اسبوعين وشهر ونص

 ابتدي منين ؟ مش عارف لكن هبتدي 

***

اول امبارح وصلني الجواب ، والنتيجة والشهادة ، … الموضوع صدمني  لما لقيت الجواب في البريد ، اللي هو قلت بس خلاص انا سقطت برغم اني عطيت الاسئلة وانا في الامتحان كالعادة واتاكدت قبل ما اقوم اني ناجح ، لقيت الجواب بعد اسبوعين جاي لي بالشهاده وبيقولي مبروك النجاح ومعاه الشهادة 

لما بقول لحد مش بيصدق ، ان الخطوة اللي بتاخد ست شهور تخلص معايا حرفيا في اسبوعين 😀وهي دي بركة ربنا ورجمته وخطته وتسهيله ، حتي مع البيروقراطية الالماني ومع الحاجات اللي بتاخد وقت وتضيع عمرك في الفاضي ، رحمة ربنا او بمعني أصح : إرادته

اللي هوا لما بتدخل في حاجة بتخلصها وتحلها بشكل رباني سحري يتعجب له الناس ، ، الخطوة اللي بتاخد شهور بيخلصهالك في اسبوعين ، كنت بتنطط من السعادة ومش مصدق نفسي بس مرضيتش اجيب سيرة غير لاقرب اقرب اقرب الناس وبس 

عشان يوم الامتحان كان عندي امتحان تاني دولي يوم ٢٤-١١ والامتحان الدولي كان في مشكلة في الكاميرا وقعدت اظبط الدنيا اربع ساعات ونص ، خد وقت كتير لحد ما دخلت الامتحان  واعصابي باظت تماما وكنترمصر علي دخول الامتحان برغم ان زمايلي فالشغل ومديري واقرب الناس ليا قالولي خلاص يا كريم يمكن ربنا مش رايد أجله لبكره ، يمكن لو دخلت تسقط ، وانا رفضت لان دا بيناقض مبدأ السعي وفوق كدا كمان عشان مش هقدر اقضي ليلة في انتظار الامتحان واعمله تاني يوم ، ابتديت الامتحان الدولي الساعه اتنين ونص بدل عشره صباحا و كان عندي الامتحان التاني حضور في مكان قريب هنا الساعه خمسة 

والحمد لله برغم كل الضغط اللي كان عندي بسبب امتحانين في يوم واحد الا ان رحمة ربنا ساندتني ووقفتني علي رجليا 

إرادته 

*** 

ليه كلمة اسبوعين مميزة بالنسبة لي ؟ 

عشان دا الوقت اللي استلزمني السنة اللي فاتت عشان ابني اساس كل حاجة واثبت رجليا في المجال ، قعدت اخلصت لله وذاكرت وبرغم التعب والعياط والقهر والاكتئاب والحزن من كل الظروف وطردي من ضغليزالا اني وقفت علي رجليا برده في اسبوعين وكل اسبوع بشهادة دولية وامتحان خلاني بكل سهوله اوصل لمكانة عالية 

الاخلاص والالتزام والاستمرار كان هوا المفتاح اللي ربنا كرمني بيه 

لما جيت احكي لحد قريب مني من يومين قالي يا سلام ، هو الموضوع بالسهولة دي ؟ قلتله اه

بس نسيت اقوله اني عندي صور وفيديوهات ليا قاعد قدام اللاب توب منهار وحزين وبدعي ربنا بحرقة وباخلاص نية وهوا بيفتحلي الباب 

دا غير الخيرة وبقية الشهادات و الكورسات والتعب في الشغل بس اول اسبوعين كانوا احلي اساس

نسيت اقوله ان بركة ربنا وإرادته بتخلي الخطوة اللي بتاخد سنين تخلص في اسبوعين بس حرفيا 

تخيل 

*** 

الطرد وصل اول امبارح المانيا ووصل البيت عندي اشعار بالاستلام امبارح 

الطرد محتوياته متجمعه من اربع دول ، حاجات هدايا من ناس وحاجات شخصية وحاجات هدايا انا اللي شاريها ، محتويات الطرد حساسه جدا وكلفني ضعف تمنه بسبب ان البيه محتوياته عدت علي اربع دول 😀

بس الحمد لله رب العالمين روحت مكتب البريد امبارح واستلمته وفتحته فالشارع واتنططت من السعادة ، شيء لا يصدقه عقل 

جالي هدية قيمة جدا في وسط الطرد ودا اسعدني وبقيت ببص لها كل سوم وشايلها في ايدي طول الوقت وسعيد زي عيل صغير ،وسبحان الله قبلها بيوم كنت بفكر اشتري لنفسي نفس الهدية اللي جاتلي بس الهدية كانت مفاجاة فاتصدمت وحسيت ان ربنا بيقولي متتعبش نفسك انا هراضيك 

حطيت كل حاجة في مكانها وبصيت للطرد وقعدت اقول لنفسي ، شهر ونص بالتمام عشان خاطر الحاجات توصل لحد عندي ، النية الصافية والصدق فوق كل حاجة وعلي راي واحد صاحبي بيقولي : ربنا فوق كل شيء يا كريم 

*** 

تقريبا اعظم عدو للانسان نفسه والا مكنتش الشهر ونص دول جبت علب سجاير ب ٥٠٠ يورو ، الغباء دا نسب في البني ادم وصدري وجعني لكن الحمد لله رجعت اسيطر علي كل حاجة تاني وصدري في تحسن والحمد لله وكذلك معدتي بالتركيز اللي ببذله في جودة ونوعية كل حاجة جسمي بيستجيب بسرعة والضغط بتاع الامتحانات خلص واتبقي امتحانين بس رتبت مواعيدهم وريحت دماغي ومعايا وقت كافي ومظبوطين علي الخطة بتاعتي بالحرف 

***

امبارح واحد بياع في محل زيوت طبيعيه قعد يكتبلي وصفه معينه للمكرونة الايطالي عشان بشتري من عندهم زيوت وكريمة معينةوكان باين عليا من اثرياء القوم واشتريت كتير فقعد فضي نفسه يكتبلي الوضفة وفي الاخر بعد ما دفعت اشتريت حاجات تانيه بقينا كلنا واقفين نضحك وانا سعيد بشوية الزيوت الطبيعية ميه في الميه اللي جبتهم ، الناس مش دايما هنا كدا لكن دا من الارياف وكمان علي حدود هولندا فالطبع بتاعهم مختلف ، وانا هناك سالت نفسي ليه منقلش مكان زي دا ، فيه بيوت مختلفة واكل مختلف وناس مختلفة وكل حاجة مختلفة وابسط نفسي باعظم قدر ممكن ، لقيت ان وماله ممكن نبقي نروح ناخد هناك بيت وان شاء الله بالرخصة والعربيه كل حاجة سهلة واعيش مع ناس لطيفة بتضحك وتبتسم في الشارع وشكلهم وتفاصيلهم وتفاصيل بيتهم وكل حاجة مختلفة ، كرم من ربنا ان شاء الله اطوله قريب وكدا كدا البيت كامل مش هيبقي غالي في الايجار مثلا او البيع بس هتبقي حاجة جامدة جدا ، يبقي عندي جنينة ازرع فيها اللي نفسي فيه واقعد كل يوم اشتغل من جنينتي في مكان مخصوص ليا ولاجهزتي و اظبط حياتي ويبقي عندي مكان تحفة فنية ، متخيل والله كل تفاصيل البيت من دلوقتي ، يارب اطولها قريب 

*** 

وختاما : 

النهارده الاحد وفيلم brave

 شغال عالتلفزيون وبعدها في حاجات حلوة كتيرة في اليوم وفي شوكليت ووحاجات دلع كتير اوي ويمكن كام خروجة حلوة واكل حلو ودلع ومكالمات رايقة حنينة وناس طيبة قلبها بينور ، الحمد لله علي كل النعم وما شاء الله لا قوة الا بالله يعني ، ناقصني هوت شوكليت هقوم اعمله كمان شوية وهتبقي دلع الدلع وواحد صاحبي جايلي من حته بعيده نتقابل وهيقعد اسبوع هنا ونخرج وناكل ونهيص 

وختاما تاني : ربنا قادر يحقق المستحيل والخطوة اللي بتاخد سنين قادر يخليها تخلص في شهر ونص او اسبوعين وقادر يخلي المتأخر يوصل في ميعاده لرزقه ويفرح بيه

كل دا كوم ووصول الطرد كوم تاني خالص ، الحاجات الهدايا اللي اشتريتها خطفت قلبي واقسم بالله

والله قلبي بقي بينتفض وانا بتفرج علي الهدايا اللي اشتريتها كدا وكاني عيل صغير 

ولسه الطرد الجاي والهدايا بتاعته اللي هيلف علي تلات دول برده 😀 وربنا لاقلب الدنيا دلع في دلع والونها بفرحتي وهفرط في الدلع والدلال بجنون 😎 ، هجيب اخر الدلع والجنان والحب والفرحة ، واهي الاجازة جاية كدا كدا وكله جاهز ❤️

***

الحياة حلوة 

نختم بقي بشكر ربنا 

*

انت عسلية يا كريم عامل زي حته تشيز كيك عليها فراولة وكريمة ودلع ، اوفر دوز حلاوة

*

يومك حلو يا جميل يا حنين يا طيب ويارب يديم نعمته وفضله ويارب الاجازة تيجي بقي عشان مشتاقلها بجنون 

يومك حلو واحلي من عيونك الحنينة الطيبة وقلبك اللي بينور