عاد إلي منزله

 عاد الشخص اللي سدد كل ديون اليوم الي منزله وكان فضل الله عليه عظيما 

الحمد لك يارب 

سددت كل الديون 😀😀😀😀😀

باقي عليا حوالي ٦٠٠ يورو ودول سهلين ان شاء الله 

اول مره من ست سنين اعيش بدون ديون 

مش عارف الحياة هتبقي عاملة ازاي 😀

تم سداد كل ديون البنوك والاشخاص كلهم كلهم كلهم 

ولينا فلوس برا لو رجعت في ميعادها هيتبقي معانا ٥٠٠ يورو زياده كمان 😀😀😀😀

الحمد لله 

وكان فضل الله عليك عظيما 

احمدك يارب 

اخيرا هقدر اعمل حاجات كتير واتطمن اكتر واتعامل بطبيعتي بدون ديون وخوف وقلق وخطط سداد 

احمدك يارب 

بنلف في دواير

الدم ولا الحب ولا العشرة ولا السنين ولا ولا ولا 

نلعب اللعبة بأصولها ؟

ولا نمشي ورا دماغنا ؟ ولا ورا قلبنا ؟ وصلنا لفين ما بين دا ودا ؟ 

الحب وصلنا لفين ؟ جواز ومشاكل وقضايا وطلاق   ومرض وتعب والم مشتمر بنحاول نعديه ونهديه مع الوقت بدون اي فايده من اي محاولة باي شكل ، كل الابواب مقفلة ، طيب نحاول تاني ؟ حاولنا وفشلنا ، الحب مش المحرك اللي هيخلق الحياة منفعش وتمان تسع سنين راحوا في المفيش ، مهما كانت غلطاتي فانا كفرت عنها ومهما كانت ذنوبي فانا دفعت تمنها ومهما كان الطرف التاني عمل فكله انتهي والواحد سامح فيه وخلصت الحكاية ، ونشال تاني ؟ نحاول ؟ برده لا لان كل الابواب مقفلة تماما ، مهما كان عندي من حب وحنية وعلاج وهدوء وسلام وراحة وامان وشغل وفلوس ومستقبل حلو فكل دا ملوش قيمة ومش مطلوب وخلاص السكة مسدودةواي محاولة هتضرني وتأذيني ويمكن تقضي علي مستقبلي بالكامل 

دماغنا ؟ موصلتناش لحاجة ، مفيش مكان مستريحين فيه ، مفيش راحة ولا انجاز غير في الشغل وبس والباقي كله امور عقلية مش بتفيد ، العقل مش هيدفيك بليل ولا هيغير طبيعة حد يخليه احلي من احلامك

قلبنا ؟ برده مفيش فايدة

خلاص نلعب اللعبة بقواعدها ؟ نرضي بالعادي ونشتري اللي بنحلم بيه ، نروح نجيب شقة في الرحاب و عربية لطيفة وشبكة وفرح جميل ونتجوز ؟ دا هيبقي كويس ، نقبل بالمطروح عالترابيزه ؟ ولا نكمل ورا القلب والحب ولا نكمل ورا العقل ولا نعمل ايه ؟

  في كل الاحوال انا كنت اتمني مقعش في الأزمة دي وكنت فعليا راضي بحياتي 

بس المشكلة في مجتمع الفلاحين اللي عايشين فيه ونقل الكلام والخبث والتصرفات بتاع الناس ، قفلت دايره علاقاتي علي تلات صحاب  بقعد مع ناس معينه وباكل مع ناس محترمة وبدخل بيوت ناس والعب معاهم وابتسم في وشهم وبيسندوني عيله حلوة 

الحياة ابسط من كل العجن دا 

لو بتحب حد قوله بحبك واتخلي عن اي حاجة في مقابل دا ، لو عايز حاجة اختارها مهما كانت المشاكل تتحل ، كله سهل بس اتحرك وكله هيبقي كويس 

انا مش عارف ليه مش مستريح حاسس ان في حاجة غلط مش مظبوطة وحاسس ان في لخبطة ومش عارف احدد مصدرها 

في كل الاحوال في حاجات كتير لازم تتهد النهارده بدون اي اعتبارات لازم نقفل ابواب معينه للابد وبالذات باب اسراء 

وربنا ينجينا وخلاص  

عروسة جديدة

 انا تقريبا هتنقط او اتشل قريب من المواضيع دي 

كل شوية القريب والبعيد والصاحب والمعرفه جايبلي واحدة وجاي 

والمره دي من العيله 

ناس ثقة وكويسين وبنت جميلة وهادية ورقيقة زي الوردة

شغل وقيمة واصل وحسب ونسب وقصة

وهتحل مشاكل كتير بكل شكل 

خلفة وذرية واولاد و عيشه محترمة وراقية و ناس رايقة وبتضحك وتتشرف بيا وتسعدني 

بس تعبت

من كتر الوش 

اتفاقنا ايه يا كيمو ؟

 نتكلم يا كيمو ؟

نتكلم 

فاضي دلوقتي ؟

فاضي 

يلا يا حب ؟

يلا ياصاحبي 

###

حياة وراحة 

احنا بندور علي ايه ؟ سواء مع الاكس او اسراء او اي بنت عرفناها ؟ 

احنا بندور علي الراحة والحياة الحقيقية ، انا عشت فرص كتير ولفيت كتير وجربت حاجات كتير وكسبت فلوس كتير اوي اوي كمان وخدت فلوس في ايام شغل في ناس مبتعرفش تعملها في شهر ، وخدت فلوس في شهور في ناس مبتعرفش تعملها في سنين والحمد لله ربنا كرمني من وسع في شغلي واقامتي وسداد ديوني وكل حاجة ، ايه اللي بدور عليه وجوهر الحياة ؟

مفيش مرتب كبير كل شهر او اقامه و فلوس او سفر تساوي راحتي في حضن حد بحبه كل يوم ، احساس الدفا اللي بيشع من جسمي في الشتا واحساس الامان ان في حد بيتدفي فيا واحساس الحب ان في حد جنبي حاضني وبيطمني مفيش حاجة تساويه ، مفيش شغل ولا فلوس ولا اي حاجة تساوي ولا حتي ربع الاحساس دا 

مفيش حاجة في الدنيا تساوي احساسي وانا تايه في السوبر ماركت مش عارف اشتري ايه وبكلم حد فالبيت يقولي ناقص كذا وكذا ، ورايح جري علي محل شاورمه في مدينه تانيه عشان اجيب اكل وابسط اللي بحبهم او بدوح محل حلويات عشان خاطر اجيب حاجة تبسط حد بحبه،  ، مفيش حاجة تساوي حضن الرجوع من برا و لقطة انا جبتلك حاجة بتحبها وانبسط ونور العيون في الضحة والفرح 

مفيش حاجة في الدنيا لا كلام الناس ولا غل ولا حقد ولا كره ولا رغي قرايب او تشكيك الصحاب او الجيران او الزمايل تقدر تغلب حلوة زي مسكة ايد او بوسه علي الراس  او حتي كلمة ساعه فضفضة او حتي تمشية بليل 

مفيش حاجة في الدنيا تساوي ان حد يبقي في حضنك ويقوم يجيبلك ميه واكل وحاجات حلوة عشان يفرح قلبك ويطمنك 

كل الحاجات دي واكتر عشتها وعشت اللي احلي منها وبدل المره ميت مرة كمان 

انا عارف ان الدنيا كدا ، الفلوس فيها رخيصة ، مش هناخدها معانا القبر ولا حتي الورق والشهادات ، اللي هناخده معانا وهنطلع بيه من الدنيا ، اللقمة والهدمة، ودا مش كلامي ، لكن انا شايف اللي هناخده كمان هي التفاصيل والاحداث اللي بنعيشها ، خد كل الفلوس واديني وقت اعيش فيه صافي البال مستريح ، خد كل الورق والسفر واديني وقت اعيش فيه مع حد بحبه وبيحبني بصدق ، مفيش حاجة في الدنيا تسوي ولا حتي الكرامة ، الكرامة مش هتدفيك بليل ولا هتاخدها معاك  ، اللي محتاجه بجد انك تعيش انسان بجد وزي ما كنت بقول لاسراء وغيرها ، انا اقدر امسح اي شخص في دقيقة لكني مختار اتالم واحس بقلبي لان دا اللي بيخليني بني ادم وغير كدا طيبة قلبي وحنيتي دي هي الكنز الرهيب اللي مش موجود عند حد ، لو هدفع تمنه شوية وجع انا موافق حتي لو اكتئاب وادوية 

انا عايز ايه ؟ 

عايز حضن دافي وحد حنين عليا وحد بيقدرني وبيلف في الشقة يشم ريحتي في كل ركن ويفرح بيها ، ولو لقي شعره من شعري عالارض يجمعها في علبه قطيفة من شدة المحبة ليا ، زي ما كنت بعمل مع الاكس وقعدت شهور خايف اغير ترتيب السرير او شهور مش عايز اشيل الحاجات اللي حطاها بايديها كن حتت في الشقة لحد ما قررت امسح كل حاجة وغيرت فعلا كل حاجة ، مش قسوة لكن عشان مش هقدر افرض نفسي علي حد مش عايزني ومهما كان حبي غالي ومهم وحلو بس طالما مش غالي عند الطرف التاني فخلاص 

عايز ايه ؟

عايز حد يسندني نفسيا ومعنويا يقدر نفسيتي ومرضي ويدلعني زي ما كنت بعمل مع كل الناس ومع اللي حبيتهم ، يستحمل عصبيتي زي ما بستحمل عصبيتهم ويراعيني ومش عايز حاجة بالحق ، عايز كل حاجة بالتفاهم والرضا والمحبة ، بس كدا ، مش عايز فلوس ولا مرتبات ولا ماديات ، مش عايز حد يشتغل ويديني ولا عايز اي حاجة من حد ، انا عندي اللي مكفيني وزيادة ، لكن مش عايز حد يستقوي عليا بفلوس او اي حاجة مش عايز احس اني في علاقة فيها طرف بيحارب فيك ، احنا مش في حرب ولو في حرب فدا ميبقاش بيت ، يبقي ساحة معركة 

عايز ايه ؟

حد يصدق ويآمن ويبقي كلمته الحلوة بتسوق معايا المركب ، مش عايز واحدة اكسرها او اهينها او اذلها او استبد بالقرار ، عايز واحدة في ضهري تقويني مش تكسر ضهري ، تقف جنبي وتسندني ، مش عايز واحدة امارس عليها سيطرتي لكن عايز حد يفهمني ويحن عليا و يصدق فيا ويآمن اني اقدر 

طيب هل انا اتساهل الايمان دا ؟

الحمد لله كل شوية بخطط وربنا بيكرمني وبنجح وبحقق حاجات كتير سواء في سفر او شغل او حياة ، عملت انجازات كتير طول الوقت وكل وقت وربنا قدرني اطلع نفسي من الهم والغم واطلع نفسي من قاع مصر والحمد لله وصلت لكتير وبفضل الله، ف آه شايف نفسي استاهل الايمان والتصديق والعذر وقت الفشل  

  حب  و حنية و اخلاص و رقة وطيبة ودلع ودفا وامان وتواجد وسند ولو بالكلمة ، مش عايز غير كدا 

الراحة الحقيقية مفيش حاجة توازيها في الدنيا ، وانا لما بلاقي لها فرصة بمسك فيها بايديا وسناني وبجري عليها زي المجنون 

###

قرارات وامان

انا مش عايز العمر يعدي وانا لوحدي ، كل يوم بنزعل فيه بيضيع مننا ، كل يوم بنكون فيه مع ناس وحشة او مش مناسبانا بنحرق في عمرنا وكل يوم مبنسمعش او بنتجاهل او بنبعد بنحرق في عمرنا وانا مش عايز احرق في عمري 

طيب العمر بيجري ، تفتكر نعمل ايه ؟ 

ولا حاجة 

just keep living  علي راي اقرب صحابنا 

مش هنخاف علي الخلفة وخلفنا امتي ولا هنخاف زي العبط علي اي حاجة متخصناش ، احنا ناس محترمة وعلي راي واحدة راجل محترم وجدع وقلبه دهب وطيب واحلي حاجة فيا حاجات كتير اوي مش موجوده في اي حته تانية 

اي قرار او فكره او خاطرة هتسبب لنا الالم مش عايزينها 

الفتره اللي تت فتحت قلبي وعرفت ناس كتير ، كان قدامي مليون فرصة بس اخترت اللي مختارني واخترت اسراء ، سواء كان صح او غلط او مناسب او لاء بس كانت الحياة لطيفة ، مفيش حاجة في الدنيا تساوي الراحة ولذلك  انا مش ندمان ولا زعلان ولا مدايق بالعكس سعيد باني قدرت افهم واشوف ان ليا فرصة في الحياة وان االحب موجود وان مسيري هقابل حد يبادلني الحب دا وان اي خساره بتعرضلها اكيد مش بتاعتي وان الالم والوجع مفيهوش مشكلة وان المحبة شرطها الجسارة ودا شرع القلوب الوفية 

مش محتاج علاقة جسدية ولا لمسة ولا سكس ولا اي حاجة غير اني الاقي محبة صادقة ودي اللي بتخلق كل حاجة تانية بتخلق حتي امنية الواحد انه يخلف ويعيش حياه صادقة ، ويمكن دا عندي بالدنيا ويسعدني مليون في الميه 

مش مساله عمر بيجري و حاجات كتير قد ما هي مسالة محبة وعشق حقيقي 

المحبة والعشق الحقيقي بيدوم والاختبارات اللي ربنا بيحطنا فيها احلي واهم من اي حاجة خلقها ربنا لانها بتخلينا نشوف الحقيقة والصح واللي المفروض نعمله ، انت عارف انا مش ندمان علي اي حاجة عشتها او عملتها او ضحيت بيها ومعدتش بفكر في السنين والشهور والتعب والايام ، بقيت بفكر في حاجة واحدة بس وهي بكره واني اعيش سعيد ومستريح ورايق والمحبة ربنا هيرزقنا بيها قريب وهنلاقي في يوم حد زي حالاتي كدا بيقعد يدور فالبيت عليا ويشم في ريحتي ويجمع شعري ، لو ملقتش محبة صادقة للدرجة دي مش عايز العيشة وانا ممتاز لوحدي وزي الفل 

جالي فرص كتير اوي الفترة اللي فاتت ، بدون حصر ، فرص للصح والغلط والحلال والحرام وكل حاجة خلقها ربنا ، جالي فرص للجواز كتير اوي لكني مش محتاج غير اني اكون مع حد بحبه او عايز وجوده او متطمن و حد مفضي له حياتي بالكامل وعايز وجوده يسعد القلب ،  

اصبح عندي كل حاجة ، الشغل والفلوس الكتير والبال الرايق والنجاح والاستقرار 

بلبس من امريكا وبشتري اغلي عطور و بجيب كل ما نفسي فيه وباكل احسن اكل وبالشكل اللي يريحني وبمزاجي وبعمل كل حاجة ملك، حرفيا الدنيا تركع قدامي ، معايا كل حاجة 

ولكن ناقصني الونس والمحبة الحقيقية ومش زعلان علي دا ومش ندمان طول ما انا مش لاقي مكاني المناسب فمش هندم علي حاجة 

زمان لما سيبت الاكس ووحشتني وجالي المرض والتروما والمشاكل ، عملت كل اللي في وسعي ، صبر ومكالمات وجري وتنطيط ونقاشات وكلام كتير مع كل الناس ومفيش شيء في طاقتي معملتوش لدرجة اني كنت بروحلها لحد البيت ، للدرجة دي كنت بحبها 

عشان كدا مش ندمان 

ودلوقتي في اللي بيحصل دلوقتي مش ندمان برده لاني قدمت كل حاجة 

اكتر حد وثقت فيه في الدنيا واكتر حد اهتميت بيه واديته طاقه ومحبة و صدق ومخبيتش اي حاجة ، بذلت كل ما في وسعي في الموضوع دا زي اللي قبله ، عشان كدا مش ندمان 

اندم ليه ؟ عشان كريم لوحده ؟ كريم اكرم له يكون لوحده من غير ما يكون مع ناس مش تناسبه او مش بتحبه بصدق او متنفعوش او مش متفقين مع بعض او مش مآمنين ومصدقين فيه 

انا مش ندمان ولا زعلان علي حاجة لاني بذلت كل ما في وسعي ، لو كان في حاجة معملتهاش كنت هندم لكني سعيد جدا والله والحمد لله

دلوقتي وانا معايا كل النجاحات اللي كنت بحلم بيها وبعمل اجتماعات مع عملا وبجيب تعاقدات بملايين و باخد مرتب كويس وبعمل حاجات بالهبل في لحظات ،انا مبسوط وسعيد حتي لو هعيش النجاح لوحدي ، عالاقل ملك مملكتي السعيدة ومستريح نفسيا من اي حاجة وحشة

البوست دا للذكري وللتاريخ 

وبكرر فيه بكل شكل : اني بقدر قيمة الاشياء وان مفيش حاجة تستاهل موتي واني بدور علي السعادة ولسه عندي امل 

مناقشتي معاك يا كريم اسعدتني ، اتطمن يا حبيبي ، بكره حلو وهنلاقي اللي بندور عليه 

وهنوصل للي بنتمناه 

والفراق مش هيموتنا مش اول مره ❤️

والحمد لله رب العالمين

نكمل كلام بعدين 

موافق نتكلم يا كيمو

 فاضي امتي ؟

بكره 

نقعد نحكي ؟

اه

جاهز ؟

اه ياصاحبي 

مستنيك بكره ياصاحبي