كافيه وغدا وكدا

 يوم طويل ومكالمات وخروجة حلوة علي غدا حلو ، كان تحفة بصراحة شفت ولاد سولم وكتاكيت خالص حلوين اوي والواد مطرقع والبنت كتكوته اسم علي مسمي ، وشفت كمان بنت حماده ودا اول مره يحصل ودي حاجة عظيمة الاطفال بيخلوا اي قعدة دمها خفيف 

والواد صاحبي التاني كان رايق وأذاني شوكليت بس مرضيتش عشان الشوجر رش وفوق كدا الكابتشينو والبروستيد كان تحفة ، مش عارف الناس دي كانت بعيد ازاي كانوا واحشيني اوي كان بقالنا كذا اسبوع مش بنقعد بس المره دي كل واحد جاب عيلته 

وغير كدا واحد تاني كلمني في وسط القعدة وهزرنا وقلتله نتقابل بكره ونقعد في كافيه والدنيا حلوه واعتذرت بشياكة عن النهارده 

وفوق كدا كان بقالي زمان مكلتش فراخ عامل لها حظر فالمرة دي جبت بروستد كان حلو اوي اوي اوي بس مكنتش بركز اوي في الطعم الاكل كان سخن وفوق كدا كنا برا جنب الدفايه 

النهارده اول مره اتكلم في وسط الجروب علي الأسواق ووريتهم اني الحمد لله شواف واني حققت نجاحات لطيفة ودا كان عظيم بصراحة 

غير كدا خلينا نتكلم شوية عن بقية اليوم كان هادي ورايق واعصابي رايقة ومستقره بدون جري وتنطيط 

أنا عارف ان رزق ربنا في كل حاجة بييجي في ميعاد وشله الصحاب دي مكانتش هتيجي لوحدها غير في ميعاد ووقت اكون مستعد فيه نفسيا واكون كمان مستقر وقادر احقق لغيري السلام والامان والمحبة والهزار 

بقيت حاسس ان في حمل كبير بيقع عن ضهري كل يوم واني ضهري بيتعدل 

بقالي كام يوم مروحتش الجيم وان شاء الله بكره هروح اظبط الدنيا بس حلو الفتره اللي فاتت عملت شوية انجازات حلوة وعملت تحليل قوي جدا لكذا حاجة والحمد لله ربنا وفقني طبعا كل دا من عالبر وبالمشاهده بس ودا فخور بيه جدا وقعدت اقلش قدام صحابي 

النهارده فقت لكام حقيقة حلوة عجبوني اوي في الأسواق ودا تقدم مذهل وعظيم وابتديت اقرا كويس وبسرعه جدا واسرع من اي حد 

في كام خطوة بخطط لهم بهدوء شديد لكن النهارده لسه خمسة يناير يعني معانا وقت اكتر من كافي بس كل حاجة في وقتها 

النهارده هتمني ايه في ختام اليوم ؟ 

- هفكر نفس الاول بنعم ربنا عليا زي 

السلام والامان والهدوء والضحك والصحة الكويسة والصحبة الصالحة وفوقان الدماغ والراحة في الحركة والقهوه الجميلة و الاكل الحلو اوي والخروجات الرايقة وابتسامات الرضا والتأمل بهدوء في خلق ربنا و الفرحة بحاجات بسيطة

- بعدها نتمني بقي 

اتمني اكون قادر اتحرك اسرع في قراراتي ومعلوماتي اللي بتساعدني اقدر احقق حاجات كتير 

اتمني اعرف انام كويس وانا متحاول بكل طاقات ونشاطات وحب اليوم وفرحته 

اتمني ان رزق ربنا من الحب والسعادة والبيت والاولاد ييجي في الميعاد 

اتمني الرضا يزيد واتمني الفرحة تزيد واتمني السلام اللي بحققه يكمل 

اتمني الوقت يعدي علي الهادي عشان مبسوط 

اتمني اني اصحي الصبح الاقي الفرحة في كل جوانب حياتي 

اتمني اكون أنا دايما كريم اللي قلبه واسع قد الكون كله وراضي وبيحب الحياة وبيحب ويضحك ويستمتع ولو حتي بوجبة بروستيد ومشروب مليان سكر 

اتمني ان ربنا يحاوطني دايما بالناس الحلوة وقلبي يفضل ينور لهم دايما 

اتمني ان اثري يكون ويفضل عظيم في حياة اللي بحبهم 

اتمني ربنا يكون راضي عني وانه يبعد عني كل شر 

اه صحيح نسيت اقول ان الطقم الجديد تحفة والبرفانات سواء توين بلاك او هتلان او حتي المسك بتاع القرشي تحفة علي الطقم دا والنهارده جاتلي فكره ان كل طقم يبقي له برفان معين 

النهارده برده خططت حاجات في حياتي مكنتش واخد بالي منها كويس 

ربنا يديم سعادتنا. ومحبة صحابنا الصادقة و البراح اللي في قلوبنا والنور اللي في كل ضحكة والسلام اللي مالي نفوسنا 

اتفاق

اتوصلت في آخر يوم في السنة لاتفاق بحيث كل القضايا تخلص وكل المشاكل مع وعد بعدم حدوث اي مشاكل تانية وقفل الموضوع واستلام كافة الحقوق وان مفيش اي حقوق عليا تاني باي شكل ب ٧٠٠ الف جنيه

كلمت المحامين عشان يرتبوا سوا ويخلصوا الورق 

و عبد الله وافق وابتدي التنفيذ واعتذرت واتاسفت واتحايلت واترجيت واتذللت بكل شكل ممكن عشان تنتهي المشاكل

هدبر بقية المبلغ واخلص كل حاجة في اسرع وقت ممكن

بس خلاص 

اروح فين

 النهارده يوم هادي بس مستني ردّ عيد الله يوم الاحد بليل 

كل حاجة في حياتي فيها انتظار مؤلمة

طلوع الصبح 

فنجان القهوة الصبح

الصلاة

المواعيد والمقابلات والخروجات 

ميعاد الدوا 

مكالمة اهلي 

مقابله فطوم صدفة

الصلح 

بداية حياة جديدة

التسامح والغفران

الاخبار 

البوستات والكفرات والعلامات

حتي وصول الورد للشركة

الابتسامات اللي ابتدت ملامحها تضيع

كل حاجة بستناها بتقتلني

بحاول أتماسك 

بفضل الف في الشقة وفي الشوارع علي امل ان الوقت يعدي 

بقول لنفسي وبسأل نفسي مليون مرة كل يوم 

عملت ايه او حصل ايه لكل دا ؟ 

اعتذرت واتحايلت واترجيت وقدمت كل العروض وكل حاجة 

ناقص ابوس ايديهم ورجليهم عشان المشاكل تخلص او عشان فطوم ترجع

عملت كل شيء واي شيء 

مبصيتش لكرامتي او كبريائي او اي حاجة 

بحاول مصدقش ان مكانش في حب وان كله كان مجرد فرصة واني كشخص مكنتش مهم ولا متشاف اساسا

بحاول اصدق ان بكره في امل وان في حياة جاية حلوة وجميلة

بحاول اصدق نفسي زي ما عملت زمان وكله قالي مش راجعه ورجعت وساعتها كنت طاير من السعادة

لكن الواقع مر والحياة قاسية 

الوحدة صعبه وقاسية وبعدها عاملي جنان

بحاول اعيش وبس ومش لاقي سبيل لكل دا 

مش عارف اروح فين ؟ او حتي اروح لمين ؟ او اصدق ايه او مين 

كل دا عشان ايه ؟ 

مفيش حاجة بتكمل في الدنيا غير انسان بيحبك بجد 

بحاول اقنع نفسي ان كل اللي حصل وبيحصل فترة وتعدي 

لكن الحقيقة اني مش فارق واني مش مهم ومليش لزمة ومحدش محتاجني ولا حد عايزني ولا حتي بيشتاقلي

ولا حتي حد عايز يوصلي

اكيد في ايام جاية وحاجات حلوة تتعاش 

اكيد

يارب اجعل كل تعبي دا عندك وعوضني عنه خير يوم ما اقابلك

يارب صبر قلبي ونور طريقي وهديني وارشدني للصح 

يارب هون علي قلبي

مش عارف هيكون

 مش عارف هيكون فات قد ايه علي اني بطلت استعمل اكونتات فيك مزيفة واتابع منها 

أنا عمري ما كنت بتابع حد ولا حتي اغلي واقدم قصة حب في حياتي واللي حصل من وراها كتير 

كم الناس اللي عدوا عليا ومتابعتش حد يخض 

دلوقتي حتي في ناس مش بفتكر مجرد انهم عايشين

بس مبسوط اني بطلت استعمل اكونتات فيك واتابع واستني ودا من فترة حلوة مش عارف قد ايه بس بقالي زمن  

فخور بذاتي 

المهم 

النهارده كان يوم حلو في الجيم ، لعبت كويس واتمرنت وقابلت صحاب واخر اليوم روحت كلت و برده خرجت تاني قعدت علي القهوه مع صحابي 

في واحد من صحابي علاقتي بيه بقت قوية وواحد تاني علاقتي بيه بتقوي مع الوقت ، امبارح وانا ماشي معاهم فالشارع حسيت للحظة بروح واحد فيهم كانه طفل حرفيا ، يمكن أنا يحتاج احيانا اركز وافوق عشان اقدر اشوف ارواح الناس بس للأسف مش دايما فايق 

المرة دي الموضوع حلو ان صحابي موجودين سواء هنا او في مدينه تانية ، مشوار الجيم جميل وملاحظ اثر عظيم في جسمي 

ملاحظ صحتي بتتحسن بس ياريت نبعد عن الشيشة 😃

لاني ابتديت اشيش بقالي يومين ورا بعض ودي حاجة مش كويسة خالص 

المهم اني النهارده كلت حلو وبكره ننضف التلاجة ، تفاصيل كتير ورايا بس اول يوم في الاجازات كان فشيخ بصراحة فخور بذاتي فشخ

النهارده استكملت شوية مفاوضات و سالت لو صاحبة الشأن تعرف بالمفاوضات و الاعتذار والمحايلة ونية الرجوع و معرفش هي تعرف ولا لا عشان مجاليش رد ، اتمني كل المفاوضات تخلص علي خير معلق امل كبير اوي علي الموضوع دا ، عايز انهي كل المشاكل وطبعا ابقي عملت كل اللي في طاقتي عشان اصلح واعيش معاها ولو منفعش فكدا مفيش حاجة تخليني اندم او ازعل مستقبلا علي اني قصرت مثلا او حتي اندم اني معبرتش بصدق عن حبي ومشاعري ، المهم اني هستني ويارب المفاوضات تخلص علي خير والمشاكل تنتهي دي امنية حياتي دلوقتي 

اليوم خلص 

اليوم حلو والجيم حلو و جسمي محققلي اعلي درجة سعادة من التمارين و الصحاب حلوين اوي يارب ديمها نعمة واحفظها من الزوال 

اليوم كان

 اليوم كان طويل والاكل حلو والشوبينج حلو والهزار حلو والصحاب حلوين ، النهارده رديت علي طنط وهي بتقولي ان ابنها لازم يكلمني وانه كان تعبان وخف وبقاله سنتين ونص مكلمني من ساعه ما نزلنا سوا في رحلة الطيران سوا وانا قاطعته بعد ما غلط فيا وبعد ما كتب تعليقات وبعد ما نشر عليا كلام غلط ، أنا عارف ان الذهان مرض صعب وان الأمراض النفسية تخلي الواحد يسامح فسامحته 

رديت علي والدته وكلمته عادي جدا بشوق ومحبة شديدة وكاننا مزعلناش يوم وفرحت بيه وفرحته وشيلت البلوك ، اليوم والفتره اللي حصل فيها الزعل كانت اصعب فتره في حياتي بس سامحت مصطفي وقلت لمامته اني سامحته وان مفيش اي مشكلة وان كل حاجة ماضي وانتهي 

فخور بنفسي عشان التسامح من صفات الشجعان والأصول والأصلح بين الصحاب بالرغم من كل حاجة بيننا عيش وملح ، الشخص دا أذاني جدا جدا جدا بس مهما كان هوا مصطفي اللي بحبه 

اليوم كان حلو وهادي ، وبسبب التغيير اللي عملته اليومين اللي فاتوا في سيستم يومي حاسس اني مسيطر بشكل كامل والمود هادي ومستقر وحاسس بالحياة سلسه وبسيطة وبضحك في وش الناس وبفكر في بكره 

بطلت اتابع اخبار الاقتصاد والأسهم والعملات والمستقبل واقعد اكتب بالساعات علي مستقبل كل شركة واقعد اشرح ، بطلت والحمد لله ودا خلاني عايش بشكل احسن لاني في الاول والاخر مليش في اي حاجة مصلحة بس مبسوط بنفسي وانا فاهم الأسواق كويس وعارف أقيم شركات بمليارات 

تغييرات ورا تغييرات واكل حلو وونس جميل مع صاحب طيب و صاحب تاني برده بس سعيد 

حاسس اني قادر ادي الحياة اكتر مش حياة وبس وحاسس ان احلامي قدام كف ايدي وسهله للدرجة دي تفاصيل بسيطة قادرة تسعد اي حد والحمد لله

اليوم خلص وفالبيت لوحدي بس البيت هادي خالص وقافل كل حاجة وقاعد في اوضتي بمنتهي الهدوء وبكتب ، مبقتش الدنيا بتمثل لي هم بقت احلامي فجاة ممكنه بشوية تغييرات بسيطة في السيستم بدون اي تدخل بدون اي تواجد من اي حد قدرت اصلح حاجات كتير بفضل الله 

بدون ارتباط ولا حب ولا اي حاجة ولا اي حد جوا الصورة 

أنا حاسس اني احسن 

أنا حاسس اني راضي 

حاسس اني سعيد