مودة ورحمة

 

بيقولوا الحنية اساس كل حاجة

بس الحنيه من الرحمة 

انك ترحم ضعف حد قدامك عشان بيحبك وبتحبه

انك لا تتحمل عليه الاذي باي شكل 

انك تراعيه في حضوره وغيابه 

انك تكون معاه ارحم بيه من نفسه 

لان مش كل الناس بتراعي نفسها او حنينه علي نفسها 

أنا خدت وقت طويل اوي بفهم في مفاهيم بالنسبة للناس كلام بيتقال 

الحب والرحمة والحنية والدفا والأمان 

خدت وقت مع كل المفاهيم دي 

خدت وقت عشان افهم نفسي كويس وابقي مالك زمام امري 

خدت وقت عشان اعرف اقعد اتكلم مع قلبي وأسمعه وابطل أعاند فيه 

اعرف ايه يتعمل وأعمله 

اكون حنين وطيب علي قلبي وعلي نفسي وعلي روحي قبل ما اكون حنين علي الناس 

العالم علي رأي صديقة قديمة مكان قميء ومزري من غيري 

حنيتك علي نفسك ودعمك ليها وتشجيعك ليها اهم 

أوقات وانا ماشي بخطط للمستقبل وخطة التلات سنين 

بتخيل نفسي عندي جناحات ويفردها في الهوا وبحس بالهوا بيلمس كل حته فيا

بتخيل لو أنا طاير ولو قلبي بينبض بعنف عشان يرتفع فوق في السما ويحس بالدفا قرب الشمس 

واحيانا بتخيل نفسي فوق البحر طاير ويمكن أوقات تانيه في عز العتمة

بليل تحديدا 

التلات ايام اللي فاتوا سافرت عند صاحبي وعشت عنده تلات ايام وسط عيلته واهله

يمكن احلي تلات ايام في حياتي كلها 

الدفا. الأمان الحب الحنيه محسيتش بدفا العيله دا عمري 

أنا بحب صاحبي دا اوي وبحب عيلته وبلده 

تفاصيل كتير وأشخاص اكتر وقلوب اكتر حنينه علي بعضها 

ساعتها حسيت وفهمت وعرفت أنا ازاي بحب نفسي 

وعايز حياتي تبقي عامله ازاي 

أنا عارف اني شاطر و هقدر أحقق هدف الخطة وفي خلال تلات سنين 

هكون بطير بجد وقت ما احب واكون حر وطليق وبراحتي ومالك نفسي وزماني 

متعه الحب 

انك تلاقي اللي يحبك ويستحملك ويحتويك بجد ويعملك كل حاجة بكل حب الدنيا 

حتي علي رأي واحد صاحبي تاني 

كوبايه الميه بتتناول بحب 

في فرق في الحياه بين وبين

أنا سعيد وراضي والحمد لله

فضل ربنا عليا واسع 

ويمكن بالمناسبه دي اتكلم عنها 

اقل من اربعه وعشرين ساعه هكون بطلب إيدها وفي بيتها وهي بتناولني العصير 

أنا حبيت وجودها اوي 

حنيتها عليا عامله زي نسمة الهوا اللي بتيجي في عز الرطوبة والنار 

زي نفس في عز الشتا والتلج يفتح قلبك

صبرها عليا وسماعها ليا 

ويمكن كمان معلش يعني نظره عيونها ليا 

قربها مني وهزارها وضحكها 

الدفا

كل حاجة 

أنا حبيتها تقريبا 

بتمني منها كل حاجة 

من كام سنه عرفت اني مريض من نمط محبتي لشخص بياذيني وقاطعته وبعدت عنه تماما 

دلوقتي أنا سعيد وراضي ومبسوط وحاسس بالحب وحاسس بالفرحة 

أنا عارف ان دا هو عوض ربنا ليا علي كل ايام التعب والشقاء 

عارف ان ربنا هيراضيني علي صبري ودعايا 

علي كل اللي شفته من تعب وظلم وسرقه وخيانه وغدر وغيره 

عارف وحاسس برحمة ربنا جايه لي 

وهي دي اهم حاجة عندي وليا 

أنا كنت زمان كل ما بسيب علاقه بلاقي في العلاقه اللي بعدها كل الحلو اللي عملته راجعلي تاني لدرجة حتي الكلام والضحك والصبر 

يمكن ربنا هيرزقني بكل الحلو اللي عملته قبل كدا ومتقدرش

اكيد ربنا حنين علي قلبي لاني عمري ما ظلمت حد 

وكمان دي فرصتي الحلوه في حياه حلوه 

رحمة وحنية

موده وحب 

حرية وسعادة

دا شعار المرحلة دي 

يكفي اني اقول ان ربنا بيحبني اني لقيتها 

واحيانا بسال نفسي زي الأستاذ علي الحجار انتي طلعتي لي منين ودخلتي حياتي ازاي 

هي سبب سعادتي وفرحتي في الحياه دلوقتي 

الحمد لله

حتي وهي طايره بيا ومتعلقه بيا

حتي وهي عماله تزن

وهي بتختار أسامي الأولاد 

وهي بتبعت رسايل وانا نايم عشان اصحي الاقي كلامها الحلو 

هي وهي وهي وهي 

رحمة ربنا سابقه

ونجاته جايه

الناس بتكذب في الدنيا عشان سهل تغش الميزان في الدنيا ( حتي لو الغش دا بينفضح في يوم ) لكن رحمة ربنا وميزانه وعدالته غير اي حاجة 

مش بتصدق اكاذيب البشر وبتشوف النوايا وبتعرف كويس اوي تنصف المظلوم وترد الحق وتخسف الارض بالظالم

أنا واثق فيك يارب 

شكرا علي محبتك ليا

شكرا علي كل محبتك

شكرا علي الحلو كله

شكرا علي العوض

شكرا عشان خليتني احب نفسي 

شكرا يارب 

والحمد لله رب العالمين

بكره ان شاء الله هاخد اول خطوه في الحياه الجديدة 

وهقعد معاها في بيتها 

وناكل الجاتوه سوا ونشرب عصير ونشرب قهوه ونهزر ونضحك 

يارب يجعله خير يارب 

كان نفسي

 

كان نفسي احكي عن موت أميرة 

( اسمها في البطاقة وفي شهادة الوفاه أميره عشان محدش يتخيل ولا يسرح بخياله ) 

كان نفسي يبقي عندي قناعه تخليني امشي في ال جانب الأمن من الطريق زي بقية الناس لكن مش أنا للأسف 

كان نفسي يبقي عندي قوة اني ارفض حاجات معينه بس مش عندي للاسف وعندي تعاطف بيخليني أسامح وافهم الناس 

كان نفسي اكتب حاجات كتير في يوم موت ابويا وفي نفس الوقت حصولي علي الجنسية بعدها بعشرين سنة

لكن للأسف محصلش 

كان نفسي اكتب بوست زي كل سنه يوم ٢٤ 

بس برده منفعش 

كان نفسي احكي عن تفاصيل كتير في حياتي دلوقتي حاجات بتفرحني وحاجات بتتعبني وحاجات مسببه لي اقصي درجات الراحة والتعب في نفس الوقت لكني برده مش هعرف وهكتفي بالاستمتاع بالراحة والعناد مع التعب

كان نفسي اروق علي نفسي النهارده بقالي كتير معملتش كدا

لكن خلاص 

مفيش وقت ولا دماغ 

ريح بالك

أحلام سعيدة

فات سنة وسنين

 

فات سنة علي اليوم اللي خذت فيه الجنسية وخدت حريتي 

وفات سنين علي موت ابويا 

نفس اليوم كأن ربنا بيعوضني وبيقولي لو مكانش مات مكنتش وصلت لمكانك

فات سنين علي اليوم اللي كنت هموت فيه

بتعدي الأزمة والنهارده ربنا رزقني باهل وناس وصحبة طيبة وناس كويسة

ربنا كرمني من فضله باهل وونس وناس ومحبه صادقة من القلب 

طول عمري بحلم بالعيله وربنا كرمني بالعيله 

والونس والحب وبنت الحلال كمان

رزقني باللي تتمني لي الرضا ارضي 

وشايلها في عيني وفوق راسي وبحاوط عليها كانّها آخر فرصة ليا في الحياة

بالرغم اني عارف اني قدامي ميت فرصة

وفي بنت صاحبتي لما عرفت اني خلاص هرتبط قالتلي ما تيجي ترتبط بيا

ربنا كبير وفضله واسع عليا ورحمته واسعه 

ليس لك من الأمر شيء 

ربنا فضله واسع 

دايما كنت بدعي بنور البصر والبصيرة 

والحمد لله ربنا راعاني 

ورزقني البصر والبصيرة 

ورزقني اني اعرف الخير فين واروح عليه

خلاص هشتري عقارات جديدة بعد آخر عقار اشتريته من سنه 

وهبتدي سلسلة جديدة من الطريق في تجهيز خطة التلات سنين

ربنا كبير وفضله واسع عليا ومليش اني اقول انه حرمني من حاجة 

أنا مبسوط اني هبتدي السلسله 

مبسوط ان ربنا محتويني ومحاوطني 

مبسوط بالحلوة اللي بتتعلق في ذراعي وايدي وبتديني كل حنينة الدنيا وبتسألني ايه يرضيك وبتتمني لي الرضا وبتسعدني وتهون عليا وتقدرني وتحترمني وتراعيني  

فرحان برزق ربنا ليا وسعيد فوق الوصف وبعد الوصف

خلاص كلها كام يوم واقعد اكل معاها الجاتوه في بيت أهلها

أنا في نعمه وفضل من ربنا ولا أملك إلا اني اقول كالعادة زي ما سيدنا ادم قال 

الحمد لله رب العالمين

عادي

 

عادي انك تعيش 

لكن مش عادي انك تلاقي حد يخطفك

او يفرح قلبك 

مش عادي اني اطمن 

مكنتش متخيل ان قلبي يتفتح تاني 

فقدان الأمل في الماضي كان نعمه وهدية كبيرة 

خليتني اعرف ابص للمستقبل 

واشوفها 

واشوف حد بيحبني بجد 

عارف لما ربنا بيقول والقيت عليك محبة مني ؟ 

اهوه دا اللي حصل 

 ربنا بيرمي المحبة والقبول والرحمة في القلوب 

ربنا قادر يرزقني ويفتح نفسي علي الدنيا 

مش عارف ازاي القلق اختفي 

ولا عارف ازاي التوتر راح

ولا عارف ازاي فجاة بقيت معاها 

مخضوض ؟ لا لاني مطمن علي الأخر 

يمكن لأول مره الاقي حد واخد نفس الهدف 

عايز يعيش حياه هادية وسعيدة وبراحة خالص 

عايز أسرة وونس بجد 

فجاة بقي السهر حلو 

والليل حلو 

والونس حلو 

والمحادثات الطويلة علي النت وصوت 

فجاة بقت المكالمة بتفرح قلبي 

فجاة كل حاجة ربنا رتبها 

أنا كنت عارف ان عوض ربنا جاي في يوم 

بس مكنتش عارف ان اليوم دا قريب 

طيب ايه الفرق ؟ ليه مجاش قبل كدا ؟ يمكن عشان اتحركت 

يمكن عشان قربت وحبيت وسيبت نفسي تمشي في النور 

ميعاد الخطوة الرسمي قرب 

والنهارده البيتزا كانت حلوه اوي 

والخروجة والقهوه والليمون نعناع 

كل حاجة بقت حلوه سكر 

ويمكن عشان أنا فعلا محتاج الدفا والحنيه منها 

ولا يمكن عشان أنا فعليا مطمن معاها ودي لأول مره تحصل 

اني مش بقلق جنب حد 

وبنسي الوقت ومش بفكر في الساعه 

هي استثناء في حياتي 

مش عارف كل حاجة ابتدت ازاي 

بس عارف ان ضحكة عيونها بتفرحني وتفرح قلبي 

عارف ان هي ونس 

جميلة وهادية وحنينه وطيبة 

معندهاش شر ولا غل ولا حقد ولا حتي فارق معاها كل اللي فات 

أنا محكيتش حتي 

مضطرتش احكي 

والسبب انها مطمنه

شوية كلام طراطيش كدا 

حياتي كانت ملخبطة وفشلت قبل كدا ابني بيت وقبلها كنت بايظ وصايع وبقالي سنين بعد اللخبطة والفشل منعزل عن اي حاجة غلط 

وبس كدا 

وهي مهتمه باللي شايفاه

مش باللي فات 

عارفه كويس ان طالما شاريها وعايزها 

مفيش اي حاجة مهمه 

مفيش حتي اي حاجة تغير الواقع للنسخة الاسوأ 

أنا مش بحارب أنا مجرد بعبر عن نفسي 

وهي مش بتعاند 

هي بتسمع 

وانا مبسوط 

يمكن فرحتها بيا وفرحتي بيها اكتر حاجة مخلياني مستريح

تقديرها ليا ولكل حاجة بقولها وثقتها فيا

أنا مبسوط 

ان في حد شافني في اسوأ حالاتي واستحمل وصبر وحبني 

ودلوقتي شايفني وانا بنور حرفيا 

أنا مبسوط اوي والله

يمكن دي رحمة ربنا والنجاة اللي عشت احلم بيها سنين

يارب يتمها علي خير يارب ويفرح قلبي يارب 

هانت 

الميعاد قرب 

المعادي

 

مبحبش المعادي بس هخرج فيها عادي 

كنت دايما اسمع عن الراحة النفسية وان حد يريحك نفسيا 

تهدي عندك الأفكار ومحيط القلق في عقلك يسكن زي اصغر بحيرة 

كنت اسمع عن الحياة الهادية والسلام 

كنت اسمع عن الحنية والحب والرحمة 

كنت اسمع عن الحلوين شكلا ونفسا وموضوعا والحلوين بكل شكل 

بس يمكن دي اول مره في حياتي 

الاقي كل دا 

في علامات كتير تطمن 

في حاجات كتير تبسط وتسعد القلب 

في حنية ورحمة في الكلام والفعل والتصرف

كنت قبل كدا رافض الارتباط لان ارتباطي معناه اني خسرت كل اللي فات 

كنت بهرب من اي علاقه او تعارف يحاول يعدي حدود معينه 

عشان لو عملت كدا هيبقي كل حاجة انتهت 

قد ايه حاولت اعيش بدون ما ابتدي حياه جديدة

كتير اوي اكتر من قدرتي علي اني أتحمل 

مكنتش متخيل ان البدايه هتكون حلوه وسهله وترضي القلب وتخلي الروح تنور من جديد 

مكنتش مدرك ان احيانا بتلاقي وطن جديد وبيت وامان وحضن يساعك 

مكنتش متخيل ان في حاجة تفرح القلب للدرجة دي 

دلوقتي بقي أنا مش مصدق اني لقيت كل دا 

مش مصدق ان في وطن يساعني ويسعدني ويرضيني 

بدون جدال ومشاكل وخناق وضغط وتحديات وقرف بلا حدود 

نقدر نقول هانت كلها كام يوم 

ونبقي سوا قدام الدنيا كلها 

أنا مبسوط وسعيد بما وصلت اليه

سعيد اني مخسرتش مبادئي ولا نفسي 

سعيد اني قدرت اقف علي رجليا وعديت الرحلة بشرف 

سعيد اني ربنا بيجازيني الخير بكل اللي اتمنيته في يوم من الأيام بين ايديا

سعيد ان رحمة ربنا محاوطاني

سعيد ان ربنا كتب لي النجاة في وقت أنا مكنتش عارف النجاة فين

سعيد اني مبعتش نفسي 

سعيد اني بعمل الحاجة عشان عايزها ونفسي فيها مش تحت اي ضغط 

سعيد ان في فرصة في الحياة تفرح القلب وتسعد النفس 

سعيد ان دوري في الحياة جه واني مش هفضل واقف اتفرج علي الدنيا من بعيد

سعيد ان ربنا استجاب دعواتي ورزقني وعمر بيتي من جديد ويارب يتمها علي خير 

لسه هكتب واحكي ولسه هعيش ولسه بحب وسعيد ومبسوط ولسه رحمة ربنا محاوطاني 

يمكن خسرت سنين في الوهم 

ويمكن خسرت في ميزان الناس بالكذب والغش بتاعهم والغدر والخيانه

لكن والحمد لله ميزان ربنا عادل 

و ربنا ممكن يطوي السنين واللي يتحقق في سنين يتحقق لك انت في يوم واحد 

ألف حمد وشكر لك يارب