يوم الاكل

 سافرت وقلبي ملهوف وخايف وعديت بلاد وحضرت كل حاجة عشان اللقاء وعشان نبقي سوا 

عملت كل حاجة بكل شكل عشان كل حاجة تبقي كويسة 

فاكر وقفتي في المطار وفاكر اول صورة خدناها سوا ومش عندي ولا لاقيها ، ذكريات السنين كلها معاكي انتي 

فاكر كل حاجة وشعري ولبسي وفاكر كنت طاير بيكي ازاي 

فاكر حتي كنتي تعبانه ازاي 

فاكر الاكل والشارع والطريق من المطار القديم للميدان 

فاكر المطعم وكلنا ايه واتصورنا ازاي واتصلنا بمين 

فاكر طلعنا روحنا فين وفاكر اول ليلة لينا سوا 

فاكر حتي نمت فين وفاكر صليت قد ايه وفاكر صليت فين وكام ركعة وليه 

فاكر حتي المكتب اللي دخلت فيه الحمام لما القولون كان بيستعين وصور ماكدونالدز منزل سندوتشات شاورما 

فاكر فرحتك وخوفك وانتي بتلفي 

فاكر تقي 

فاكر انك كنتي مكسوفة بس جيتي وخايفه بس عديتي 

فاكر كل حاجة كانها دلوقتي 

كانها بتحصل حالا 

فاكر بشكل مفزع حتي الاكل اللي خدناه بعد ما اتبقي من العشا وروحنا وشلناه عند عمر وباظ

كريم مبينساش وكل ذا بدون توثيق 

فقط الذكري لانها كانت ملحمية 

بالمناسبة السعيدة دي 

احب اقول شوية حقايق 

أنا مش متصالح مع الوحدة بتوجعني وتتعبني اوي وبتاكل فيا وبتحرق روحي 

أنا مش متصالح مع فكره ان ممكن مشوفكيش تاني وانك مش ليا وممكن تبقي في مكان تاني مع حد تاني في يوم من الايام بس لو قبلتي دا علي نفسك مليش حق اعترض 

أنا مش متصالح مع افكار وحاجات كتير اوي  

برغم كل التفاصيل اللي فاكرها حاسس اني ملحقتش اعيش معاكي ما بين شغلي وشغلك و تفاصيل كتير اوي اوي اوي من ضمنها الكورس والشغل والمناسبات وغيره حاسس اني مش مصدق اني عشت الحياه دي 

حاسس ان كل حاجة بعيد وعاملة زي حلم متبقاش متاكد انك عشته بس صاحي والدموع مالية عيونك والوجع بيحرق قلبك و حياتك متدمره ومش قادر تصدق انك عشته وان كل دا حصل ، دا اللي حاسه 

بالمناسبة السعيدة دي 

مبطلتش احبك او أتمناكي او احلم بيكي 

مبطلتيش توحشيني 

علي بالي ونفسي في كل حاجة تجمعنا 

ببني حاجات دلوقتي هتساعدنا قدام ان شاء الله لو كان لينا نصيب سوا 

أنا مفتقدك جدا 

اليوم دا كان محتاج خروجة وعزومة حلوة و نقعد نشوف فيلم ونشرب هوتشكليت سوا بليل وننام قدام التلفزيون 

مفتقدك وبحبك

كنت علي طول بقولك بحبك كتير بداعي وبدون داعي كرضيد للمستقبل وبقولك يمكن ييجي يوم معرفش او مقدرش اقولهالك 

اعتبري اليوم دا منهم وافتكري منهم واحدة

تصبحي علي خير واحلام سعيدة

كل ما افتكر ذكري حلوه هكتب عنها وانا فاكر كل حاجة بس هفتكر الفرح والحلو بس 

ودا كتير اوي 

بس والله ملحقناش نعيش ولا خذنا فرصة سوا 

واعتراف كمان : كان لازم أصاحبك واحبك وأقدرك وأعاملك احسن من كدا حتي لو كنت فاكرني بعاملك حلو كان لازم اعبر اكتر واحسسك اكتر 

تصبحي علي خير يا حبيبتي ويارب يجمعنا سوا في اقرب وقت

مفيش بيت شعر تقريبًا أقسى من بيت ابن الفارض لما قال:

«إن كانت منزلتي في الحب عندكم ما قد رأيت، فقد ضيّعتُ أيامي..»

رد سريع شويتين

 عزيزتي 

النهارده لتعملي بلوك بيتهيالي عارفه دا من عبد الله

مش عارف انهي طريق يتمشي فيه عشان اوصلك بس بيتهيالي معادش في طرق ، معادش فيه غير حقوق وفلوس وبس 

للأسف الشديد الفلوس ملهاش اي قيمة في عيني لكن مش دا موضوعنا 

مش عارف اقولك ايه بصراحة 

لسه بقول بسم الله وانا بفتح اشوفك واطل عليكي متخيلة ؟ 

النهارده بدات اشوف مسلسل موضوع عائلي من الاول تاني للمره التانية وافتكرتك كتير وعينيا دمعت بقالي كتير معيطتش 

مع كل مضادات الاكتئاب دي والأدوية اصبح من الصعب جدا اني اعيط علي حاجة لكن عينيا دمعت شوية 

افتكرت حاجات كتير 

أنا ايه اللي خلاني اكتب تاني النهارده وانا عارف وانتي عارفه ان مفيش فايدة حتي لو وصلتك رسايلي 

حتي لو قلت اني بحبك ووعدتك بايام حلوة ووعدتك بتصليح اي مشكلة او غلط ووعدتك بحياة حلوة كل دا مش هيفرق في حاجة مش عارف بكتب ليه 

كنت عايز اقولك بس وحشتيني ويارب يكون اللحظة  اللي بتقري فيها الرساله دي واحنا  مع بعض وبنضحك وبتفكريني بالايام دي 

وحشتيني بس مش عارف اقول ايه تاني 

سبحانه مقلب القلوب بين يديه 

تصبحي علي خير 

عالسريع

 عزيزتي 

بعد التحية والسلام 

النهارده وصلني كلام من المحامية غريب شوية وهي قالت كلام ملوش لزمة ، أنا مقدرش احكي لحد الظرف اللي حصلي لاني اقسم بالله أنا ذات نفسي مش مصدقه ، تخيلي ؟ بس عادي أنا بحاول اصدق كل يوم ، لا حرفيا مش عارف والله كنت بحكي مع حد ولقيت ان فعليا الكلام ميتصدقش فقلت طالما. انت كصاحب مش مصدقني امال هما لو عرفوا ؟  تخيلي بقي ؟ 

النهارده لقيت عبد الله عاملي بلوك علي الرقم الوحيد اللي باقي اني اكلمه عليه ، مش فاهم ولا عارف بس شكل فعليا الطريق اتسد ، عرفتي ليه بقولك اني فقدت الامل وفقدان الامل بيكون راحة احيانا وفي نفس الوقت والله مشاعري موجودة ، بس مش هسيب نفسي أتوه نفسي واضيع في خيالات جوا دماغي واوهام وحكايات توديني في ستين داهية ، يكفي انك عارفة اني بحبك واني بتمني وجودك 

النهارده خدت بالي من ان الواحد فعليا كان مقصر في حاجات وكان عندك حق في حاجات كتير ، يمكن في التعامل أنا كنت مضغوط كتير عشان المشاكل اللي كانت موجوده واحساسي اني لوحدي والله دا صعب عليا جدا كنت في عزلة وبخبي عليكي المشاكل ، المفاجاة بقي في ايه ؟  في اني بجد حاسس اني مبسوط اني لسه المشاعر جوايا والله بحبك فعليا وكنت مقصر في حاجات ، أنا كنت مشغول بس واحساسي كان بعافية شوية ، بس عمري ما خدتك حق مكتسب والله وعمري ما طنشت خالص وجودك بس كنت بعاني ونفسي في حد يقدرني ويعاملني بشكل كويس 

كفايه كلام لحد كدا أنا لازم اريح واستريح  وانتي وحشاني وعلي بالي ووحشني عيونك والله، حقا وصدقا 

مش عارف اقولك ايه تاني ولا ايه بس هكتب لك رساله حب حلوة بكره تليق بعيونك يا طمطم

صدقي اللي تصدقيه واعملي اللي تحبيه براحتك

هتوحشيني 

تصبحي علي خير 

متجمعناش لقعدة الجمعة

 عارفة النهارده كان يوم طويل 

الشاور والصلاه والفطار وبعدها زي الشاطر عملت فطار وقعدت فالبيت وبعدين خرجت لصاحبي روحتله قعدت معاه وكان وقت لطيف بس الدنيا كانت ساقعة وبعدين روحت عملت عشا 

وبعدين  بكل سلاسة 

عملت الغدا او العشا بقي 

وبعدين بقي لأهم حاجة

قاعد بشوف مسلسل اشغال شقة 🤣🤣🤣

المسلسل حلو اوي 

بيعجبني اوي علاقة حمدي و ياسمين 

مضحكين اوي والشغالات دمهم خفيف 

كان نفسي اشوفه معاكي 

مش عايز اقولك مواقف كتير بحس فيها ان كنا احنا وبشوف فيها كتير 

نفسي اكلمك اقولك كان عندك حق في ايه ومين

بس النهارده حصلت مصيبة جديدة واحتمال اخسر برده مبلغ قد اللي فات تقريبا تلات مرات 

بس بقول يارب يستر 

مش عارف اعمل ايه والله

بس هي غلطتي يعني 

المهم انك وحشتيني وكنتي علي بالي طول الوقت والله حتي وانا عند صاحبي ومعايا ناس كتير 

والنهارده قعدة الجمعه محصلتش 

وبالتالي متجمعناش 

بس عايز اقولك انك وحشتيني وانك لو معايا هيفرق كتير واني بحلم بوجودك 

وانك بالنسبة لي من زمان قيمة وقامة كبيرة اوي اوي اوي 

وأكبر مما تتخيلي 

بس عادي 

متشغليش بالك عشان عارف مش هيفرق معاكي

المسلسل حلو اوي يا طمطم 

كان نفسي تكوني في بيتي قبل ما رمضان ييجي واجيبلك علب بلح عليها اسمك يا فطومة

بس معلش 

ربنا يجعل الأمر كله خير 

يناير حلو بس ناقصه وجودك وحشني اوي 

خير 

روقي روقي 

وحشني اشوفك اوي 

وحشني اسمع صوتك واطمن بيكي 

وحشني محيش اني غريب وانك قاسية عليا 

والله وحشني اوي 

سيبك كل دا مش هيشغل بالك ومتخليهوش يشغل بالك 

أنا مستني حاجات مهمة اوي الفتره دي 

نفسي تكوني موجودة عشان تحضريها ونفسي اقعد احكيلك إنجازاتي 

عارفة 

وحشتيني

انتي علي بالي والله

اقولك ايه تاني ؟ 

اممممممنمنننننممم 

اما انتي جميلة وسكرة وعلي قلبي حلوة ووحشني دفاكي ووجودك اوي 

يارب يطمن قلبي بيكي في اقرب وقت يارب 

بس والله مبقاش عندي امل  في كل حاجة من ناحيتك 

كل دي احلام 

فاكرة زمان لما كنت بقعد اقرالك كتب واقولك الاحلام هي الحقيقة الوحيدة ؟ حلوة وزي العسل الاحلام 

بس لازم اكون متقبل الواقع انك مش بتحبيني ولا بتقري حتي الكلام دا ولا حتي هييجي علي بالك تقولي يا كريم او تكتبي لي كلمة في يوم او تسالي عني في يوم ويمكن تكوني شفتي حياتك وكملتي من غيري ، عادي هفضل احبك دي الحاجة اللي محدش يقدر ياخذها مني .. احساسي ومشاعري وبس وعشان كدا متشاله جوايا زي روحي كدا بايد اللي خالقها ومشاعري برده

لو ليا نصيب فيكي هشوفك وهتبقي جنبي ونبني حياة 

ولو مليش نصيب مش هيبقي له فايدة الجري والتنطيط المهم تبقي كويسة وبخير ومبسوطة وسعيدة في كل الاحوال وانا عن نفسي مش عايز حاجة أنا بحلم وكله علي الله

خدي بالك من نفسك عشان وحشتيني اوي 

تصبحي علي خير يا طمطم 

الجمعة وتجهيزاتها

 نزلت صليت الجمعة ولسه عندي حاجات تتعمل ، لسه هفوت علي صاحبي ولسه هقعد ارتب مواضيع الكريبتو ولسه هرتب برده مواضيع مصر ولسه مستني اشوف شلة دوسلدورف جايين النهارده ولا لا عشان نسهر ولسه هشوف البيت ومفطرتش وورانا حاجات بالكوم 

لكن في وسط كل دا مغيبتيش عن بالي و في وسط كل دا وحشتيني وفي وسط كل دا مش لاقي حلول ولا عارف ربنا هيحلها ازاي 

بس افتكرت ان اللي رزقي فيه مش هيغيب وهييجي ولو ليا نصيب فيكي هييجي 

نسيت اقولك في بوست امبارح اني اشتريت علبه بلح مخصوص عشان عليها اسمك تخيلي ؟

اللي في رزقك مش هيهرب منك 

واللي مكتوب لك هتشوفه 

ولو ليا نصيب معاكي هتكوني هنا 

ولو مليش فانا كفايه عليا الحب اللي حاسه والسنين اللي عشناها 

وفوق كدا مش بتمني لك اي شر 

يمكن مواجهتي ليكي بمليون خطاب ولاهلك وكتاباتي والجري وراكي هيخليني في يوم من الايام اتحرر ومش خايف ومش بكتم اي حاجة خالص وبقولك كل حاجة بصراحة وبحاول 

لكن الكتمان والهروب عمره ما كان حل او مفتاح عشان بيفرقع في يوم ويجدد الجرح والإنسان بيصحي يلاقي نفسه مجروح وفجاة كل حاجة صعبه فعشان كذا المواجهة بالنسبة لي والجري مهما كان متعب بس متاكد انه هوا الحل مسيري في يوم هبقي احسن واخف وأصلح وكل يوم بصلح في نفسي عشان اعيش كويس وابني بيت وأراعي ربنا لكن مهربتش ولا استخسرت اي حاجة

أنا هقوم اعمل فطار بقي 

دا الحل الوحيد المواجهة 

لكن الهروب مش الحل 

يارب يكتب لنا اللي يرضيه ويراضينا بيه

وزي ما قلتلك بقيت متسامح من فكره الوحدة وان ممكن متكونيش بتحبيني وان ممكن يكون خلاص فعليا وحقيقة كل حاجة انته ويكون في حد تأني تسامحت وتصالحت خلاص ومبقاش كل دا بيوجع والحمد لله راضي بقضاء ربنا 

ربنا يصلح الحال 

يارب خير 

يومك حلو ويناير سعيد وكل عيد جواز وانتي بخير يارب