السكة

 ولو صعبة عليكي السكة شاوري لي وانا اجيلك 

HBD

❤️

More than life itself 

صباح شريف 

صباح جميل

صباحك ياللي علي بالي

صباح الواحد من ستة

هغني لك وتبقي قبالي 

وتمشي مع قلبي السكة

صباح النىو 

علي البنور 

عيون الحور  

واعدي البعد والمسافات 

واقول للحلو اطمن

دا مهما كان بكره بعيد 

قلبي صابر ويتحمل 

وحشتيني 

Cinema وبس

 …

Keep going

 انت انسان عظيم عشان العظمة مش في السيطرة علي النفس زي ما بيقولوا لكن في تقبل الذات والتصالح معاها ، والحلو في العاطفية الاوفر بتاعتك هي الحنية ، انك حنين وبتحتوي اللي قدامك وتحس بيه بصدق وفي كل الاحوال مهما اذاك برده بتحاول تلتمسله العذر وبيصعب عليك وبتسامحه، انا واثقة من ان جوهرك طيب وعمرك ما تضر حد ولا تأذيه وقلبك يساع الدنيا دي والف دنيا فوقهم ، والرحمة اللي جواك والصدق كافي يكون لكل الالف دنيا دول الف شمس تنورلهم في قلبك لو تعب والعتمة مليته وبقي ضلمة.

بعد الاكل

 زي سطح بحيرة هادية ، زي ليل جميل مفيهوش مشاغبه ولا قلق ولا نور شارد من لمبة بعيد يقلق راحة البال ، زي زمان كدا لما كنت بنام فوق السطوح علي الكليم وراسي عالارض وباصص للسما ، هدوء ، اخيرا ، وراحة أخيرا ، ، النهارده طبخت تاني ، اليومين دول رجعت اطبخ ، ابتديت بحاجات بسيطة زي طبيخ الفاصوليا وصينيه البطاطس ، وبعدها عملت تحديث للمنيو وعملت بشاميل كامل اكتر من مره لوحدي ، فخور بنفسي اوي ، كل مره في تحديث في الوصفة ، النهارده بقي كانت كفته داود باشا ومعاها صينية بطاطس وشوية رز وسلطه وخص  وعيران و بيبسي فانيليا ، الموضوع خرافي ، النهارده قبل ما اطبخ كنت تعبان جدا لكن اول ما طبخت وكلت ، مش عارف حصل ايه بس حياتي كلها نورت ، الاكل فعليا حلو وانا بعمله حلو وي وطالع جميل اوي والله ، فرح قلبي فعليا لدرجة اني خدت الاكل ستين صوره 😂😂😂

الفكرة بتاعة من يومين اصدق مين كملت معايا وابتديت افكر ان لو عارف الحقيقة والدنيا رايحة فين واخترت اختيار مخالف هل كدا تبقي وحش ؟مش عارف ، يهمني اكسب نفسي واكسب نفسي بشرف مش بخسة ولا ندالة ، تقريبا و مش تقريبا انا فعليا عملت كل حاجة فمفيش لوم بيني وبين نفسي او ندم ، والحمد لله ابتديت دلوقتي اقتنع ان كل حاجة حصلت وانتهت وابتديت كمان انضف البيت ، امبارح قعدت نضفت الحمام بشكل قوي جدا ، تقريبا من يوم ما دخلت الشقة منضفتهوش كدا ، الشاور والحوض وكل حاجة وبرده اول امبارح لما غسلت اهم كوبايه فالشقة ، النهارده بقي قلبت في دولاب التوابل وابتديت ارمي علب التوابل وعلب المرقة وعلب القهوة وعلب كتير ، اكتشفت اني كان عندي حاجات كتير اوي واننا جايبين كل حاجة بس محدش كان فاضي يعمل او يستعمل ، ، رميت كتير اوي عشان  انضف الدنيا وانضف المكان وابتدي امحي اثار كل حاجة ، ولميت الجرايد والمجلات كلها في شنطة عشان تترمي برده ، انا مبسوط اني والله ابتديت اصدق ، اعصابي مستقره ويومي بيعدي ،وابتدي الاكل يبقي طعمه حلو ومش عارف السر في ايه ، النهارده بصراحة عشت حالة رعب من ان ممكن حاجة تتصلح ، انا حرفيا لو حد كان حلفلي عالمصحف ان انا هحس دا او اعيشه بيني وبين نفسي والله ما كنت صدقته ، طبعا لسه في خطوات كتير فشخ عشان اكمل تنضيف البيت وفي حاجات كتير فشخ لسه هتترمي بس انا مبسوط باللي عملته ، انا مبسوط ان في حد انتصر في المعركة جوايا وان خلاص اصبح الواقع هوا الحاجة اللي اتقبلها باختياري واني خلاص اركن قناعاتي علي جنب لان مفيش فايده منها ولا حتي من معرفتي الحقيقة او اللي هيحصل ، كريم لازم يبقي كويس 

السبورت سيستم سواء من الاتنين منتور اللي واقفين جنبي بصراحة مخليني كل شوية مركز تماما في تجاه حلو ، سعيد جدا ان في حد بيفكر معايا وبيخش يسلك الخناقة جوايا ويساعدني ويبتسم في وشي ، انا مش قادر اوصف قد ايه الموضوع دا فارق ، موضوع ان حد يصحك في وشك ، تقريبا يمكن عشان بقالي زمن بعيد عن الناس بس الحمد لله دلوقتي الاتنين دول سواء المنتور بتاعتي او المنتور التاني اللي واقف علي طول الخط جنبي ، بصراحة متطمن

كلام بسيط من المنتور صاحبي : انت قدها ياسطا ، هتعدي والله ، اهدي وركز ، هتعرف توصل براحة بس  

وكلام المنتور بتاعتي برده لما بتكلم عن اني شخص عاطفي والرد ان دا احلي حاجة فيا او يكفي جملة : انت عظيم والله 

من غيرهم ومن غير كلامهم حاجات كتير مكانتش هتحصل شكرا لهم حتي لو مش هيقروا الكلام حتي لو صحاب ساندين من بعيد من اخر الدنيا ، هما بالدنيا والله وسعيد بيهم جدا وبانقاذهم ليا كل شوية 

انا دلوقتي اقدر اقول اني علي الطريق وان الخسارة بشرف حلوة لو هتخليك تبني نفسك صح وتشوف حقيقة الناس وان الممتع في الموضوع انك تعرف نفسك كويس وتساعدها 

الحمد لله 

تصبح علي كل ما تتمناه يا كيمو و احلام حلوة وسعيده بطعم كفته داود باشا وصينيه البطاطس ❤️😍😂

الرؤية والطريق

، جبت جردل مليته ميه وملح وقريت عليه قرآن و مسحت بيه الشقة ووانا بمسح المساحة كانت بتتقطع وفي اخر جزء بمسح فيه مقدرتش امسك نفسي في شيء طبق علي صدري خلاني اعيط بجنون وبدون سبب وعملت دا عشان طرد العين والحسد والسحر والاعمال وكل الحاجات دي من البيت لان مستحيل يكون كل اللي حصل من فراغ و بيحصل الفترة دي وبدور علي بخور برده عشان اطهر البيت كمان وكمان  

 النهارده غسلت اكتر كوباية مهمة فالبيت كله ، قلبي موجعنيش زي ما كنت متصور ،  ولسه في حاجات كتير تتعمل بس اول حاجة بتبقي خطوة صغيره دايما 

الفكرة كلها فالرؤية ، امبارح سالت سؤال حلو : كان مغزاه هوا ليه مصدقش كلام واشارات وتصرفات الناس بدل ما اصدق ايماني العميق ، مش شرط اتقبل اللي حصلي بس هل لازم فعلا اتخلي عن تصديقي بالحب والروابط الكتير واصدق الناس اللي قالولي خلاص ؟ هل فعليا دا الحل ودي الرؤية المناسبة ، هل هما عندهم حق ؟ بس هما ميعرفوش اللي اعرفه وشايفين من ناحية تانية ، امور كتير جدا ملهاش حصر والله بس الخلاصه لازم اصدق الناس وابطل اصدق احساسي وافكاري وتجاربي وخبراتي لازم اصدق الناس ان اوريدي في حد مش عايزك ، لازم ارسم الطريق ان اقرب حد ليا رفض يساعدني وان علاقاتي كلها بدون استثناء طلعت مجرد وهم وان صحابي مطلعوش صحابي وان محدش خايف عليا فعليا ، ودا مش دور الضحية دا كلامهم هما وبلسانهم ، لازم ابني من جديد مع اصحابي الجداد وابني بيت جديد ودنيا جديدة

النهارده اتخنقت واتدايقت جدا لاني ابتديت احس ان كل الذكريات بقت عباره عن حلم بعيد ، بقيت اشوفها زي ما تكون كوبايه عالترابيزه بعيده عن ايدي ومهما مديت ايدي مش طايلها ، مش فارق خير ولا شر اللي عملته لكني دلوقتي فعليا مش قادر امسك الذكري في ايدي واركز فيها ودا مدايقني جدا ، الموضوع بقي عامل زي حلم حلمته بليل وصحيت وكل شوية تفتكر حاجة وبتحاول تتمسك بالحلم لكن بيهرب منك ، متخيل ؟

انا نمت امبارح كويس لدرجة منمتهاش من اول السنة او من اكتر من سنة كمان وتحديدا من ايام الكورونا ، الحياة غريبة اوي والله علي اللي بيحصل فيها ، حاسس ان كل حاجة حصلت ليا من شهر اربعه لحد دلوقتي كان مجرد نداء من ربنا ودرس بالطريقة الصعبه عشان افوق وافهم اني عايش غلط وان ثقتي الزايدة ورؤستي غلط وان كان لازم اخسر كل دا ويحصل كل دا ، معدتش زعلان والله علي اللي خسرته خالص باي شكل ، لكن اللي فارق عندي هوا اني اعيش حرفيا ودا الحمد لله بعمله حاليا 

لما قعدت فكرت لقيت اجابه لاسئلة كتير جدا والله ، من ضمنها ، ازاي قدرت تعمل فيا كدا وازاي نسيت وازاي من غيري عايشة وازاي وازاي وازاي ، لاول مره بعرف ، الحمد لله انا كويس ودي اهم حاجة علي قلبي حاليا ، وصلت القاع ووقعت ودي حاجة حلوة عشان اعرف مين حلو ومين وحش ومين اصيل ومين يستاهل 

الحمد لله اللي نور بصيرتي ولو حتي بدرس صعب زي دا في صحابي واللي حبيتهم 

احلام سعيده يا كيمو