المستلم مجهول

للعلم بس دي صورتي :D

أبدأ منين ؟؟
دايما بسأل نفسي السؤال دا 
لأني مش مقتنع بصراحة  إن فى بدايات ونهايات 
فى أحداث كدا كانت كدا كدا هتحصل 
( بلاش الكلام العايم دا خلينا فى الحاجات المحددة ) بس إزاي بلاش كلام عايم وهوا أصلا كل حاجة متداخله فى بعضها , خلينا نبتدي من إن النهارده كان اليوم التاني فى ( ورشة كتابة نص مسرحي فى التحرير لاونج ) اللى بشارك فيها 
ولا خلينا فى العنوان :
يعني إيه أي حد يستلم أو المستلم مجهول ؟؟
يعني رسالة مش مهم مين يستلمها 
أي حد 
سواء إتقرت أو متقرتش أو حتي إترمت فى المدونة ففي كل الأحوال هي إتكتبت وخلاص 
زي أي فيلم أو أي مسرحية أو مقال مش مهم مين يستلم أو يفهم الرسالة , المهم إنها إتبعتت وخلاص 
ممكن بقى تضيع فى البريد أو توصل لحد تاني أو تالت أو عاشر
أي حد هيستلم الرسالة يقدر يفسرها لروحه 
عادي يعني :))))
ويعمل بيها اللى هوا عايزه 
ويتصرف علي أساسها أو أي حاجة بقي :)
بس هي إنكتبت وإتبعتت دا المهم ...
معايه ناس جامدة جدا فى الورشة وبتعجبني أفكارهم ودا نادرا ما يحدث او نادرا ما أقوله أصلا :D
النهارده ( جهاد ) سألتني وقالت لى هوا إنته ليه بتركز أوي كدا 
كان نفسي أقولها أنا من الناس اللى مينفعش تقعد قدامهم أكتر من تلات دقايق 
بس رديت رد أحسن وقلت إن ( قوة الملاحظة ) شىء مش بقدر أتحكم فيه  وتركيزي فى تفاصيل كل شىء بيكون غصب عني :D وحكيت موقف بيدل علي إني فى معظم الأحيان مبفقدش تركيزي :D
فاجئني السؤال الصراحة 
كان فى تمرين النهارده عن إنك تغمض عينيك وتحاول ترسم نفسك 
واللى حواليا كل واحد رسم نفسه بشكل 
بس الناس إستغربت العك اللى عكيته دا وأنا مغمض 
رسمت واحد مكشر وبنضارة وجنبه لاب توب وفى شباك مقفول وقدامه سور وعالارض مسامير أو قزاز :D
وعنده شعره واحدة :D
تقولي بقى جمعت كل الحاجات دي إزاي فى نفس الورقة وقرب بعض ووضوح وإنته مغمض 
خيالي واسع :D
والموضوع عجبني وخصوصا بعد أول يوم روحته رسمت فيه على ورقة وأنا مفتح وكل واحد كمل الرسم بتاع التاني 
الورشة مسببة  لي سعادة لا توصف 
حضوري ورشة الكتابة دي 
مخليني فى قمة سعادتي 
وهكتب مشهد قبل يوم الأتنين 
ويارب أقدر أبدع فيه أو أقدم فيه حاجة جديدة :D
هنقل المعاناة من وجهة نظري الشخصية وبالشكل اللى ممكن تكون عليه قاسية بجنون 
بيتهيألى الموضوع مش صعب 

***

النهارده ناقشت بنت فرنسية عن موضوع الشيطان وهل أصلا موجود ولا لاء والجن ودا حقيقى ولاء وكلام كتير كدا 

مش بتكلم فرنساوي 

بس بتكلم إنجليزى كويس 

كنت مستمتع الصراحة بأقصي شكل ممكن :D

والجميل فى الموضوع لما إتسألت بتحلم بإيه قلت تلات حاجات بس :

- بحلم ألف العالم 

- بحلم أعيش مبسوط 

- وأكون أنا 

:)

وبس 

:D

***

أنا لما إتكلم قدامي شخص ما وقال إنه عايز يعيش خمسين سنة بس 

ومش عايز أكتر 

قلت له يخرب بيت كدا إنته عندك أمل 

أنا آخري 35 فقط 

وبعدها بقى اللى ربنا يريده يحصل 

:D

كلانا كاره لفكرة العجز والمرض 

ويمكن أنا بفكر فى الموضوع 

لأني مش حاسس إن فى حد هيقدر يلتزم معايه للدرجة اللى يبقى معايه فيها وانا عجوز ومريض 

لان كل الناس بتمشي ودي حقيقة ولازم نتقبلها :)

***

من يومين كنت فى لقاء عن الصدمات النفسية وكيفية التعامل معاها وتعمل إيه ومتعملش إيه وإزاي تتعامل مع الناس اللى بتمر بصدمة 
فى اليوم دا إكتشفت قد إيه أنا مليان عقد وكلاكيع نفسيه و إتقالي كلام كتير مفيش مجال لذكره هنا , لكني مريت بصدمات نفسيه كتير أوي :D , عادي  فى البطاقة مصري يبقى أكيد عندك ستين ألف صدمة نفسية :)
انا كتبت البوست بس منشرتوش :D
لأنه عبارة عن نقط نقط نقط وكمان أنا مش عايز أنشره عشان شكله مش عاجبني وهيفيد أشخاص ويضر أشخاص وفى كل الأحوال أنا مش عايز أنشره , بس إكتشفت إني من الناس اللى عندهم قدرة علي التعامل مع الصدمات النفسية بالفطرة :D

***

 بتحاور مع ملحدين اليومين دول ...

 ***

 حياتنا مغامرة 
كل لحظة فيها 
من أول ما تنزل من البيت الصبح 
لحد رجوعك 
إنت حياتك كلها عبارة عن مخاطر ومغامرات 
عايز تقنعني إنك ماشي فى طريق جانبي ومبتاخدش قرارات معينة ولا بتمشي فى سكك معينة عشان خايف 
لو كلنا خفنا 
يبقى مفيش حد هينزل من البيت 
حتي لو فشلت فى حاجة 
فدا هيعلمني كتير قدام 
وربنا هيساعدني أمشي فى الحياة وأكمل 
مش مشكلة إن البني آدم خايف 
لكن المشكلة لما يسيب الخوف يتحكم فى كل حاجة 
أنا إخترت كتير 
إخترت إني أعيش أخيرا 
وأخترت الحياة 
مش العبودية ولا الموت 
ولا الخوف 
ولا الرعب والهلع من شوية قرارات وشوية حاجات بتحصل 
أنا ليا الحق أفكر فى ربنا وهيرضي عني ولا لاء ؟
بس هغلط 
ولما أغلط هرجع تاني للطريق 
واقول يارب 
واحاول أعمل الصح من خلال تعاليم المولي سبحانه وتعالي 
وأكيد فى طريق فيه مخاطرة وفى نفس الوقت بحقق منه اللى انا عاوزه وفى نفس الوقت يرضي ربنا 
ولا إيه ؟؟

***

 مين مشي ؟
ومين جاي ؟
ومين مجاشي ؟
سيبك 
بكره الخميس 
عيد ميلاد إبليس 
بكره يوم خاص جدا 
دايما يوم الخميس بيبقى مميز عندي 
ودايما بليل الساعة تلاتة الفجر بعشق الوقت دا 
ممكن يوم الخميس دا يحصل أى حاجة وكل حاجة 
ممكن أسامح أو أنسي او أبقى طيب أو منيل بنيلة 
ممكن يحصل أي حاجة 
مين وصل ومين موصلش ؟
بلاش الأسئلة دي 
المهم إن بكره الخميس 

***

My Dark Passenger was Never wrong

تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .

Deleted

للمزيد من التفاصيل إضغط هنا

شاب فقري 

***

 بكره عيد الحب أو الفلانتين زي ما بيقولوا 
مش هبعت رسايل عالموبايل أنا 
مش زي كل عشاقك أو اللى تعرفيهم أو اللى يعرفوكي هبعت أقولك كل عيد حب وإنتى طيبة والكلام الفكسان دا 
أنا شايف إنه شىء سىء جدا جدا جدا عمل يوم واحد للحب فى السنة فى أى علاقة 
أنا عن نفسي 
شايف إن كل يوم بقضيه معاكى  ينفع يتعمل عيد 
كل تصرفاتنا وحركاتنا ونظراتنا وكلامنا ومشينا وهزارنا وخناقاتنا 
كل يوم بيننا هوا يوم فيه حب ,وفيه عيد وفيه روعة مبتنتهيش 
سواء كان يوم حلو بأحداثه أو تيت بفراق أو وجع او مشكلة 
تواجدنا فى الحياة سوا حتي لو مش موجودين سوا أو مش مع بعض أو بيننا كام ميت كيلو متر أو حتي مسافات الدنيا كلها 
كل يوم إحنا فيه عايشين هوا حكاية فيها مليون عيد حب
آه طبعا فى هدية 
قد تكون جوانتي من اللى نفسك فيه أو حتي شراب أو طرحة أو رسمة أو وردة أو فستان من اللى قلتي لي عليهم من فترة أو أي حاجة محتفظ بيها لذكري خاصة وبديهالك عشان تعرفي قد إيه أنا بحبك 
أو حتي كوباية قهوة مرة فى مكان نفسك نروحه سوا أو كوباية شاي معاها كلمتين بيختصروا الحكاية .
بس إنتي مش محتاجة دا كله عشان تعرفي 
إنتي عارفة لوحدك 
وبرغم كل حاجة 
وهنا بقصد بكلامي كل الهم والمشكلات والحاجات الوحشة اللى مطلعه عينينا 
برغم كل دا إنتي عارفة 
إني مش هقدر أكون ( عبده )
مين عبده بقى دى حكاية تانية خالص ولكن خلاصتها إني مش هبقى ( عبده )
 ممكن احبك مليون سنة ومزهقش ولا أمل ولا أحس بضيق 
ممكن أكتب عنك ميت رواية وكام ألف قصيدة علي كام مليون كتاب 
لكن ...
آسف أنا مش ( عبده )
فى مليون بروتوكول لتنظيم العلاقات بين البشر 
ومليون فكرة لتنسيق التواصل 
ومليون طريقة للحوار 
وأنا بقى فى الكام مليون دول 
مستحيل يعني مستحيل اكون ( عبده )
وبس ...

****

وأكيد مش هقعد أحكي لقراء المدونة زي كل سنة عن عيد حب كنت هجيب فيه ( يوسفندي فى شكارة ) عشان هي بتحبه وعشان مينفعش أجيبلها حاجة تانية 
بس مش السنة دي 
خلي السنة دي مختلفة :D
واللى عايز يعرف تاريخ اليوم دا معايه يقلب فى الأرشيف :D

***

 بحب الشطرنج جدا 
بس بحبه فيس تو فيس 
مش عالنت 
مش من ورا جدران 
مش من ورا مليون باب 
مش وكل واحد مسجون 
إقعد قدامي وإلعب وخد مليون خطوة وإعمل اللى يريحك 
المهم تبقى قدامي عشان أقدر ألعب معاك وأشارك فى اللعبة 
لأن ليها طرفين ...
حاجة دايما بتتنسي إن فى حاجات ليها طرفين 
مش طرف واحد 
مش أنتي وبس الحكاية فيها طرف تاني ..
ومبحبش في الشطرنج النصح من حد واقف جنبي وكذلك فى الحب يعني 
النصح فى الحب زي واحد صاحبك بيدخن وعايزك تدخن معاه 
هوا عايش فى عذاب فبيساعدك تاخد قرار مهبب عشان يقنع نفسه إنه مش غلط وإن فى غيري بياخدوا قرارات مجنونة زي دي أو ملهاش معني 
أنا مش هضيع عمري 
أنا مبستناش 

الإنتظار فعل عبودية 

والشوق فعل وجع وألم ومتعة

والحب فعل حياة 

عشان كدا مش هعيش فى إنتظار 
ولما أحس بشوق بخبط علي الباب بجنتله و هدوء كدا 
ولما بحب بخلق مليون دنيا وأعمل مليون حاجة تصنع حياة 
مش بقف أتفرج ولا بستني اللى قدامي يعمل 
أنا بنفذ بناء علي قرار مقتنع بيه الطرفين اللى انا واحد منهم أكيد يعني 

***

فى خبر لسه عارفه حالا :

صخرة وزنها 130 ألف طن تتجول 5 ساعات فوق العرب يوم الجمعة المقبل

الكويكب حجمه نصف ملعب كرة قدم ووزنه 130 ألف طن متجه الآن نحو الأرض بسرعة 29 ألف كيلومتر بالساعة، ليصل قربه منها يوم الجمعة المقبل إلى مسافة لم يسبقه إليها أي كويكب في التاريخ الحديث .. الباحثون يؤكدون : ان سقط على الارض يمكن ان يحدث دمارآ هائلآ !

لتفاصيل اكثر من اللينك دا : http://masrbook.net/2/?p=2898

وتعليقي الشخصي :

فلتكن مشيئة الله :)

***

بالنسبة للبوست اللى فات

هوا أنا رايح أتنحنح يابني ؟؟

ولو روحت أتنحنح هتنحنح لواحدة معرفش عنها حاجة ولا عمري شفتها 

وأكيد يعني مقدمة البوست لازم يبقى فيها شىء من المراعية لإحساس اللى بتكتب عنه 

مش داخل ترزع الكلام 

وبعدين لما بتكتب بإحساس حد تاني 

لازم تفكر بدماغ حد تاني 

وأسلوب كلامه 

عالعموم 

لو حد قالك إني بتنحنح 

 يبقى لعب بدماغك

أو إنضحك عليك

 لأني إستأذنت قبل نشر النص وإتقالي جميل ومعنديش مانع خالص فى النشر

وتعليقات عالفيس عندي وعالصفحة لما إتنشر والحياة حلوة خالص

لو كلفت خاطرك ياللي قلت رأيك بكل سخافة 

كنت نزلت بالماوس تحت شوية وشفت البوست اللى تحته

أو أي بوست وكان هيظهر لك يا إما فلان دا في قصة حب أو مرتبط بشكل رسمي

ولو إنته فى قايمة الفريندز عندي عالفيس هتلاقي فى المعلومات بتاعتي 

In relationship

وهتلاقى فى صورتي المنشورة عالفيس برده دبلة واضحة فى الصورة 

ولا إنته داخل ترمي بلاك وخلاص 

لو حد قالك تكتب اللى كتبته أو تعلق بمنتهي السخافة إنته واللى علقوا بعدك 

فكنت اتمني ألاقى نقد للمكتوب 

وكنت هرد عليك من أول لحظة وأحترمك جدا سواء إنته أو غيرك 

لكن كل كلامك تريقة وسخرية 

حد قالك إنك جاي تقرا لتوفيق الحكيم  ؟

أنا مدون 

لا أنا كاتب ولا ناشر أربع كتب ولا ناوي 

فنصيحة 

عايز تعمل جدع علي واحدة 

روح إتشطر فى حاجة تانية 

وأعمل فونط وبرنس فى حاجة تانية 

مش علي حسابي 

وبعدين يابني ( الذي أحبها ) 

هوا فين دا فى البوست السابق بيقول إني بحب فلانة ولا حتي بكن لها أى مشاعر ؟

إنتهي كلامي 

أما عن اللى قريته إنته أو غيرك 

محدش طلب رأيكم ولا قالك تعالي إقرا 

يلا 

روح إعمل راجل عليها وحامي الحمي فى حتة تانية 

:)

وللعلم بس 

لما سألتها قالت كل واحد حر فى رأيه وإنته حر فى الرد والتعقيب 

يعني لو هي اللى قالت لك إكتب بقى وقول اللى قلته يبقي هي اللى بتألف الفيلم 

( ما كان من قدامها من الأول تقول متنشرش يا كريم )

يعني يا إما هي بتكدب وعايزة تبان قدام الناس الفتاة اللى واحد ياعيني بيسبل لها 

يا إما عايزة تعمل عليك نمرة برده 

يا إما إنته بتتصرف من دماغك 

وساعتها تبقى بتحاول تبان راجل عليها أو بتدافع عنها 

أو فاضى ومش لاقى حاجة تكتبها 

وفى كل الأحوال 

شكرا جدا علي رأيك وكلامك 

مش هنعتب الجنة من غير ما واحد زيك يشيل من سيئاتنا شوية :)

وممكن أرد علي نقدك للبوست بس صراحة مش فارق معايه إنك تفهم أو لاء 

لا إنته ولا هي ولا غيرك

تحياتي 

شاب فقري

13-2-2013

به و بدونه

البوست الرابع فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

البوست بالكامل من وحي الجملة دي من عند دعاء العطار صاحبة مدونة كلمتي  وأنا بفتش فى المدونة وبقلب فى مدونات الناس كالعادة المقيتة بتاعتي :D
نكتب الجملة بقى : 

هي معاه كانت أوقات بتزعل .. بس من غيره مبقتش عارفة تفرح :(

به وبدونه

كانت وهي معه تشتكي البكاء فى الشوارع بسببه وتشتكي الوجع الذي تشعر به كلما تذكرت أوقاتهما معاً ولكنها بدونه لا تعرف للفرح طريق سوي أن تظل تبحث في كلمات من حولها عن الرضا عنها والذي لا يأتي أبدا وتظل تبحث فى عيونهم عن معني أو فرحة ما أو سببا يدعو للسعادة لكن ... السعادة كانت فى البكاء معه وفى لحظات قضتها بين يديه وفتحت أبواب روحها له لكي يصلح ما تكسر ويبني ما ضاع منها فى سنين العمر السابقة  , بدونه هي مازالت تبحث بداخلها عن حلم للغد , مازالت تفكر كيف سيكون غداً ؟؟؟ لا طاقة للحلم ولا طاقة للراحة ؟ تسأل نفسها كل لحظة إلي أين أنتمي ؟؟ وأين أنا ؟؟ ربما مكاني بجواره ؟؟ لكنها دوماً ما تخبر نفسها أنها غير مستعدة لتلك المحادثات المتعبة والتفاصيل الموجعة والحقائق المرة , تري كيف يكون هوا حياتها بكل نقائصه ؟؟ اهذا هوا الحب ؟؟ أسيظل يتحمل حماقاتها وتناقضاتها ؟؟؟ وإلي متي ؟؟؟ تتذكر رده علي ذلك السؤال حين قال (( وحتي تحترق النجوم يا حبيبتي )) , تسال نفسها فى سذاجة وهروب من الكلمات ومعناها  : وهل سنظل نحيا إلي أن تحترق النجوم ؟؟؟ وهل هوا بهذا الوفاء ليظل يحبني هذا العمر كله ؟؟ وهل أنا أستطيع الحياة معه ؟؟؟ ترد علي نفسها بأنهما من عالمين مختلفين ولا يمكن أن يجتمعا أبدا , تبكي بحرقة وتشعر بالبرد يعصف بكل خلايا جسدها تحاول أن تهدأ بلا جدوي ولذلك تحتضن وسادتها وربما تنظر إلي سقف الغرفة وتنام منصتة إلي دقات الساعة .

كانت به تعرف للوجع معني وبدونه عرفت للأوجاع معاني كثيرة , كانت به لا تميز الفقد ولا تعترف به وبدونه صارت لا تعرف سواه بداخلها كالثقوب السوداء التي تبتلع أي فرحة مهما كانت بساطتها, به عرفت أن الروعة تسكن كل شىء فى الحياة مهما كان هذا الشىء وبدونه أدركت أن هنالك الكثير من الأشياء التى تحمل الشقاء بداخلها والوجع وتبدو رائعة رغما عن شقائها وكأنه تمويه الطبيعة لها بأن تحمل الشقاء والفقد والألم فى غيابه .

تطيل الغياب وبدون ذكر تفاصيل الوجع والجنون والألم التي قامت بها ولم تلحظ فى غمرة إصرارها بما قررت عند الرحيل أفعالها .تعرف حد اليقين أنه سامحها دون مقدمات , تحاول التماسك أمامه ولا تصرخ بسؤالها : لماذا ؟؟ , بدون تفكير تستدعي ذات الذكري حين قال : سأحبك وحتي تحترق النجوم .

شاب فقري

4-2-2013

الدفء

البوست الثالث فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

إحساس غريب ينتابني الليلة برغم كل ذلك البرد الذي يشكو كل من أعرفهم ومن لا أعرفهم منه إلا انني دافىء وبشدة 

ربما لأنني جمعت كل أجزائي وأشلائي المبعرة بين المقابر وتحت أطلال القصور وفى كل قرار عميق 

ربما لأنني جمعت نفسي وكل ذلك الليلة لأجلك 

الليلة ها أنا ذا 

أنا الدفء ولا دفء غيري ...

أرتدي ملابس الصيف و أفتح كل النوافذ التي تعلوها أتربة الوجع والأبواب الصدئة من الفقد وأستسلم للبرد لأدعه يحاوطني من كل إتجاه ولكني لا أشعر به , الليلة أنا موجود , لم أشعر بذلك منذ سنوات ولكنني حقا وبصدق وبرغم صدق كل تعبيراتي وكل الجمل التي كتبتها ( عن الأبواب والنوافذ ) أشعر بأنني دفء الوجود كله ...

***

أتذكر كلمات الرجل العجوز : 

لا قيمة لدفء يا ولدي دون أن يكون هنالك من يجالسه أو يؤنس به 

مثل النور ما قيمته إن لم يتواجد من يري به 

لكل شىء سبب

***

أتذكر كلمات المسافر عن الأوطان والأوجاع وعن الترحال 

وأحاول الهروب حتي من تسجيلها أو كتابتها   

***

تري 

متي ينتهي الإنتظار ؟؟

متي ينقضي الليل ؟؟

متي أتحدث ؟؟؟

متي أرتاح ؟؟؟

متي ...؟؟ 

شاب فقري

3-2-2012

مازلت فى ضلالك القديم

البوست الاول فى حملة التدوين المعروفة بإسم 

(( حملة البتاع التدوين خلال شهر فبراير ... مش عارف ولا فاكر بقى الله  بس أنا بكتب معاهم يعني ومش هشير لينك الإيفنت عشان بجد مرهق ومش هقدر أروح أجيبه ))

 ***

{ يخبرها وتخبره }

يخبرها : أنه هنالك بعض الأمور فى الوجود تستحق أن تنتظرها 

تعانده بأنه : لا تنتظر شيئا لأن لا شىء يأتي يا عزيزي 

يود لو إستطاع أن يفهمها أن هنالك فى الحياة أناس مصيريون فى حياة بعضهم وبانهم مهما إفترقوا وإرتحلوا فسيعودوا 

****

يخبرها : أن الكون علي إتساعه لم يسع شوقه وعشقه لها فى غيابها وأن نساء الدنيا علي قدر روعتهم لم يعوضوه لحظة واحدة مما قضاها معها

ترد فى إستغراب : وكيف إتسع قلبك لكل هذا ؟؟ ومن أين عرفت بأمر روعة نساء الدنيا ؟؟؟

لم تعلم بأن قلبه تفتت آلاف المرات فى غيابها ولم تعلم الكثير مما حدث فى غيابها هي فقط تعودت أن تقرأ العناوين فى الصحيفة بدلاً من الخوض فى التفاصيل لأن التفاصيل دوماً مؤلمة قاتلة وربما تمنح الآخر كثيرا من الإهتمام وهذا ما لا تريده, وربما لم تعلم بان الدنيا دوماً تسعي لتخطفه منها لكنه  يقاتل بإستماته .

***

يخبرها : بأنه يقرأ كل شىء ويري كل شىء ويعلم كل شىء بشكل لا تتخيله 

ترد فى هدوء مصطنع : وماذا بعد ...

يود لو أخبرها بأن المعرفة ليست كل شىء ولكن الإهتمام هوا جزء من الشىء الكبير الذي يسكن قلبه 

***

يخبرها : بأن هنالك أشياء تستحق ان تتحطم قلوبنا لأجلها 

ترد فى ثقة : قلوبنا ملك لله ولا يمكن أن نمنحها لأحد ليكسرها لنا .

ألم تعلم بان الله خلق بين كل زوجين مودة ورحمة ؟ وأسكن فى قلوب البشر الرحمة والحب وبأننا نحن من نضحي بقلوبنا فى سبيل الوصول للغاية الأسمي ؟؟؟ 
لا فائدة من النقاش , يهرب من الأسئلة والأجوبة والحقائق 
يستعين علي وجعه بصمته فيختنق صوته ويعلو صوت أنفاسه ليكتمه بكلتا يديه فى مخيلته فلا يستطيع التنفس , يشعر بالغرق بالرغم من أنها هي الحياة بالنسبة له إلا أنه يشعر بالغرق لأنه وللمرة الأولي يصبح خائفا إلي هذا القدر وعاجزا عن التعبير إلي هذا القدر , يحاول أن يخرج ما فى صدره من مكنونات ويخبرها بالملايين من الأشياء والحكايات التي إحتفظ بها لها لكنه يخبر نفسه أنه لابد أن يصمت فى حضورها فالصمت فى حضرة الجمال جمال , تصمت هي الأخري 

يقول فى هدوء : هل تعلمين بأن ...

ترد مقاطعة إياه فى عبث وكأنها إستطاعت أخيرا أن تطلق تلك الطفلة بداخلها للحديث معه : مازلت فى ضلالك القديم يا عزيزي

يبهت ولا يستطع الرد فهل هذا شىء جيد أم شىء سيء أم أنه لا شىء لها علي الإطلاق لكنها تكمل جملتها فى مرح 

: مازلت حبيبي 

تمت ,,,

بقالي كتير أوي مكتبتش قصص قصيرة ولا حتي عفرت إيدي فى الكيبورد بكتابة عبارة باللغة العربية الفصحي ودا أثر عليا جامد جدا وبشكل كبير ويمكن مش عارف حد خد باله ولا لاء , بس بقيت حاسس إن فى حاجات محبوسة مش عارفة تطلع من جوايا , كان لازم أكتب حتي لو القصة هتخرج مشوهة 
هعتبر دا بوست بداية الشهر وأنا عن نفسي فاشل فى الإلتزام فى الحملات التدوينية وعشان كدا مش بدخلها وعشان كدا برده هتلاقوني بكتب فى اليوم أحيانا أربع مرات وأحيانا بكتب علي آخر لحظة بقول جملة واحدة وبسكت , بس بكمل , الخلاصة :)
إني حاليا مبسوط وسعيد لأكتر من سبب 
يمكن لأني قدرت اكتب قصة قصيرة من جديد بعد ما فقدت الأمل فيا 
يمكن لأني حاسس إني قدرت أشوه اللغة العربية للدرجة اللى سمحت لي بكتابة القصة القصيرة دي 
يمكن لأني مبسوط فعلا باللي بيحصل وحاسس إن ربنا معايه وبيساعدني كتير أوي 

شكراً يارب

أنا مبسوط وراضي 

مازلت دايما محتاجك معايه وعمرى ما هبطل أحتاجك 

وعمري ما هنساك 

شاب فقري 

1-2-2013