وداع وحضن بضمير

عارفين إحساس إنك تبقى واقع فى بير والبير كل شوية عمقه بيزيد وبيبقى النور بعد ما كان دايرة كبيرة فوق بقى مجرد نقطة وانت باصص من قاع البير لفوق 
ياتري ليه الاحساس دا بيجي لي ؟
هتكلم عني ومليش دعوة بحد 
كل الأمور العالقة جوايا 
المتعلقة فى الزمن وكأنها إنكتب لها المعاناة كلحظة ألم وإحساس يعيش ليوم الدين
كل الناس اللى طلعوا يجروا وهربوا واللى مخدوش بالهم مننا 
كل الناس دي كانوا عاملين زي أسوار بتتبني وبتخلي البير أعمق 
بتحس إنك بينك وبين النور ألف مليون سكة 
بتسأل نفسك هوا إزاي أنا أصلا هقدر أتسلق وأطلع من دا كله 
وبتفقد الأمل وبتتأقلم مع السجن وتحبه وتمسك فيه وتحاول تعيش من خلال إنك تلمح حتي النور من بعيد أو إنك تعيش تلمس الجدران وتفتكر الذكرى وتعيش لها 
من فترة فى بنت مهيسة خالص ومش شخصية وبالنسبة لى أفاقة عظيمة هنرمز لها بالحرف الأول (G )
البنت دي مرت بحادث قدام عيوني 
أنا كل اللى عملته إني وقفت أتفرج ومأخدتش موقف 
البنت فجأة بقت بعد ما كنت لا مبالية وقاسية وجبارة 
بقت واقعة فى دايرة الحزن 
والدايرة بدا يطلع لها أسوار لأنها مسمحتش لحد يقرب منها 
وكل شوية وكل لحظة بيتحول الدايرة اللى رسمتها حواليها لأسطوانة بتكبر جدرانها 
وبعدين الأسطوانة بتطول جدرانها أكتر وبتتحول لبير 
ياتري إيه اللى عمل كدا ؟
هي فجأة بقت حساسة وبتتألم بجنون , لدرجة إن إنسان زيي بيتخنق من مجرد سيرتها بقت صعبانة عليا وعايز أتصل بيها وأقولها تعالى أطبطب عليكي وبقي نفسي أقابلها فى الشارع عشان أحضنها وأطمنها 
آه والله 
بالظبط كدا 
هي اللى قامت ببناء الأسوار دي 
هي اللى حطمت فى نفسها بكل شكل تحت حجة إنها قوية 
ودلوقتى بتتغابي علي نفسها وبتعمل نفس الحاجات اللى كانت بتتريق عليها لما حد من الناس المنهارين يعملها
يمكن اللى هي فيه دا لنفس السبب اللى أنا واقع فيه فى البير 
إني مقدرتش أحضن اللى بحبهم أوي وأقولهم قد إيه أنا بحبهم 
وإني مقدرتش أقف فى لحظة وداع تحت المطر وأبكي زي ما عملت قبل كدا من سنين 
ولا إني قدرت فى لحظة أجمع شتات أفكاري وأنطق الكلام بدون ما يبان عليا إني بسمع الكلام وبردد كلام حافظه 
وأقول بكل بساطة بحبكم 
يمكن لأني موقفتش لحظة الوداع زي الأسد وقلت كلمتين من القلب وداريت دموعي 
كان نفسي فى لحظة وداع ملحمية 
يمكن هي فعلا حكاية ( الخاتمة ) اللى بسمع عنها علي طول فى الأفلام الأجنبي 
إن البطل كان محتاج Closure زي ما بيقولوا
مش عارف 
يمكن هوا دا السور 
إني ملحقتش أخد الحضن 
إني ضمنت إن فى عيد جاي هنقضية سوا ونستمتع ونفرح 
إني قلت إن النهار هيطلع وهاخد حضن كبير 
إني أقنعت نفسي إننا هنتقابل تاني 

كان نفسي فى حضن أخير وخاتمة من بعض الناس 
كان نفسي أقف وأقول كلمة فى الجنازة زي ما عملت بعد ما وقفت قدام تورتة عيد ميلادي وكلمتهم عن سر خطير 
كان نفسي أبتسم ساعة الوداع وعيوني مليانة دموع وأبقى علي يقين تام إن دي المرة الأخيرة اللى هقف فيها فى المكان دا قدام نفس الشخصية 
بس الحمد لله إني إتعلمت الدرس 
يارب جدران البير متكبرش ومحسش إني محبوس أكتر من كدا جوا كل حاجة حلوة فاتت 
الوداع فعلا بيفرق كتير أوي أوي أوي ....

P.S:

 "Every Christmas is last Christmas"

شاب فقري

وعبرت للنصف الآخر

وكبرت سنة 
وبقيت فى النص التاني من عمري 
طبقا لحساباتي السابقة فانا هنتحر قبل تسع سنين وقبل ما اكمل الخمسة وتلاتين بيوم 
لكني حاليا نحيت الحسابات السابقة وقررت اخوض التجربة للاخر 
وليحدث ما يحدث 
المرة دي احتفلت بعيد ميلادي وسعادتي كانت لا توصف 
يمكن للمرة الأولي من سنين طويلة أوي أو يمكن دي فعلا أول مرة فى حياتي أبكي من الفرح 
يمكن علي رأي أقرب الناس ليا هوا دا فعلا العيد ميلاد اللى عوض كل الأعياد اللى فاتت كلها كلها ويمكن دا فعلا أحلي وأروع عيد ميلاد فى حياتي . :)
مش هسأل ليه البكا بيصاحب حالاتنا النادرة زي الحزن والفرح لكني هفرح إني روحي مرتاحة بجد
مش عارف أعبر إزاي 
مش عارف أوصف 
لكني سعيد باللى وصلت له 
الوقت اللى فات من عمري إتعلمت فيه كتير ويمكن ألفين وأربعتاشر أكتر سنة تعبتني وطلعت عيني 
:D
لكن كسبت فيها أجدع صحاب 
كسبت فيها نفسي 
كسبت فيها اللى كنت بحسه وبشوفه كل ليلة فى ساعتين نوم كنت بحس انى بسافر الدنيا دي كلها باحلامي 
العزلة عاملة زي الموس اللى بيبري القلم الرصاص اللى هوا احساسك 
بتخليه حاد وقوي وبتتعبك لكن بعدها بتبقى إنسان مختلف 
بحلم بإيه ؟
ياتري لسه أصلا فى دماغي كل اللى فات ؟
ياتري لسه فاكر البنت العصفورة ؟
طيب و و و و و 

إنجازاتي المرحلة السابقة إني :
خلصت جيش كراجل مش كعيل وسخ زي ناس زمايل قرفت منهم
بطلت سجاير بقالى شهر ونص تقريبا ودا إنجاز عالمي :D
عرفت مين معايا ومين ضدي بكل بساطة 
كسبت أحلي العلاقات فى الدنيا 
إنتقمت من أوسخ ناس فى حياتي :D أو أصروا أنهم يدوروا فى حياتي :D
ومازلت عند إعتقادي ومبدئي إنك تسيب الوحش هوا اللى هيأذي نفسه بنفسه :D
يعني بمعني أصح معملتش أي حاجة لكن الإنتقام إتحقق

***

لسه بفتكر البنت اللى شعرها طويل واللى كانت بتجنني برقصها والبنت اللى بحس انى خيالي ملوش حدود وانا واقف معاها 
والبنت اللى بحب حكيها وحزمها وجنانها وهزارها والبنت اللى مفيش منها إتنين والبنت اللى بحبها والبنت اللى هتبقى أم عيالي :D
وهكذا :)
لسه بفتكر كل الملامح الحلوة لكل العلاقات الجميلة اللى مريت عليها فى حياتي 
يمكن فى الآخر الواحد لازم يتخلي عن أي إحساس أو فكرة أو ذكري وحشة ويرميها فى الزبالة مع بعض الناس الزبالة :D
الحمد لله علي كل حال 
كام نقطة بس عايز أوضحهمأو نقدر نقول أخليهم غامضين أكتر شوية :) عشان الذكاء دا نسب فى البني آدم :)  :D

***

 أولا : مبنساش :)

***

 ثانيا :
- يا ولدي إذا نويت الرحيل فإحمل وطنك وأحبتك داخل قلبك وأرحل , فكل أرض تنبت بالحب والشوق والحنين يا ولدي وطن 

***

 ثالثا : 
عزيزتي :)
 
#أمان :)

***

رابعا :
من فترةكنت قاعد بتكلم مع شخصية هامة فى حياتي فكانت بتسألني وبتقولي : تفتكر هتنجح ؟
قعدت أضحك أوي وصوت الضحك خلي اللى حوالينا يستغربوا ويقولوا الواد اتجنن 
قلت : أكيد دي تربيتي و ... ببساطة كدا دي التانية ولو فاكرة الأولي مكانش زمانك بتسألي هذا السؤال :D
أنا فاكر ساعتها إني قلت أحا :D

 ***

 رابعا بقى :
أستااااااااااااااااااااااااااااااااااااااذ وبشهادة الكل أنا مجواييش نية إنتقام 
لكن يا ولدي إنها العدالة الإلهية 
لما العدالة الإلهية تجيبلك حقك 
بتبقى واقف تقول الله يا سلام زي علي ربيع :D
بنقل بعض القطع علي لوحة الشطرنج وبتفرج فى صمت :D
وبس خلاص :D

****

هاشتاجات :
#عيد_ميلادي
 #هي
#حرية
#أمان
#نجاح
#سجاير
#الحمد_لله
#Father 
#سعيد
#أحا
#إلبس_يانونو
#هابي
#حط_عليهم
#كله_بحسابه
#سر
#:P
#لأنك_دايما_هنا
#حبك

سويت دريم

كانت ليلة حلوة وحلم أحلي 
ويمكن كانت هتبقى أحلي بكتير لو مكانتش حلم طبعا 
حلم إمبارح بعد البوست الكئيب إعتبرته طبطبه 
بس من مين ؟
منك ولا عقلي اللي أشفق عليا ؟
مش عارف 
بس مبسوط إني حلمت بيكي من جديد
#للتوثيق
#سنة_جديدة
#الباب_المفتوح

شاب فقري

مستنفذ

عزيزتي 
بدون مقدمات كبيرة وكلام كبير ملوش لزمة ودخول فى تفاصيل : أنا مرهق وتعبان وطاقتي بالكامل مستنفذة 
لأول مرة من سنين بحس إني مفيش جوايا طاقة خالص تصلح لأي شىء 
فاصل تماما
كنت فاكر إن لما أوصل للمرحلة دي هبقى عجزت لكني من الواضح إني عجزت بدري أوي 
مفتقد أشياء كتيرة لا حصر لها 
عارفة ان الواحد لما بيفكر فى كم الاشياء اللى مفتقدها والاحداث والتفاصيل بيحس انه مفتقد حاجات ممكن تقضي عليه 
وبييجي فى بالي بيت الشعر بتاع : ليس كل ما يتمناه المرء يدركه ... فقد يكون حتفه فيما تمناه 
الحاجات اللى ممكن تموتني 
الحاجات المستحيل حدوثها 
الحاجات اللى عاملة زي نجمة فى السماء 
انا مرهق يا عزيزتي 
حتي مجرد النظر لنجوم السما بيتعبني 
البرد قاتل والجيوب الانفية عاملة عمايلها , تفتكري فى حد بيدعي عليا ؟
مقصدكيش يعني , أقصد غيرك :D
طبيعي إنك تدعي عليا لما مبقاش هنا ولما أبقى مش قادر أوصلك ومش قادرة تبقى هنا 
إلعني المسافات يا عزيزتي لأني برىء والله 
فى كل الاوقات هفضل بشر وبغلط لكني بتحمل للنهاية وبحارب لما بعد النهاية وبصبر وعلي عكس كل الناس بحاول بكل الطرق مكررش غلطي تاني
أنا مش عارف أكتب أقولك إيه 
أوقات بحس إن الجوابات مبتذلة وإن كلامها رخيص وملوش لزوم 
إمبارح قعدت مع واحد وقالي : مفيش أحسن من الطبيعي 
مفيش أحسن من إنك تقعد تتكلم كدا فيس تو فيس :(
فى أوقات زي دي بتمني الموت عشان تبقى روحي خفيفة وأقدر ألف العالم كله وآجي أقف علي شباكك وأشوفك  ودا هيطمني ويريحني  أناعندي يقين ب دا 

عزيزتي أنا بضيع 
أنا ما صدقت خرجت من سنوات التيه اللى كنت فيها 
ما صدقت إني خلصت حالة الغضب المستمر والإنتظار اللى كنت فيها 
أنا مش عايز أدخل فى توهة تاني 

بتخيلك يا عزيزتي 
بتخيلك جاية من بعيد فى ميعاد محتوم ومبتتأخريش 
بتخيلك بتشقي السماء وبلاقي إيدك بتتمد عشان تاخديني من العالم دا 
بتخيلك بتضميني وبيكي بشوف الطريق وبتحمله 
يمكن كلمة واحدة بس منك كفاية إني أعيش من تاني 
يمكن كل اللى ممكن يخليني أستحمل المعركة القادمة هي كلمة واحدة بس منك 

الوقت ضدي 
الوقت ذات نفسه بيخلص 
مش عايز بقية حياتي تفوت وأنا فى الحالة دي 
ولا عايزها تفوت وأنا بحلم بيكي كل ليلة 
مفيش حاجة زي الطبيعي يا عزيزتي 
فيس تو فيس

كل دقيقة وكل لحظة للابد
متأكدة دلوقتى إني هلتزم بوعودي ؟
عندك يقين فيا ؟

بمناسبة إن فى سنة فاتت  وسنة جديدة بدأت والتاريخ إتغير رقم والعمر زاد رقم 
مش عايز أتكلم فى الموضوع دا 
حاسس إني هبقى كتلة من الكآبة :(
وممكن تلت الكرة الأرضية ينتحر لو قروا كلامي 
فكفاية إنتحاري أنا 
دلوقتى فى ختام البوست والكام يوم دول  هدعيلك 
بعد ما ودعت واحد قريب مني فى المطار النهارده فأنا هستحمل أكتر وأدعي 
وأعرف إن المعركة اللى جاية محتاجة مني أرجع لحالة الغضب الدائم تاني 
محتاجة منى انى احس بوجعي للاخر 
محتاجة انى اشوف فى قاع قلبي كل الحاجات اللى مخبيها واحس بيها 
محتاج حتي استعمل كراهيتي تجاه الاشياء والمواقف الغبية 
محتاج اى طاقة تخليني اقدر احارب واكمل 
هقدر احول كل دا لشىء إيجابي وحلو وأبهرك كالعادة 
لكني فى اللحظة الحالية وفى الليلة دي 
هحلم بيكي وأفكر في الحاجات الحلوة اللى تخصك هنا 
مش هزعل ومش هدعي عليكي غير بالحنين 
عشان تشتاقي أكتر وتيجي أسرع 
هدعي عليكي ببرد الشتا مش بمرض البرد يا عزيزتي
هدعي إن برد الشتاء يقوي عضمك 
بس يجيبك هنا بحنين وشوق حالا :D
وساعتها هجيبلك ورد كتير لما تبقى جنبي هنا :)
أنا هروح أسمع Evanescence وادعي لك
تيك كير يور سيلف 
After All ... you will always be you :)
:P
أنا آسف لاني هكتئب و لأني مفياش طاقة النهارده ومستنفذ ومتعب ومش قادر حتي أخد نفسي ... سامحيني يا حياتي ... يمكن فعلا كلمتك تحييني من جديد بعد كل الضغوط اللى مرت عليا الفترة اللى فاتت واللى مخليتش فيا حاجة 
النهارده يا عزيزتي لو كان حد لمسني بس كنت بكيت وبشدة 
الحمد لله اللى عداه علي خير 
بس يمكن لو كنت بكيت كان زماني بقيت أحسن .

شاب فقري