاص 

السكن

 من المعروف عني اني بقرف جدا وعامل حدود قوية جدا لاي شيء او شخص ممكن ألمسه ودا بيخليني معظم الوقت اعمل حدود في التعامل وعندي فوق كدا حدود نفسية وحدود واضحة في الكلام والتعامل مينفعش حد يعديها 

فكرة البحث عن سكن مرهقة لكن بتحتاج شوية اعتبارات :

أولها يكون مكان يحتويك يعني ميكونش مكان انت عايز تروح منه او تمشي منه وعندي استراتيجي اني لو بصيت في الساعه وانا في صحبة شخص او في مكان ما بمتنع عن التقرب من الشخص او من المكان تاني ، ما لو مش هيحتويني هسكن فيه ليه ؟ الشارع والوحدة حلوين ومش شرط احس بالدفا بليل يعني مش شرط يكون في سكن طالما صحبة الشخصية غير مقبولة بالنسبة لي وهيجي وقت افكر فيه اني عايز امشي او اختفي 

ثانيهم : ان السكن يكون مناسب بمعني ان مينفعش اي مكان يصلح سكن لازم يكون يليق بيا ، ممكن يكون فيه عيوب لكن عيوب بتركب مع عيوبي وحاجات بتنفع معايا ، بحيث انها متبقاش عيوب 

ثالثهم قدسية المكان والشخص بمعني ان مينفعش تشرب من بير بيشرب منه اي حد لازم يكون المكان خاص بيك ومش اي حد يقدر يدخل ويبيت جوا يومين والا مكنتش هسكن هنا ببساطة لان بدون امان وثقة فالشخصية والمكان في عيوني لا شيء 

رابعهم الوضوح يكون كل أبعاد المكان والشخصية واضحين وميكونش أنا قاعد طول الوقت بتعامل بنفسي والطرف التاني مدخل قبيلة من عنده وبالتالي كدا مفيش علاقه أصلا لان طالما في اي اثر خارجي بالموضوع فالموضوع بايظ من اول دقيقة 

خامسهم ان يكون المكان او الشخصية روحهم حلوة مش عايز حد يكون شرير ولا حد يكون بيقتل فيا الطفل اللي بيلعب ويهزر ويضحك طول الوقت ، باختصار حد يضيف بهجة للمكان 

أنا شخص إنتقائي جدا وعارف بقدم ايه كويس علي اي ترابيزة وعارف اني بحاول لحد آخر نفس فيا وروحي طيبة وقلبي نقي وعبيط وبيسامح 

يتبع 

تظبيط لابد منه

 اليوم كان هادي وجميل لاني قدرت العب في السحور براحتي ودا خلاني قدرت اظبط معدلات الجوع والعطش والسكر في دمي بطريقة تخليني متعبش ، صحيت براحتي علي الاخر ولبست وروقت علي نفسي وخرجت 

كلمت اهلي وبعدها روحت لصاحبي عشان افطر مع الرجالة والدنيا كانت رايقة وعرفت قيمة البشاميل اللي بعمله تحفة فنية والله غير اللي جالي النهارده 

ظبطت الدنيا علي الاخر وروقت نفسي و قضيت وقت ظريف وجربت التمر الإيراني والدنيا كانت حلوة وروحت بدري النهارده وقعدت اتفرج علي مسلسلي المفضل وبعده شوبرناتشورال 

مش عارف هعمل ايه للسحور لكن الدنيا هادية اوي ومزاجي صافي برغم اني اتخضيت وانا نايم امبارح بحلم غريب بس الحمد لله 

اما كلمت اهلي اديتهم شوية نصايح وظبطت الدنيا و كملت يومي زي العسل رايق وكلمتهم تاني وانا مروح ونفسيتي هاي خالص ودي حاجة تنضاف لرصيد رمضان وعرفت السر في يوم هادي بييجي منين

الحمد لله احلامي ومخططاتي فيها شوية تعديلات بسيطة بس رايقة جدا جدا ودا نعمة من ربنا وقدرت اعرف الخطوات بشكل مختلف و اتحركت كتير والحمد لله هانت باقي علي الحلو كام خطوة 

الحمد لله رب العالمين ربنا يديم نعمه علينا 

احلام سعيدة يا كيمو يا حبيبي بعد السحور 

♥️♥️

محضر علي البيت

 النهارده جالي محضر تنفيذ علي البيت 

بعد استنفاذ كل الطرق في الصلح والتواصل والكلام وتخليص الحقوق والرجوع والحب والكلام وكل حاجة في الدنيا جالي محضر علي البيت 

حاجات كتير اتغيرت منها استقراري وسلامي النفسي الأوفر اللي وصلت له 

هدوئي الشديد وروقاني الدايم 

ورغبتي في الحياة و انفتاحي علي العالم وعدم توكلي علي اي شخص

عدم توكلي علي اي شخص يحل لي ازمة

عدم توكلي علي اي وسيط ورفضي للوسايط 

لان لو فضلنا في قصة الوسايط هنفضل في نقل الكلام وناس تعمل مشاكل وفضايح علي الفاضي ومفيش وسيط حتي صالح يراعي ربنا هدفه عمار البيت

عدم توكلي علي اي جهة قضائية او رسمية 

عدم توكلي علي اي حد 

توكلي علي الله فقط 

رحمة ربنا سابقة 

كان نفسي يكون في باب مفتوح نقعد ونتكلم يا اما نصلح ونحل يا اما يتاخد الحق

لكن للاسف كل الطرق مقفولة و مجبر علي الغربة ومجبر علي الوحدة ومجبر علي المشاكل والفضايح

كان نفسي اعرف اتصل واقول كلام كتير واحل المشاكل بس وصلني تحذير قبل كدا بعدم التواصل ومينفعش اتواصل نهائي بعده ومن ساعتها سكتت غصب عني 

وحتي لما حاولت اصلح مع عبد الله ربنا مأرادش والموضوع عطل بعد الصلاة 

لعل ربنا يفتح باب 

لعل هي تهتدي وتفتح باب للتواصل 

لعله خير بس يقيني في الله بيقول ان هو الخير 

كله هيعدي وكله علي الله 

يومي كان طويل ومحتاج ارتاح واتمني بكره يكون فيه الخير 

كل الابواب مفتوحة وكل الفرص متاحة 

والباقي علي الله يهدي الطرف التاني 

تصبح علي خير يا كيمو واحلام سعيدة 

قضي الأمر

 الحمد لله

طويل الليل

 طويل الليل 

مواقف بسيطة

صدف

قرارات عظيمة

حياة شخصية

حياة عاطفية

تعب

صداع

ارهاق اليوم 

تعب الغربة

الوحدة

الليل طويل

بيفوت الليل 

ربنا بينور الطريق

بيعلمني الدرس بأصعب طريقة

الدرس بيعلم 

الحياة بتمشي

ارهاق الموقف واللحظة

صداع اليوم 

الدوا

المواعيد 

الذكري 

الحقايق

الصدف

ربنا بينور الطريق 

الصحبة خير 

بنعيش

حاجات بسيطة بتغير حياتي بالكامل 

محبة الرحمن

سعادة 

هدوء

صبر 

نوم واحلام عشان بكره

ولسه بيجري ويعافر

رحمة ربنا سابقة

مواقف بسيطة وحقائق صغيرة وقرارات عظيمة

رسايل بتتكتب

بنعيش

سيبني انام

تفاصيل

 التفاصيل هي اللي بتصنع الحياة ومبتشوفهاش غير لو خذت الحياه علي الهادي ودققت براحة في الصورة هتشوف كل حاجة

كل نقطة وكل تفصيلة وكل حاجة لها معني وطعم 

كل حاجة مهما كانت بسيطة وتافهة 

نظرة عين ابتسامة مسكة ايد طبق شوربة شوية بشاميل خروجة تمشية هزار وضحك مسلسل مصري لعبة تافهه ضحك وزغزغه 

فما بالك بالحاجات العظيمة مش بس التفاصيل 

مفاهيم كبيرة بيصنعها التفاصيل زي الامان والدفا والراحة و الحب 

وبرده حاجات اهم بيصنعها الوجود والتواصل والتفاهم حاجات كتيرة 

كتيرة اوي 

أنا مرهق شوية

بس في نهار رمضان ببقي سوبر أكتيف ببقي بتحرك وبتكلم كتير 

النهارده كلت بقية صينيه البطاطس بس عملت بلح حلو اوي اوي اوي 

وجبت نوع بلح جديد وجميل 

الموضوع هايل وعظيم وبالذات اكتشاف حاجات جديدة ورايقة

الحياة حلوة بس يارب تتملي تفاصيل صغيره وكبيرة 

نفسي في حاجات كتيرة بس تصدق حاسس اني ممكن ملحقش 

النهارده اكتشفت مشكلة في جسمي  ودايقتني جدا بس عادي يعني 

كله بيعدي 

لسه كل الخطط ماشية مظبوط 

لسه كل تفاصيل حياتي حلوة وهادية

لسه بجري وبتمني بكره يبقي احلي واحلي واحلي 

خير ان شاء الله

يارب بكره اصحي علي اخبار حلوة

يارب يطمن قلبي 

يارب يريح بالي 

يارب كل حاجة تبقي كويسة وحلوة وهادية زي ما يتمني 

يارب … يارب 

احلام سعيدة يا كيمو 

بس نخلص السحور ونشوف المواضيع دي 

حب كتير 

الخط المستقيم

 أقصر طريق بين نقطتين هو الخط المستقيم 

النهارده افتكرت دا وانا بلف علي السوق وبكره هلف تاني عشان اخلص شوية حاجات واركز في اللي المفروض اعرفه وأعمله 

النهارده مشيت شوية حلوين وامبارح بليل اكتشفت تنميل في نص دماغي اليمين لما حاولت اسرح شعري وكان الموضوع مزعج ويخوف شوية 

الحمد لله كله تمام وبخير واليوم عدس حلو ووصلت البيت ساعه الا ربع قبل الفطار وعملت صينيه بطاطس باللحمة و العصير والرز وبابا غنوج

سريع بس كفاءة والاكل كان هايل 

بكره ناوي اطبق القاعدة دي في يومي وربنا يسهل 

الحياة حلوة ربنا يحليها كمان وكمان ويقصر المسافات وينور الطرق ويوصلنا لاهدافنا يارب ويعدي الفترة دي علي كل خير وباعلي نجاح

تعليم الحاجات دي مش بالساهل 

بس اللي معاه ربنا يمشي علي الميه 

احلام سعيدة يا كيمو 

تصبح علي خير يا حبيبي 

اول يوم

 للأسف متسحرتش امبارح وكنت راجع تعبان جدا من مشاوير كتير مع صاحبي وفي المحل وميت حوار وكنت مش شايف قدامي لولا واحد صاحبي تاني فات عليا بعد التراويح وقعد معايا مكنتش كلت ، كنت بصراحة تعبت اوي ولما جالي قمت كلت وشربت وجربت كيك البرتقان ونمت فجاة 

ملحقتش اتسحر 

المهم بقي النهارده صحيت رايق والصيام هادي وروحت قابلت صاحبي وروحت المحل اطمن علي الدنيا هناك وبعدها روحت افطر عند حد معزوم عنده 

يمكن اللي فطرت عنده دا اكتر شخص بيديني امل في الحياه وبيعتبرني من اهل بيته 

فطرت مع اهل بيته ومعاه وحسيت فعليا اني ليا بيت واهل 

وبعدها قعدنا قعده لطيفة وروحت تاني اطمن علي صاحبي في المحل وبعدها روحت 

اليوم كان حلو وخفيف اوي ولطيف 

وكنت جايب اناناس في برطمان حطيت منه علي الزبادي وكمان عسل نحل وبعدها شوية موز جنب الفول والبيض بالسجق 

خدت فيتاميناتي 

روقت بالي وسهرت حبه حلوين اهوه 

وشوية وانام 

عندي امل لما يشوف الأطفال 

عندي امل لما ببص علي الحياه الهاديه المستقره 

عندي امل كبير بكل شكل والله

ودعيت كتير علي الفطار كتير اوي 

دعيت لكل حبايبي وكل اللي بتمناه 

وفوق كدا بقي 

كان عظمة الموضوع اني معايا ونس ناس بتحبني بجد 

كلمت امي واخواتي  واطمنت علي كله 

اليوم حلو يارب يخلي بقية الشهر خفيف 

وعملت مكالمات تانية مهمه 

والحمد لله

امي وحشتني وحاجات كتير في مصر بس لعله خير 

وفوق كدا في حاجات كتير اوي وحشتني من اول فطار لينا في رمضان والذكريات الحلوة كلها 

الحمد لله ربنا يقدرني علي الحياة وعلي الفرح ومسير الفرح جاي 

ليلتك سعيدة يا كيمو يا حبيبي 

تصبح علي خير 

مسير الغايب

رمضان وكدا وايام حلوة والغربة حلوة بس لوحدك

الجنة من غير ناس ما تنداس 

الحياة والحمد لله حلوة والواحد بيخطط وبيجري وبيتصرف وبيعمل كل اللي في طاقته والواحد تعب والله 

من بين كل الحاجات اللي بتوجع ان الواحد بقي محروم يشوف اهله او يفطر معاهم ، مش كان السجن ست شهور اكرم من العيشه دي ؟ 

محروم من المحبة والحنان ولمة الفطار وخناقات رمضان و الجري ورا الفطار وحاجات كتير 

أنا بطلت اطبخ من شهور والحمد لله لسه بصحة جيدة وكله تمام 

بس الواحد تعب شوية عادي يعني ما العزلة والوحدة وحشة

بدور كل يوم علي حاجة تتعمل او مكان يتراح عشان الواحد يقضي وقته وينشغل باي حاجة 

بجري عشان افتح مشروع وأخلص ورق واخلص ميت حاجة 

والواحد بيقول الحمد لله 

رمضان جه والشهور عدت وفاتت الايام ، مش عارف ازاي مر كل الوقت دا بس مر بمرارة شديدة وساب علامات كتير حتي لو هديت واستريحت وبقيت كويس والحمد لله بشكل كبير في خير حال 

بس زي ما قلنا أنا بقالي سنين لا فطرت مع اهلي ولا قضيت معاهم وقت حلو 

مرهق اوي من الغربة وعايز انبسط واتفسح واعمل مليون حاجة 

قطعت كتابه البوست عشان واحد صاحبي جالي

اتغديت وكلت وحليت وهزرنا وضحكنا وانبسطنا جدا 

اليوم حلو دلوقتي 

الغربة اهدي والواقع احلي 

اكيد هي وحشتني ووجودها فارق وذكرياتنا في رمضان كتير اوي بس الحمد لله كله رضا 

أنا مبسوط وراضي والحمد لله 

نفسي في وجود ناس كتير ونفسي كل دا يتحل ويبقي كويس 

بس هي إرادة ربنا سابقة كل حاجة 

الحمد لله

رمضان كريم وكل سنة واحنا طيبين 

ويارب يسعد الجميع يارب في كل مكان وفي كل نصيب وفي كل قدر سواء معايا او من غيري 

الحياة ابسط وأسهل والله من كل دا والله 

يارب يصلح الحال والاحوال ويهديها ويهدي قلوبنا 

لسه فاكر رمضان وحلاوته 

خير 

ايام رمضان نهار وليل كانت كلها سكر والحمد لله 

ربنا يديم الفرح علي الحياة ويسعدنا في كل الاحوال 

دلوقتي ببتسم وراضي وسعيد لاني عشت كتير وسعيد والحمد لله 

وحققت وبحقق كل احلامي وأمنياتي في مليون حاجة 

رضا من ربنا 

خلينا نقول كله علي الله والباقي علي الله

هستني أتسحر واكل كيكة البرتقال بتاع ليدل بعد ما عصرت عليها برتقاله وليمونه وبقت حلوة اوي وينفع تتاكل ويتحط منها علي الزبادي 

ربنا يوسع علينا حياتنا ويسعدنا يارب 

الحمد لله رضا 

كل سنة واحنا طيبين يارب 

ومسير الغايب يعود وتلمس ايده الحيطان ♥️♥️

مسيري اشوفك تاني يا امي 

الموضوع صعب

 الموضوع صعب انك تبتدي لوحدك وتعمل كل حاجة بنفسك ولوحدك

الموضوع صعب اوي اوي اوي 

دا الهم اللي علي قلبي وبس 

الضغط من ورا النقطة دي 

لان محتاج ناس تشتغل ومحتاج ترتب الدنيا للناس  ومحتاج اوراق ومحتاج بضاعه ومحتاج مكان مميز ومحتاج دعايه ومحتاج تركز في الشغل علي قد ما تقدر 

محتاج تبذل مجهود 

أنا معنديش مشكلة في المجهود بس في نفس الوقت محتاج ناس تسد معايا في كل دا 

لحد دلوقتي بتحاصرني افكار كتير 

خوف وقلق 

بس عادي مسيطرين عليها 

محتاجين نتعلم اكتر 

لعله خير ان شاء الله 

الدعوة مقصورة

 كانوا زمان بيقولوا لنا مثل لطيف بيعبر عن حالة التعامل بين الصحاب 

في الحزن مدعيين وفي الفرح منسيين

شايف المثل دا يمكن دا بيلخص صداقات كتير في حياتنا ، قد ايه الواحد مش بيهون عليه يشوف صاحبه حزين او موجوع او في ازمة لكن صاحبه بينسي كل دا في الفرح وينسي يقوله تعالي شاركني فرحتي

الانسان كائن اجتماعي غريب واللي بيقبله في الحزن لما بيكون غريق في عرض البحر ومستني اي حد ينقذه اوو ولو يطبطب عليه او يساعده غير اللي بيقبله ساعه الفرح والفرفشة 

فكرت كتير في سبب إذا لقيت انه ان عقل الانسان بيستسهل عمل القوالب يعني بتحط فلان في قالب ومش بتحطه في اي قالب تاني والقالب دا قاسي اوي عشان بيخليك معظم الوقت تتعامل مع فلان علي انه القالب دا ومش بتعامل الشخص بحقيقته 

مثال 

نفترض شخص اسمه  شلبي ، أنا شفت شلبي لقيته شخص مكافح و بتاع شغل و مبيكدبش وجدع وكفاءة وحطيته في القالب دا ، القالب الجد جدا واللي ينفع يبقي معايا في الشغل ومبهزرش مع شلبي خالص وبتعامل معاه بشكل واحد بس 

تمر الايام وتجمعني صدفة ب شلبي علي كافتيريا ، واقعد معاه وييجي واحد صاحبه بكتشف ان شلبي شخص لطيف جدا وتقدر تضحك من قلبك وتكركر معاه ، ما كل هذا الضحك ما كل هذا المرح 

طيب هو أنا ليه مكنتش شايف شلبي بشكل كامل ؟ ليه بعامله بجدية فقط وبعتبره مجرد واحد شاطر في الشغل بس ؟ 

عشان خاطر أنا حطيت شلبي في قالب عشان عقلي عايز يستريح مش يستكشف كل شوية حاجات جديدة ودا كسل المخ والنفسية فبالتالي معنديش استعداد اتعب في استكشاف شلبي مع ان شلبي عسليه اوي ودمه خفيف 

المشكلة في القالب 

دايما بدي الناس فرصة عشان استكشف اكتر واشوف اكتر وابص اكتر واكتر واكتر واتابع واتعرف علي الناس وعلي جوانبهم 

أنا مش جاي الدنيا عشان أصنف حد ولا عشان اعمل قوالب ، أنا عايز اعيش في راحة بال بس في نفس الوقت عايز علاقاتي يبقي فيها مرونة وتكون حقيقية لأقصي قدر ممكن حتي لو قفلت علي نفسي مع صديقين فقط

الموضوع جميل وانا حبيته ولذلك ماشي بيه من زمان

ننتقل لنقطة تانية 

خلينا نحكي شوية

في عوامل كتير بتسيطر علي اي بزنس :

- دورة راس المال 

- السيولة النقدية

- معدل الربح 

- الفواتير 

- الموارد البشرية

- الدعاية والإعلان والتسويق 

أنا محتاج ادرس الموضوع اكتر واشوف طريقة لترتيب كل دا 

ممكن اشوف برنامج محاسبي او ممكن اشوف برده طريقة للسيطرة علي كل الجوانب مره واحدة ودا محتاج تركيز عالي وحسابات كتير 

المهم يعني 

لازم ابقي رايق ومركز كويس 

نقطة تانية 

أنا محتاج استقرار وبيت وأولاد ودفا وونس 

محتاج دعم حقيقي بالحب من ناس حواليا من كل اتجاه عشان الايام تعدي ومحتاج حب حقيقي ودعم مستمر عشان اعرف اوصل لمرحلة الروقان والراحة النفسية اللي تخليني قادر اركز في كل الحاجات دي. وانا بعمل البزنس 

عندي خطط  لحاجات كتير بس محتاج تركيز 

قعدت الجمعه مع صحابي وكانت سهره حلوه اوي 

والسبت كان يوم لطيف 

والنهارده عندي حاجات كتير دمها خفيف تتعمل. ربنا يسهلها ان شاء الله

الحياة محتاجة ومش حقيقي مش منظر 

مش عارف أنا عشت ازاي العمر اللي فات بس متاكد انه فات وبسرعه اوي كمان 

ربنا ينور الطريق الجاي ويكتب اللي يرضيه ويرضينا بيه 

الحمد لله

لو قالوا

 لو قالوا حاجة فانا عملت حاجات 

زمان اتقال عليا كتير بس صدقت وآمنت بربنا وحلمي وتعبي 

وعلي قد ما قالوا علي قد ما حققت مليون ضعف 

ومش ليا اي يد دا كله فضل ربنا 

دلوقتي الموضوع مختلف جدا 

دلوقتي أنا بجري بجنون 

وقادر أشوف وأجمع داتا واقف علي رجليا وانقل فلوس وأتصرف في الواقع وأغيره 

مش عارف ايه خلاني انام خلاني اضيع السنين دي كلها 

بس المشوار كان طويل اوي 

ولسه الجاي اطول 

عارف اني مش بسمع لحد 

بس الكلام بيوجع برده

بس التصرفات لسه بتوجع 

زيها زي الغياب زي الحاجات اللي بتقهرني

كله بيوجع 

وانا قاعد في حالي بشحن

بجري لا بطير زي الصاروخ 

بكره نازل السوق لاول مره اشوف بعيني عشان تعبت من تصديق الأكاذيب 

بكره نازل ملعبي الجديد ومش خايف اتمشي هناك لاحسن اقابل حد لاني عارف ان المدينه فضيت خلاص 

بكره رايح أراقب واشوف الواقع واركز بكل طاقتي 

بكره رايح افهم عشان سوء الفهم وحش 

بكره رايح ابتدي اخذ خطوه واتحرك وربنا يجعله خير 

أنا مرهق جدا وحاسس اني مش هقدر اروح بكره

مش عارف والله

حتي لو مروحتش معنديش مشكلة

بس ابقي علي الاقل حلمت الليلة بحلم حلو ونويت حاجات حلوة

صح ؟

خلينا بقي نعيش

تصبح علي خير يا كيمو يا حبيبي 

ربنا مش هينسانا 

لسه بحلم ببيت واستقرار وامان ودفا

لسه بحلم بالحياه حتي وانا في حالة زي دي 

بس خلاص يعني 

احلام سعيدة يا كيمو 

تلات ايام

 تلات ايام ورا بعض خبط خبط خبط 

جري جري جري 

واخيرا الويب سايت اونلاين

تعب شديد وجري وتظبيط مليون حاجة في نفس اليوم 

مش حاسس بجسمي حرفيا والله

بس اتعلمت دروس مهمة الفترة دي 

نبتدي منين الحكاية

بقالي تلات ايام برجع مش قادر باكل لقمة وانام مكاني بدون ادوية

نومي مظبوط صحتي زي الفل رايق وواقف علي رجليا زي الاسد 

صعبه يا كيمو 

للأسف مكنتش بلحق اخذ الدوا 

بس كل حاجة مظبوطة 

النهارده اصريت اكل برا. وبعدها خذت الدوا جري في جري قبل ما نروح الكافية 

اليوم مرهق اوي بس النهارده قرصت علي نفسي وصحتي بزياده كنت عايز اجرب جسمي في النشاط الاوفر وفعليا المكنة اشتغلت وطلعت قماش 

امبارح دخلت في مناقشة مع واحد 

وانا بكلمه قلتله اني بحب بنت فقالي لسه ؟ قلتله والله بحبها اكتر من النفس اللي بتنفسه 

أتصدم وسكت ومعلقش

هوا ليه الناس مش بتصدق دا بسهولة ؟ هو صعب اوي كدا ان في انسان يحب للدرجة دي ؟ هي الناس غلط ولا كلامي اللي مش منطقي ، معرفش بس مش قصتي عادي جدا يعنيني ويهمني اني احافظ علي نفسي واعيش زي ما احب واحس زي ما احب وبس 

واحب زي ما أنا عايز دي حاجة ترجعلي والقلوب بين يدي الرحمن يقلبها حيث يشاء 

ننتقل لموضوع تاني 

خايف من موضوع البزنس ، الموضوع فيه مليون حاجة مربوطين ببعض ودماغي حرفيا عماله تشرب الداتا وعمال أتعلم شوية بشوية بشوية وانا مرهق وبعافر فشخ

ان شاء الله كل مخططاتي ماشية مظبوط 

ويارب يتمها علي خير 

أنا حاسس اني عايز اشتغل واعيش وبس 

مش حاسس ان في باب الحياه مستنيني او استقرار او اي حاجة 

معرفش بقي 

مش قصتنا 

أنا عايز اعيش في هدوء وسلام وبس 

أنا محتاج انام 

تصبح علي خير يا كيمو 

هتوحشني يا كيمو حتي البوست القادم 

ليلتك زي العسل واحلام سعيدة يا كيمو يا حبيبي 

ايام طويلة

 اليومين دول جري طول الوقت وتنطيط ومشاوير ومعلومات كتير كتير كتير حاجة فوق الوصف مش دا العادي بتاعي بس عشان بنستعد نبتدي حاجة مهمة 

النوم كويس والاكل كويس والراحة حلوة والدفا حلو 

جري جري جري 

مش قادر حتي اقعد مع نفسي افكر في اي حاجة شوية 

الموضوع سهل وفي نفس الوقت صعب 

مش متخيل لو مشروعي هعمل فيه ايه الموضوع فوق طاقتي محتاج ناس زي حالاتي كدا مخلصين وفايقين وعايزين الخير زي حالاتي 

بس في وسط كل دا سعيد بفهم كتير وبستوعب اكتر 

الجري حلو بس محتاجين مليون حاجة جنب كل دا 

علي الهادي الفترة هتعدي 

مش عارف ليه حاسس اني في رمضان ولازم أصوم  مع انه لسه مجاش 

سعيد باللي بعمله وسعيد بنفسي ومستني نقطة انطلاقي قريبه ان شاء الله

المهم يعني نروق علي نفسنا بحاجات بسيطة 

سددت المبلغ اللي عليا وحولت فلوس والأزمة اتفكت ونزل من علي كتفي حوار الديون دا كان مجنني

الحمد لله رايق جدا دلوقتي 

والحمد لله علي كل حال نركز بقي في الحاجات اللي هنجيبها والتجار والدنيا هتمشي ازاي 

عدي الوقت واقف علي رجليك

شفت فيلم حلو اوي اوي اوي اوي 

مخليني في مود حلو طول الوقت 

مش عارف هل هرجع ءآمن تاني بالحب المستحيل ولا هحن للرومانسية بتاعتي ولا هعمل ايه بس الاحساس حلو 

الاحساس نعمة وانا مبسوط بيه جدا

نفسي اكتب رساله للي عملوا الفيلم اشكرهم 

بس مش قصتنا دلوقتي 

خلينا نركز في اليومين دول 

يومك زي العسل يا كيمو ويارب يوفقك يا حبيبي 

ويارب نبتدي علي خير وناخذ خطوه في طريقنا يارب 

بيس ياحبي 

ماذا لو

النهارده صحيت عندي مشوار مهم روحت مع واحد صاحبي مهم بعتبره من اقرب الناس ليا اعمل مشوار مهم واشوف معاه محل حلو وبصراحة عجبني بس مظنش اني هدخل في الموضوع دا دلوقتي برغم خبرتي في الموضوع اللي قد خبرته ميت الف مره بس مش عايز ادخل دلوقتي والساقعه كانت شديدة وجسمي مكانش شغال كما يجب فشربنا اتنين قهوه وروحت اتدفي شوية لقيت جواب من الدي اتش ال عشان استلم هدية حلوة هبقي اروح اخذها بكره 

دفيت الشقة كويس وريحت وشغلت حاجة بحبها ونمت شوية ، جسمي هدي وارتاح بس بقالي يومين بسال نفسي سؤال مهم جدا  ماذا لو صحيت في يوم لقيت النار انطفت ؟ 

يعني ايه ؟ 

يعني مش عايز اكمل ومش عايز اروح في حته ولا عايز حاجة أصلا زي الفترة دي نادرا ما يتحرك تجاه اي شيء 

ومعرفش السبب ايه تحديدا بس مش بتحرك خالص غير واجي او التزام قهري ودا مينفعش في البزنس 

عارف اني عالجت المشكلة دي مليون مرة بس احيانا بيكون قدامك اقل من دقايق 

زمان ايام الكافيه والسكات النتورك وأمازون كنت احيانا مش بكون نايم اساسا غير اربع ساعات وبصحي وبتحرك بسرعة الصاروخ وبتجاهل جسمي تماما 

طيب ياتري لو أنا صاحب البزنس ؟ هتحرك أنا عارف بس بصراحة مش خايف من اي حاجة في الدنيا ولا حتي من نفسي عشان عارف هتصرف واتحرك ازاي وبانهي قوة و هجيبها منين 

الباور الرهيب اللي عندي والنار اللي بتجري في عروقي 

محتاج حد يقعد يراقب جسمي ومستويات الاستقرار والامان والدفا وفوق كل دا يهتم بحاجات كتير 

نفسي ابقي عايز ارجع البيت بس مش بيكون نفسي غير في اني اشغل الدفايه واشغل حاجة وامسك الموبايل واسرح شوية ونادرا ما بكلم حد 

الحمل بيزيد والنقل بيزيد وانا عارف ان ربنا أوجدني في المكان المناسب 

النهارده اكتشفت صفحة بتنزل اغاني حلوه اوي علي انستجرام ومقامات مختلفة للصوت وانسحرت 

النهارده كان يوم حلو وكلت حلو اكله بحبها وبكره عندي ميعاد مهم عند الدكتور 

انا عارف ماذا لو النار انطفت او بقيت مش عايز اي حاجة هعمل ايه بس مش عايز اتحط في الموقف دا 

زمان كنت مهتم بالنور بس بقالي سنتين تقريبا مهتم بالنار فقط 

انا مرهق شوية معلش بس كله تمام 

النهارده كان حلو وانا هنام كويس وكله جميل 

وبكره ميعاد الدكتور مش شايل هم حاجة 

وبالنسبة لبكره هدلع نفسي زي الصاروخ بكل طاقتي 

لعله خير وربنا يجعله خير يارب 

أنا سعيد بنفسي وبحالي وباني قادر اعيش وأخلق حاجات حلوة واسمع مزيكا واخرج وأتأقلم وأعتبر دنيتي تخصني وبكل شكل قادر اعيش واتعامل وابني نفسي وحياتي 

بس علي راي واحد الجنة من غير ناس ماتنداس بس فلنعتبر اني الذئب الوحيد او آخر شخص علي الكوكب وكله بيعدي وهيعدي 

كله علي الله 

كيمو حبيبي اتطمن ونام أنا واثق فيكي

مهما كان أنا دايما في ضهرك 

عمري ما سيبتك ولا ضللتك ولا هسيبك

تيك كير ياحبي 

احلام سعيدة واسمع مزيكا حلوة ♥️

بشاميل واخبار وحركات

 النهارده كان يوم لطيف ، كنت مستني حاجات جايه لي من مصر مجاتش في البريد منها عطور بحبها وشوية ادوية خفيفة و ريحت في نص اليوم عشان مستني صاحبي وكلمت واحد صاحبي تاني واتفقنا علي ميعاد الصبح نروح نشوف محل عشان مشروع معين وان شاء الله نروح بكره وغير كذا ريحت شوية وروحت بعدها لصاحبي وقعدنا سوا شوية حلوين وبعدها روحت كلت مكرونة بشاميل بالدونر عند مطعم كنت بجيب منه زمان وكلت منه من يومين 

كان المفروض النهارده اكل بيتزا مع واحد تاني او حتي اطلع شوية ستيك بس بصراحة مفيش باور كنت مهبط بشكل غريب ودا دايقني جدا وخلي روحي في مناخيري في آخر اليوم 

المهم 

اليوم كان خفيف ولطيف ومستني جوابات كتير في البريد وعايز اروح فرانكفورت ضروري اريح يومين هناك و يمكن يطق في دماغي كام فكره اعملهم بس اهي خطوة حلوة ، بدات اخلص في حاجات ماجاها من بدري ومش متخيل احساسي ولا شعوري هيبقي عامل ازاي لما تخلص بس ان شاء الله خير 

الإرهاق لا ملة له ولا ملك يا صديقي 

عزيزي كيمو أنا مطمن عليك والحمد لله بس عايزك رايق كمان شوية وعايزك تجيب شوية هوت شوكليت وعايزك كمان تفكر في حاجات معينه وتعمل حسابك عليها متنساش احنا منتظرين مهلة معينه لحد ما نبتدي اول خطوة والمرحلة الاولي 

كيمو حبيبي أنا عايزك كويس ورايق عشان تقدر تركز في المهم ، أنا ليه حاسس ان عيني مش مستقره مش عارف ، حاسس ان عيني مش بتعدي علي كل حاجة كما يجب بس هحل الموضوع دا 

في حوار في دماغي بفكر فيه بس مش هينفع للأسف 

علي بالي اني اسافر بس برده مش دلوقتي وعلي بالي اتدلع بس برده مش دلوقتي ومش قصتنا 

صحيح النهارده حالي تلات اخبار حلوين فشخ ودا من فضل ربنا والحمد لله واديني بقول لنفسي ربنا بيسبب الاسباب وبيخلق الطريق وكل حاجة في ايده بس الاخبار فرحتني والله اوي حتي لو حاجة بسيطة بس رضا والله

كل حاجة بايد المولي سبحانه وتعالي 

المهم يا كيمو اطمن وروق وكدا كدا الوقت في صفنا عشان نبتدي المرحلة الاولي ، عايز اشرب شوية كاميل سخن واريح وانام

احلام سعيدة يا كيمو يا حبيبي 

غدوة ونزولة وحكايات

 عارف احساس النار 

كنت بستعين بيه احيان كتير عشان انجز حاجات كتير زي يوم نازل فيه الشغل وعندي اجتماعات كتير وكذا ستوري وبجري ورا نفسي ، وانا ماشي في إيسن لحد مقر الشركة  او لو تعبان وعندي حاجة مهمة ، ولازم اخلصها بسرعة بقدر اخلي دمي كله يولع زي النار وتركيزي يبقي عالي جدا عشان اقدر اخلص بسرعة 

عارف احساس ان وراك جيش 

كنت بستعين بيه كتير وبتخيل جنود الجيش كلهم وكل الرجالة في دماغي واقفين جنب بعض مستعدين وبيفكروا وكل واحد بيتحرك وبينجز ومن برا أنا عادي جدا وهادي وكنت برده يستعين بيه 

خيالات جميلة ولطيفة وبتساعد 

النهارده تقريبا حاولت اعيش الاحساس واستدعيته في لحظة وقفلته في لحظة ، الموضوع جميل لما تسيطر علي نفسك للدرجة دي ، بصراحة كان الموضوع لطيف ، قضيت الصبح في البيت ومرضيتش انزل اخذ الجولة اللي عايز اعملها ، مش وقته عشان عندي حاجات اهم الفتره دي 

جالي لوكيشن مصنع ومزرعة هنا اجيب منهم بضاعة بس مش وقتهم دلوقتي هبقي أزورهم الأسبوع دا اشتري شوية حاجات 

جالي صاحبي وعملت غدا حلو وشوربة وفرخة مشوية وخضار ورز رايق و حاجات حلوة اوي وكان البابا غنوج سكسي ودمه خفيف ولا المخلل بقي واااااو ، قعدنا واتغدينا ونضفت كل حاجة ونزلت جري الحق صاحبي التاني ، صاحبي التاني صعبان عليا عايز اساعده بكل شكل بس مش وقته دلوقتي أنا كذا كدا بساعد بكل طاقتي وأفكاري بتتحرك صح في موضوعي وما يخص البزنس  بتاعي والمفروض ابتدي اونلاين قريب 

مش قصتنا 

المهم اني رسمت خطوط واضحة واقوي بكتير للبزنس وبفكر في كذا حاجة تخص كذا موضوع والدنيا سهله وكله علي الله 

في شخصية امبارح حاولت تزنقني في الكلام سيبتها وقفلت ونمت فجاة مش فاضي بصراحة لزنقة واقعد اعيد وأزيد في كلام فاضي وفوق كدا مش في دماغي ، بس هما كانوا اتنين بصراحة ، هي الناس دي فكراني عبيط القرية ؟ ولا في ايه تحديدا ؟ مش قصتنا بس أنا كدا كدا قافل في وشهم الباب من زمان ومعنديش استعداد ادخل في حوارات ف فكيتني منهم ونمت … مش عايز مزاولات ، دا غير اني مش برد علي التليفون اساسا او الرسايل لما حد بيتصل او يبعت ، بدخل ببساطة اكلم اللي عايز اكلمه وبس عشان مش عايز صداع ، مش عارف أنا حالي الصفاء والهدوء دا كله ازاي بس الحمد لله مش عايز حكاوي كتير وهري كتير ومش عايز صداع ومش عايز تعب ولا حد يزنقني ولا حد يعمل عليا فيلم زي الاتنين بتوع امبارح ، اللي هوا احا اتنين في نفس اللحظة ونفس الحوار ، يلا عادي مش فارق ولا شاغل بالي وانتوا اساسا لا في الحساب ولا في الدماغ 

المهم اني رايق ومستقر جدا ودا أنا ذات نفسي مستغربه جدا بشكل صادمني بس عادي الهدوء والاستقرار حلو بعد العواصف وفي اوقات المرض وفي اوقات الانشغال 

كيمو حبيبي تجاهل الاتنين واشتغالاتهم ومتجيبش لنفسك صداع وعيش يا حبيبي ، كمل في طريقك ومتخافش ان شاء الله ربنا يكرمك بتوفيق عظيم من عنده يارب 

أنا فخور بيك وباللي بتسعي فيه بس عشان خاطري متسيبش الساقعه تلسعك وركز في صحتك واتعب شوية في طريقك ومتكسلش وربنا هيكرم ويرزق من وسع ، احنا بنسعي للخير يا حبي 

خد بالك من نفسك يا كيمو 

خد الدوا ونام واحلام سعيدة يا حبيبي 

خطوط وحكايات

 النهارده اضطريت اعمل جولة في كذا مكان غصب عني كنت رايح اعمل مصلحة حلوة ، المهم قوم ايه ، ابتديت ألاحظ الفروق ، عيني معادتش زي زمان ودماغي بقت بتلقط حاجات مختلفة وبشوف بنظرة التاجر اللي بيحسب ويقارن ويفصص الحاجة مش عين المشتري اللي بيدور علي اعلي كواليتي واحسن ماركة وبيركز في المكونات 

الدنيا مختلفة فعليا لما بتغير مكانك 

النهارده روحت مكان مختلف وفكر مختلف قابلته وحرفيا ناس مجانين بتحاول تخسر بكل طاقتها ، ودا نادرا ما تشوفه ، النهارده قعدت مع صاحبي كام مرة وفوق كدا قعدنا نحكي بتفاصيل وأرقام وكل واحد واجه التاني بكام حقيقة وحكايات لا تنتهي 

مش عارف احكي ايه ولا ايه لكن فهمت فلسفة البعض وقعدت احكي عن مقر الشركة اللي عجبني امبارح وإيجاره ممكن يخبط حداشر الف يورو ودي حاجة صادمة بصراحة بس متوقعة بشكل او باخر ، ببساطة الموضوع محتاج تضحيات وجنان اوفر وترتيبات ودراسة جدوي 

صاحبي قعد يحكي معايا كتير كتير كتير كتير كتير واقترحنا علي بعض كام فكرة ، الموضوع كان هايل بصراحة  بس برده محتاجين قعدة حلوة ومحتاجين نقعد نرتب اكتر ، مش قادر ابطل دماغي عن التفكير في قعدتي مع واحد صاحبي تاني بنقعد نفكر سوا بشكل خلاق ومنطقي وواقعي فشخ بدون كل التوتر و كمان بدون حدود 

النهارده جالي هدية ياميش رمضان من ضهري وحبيبي واخويا العسلية اللي رجع من مصر ، النهارده حسيت ان ضهري بقي اقوي ومن اول ساعه قعدنا نهزر ونضحك ونفكر وبعدها مشينا سوا لوحدنا واتضح اننا عندنا نفس الحلم بس كل واحد بطريقته وحايبلي هدايا من مصر وربنا ما كنت طلبتها ولا اعرف اساسا انه هيجيبها وفوق كدا قعدنا نفكر ونحكي وابتدينا نتناقش حسيت لوقت حلو اوي بان ضهري بقي اقوي وصحتي بقت احسن وحاسس بامان فوق الوصف ، كل الدنيا فداك ياصاحبي والله ووجودك احلي من طلوع الصبح ، مستني نرجع نتغدي سوا ونخرج ونشرب قهوه ونقعد نشرب سيجاره تحت سوا ، بجد بعد كام شهر غياب فوجود صاحبي علي قلبي زي العسل وغير كذا هدايا ياميش رمضان ، أنا كنت هموت علي هدايا وحد يفرحني والله ، موضوع الهدايا طلع بيفرق معايا جدا والله 

المهم بكره يوم جديد ناوي اقابل التلاته صحابي واقعد ارغي واحكي معاهم وارتب وكل واحد بمنهجه وطريقته وعقله 

موضوع الهدية مأثر عليا جدا فوق الكلام بالإيجاب والله 

المهم يعني ان ترتيبات كتير وتلات صحاب في وقت واحد منهم واحد كان غايب شهور والتاني معايا كل يوم والتالت مختفي عشان مشاغل حياته ، لو الرزق جاي كدا فانا سعيد وراضي جدا يارب واحساسي ان ربنا بيرسم الطريق مخليني طاير وسعيد ، الدوا كويس ، صحتي كويسة ، الاكل كويس ، وهنام النهارده في الهداوة جوا عشان بقالي اسبوع بنام فجاة علي الكنبه قدام التلفزيون والدفاية بس نخش ننام جوا ونظبط احوالنا 

أنا بحبك يا كيمو ويوم الاتنين هاخدك ونعمل جولة في السوق ونروح مدينة تانية نتشقلب فيها سوا 

احلام سعيدة يا كيمو 

احلم وانت علي قد حلمك واحلامك هي الحقيقة ان شاء الله 

ويارب يحقق لي النجاح في مشاريعي وفي سعيي يارب 

تصبح علي خير يا كيمو ♥️♥️

الاحلام بترسم المستقبل

 النهارده في تقليل فشيخ لكل حاجة ، في وقت ، في اعصاب وهدوء ، في مزاج ، للأسف نسيت اخذ الدوا امبارح من التعب وطنشت الاكل عشان كلت برا ونسيت اجيب بيتزا زي اول امبارح بس اليوم عدي وكنت مستريح ولو حتي في قلق بسيط جدا جدا بس سيطرة واحد زيي علي نفسه للدرجة دي مفزعه وخطيرة ومفرحة في نفس الوقت حتي بالنسبة لي 

امبارح الشباب مجوش عشان تعبانين واليوم خلص مع صاحبي قعدنا شوية وهزرنا وضحكنا وكلنا  وقعدنا سوا شوية وقت لطيف 

عندنا ايه النهارده ؟ 

ممكن نبتدي بترتيب البيت وقبلها فطار خفيف و عندي ترتيبات في الحسابات عندي فيها مشكلة جامدة عشان الحلم بدون حساب بيبقي هبل فلازم نتحرك وعندي صاحبي برده هنزل اقابله عايز اقعد معاه شوية

لازم اعرف طريقة كام حاجة واحدد لها مبلغ ، في حوار هياخد مني بتاع من الفين ل تلات الاف يورو هرتب الناس اللي هتعمله واجهز نفسي فشخ للحوار عشان اكون مستعد وعند نقطة الصفر فايق وكله جاهز 

كذلك برده موضوع العربية مش عارف ممكن احط فيه فلوس قد ايه بس لازم اذاكرله كويس الاول وبعدين نفكر نشتري بس خلاص عرفت هشتري انهي موديل وليه ، دا يهمني جدا  ومعنديش مشكلة توصل لحد خمس الاف يورو المهم تكون بتسد معايا في حواراتي  اللي هعملها 

عندنا غير كدا نقطتين مهمين في التجهيزات وفي العفش ممكن نشوف هنكلف كام برده هتدخل لها في خمسة عالاقل دا لو ببلاش  هتخليني في الرينج دا حلو اوي مش مزعلني في حاجة 

عندنا برده نقطة تانية هي نقطة الاجهزه ودي مقدور عليها ممكن نعمل فيها اداء حلو بالفين بس والعفش كذلك بس خلينا نحسب ونعرف مكان كل حاجة وعلي اعلي معدل ممكن عشان منتصدمش قدام

اتبقي عندنا نقطة الايجار وكام حوار تاني قانوني بس مش قصتنا دلوقتي ، عرفنا الرينج والدنيا 

كدا متبقاش غير حاجات بسيطة برده مقدور عليها بعون الله هرتبها مع الشباب دا غير الشباب ذات نفسهم ودي برده مش مشكلة

اتبقي عندي حوارات تانية هيشيلها ابو هيما فكدا كله خلصان ومنتهي 

محتاجين برده غير كل دا مخزن او تجهيز الحاجات وهنجيبها ازاي 

أنا مرهق فشخ وعقلي عمال يلف في ميت حته ودي ازمة بسيطة وهتعدي ، كل دي حوارات وكل حوار بقصة طويلة وتجهيز لكن الحمد لله ان معانا وقت حلو ولطيف  واكثر من كافي 

التفاصيل التفاصيل التفاصيل 

كان في حد بيقول دايما ان ربنا موجود في التفاصيل ، تخيل للحظة الجملة ، هي المقدرة علي رؤية الاله لما تقعد تتأمل في خلقه ، وتفكر وتحس وتشوف بنفسك وتتأمل للآخر ، يمكن عشان كدا التفاصيل بترسي في دماغي وبفتكرها كويس وبعرف اسيطر عليها زي اللي بيجمع ليجو او اللي بيرسم لوحة جميلة 

النهارده في صداع ولسه متحركتش ومفيش لقاءات كتير ورايا  بس هعرف اسيطر برده علي الدنيا 

نبتدي واحدة واحدة وناخذ المسكن ونعمل الاسكين كير روتين ونجهز اوضه النوم ونروق شوية 

احلامنا هي اللي بترسم مستقبلنا وربنا يكرمني ويصبرني ويسهلي حالي علي المستقبل اللي بجري وراه دا ، عارف اني بعمل مغامرة رهيبة بس اشطا حلوة وزي السكر علي قلبي بس يارب أتوفق فيها 

صباح الفل ويومك زي العسل يا كيمو ♥️♥️

الصراحة حلوة

 النهارده خضت حوار صريح فشخ وكان له اثر طيب في نفسي ، مش عارف ليه الناس بتهرب من الصراحة ويمكن من انهم يقولوا الحقيقة ، بحب الصاحب اللي يقول الحق والصراحة ويكون واضح حتي لو فيه العبر ، عالاقل له موقف يسعد الانسان ولو حتي حصل ايه 

الحوار النهارده كان صريح وعجبني وسعيد جدا بيه ، عارف ان دا مش طبيعي واني ممكن اكون مقصر في حق نفسي بس مين قال اني مش مبسوط بالصراحة ؟ مين قال اني مستني من صاحبي غير كدا ؟ 

يمكن السعادة الحقيقية في انك تبني تفاصيل الصورة قطعة قطعة 

تخيل 

بتبني كل يوم تفصيله في مستقبل جديد ، فايق مركز عارف الناس شرورها واصله لحد فين ، مشكلتي يمكن هي العطاء الزايد والتضحية بس أنا سعيد فشخ باللي وصلت له مع صحابي 

كل يوم تفصيله جديدة قبل وبعد ما الصورة تكتمل وتوضح في خيالي ، شايف البزنس والشركة وكل خطوة مهما بلغت تفاهتها ، حتي شايف  كل فاتورة بعيني طالعه من الشركة ، فكره اني اعمل بلان حلوة للحصول علي مبلغ زي دا حرفيا كبيره فشخ وتفرح فشخ ويمكن صحتي بتتحسن كتير من ناحية النوم والاكل من ساعه ما ابتديت اشغل بالي بالنقط البسيطة دي 

السعي حلو وبيخلي الواحد احسن وبالذات لو بيقدر يحقق كل حاجة علي ارض الواقع بمساعدة ربنا ، الهداية والطريق اللي ربنا بيخلقه ويبعتنا له ، السكة اللي ربنا بيمشينا فيها 

معنديش مشكلة مع الفلوس ولا مستني فلوس من حد ولا بدور علي زيادة بالرغم من ان دي الفترة اللي المفروض اعمل فيها فلوس عشان خاطر المشروع والشركة ، ابتديت افكر في خطط الماركتينج للشغل وازاي هتحرك وهتصرف ازاي 

لحد دلوقتي رتبت نفسي علي خمسين الف وهقدر اجمعه في فتره صغيره ازاي ونويت أكمله ٨٠ او ١٠٠ الف قريب بكل سهوله ان شاء الله وربنا يبارك بقي ويستر 

الخطوات اللي باخدها حلوه وصحيح روحت امبارح الميعاد بتاعي وكنت رايح عشان اعمل مشكلة واتخانق مع الناس بس ستر ربنا لحقني وهدي اعصابي وقضيت الميعاد كله ضحك وهزار وخلصت الموضوع بسهوله وبعتت للمحامي النهارده عشان ارتب معاه الدنيا 

النهارده برده حولت فلوس ولسه بحول وهحول عشان حاجات كتير ، عندي ميعاد تاني قريب لازم اكون فايق ورايق عشان هقعد مع الدكتور ، اعصابي هادية ومخي صافي بس عايز افضل كدا فترة محترمة قبل ما اقطع اجازتي ودا لسه بدري عليه ، عندي التزامات اكتر و حاجات اهم زي ورق الشركة مثلا والورق المطلوب مني في مصر ،، قصص وحوارات 

خففت شوية عن صاحبي وقاعد فالبيت عشان معملش صداع لحد ولا حد يعملي صداع وناوي اظبط نفسي بكل شكل بس مستني اخلص اللي ورايا وعايز احط بلان لسفرية امريكا عايز اقعد عالاقل اسبوعين

كل حاجة بتمشي علي الهادي بس محتاجة شوية صبر سهله والله ربنا يسهل 

من نعم ربنا عليا قول الحق والصراحة ويمكن دي اكتر حاجة واهم قيمة في حياتي نركز عليها ربنا يكرم يارب 

هقوم اخلص حوارات الشوبينج للبيت واروح اتدلع شوية واشيل وأجهز الاكل وانضف البيت شوية حلوين وممكن اعمل دا بكره والباقي سهل وعلي الله 

كتبت نص البوست امبارح من التعب والنهارده كملته وبرده لسه جسمي  واجعني ومرهق شوية 

هخلص اليوم وادفي الدنيا واعمل سهرة تليق بيا لو الشباب متجمعتش معاهم 

أمسية سعيدة يا كيمو

مزيد من الخطط

 اليوم امبارح كان حلو ، انجازات كتير ، النهارده لازم انزل اصور ورق وافوت علي صاحبي واروق علي نفسي في حاجات عايز اجيبها عشان اعمل الشوربة 

وفوق كدا عايز اجيب شوية رز وارتب الدنيا في البيت للاكل واوريدي عملت دا 

نفسي اجيب بيتزا برده 

وعايز احول فواتير كتير 

مرهق وبجري كتير أنا عارف بس حاسس اني ماشي صح 

الفترة الجاية عايز اعلي نسبة تركيزي وعايز اعمل خروجة حلوة يوم الاحد 

الدنيا هادية ومستقرة ودي نعمة عظيمة و عايز اظبط شوية حاجات حلوة كذا تروق عليا ، عندي برتقان مسكر فشخ وعندي حلاوة بالفستق وعايز اعمل اكل مش عارف هيكون ورق عنب ولا سبانخ وعايز اروح ايسن واقابل صحابي وعايز اكل شاورما في محل حلو اوي وممكن اروح المطعم بتاع دوسلدورف الجديد واقعد اجرب في الاكل هناك

عايز برده اظبط الدنيا من ناحية مصر في حاجات كتير لازم تخلص وحسابات كتير وعايز اروق دماغي ليها 

عايز اكلم قرايبي وارتب سفرية هادية لفرانكفورت مع مازن 

عايز اظبط نفسي من كذا اتجاه ، مرهق جدا والله ومهما نمت مش بستريح ومهما دفيت الاوضه بيتهيالي محتاج الوجبات اللي بخطط لها في اسرع وقت ممكن 

عايز انزل اصور الورق واستعد قبل الميعاد بيومين وارتب بعد الميعاد مع المحامي لاني خلاص زهقت فشخ بصراحة

عايز اظبط موضوع الماديات محتاج اظبطه بحل قوي وسريع وفعال 

عايز ارتب خطوات تسجيل الشركة برده في اسرع وقت 

عايز ارتب حاجات اكتر بكتير في النقط دي 

ممكن ان شاء الله نظبط الدنيا علي شهرين من دلوقتي  وبعدها يبتدي المرحلة الاولي وفي آخر السنة ندخل المرحلة التانية بس مش عارف هل هقدر اخلص المرحلة الاولي واحقق تارجت السنة ولا لا لان المبلغ كبير فشخ

عايز اخلص حوارات الورق كلها واعرف كل ما يخصها في اسرع وقت ممكن 

كل حاجة في وقتها يا كيمو 

لازم اقوم انزل ارتب الورق واتحرك شوية

امبارح شفت بنت مصرية صدفة بس مركزتش مين دي أصلا

عايز اركز علي النقط دي فهاخد البوست واشيله في النوتس واحط منه علي الوايت بورد بتفاصيل اكتر 

أنا صاحي من بدري من تمانيه تقريبا 

بس برده يسعد صباحك يا كيمو 

افتكر اني بحبك واني جنبك وان كل حاجة هتبقي كويسة يا حبيبي 

يومك زي السكر يا كيمو 

كريم

بالمناسبة يا كيمو 

أنا بدعي ربنا كل الخطط دي تفشل وربنا يبعتلي خطته ونجدته وتبقي كالعاده احلي من كل مخططاتي ويفاجئني بالخير كله زي كل مرة وبولاد الحلال 

حبيبي يا كيمو ♥️😍

الاحد وراحته ومشاكله وحواراته

 الأسواق منهاره بشكل مفزع 

العالم مكان قميء جدا عشان مليان حاجات مزرية ومقرفة  بس عادي 

موضوع الأسواق دا عادي لو مستحملتش تقلبات السوق اساسا متدخلش مش ناقصة عبط 

والحمد لله انه مش فارق عندي لاني رتبت قناعاتي وأولوياتي 

وحاليا ركنت كذا حاجة والواقع بيجري بسرعه فشخ مش عارف ليه السنة دي هتبقي فارقه برغم اني مش ناوي انزل شغل جديد قريب 

وكدا كدا عندي ميعاد مهم كمان كام يوم عايز امسك اعصابي عشان متجننش ولا اتعصب عشان التعنت بيقرفني ويدايقني فشخ

مستعجل علي الميعاد وعايز اعمل شوربة بكره عشان دا مهم فشخ وضروري عشان عايز اعيد بناء اجزاء معينه من صحتي ومحتاج الشوربة دي جدا بس مش عارف لسه هعمل ايه جنبها بفكر علي الهادي بس اكيد الشوربة مش بكره هشوف لسه بكره يوم طويل 

عندي حوارات تانية غير قصص الأسواق عشان كلها فاكس عايز ارتب مكان حلو في مصر يليق بيا وعايز ارتب حاجات كتير هناك ونفسيا النهارده كان دروب فشيخ غير دروب الأسواق وفوق كدا في ناس حلوة وقفوا وسدوا ولو حتي بالسلب والنيجاتيف ووقفوا يتخانقوا 

حاليا الادوية ماشية كويس 

نمت امبارح والنهارده كويس اوي وقعدت اشوف سام و دين طول اليوم الموسم التاني لحد ما خلص عشان عارف اني مش هفضي خالص بقية الاسبوع 

سبحان الله قدرت اغير حاجات كتير فشخ في علاقاتي 

دلوقتي الهدف المادي مش قلقان منه خالص مركز في كذا اتجاه  بالتساوي والجري مظبوط بس لو جودز شافني هيشخرلي عشان حرفيا مقصر فشخ في حق الكارير بس مش هيحصل تاني اني ابقي تحت رحمة موظف  تاني او اني اكون موظف 

طريقي مرسوم بالمظبوط و ماشي زي الساعه 

نفسي اشتري ارض بس مليش مزاج للحوار خالص ونفسي مسدودة منه برغم اني شايفه حوار عقلاني وكمان اسعار اراضي المانيا عالية فشخ

عندي برده قصص تانية لازم تخلص تخص الاكل والتركيز والعيشه عايز اروق بالي وعلي الهادي 

كله ماشي مظبوط بس النهارده اكتشفت جوانب جديدة في نفسي او يمكن كنت نسيتها 

علي بالي ميت حاجة تخص اهلي بس دا مش المجال للحكي فيها 

علي بالي ميت حوار تاني يخص البزنس 

ودا برده مش وقته 

بس حاليا نكمل نوم ونستمتع عشان بصراحة النوم ريحني النهارده ونمت الصبح وامبارح والعصر يخرب بيت الجمال 

المهم الفوقان والتركيز والوصول للهدف ومش شرط الطريق أنا عندي ثقة في ربنا أن التراب في ايدي هيكون دهب اه والله

المهم خلينا ننام عشان عيني وجعتني ولازم البس النضاره فتره علي الهادي كدا لحد ما عيني تتعافي وأقدر اعمل الشوربة وصحتي تبقي ميه ميه بدل ما هي ناقصة ييجي عشره في الميه ناو ودا مش مريحني مخليني مهووس بنفسي 

يلا يا كيمو يا حبيبي 

تصبح علي خير واحلام زي العسل وان شاء الله نحقق حلم امبارح ونسافر امريكا تاني في اقرب اجازة 

حب كتير يا كيمو يا حبيبي ♥️♥️

ايام وايام

 النهارده مكانش يوم حلو من اول مشوار المحامي ودوسلدورف لحد ما حلقت شعري وصغرت عشرين سنة فجاة و صلاه الجمعة وبعدها مشاوير صاحبي وقعدتي معاه 

هوا أنا فعلا عصبي ؟ 

في ناس كتير بتشتكي من عصبيتي الشديدة او ردود فعلي 

ممكن اكون فعلا عصبي مع الغباوة او اي رد فعل وحش

كريم العادي بتاعه ممكن يستحمل لكن الغباوة والاستفزاز من ناس زي النهارده بتدايقني فشخ وبتخليني اتعصب واتحرك بسرعة 

النهارده تعبت شوية واليوم كان طويل مش عارف حاسس انه كان فوق طاقتي وعايز اشغل الدفايه و اتغطي كويس واروح في النوم كام شهر ، هوا مطلوب مني استحمل غباء او كسل بعض الاشخاص 

مش بقدر للاسف 

خلينا في موضوعناً اليوم كان طويل 

الإرهاق والتعامل مع الاغبياء متعب 

خلينا نفكر في حاجة حلوة

أنا نفسي اخلف كذا بنت 

والله بجد امنية حياتي 

الحنية والحب والامان والدفا 

البنات حلوة وطيبة 

ودا كفايه اوي وسكر علي قلبي 

نفسي برده في اجازه حلوة مش عارف احدد لسه فين

بس هشوف 

عالاقل مش دلوقتي لحد ما اسدد بقية ال تلات الاف يورو اللي استلفتهم ونزلتهم مصر 

ولسه برده بعدها عندي مصاريف كتير الفترة دي 

بس الاهم اني عايز ارتاح وانام شوية

الناس كلها كبرت وكله بقي يقفل عليه بابه والواحد بيقعد لوحده ودي حاجة متزعلش دا العادي والطبيعي ، كل واحد وحياته محدش مهتم بحياة حد ولا وحدة حد ولا تعب حد 

في الاول والآخر دي سنة الحياة يارب يسعد قلوب الجميع يارب ويسعد قلبي أنا كمان

سهرة الجمعة اتلغت والعيال مسافره بكره برلين وانا مش رايح ملحقتش احجز وفوق كدا عندي حاجات اهم وكمان شايل السفرية دي لمناسبة حلوة 

وفوق كدا برده دا العادي بتاع يوم الجمعة يبقي الواحد تعبان فيه كدا او ميبقاش خفيف علي روحي بس المره دي الغباوة دمرت كل حاجة بتاع المحيطين بيا … خير والله

كيمو حبيبي أنا عارف انك تعبان وعايز ترتاح 

لما ييجي لك مزاج تكتب تاني النهارده لو سهرت اكتب 

وافتكر يا كيمو اني بحبك

واني وعدتك كام وعد من يومين 

وكل حاجة كويسة وهتبقي احسن يا حبيبي 

خد بالك من نفسك بس وريح وارتاح كويس 

احلام سعيدة يا حبيبي 

كريم

يوم لطيف حسن جدا حتي النهاية

 النهارده كان يوم طويل ، انجازات كتير ، مشاوير حكايات احداث وصل غير منتهي مع ناس كتير تركيز وقرارات وحاجات كتير مختلفة

ياتري كل دا كان مستخبي فين 

مش بدور علي احلام ولكني سعيد بالحياة 

والنهارده يومي كان عامل زي بحيره هادية لحد المغرب لحد ما جسمي قل فيه السكر و حسيت برعشه في ايدي وبقيت منور  لما شربت حاجت ساقعة وجسمي فاق كاني لسه صاحي 

الشوجر راش واه من الشوجر راش 

كلت برا صحن شاورما عربي كان لطيف اوي ودمه خفيف وكنت محتاج دا جدا 

احداث كتير بس مليان جري وقرارات وجسمي حرفيا علي حافة الانهيار في آخر اليوم مقدرتش 

أنا معرفش امتي بقيت كدا ولا ازاي بس مبسوط اوي 

كاني بستكشف نفسي وعالمي من جديد 

حابب تفاصيل حياتي اوي حاليا زي ما فيروز كانت بتغني وتقول زاهدا فيما سياتي ناسيا ما قد مضي 

مبسوط باسكتشاف نفسي ودقة ملاحظتي اللي بقت زي النار بتنور كل حته فيا 

أنا سعيد ليا اوي اوي اوي اوي 

أنا متوقع الشهور الجاية هتكون اكثر رحمة بيا وهتكون كلها حنيه عليا ومعرفش ازاي يمكن عشان عشت قسوة ووحدة في حياتي كتير ومن الطفولة دلوقتي بقيت طاير اهوه بكل ما فيا 

بفكر نفسي بكل حاجة حلوة فيا سواء الحكي والكلام واللدغة والمشي والضحكة والابتسامة الحلوة والعيون اللي بتنور 

كل حاجة حلوة فيا حتي عشرتي 

بفكر نفسي قد ايه بحب كريم وسعيد بيه 

كريم بخير ودا شيء يستحق الإشادة بيه 

يومي بقي احسن وصحتي في تحسن طاير 

ودا مش عادي ولكني سعيد بنفسي اوي كدا وبحبني 

يارب يكمل صبري بالخير يارب ويسعدني 

المهم يا كيمو انت تستاهل كل الخير وكل الحب والحنان في الوجود 

ووالله وعد مني كله هيبقي حلو والحياة هتبقي احلي وبكره مشوار حلو ويوم احلي 

أنا بحبك جدا يا كيمو و هنحافظ عليك

ليلتك زي السكر 

تصبح علي الف خير يارب 

إيه ياعم

 ايه يا كيمو كل دا ؟ 

اليوم كان طويل صحيت تلات مرات علي مكالمات وبرده نسيت اكلم المحامي والمفروض اتصل بيه بكره والمفروض اعمل حاجات تانية ، خلي دا للاخر وخلينا في المهم 

المهم اليوم ابتدي ونزلت فطرت مع صاحبي في مطعم دونر واينعم الدونر كان لطيف اوي وسكسي خالص بس مكانش ليا نفس وبعدها مشوار طويل لحد حدود هولندا وبعدها علي طول رجعنا تاني اوبرهاوزن عشان نقعد سوا ونعمل حاجات كتير وبعدها حصة سواقة كان دمها خفيف اوي اوي اوي والراجل قعد يضحك ويهزر وبعدها روحت تاني لصاحبي لحد حداشر بليل 

دماغي مشغولة طول اليوم بموضوع المحامي والورق والحوارات دي وبصراحة الطريق كان دمه خفيف وقعدنا نسمع أنغام ورامي صبري وانا مليش تقل علي الاغاني العربي بس المشوار كان دمه خفيف 

أنا انبسطت من المشاوير والناس والتصرفات والقرارات الكتير اللي باخدها والجري دا بيخليني عندي باور فسيح يعني لحد دلوقتي لسه مكلتش والاكل في الفرن 

انبسطت من ان عندي صاحب يصحيني ويكلمني ونفطر سوا وانبسطت من ان في حد مهتم بتفاصيل حياتي وانا اساسا مقصر فيها بس تركيزي الكامل غصب عني رايح في حوارات المحامي بس عادي هنا السلطات بتمارس البيروقراطية بمزاج ودا بيطحن الواحد  بس عادي أنا متعود وعشان كدا اساسا جايب محامي وواخد مبلغ قد كدا استثمار في راحة بالي 

المهم اني دلوقتي محتار في موضوع الرخصة مليش مزاج أصلا اكمل  بالرغم من اني بركب عربيات كتير اوي وبالرغم من اني حسيت بقيمة العربية ، بصراحة مش عارف هعمل ايه بالعربيه مش لاقي لها فايدة وانا اساسا طول الوقت جوا مدينتي وقريب ان شاء الله لما افتح مشروعي هتشغل اكتر واكتر 

صحتي بتتحسن والحمد لله ضاحي رايق وذهني صافي بس للاسف حلمت اني نايم في البيت في مصر وانا دا جابلي خضة محترمة بس قدرت اسيطر علي عقلي ومشاعري بشكل كامل الفترة دي بقيت عارف افكر في ايه واوجه نفسي في انهي اتجاه 

رايق و كويس ودا حلو اوي علي قلبي والحركة بركة 

انت عارف يا كيمو أنا بحبك قد ايه ونفسي اسعدك قد ايه بس وعد مني هنأسس حياة حلوة ، هنتعب سنة واحدة بس وبعدها هنعيش عيشة تانية خالص وعد مني وحياة فعليا رايقة ووعد مني مش هخليك تعيش غير مع حد بيحبك اكتر ما بيحب نفسه ، مش بعد دا كله هنرضي باي حاجة والسلام ولا حتي بنصف حياة لانها مش هتكون حياة ، ان شاء الله السنة دي بس يا كيمو والشغل يمشي والشركة تقف علي رجليها ويمكن العربية تساعدنا في دا 

أنا مطنش التاجر في مصر عشان عندي اولويات تانية بس عارف اول الموضوع واخره ولسه عندي فلوس تتسدد هنا باقي عليا بتاع الفين لازم يخلصوا الشهر الجاي عشان نروق 

حبيبي يا كيمو ، قوم كل وانبسط ، بتخيل في يوم من الايام لو ابني وبنتي قعدوا يقروا حكاياتي وكلامي هنا والله هتبقي عسل فشخ وهيحسوا حتي ولو بعد زمن اني عايش معاهم وشافوا تطور حياتي وان عادي نقع ونتعب ونحب ونتوجع وننجح 

خلاصة القول لو يا حبايبي هتقروا الكلام دا والله العظيم بحبكم بجنون وتعبت اوي عشان تيجوا الدنيا وتعبت عشانكم وبحبكم حتي من قبل ما اشوفكم ويارب تكونوا باحسن حال وسعادة وقلبي راضي عنكم ولكم مني حب الدنيا كلها والله واكتر شوية 

روح كل ونام يا كيمو بكره في حوارات مهمة 

ليلتك زي العسل واحلام سعيدة يا حبيبي 

كريم 

صباح الفل ياكيمو

 صباح الفل يا كيمو 

انا صاحي متاخر وبراحتي ومدفي الاوضة و مدفئ  نفسي باللحاف ، أنا الحمد لله مبسوط يا كيمو عشان عندي صاحب بيتصل يسألني صحيت ولا لسه وعملت ايه وكدا يعني ، سعيد جدا والله ، دا غير مكالمة امي الصبح.  ، بس ملحقتش ارد وهكلمها تاني 

الدفا في البيت حلو بس الشمس طالعه والسماء صافيه هعمل واحد قهوه حلوه وانزل اتمشي بعد الفطار واقعد في الشمس واروق حالي وأحوالي بس محتاج شاور الاول عشان الفوقان

كيمو حبيبي انت واحشني فشخ وشكرا علي امبارح لوقفتك اللطيفة وتصريح مشاعرك وتوضيح موقفك أنا عارف ان دا مكانش  سهل عليك لكن فخور بيك والله 

كيمو حبيبي عايزين نركز في كام حاجة الفتره اللي جايه ، ربنا يكرم. والله احنا صحيح بنبتدي من نقطة الصفر بس اكيد كرم ربنا واسع ، عايزين نركز ومتنساش عايزين مكالمة تليفون حلوة النهارده عشان نسال المحامي هنعمل ايه ونروح نخلص الورق بريد ، حاول تهدي يا حبيبي وتروق كدا كدا رزقك مكتوب وجاي بامر الله ومفيش حاجة إلا وهتاخد عليها مكافأة من ربنا دي جزاء الصبر يا حبيبي

كيمو حبيبي قوم شوف قهوتك و شوف فطارك وجهز للخروجة جري في جري واستمتع بالشمس والهوا الرايق انت تستاهل كل حاجة حلوة في الدنيا وانا والله بحبك جدا يا كيمو 

متنساش صحيح النقط اللي كاتبينها علي الصبوره برا عايزين مننساهاش

يسعد صباحك يا كيمو يا حبيبي 

ويسعد ايامك وينور قلبك ويشفيك ويرضيك يارب 

كريم 

أنا والليالي

 عزيزتي طمطم 

هل في كلمات تكتب او توضح بحبك قد ايه ؟ هل هناك من كلمات يمكن ان تصف الجنة والنار ؟ ما بين نار لوعة العشق ولذات الحب التي لا تنتهي ، معلق أنا بين الحياة والموت وأنت كالبحر كالصحراء لا تروي العطش وعشقك لا يغني ولا يسمن من جوع ، هل هناك شيء يصف العشق الحقيقي ؟ ليس بيننا أبناء ولا شيء يبقي بيننا ليغنيني عن لوعة الفراق 

عزيزتي 

تغيرت التواريخ واصبحت ذكري عابرة وأضحت هناك ذكريات أخري تملأ حياتك وتواريخ أخري و ( أنا والليالي عشاق ياغالي عشاق بقالنا زمان ٢٨-١-٢٠٢٤ ) لا بأس هذا مصيري وهذا ما أستحقه ، شكرا لك ، لم أفعل لك سوي كل خير ، ضحيت بكل شيء وأصبحتي زادي وزوادي و متعتي في الحياة ولا حياة بدونك ، ربما عشقتك وأحببتك أكثر مما ينبغي ، هل يجب أن أكف عن الكتابة لك ؟ عن متابعتك ؟ عن رؤيتي لكتابتك ( المنشورة بابليك ) قبل أن تمحيها بضغطة زر ؟ ما يفصلني عنك ليس مدينة ولا بعد ولا مسافات ، ما يفصلنا هو غضبك و قسوتك وضغطة زر أخري علي هاتفك ، مجرد مكالمة ، مجرد لمسة بسيطة تفتح باباً ، مجرد لمسة بسيطة علي هاتفك ستنير حياتي ، ربما حتي تلك اللمسة لا أستحقها ، ما فائدة الغفران الآن ؟ ربنا ذهب عشقك ومحبتك أدراج الرياح ، تكتبين اليوم لتثيري غيرتي ؟ مجرد انتقام ؟ ليس هناك ما تبقي يا حبيبتي لتنتقمي منه ، مات كريم ملايين المرات ، كل شيء رحل ، مجرد جسد تبقي ها هنا ، إحترقت روحي وأيضاً قلبي ، لم يبقي شيء

أتمني لك الخير كله ، كل السعادة ، كل الحب ، كل ما حلمت أن أمنحه لك ولم أجدك ، كل شيء والله يا فاطمة ، بلا إستثناء ، إن كنتِ وجدت من تحبينه أكثر مني ، إن كان لك مرسي آخر ترسو عليه سفينتك ، أتمني لك الدنيا والآخرة ، والخير كله عاجله وآجله وأعدك أن أسعد لأجلك ، حتي وإن لم يبقي لي في الحياة سوى نفسي وجسدي المرهق وروحي ونفسي المريضة ، أتمني لك بيتاً هادئاً وسعادة لا توصف وعمر مديد وأبناء وديعين حسني الخلقة والخلق مثلك

لا أخفي عنك قلبي يحترق ، أشعر بالنار تأكلني ، لهذي الدرجة وصلت الأمور ؟ حسنا أنا لست حزينا بعد الآن ، مقهورا ربما وربنا أيضا أتذكر كل سيرنا في رحاب القاهرة وكل ذكرياتنا معاً ، هنيئاً لك إذا وجدتِ الحب في مكان آخر ، إن كان لك وطن غيري ، إن قبلتي هذا فهنيئاً لك ، إذا وجدتي من يمنحك قلبه وروحه مثلما فعلت فوالله هنيئا لك والله ما تمنيت لك سوي الخير كله وسعيت في الخير كله وبعت كل شيء لأجلك 

شكرا علي إفاقتي من الوهم ، ظننت لوهلة أنني المقصود ، لي كل الحق في حسدها الشخص وغبطته ، فاز بقلبك.  ، جعلك تكتبين ، اي مكسب في الحياة اعظم من هذا ، اي شيء يمكن ان يناله المرء أحلي منك ؟ والله لا شيء

عزيزتي وحبيبتي ، ربنا سأكف عن خطاباتي لك ، ولا أخفيكِ سراً فقد أعددت العدة لعودتنا وأرسلت لك الورد الي مقر شركتك ( مرتين ) مع أبيات من الشعر ، واشتريت عطرك المفضل واول عطر أهديتيني اياه لننعم بهم وأقدمهم لك هدية يوم أن ألقاك وحرمته علي نفسي أن أشتم رائحته في غيابك، والله جمعت الدنيا كلها لأجلك ، شكرا يا فاطمة لأنك جعلتني أفيق من هذا الوهم ، ربما هذا ما أستحقه ، ربما يجب ان اكف عن متابعتك واتابع حياتي فقط ، والله الكلمات تدمي قلبي وتكسره وانا اكتب إليك ، حبيبتي إنعمي بالحب وإنعمي بالحياة وسأحاول أن أنجو وأحيا ربنا يرزقني الله ما رزقك إياه 

هل تعلمين أنني كنت أعرف ، والله كنت أعرف لكني كذبت نفسي ، اي شيء يجعل حبيبتي تقسو كل هذه القسوة وتبتعد كل هذه المسافات ، وهي اقرب الي من حبل الوريد وتسكن قلبي ، ما الذي يجعلها تكتب وتحكي في ظل البلوك في كل مكان ؟ ما الذي يجعلها أصلا تهتم بي ؟ عزيزتي والله ما عدت قادرا علي الكتابة ، اختاري جيدا وأنعمي والله كنت اعرف ان في تواريخنا ستنشرين شيئا يحرق قلبي ربما نبأ خطبة او زواج ، ربما ربما ربما ربما بوست جميل عن حالة من الحب ، وفقك الله في كل أرض وكل زمان ووالله لسه روحي ساكناكي وبحبك ووحشتيني جدا وهتوحشيني جدا 

احلام سعيدة 

وليلة سعيدة مع من تحبين وعذراً علي سوء الفهم 

مازلت أحمقاً موهوما ولكن هذا شأني وهذه مشكلتي 

ليلتك سعيدة يا نور عيني 

يا حب العمر 

كريم

زي الليلة

 زي النهارده كان ذكري سفرنا واول يوم لينا سوا في بيتنا 

وذكريات سفرنا وخطوبتنا 

زي النهارده كنتي جنبي 

لو كان الكلام ليا وضحي 

أنا دايما هنا وجنبك وبحبك ووحشتيني اوي 

لو مش ليا هتنشري بابليك ليه ؟ 

عايزاني ؟ بتحبيني ومؤمنة بيا بجد ؟ 

محتاج اهدي الشياطين جوا دماغي واهدي عشان اعرف اكتب لك رد حلو 

بس والله العظيم بحبك 

ووحشاني ووحشني مشينا سوا ووحشني اللف في شوارع القاهره وإسطنبول والمانيا

ارجوكي لو مش ليا متلعبيش بيا

لو مش عايزاني سيبيني في حالي عندك الف حد يصقف علي كل كلمة ليكي 

بس أنا مش عايز انزل علي مفيش وييجي لي احباط 

ربنا يهديكي ويردك علي خير ويجعل فيكي ومعاكي الخير كله يارب 

الموبايل بيفصل شحن وانا برا 

هكتبلك في كل حته

والنهارده

يارب يجمعنا علي خير يارب 

خليني احكيلك

 النهارده صحيت مستعجل عشان بقيت بصحي بدري وعايز اعمل مليون حاجة في اليوم وشربت قهوه وكلمت خالتي عشان اروح اجيب الطرد من الخزنة لان بتوع التوصيل لما مش بيلاقوني فالبيت مش بيسيبوا اي ورق ويضطر اتصل بخدمة العملا يا اما استني يومين وصول الورقة بالبريد 

المهم روحت زي الشاطر كلمتهم وخدت الرقم وكلمت خالتي في الطريق وبعدها استلمت هدية عيد ميلادي برفان فيرزاتشي ومعاه شاور جيل في علبة حلوة وكارت لطيف اوي فوق الوصف 

فرحت والله اوي برغم اني مليش شوق ل فيرزاتشي  بس من يومين كان مازن بعتلي برفان اسد من لطاف ودا قريب جدا من سوفاج اليكسر اللي بحبه بس بقالي فتره مش بجيبه فكذا برفانين جداد في المكتبه بتاعتي 

وصلت البيت فرحان بالطرد وبعد دقايق ابتدي وشي يوجعني ، وجع مش طبيعي قوي جدا معرفش السبب وبعدها اتجمدت مكاني ونمت عالكنبه علي فيلم كلاود اطلس ، مكنتش محتاج انام بس كان لازم انام مكنتش مستحمل الوجع كان فوق طاقتي 

صحيت والوجع مكمل وصاحبي مكلمنيش عشان انزل معاه غير علي الساعه خمسة كنت مرتب احلق واروح مدرسة السواقة بس فوتت الحصة و روحت لصاحبي روحنا مشوار مولهايم والحمد لله عملنا حادثة في الجراج و البوليس جه وعدت علي خير عشان اساسا البوليس مش شايف الضرر في عربية البنت التانية بس هي غباوة كدا 

نسيت اقولك جالي حواب عصبني جدا جدا جدا ، بواجه تعنت رهيب ومعنديش باور لكدا ودا مخليني علي اعصابي بس مظنش اساسا ان اللي جرالي في وشه سببه الجواب عشان معرفتش عنه حاجة غير آخر اليوم بس ان شاء الله هخلص عن قريب ورايح ميعاد قريب اوي كمان عشر ايام ولا حاجة وربنا يسهل ، حاسس والله ان بيتلعب بيا بس مستحمل ، لان مفيش بديل وسايب المحامي يتعامل 

روحت لصاحبي وقضيت وقت لطيف ولفينا شوية والدنيا حلوة ، وفطرت بعد ما صحيت بس معرفش مالي ملخبط وموجوع ومحتاج شوية هدوء او حلول للمشاكل 

أنا وصاحبي قفلنا المكان ومشينا سوا والدنيا حلوة بس الفكره بقي اني كنت مطلع لحمة جاهزه للشواء بس مقدرتش اروح اعملها جبت بيتزا من الايطالي اللي تحت البيت كالعادة ، عايز اقولك البيتزا بتاعته تحفه جدا فوق الوصف 

كذلك اتواصلت مع التاجر من مصر وطبعا الدنيا اتظبطت شوية بس الدنيا هديت برده وكله علي العادي والحمد لله ويمكن الدنيا تظبط شوية بس بحاول والله ، حاسس ان الحلم كبير اوي بس كالعاده بقول لنفسي اني ياما حطيت حاجات في دماغي وعملتها ، يكفي اني عشت معاكي ومكانش في مستحيل اكبر ،

 انتي وحشتيني اوي. اوي اوي ساعات بحس اني ملحقتش اشبع منك واوقات بحس اني عدي الموضوع بسرعه اوي واوقات بحس انه كان حلم بعيد اوي اوي اوي وانا مش طايله واوقات بحس اني نفسي الزمن يرجع تاني عشان اعرف اعيش وقتي معاكي بوعي كافي بادراك كافي وحب كتير والله، وحشني وجودك وابتسامتك وهزارك اوي ، بتجيبي فعلا بهجة في المكان 

شايفة النهارده كان عامل ازاي ؟ ولسه مخلصش

بكره المفروض احلق واروح كذا مشوار واكل كويس وارتب حاجات واتفاقات كتير 

بكره  المفروض اعمل حاجات كتير اوي بس عايز اقولك اني مرهق وجسمي واجعني اوي اوي ووشي كذلك حاسس نص وشي منمل او فيه وجع قوي وشديد اوي تحت الجلد زي ما يكون في نار ، دا بيحصل لما بيكون عليا ضغط كبير او وجع شديد او الم شديد او قلق وضغط نفسي  بس مش عارف مالي يمكن احساسي بالوحدة او بالتعب في عيد ميلادي او احداث بتحصل او بعدي عنك وشوقي ليكي ويمكن الذكريات الكتير او عقلي الباطن معرفش بس الموضوع صعب اوي اوي اوي  ومسيره هيعدي الوجع دا ان شاء الله مش هيكمل لبكره يعني ، هنام كويس واتدفي واحاول اهدي اعصابي 

خدي بالك من نفسك واحلام سعيدة واعرفي انك وحشاني اوي اوي اوي اوي فوق الوصف والله

ليلتك سعيدة يا حبيبتي 

كريم

حوارات كتير

 كنت مشغول الفترة دي اوي مع صاحبي في البزنس بتاعه بس والله ما غبتي عن بالي يوم ، انتي واخدة بالك اننا بنكبر ؟ كل حاجة بتروح شوية بشوية ؟ ايام كان ممكن نعيشها وتفاصيل كتير 

سوري نسيت انك اوريدي اكيد عايشه امال مختفيه من كل حته ليه ؟  النهارده شيلت بلوك الواتس وعارف انك عاملة بلوك علي الجنب التاني بس عادي يعني 

المهم كنا بنقول 

المفروض مخططي السنة دي انها تبقي احسن سنة من حيث كل حاجة وخاصة الماديات والمشاريع وفعليا باخد خطوة في الموضوع 

ايوا نفسي تبقي معايا تشاركيني الحلم ونقعد نتناقش بالساعات في اللي بعمله

بس عادي هعمل واتحرك  زي ما تكوني هنا بالظبط ، عقلي بيجري بسرعه اوي يا طمطم حاسس نفسي فات عليا سنين مش بس كام سنة 

فارق معايا كل حاجة نظرتي وكل حاجة اتغيرت 

بقيت شايف ان العلاقه نفسها محتاجة تبقي صحاب وابطل احكي وان في حاجات محتاج فعلا اغيرها في العلاقه وان المفروض الواحد يريح اكتر ما … طيب ما أنا كنت بريح

مش موضوعنا دلوقتي 

عايز ابتدي في اسرع وقت بس كالعاده في مشاكل في السيولة ، حاجة مش متوقعه صح ؟ 

بالظبط وبالذات لو بتجمع في نص مليون يورو 

بس سهله طبقا للبلان يعني المفروض اعرف اعمل دا قريب ان شاء الله

المهم يعني ان لاقي نفسي شوية في البزنس وصدقي او لا تصدقي عندي خبرة في حاجات فيه

عيد ميلادي كان محبط جدا وفي ناس كتير طنشت وفي ناس حتي مهتمتش تتصل وتقول سلام عليكم بس عادي اتعودت علي دا وغير كدا اساسا شفت اسوا من كدا ويمكن بطلت أتعشم بزيادة في الناس ودا اكيد مش ممكن 

النهارده كان يوم راحة ونمت كتير عشان اتطحنت طول الاسبوع بجد والله ومن بكره هبتدي سيستم جديد وهرتب امور تانية خالص 

بس المفروض ارتب حاجات تخص البزنس لان عشان اوصل للرقم دا محتاج مجهود وافكار حلوة 

سهل الموضوع ان شاء الله حققت اصعب منه مليون مرة قبل كدا

المهم انك وحشتيني اوي ، وهوا أنا موحشتكيش؟ 

أنا مش مهتم باي حاجة غير اني اطمن عليكي وألاقيكي وحشتيني بجد 

ومش عارف ازاي ممكن نعمل اول محادثة

أنا مش مطنشك بس بعد آخر ايميل بعتيهولي بقي معنديش اختيار غير اني اقعد في حالي وابطل احاول معاكي شخصيا عشان متتعصبيش او تعملي فيا مصيبة 

انتي عارفة اني قوي جدا بس الفكرة اني بحبك انتي ومش عايز ابقي قوي عليكي انتي ولا امسحك من دماغي 

كوني بخير 

وابقي طمنيني عليكي 

ليلتك زي السكر واحلام سعيدة يا حبيبتي وياريتك هنا 

كريم

عارفة

 عارفة كام مرة ببص عليكي ؟ 

عارفة  كام مرة بدعي ربنا ؟ 

عارفة كام مرة بفكر ممكن نرجع او نعيش ازاي ؟

عارفة كام مرة بحس بحرقة القلب من غيابك او من اللي جري ؟ 

عارفه كام مرة بتخيل وجودك هنا ؟ 

عارفة كام مرة بقول تاخد اللي تتمناه بس ترجع ؟

عارفه كام مرة بستناكي كل يوم وببص علي بروفايلك او علي اي حاجة تخصك وبستني اي جديد باي شكل.  ؟ 

عارفة كام مرة … في اليوم يعني كل دا … عارفة ؟

خير 

عيد ميلادي

 مقدرتش امنع نفسي استناكي مع اول دقيقة في السنة 

مقدرتش أمني نفسي بصوتك او بكلمة منك او حتي عيونك تشوفني او تفتكري ان النهارده عيد ميلادي 

مقدرتش غصب عني أنا اسف 

بتأسف كتير 

المفاجاة اللي محضرها اني اكتشفت كدا تقريبا يعني اني عندي 

ADHD 

ودا بقوله لا لكسب التعاطف ولا كتبرير عشان نبقي واضحين بس

حاجات كتير بتفسر 

تقلبات المزاج و الأفكار الكتير والكلام الكتير والخوف من الهجر والرغبة في الامان والرعب اني ابقي لوحدي 

مستويات السكر برغم عدم إصابتي بيه اللي نزلت او اتاخرت في الاكل يبقي في مود وحش اوي ولما باكل ببقي حلو وجميل وعسلية

قلقي وتوتري الدايم والشديد ولخبطتي معظم الوقت 

لما كنت في مصر آخر مره دورت علي مكان اعمل فيه تحاليل بس للاسف كان الوقت فات ودلوقتي مقدرش انزل مصر أصلا حتي لو فاضي وفي اجازة زي دلوقتي 

وفي المانيا مضطر استني سنة عشان اعمل التحاليل دي بس عادي 

بس واضح من الحرمان العاطفي والخوف من الهجر والتضحية بالنفس في اي مناسبة ودا واضح في تصرفاتي في حاجات كتير اوي 

دا غير الساقعة واللي بتعمله فيا 

انتي متعرفيش كنت بعمل في نفسي ايه عشان اسيطر علي نفسي 

فات كام سنة علي جوازنا ؟ طيب طلاقنا ؟ 

فات كام يوم وليلة وانتي مش هنا ؟ 

بقالي زمن حتي مشوفتكيش ولو صورة عالفيس 

ياتري لسه سكرة بتنوري ؟ اكيد طبعا 

ياتري لسه زي ما انتي ؟ 

معرفش 

بس وحشتيني اوي 

ومش عارف ازاي كل دا حصل ومش عارف ازاي وصلنا لكدا 

مش هقعد اقول وأفسر في دماغك لو في الواقع 

لو كنتي معايا لو لو لو لو لو 

مش عارف اقول إيه أصلا  بقيت بعطل لما يتخيلني بكلمك 

الصدمة وحشة 

كان نفسي حتي في خبر حلو 

طيب اي حاجة اي بوست اي صوره او اي حاجة 

أنا استاهل القسوة دي كلها ؟ 

أنا وصلت لكدا ؟ 

من يومين اكتشفت اني معنديش بيت ولا امان ولا حد يحضني ولا احري عليه 

الحياة صعبه 

بس النهارده عيد ميلادي وانا بحبك اوي ووحشتيني

ممكن اسمع صوتك ؟ طيب اتبسط باي حاجة منك ؟ ممكن احلم بيكي النهارده واشوفك.  ؟ 

اليوم خلص وكل حاجة بتعدي 

بس انتي وحشتيني 

هحاول احلم النهارده اني صحيت علي صوتك او وجودك او خبطك علي الباب 

النهارده اول ما رجعت من برا ناديتك 

خدي بالك من نفسك عشان انتي غالية عندي اوي 

مش لاقي حاجة اقولها 

بس ينفع اتمني ان تبقي موجودة ولو يوم واحد ؟ 

ينفع اتمني ان توقفي القسوة والزعل والهجر دا 

ينفع اتمني لو احلم ؟ 

أنا فاكر أيامنا في تركيا كلها 

أنا تعبان ومرهق اوي 

ووحشتيني اوي اوي اوي 

كل سنة وانتي حبيبتي 

فاكره البوست بتاع آخر عيد ميلاد لما كتبتي لي ملقتش ونس العمر احسن منك واني صنت الامانه ؟

كان نفسي اقرأه بس هسمع القصيدة وانام 

تصبحي علي خير يا طمطم 

يوم الاكل

 سافرت وقلبي ملهوف وخايف وعديت بلاد وحضرت كل حاجة عشان اللقاء وعشان نبقي سوا 

عملت كل حاجة بكل شكل عشان كل حاجة تبقي كويسة 

فاكر وقفتي في المطار وفاكر اول صورة خدناها سوا ومش عندي ولا لاقيها ، ذكريات السنين كلها معاكي انتي 

فاكر كل حاجة وشعري ولبسي وفاكر كنت طاير بيكي ازاي 

فاكر حتي كنتي تعبانه ازاي 

فاكر الاكل والشارع والطريق من المطار القديم للميدان 

فاكر المطعم وكلنا ايه واتصورنا ازاي واتصلنا بمين 

فاكر طلعنا روحنا فين وفاكر اول ليلة لينا سوا 

فاكر حتي نمت فين وفاكر صليت قد ايه وفاكر صليت فين وكام ركعة وليه 

فاكر حتي المكتب اللي دخلت فيه الحمام لما القولون كان بيستعين وصور ماكدونالدز منزل سندوتشات شاورما 

فاكر فرحتك وخوفك وانتي بتلفي 

فاكر تقي 

فاكر انك كنتي مكسوفة بس جيتي وخايفه بس عديتي 

فاكر كل حاجة كانها دلوقتي 

كانها بتحصل حالا 

فاكر بشكل مفزع حتي الاكل اللي خدناه بعد ما اتبقي من العشا وروحنا وشلناه عند عمر وباظ

كريم مبينساش وكل ذا بدون توثيق 

فقط الذكري لانها كانت ملحمية 

بالمناسبة السعيدة دي 

احب اقول شوية حقايق 

أنا مش متصالح مع الوحدة بتوجعني وتتعبني اوي وبتاكل فيا وبتحرق روحي 

أنا مش متصالح مع فكره ان ممكن مشوفكيش تاني وانك مش ليا وممكن تبقي في مكان تاني مع حد تاني في يوم من الايام بس لو قبلتي دا علي نفسك مليش حق اعترض 

أنا مش متصالح مع افكار وحاجات كتير اوي  

برغم كل التفاصيل اللي فاكرها حاسس اني ملحقتش اعيش معاكي ما بين شغلي وشغلك و تفاصيل كتير اوي اوي اوي من ضمنها الكورس والشغل والمناسبات وغيره حاسس اني مش مصدق اني عشت الحياه دي 

حاسس ان كل حاجة بعيد وعاملة زي حلم متبقاش متاكد انك عشته بس صاحي والدموع مالية عيونك والوجع بيحرق قلبك و حياتك متدمره ومش قادر تصدق انك عشته وان كل دا حصل ، دا اللي حاسه 

بالمناسبة السعيدة دي 

مبطلتش احبك او أتمناكي او احلم بيكي 

مبطلتيش توحشيني 

علي بالي ونفسي في كل حاجة تجمعنا 

ببني حاجات دلوقتي هتساعدنا قدام ان شاء الله لو كان لينا نصيب سوا 

أنا مفتقدك جدا 

اليوم دا كان محتاج خروجة وعزومة حلوة و نقعد نشوف فيلم ونشرب هوتشكليت سوا بليل وننام قدام التلفزيون 

مفتقدك وبحبك

كنت علي طول بقولك بحبك كتير بداعي وبدون داعي كرضيد للمستقبل وبقولك يمكن ييجي يوم معرفش او مقدرش اقولهالك 

اعتبري اليوم دا منهم وافتكري منهم واحدة

تصبحي علي خير واحلام سعيدة

كل ما افتكر ذكري حلوه هكتب عنها وانا فاكر كل حاجة بس هفتكر الفرح والحلو بس 

ودا كتير اوي 

بس والله ملحقناش نعيش ولا خذنا فرصة سوا 

واعتراف كمان : كان لازم أصاحبك واحبك وأقدرك وأعاملك احسن من كدا حتي لو كنت فاكرني بعاملك حلو كان لازم اعبر اكتر واحسسك اكتر 

تصبحي علي خير يا حبيبتي ويارب يجمعنا سوا في اقرب وقت

مفيش بيت شعر تقريبًا أقسى من بيت ابن الفارض لما قال:

«إن كانت منزلتي في الحب عندكم ما قد رأيت، فقد ضيّعتُ أيامي..»