الصبغة

النهارده كان يوم صعب وطويل بس في انجاز برده 

كان نفسي اوي اكون موجد جنبي امي في تعبها

بس للاسف معادش ينفع لا نزول ولا اني اكون موجود بنفسي 

شيء متعب وبيقبض روحي احساس الحبسة  هنا في المانيا وانا بعيد عنها ومش عارف اعملها حاجة 

النهارده مثلا كان يوم الاشعه عشان يعرفوا حاجات تخص القسطرة والدعامات

وبعد انتظار طول اليوم في المركز مكانش ينفع انها تعمل الاشعه ومش عارف هيجري لها ايه ولازم تعمل العملية قريب 

وبرغم كدا كملت مذاكرة  و تجهيز اسكريت وتصوير عشان الحلقة الجديدة عاليوتيوب 

احساس بالحبس واني مش عارف انزل حاجة مخلياني فعليا عايز اكمل في قراري باني اسيب البلد وامشي وشكل دا اللي هكمل فيه فعلا قريب اوي  

هي ليه الحياة مش بسيطة ؟ ليه الحياة معقدة للدرجة دي ؟ 

زمان كنت بفكر ان المانيا مثلا اللي صعبه بس قدرت الاقي حل لمشاكلي فيها لكن دلوقتي بقت نظرتي للحياة نفسها 

يمكن محتاج اقعد اقرا فالمدونة شوية وافتكر كنت بفكر ازاي في ظروف المرض والموت

يمكن بعد وفاة بابا ووفاة ناس كتير بحبها او يمكن معايشتي لسنين مرض والدي غيرتني 

بس انا بقيت شخص متعاطف ويمكن دا اكبر اذي وخير وصلي من الموت والمرض اني بقيت بتعاطف مع كل الناس كلها فما بالك بحد هوا السبب في اني عايش اصلا 

من حوالي اربع ايام  قبل تعب امي بيوم تقريبا كنت بفكر انزل مصر زياره سريعه  

بس معادش ينفع نزول خلاص

انا معنديش باور اكتب ولا عندي باور اقعد بصراحة تعب روحي قوي جدا للدرجة اللي مخلياني مش قادر افكر حتي 

ومن غير قفلة للبوست بس احلام سعيده يا كيمو  

كل اللي يجيبه ربنا كويس 

آمنت بيك يارب وسلمت حالي وحياتي بين ايديك كالعادة 

يارب 

The next screen

 

Just for recording the moment …

يارب ينجيكي يا أمي

من كام شهر حصل لامي جلطة ومعرفتش غير بعدها بتلات اسابيع دا كان في فبراير تحديدا 

وساعتها قبل ما اعرف الخبر من اي حد 

حسيت ان في حاجة غلط وكلمت اخواتي  وقعدت اسال لحد ما عرفت 

لحد ما خليتهم يقولوا حصل ايه احساسي لوحده كان كفاية اني اعرف 

امي هي اللي زرعت كل حاجة حلوة فيا ، الحنية والحب والرحمة والتعاطف وان قلبي يبقي علي الغير ويصعب عليا الناس واشاركهم همومهم واسندهم واقف جنبهم 

امي هي مصدر كل الخير في حياتي بكل شكل ، مفيش يوم الا وكانت جنبي فيه وبتدعمني وساعدتني مليون مرة

امي اللي معرفش لو هي مش موجودة هعمل ايه في الدنيا من شدة حبي ليها

امبارح وصلي الخبر متاخر للاسف 

ان امي دراعها وجعها و وقف خالص وان هما خدوها عالمستشفي ، وبلغوني علي النت بس للاسف كنت غير متاح ومعرفتش الخبر و موصلنيش غير بعد ما كتبت البوست بتاع امبارح 

فجاة كل حاجة مبقتش في مكانها 

امي اللي وجودها بينور قلبي كالف شمس بتشرق علي ارض ميتة فتحييها 

عيانة ومريضة بالقلب من فترة طويلة 

 وحاليا محتاجة قسطرة ودعامات عالقلب 

انا مش عارف تحديدا اوصف مشاعري عشان يمكن دي حالتي الفترة دي مببقاش عارف حاسس بايه بس ببقي عارف انا كويس ولا لا ،  وبحاول اميز مشاعري في كل تعامل مع الناس  وبنجح الحمد لله 

لكن من ساعة اللي حصل امبارح وانا خلاص كله اتلخبط واتبرجل ، طيب انزلها مصر …؟ ولا احاول بفلوس النزول اتصرف وابعتها تساعد في الموضوع ؟ طيب اكلمها ؟ ولا بلاش عشان قلبي اللي بيتعصر دا 

فجاة بعد ما كنت حسيت اني كويس وعايش فجاة بيحصل حاجة زي دي تعصر قلبي 

انا هحاول اعمل اي حاجة عشان تبقي بخير والله يا امي 

مفيش في ايدي غير الدعا والافكار عماله تلف في دماغي ، امبارح كل حاجة راحت من عقلي ومتبقاش غير احساسي بالعجز والالم ، لكن مفيش حد يقدر يعمل حاجة مع المرض ولا حد يقدر يعمل حاجة مع شبح الموت وهوا بيخيم علي حبايبنا  ربنا يحميها ويبعدها يارب عن كل شر ويبارك في صحتها وعمرها 

وانا كنت حاسس والله ومستغرب تعبها وقلقها وحاسس بيها من قبلها بيوم واتنين

الحمد لله علي كل حال ويارب يشفيها وميكسرنيش فيها 

هي اللي ساند عليها في الدنيا دلوقتي وعايش ببركتها وبركة دعاها 

مش عارف اقول او اكتب ايه

مش عارف هي هتستحمل العملية ولا لا ولا حتي ممكن يحصلها حاجة ولا لا يارب يبعد عنها كل شر 

هفكر نفسي ان ربنا هيحميها ومش هيوريني فيها حاجة وحشة وانه هيساعدني اتصرف في كل اللي بيحصلي فالشغل والحياة واني هقدر اتصرف واقف علي رجليا واساعدها واعملها كل العمليات اللي تخليها كويسة

امي بالدنيا واهم من الدنيا 

خلاص كلامي خلص ومعدتش قادر اكتب تاني النهارده ومش هكمل حاجة في البوست دا 

هروح اشتغل علي مشاريعي واحاول اظهر هادي وكويس وبخير عشان مشاريعي تنجح 

امبارح انجزت في اكتر من حاجة وخططت كويس وظبطت الدنيا بس برده لسه متأخر في اتنين بروجكت منهم 

ولسه برده مخلصتش اهم تاسكات عندي 

خير هلحق اخلص كله النهارده

ممكن ابقي اشوف بقي هبقي اعمل ايه بس الحمد لله لحد دلوقتي التحديد حلو والتارجت حلو

ربنا ينجيكي يا امي 

ولحد البوست الجاي

كل السلام والمحبة والأمان 

كريم 

كريم بيكتب من جديد

 

الحمد لله هوب رجعنا ليكم 

الحمد لله اني لسه بحب اكتب ويمكن دي اكتر هواية بتوحشني فعليا 

هحاول متكلمش كتير في اول بوست بعد رجوعي للتدوين 

لكن فعليا هلكان وتعبان اوي النهارده الصداع مش عارف بيعمل في دماغي كدا ليه 

زمان لما كنت بكتب نص بوست كنت بقول هكمله بكره وبرجع اكمله

ودلوقتي للاسف لازم انام من التعب والصداع 

بس الفترة دي علي قد الضغط من الشغل والحياة والمذاكرة وحاجات متواصلة 

بس يعتبر اكتر فتره اصفي فيها ذهني وعقلي واستريح  واكتشف نفسي ويومي وهواياتي 

والاهم هوا النوم بصراحة بس هنرجع للنقطه دي

 تكملة بتاريخ اليوم : ٢٩ اكتوبر 

النهارده السبت والحمد لله اجازة وصداع امبارح اختفي ، مبقتش بعاني من الصداع النفسي زي قبل كدا والحمد لله 

نكمل موضوعنا بقي 

رجعت للتدوين من تاني 

ورجعت لاشياء كتير بحبها وحاجات كتير كنت مفتقدها لاني مكانش عندي وقت نهائي قبل كدا 

مكانش عندي وقت اقعد ابص في الشمس ساعة العصر زي دلوقتي ولا اكتب بوست واعمله تكملة زي دلوقتي ولا حتي انزل اتمشي وابص للشجر بيرقص مع نفسه كدا فالهوا ولا انزل اغلس علي الشتاء واتحداه بدفا جسمي وايديا اللي بتشع نار 

كل دا كان بيتعمل صدفة 

دلوقتي بقيت اعمله بوقته وانا مبسوط وانا براقب الحياة والدنيا 

حصلت احداث وتفاصيل كثيرة جدا من اخر بوست كتبته والفترة اللي فاتت برده 

وبما إني بصدق في موضوع الامتحان والصراحة والرد بكلمة واحدة فهطبقه علي نفسي 😂😂😂

اصل الموضوع مع حلقة من حلقات مسلسلي المفضل لما كلارا اتحطت في اختبار انها لازم تقول الصراحة وترد بكلمة واحدة علي كل سؤال لان كتر الكلام معناه كدب 

فنجحت الحمد لله 😀

***

- ليه رجعت للتدوين ؟

- وحشني

- انت كويس ؟ 

- شوية

- بتكتب هنا ليه ؟ 

- بيريحني

- ايه هدفك الحالي في الحياة ؟ 

- أمان

*** 

مفيش في دماغي اسئلة تانية عشان اجاوبها

اول امبارح يوم سبعه وعشرين كانت اعصابي هادية ومستقرة وبكل خير حرفيا مش منهار ولا متدمر ولا حزين ولا مكسور 

كنت في حالة استقرار كويسة 

وساعتها بس اخدت قرار و نفذته و عملت كل حاجة في طاقتي  عشان استعيد حياتي من تاني ومجابش فايدة ولا كان في حاجة عملتها لها قيمة

كان نفسي فعليا ابني حياتي من جديد ونعيش سعدا والتفاهم مقدور عليه 

عشان ملومش نفسي مستقبلا علي اي شيء وعشان ابقي عملت كل اللي في ايدي ومش في ايدي ودوست علي نفسي واتبلغت حرفيا اني ممنوع من التواصل مع شخصيات معينة وممنوع حتي احاول اوصلهم  باي شكل 

وطبعا مينفعش اخون الشخص اللي قالي كدا فدا يعتبر اخر ما كان في ايدي 

 عشان مقولش كان في فرصة و كان في ايدي وكان ممكن اعمل واعمل وألحق حياتي اللي كانت بتضيع ، عشان يمكن اي حد يعرفني يعرف اني بحارب نفسي كتير وبفكر في الشيء مليون مرة

المرة دي كان هدفي  غير اني استعيد حياتي واني فعليا مش عايز اخسر انسانة حبيتها اني حتي لو مر وقت او حصل اي خسارة باي شكل ابقي عملت اللي عليا وحاربت لحد اخر نفس عشان مندمش ولا الوم نفسي ولا احس اني كان في فرصة وانا مستغليتهاش 

لكن قدر الله وما شاء فعل 

عارف الموضوع عامل زي ما تمسك قايمة احتمالات وتنفذها كلها عشان ميبقاش في احتمال متبقي في ايدك  عشان ميبقاش في حاجة كانت تتعمل ومتعملتش 

الحمد لله علي كل حال ودا قضاء ربنا ولازم ارضي بيه

***

وبسجل دا في المدونة في بوست مميز كحدث مميز لأنه كان يوم مميز فعليا في كل شيء وفرق معايا في شخصيتي ونظرتي للحياة ونفسي وازاي عايز اعيش بعد كدا وايه اولوياتي وايه اللي عايز اعمله وهوصله ازاي 

امبارح قبل ما انام بحبة حلوين كلمت محمد وكانت مكالمة حلوة ساعدتني احدد اولوياتي في الشغل وهتخليني افكر في موضوع السفر دا 😀

صحيح امبارح فتحت الفيس بوك ودي حاجة لطيفة طول ما هي تحت السيطرة ومش بتحرق وقت واعصاب والحمد لله كل شيء في مكانه

برغم ان الفيس بوك مدمر للتركيز والنفسية ولكنه له قيمة برده في التواصل مع ناس كتير بنحترمهم بصراحة 

لكن كانت فترة لطيفة اتعلمت فيها اساسيات لغتين وابتديت فيهم وحققت نجاحات كتير جدا وقريت كتب وقربت من ربنا ، تقريبا مفيش حاجة حلوة معملتهاش ومفيش نجاح الا ووصلتله 

وقدرت اعيش مع نفسي ولوحدي بدون اي حد خالص ودا يعتبر اهم واعظم انجاز  

انا مش عارف اوصف شعوري بنفسي لكن الغالب هوا اني الحمد لله عايش 😊

مش هقعد بقي اعمل افلام وانا سعيد وبطير في الجو اعمل سحب هنا وسرور 😂😂😂 لاكتر من سبب و اولهم اني مبحبش اكدب وثانيا لان انا اتعودت اكتب هنا الحقيقة ولا شيء غير الحقيقة وثالثهم عشان فعلا دا هدف انا شغال عليه والنجاحات العملية كلها حلوة لكن السعادة والرضا شيء كبير ومهم ومينفعش يتزور بكلمة او بوست او حوارات ملهاش قيمة

واني عايز اولادي في يوم من الايام يدخلوا هنا ويقروا زي ما كان وليد صاحبي بيكلمني ويحكي لي انه طول الوقت عمال يكتب سيرته الذاتيه كلها حرف حرف عشان ولاده يبقوا يقروها لما يحبوا يوصلوا له 

فعشان كدا مش هنكتب اوهام 

لكن الحمد لله 

دي اهم حاجة تتقال دايما 

و

لحد البوست الجاي 

كل السلام والمحبة 

كريم 

#اعادة_افتتاح_المدونة

Ok , will be done

وكل ما يمكن تنفيذه سينفذ
وكل اللي في طاقتي عشان اليوم دا يعدي وابقي متطمن
وكل ما يمكن عمله عشان اي حد يهمني يبقي كويس هعمله
مهما كان هعمله والله
اهلي والناس اللي بضمهم تحت الكلمة  دي
والامان كل الامان للدنيا كلها وفعا نا تقريبا بشوف احلام مرعبة بس حاضر هحمي نفسي وغيري من القلق والخوف والله
هحارب حتي لو نفسي وهنفذ كل شيء يمنع القلق دا والله
نهارك زي الزفت علي دماغك يا كيمو