فين

 شايف البريبيء الل هناك دا ؟

—

تفتكر ؟

——

هتصرف 

—-

وفينك ؟

——

بطلوع الروح مقبول 

——-

اغاني روبي 

——

افلام عبيطة

——-

احنا داخلين علي مرحلة تعتبر اقوي او اصعب او احسن مرحلة وحلم

نقعد نفكر سوا براحة كدا 

——-

انا لما بقعدرافكر في كم المواقف والايام والحياة والاحداث والتفاصيل والذكريات ، هوا انا ازاي بفتكر بشكل قوي للدرجة دي ، العيب والمشكلة فين ؟ دا عيب مصنع يمكن ؟ معرفش ، انا محتاج بس مساحة خفيفة كدا ، في حاجة بالنسبة لي حرفيا كابوس خايف منه فشخ 

بس هتمشي ونتحرك والخوف مش مشكلة بنواجهه وبنحارب بسهولة ، اللي الناس بتحلم بيه بنقدر نجيبه في لحظة بشوية تركيز ، الحرمان فعلا من الاخبار كان رحمة ، الحرمان من الصور والاحداث والكلام ، تخيل للحظة تركيزي كان هيبقي ازاي ، دلوقتي بنريح شوية في الاجازة وبناخد نفسنا ونطمن ، بالرغم من ان غياب كل التفاصيل والاحداث والصور والكلام موجع بس رحمة لان واحد زي حالاتي الوهم بيعمل منه بوفتيك

من فترة عرفت وفهمت ان في حاجات مهمة لاي حد وفي نفس الوقت مصيبة زي الحلم والحب والايمان و الوهم والخوف 

الحاجات دي قادرة تحدفك بعيد وقادره توصلك للسما 

انا مش ممكن اقدر علي تسجيل حالات الوهم اللي عشتها بناء علي صورة او جملة او تلميح او حتي اي خبر ، محدش يعرف والله الوهم كان بيوديني فين ، الخوف برده كذلك قاسي اوي وقاتل وخصوصا علي حاجات ماتت وانتهت ، والحلم والايمان والحب معروف اثرهم مش محتاجين شرح ،يمكن رحمة بيا هتكون ان يحصلي حاجة تمسح الحاجات دي كلها من الذاكرة ونبتدي علي نضيف ، اي حاجة تحصل، مش خايف ومش بخاف علي نفسي ، تقريبا محتاج انسي تفاصيل كتير واحداث كتير ، رحمة ربنا سابقة ، خلي اليوم يعدي ، شهر تمانيه كدا ، 

علي الهادي يا كيمو 

كاس

 كاس كان ملاك 

لكنه عمره ما عمل المطلوب منه ، عمره ما نفذ اي امر للاخر ، عمره ما عرف يفهم طبايع البشر وكان هوا اكتر شخص فهمها ، تناقض غريب وعجيب ومش محلول ، لانه دايما في طور التعلم 

عامل زي دين بس نسخة اكثر حماقة ، انسان 

يمكن كاس اتصاب بعدوي الانسانية انك تغلط وتغلط وتغلط وتجرب بدل المرة مليون 

الحل دايما في انه يحاول وميقدرش يسكت ولا يبطل يحاول يحل المشاكل والصعوبات 

بيجرب بلا انقطاع 

اتعلمنا معاه ان كل تجربة بمصيبة ، كل مرة بيحاول يصلح حاجة بيعكها اكتر ، تخيلت للحظة لو لو لو 

لو كان سمع الكلام ، كان حصل مصايب 

لو كان نفذ اي امر للاخر كان هيبقي في كوارث اعظم 

تحركه ذات نفسه لمنع المصايب عمل مصايب لكنها اخف بكتير 

يعني انت رايح تحل مشكلة يا كاس يابني  تلبس في مشكلة تانية 

بس المشكلة التانية النتيجة متجيش اي حاجة في الاولانية

كاس كان عبيط ، طفل صغير في جسم كبير علي راي دين 

ركزنا هنلاقي حتي دين كان بيتصرف كدا بنفس الشكل ، كل ما ييجي ينضف فوضي يلبس فيها ومش كدا وبس 

كل مرة كان بياخد القرار الصح 

والقرار الصح كان نابع من فطرته وقلبه ، الموضوع بسيط من رايي والاتنين سوبر هيروز جامدين جدا 

الاتنين الانسانية فيهم زيادة والقرارات كلها نابعةمن صدق ومحبة

الحياة في عيونهم حلوة

الخلاصة :  كل مرة ييجي في ايدك تاخد قرار اختار القرار الصح اللي قلبك يقولك عليه حتي لو ضد مصلحتك

في الاخر محدش هيقف قدام ربنا غيرك 

محدش ساعتها هيبرر لك ولا هيدافع عنك وانت ذات نفسك متقدرش تكدب في الغلط قدامه ولا حتي تدافع

بس من رحمة ربنا انه ربنا وشاهد

فالقرار اللي ينبع من قلبك وعقلك يصدقه حتي لو ضد الفطرة امشي وراه ، الدنيا سهله يا حبيبي 

———

اليوم خلص كان تقيل وصعب بس خلص ، المفروض ان دا الوقت اللي بنزدهر فيه وبنحقق ذاتنا 

مستني اروق كفاية عشان اقدر بكل سهولة اكمل تعايش واكمل مسيرتي بكل سهولة ان شاء الله

مبسوط اني كتبت لبابا جواب وذكرت حاجات كلها حلوة وايجابيت وقدرت اقوله اني خدت كل اللي نفسي فيه من الدنيا وحققت كل احلامي ودا فعليا حقيقة ، مهما كانت النتايج صعبة ووقعت في مشاكل مينفعش احكي له عنها ولا عن اي خذلان او تعب مش مكانها في الجواب دا والاهم من دا اني حققت احلامي 

——

حلمت حلم امبارح بس مش هحكيه، كان لطيف برغم اي حاجة

——

امبارح دخلت مناقشة طويلة واتكلمت في حقايق واعتذرت ، مكنتش متخيل كذا حاجة 

- مكنتش متخيل اني هعرف اعتذر للدرجة دي في حاجات غلط في حق حد للدرجة دي بالرغم اني بقول دايما دا واني بعتذر بس الشخصية دي  بالذات كنت غلطان في حقها وغلطانة في حقي فمش من السهل الاعتذار 

- مكنتش متخيل اني هعرف ادير دفة النقاش كدا وانجح في التفاهم والاقناع للدرجة دي ، مبسوط جدا بدا 

- لما بتقابل او تكلم او تتواصل مع حد كان قريب منك بتحس ان الموضوع كانك بالظبط بتحس بحاجات حلوة بتحس انك بتبني جسور وبتحل مشاكل وبتشيل من علي قلبك الطوب والذنب اللي كسر ضهرك ، بتحس انك قدرت تاخد الخلاص ، شيء عظيم وكان هدية من ربنا 

- مكنتش متخيل ان التسامح والرحمة هتبقي حلوة للدرجة دي ولا ان التفاهم جميل للدرجة مع شخصية بينك وبينها مشاكل ، الموضوع جميل يخليك تقوم تألف كتاب عن المحبة والتسامح والصدق 

- مكنتش متخيل كل دا وبالذات موضوع سرد الحقايق والاجابة علي الاسئلة بكل صدق ، موضوع انك تحل عقدة حد بانك تقوله الحقيقة ، في ناس تستاهل الحقيقة لان الحقيقة جميلة حتي برغم قسوتها بتشفي وبتحل مسائل ياما ومعضلات جوا النفس وشكوك احسن مليون مرة من اوهام بنمشي وراها 

انا فخور جدا بنفسي ومستغرب ان المكالمة دي جت في اليوم دا بالذات وتحديدا في آخره ، العظمة بتاع ربنا بتكون احيانا في النجدة والتوقيت، 

ودلوقتي حلينا مشاكل وعقد كبيره جوا الناس ونشرنا الرحمة ، ويمكن انك تنشر الرحمة بتخلي لطف ربنا يحل ، انا شايف انه حل عليا خلاص والحمد لله

————-

الحكايات مبتخلصش والحكي والنقاش حلو احيانا بيحررك من عقد وتعب والام كتير بيخليك تمشي خفيف خفيف 

تعرف تجري وتبتدي علي نضافة ، بيخليك تعرف تعيش مستريح مطمن آمن مفيش مخاوف مفيش اوجاع ، علي قد ما بيوجع علي قد ما بيطهر الجروح زي النار ما بتطهر الجرح وتكويه وبعدها علي طول الجرح بيخف ويختفي الالم ، بتعيط احيانا بعدها وبعدين تضحك وتفتكر وتعيش بكل حب وصدق وتقدر تاخد الحياة بالحضن ، الجرح بيتحول لعلامة تفكرك وتبتسم وتعيش وتقدر تبني من جديد بفرحة حقيقية 

الحياةحلوة احلي من اننا نضيعها في وجع وخصام وتعب وقلق وانتظار ، انا عارف اني اول واحد بينسي دا وبيتالم ويتعب لكن لكن لكن كل مرة بحاول زي كاس و زي دين بحاول اعمل الصح واختار اختيار حقيقي واحس بالفرحة والحياة والعيشة وافتح قلبي للعالم 

عارف اني بختار اختيارات تاذيني ، بس لو معملتش دا في حياتي هعيش حياة حد تاني بناء علي اراء ونصايح وكلام فاضي من الناس حتي لو رايهم صح بس مش هتكون حياتي هبقي عايش بقاموس فلان وخبرة فلان وانا مش جاي الدنيا عشان ابقي غيري ، خلي نصايحهم تنفعهم وخلي العالم في عيوني اجمل واحلي ، خليني عايش بدماغي عالاقل ساعتها اسمها حياتي 

حتي لو حياتي دي كانت متعبة وصعبه ونصايحهم ورايهم وكلامهم حقيقي ، بس هي تجربتي الشخصية ، هكون موجود للي بختاره في حياتي هكون قادر اكون معاهم هعيش معاهم حياه حلوة حتي لو فيها مشاكل ، في الاول والاخر هتبقي حياتي ودي متعتها ان زي كل حياة وكل تجربة فيها حلو ووحش، مش عايز مثالياتمش عايز نصايح مش عايز اي حاجة غير اني اعيش حياتي وبس واختار لان مفيش حاجة اعظم ولا احلي من كدا ، الاختيار 

كريم

ستة وعشرين

بابا حبيبي 

النهارده هيكون فات تسعتاشر سنة ، عشت من غيرك اكتر ما عشت معاك ، لسه فاكر اخر خروجة لينا سوا ووصاياك ، لسه فاكر احساسك يومها وكلامك ، لسه فاكر مشينا فين وقلنا ايه، لسه فاكر لمسة ايدك وانت بتطبطب عليا وكنت بتطبطب عليا ازاي ، وحشتني جدا بشكل ميتوصفش ، بس يا حبيبي الدنيا بتكمل وبنعيش ، فاكر الليلة دي وفاكر اخر حاجة قلتهالي وفاكر وانت بتدعيلي ، فاكر كل حاجة ياغالي فاكرك اوي 

الدنيا مشيت بيا ، كبرت ودخلت جامعة ، اشتغلت من قبل ما ادخل الجامعة وكنت بكتب محاضرات وقضيت تلات سنين في اعلام القاهرة ، اضتغلت في جوجل واضتغلت وعملت مواقع وعلمت نفسي من الصفر بقيت سيرفر ادمن ، اشتغلت سنين ، وطولت في الجامعة شوية بس حققت نجاحات خليتني اقف علي رجلي لحد النهارده ، خطة ربنا يابابا مكنتش عارف ايه فايده كل اللي مريت بيه لكن ربنا نجاني ووصلني لبر الامان ، بسبب سنين التوهة والشقا وقفت علي رجليا النهارده ، عديت علي محطات كتير ودخلت جيش وخلصت كل حاجة ونجحت وفلحت في امور كتير اوي 

بابا انا اتجوزت ، اتجوزت بنت حلوة اوي وعسولة وكل حاجة حلوة ، كان نفسي تبقي موجود وتشوفنا ، نجحت وبنيت بيت ، سافرت لاخر الدنيا وبنيت حياة ، عشت في ظروف ميتحملهاش حد ونجحت ، بنيت نفسي بارادة ربنا وربنا اختارلي الطريق ، اتجوزت وبيتي حلو اوي احلي مما يمكن اني اوصفلك ، ، عروستي متتوصفش بكلام والله يابابا حتة من الجنة ، احلي من كل احلام الطفولة والمراهقة والشباب وكان في حمل وربنا مأرادش ، انا عارف يا حبيبي ان كل شيء بميعاد ، مش عارف احكيلك حسيت بايه يومها ، فرحة كبيرة بالحمل وكاني مسكت نجوم السما ، وكان باين عليا اوي ، يوم واحد بس يابابا اللي حسيت فيه يعني ايه ابقي بابا ويعني ايه يبقي عندي طفل ، وبعدها حصل قهر مع الخسارة ، قهر شديد دقعني للاكتئاب ونوبات قلق شديدة وخوف ، حاجات مكنتش اعرف اني لما اكتمها في الوقت دا عشان صحة حبيبتي هتظهر عليا مع الوقت وتدمرني ، خسارة مرعبة قوية ، حسيت كاني بموت في الوقت دا بكل شكل ، حسيت ان روحي مش بس في الطفل لكن في مراتي ، حسيت ان مفيش حاجة في الدنيا تساوي لحظة حلوة وتفاهم ورحمة ومودة وحب ، بقيت بسامح لاني خفت اخسر تاني  بقيت بتنازل ومش متزن ، قريت قبل كدا ان مفيش خسارة اعظم من خسارة طفل ، عرفت دا بالخسارة الحقيقية ، عرفت يعني ايه اتالم والتعب مش في جسمي ، عرفت يعني ايه اريح حد وانا مقهور ومش قادر اقف ، عرفت كتير وبحكيلك دا عشان اقولك اني عرفت معني ازاي يكون الانسان اب 

بابا حبيبي 

كان الفرح حلو والعروسة سكر والحياة حلوة وبيتي جميل واحلي من اي مكان خلقه ربنا ، كبرت واشتغلت وسافرت لاخر الدنيا حرفيا ابعد من اي مكان وصله اي حد تعرفه وفي احسن مكان كمان ، نجحت في شغلي ومجالي ، حققت ذاتي ، وصلت لدرجات من النجاح محدش وصلها ، عملت المستحيل حرفيا في بلد زي دي ونجحت وبقيت نجم وسط سحاب ، بقيت في دنيا غير الدنيا 

هنا لبن العصفور موجود بس العصفور نفسه يجيلك

لو مكتبتلكش النهارده يا حبيبي هكتبلك امتي ؟

في حاجات بحكيها لمجرد اني اعرفك او اقولك وصلت لفين ، من كام يوم حلمت بيك واحنا بنحج سوا ، شفت الحرم وشفتك وطوفنا ولبينا ، كان نفسي تكون معايا في الحقيقة ونحج سوا ، كان نفسي اراضيك عن كدا والله ، بس يوما ما عن قريب ان شاء الله ، السنة الجاية كل شيء سهل ، ودلوقتي حاجات كتيره سهلة ، مش عارف اقولك ايه بس عشت حياة حلوة واستمريت في الحياة ، ويمكن عايز اقولك اني غلطت وبقيت بدخن ، بس يمكن عشان ريحة ايدي بتبقي شبه ريحة ايديك ، يمكن دي الحاجة اللي عمري ما قلتها لحد ويمكن دا اللي مخليني مكمل ، عشان محسش اني لوحدي من غيرك ، بطلت سجاير كتير ورجعت كتير بس اللي بحسه يمكن اهم من الصحة ، مش عايز اقولك حققت ايه وايه وايه بس يمكن اهم الحاجات اللي حكيتهالك دي تقول قد ايه كملت وعشت و لسه مكمل وبحارب الوجع والقهر والتعب عشان اعيش ، لسه لحد دلوقتي يا حبيبي سواء وجع فراقك او اي وجع تاني ، وهكمل واعيش حتي بعد كل دا 

كان نفسي تبقي موجود وتشوفني نازل الشغل الصبح ، كان نفسي تيجي تقعد معايا انا مراتي وتتغدي معانا ، كان نفسي تبقي جنبي ونقعد نشرب قهوة سوا ، كان نفسي اعملك قهرة زي زمان ، كان نفسي تبقي جنبي ومعايا ، وحشتني ، كان نفسي تشوف بيتي وازاي بنيته ، كان نفسي تشوف حياتي وازاي خطة ربنا نفعت ، كان نفسي حتي لما ننزل اجازة مصر نشوفك ، كان نفسي تحضن ولادي كنت عارف انك هتحبهم اكتر ، كان نفسي اوي يابابا تبقي حواليا ومعايا 

بفتكرك بالدعا وبكل الحاجات الحلوة ، زي النهارده كنت قاعد بفكر لو صحيت الصبح وبابا مات ، زي النهارده كان اخر ليلة ليا احس فيها حتي اني مطمن ، زي النهارده يا حبيبي كنت خايف عليك وهموت من الرعب وقلت لا هصحي الاقي بابا، هفتكرك بكل الحب والخير وادعيلك واكمل في الحياة ، زي ما الحياة كملت من بعدك كل العمر دا فهتكمل برده معايا مهما كان اللي حاسس بيه او خسرته او حصلي او ذكري وجعك او اي تعب او مصدر قلق وقلة راحة تاني ، الحياة هتكمل ، بس اكيد يابابا انا عمري ما هنساك ولا هبطل ادعيلك ومش هبطل احبك ، وهعيش ومش هبطل احلم وهنتقابل ونقعد نضحك سوا يوما ما علي كل الصعوبات دي ونبقي ساعتها صحاب اوي كمان ، هستني اليوم دا نقعد نشرب قهوه ونضحك اوي بصوت عالي وهدخن اليوم دا برده وزي اي اتنين صحاب هنقعد نحكي ، يوما ما هحكيلك بقية كل الحاجات دي ، مش دلوقتي ، عارف قلبك عليا وفي حاجات كتير غلط عملتها ، بس ادينا بنتعلم والدنيا بتكمل يا حبيبي  ، علي خير ان شاء الله هكمل يا حبيبي 

ابنك كريم

Good man

 معضلة كبيرة 

ازاي تبقي شخص صالح 

 متزعلش علي حاجة مش بتاعتك 

وازعل علي الحاجات اللي بتنتمي ليك بس 

اتمسك بالحاجات الحلوة فيك

كل مرة ييجي قدامك اختيار اختار دايما الصح حتي لو فيه اذيتك 

قاوم القسوة متبقاش قاسي خليك حنين دايما 

قاوم العالم بكل طاقتك متخليش العالم يغيرك

اعلي علي كل الظروف وانجح

ساعد الكل وخليك قلبك علي الخير والحب متبيعش وخليك شاري 

اعرف قيمتك

اعرف قوتك قبل ما تدوس علي حد 

اعترض بغلطك 

اتاسف وقت ما تغلط 

راضي قلوب الناس عشان ربنا يراضيك 

احتفظ بتركيزك للمهم والاهم دايما 

حافظ علي مشاعرك وقلبك 

اعترف بضعفك واعلي عليه

حب بكل طاقتك وعيش كل لحظة بكل صدق متسيبش الدنيا تخسرك حبايبك

احترم مشاعرك ومشاعر غيرك 

 احتوي حبايبك

قدرهم 

حاسب من الاحزان وحاسب لها 

اوعي تهرب 

خليك حقيقي متزورش ومتخبيش 

اوعي تخبي اوعي تكدب اوعي تخون 

الباقي كله مقدور عليه وسهل واسهل من كل نفس بتتنفسه

حب الحياة وحب اللي يحبها وحب اللي يقدرك ويشيلك في عيونه 

زي ما بتاخد ادي وادي زي ما بتاخد 

متزعلش علي حاجة مش بتاعتك انت ضيف وهتقابل ربنا في اي وقت فخليك حقاني وراعي ربنا 

ومتنساش 

ابعد وقت ما يكون المكان مش مكانك 

حب بصدق 

تخلي للنهاية 

اوعي تستسلم 

متريحش كتير 

اتعود علي الخساير لانك هتخسر اكتر 

افتكر الخير دايما والحلو وانسي الوحش عشان خلص 

احمل وطنك بداخلك وسافر ولف الدنيا وطنك جواك اطمن 

تصبح علي خير 

قديم اوي

 النهارده قابلت حاجة قديمة اوي 

جه في بالي مليون حاجة تخص الحاجة دي 

اكتشفت اننا نسخ بتتغير ونكبر ونتغير 

بس اللي مش قادر اتخطاه احنا ازاي نسينا النسخ الحلوة دي مننا ، النسخ الطيبة الحلوة الجميلة دي 

كانت حلوة اوي والله حلوة حلوة حلوة اوي اوي اوي اوي 

كله بيروح وييجي والعمر بيكمل والحياة بتمشي وبكره بييجي غصب عننا عادي 

ويناير زمانه جاي 

كان نفسي اكتب واشرح واوضح 

بس دي الزيتونة رضا اوي 

الواحد في حاجات شافها علط وفي حاجات مشافهاش وفي حاجات نسيها تماما وبيحتاج حاجة عبيطة تفكره 

بس زي ما الحلو عدي والوحش عدي والايام كلها هتعدي عادي