اتفاق لاغي وخطاب جديد

 كتبتلك خطاب جديد يارب يوصل  عن سورة العصر علي الفيس

ان الحب ميبنفعش يغيب فيه الحق ولو الحق مش موجود بقي الحب مليان ظلم للمحبوب  وافتراء و طرف بيعطي وبيتظلم 

ايه اللي حصل ؟ عشان الاتفاق يتلغي 

هيفرق ؟ حد هيصدق ؟ حد هيسمع اساسا ؟ ، حد هيستوعب ؟ 

كدا كدا هفضل في نفس الصورة الوحش الكذاب المخادع اللي اللي اللي الي آخر التهم اللي مش بتنتهي

هيفرق كلامي وحكي اللي حصل ايه ؟ 

هتقري اساسا ؟ طيب هتقدري الموقف ؟ 

كنتي قريتي اللي فات أنا كتبت لحد ما ايدي وجعتني وشرحت لحد ما بقيت بكرر كلامي 

هتقدري الموقف ؟ كنتي قدرتي اي لحظة حلوة ؟ كنتي قدرتي العيش والملح وسمعتي او حتي اديتي فرصة ؟ 

هتسمعي حتي ؟ فاكره آخر مرة سمعتيني بإنصات امتي ؟ فاكراني أصلا.  ؟ ولا أنا معدتش هنا ولا عاد ليا لزمة ؟ 

شوارع القاهره ممكن تسمعني 

الحديقة الدولية والأوبرا 

التحرير وشوارع العتبة ووسط البلد ونادي المعلمين

يمكن شوارع إسطنبول وتقسيم 

يمكن كمان المانيا وشوارعها 

يمكن محطات القطر في أيسن ومولهايم ودويسبورغ واوبرهاوزن 

يمكن حتي شوارع ومطاعم وكافيهات المانيا تسمعني 

لكن انتي 

مظنش

هتصدقي ؟ 

طيب مصدقتيش كل التوسلات والأسف والندم والحكي الكتير دا ليه ؟ 

ليه مصدقتيش كل جوابات الحب والغرام اللي تملي كتب دي ؟ 

هيفرق ؟ 

طيب كان فرق اي موقف حلو او اي يوم او اي قعدة او حتي اي لمسة او حضن

كل اللي اقدر اقوله هو ان كان عندك حق في حاجات معينه والحاجات دي فرقعت في وشي وفشختني وخسرت في مصيبة كبيرة مبلغ كبير وروحت في ستين داهيه

بس خلاص 

ودا جزائي 

عارفة 

المشكلة اني عامل نفسي ناصح وفالح وانا اساسا اهبل وعبيط وامي عارفة

ودي المصيبة 

بحط ثقتي في الناس الغلط 

وبتعشم بزيادة 

ومش بعرف اشوف قيمتي ولا نفسي صح 

وبتعب وبجري بلا هدف 

وبستني المستحيل و فاكر ان هيحصل تاني 

وكل الناس بتقولي انت كنت سلم وانت اساسا محدش حبك ولا نيلة 

ومفيش رجوع ومفيش فايدة ومفيش ومفيش ومفيش 

وانا زي الاهبل بتعشم بزيادة وبصدق نفسي وبسيبك تلعبي بيا عشان بحبك

عشان فاكر اني عندي التاريخ والقصة والحدوتة وفي حياة بعض من زمن الزمن  بس كل دا راح 

وانا زي الاهبل 

مكمل في العبط

وعارف اني هفوق علي قلم يخليني اتمني الموت زي يوم ما عرفت في يناير اللي فات بالست شهور سجن 

والله

وربنا عارف 

ياتري عندي ايمان بيكي ؟ ياتري أصلا فاكر ان كلامي هيكون له اثر وهنتكلم او حتي يتصلح حالنا ؟ 

حالنا مين احنا معدناش احنا معدناش نا من غير نا بقي في أنا وهي 

مفيش احنا 

بس معلش 

اكيد ربنا شايلي الخير 

ياريتني سمعت كلامك في حاجات كتير 

ياريتني ما عاندت ولا وثقت في ناس معينه

بس معلش خير 

حصلت المصيبة والاتفاق اتلغي  وكله راح 

يعوض عليا ربنا 

في اللي راح وفي الاتفاق وفي كل حاجة حتي في حلمي واملي في رجوعك 

يعوض ربنا في العمر والحب

وبرغم كل دا وعارف انه لا هيتحس ولا ينشاف ولا يتسمع ولا هيكون له اي اثر والله إلا اني بحبك 

ياتري هتلاقي حد يحبك قدي يشاركك نفس التاريخ والحري ؟ يكتبلك ويجري وراكي ؟ يعيش زي ما عشت ؟ يحبك زيي ؟ يعمل عشانك تعب بالسنين ؟ ياتري حد هيمضي لك علي ورقة بيضا تسجنه زيي ويحط روحه في ايدك كدا ؟ 

يمكن 

خير 

تصبحي علي خير 

بكره يوم مهم 

سلام

لله الأمر

 لله الأمر من قبل ومن بعد 

وإليه يرجع الأمر كله

لعل الله يحدث بعد ذلك أمراً

ربنا يعوضني خير 

ويسترها في اللي جاي 

عادي

 خلصت التحويلات النهارده والمحامين رتبوا يوم ١٩ يناير 

المضحك في الموضوع ان يناير الشهر اللي اتجمعنا فيه واتجوزنا برده فيه واللي قربنا فيه وكل ذكرياتنا فيه

بس عادي 

أنا مش عبيط يدوبك الخبر وصل امبارح وهي كدا كدا نازلة مصر من كولن

عادي 

ياتري هيحصل ايه ؟ دوامة من المفيش للوصول للمفيش

اوقات تعمل ميكس سيجنالز ، طيب ليه يابنتي ؟ بتحبيني ؟ عايزاني ؟ طيب ماله الدوغري ؟ ماله السالك ؟ مش مناسبك ليه ؟ ليه دايما في ناس في النص ؟ ليه خايفة تواجهي اساسا؟ معرفش 

طيب دا انتقام ؟ وماله ممكن برده 

طيب دا بهدلة عشان حاجة عملتها ؟ اكيد لا لاني معملتش حاجة تستاهل كل دا 

سنتين ونص من العذاب البيور والقضايا والاشتغالات والاذي والجري والفضايح والسجن والحاجات الكتير 

طيب يابنتي عايزه ايه ؟ اروح اعتذر لهم بالفعل عملت دا 

طيب عايزه تنازلات حاضر نعتذر ونتنازل 

طيب عايزه حقك زي ما انتي شايفاه وبمزاجك برغم تنازلك عنه ماشي حاضر مفيش مشاكل اللي تشوفيه خديه

طيب استني هعمل ميكسد سيجنالز واخفي الحالة الاجتماعية وميبناش سنجل ولا لا 

طيب خلاص اتخطبتي سيبيني في حالي اعيش حياتي ، لا برده مينفعش هتكلم عليك واكلم الناس واتصل بيهم بالساعتين عشان افضحك واهد الدنيا

طيب عايزه ايه ؟ 

طيب حضرتك هتعملي ميكسد سيجنالز ، بوست حلو عن ذكريات زمان وحكاياتك اللي كنتي بتحكيها وبعدها تخفيه وبعدها تظهريه وبعدها بوست تاني والحب وأساسه وما ادراك ما الحب ، طيب الحالة والكلام ينطبق علي فعلك وعلي حالتنا بالحرف ، لا استني هكتب كومنت ان الكلام برا عنك وهخفي كل البوستات طيب انتي عايزه ايه ؟ 

أنا بطلت اجلد نفسي وبطلت افكر عملت ايه ومعملتش ايه 

الحياة اقصر واسهل وابسط من كل دا 

الحياة اللي بجد مش مستاهله كل الجري دا 

عمري ما فكرت في الفلوس ولا كان لها قيمة في عيني اساسا سوي اني افرح بيها اللي بحبهم

نازلة مصر اعملي ما تشائي بس اتمني ان كل دا يخلص بعد ما اتنازلت ورميت كل حاجة تحت رجليكي 

مستني اليوم اللي اعيش فيه بدون كل المشاكل دي 

مستني اليوم اللي اعيش فيه مستريح 

ومسيري هستريح 

ما اصل مش معقول الحياة تفضل كدا 

مش هفضل طول الوقت في قلق وتوتر ومحاط بالإشاعات والكذب والتضليل والقضايا والمشاكل 

لازم كل دا يخلص 

انتي جدعة وحلوة وشطورة وانا اللي وحش 

حلو كدا ؟ 

واحد كان بيحلم بالحب والحياة الهادية والسلام والبيت السعيد 

مش عايز من الدنيا اكتر من كدا 

واكيد ان شاء الله هوصل لدا 

فاجازة سعيدة

اعملي اللي تحبيه

بس كل دا يخلص 

كل دا اهم حاجة يخلص 

معادش عندي استعداد اعيش يوم واحد تاني بالشكل دا 

يارب يهون ويسهل ويارب يعدي كل دا ويخلص وتنتهي كل المشاكل 

يارب 

اهم حاجة تعرفي عايزه ايه لاني خلاص وصلت لمرحلة اني عايز اعيش وعايز كل المشاكل تخلص مهما كان التمن

انتي بقي عايزه ايه ؟

بكره هبعت

 بكره هبعت آخر تحويلة فلوس وهتكون حوالي تمانين الف 

وبكده هيكتمل المبلغ تماما وتبتدي اجراءات التسليم

علي خير ان شاء الله

الجمعة وسهراته

 الحمد لله اللي جمعنا النهارده الشله كلها من دوسلدورف وعندنا في اويرهاوزن قعدنا زي كل اسبوع حياة الراجل العازب المغترب المهندسين صحابي اتجمعنا والنهارده طلبنا البيتزا وجبت الحلويات والمشروبات وقعدنا ، الموضوع كان لطيف جدا جدا جدا كنت عمال العب واكسب واهزر ونجمي عالي وطبعا قبل ما ابتدي لعب وهزار مكنتش لسه كلت ولا اخذت دوا فكنت مرهق وتعبان وصامت تماما بدون اي كلام لحد ما البيتزا جت من المحل اللي جنب بيتي في الدليفري 

عايز اقولك اني ايديا لسه دافية في الشتا ولسه بحب المشي وبطلت اسمع علي سبوتيفاي وبقيت بسمع علي حاجات تانية وبسمع مزيكا هادية بس 

اتكلمنا كتير ولعبنا كتير وخاصة في الكريبتو والسوق واللي متوقعينه الفتره الجاية والحمد لله كان في ترتيب سفرية ل برلين بس ملحقتش احجز للاسف ومش هعرف اطلع 

الاكل بيلعب دور كبير جدا في المود بتاعي ويمكن يكون في تعب في غدة ما بس الحمد لله لما باكل ببقي متزن ورايق وهادي جدا والحمد لله 

مش عارف اقول النهارده فكرت في ايه ، هقولك فكرت فيكي ؟ هقولك وحشتيني ؟ طيب ما انتي عارفه وقلت مليون مرة ، أنا لو جمعت كل اللي كتبته هنا في حبك يكفي كتب والله تخيلي ؟ 

بحاول الاقي علامة او اشارة او اي حاجة بس مفيش بحس ان روحي بتنسحب ، أنا ببقي كويس اوي لحد ما تيجي سيرتك بتلخبط وبتوتر والنار بتمشي في جسمي بدون انذار من الشوق والمحبة ، يمكن أنا مريض بيكي فعليا بس أنا عارف المرض وعارف الحب كويس وأقدر افرق في نفسي ما بينهم أنا بقيت شاطر في مراقبة نفسي 

خدت الدوا والحمد لله نضفت البيت كله النهارده وروقت كل حاجة و قعدت مش لاقي حاجة اعملها وروحت لواحد صاحبي فوتت عليه في المحل وقعدت شوية مش كتير ومشيت وجبت اكل وحاجات كتير 

مش هعرف اوصف وحشتيني قد ايه ، يمكن احاول اقول اني زي ارض الصحرا اللي مشتاقة لنقطة مطر ترويها او زي الجعان للشوق والحنين ويمكن زي اللي بيحلم في الدفا في ليالي بارده زي دي 

كتبتلك كتير وقلتلك كتير وبعتلك كتير بس هل في حاجة اتغيرت ؟ 

مش عارف اقولك بقيت بفهم في الناس ازاي ويمكن برده ملوش لزوم بس معدتش عبيط وريالتي تملي طشت زي زمان ، بقيت عارف رايح فين كويس ومرتب الشهور كويس وعارف هعمل ايه ومستني ورق كتير اوي 

مش هعرف اقولك بحبك قد ايه ، قد فرحتي بيكي اول يوم قابلتك فيه ؟ ولا زي حلاوة نظراتك في لحظة حلوة ، ولا زي ايه ؟ ولا زي طعم الكلام الحلو من شفايفك ؟ مش عارف بس أنا بحاول اعيش ، هل دا غلط او حرام ؟ هل اني احاول اعيش فيه مشكلة ؟ 

مش عارف هعمل ايه بصراحة علي المستوي الشخصي الحياة ماشية وانا مريح دماغي وهادي ومش عايز قلق ، عايز استريح من تعب الحياة شوية ، عايزك وعايز وجودك ومحبتك وكلماتك وكتاباتك ، لكن باخد ميكسد سيجنالز، مش فاهم حاجة ولا عارفلك حاجة ، شوية حاجات تظهر وشوية حاجات تختفي مش فاهم حاجة

بس عادي زي ما تحبي ، الطريق والأبواب بايدك مش بايدي للأسف 

ليلتك سعيدة واحلام حلوة وسعيدة زي عيونك الحلوين