عيد ميلاد الحبايب

 امبارح كان عيد ميلاد بابا الله يرحمه ويحسن اليه ويصبرنا علي فراقه ، والنهارده عيد ميلاد ماما ربنا يخليهالنا وكلمتها وعيدت عليها ودعيت لبابا كتير والحمد لله، اليوم حلو والنهار عدي حلو وخرجت كمان بليل واتبسطت واتكلمت مع ناس ، النهارده يوم عدي بسلاسه وزي ما بحب وبتمني ، مش دايما الحياة بتقف وبتسحق روحنا لكن احيان كتير بتطبطب علينا وتهون علينا بكذا شكل ، الحياة بتستمر وبتمشي لما بتعوزها تمشي لما بتحب تحس انها ممكن تمشي ، الحياة بتبقي احلي لما بتقرر تفكر في اللي في ايدك واللي بتعمله ولما بتفكر في اللي فيه فايده من عمل واللي فعليا هيجيب نتيجة ، بكره عندي حاجات كتير ومشاوير كتير وربنا يعين ويسهل الحال ويصلح الحال ويطمن الواحد وقلبه ، كان لازم اقع عشان اعرف علي رجليا تاني وكان لازم انهار واخسر كل حاجة عشان اقدر قيمة كل شيء جاي ، كان لازم اشوف مشاكلي وخسايري جبال عشان بعد كدا اعرف اتعامل معاها ، قلبي اللي اتوجع هيخف مع الوقت وهرجع اكتب حلو تاني ، مفتقد جدا الكتابة بالشكل اللي بتمناه ، عمال افتكر في وليد وكلامه وعمال افتكر في كلام محمد برده ، كلهم ولاد حلال ساعدوا في يوم ودي حاجة متتنسيش ، ربنا يكرمهم بس للاسف كنت نسيت الكلام دا ودا اللي تعبني وخلاني اقع الوقعة دي ، الحمد لله يارب اجعل بكره بكل مشاغله يوم حلو وصفي قلبي وذهني ، انا عارف ان اللي رزقي فيه جاي وكل رزق بميعاد وانا متطمن لك يارب وواثق فيك وفي الخير والحلال لاقصي درجة واكيد انت هتقف جنبي ، غدا يوم افضل ان شاء الله

كالعاده خلينا نركز

 سيب نفسك للدوا 

استحمل تقلبات المزاج 

استحمل وجع الفراق 

اتقبل خسارتك في العمر والحب 

اتقبل ان لو شخص مش عايزك خلاص متجريش وراه ولا حتي تجبره

اتقبل انك غلطان في حق نفسك وسامحها 

مفيش حاجة بتتغير لا بفعل ولا بسكوت ولا بجوابات ولا بايميلات ولا باتصال 

وخد بالك كالعاده هتحاسب في الاخر علي كل حاجة وزي كل مره 

انت اللي هتتفشخ

لحد دلوقتي تخطيطنا عالمستوي العملي ناجحين وبنحقق حاجات وبنعمل حاجات وعارفين نتصرف وربنا ساترها 

كمل 

اللي ربنا كاتبهولك من رزق مش هيفوتك 

زوجة واولاد 

بيت وحياة 

حب وحنان 

شغل وفلوس 

عارف ان قلبك بيتقطع وعقلك هيشت وبيبقي هينفجر 

بس في حاجة في ايدينا …؟ 

استحمل وعدي 

انا شفت ايام اصعب من دي وموتت موتات احلي من دي بكتير 

نسيت مصر والدكتور النفسي قبل ما تسافر 

نسيت اللي حصل واللي بيحصل 

احنا عشنا ايام صعبه كتير 

معلش والله العظيم قلبي محروق جدا عشانك 

بس يا حبيبي يا انا مفيش في ايدينا حاجة

حتي الكلام بيوجع وبيحرق القلب 

خلينا نرجع نحكي زي زمان بطريقتنا وبراحتنا 

ارجوك 

معادش ينفع تتعب اكتر من كدا ، الدوا بيساعد ولسه هيساعد 

بس انت محتاج متستناش سيستم دعم ولا تستني حد 

والله العظيم قلبي مخطوف وحاسس بيك وبيبكي دم عشانك 

حرفيا ببكي علي حالي 

مش هقول في حد حاجة مش هفكر انا قليل ولا كبير ، مش هنطق وهكتم الاه واخر مره عملت كدا اتحرقت ، دلوقتي جسمي باظ وصحتي وكل حاجة 

نستحمل يا كيمو يا حبيبي 

عشان خاطري 

الصراع النفسي الرهيب اللي انت فيه لازم تهدي 

هتبقي كويس والله وكل دا هيمر 

حتي وانا بكتب بفتكر ذكريات 

كل دا هيخلص 

فاكر كنا زمان بنقول ايه ؟ قولها ابوس ايدك 

كله هيخلص يا كيمو والرزق بيت واولاد وحب جاي في ميعادي وغصب عنك والله كمان

ليلتك سعيده يا حبيبي 

………

كالعادة كل الطرق مسدودة ومفيش حاجة هتتصلح ومفيش حاجة هتفلح 

دا لو الواحد عمل ذنب ربنا بيسامحه وبيغفرله ،ودا العظيم

وبيغفر ويسامح

انا متردد ومهزوز وتعبان ومريض ويائس والامل بيجري في دمي زي السم 

امل مسموم وفي الاخر هيموتني او هيتحقق وهحاسب علي كل حاجة وهشيل كل حاجة فوق دماغي 

ليه الحياة معقدة كدا للدرجة دي ، ليه مفيش بساطة ليه مفيش ذكري حلوه او موقف كويس و ايام جميلة تخلي الناس تفكر ؟ او حتي تدي فرصة او حتي تراعي ، انا لازم اتبع طريقة تانية في التفكير 

اينعم انا هادي بس بضيع نفسي وحياتي كلها وبرميها فالشارع وهييجي يوم وامشي من هنا زي ما اتبعتلي وزي ما هترحل وزي ما اتبلغت 

ومفيش علاج لا هنا ولا في مصر ومفيش امل ومفيش اي حاجة 

ومفيش حاجة هتتغير فاهدي ونام وبطل تفكر في اي حاجة 

واهدي يا اما متتكلمش 

متنطقش وتتالم ولا اي حاجة ركز في شوية الحاجات اللي ليك سيطرة عليها ، في شوية الحاجات الكويسة ، شوية شغل تقديم اي حاجة تقدر تسيطر عليها ، غير كدا كلها اوهام

كل اللي وقفت فيه وفكرت فيه ومحاولاتك كلها انت موهوم انت الوحيد اللي عايش في الحلم دا 

مفيش حد بيحب حد ويهينه او يذله او ميردش عليه او ينتقم منه للدرجة دي ويدور علي فين يوجعك ويعمله او ياذيك بتجاهل او كلمة او موقف او اي حاجة 

اللي عايزك هييجي لك 

اهدي وخف وخليك كويس وبطل تفكر في الامل 

الوضع بيسوء

 الوضع بيسوء 

مفيش حاجة بتتغير 

مفيش فرص 

الدوا بيهدي بس الوضع زي ما هوا 

مش عارف اتقبل 

حاسس بخنقة وموت 

مش عارف اسمع الكلام وانسي 

مش عارف ابطل استني 

مش عارف ابطل اتمني واقول يارب 

مش عارف اكل ولا انام ولا اعيش 

مين مستفيد من كل دا 

فايدته ايه ؟ 

ليه العقاب دا كله 

ليه  الالم اد كله 

امتي هينتهي كل دا ؟ 

امتي هيخلص او حياتي ترجع لطبيعتها 

امتي هلاقيها او تكون موجودة ؟ 

امتي هتديني فرصة اتكلم او تحس بيا وتصدقني ؟

امتي هيبقي في فرصه 

امتي هعيش من تاني 

عقلي هيشت من التفكير وفي نفس الوقت لازم اتحرك لقدام 

طيب ازاي ازاي ازاي ازاي ازاي 

طيب يارب انت العالم بحالي 

يارب انت العالم بتعبي محدش مصدقني غيرك 

يارب انت اللي حاسس بيا وفاهمني 

يارب انجدني النجدة من عندك

يارب حرك قلوب الناس 

يارب طمن قلبي وهون عليا 

يارب ابعتها وردها علي خير 

يارب والله تعبت

يارب انا بتنفس حتي النفس بصعوبة 

يارب مفيش صاحب ولا اهل ولا اي حد جنبي ولا حتي حد بيكلمني وطول اليوم لوحدي 

يارب انجدني وساعدني 

يارب اديني فرصه واحدة يارب قولي ايهممكن يحصل يغير اي حاجة 

يارب وريني طريق 

يارب ارشدني وساعدني ونور طريقي 

يارب وريني اعمل ايه يخليني اعرف حتي اتكلم واعدل اي حاجة

يارب انت العالم بيا وبحالي يارب 

يارب  يارب يارب اجمعني بيها زي ما جمعتنا قبل كدا كتير 

يارب ردنا لبعض 

يارب ساعدني ووريني الطريق  وساعدني وانا هعمل كل حاجة عشان احافظ عليها يارب 

يارب ابعتلي اللي يساعدني 

يارب وريني الطريق 

يارب 

ادراك للحقيقة

 من فتره شفت فيديوهات علي اليوتيوب والفيس بوك من حوالي خمس شهور كان الزوج والزوجة بيسالوا بعض في حالة الانفصال هتاخد ايه من البيت معاك ، وكان في ناس بتقول مقدرش اعيش من غيرك هاخدك معايا وفي ناس بتقول مستحيل يحصل وانا ياريتني روحت معاها 

…..

الحقيقة ان مش زي ما كنت بقول كل حاجة هنا تخصني وتعبي وشقايا ولازم تتقدر قيمتها ، الحقيقة ان مفيش اي شيء هنا يخصني نهائي كلها حاجاتها كلها حتي جدران البيت حتي كل ذرة هوا فالبيت بس انا كنت حمار ، ياريتني اعترفت بدا بدري ياريتني قلت لها دا في الوقت اللي ينفع فيه يتقال ياريتني عرفتها دا ان كل حاجة تخصها وبتاعتها هي واني هنا مجرد ضيف تقيل ، بالمودة والرحمة والحب ببقي ضيف خفيف ، لكني للاسف فكرت بشكل مختلف وكانت غلطتي اني سمعت غلط لناس كتير غلط وسيبت عقلي يحدف بس كنت واثق من الطرف التاني انه هيمسك فيا ويتمسك بيا ويعقلني ويستحملني حتي وانا بتعبه، انا مخرجتش النهارده ومعملتش حاجات كتير غير انترفيو وشوية تنضيف البيت كله وشوية غسيل وخلاص ولما عملت شوبينج وانا جاي فكرت اني وحشني ارجع بالشوبينج للبيت واقعد اهزر واشتري حاجة بسيطة واقعد اقولها دي هديه ومفاجاة ، وحشني وجودها جدا ومرحها وضحكها وحبها وحشتني هي كشخص يستاهل فعلا حتي لو جارحني مسيره يفهم ويحس بيا .

…………

قلبي مليان دايما كلام حلو وكان مليان بس الظروف والصعوبات والضغوط بتاع الحياه كانت كاتمان ، فاكر زمان لما كنت بقولها بحبك كل شوية واقولها عشان لو جه يوم مش قدامي ومش عارف اقولهالك ابقي قلتهالك وقلت كل اللي في نفسي . انا محتاج اتغدي واقعد ارتب افكاري تاني ، وحشني اطبخلها وبطلت اطبخ اساسا واعمل اكل حلو واستكشف ، وحشني كتير اوي والله حاجات كتير 

كان في جملة بصدق فيها بتقول ليس في الادراك اي نبل ، لان لو مصاحبهوش فعل مش هيبقي له لزمة بس انا فعليا مدرك من زمان من ساعه ما هي مشيت والله بس المشكلة كلها اني عملت كل الافعال وبلا نتيجة ، لعل الله يحدث بعد ذلك أمرا 

لسه عمال افتكر اغنية انغام والميكروباص و هي بتقول ( وساعتها هسامحك ياحبيبي ما انا لازم اسامحك ياحبيبي ، بقي يخلصني انك تيجي وترجع مكسوف ؟)  ياااه والله كان يوم حلو في كل حاجة

ربنا يطمن قلبي ويشفيني وابقي احسن وكله يبقي احسن واحسن

أشياء بسيطة لتصنع بيتا

 ضحكات في الصباح مع كوب القهوة 

قبلة علي وجنتيها حين تفتح عيناها وعلي راسها حين تغمضهما مساءا

ابتسامتها قبل الخروج من المنزل  

ضحكاتها حين العودة الي المنزل وتحذيرات هزلية لمجرد الضحك

مشاغبة اثناء اليوم وتنافس علي اشياء بسيطة

شجار مساءا علي الغطاء والضحك بدون توقف حين الدغدغة كالاطفال 

الجلوس لمشاهدة شيء من الماضي سويا 

اي شيء تفعله وافعله بمحبة او غضب او حين احنو وتحنو علي 

التسامح الفوري والرحمة والغفوان دوما 

الضحكة بعد غضب شديد والابتسامة بعد خصام 

——-

حاجات بسيطة في المطبخ زي علبه الموزلي و علبة النشا و اللب وحاجات حتي لو مبنسعملهاش بس حابينها بتحسسنا ان في حاجة بتحصل او بنعملها ، 

وقبل كل ذلك واولا وآخرا 

هي من تصنع البيت

She really makes it home.

المودة والرحمة والحنية والطيبة والتفاهم والدفا والاهتمام والسؤال والرضا والحب والحلم والنقاش والحلم تاني والصبر والتغافل والتراحم ونسيان غلطات الماضي  

————

النهارده نضفت البيت كله والمطبخ والحمام وكل حاجة ، العند هوا اللي كان بيخلي اي شيء تقيل ، مش العمايل ، ودي ملاحظة لازم متتنسيش برغم اني نسيتها بس معلش يا كيمو  

المفروض اني ابطل اعدي يوم بيوم بس حاليا بحاول اتعافي واطرد كل الافكار ولازم اعمل اعمال بسيطة تساعدني زي اللي عملته النهارده ولسه هخرج ولسه هطبخ ولسه هتمشي ، خير ان شاء الله 

واديني مظبط كل حاجة اهوه مفيش داعي لاي قلق 

في كل شوية لما بفكر في اي حاجة بشكل معين بتطلع النغزه في قلبي ، اتمني دا يخف مع الوقت واتمني كل حاجة تبقي احسن واحسن