ستة وعشرين

بابا حبيبي 

النهارده هيكون فات تسعتاشر سنة ، عشت من غيرك اكتر ما عشت معاك ، لسه فاكر اخر خروجة لينا سوا ووصاياك ، لسه فاكر احساسك يومها وكلامك ، لسه فاكر مشينا فين وقلنا ايه، لسه فاكر لمسة ايدك وانت بتطبطب عليا وكنت بتطبطب عليا ازاي ، وحشتني جدا بشكل ميتوصفش ، بس يا حبيبي الدنيا بتكمل وبنعيش ، فاكر الليلة دي وفاكر اخر حاجة قلتهالي وفاكر وانت بتدعيلي ، فاكر كل حاجة ياغالي فاكرك اوي 

الدنيا مشيت بيا ، كبرت ودخلت جامعة ، اشتغلت من قبل ما ادخل الجامعة وكنت بكتب محاضرات وقضيت تلات سنين في اعلام القاهرة ، اضتغلت في جوجل واضتغلت وعملت مواقع وعلمت نفسي من الصفر بقيت سيرفر ادمن ، اشتغلت سنين ، وطولت في الجامعة شوية بس حققت نجاحات خليتني اقف علي رجلي لحد النهارده ، خطة ربنا يابابا مكنتش عارف ايه فايده كل اللي مريت بيه لكن ربنا نجاني ووصلني لبر الامان ، بسبب سنين التوهة والشقا وقفت علي رجليا النهارده ، عديت علي محطات كتير ودخلت جيش وخلصت كل حاجة ونجحت وفلحت في امور كتير اوي 

بابا انا اتجوزت ، اتجوزت بنت حلوة اوي وعسولة وكل حاجة حلوة ، كان نفسي تبقي موجود وتشوفنا ، نجحت وبنيت بيت ، سافرت لاخر الدنيا وبنيت حياة ، عشت في ظروف ميتحملهاش حد ونجحت ، بنيت نفسي بارادة ربنا وربنا اختارلي الطريق ، اتجوزت وبيتي حلو اوي احلي مما يمكن اني اوصفلك ، ، عروستي متتوصفش بكلام والله يابابا حتة من الجنة ، احلي من كل احلام الطفولة والمراهقة والشباب وكان في حمل وربنا مأرادش ، انا عارف يا حبيبي ان كل شيء بميعاد ، مش عارف احكيلك حسيت بايه يومها ، فرحة كبيرة بالحمل وكاني مسكت نجوم السما ، وكان باين عليا اوي ، يوم واحد بس يابابا اللي حسيت فيه يعني ايه ابقي بابا ويعني ايه يبقي عندي طفل ، وبعدها حصل قهر مع الخسارة ، قهر شديد دقعني للاكتئاب ونوبات قلق شديدة وخوف ، حاجات مكنتش اعرف اني لما اكتمها في الوقت دا عشان صحة حبيبتي هتظهر عليا مع الوقت وتدمرني ، خسارة مرعبة قوية ، حسيت كاني بموت في الوقت دا بكل شكل ، حسيت ان روحي مش بس في الطفل لكن في مراتي ، حسيت ان مفيش حاجة في الدنيا تساوي لحظة حلوة وتفاهم ورحمة ومودة وحب ، بقيت بسامح لاني خفت اخسر تاني  بقيت بتنازل ومش متزن ، قريت قبل كدا ان مفيش خسارة اعظم من خسارة طفل ، عرفت دا بالخسارة الحقيقية ، عرفت يعني ايه اتالم والتعب مش في جسمي ، عرفت يعني ايه اريح حد وانا مقهور ومش قادر اقف ، عرفت كتير وبحكيلك دا عشان اقولك اني عرفت معني ازاي يكون الانسان اب 

بابا حبيبي 

كان الفرح حلو والعروسة سكر والحياة حلوة وبيتي جميل واحلي من اي مكان خلقه ربنا ، كبرت واشتغلت وسافرت لاخر الدنيا حرفيا ابعد من اي مكان وصله اي حد تعرفه وفي احسن مكان كمان ، نجحت في شغلي ومجالي ، حققت ذاتي ، وصلت لدرجات من النجاح محدش وصلها ، عملت المستحيل حرفيا في بلد زي دي ونجحت وبقيت نجم وسط سحاب ، بقيت في دنيا غير الدنيا 

هنا لبن العصفور موجود بس العصفور نفسه يجيلك

لو مكتبتلكش النهارده يا حبيبي هكتبلك امتي ؟

في حاجات بحكيها لمجرد اني اعرفك او اقولك وصلت لفين ، من كام يوم حلمت بيك واحنا بنحج سوا ، شفت الحرم وشفتك وطوفنا ولبينا ، كان نفسي تكون معايا في الحقيقة ونحج سوا ، كان نفسي اراضيك عن كدا والله ، بس يوما ما عن قريب ان شاء الله ، السنة الجاية كل شيء سهل ، ودلوقتي حاجات كتيره سهلة ، مش عارف اقولك ايه بس عشت حياة حلوة واستمريت في الحياة ، ويمكن عايز اقولك اني غلطت وبقيت بدخن ، بس يمكن عشان ريحة ايدي بتبقي شبه ريحة ايديك ، يمكن دي الحاجة اللي عمري ما قلتها لحد ويمكن دا اللي مخليني مكمل ، عشان محسش اني لوحدي من غيرك ، بطلت سجاير كتير ورجعت كتير بس اللي بحسه يمكن اهم من الصحة ، مش عايز اقولك حققت ايه وايه وايه بس يمكن اهم الحاجات اللي حكيتهالك دي تقول قد ايه كملت وعشت و لسه مكمل وبحارب الوجع والقهر والتعب عشان اعيش ، لسه لحد دلوقتي يا حبيبي سواء وجع فراقك او اي وجع تاني ، وهكمل واعيش حتي بعد كل دا 

كان نفسي تبقي موجود وتشوفني نازل الشغل الصبح ، كان نفسي تيجي تقعد معايا انا مراتي وتتغدي معانا ، كان نفسي تبقي جنبي ونقعد نشرب قهوة سوا ، كان نفسي اعملك قهرة زي زمان ، كان نفسي تبقي جنبي ومعايا ، وحشتني ، كان نفسي تشوف بيتي وازاي بنيته ، كان نفسي تشوف حياتي وازاي خطة ربنا نفعت ، كان نفسي حتي لما ننزل اجازة مصر نشوفك ، كان نفسي تحضن ولادي كنت عارف انك هتحبهم اكتر ، كان نفسي اوي يابابا تبقي حواليا ومعايا 

بفتكرك بالدعا وبكل الحاجات الحلوة ، زي النهارده كنت قاعد بفكر لو صحيت الصبح وبابا مات ، زي النهارده كان اخر ليلة ليا احس فيها حتي اني مطمن ، زي النهارده يا حبيبي كنت خايف عليك وهموت من الرعب وقلت لا هصحي الاقي بابا، هفتكرك بكل الحب والخير وادعيلك واكمل في الحياة ، زي ما الحياة كملت من بعدك كل العمر دا فهتكمل برده معايا مهما كان اللي حاسس بيه او خسرته او حصلي او ذكري وجعك او اي تعب او مصدر قلق وقلة راحة تاني ، الحياة هتكمل ، بس اكيد يابابا انا عمري ما هنساك ولا هبطل ادعيلك ومش هبطل احبك ، وهعيش ومش هبطل احلم وهنتقابل ونقعد نضحك سوا يوما ما علي كل الصعوبات دي ونبقي ساعتها صحاب اوي كمان ، هستني اليوم دا نقعد نشرب قهوه ونضحك اوي بصوت عالي وهدخن اليوم دا برده وزي اي اتنين صحاب هنقعد نحكي ، يوما ما هحكيلك بقية كل الحاجات دي ، مش دلوقتي ، عارف قلبك عليا وفي حاجات كتير غلط عملتها ، بس ادينا بنتعلم والدنيا بتكمل يا حبيبي  ، علي خير ان شاء الله هكمل يا حبيبي 

ابنك كريم