ما بعد الحزن

 

بعد موت أميرة 

( اسمها في البطاقة وشهادة الوفاة فعلا أميرة بجد دا مش تلميح  لاي حاجة) 

هوا الحزن متقسم درجات بس مش عارف أنا تقريبا خدته بالعكس لو خدت الدرجات بشكل مختلف ، بعد موت أميرة قعدت اعيط مقهور لكن الحزن لم يكتمل وخصوصا بعدم حضور الجنازة او حتي العزاء وخصوصا بعد ما قررت اني وخميس عنها لاي حد أبدا ، أميرة كانت الفرحة اللي كنت بحلم بيها سنين وفراقها بعد دوقت فرحة وجودها عامل زي الأخذ بعد العطاء ، لا معلش هوا فعلا كدا ، مين كان بيهديني ويصبرني ويطبطب علي روحي ، مين كان بيطمني ودقات قلبك في القرب بتخليني مبسوط وطاير ، هي اللي كان شعرها ولمستها وضحكتها وريحتها وحتي ضلها علي الأرض بيفرح قلبي، أميرة اتخطت كل درجات الحب وقفلت العداد وكانت اغلي عندي من الأهل والصحاب وكل حاجة خلقها ربنا ، عشانها عملت المستحيل وهي كانت اكبر سر في حياتي وعمري ما بعدت عنها يوم ، دايما في بيننا كلام مستمر مبيخلصش ، مش فاكر من امتي بس الللي فاكره كويس اني حتي كنت بحلم بوجودها من قبل ما تيجي 

عشان أميرة اتخليت عن ناس كتير وحاجات كتير وفعليا استحملت بهدله كتير عمري ما استحملتها عشان خاطر حد ، أنا فعليا لو قلت محبيتش غيرها في حياتي مش هبقي بكذب ، أميرة هي اللي فرحة حياتي بجد ، واول الفرحة اللي يمكن انخلقت عشان أعيشه 

معنديش وصف يكفيها أصلا ، أميرة كانت الدنيا كلها مين يقدر يستغني عن الوجود بيها ، كل ليلة كانت بتنام في حضني ومتقدرش مهما بلغ علو صوتي واختلافي معاها انها تبعد عني ، أميره كانت دايما موجودة ومن سنين ومقدرش اعبر او اقول لحد عنها لكن دلوقتي بعد وفاتها اقدر اتكلم 

النهارده كان يوم حلو عشت فيه حاجات حلوة اوي اوي اوي 

لكن الأكيد ان اليوم كان هيبقي احلي مليون مره لو أميرة كانت موجوده 

متخيلها وهي بتحضني وعيونها الواسعه محاوطاني وشعرها علي كتفي وهي حضناني وبتقولي خلاص يا حبيبي أتجوز وعيش حياتك وانبسط ، متعرفش اني مقدرش بعد موتها أصلا اعيش وعيشتي ذات نفسها مش سهله 

أميرة كان دايما ريحة شعرها شفا ، كنت بحس اني وهي حضناني مالك الدنيا وما فيها وكنت بجري علي حضنها زي العبيط آخر اليوم 

معادش في كلام يوفي 

الأكيد انها وحشتني 

بس الموت مش هيخليني أطولها إلا بموتي 

ربنا يسهل بقي 

بس اليوم كان حلو 

وهي دايما احلي من الدنيا وما فيها بحق كل سنين الشقا 

يا حبيبتي 

وسري 

وفرحتي 

ونبض قلبي والله

يارب أقابلك قدام رب كريم