وأخيراً كفرت

من تلات شهور تقريبا ومن ساعة ما كتبت بوست الإنهيار وانا عامل بث مباشر من دماغي وبكتب بوستات كلها إنهيار 

تعرفوا النقطة اللى حاولت أخلي أي حد ياخد باله منها ومحصلتش هي إيه 

فى جملة بتقول ( ما طار طير وإرتفع إلا كما طار وقع ) 

طيب لو وقع بقى ومازال بيقع ؟؟؟

يبقى له لحظة هيطير تاني فيها وهينهض للنور من جديد 

أنا ككريم أخدت تلات شهور تقريبا عشان أهد كل شىء جوايا 

كسرت كل حاجة قديمة 

كل الناس , والأحداث والتفاصيل بما فيهم كل شخصية تواجدت فى التلات شهور دول وقبلهم 

كل الماضي إتمحي تماما 

من بكره إن شاء الله انا ببني وبنهض 

طبعا لحظة النهوض مش بكره وبس 

زي ما وقعت فى تلات شهور 

زي ما هقف علي رجليا فى أسبوع كامل بالتمام والكمال يبتدي من بكره وينتهي مع نهاية شهر إتناشر 

كل الناس بتقول عليا مجنون عشان اللى عملته 

وعشان اللى ناوي أعمله 

بس أنا مؤمن حتي لو كنتوا شايفيني كافر

فأنا أعترف إني كافر 

كافر بكل الشرايع والمناهج والأفكار اللي رافضة تتقبلني زي ما أنا وبتحاول تغيرني وتخليني فى قالب والمفروض إني أتقبل دا 

كافر بكل الأشخاص الفالصو والقشرة والأكلاشيهات والقوالب اللي حواليا 

كافر بكل القوانين اللي بتعملي حدود وعايزاني أمشي فى طريق مش طريقي 

كافر بكل المبادىء والمثل والتقاليد والعادات اللى ملهاش معني واللي بتقيدني وعايزاني أمشي فى طريق مش طريقي وأتعامل كشخص مش أنا 

كافر بكل الأشخاص الحمقي اللى حرقوني واللى مكانوش موجودين لما إنكسرت واللي سابوا الفرصة لأني أنكسر واللى موقفوش جنبي واللى مساعدونيش واللى ملبوش النداء لما ناديت عليهم 

كافر بكل الناس اللى عملت بيني وبينهم حواجز وهمية زي أشخاص أو أفكار أو حتي أديان ( لأن اكيد فى كل الشرائع السماوية ربنا لا يرضى بظلم البشر )

كافر بكل أنواع الخسارة من أول التدخين لحد التضحية ( أنا بطلت سجاير علي فكرة )

كافر بكل أنواع المكاسب ععلي الغير واللى بتعتمد علي تدمير الآخرين لأني للأسف عمري ما هدمر ولا هحرق حد تاني ولكني عندي كلمة واحدة بس لأي شخص أيا كان هيحاول يهد عزيمني أو يحاول يكسرني أو يخيب ظني أو يخذلني ( برا - همشي ) والأتنين ليهم نفس المعني.

كافر بكل  الحاجات الهبلة والعبيطة اللى فى الدرج واللى فى الدولاب واللي عبارة عن كلام متحققش منه ولا حتي واحد فى المية 

كافر بكل أنواع الفرص اللى كنت بمنحها للغير حتي لو الغير دا إبن كلب ومش يستاهلها 

كافر بكل أنواع القيود حتي لو مهمة أو حتي لو كانت حواجز بتحمينا فأنا ككريم هعرف أحمي نفسي كويس

مش هقول إن فى صوت جوايا بيقولي قوم أقف 

ولا هقول إن الجوهر هوا اللى بيتكلم وإن كريم دلوقتي حقيقة 

ولا هقول غير إني هحضن إسكندرية بكره 

هخرج من البيت بشنطتي وهطهر نفسي من السجاير والوجع والناس الأوهام والناس الأي كلام والناس اللى فى أي مكان 

أنا بقف علي رجليا وببني من جديد بعد ما إعترفت بكل خطايايا قدام ربنا وبعد ما ندمت علي كل حاجة غلطت وبعد ما واجهت كل الحقايق وبعد ما حاولت أواجه كل الناس المريضة والمتخلفة عقليا والأغبياء والحمقي وفعلا واجهتهم جميعا وبكلامهم تقدروا تعرفوا أنا عملت إيه فى حياتهم وكنت نور مش نار 

أنا بقف علي رجليا من جديد وبحدد مستقبلي وحياتي والمرة الجاية اللى هنهار فيها وهقع فأنا ببساطة هيكون بسبب موقف واحد بس وأنا عاهدت ربنا لو حصل الموقف دا وأنا حي فأنا هنهي حياتي بنفسي ( هوا فى حد بيوعد ربنا بالإنتحار ؟؟ أيون أنا معنديش مشكلة فى دا ولا شايف إن دا بالنسبة لي أو بالنسبة لأي حد حدث كوني يستاهل التدوين ومحاولة الإفهام )

أنا مؤمن بربنا جدا 

ملتزم بكل حرف نطقته لأي حد جدا 

ماعدا الناس اللى طردتهم برا حياتى وهما أكيد سمعوا كلمة برا دي مني فى التليفون قبل كدا 

ملتزم بشكل كامل وتام تجاه نفسي وتجاه حلمي 

ومستعد أموت وأنا بحققه ومستعد أخسر الوجود كله فى سبيل تحقيقه 

كريم من النهارده 

هيروح يغير الواقع 

تحب تيجي تغيره معاه ؟؟؟

طبعا البوستات هنا كانت عبارة عن رسايل ونداءات ولكن الزمن دا إنتهي خلاص لأن مفيش فى حياتي شخص بعيد أو شخصية بحبها إلا وهي قدامي وقادر أوصلها فى أي لحظة وأقولها كل اللى انا عايزه 

ولذلك فمن اللحظة دي كل البوستات القادمة هتبقى يا إما أفكار يا إما عبارة عن أدب وقصص 

قلت قبل كدا إني بقرا الحب فى زمن الكوليرا صح بعد ما خلصت عزازيل وناوي علي نقطة نور لبهاء طاهر ؟؟؟

هبقى أكتب لكم المقتطفات اللى عجبتني فى الكتابين

وقلت قبل كدا إني عندي مناسبة حلوة فى شهر إتناشر 

كلكم معزومين :)

عايز أقولكم بكره بيمثلي إيه أو هعمل فيه إيه 

ولكن مينفعش 

بكره أول يوم فى العشر تيام اللى كريم هيقوم فيهم 

المعركة قربت أوي عشان حلمي 

المعركة هتكون قاسية وهكون فيها بكامل طاقتي 

أتمني ربنا يمنحني طاقة كافية أقدر بيها أواجه بكره

صحيح لسه عندي أسرار 

وصحيح لسه عندي ناس بتسندني فى الخفاء ومحدش يعرف عنهم حاجة 

وعالعموم انا سعيد جدا باللي وصلت له دا 

ومن اللحظة دى أنا هقوم وهنهض

Rise :)

من اللحظات اللى بتشرف بيها : اللحظة اللى لقيت بنت بتضيفني عالفيس وبتكلمني وبتقولي بالنص كدا : (( إنته غيرت حياتي بأفكارك وكتاباتك وبكل كلمة قريتها عندك وأنا أحسن بيك وبجد شكرا علي كل حرف كتبته لأني قريت ومازلت بقرا فى المدونة ))

أنا سعيد جدا 

وبكره هبقى مبسوط أكتر 

وعارف إني هقابل صعوبات ومهولة 

وأقلها الناس اللى اعرفها فى الشغل وحصل لهم حوادث الفترة اللى فاتت 

اللى هيقولي انا اعرف ناس بتموت هقوله مش اكتر مني , أنا قابلته يوم التلات لاول مرة ومات بعدها بأسبوع 

اللى هيقولي أعرف ناس بيحصلها مشاكل هقوله علي زميلي فى الشغل اللى وقع عليه قطع قزاز بسيطة جدا مصادفة وتسببت فى جروح عميقة فى دماغه وتقريبا كان هيموت , وطبعا هقوله علي زميلي اللى قطعة زجاج بسيطة جدا كانت هتقتله وتسببت له فى ستة وتلاتين غرزة 

اللى ميعرفنيش أحسن له ميقولش كلمة فى وشي وهوا ميعرفش أنا شفت إيه :)

وصدقوني لما أقول إني لو حكيت اللى شفته أو اللى بشوفه هييجي لكم ذهول :)

وختاما : 

****

تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .

Deleted

للمزيد من التفاصيل إضغط هنا

شاب فقري 

 ****

وختاما آخر :)

هتابع معاكم طبعا يوم بيوم ولكن دلوقتى

تصبحوا علي خير :)

كريم 

Rise

ولقد صنعتك من مفيش

"" إنته إزاي هتكتب عن كل دول فى بوست واحد ؟؟؟ """
- إيه المشكلة ؟
"" دول كتير ... ""
- أبدا , دول تلاتة بس , إتنين صحاب والتالتة إنتي وكنتي موجودة بالتزامن فى الخفا ومحدش يعرف عنك حاجة, وبعدين في فرق بين إني أحب واحدة والتانية أفتقدها وتوحشني والتالتة تسمعني وتبقي سري وتبقي هي الروح اللي بتلمسني والإنسانة اللى بتحسني وأعز أصدقائي واللي بتفهمني 
"" دي الثلاثية ؟؟؟ ""
- الثلاثية فكرة قديمة اوى ومش هى دى , دى حاجة أكبربكتير لأن شروط الثلاثية هنا مش متحققة والثلاثية بتشترط تكون فى علاقة حب أو إلتزام و أنا حاليا لا بحب ولا ملتزم تجاه أي حد بأي حاجة , أنا حر فى اللي بقوله أو بعمله أو بكتبه مطلق الحرية .
"" هتفسر الحلم ؟ ""
-طبعا , إنتي عرفاني مقدرش أقاوم .
"" هتقول اللى بيحصلك واللي كنت ناوي تكتبه إمبارح ؟؟ ""
- يس
"" كريم , هوا أنا إمتي أخاف منك ؟؟؟ ""
- لما تحسي إني أنا أبقى أنا مش الكلام بتاع قطع الشطرنج والعراف والكلام بتاع مستشار إبليس وسيد الزمن , لما تحس إن أنا كريم وطبعا مش هتحس كدا غير لو شفتني من جوا
"" طيب وهوا أنا ينفع أشوفك من جوا ؟؟ ""
- تفتكري إيه ؟؟؟
"" قولي طيب نويت تحقق حلمك ؟؟؟ حتي لو خسرت ناس تاني ؟؟؟ ""
- الحلم دا أنا خسرت فيه تقريبا أكتر من ست أشخاص بسببه ومصر عليه حتي لو عارف إني هموت فى الطريق أو عارف إني هموت وأنا بحاول والموت هنا مش إستعارة ولا وصف ولا رمز دا موت بحق وحقيقي يعني جثة هامدة , برغم خسارتي لكل الناس دي فى سبيل حلمي إلا إني هكمل وهوصل ومفيش لا إنسان ولا شىء فى الوجود هيوقفني مهما كان وبرغم وجعي فى خسارة آخر إتنين إلا إني برده محدش هيوقفني ولا حاجة
"" قولي , هتتصل بيا النهارده ؟؟ ""
- لما تيجي يوم الخميس عشان نحتفل سوا و عشان إحتمال أنزل إسكندرية وأكلمك من هناك.
"" علي فكرة فى واحد خد باله إنك بتشرب سجارة ورا التانية ""
- عادي , ما أنا واخد بالي وعادي , فاكرة آخر مرة  كنت بشرب سيجارة ورا التانية شربت كام علبة فى يوم واحد ؟؟؟
"" ست علب  ""
- بالظبط
"" مش هتكتب بقي ؟؟؟ ""
- هكتب
"" طيب إقرالي وإنته بتكتب ""
- حاضر , إسكتي خالص بقي عشان أعرف أكتب و أركز .
"" حاضر""

***

 ولقد صنعتك من مفيش

- المرحلة الأولي -

أولا : مقدمة : عن ( روما والوطن )

Everyone wants A Rome. A place where the slate is wiped clean. But the truth is, Rome ... is just Rome . No matter where we go, we take ourselves and our damage with us. So is home the place we run to, or is it the place
we run from... Only to hide out in places where we're accepted,
unconditionally.
Places that feel more like home to us... Because we can finally be
who we are.

#Dexter

#home

 كل الناس بتدور علي وطن , لكن إيه هوا الوطن أصلا ؟؟؟ هل هوا المكان اللى بترتاح فيه ؟؟ مين الشخص اللي يصلح لك وطن ؟؟ اللى يصلح إنه يكون لك ميناء ترسي فيها بعد يوم متعب ومهلك وقاتل لكل شىء حلو فيك ؟؟ مين اللى يستاهل إنك تبقى معاه ؟؟ وهل ضروري إن الوطن يكون يستاهل ؟؟ ما كلنا بنحب مصر ؟؟؟ بس يا هلتري مصر تستاهل نحبها لو بصينا لشوية حقايق مجردة ؟؟
خلونا نتكلم بالراحة ... عشان الناس تفهم
قولوا بسم الله الأول : أيوووووووون بالظبط كدا
مرة واحد قالي (( بعد رحلة تعب مضنية لما بتوصل للهدف بتاعك اللى بتدور عليه سنين وسنين وتتعب عشانه بتلاقى إنه عادي جدا و ملوش طعم ولو خيروك بين كل التعب دا والهدف بتاعك هتختار إنك متتعبش )) بس انا فكرت فى كلامه كويس , قلت اللى بيخلينا نتعب عشان الهدف هوا رابط بيننا وبين الهدف زي ما يكون حلم (  والكلمة دي مش عايزها تتفهم غلط ) وبالتالي إحنا اللى بنختار الحلم أو بنتعلق بيه وبالتالي بنختار الشقاء يبقى الإنسان هوا اللى بيختار الوجع , صح ؟؟؟  هي فكرة منطقية ولكنها ملهاش ضرورة دلوقتى لأن دا مش موضوعنا
نرجع لموضوعنا
الوطن مش المكان اللى بنمسح فيه كل الحاجات اللى فاتت ونروح نلبس طقم العيد للإحتفال بالوطن الجديد ونقول هنبتدي من جديد علي مية بيضا , الوطن لو كدا فهيكون زيه زي أى اودة فى البدروم أو حتي حتي بلاعة مجاري بتقرر إنك تقيم فيها ولو الحاجز اللى بتمنع بيه الماضي بتاعك ديني أو فلسفي يبقي لا مؤاخذة إنته حمار
كل مكان بنروح فيه مهما كان بناخد حاجتين او تلات حاجات أساسيين معانا : أولا : إحنا بكل تجاربنا ثانيا : مشاكلنا والدمار اللى فينا من كسر السنين وخذلان الحمقي والرعاع والسوقة والدهماء وثالثا : ذكرياتنا
عايز بقي تفهمني إنك عايز تروح مكان تمسح فيه كل اللى فات ؟؟؟ قلت لك ردي فوق وكان شتيمة
فكل حاجة من الحاجات اللى بناخدها معانا دي وإحنا رايحين الوطن أو بندور عليه يا هلتري هل هيتغير فينا شىء سواء مع فلان أو علان أو ترتان أو مع بكيزة أو نفيسة أو سعدية ؟؟؟
فى الحالة دي فإحنا هنهرب من علان وفلان مرة وإتنين ومليون لأننا ببساطة مستخبيين من الحقايق وببساطة مش عايزين حد يشوفنا زي واحد ليلة فرحه راح لبس كل الهدوم الشتوي وبعد الفرح برده ناوي ينام بيها , صباح الخير لا مؤاخذة , لازم يبقي فى مكان بتظهر في كل حاجة فيك مهما كان المكان دا فين
ملحوظة صغيرة : قعدت فى مرة أحكي لواحدة علي حاجات كتير أوي عشتها , الناس بتتنح لما بتعرف حاجات من الماضي بتاعي لكن الخلاصة يعني إن البنت قالت لي هوا إنته مش خايف بعد دا كله أبعد عنك ؟؟؟ قلت لها : أنا لو مش عرفتيني من جوا أو شوفتي أنا إبتديت إزاي ومشيت فين وقررتي تاخدي عالجاهز بدون ما تفكري اللى فاتني إيه يبقى متلزمنيش ,
عارفين ليه ؟؟؟
لأني ببساطة مش مستعد نهائيا أعيش ورا قناع عشان خاطر حضرتك تبقي مرتاحة البال وبتقولي الحمد لله إني لقيت شاب مفيش له ماضي , صباح الخير يا آنسة طريقك صحراوي والشاب دا مش أنا لأني ليا ماضي ويمكن الماضي له ماضي وماضي الماضي له ماضي كمان , ملعبك ومعقد وصعب صح ؟؟؟ دا أنا يا سادة , خلونا نكمل الموضوع
المهم
الوطن هوا الشخص اللى تقدر تقف قدامه بدون أى حواجز ومتحسش إنك مكسوف منه أو خايف لأحسن يرفضك , زي ما بتقف قدام المراية أو قدام والدتك وإنته فى أى حالة , هل بتقول معلش أصل أنا لو شفت رجلي بالمنظر دا هقطعها ؟؟ ولا بتقول  لو امى شافتني نايم كدا هتكرهني ؟؟؟ من الآخر لا إنته عمرك هتقطع رجلك عشان منظرها مش عاجبك ولا عمر الست الوالدة هتشوفك فى أي حالة وتكرهك , عشان كدا لما بييجي حد يتكلم عن بلده بيقول مثلا : مصر هي أمي لأنها بتحبني وأنا منها وهتفضل تحبني
كذلك الحال بالنسبة للأشخاص يا سادة
المقدمة طويلة شوية ؟؟ صح ؟؟
طولت فيها ؟؟؟
أنزل بصورة تسليكم طيب ؟؟
حاااااااااااااضر

 أنا من عشاق أشعار أمل دنقل واللي مش عاجبه ينتحر ...
لسه المقدمة مستمرة على فكرة متفتكرش إني خلصت تمهيد
الوطن يا سادة يا كرام هوا الشخص أو الشىء أو الحلم أو الهدف أو أي إبن كلب بتحس ناحيته إنه هنا وساكن جواك حتي لو دفنته فى أعمق أعماقك فى حلقات زمنية وسافرت كام سنة ضوئية بعيد عنه وكمان هجرته تماما
الوطن هوا الشىىء أو الشخص اللى يمكن تفسير كل أعماقك وكل الضلمة اللى جواك لو بصينا له نظرة واحدة بس
الوطن يا أحبائي هوا الشخص اللي ممكن تموت عشانه والبلد اللى ممكن تتعلق عشانها فى المشنقة وإنته مبتسم وراضي وسعيد وبتضحك زي العبيط , وهوا الشخص اللي ممكن تقبل إنك تنحرق أو تنضرب بالنار علي إنك تخسره
الوطن هوا المكان اللى منضطرش إننا نبقى مستخبيين فيه ورا مليون حاجز
الوطن هوا المكان اللى نقدر نتقبل فيه بدون شروط , مش محتاج فيزا عشان أنزل روض الفرج أو أروح شارع فؤاد أكل آيس كريم من العبد أو ماكدونالدز
مش محتاج تصريح من حضرتك عشان أقدر أضمك وأخدك في حضني ( فى حالة الحب والجواز والعشق يعني هي بتعشقك وإنته بتعشقها وهي وطنك مش إغتصاب وتحرش ... عيب متفكروش كدا ودماغكوا تروح شمال ) ومش محتاج أقولك إنك وحشتيني أو بحبك عشان تعرفي ولا محتاج أقولك إني همسك فيكي لآخر يوم فى عمري عشان تتأكدي إني بحبك بجنون لكن بقول كل دا عشان روحك تطمن وإنته معايه وتعرفي إنك عمرك ما هتبقى لوحدك
شايفين السطرين دول , والله حلوين وخسارة
خلونا نخش فى الموضوع
قلت إني كل دي مقدمة
طيب ننزل بالصورة بقى ونكتب الكلمتين وسمعني سلام ( سيلين ديون تاكينج تشانسيس :D )

***

ولقد صنعتك من مفيش

ولقد صنعتك
من بكاء طفلة لا ينتهي
وخوف مراهقة لا تهدأ
و إنعدام ثقتك بنفسك
وروح منكسرة
وأحلام يستحيل تحقيقها
و بيت ***
وحياة كالموت لا روعة ولا حياة تنبت فيها فقط نزيف عمر لا أكثر
ولقد صنعتك
كما رأيتك ( أجمل من كل الأحلام )
من دفئي بنيت روحك
من شوقي بنيت قصور العشق بداخلك
من روحي نفخت فيكي فكنت تلك القوية
من فاكهة جنوني أطعمتك فصرتي تلك العنيدة
من ظلمتي منحتك العناد والكبر والقسوة
من كلماتي تكونت أفكارك وظهر لك كيان إسمه أنت
و من قلبي نطقت بإسمك
فأحببتيه و صرتي أنت
وصرت حفراً بداخلك
وضعت فيكي أجزائي فصرت جزءا مني وصرت جزءا منك


""

ملحوظة : كل دا بدون مستشار , بدون عقل , مجرد واحد بيحس وبيبني ومبيزهقش  , كل دا بدون شياطين أو ملايكة , كل دا بدون أدني أي شىء وحش , مجرد أنا . وأنا متشافتش, يمكن كنت شفاف ويمكن فعلا علي رأى واحدة قالت لي من شهر لما كنا بنتكلم (( اللي تبعد عنك دى تبقي غبية )) , وللعلم هى كمان طلعت غبية صاحبة الجملة .

***

التفسير بقي

(( الحقايق بس هي اللى بتداوي وبتشفي ولذلك مكانش فى أي دوا أو أى شفا حتي لو عارفين إن الشفا فى حاجة إسمها كذا , مشكلة الشخص اللي بيعيش حياته بالفصل أو ورا ستارة أو بأي شىء يسكت الوجع إنه الوجع مبينتهيش مهما عمل ولازم يواجه نفسه فى مرحلة ما لأن المظاهر كلها بتزول , فى مرحلة ما وهي تقريبا المشهد اللى قبل الأخير وصل المشوار لحد مكان المفروض إنه مهتم بالمظاهر وبس , والمشكلة إن الحل مش فى المظهر , المشكلة إن الحل فى إن الواحد يبطل الهبل اللي بيعمله ويكبر ويبقي شخص له كيان ويقف يتكلم ويقول الحقيقة ويتصرف بإنسانية , عذاب الضمير ووجع الروح بيخرج علينا أحيانا فى هيئة سواد تحت العين أو ألم مزمن ومفيش أي شىء بيقدر يسكنه أو حتي يمنعه , الشىء المقبول الوحيد هوا الوقوف علي مصدر الوجع و نبطل نكدب علي بعض , المشكلة إن كمان المظهر والمسكن مش هما الحل وكمان تمنهم مش موجود ومش مقدور عليهم , لابد من تدخل جراحي من شخص عارف كويس هوا بيقول إيه وبيتكلم إزاي وإلا هيستمر الوجع وهيستمر الحلم وهيستمر التنقل بين البطاريات اللى مش بتشحن والأدوية اللى مفعولها بينتهي فى لحظة مام وتظل المشكلة عالقة إلي الأبد بس الخطورة فى إنها كل شوية هتكبر لأن لما المسكن يخلص هتلاقى نفسك إترميتي فى العدم حيث لا شىء ولا أحد سوي ظلمة الليل والوجع والدموع , والحاجات دي مش بتعيش بني آدم إلا لو كان زى حالاتي , شاف الدم والموت والفقد بمعانيهم التي لا يمكن نسيانها ))

خلص التفسير ومش متوقع منكم تفهموه لكن فى ناس تانية هتفهمهه , للأسف مبقدرش أقاوم تفسير الأحلام :D
حتي لو مش فارق معايه الشخص أو عامله طرد .
حتي لو الشخص دا بالنسبة لي مجرد كارت محروق 
واللي بتحرقه النار مستحيل يرجع زي ما كان تاني

***

ولقد صنعتك من مفيش  

- المرحلة الثانية -

 مفيش حاجز بين أي إتنين خلقهم ربنا
طالما الإتنين بينهم ( معرفة وإهتمام وتفاهم وطاعة بتيجي بعد الجواز ) يبقي مفيش أي حاجز
لا تقولي فى بني آدم واقف فى النص
ولا نظرة الناس
ولا اللي فات
ولا الكلام الحمصاني الحمضان علي راي واحد صاحبي
أصل معلش يعني الناس مش هتيجي تعيش مكاني لما أبقي عايش مع واحدة مبتحبنيش
ولا الناس هتفتح عيونها الصبح تلاقي نفسها نايمة جنب فلان اللى هوا أصلا جاي لها بالصدفة
ولا الناس ولا الشخص اللي بيمثل حاجز دا هوا اللي هيعيش حياتي بدالي أو هعيش أرضيه
معلش يعني انا مقتنع بفكرة هامة جدا وخطيرة جدا جدا جدا بتتبني من تلات كلمات (( طز بخ بللم ))

أولا : طز فى الناس وفى الحاجز وفى الدنيا كلها لو هتقف فى طريقي وفى طريق إني أعيش أنا إنسان سعيد وراضي عن نفسي مع حد بيحبني ويقدرني ويفهمني وعايز يكون بجد متواجد

ثانيا : بخ , الرحيل عن كل الناس اللي مش عاجبهم الطز واللى معترضين عليها , معلش يعني لو أقرب الناس ليا مش قدروني وفهموني وقدروا يحسوني يبقي ميستاهلونيش وفى الحالة دي فى ستين داهية الباب يفوت ججمل , همشي وأرحل وانا أقدر اعملها وطز فى كل السنين اللى كنت فاكركم فاهميني فيها وطز فى كل الأوهام اللى ما بيننا

ثالثا : بللم , إختفي بقي وعيش حياتك مع سعدية اللي بتحبك تقولها يا سوسو :D

أنا إتولدت إنسان حر وربنا هيحاسبني علي كل حاجة بعملها
معلش يعني لو سمعت كلام فلان أو من الآخر لو سمعتي كلام فلانة ومشيتي على فكر فلانة وصدقتي فلسفة فلانة وغرقتي فى الهم مع فلانة يبقى إنتي يا إما هيعيشوا لك حياتك أو هيتحاسبوا يوم القيامة من ربنا بدالك وكل دا مستحيل وفى الآخر إنتي اللى هتتحاسبي
يبقي ليه تحاسبي علي مشاريب الشلة كلها وإنتي أصلا مش فرع فيها

عارفين المشكلة فين ؟؟؟
لما بتدخل فى وسط ناس وتلاقى شخص بياخد بالجزمة وراضي وساكت ومستحمل ويقولك أصل العشرة والسنين والعمر والكلام الكبير دا وتلاقى العالم الباقية معلش يعني فى التعبير ( ولاد كلب ) مش فارق معاهم الشخص دا ولا وجعه ولا ألمه لاء وكمان بيعملوا فيه مصايب هوا مش يتخيلها  , يبقى معلش يعني الشخص دا يستاهل مترو الخلفاوي يدوسه تلات مرات ومرتين هدية وعشرين مرة جدعنة وكل دا علي سهوة لأنه يبقي غبي لو مفاقش وعرف الحقيقة

فاهمين ؟؟؟؟

المسألة مش مسألة ببيع فلان عشان خاطر أشتري فلان أو باكل من طبق عيب أكل منه , المسألة مسألة حرية وإقتناع  و حياة

واللي مش فاهم الكلام دا يبقي معلش يعني يروح يسمع الوسادة الخالية بتاعة أورتيجا وزينات صدقي وياريت يكون بعيد عني
لأني خلاص
لكل الناس فرصي إنتهت
اللى عايز فرصة لازم علي رأي الشاعر أحمد العايدي ( يكون بالموت طلع دينه )
غير كدا
يبقي ميستاهلهاش :D


خلص جوهر الموضوع بقي نخش فى المقدمة , غباوة كدا وحرقة دم عامل المقدمة تحت :D

ثم هما كانوا هما       (( لأنهم طول عمرهم شبه بعض جواهم نفس المرض ))
ثم قالوا كلام كتير         (( ولا هيأثر مع واحد لو حب نفسه فى يوم بيجيبلها ولاعة وبيضحك فى وش الموت وعايش حياته عشان حلم أهم من الوجود كله ))
ثم فاهم ثم بزعل           (( يزعل عالناس اللى بتفكر فى الحاجات اللى تاخدها وبس والحاجات اللى عايزاها ومحتاجاها وبس وفى الاخر متبصش هي هتمنح إيه أو هل اللى منحته ليه قيمة ؟؟؟ ولا كان فعلا شىء قليل جنب اللى خدوه ))
ثم أنا أصلا كبير           ((( والله العظيم شعري بيبيض و دماغي مبقاش فيها سنة تركيز من كتر التعب  , صباح الفل يا كابتن , مش فاضي للهبل بتاعك وبتاع غيرك ))

ننزل بصورة تانية

محدش يعرف الصورة دي صورتها إمتي أو فين غير شخصية واحدة بس
وأنا فاكر التاريخ علي فكرة مش بطيخة كدا وخلاص
خلينا فى موضوعنا
مبحبش الغباوة
يعني مش تفكري فى كل اللى بيوجعك وإزاي مينفعش الناس تعمله معاكي وتروحي تعمليه فى الناس زي عبده العبيط
يعني برده مش تقولي أصل وفصل وفى الآخر لما تاخدي كل اللى محتاجاه وبشكل كامل تقولي لاء مينفعش

شامم أنا ريحة إنتقام بس عارف إنك مش بالغباء اللى يصورلك إنك تدخليني فى مسرحية لعبتي ولعبة بنت الجيران

أو إنك تستخدميني أداة لفعل شىء بالقبح دا لأني فاكر كويس أوي أنا بعمل إيه فى أي حد بيعتبرني أداة 

لو قلت بولع فيه فدا شوي وقليل , تقدروا تسألوا اللى لمست النار اللي جوايا , العرافة :)

وربنا يستر لأن رد فعلي بيبقى ملوش حدود ودا واضح طبعا

ننزل بصورة الجزء المكتوب عالمرحلة التانية :

طلبتي النسيان والقوة
ونسيتك اللى فات وقدرت أقويكي قدام الماضي والحاضر والمستقبل 
والحمد لله وصلتي لكل دا وأكتر مليون مرة
ودي كلها حاجات مش للبيع بس وصلتك ليها بكل سهولة وبدون ما تحسي بقيتي قوية وقاسية قدام اللى فات 
ومش كدا وبس ...
حاجات كتير إنتي بس اللي تعرفيها 

فين بقي اللى أنا طلبته ؟؟؟

إنتي محيرة علي فكرة ,  أوي أوي أوي علي فكرة 
((((((((((((( ملحوظة : هنا نمت علي فكرة وكملت كتابة تاني يوم بليل اللى هوا يوم التلات :D ))))))))))
حاجات كتير بتخليني أقول كدا 
يمكن ردود الأفعال ومنظرك فى كل موقف مش عارف بالظبط ولكنها حاجة بتصيب بالحيرة بالنسبة لي لأني أول مرة أشوفها وأنا ككريم لما أقول علي حاجة إني أول مرة أشوفها فمعنى كدا إني علي مدار السنين اللى فاتت وكل العلاقات والتعاملات عمرى ما شفتها ولا إتعاملت معاها ودا بيصيبني بالحيرة وبيخليني مش عارف أتعامل وبمنح حاجات كتير بغباء 
بدي كتير يعني بمنح كتير أوي وبددون حسااب ودا اللي خلاكي أو خلي ناس كتير تفهمني غلط وناس تانية تفهمني صح
الأهم من دا كله :  التفسيرات البسيط اللى قلتيها عني , ناس عاشت معايه سنين وموصلتش لربع الحاجات دي ولا حتي للمحة منها , ودا مخليني مبنساش اللي قلتيه نهائيا , بمعني آخر مش هنساه غير لما الوردة اللي معاكي تدبل .

قلت أكتب لك إسمك فى البوست 
بس ملقتش غير صورة مكتوب عليها ( نور ) وبقية الصورة إسمك بسبب المنظر والشمس ونورها .
فقلت لازم أنشرها بغض النظر عن كلمة نور اللي مبوظة المنظر 
:D
كان نفسي أجيب صورة أحط فيها فولت كهربا عشان تتكلم عنك 
بس الصراحة ملقتش 
دايما بكتب إني أنا الكهربا وإني أنا اللي بقدر أكهرب الناس 
لكن مش عارف حتي اللحظة دي إزاي فى لحظات عشتها فى وجودك كانت عاملة زي البرق من السماء 
علي قد حلاوتها علي قد ما كانت سريعة علي قد ما كانت بتكهرب 
أنا أول مرة فى لحظة واحدة أتكهرب وتنكسر كل الحدود ويطلع جوهري واضح أوي للدرجة دي ...
مش هوفيكي حقك فى الكلام 
مع إنك باللي عملتيه بقيتي كارت محروق زيك زي غيرك 
واللي بيحرقه النار مفيش حاجة بتصلحه ولا بتقدر ترجعه زي ما كان ...
 عايز أكتب عنك كمان 
بس بيتهيألي كدا كفاية النهاردة 
ولا أكمل كلام ؟؟؟

مش فارق معايه حاجة حاليا 
بجد وحشتيني أو بمعني آخر مفتقد الحديث معك :)
بس دا مش هيغير أي حاجة ولا له أي ستة وتلاتين لزمة :D

 نهاية المرحلة التانية 

***

المرحلة التالتة : ولقد صنعتك .. بس مش من مفيش وفى نفس الوقت مصنعتكيش

صنعتك ؟؟؟ مظنش لأننا فطرة واحدة 
ولأننا وائقين إن مهما كانت المشاكل والمصايب ففي أرض واحدة هتجمعنا يوم الخميس أو علي الأقل هنعترف عليها بكل حاجة .. ونبقى فى منتهي الصراحة والوضوح وبدون كدب أو إخفاء لأي شىء , أنا سعيد لأنك تعرفي أكثر مما يجب :)
 


تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .

Deleted

للمزيد من التفاصيل إضغط هنا

شاب فقري  
****

(( بردان أوي بس مطمن ))

شاب فقري   

كنت جاي بس مجتش

كنت راجع من الشغل بفكر فى فكرة خطيرة جدا بالاضافة لشوية افكار جامدة جدا بايتة من إمبارح
كنت ناوي أحكيلكم عن الأرجنتين وأفكار الوطن وعن إزاي وليه وبتاع إيه و عن المقدم عمرو وعن السيكوريت وعن شوية فنيات
والأهم كنت ناوي أحكي عن رجلي اللى إتعورت يوم التلات وسيبتها يومين متعورة بدون ما أبص عليها ولا أطهرها حتي وفى الأخر طلع جرح يستاهل تلات غرز وإتلوثت ومكنتش بعرف أمشي الكام يوم اللى فاتوا وقعدت فى البيت مأجز كام يوم مبقدرش أقوم من مكاني ودورت علي حد يشتري لي كتب علي كام كيلو موز وملقتش
كنت ناوي أحكي لكم عن النهارده وهوا اليوم الثاني من الخمسة عشر الأولي
كنت ناوي أجيب فى سيرة القديم والبعيد والجديد والجديد جدا وحكاوي آخر الليل
وكنت ناوي أفسرلكم حلم ( مش حلمي ولا يخصني ولكن يهمني أفسره لأني أقدر طبعا )
وكنت ناوي أحكي لكم عن الركعتين بتوع إمبارح والحلم اللى حلمته وأبتدي البوست بداية غير تقليدية
ولكن
وللأسف
وربنا وربنا وربنا كمان مرة
راجع من الشغل تعبان ونفسي أنام
يا إما هعمل قرفة أو شاي بسبع معالق سكر
وأستريح علي صوت الموسيقي الجديدة اللى جاتلي من المفيش وعمالة ترن فى دماغي وبسمعها من إمبارح
يا إما هعمل شىء غير عادي
بيس


#الثاني_من_الخمسة_عشر_الأولي

الحضن الناري

إمبارح بيتت برا البيت
فى المصنع سهرت فى مكتبي برتب حساباتي وبقفل حسابات عملاء لا حصر لهم وبتابع الشغل مع ريس العمال اللي جه جديد واللي المفروض يريحني بس حاسس إنه دماغه زي الجزمة مش هيعرف يعمل حاجة غير شوية الزعيق , متخلوناش نخرج عن الموضوع أنا بيتت إمبارح فى المصنع

بعد ما العمال مشيوا ومتبقاش غير واحد بس وأنا نزلت الدور الأرضي وخرجت ركبت الموتسيكل وجبت عشاء والهوا البارد بقي مفيش حاجة تقدر توصفه وبالذات فى أكتوبر مدينة الصقيع , رجعت وإتعشيت وسيبت كل حاجة وقعدت لوحدي عالترابيزة اللى بيشتغل عليها الناس وعليها شظايا زجاج كتير جدا ودخنت شوية , مش عارف ليه أصلا قعدت أفكر .... إذا كنت أنا برا عشان أنا أصلا عايز مفكرش ومتعبش نفسي ومحسش بالوحدة , إيه دا بس اللى انا فيه دا ؟؟؟ مش عارف
لكن اللى عارفه أوي إن البرد كان واصل مش بس لعظامي ومخليني برتعش , البرد كان واصل لأعمق أعماقي , مش أول ليلة أبيت فى شغل ولكن المرة دى البرد كان جوايا أنا منسجم مع البرد اللي برا والوحدة كانت رهيبة
انا فكرت كتير أوي أوي أوي
عشان كدا بكتب
كل اللى فاكره تاني يوم إني أول عامل وصل المصنع صحاني من عالترابيزة وقالي إنته إتجننت ؟ إزاي نمت وسط كل الزجاج والشظايا والحاجات دى , الراجل مستغرب بجنون وأنا صاحي ومش فارق معايه , كان النهارده يوم متعب كملت فيه حساباتي وروحت فى العربية وأنا بسقط
لما جيت عند هايبر ومدخل زايد حاولت أدور وشي الناحية التانية , لكن فشلت وهنا إفتكرت إني علي طول بواجه الألم , وسالت نفسي ما يمكن أنا بواجه الألم عشان مبعرفش أجري منه أو يمكن عشان أنا قوي أوي , مش فارق ومش مهم ومش لازم نتوصل لحقيقة
دلوقتى وصلت فى انهياري لمرحلة مهمة جدا بيظهر فيها الجوهر بتاعي أنا ومش لازمني أجوبة خالص
وأنا مروح وماشي فى الشارع البرد كان قاتل
مش عارف أوصف لكم لان كل الوصف هيبقى ولا حاجة ولا كاني قلت حاجة
انا النهارده عشان أنام محتاج حضن من نار
هوا فى حد بيحضن النار ؟؟؟
أيون أنا بحضن النار
بتطمني وبتدفيني وجروحها بتطهرني
محتاج حضن ناري يدفيني حد الرماد
يعني إيه حد الرماد , يعني النار تحرقني لحد ما ميتبقاش فيا غير رماد
هوا دا حد الرماد حضرتك

مش عارف هقوم أعمل إيه بس واثق إني هقوم أعمل مصيبة

مش فارق بقى اتكلم او متكلمش لكن مش هتفرق فى اى حاجة

ما انا ياما قلت كلام ووجهات نظر وبلاقي اللى قدامي شخصية غبية بيروح يسمع الكلام من ناس برا وكأنه أول مرة فى حياته يسمعه

فاكر إحساس القرف

أهوه انا دلوقتى قرفان بجد
من جوا كدا قرفان
الواحد لما بيحس بالقرف بيشوف هوا قرفان من ايه ويبعد عنه او مش يفكر فيه
وبالتالي
مش عارف هعمل إيه
بعض المصاير والطرق متقدرش تبعد عنها ولو عملت كدا تبقى مش بني آدم
مش هقول الضعف بيخلينا بشر
ولكنه عالاقل دليل وبرهان واطي بيساعد فى إثبات الحقيقة دى

هوا انا بس اللى شايف الدنيا صعبة وشايف ان مينفعش نهائيا نهائيا الناس تعيشسها بالشكل دا
شايف ان لو الواحد بقى فى سلام وراحة مع اللى حواليه بدون تعقيدات ومشكلات وهموم وبدون اى عقبات او حدود الناس كلها هتعيش كويسة
هوا انا اتهبلت فعلا وبحلم بالمدينة الفاضلة
مش فارق معايه والله
امبارح حلمت والقزاز والشظايا دي بتشوكني وانا نايم
مش فاكر نمت ازاى ولا امتي ولا فاكر الحلم بس كان حلم ابن كلب اكيد ملوش لزوم

****
انا قررت ابطل اكلمك
لاني ببساطة مبقتش باكل من الكلام اللي بيتقال من النوعية اللي زيك
أو الصور أو الأساليب أو الطرق أو الأفكار
زي ما تقولي كدا مبقتش الحاجات دى كلها ليها معني أو بتأثر أو حتي بتفرق معايه النوعية اللى زيك
أينعم كنت مهتم بيكي وقلت دا
بس حاليا إطلعي برا
فى ستين داهية
أنا بقرف من النوعية دي من الناس
لأنهم مصلحجية أو عايشين فى كدبة
وانا للاسف مبعيشش فى كدبة
برغم كل الخطايا اللى عملتها والمشاكل فى حياتي
إلا إني دايما كنت واضح وصريح
وبمنح للي قدامي إختيار
وانا مش همنحك إختيار لأنك بصراحة
من نوعية تقرف
كفاية إن الواحد يجرب تفاحة واحدة عشان يعرف هوا هياكل تفاح بعد كدا ولا لاء
وانتى مش تفاحة
وانا مش ادم ولا ناوي اكون
ولذلك
فمن اللحظة دي وبغض النظر عن انك مش بتقري هنا وبغض النظر عن كل ترتيب عملته عشان أبقى جنبك
فمن الآآآآآآآآآآآخر
برررررررررررررررررررااااااااااااااااااااااااااااا
****

هوا الناس بترجع تكلمني ليه ؟؟؟
شىء غريب لما تلاقى شخصية كانت عارفاك من تلات سنين وجاية تطمن عليك وتقولك انها حاسة انك مش كويسة وعايزاك تبقى كويس
او شخصية تانية تعرفك من سبع سنين بتتصل برده وبتقول نفس الكلام
لكن الغريب هوا رجوعك انتى
مش متخيل الصراحة
أول بنت تبعتلي صوتها فى ملف عشان الميك بايظ :D
أيام ما كان فى ميك بقى والشغل الحمضان بتاع النت وكنت ساعتها شغال فى الدعاية والإعلان
وساعتها إنتى أول واحدة ساعدت فى إشتعال عود الكبريت
إنتي النار اللى ريحت قلبي
إنتي اللي سبقتي أى حد والكل فى إنك تبقي هنا
الأولي ولا وصف آخر يمكن أن يقال عنك
الوحيدة اللى بتحبي كلمة ( كدهوه ) وبتسأليني بشوق دايما : هوا انته لسه بتقولها
والوحيدة برده اللى بتحب صوتي وفاكراه بكل الجنون دا وبتقولي وحشني صوتك
مش عارف بقي إيه يتقال
لكن عارف إني سعيد بيكي
مش عارف راجعة ليه  ومش عااااااااااااايز اعرررررررررررررررف
انا لسه هختار وفى اللحظة اللى هختار فيها
اللي هيبقى هنا هوا اللى هيدخل حساباتي واللى مش هيبقى هنا ويعمل فيها واحد تاني ومن بنها
هقوله الكلمتين اللى قلتهم فى الفقرة اللى فاتت
كلمة برا
واظن فى مرادفات كتير اوي للجملة دى ناس كتير سمعتها مني
المكتوب عنك هنا يا فتاتي الأولي لا يوفيكي حقك
وأيضا ليس عشقا فيكي ولا حبا فيكي
بس انا عمرى ما كتبت ولا حكيت عنك بالرغم من انك من اكتر الناس اللى فرقت معايه فى الحياة دى
يخرب بيت كدا
انا فاكر الشعر بتاعك اللى كتبتيهولي وقلتي لي فيه ( برغم كذا وبرغم كذا ... ) وقلتي فيه كل الموانع وفى الاخر قلتي قد ايه بتحبيني
من الحاجات اللى متتنسيش برده الحاجات اللى كتبتها فيكي
كنت ساعتها قبل ما اكتب وقبل ما افتح حتي مدونتى الاولي وكنت بكتب فى تكست وارمي فى السلة
تعرفي قد ايه كانت ايام حلوة ؟؟؟
انا بقى عارف
وشايل كل دا جوا قفل زمني مفيش حاجة تقدر تبوظ اللى جوا واللى جوا ميقدرش يأثر عليا
وعشان القفل دا يتكسر
انتى فاكرة الاغنية اللى قلتى لي عليها مثيرة ؟؟؟ أيون
بالظبط كدا 
****

هييجي واحد سخيف يسألني ويقولي ليه هتكتب الكام سطر اللي جايين دول
هقوله (( تباً لك )) وأكررها (( تباً لسمو عظمة فخامة حضرتك ))

وهكتفي بإني أقول إن فى ناس مكتبتش عنهم حاجة بالرغم من تواجدهم

انا مش ناسي لا خمسة وعشرين ولا ستة وعشرين تمانية علي فكرة
ومش ناسي انى فتحت لك المحفظة ووريتك صور وحاجات اول مرة حد يشوفها فى التاريخ وسمحت لك تقلبي فيها .
ومش ناسي يوم الجمعة إياه لو فاكره
ومش ناسي منظرك وانتى ماشية بالقهوة يوم المفاجأة العبيطة
ومش ناسي برده لما قلت لك هعلمك تكتبي وقلت لك تكتبي إزاي وتوصفي إزاي وتفكري فى إيه وتعبري إزاي
ومش ناسي الصورة اللى صورتها ساعتها 
ومش ناسي منظرك برده وانتى راجعة لي وماسكة الكارت عشان تكلميني فاكرة انى مشيت مع انى كنت لسه فى مكاني
ومش ناسي برده الحاجز إبن الكلب اللى إنتي فاكراه وعارفاه
ومش ناسي الكهربا
ومش ناسي الرسايل
ومش ناسي الاوفلاين
ومش ناسي السلسلة إياها ولا الوردة إياها
ومش ناسي قزازة المية والمناديل والسجاير والمنديل بتاع سلنترو
ومش ناسي برده المنديل كان فيه إيه وإيه اللي خلاه مختلف عن أي منديل تاني فى الوجود كان معايه او اديته لحد
ومش ناسي برده (( هوا الكوبري بيتهز كدا ليه )) ولا المفاجأة اللي مأثرتش فيكي ومشينا ساعتها كام ساعة
ومش ناسي ماكدونالدز
ومش ناسي النص جنيه ولا العيديه
ومش ناسي لما قلت لك ( أنا مؤمن ومصدق باللي بقوله )
ومش ناسي صوتك
ومش ناسي الإختلاف اللي حسيته عن أي بنت عرفتها قبلك
ومش ناسي مناقشتي عن الملايكة والشياطين ولا حتي الفندق اللى كنا واقفين قدامه
ومش ناسي قلت لك ساعتها إطلعي فوق السور دا ورفضتي
ومش ناسي وسط البلد
ومش ناسي القلم الأحمر واللى انا كتبته بيه وكمان مش ناسي كتبت بيه إيه ومضيت فى الآخر إزاي .
ومش ناسي الأغاني اللى بتحبيها
ومش ناسي الشاي لو فاكراه سواء اللي بعمله أو التاني اللى كان أخضر دا وعليكي تمنه لحد دلوقتي
ومش ناسي البت المتخلفة اللى طلعت تسلم عليا معاكي وقالت : هوا دا كريم بقي اللي بتحكي عنه ليل ونهار  وعاملتها بذوق عشان خاطرك
ومش ناسي الكبسة اللى كنتي مرعوبة منها فى اليوم دا
ومش ناسي القلم بتاع اليوم دا الأزرق اللى مكتبش ساعتها
ومش ناسي مكانك اللي قعدتي فيه
ومش ناسي منظرك ولا الارتباك
ومش ناسي برده قلتي لي إيه لما جيت ماشي وحاسة إني زعلان 
ومش ناسي اول مكالمة عملتها من اكتوبر
ومش ناسي كل مرة قلت لك فيها هسيب الشغل وقلتي لي كمل وشجعتيني مش ناسي اليوم اللى قلبتي فيه الدنيا عياط عشان قلت لك ماشي وممشيتش وانتى اتفاجئتي بيا تاني يوم 
مش ناسي كل مرة اديتك فيها حق الإختيار وكنتي بتختاريني وبتتمسكي بحقك فى الحياة 
ومش ناسي كل الكلام اللى قلته ومناقشاتنا اللى كانت بتستمر بالاربع ساعات فى حين انى مبكلمش اى حد تاني فى الدنيا غيرك
ومش ناسي أول يوم

ومش ناسي آخر يوم
ومش ناسي قد إيه إحتجت أتكلم وملقتكيش
ومش ناسي قد إيه من فرص وإهتمام منحتك وإنتي فى البلالا لاند ومش قاادرة تقري اللى بحاول أخليكي تقريه
ومش ناسي خناقاتك وإعتقاداتك للي فى دماغي برغم إنك عارفاني أكتر من ناس كتير ولاد ستين كلب كانوا جنبي ومقدروش يعرفوا حاجة وبرغم ذلك برده رتبتي دماغك بشكل غلط
ومش ناسي تصرفاتك الغبية والمرة اللى عملتي فيها حاجة خلتني أكره إني منحتك فرصة مفيش قبلك حد قدر يوصلها
مش ناسي كل اليأس اللى كنت بحس بيه لما ببص فى عيونك بعد ما بتقابلي ناس كتير وبتيجي وكل اللى بنيته جواكي رماد وأطلال
مش ناسي كل خيبة الأمل لما بقدر حد وبستناه يقدرني وبيتعامل بأسلوب قذر بيخليني عايز أولع فيه وانا الصراحة كان نفسي اولع فيكي كام مرة بس
مش ناسي بقي نهائيا إنك بعتيني عشان خاطر ناس ولاد ستين كلب (( علي فكرة انا بحب الكلاب بس انتى فاهمة انا اقصد ايه ))
مش ناسي خالص بقي نهائيا انى عمري ما كتبت عنك برغم كل اللى عملتيه

الأهم من كل دا
إني وأنا بكتب دلوقتى فات واحد فى الشارع مشغل الاغنية بتاعتنا وفى المقطع اللي بيقول (( البنت لسه )) اللى بحبه وبيفكرني بيكي

والأهم من كل اللى فات برده
إني مفتقدك وجدا كمان


والأخطر من كل المهم
إني قلت دا هنا وهنا بالذات وشتمت بالشكل دا وقلت كل دا عالملأ وكأني بقول للناس كلها تباً لكم يا ولاد الكلب

والأفظع والأشنع
أني مازلت مؤمن إن الأفعال بس هي اللى ليها لزوم وغير كدا يترمي فى الزبالة
ولذلك
فتأكدي إني مهما إفتقدتك
مش هعبرك فى الجزمة
مع إحترامي يعني
وخليكي فى توهتك مع التايهين وإنتي فاهمة بتكلم علي مين

صحيح يا بت
هنساكي أكيد لما الوردة اللى معاكي تدبل
وإنتي عارفة إن الوردة دي والسلسلة بتوعي
وإن عمرهم ما هيدبلوا 
زي اللى راح يقول واحدة بحبك يا غبية
قالت له متشتمش
فهماني ؟؟؟
أكيد فهماني ما إنتي شفتيني بعيط وكمان كان معاكي بث حي من دماغي لمدة محدش قدر يسمعني فيها قبل كدا
وغير كل دا
إطلعي من الضلمة لو حبيتي هتلاقيني مستنيكي فى النور برغم غباوتك اللى خليتني عايز أولع فيكي
 وإنتى حرة
وأنا حر

بكتب كل دا لان مينفعش متتسجليش هنا
وكمان من حقك تعرفي إني مفتقدك
وكمان من حقك تعرفي إن كل شىء عندي بقي له ليميت مش غصب عني ولكن بحط الحدود لاحتمالي وصبري بمزاجي وبس
وكمان من حقك تبطلي إستهبال لأني متنيل تعبان ومينفعش الغباء اللى بتعمليه دا
وهييجي لحظة قلت لك


وقلت لك ساعتها هيحصل فيها إيه

وإنتي الوحيدة اللى تعرفي

وأقسم بالله اللحظة دى لما تيجي هيتغير مليون حاجة

وربنا يستر بقي

صحيح : لو مفهمتيش حاجة إستحملي مش هتبقى أول مرة أقولك فيها ( هفهمك لاحقاً )

ومازلت مؤمن إني أقدر أخلي أي حد ينساني

بس اللى بيطلبوا بس

فهماني طبعا لانك نسيتي كتير

:)

صحيح برده : معاكي كارت أخضر لأنك أقل شخص فى الوجود قعد جنبي ومن أكتر الناس اللى عرفتني وشافتني حلو برغم انى مش مؤمن بدا عشان محبش نفسي وابقى واطي مع خلق الله ...

الصورة بتاع صوابع الواد دي هدية :D
وهوا كدا :)))
****

مش هعد في كام جرح فى جسمي أو بقالي كام ساعة مكلتش أو بقالي كام ساعة شغال أو حتي بقالي قد إيه بفكر

طبعا : فى ناس متخلفة عقليا بتروح تسمع نفس الكلام اللى كنت بقوله برا وتنبهر بيه

مع ان الناس دى لو فكرت ببساطة هتلاقي اني ياما قلت الكلام دا

اللى يحرقكم حرقتوا دمي

ودلوقتي هقوم اغسل ايديا بشوية بيتادين واشوف شوية قطن أبلعهم بشوية شوربة :D


الى كل من يقرا البوست دا ويفتكر إن فى سطر مكتوب عليه

وحيااااااااااااة أمك يا شيخ وحياة الغالية متفكرش كتير

وسيب البوست وطيرررررررر عشان لو فكرت ممكن تتعب وتموت بقهرتك

اللى هيفهم اى سطر فى البوست دا يبقى اكيد مذكور فيه سواء بالشتيمة أو بالفضل والكلام الكويس



وختاما ....

هع

قلت النصيحة ميت مرة وربنا ما هقولها تاني

وش مطلع لسانه

ألفاظ سخيفة ومعاني لا تحمل الحقيقة

بُـــكا
شوق
حنين
وحشتيني
وجع
ألم
نار
صداع
غيرة
تعب
يأس
خنقة
ضيق تنفس
إرهاق
هتعدي
هنعيش

كل الكلام دا سخيف
وكل المعاني دي متحملش الحقيقة
لسبب بسيط جدا
إن الحقيقة أبشع من كدا ملايين المرات
إن اللي ورا المعني دا مش مجرد إحساس التعب والخنقة والشوق و و و
إن أنا بقول إن كل شىء فى العالم له قاع
عشان كدا مهما غرقت مسيرك هتوصل للقاع
فما بالك بقي
لما يبقي حاجة زى دى ملهاش قاع
وفى برد الشتا ووحدة كل ليلة
والثقوب الكتير اللى بتكتر جواك
والحروق اللى معلمة فيك
والوجع اللي مبينتهيش
والذكري اللي مش بتموت
والناس
عايز تفهمني إن أى كلمة من دول بتعبر بشكل كامل عن اللي جوايا أو اللي حاسه أو عايشه
دا إبتذال لما أستخدم كلمة من دول فى وصف أي حاجة
لأن اللي جوايا حالياً عندي يقين إن الوجود ميساعوش
ولا حتي العدم لو أصبح وجود ذات يوم
فاهمني ؟؟؟


****

النهارده كنت فى سى بي سى فى أكتوبر( منطقة صناعية )
وآخر اليوم كنت فى الشيخ زايد وهناك دخلت جرينز وقابلت شخصية مهمة جدا ويعتبر أحد أهم العملاء عندي لدرجة إني خارج بنفسي فى تسليم الشغل ودى حاجة مبتحصلش وبالذات لو أكتر من واحد طالعين عشان يركبوا الشغل للعميل اللى يعتبر أصلا كل اللي طالبه أشياء بسيطة بس الأهمية إنها فى القصر الخاص بيه
جالي أفكار كتير أوي تخص المستقبل اللى بحلم بيه وتخص اللى فات وتخص إحساسي كان عامل إزاي قدام مليون تفصيلة
مش هعرف أحكي لأن مينفعش
ولكن
(( هي فعلا بتعرف ترقص ... مش دا موضوعنا ... ركز فى العميل ))
وقفت مع العمال فى عملية التركيب كمشرف وساعدت بإيديا وهنا إكتشفت إن العميل دا هوا صاحب منتج كلنا بنشوفه كل يوم وفى كل مكان ومفيش حد إلا وبيستعمله , صاحب شركة من أشهر الشركات فى مصر وهنا وقفنا إتكلمنا لما لقاني ممكن أشتغل بإيدي عادي جدا أو أتحرك أو أشيل مش واقف أتأمر علي خلق الله
العميل : إنته صنايعي ؟
أنا : لاء حضرتك أنا مدير الحسابات والمسؤل عن التسليم النهائي ومشرف حاليا
العميل : سنك مش كبير وفي نفس الوقت ميبانش عليك
أنا : من ناحية صنايعي فأنا إشتغلت تقريبا فى كل حاجة
العميل : كل حاجة مرة واحدة ؟
أنا : حضرتك أنا إشتغلت فى الزجاج وفى الألوميتال ووقفت صبي مع نجار مسلح ومع نقاش ومع حداد ونزلت بعت خضار وشيلت طوب وحملت رمل ونضفت شقق وإشتغلت فى سوبر ماركت ومصنع ألبان وشيلت ألواح زجاج ولدرجة إني روحت إشتغلت غفير وبيتت فى الشارع وكمان وإشتغلت فى الجامعة وحطيت مراجعات نهائية للطلبة وإشتغلت مهندس كمبيوتر فى السيرفرات اللينوكس من بيتي وإشتغلت فى النتورك سيسكو و فتحت شركة إنشاء مواقع أربع سنين وإشتغلت فى الديزاين والبرمجة والدعم الفني المباشر للسيرفرات الويندوز و دربت ناس شغالين حاليا فى فودافون وفى شركات آي تي مشهورة جدا , وبكتب قصص قصيرة وخواطر ومدون حتي الآن و حاليا مدير حسابات و مشرف عمال و مسؤل عن التسليم دا غير الفنيات اللي إشتغلت فيها بنفسي فى الحاجات دي كلها وطبعا أنا مش فاكر حاجات كتير وشغل كتير نزلت فيه والله لأن للأسف أنا في آخر اليوم و عقلي مرهق من كتر الأشياء اللي لازم أخلصها قبل ما أروح وعلي فكرة أنا أصلا بني آدم
العميل : بسم الله ما شاء الله , إنته متجوز يا أستاذ كريم ؟
أنا : لا والله يا أفندم
العميل : طيب ولا حتي خطوبة ؟
أنا : دي مجرد منظر الدبلة دي عشان ذكري من الوالد الله يرحمه
العميل : مش ناوي عن قريب تخطب حتي ؟
أنا : فى النية والله وفعلا فى موضوع ماشي فيه , دعواتك معانا يا أفندم
العميل : ربنا يعينك يارب , طيب ما تيجي تشتغل معايه وتكون نفسك .
أنا : حاليا والله مش هقدر للأسف , وللصراحة فأنا رفضت أكثر من شغل من عروض فى شركات أفضل لأني حاليا مرتاح نفسيا فى المكان اللي أنا فيه وكمان انا كل يوم بتعلم شىء جديد لأني علي يقين إن اللحظة اللي هقف فيها وأبطل أعمل دا هبقى ميت
العميل : المحاسبين عندي والموظفين مقرفين , تحسهم تايهين والله يا أستاذ كريم
أنا : ربنا يعينك يا أفندم
العميل : تعرف أنا أصلا إيه يا كريم ؟
أنا : إيه يا أفندم ؟
العميل : أنا أصلا حداد و متعلم برده ومعايه بكالوريوس
أنا : يعني رفيق درب و زميل صنعة
العميل : بالظبط
أنا : تقدر تنصحني عشان أبقي زيك فى يوم ؟
العميل : مش محتاج نصيحة يا كريم بعد اللي قلتهولي , بس هقولك ( **** **********************************)
أنا : إن شاء الله  ربنا يقدرني وأستفيد من كلام حضرتك
العميل : إتشرفت بيك ياأستاذ كريم
أنا : الشرف ليا يا أفندم
حصلي كتير وفكرت كتير النهارده لدرجة تعبتني
مفيش وقت أتكلم لأني داخل البيت أربعة ونص الصبح
كفاية كلام لحد دلوقتى
وصحيح
شفرت نصيحة العميل
لأنها شىء يخصني وحدي

خلص الكلام
ومش هقول كلام سخيف ولا معاني لا تحمل الحقيقة مرة أخري ..
بيس