البعو و أبو رجل مسلوخة

- إنت عايزنا نتنفي ؟ نسيت البعو وأبو رجل مسلوخة ؟ عايزنا نروح أرض الضياع ؟
هكذا تحدث مارد وشوشني 
طول العمر اللى فات بفكر فى إن اللى بيسافر بيبقى مجبر وإن الظروف بتاعته وحشة وإن لازم يطور نفسه ويسعي ويستحمل ياعيني العيشة برا ويضغط علي مشاعره وأعصابه ويضحي ويسافر برا 
متأكد إني كنت طيب وعبيط لما كنت بفكر بالشكل دا 
متأكد كمان إني مش عايز أوجه كلامي لحد ولا أتخيل وأسرح بخيالي وأقعد أتخيل إني بحكي الكلام دا كله لحد عشان يبقى ليا نفس أكتب 
بإختصار أنا مليش نفس أكتب ولا حتي أعيش 

***

سمعت بنصيحة واحد صاحبي لما قالى إحتياجاتك الأول وبعد كدا الطموح والأحلام , لازم تسد إحتياجاتك الأول وبناء علي هذا الكلام الجبار إبتديت مشروع إمكانياته صفر وراس مالي فيه ولا حاجة والحمد لله المشروع ماشي 
كل ما أبص لنفسي فى المشروع دا أحس إني بكرهني وإني فعلا إنسان غلط ...
كتر التعامل مع الناس بياكل آدميتك شوية بشوية 
من كتر ما بتشوف قرف الخلق , كل واحد معندوش أدني إستعداد لأنه يقولك كلمة حلوة أو حتي يعاملك بأسلوب كويس :)
كتر الرفض اللى بشوفه فى مشروعي بيخليني أحلف مليون يمين إني هطلع من التجربة دي عضمي فولاذ  وجاهز لأي مصايب وعقبات أقابلها فى السكة 

****

كتر التفكير مبقاش حلو بالنسبة لى 
لأني إكتشفت إني بفكر بعبط 
وبتصرف بأسلوب طيب وعبيط برده 
أنا فعلا لازم أنسحب من حياة ناس كتير أوي 

****

إمبارح قعدت أحكي لأعز صحابي وأقولها يابنتي إتعبي عشان تتعبي أكتر 
عمال بشجعها وأحمسها وأرسم على وشها إبتسامة حلوة لدرجة إنها أول ما قعدنا كانت مكتئبة بس فى الاخر كانت عمالة تقلش خمسين قلشة فى الثانية ومبتسمة 
بقى بيعجبني تأثيري فى حياة الناس 
خليت واحد صاحبي يبطل سجاير زي ما بطلت 
وخليت صاحبتي تبتسم وتطلع من كآبتها إمبارح 
انا فعلا تأثيري كويس جدا :)
بس خلينا نتناسي النقطة العبيطة دي ونفكر فى الأهم 
ليه أصلا تتعب ؟؟؟ ليه ؟ هل عشان عايز حاجة ؟ ليه برده عايز الحاجة او الحد المعين دا ؟
ليه تتعب اصلا فى حين انك ممكن تنتحر وتبطل تعيش وساعتها هتتخلص من الحياة المقرفة والمجتمع الوسخ دا 
أو حتي ليه تتعب نفسيا ؟ ما تسيب كل حاجة وتمشي وتسافر بعيد عن كل القرف دا ؟
ليه تعيش مع بشر بالجسد بس وقلوبهم وعقولهم أوسخ وأحقر من الضباع ؟
خلاصة كلامي معاها إمبارح وخلاصة مشروعي وتعبي إمبارح وخلاصة مشاكل النهارده بتقول حاجة واحدة 
البعو وأبو رجل مسلوخة مراحوش المنفي مجبورين ومطرودين يا مارد 
دول راحوا عشان يخلصوا من القرف اللى إحنا عايشين فيه 
عشان فى المنفي هتبقى سعيد بجد 
إحنا فعلا محتاجين نحفر نفق ونهرب من البلد دي 
:(

سجليني غياب

عزيزتي 
الكدب حلو 
حتي لو كان خيبة وملوش رجلين بس حلو أحيانا
أنا بعرف أكدب كويس وإنتي عارفة دا بس يشهد ربنا إني مبكدبش ولا بقدر أعيش فى كدب لأني بسمي كل حاجة بإسمها وبحاول أشوف جوهر الأشياء دايما
- من أسبوع تقريبا حضرت session عن إزاى تملي ال C.V بإنجازاتك وإنك شاركت فى حاجات كتير وكدا وفجأت إفتكرتك وإفتكرت إنك اللى تعرفي كتير فى الموضوع دا وإنتي الوحيدة اللى تقدري تساعديني , وتخيلتك كصديقة عارفة حدودها بتساعد صديق عارف حدوده كويس وبتشجعه زي ما الصديق دا كان بيعمل زمان من سنين  , إفتكرت أيام ما كنتي بتكبري وبحتفل كل يوم بنجاحاتك والنهارده للأسف أنا محتاج مساعدة لكني يا عزيزتي إتعودت على إني أقسي علي نفسي زي ما بتعملي , إتعلمت منك دا ورفضت أطلب منك مساعدة , تخيلي ؟؟ -
النهارده أنا غياب 
سجليني فى دفاترك إني غياب 
النهارده بكيت أكثر مما يجب 
بكيت أكتر مما بكيت فى سنة بحالها 
إفتكرت حاجات وعشت حاجات و لاحظت إني خسرت بدون ما أخد بالى حاجات أكتر 
النهارده أنا اللى عايش فى إكتئاب وحالتى النفسية صعبة علي غير العادة 
النهارده فعلا حاسس إني عجوز جدا 
حاسس إن فى عمر جري من بين إيديا بدون ما أخد بالي 
النهارده أنا بقولك سجليني غياب وبتمني تفهمي ليه وتحسي بدون كلام ولا شرح ولا أي حاجة فى أي حاجة وبدون سبب بكتب ...
أعز صحابي مر بأسوأ الظروف الحياتيه وهوا وفاة والده ودا أسوأ ظرف فى حياته وأنا مش عارف أعمل إيه ؟ ولا أكون جنبه إزاي وأنا فى حالتي دي ...
بدعيله وبحاول بكل طاقتي أبقى موجود 
صديقتي أو ما تبقى منك ...
زميلة الرحلة ..
رفيقة الدرب اللى كنتي هنا يوماً ما .
سنو
هل ياتري يستحق غلط الناس اللى بنحبهم العقاب الأبدي ؟؟
أنا هروح أتفرج علي فيديو عبيط وأعيط جنبيه لحد ما أفوق
 وأرجع شرس بجنون 
لحد ما أفوق وأقوم من وقعتي دي 
بس ياتري هفوق إمتي ؟؟ مش عارف :(
فعلا سجايري كانت هتنفع فى الوقت دا 
بس أنا فعلا مبطل بقالي تلات شهور :(
هروح أنام 
تصبحي علي خير 



** الصورة من الفيديو دا 

وداع وحضن بضمير

عارفين إحساس إنك تبقى واقع فى بير والبير كل شوية عمقه بيزيد وبيبقى النور بعد ما كان دايرة كبيرة فوق بقى مجرد نقطة وانت باصص من قاع البير لفوق 
ياتري ليه الاحساس دا بيجي لي ؟
هتكلم عني ومليش دعوة بحد 
كل الأمور العالقة جوايا 
المتعلقة فى الزمن وكأنها إنكتب لها المعاناة كلحظة ألم وإحساس يعيش ليوم الدين
كل الناس اللى طلعوا يجروا وهربوا واللى مخدوش بالهم مننا 
كل الناس دي كانوا عاملين زي أسوار بتتبني وبتخلي البير أعمق 
بتحس إنك بينك وبين النور ألف مليون سكة 
بتسأل نفسك هوا إزاي أنا أصلا هقدر أتسلق وأطلع من دا كله 
وبتفقد الأمل وبتتأقلم مع السجن وتحبه وتمسك فيه وتحاول تعيش من خلال إنك تلمح حتي النور من بعيد أو إنك تعيش تلمس الجدران وتفتكر الذكرى وتعيش لها 
من فترة فى بنت مهيسة خالص ومش شخصية وبالنسبة لى أفاقة عظيمة هنرمز لها بالحرف الأول (G )
البنت دي مرت بحادث قدام عيوني 
أنا كل اللى عملته إني وقفت أتفرج ومأخدتش موقف 
البنت فجأة بقت بعد ما كنت لا مبالية وقاسية وجبارة 
بقت واقعة فى دايرة الحزن 
والدايرة بدا يطلع لها أسوار لأنها مسمحتش لحد يقرب منها 
وكل شوية وكل لحظة بيتحول الدايرة اللى رسمتها حواليها لأسطوانة بتكبر جدرانها 
وبعدين الأسطوانة بتطول جدرانها أكتر وبتتحول لبير 
ياتري إيه اللى عمل كدا ؟
هي فجأة بقت حساسة وبتتألم بجنون , لدرجة إن إنسان زيي بيتخنق من مجرد سيرتها بقت صعبانة عليا وعايز أتصل بيها وأقولها تعالى أطبطب عليكي وبقي نفسي أقابلها فى الشارع عشان أحضنها وأطمنها 
آه والله 
بالظبط كدا 
هي اللى قامت ببناء الأسوار دي 
هي اللى حطمت فى نفسها بكل شكل تحت حجة إنها قوية 
ودلوقتى بتتغابي علي نفسها وبتعمل نفس الحاجات اللى كانت بتتريق عليها لما حد من الناس المنهارين يعملها
يمكن اللى هي فيه دا لنفس السبب اللى أنا واقع فيه فى البير 
إني مقدرتش أحضن اللى بحبهم أوي وأقولهم قد إيه أنا بحبهم 
وإني مقدرتش أقف فى لحظة وداع تحت المطر وأبكي زي ما عملت قبل كدا من سنين 
ولا إني قدرت فى لحظة أجمع شتات أفكاري وأنطق الكلام بدون ما يبان عليا إني بسمع الكلام وبردد كلام حافظه 
وأقول بكل بساطة بحبكم 
يمكن لأني موقفتش لحظة الوداع زي الأسد وقلت كلمتين من القلب وداريت دموعي 
كان نفسي فى لحظة وداع ملحمية 
يمكن هي فعلا حكاية ( الخاتمة ) اللى بسمع عنها علي طول فى الأفلام الأجنبي 
إن البطل كان محتاج Closure زي ما بيقولوا
مش عارف 
يمكن هوا دا السور 
إني ملحقتش أخد الحضن 
إني ضمنت إن فى عيد جاي هنقضية سوا ونستمتع ونفرح 
إني قلت إن النهار هيطلع وهاخد حضن كبير 
إني أقنعت نفسي إننا هنتقابل تاني 

كان نفسي فى حضن أخير وخاتمة من بعض الناس 
كان نفسي أقف وأقول كلمة فى الجنازة زي ما عملت بعد ما وقفت قدام تورتة عيد ميلادي وكلمتهم عن سر خطير 
كان نفسي أبتسم ساعة الوداع وعيوني مليانة دموع وأبقى علي يقين تام إن دي المرة الأخيرة اللى هقف فيها فى المكان دا قدام نفس الشخصية 
بس الحمد لله إني إتعلمت الدرس 
يارب جدران البير متكبرش ومحسش إني محبوس أكتر من كدا جوا كل حاجة حلوة فاتت 
الوداع فعلا بيفرق كتير أوي أوي أوي ....

P.S:

 "Every Christmas is last Christmas"

شاب فقري

وعبرت للنصف الآخر

وكبرت سنة 
وبقيت فى النص التاني من عمري 
طبقا لحساباتي السابقة فانا هنتحر قبل تسع سنين وقبل ما اكمل الخمسة وتلاتين بيوم 
لكني حاليا نحيت الحسابات السابقة وقررت اخوض التجربة للاخر 
وليحدث ما يحدث 
المرة دي احتفلت بعيد ميلادي وسعادتي كانت لا توصف 
يمكن للمرة الأولي من سنين طويلة أوي أو يمكن دي فعلا أول مرة فى حياتي أبكي من الفرح 
يمكن علي رأي أقرب الناس ليا هوا دا فعلا العيد ميلاد اللى عوض كل الأعياد اللى فاتت كلها كلها ويمكن دا فعلا أحلي وأروع عيد ميلاد فى حياتي . :)
مش هسأل ليه البكا بيصاحب حالاتنا النادرة زي الحزن والفرح لكني هفرح إني روحي مرتاحة بجد
مش عارف أعبر إزاي 
مش عارف أوصف 
لكني سعيد باللى وصلت له 
الوقت اللى فات من عمري إتعلمت فيه كتير ويمكن ألفين وأربعتاشر أكتر سنة تعبتني وطلعت عيني 
:D
لكن كسبت فيها أجدع صحاب 
كسبت فيها نفسي 
كسبت فيها اللى كنت بحسه وبشوفه كل ليلة فى ساعتين نوم كنت بحس انى بسافر الدنيا دي كلها باحلامي 
العزلة عاملة زي الموس اللى بيبري القلم الرصاص اللى هوا احساسك 
بتخليه حاد وقوي وبتتعبك لكن بعدها بتبقى إنسان مختلف 
بحلم بإيه ؟
ياتري لسه أصلا فى دماغي كل اللى فات ؟
ياتري لسه فاكر البنت العصفورة ؟
طيب و و و و و 

إنجازاتي المرحلة السابقة إني :
خلصت جيش كراجل مش كعيل وسخ زي ناس زمايل قرفت منهم
بطلت سجاير بقالى شهر ونص تقريبا ودا إنجاز عالمي :D
عرفت مين معايا ومين ضدي بكل بساطة 
كسبت أحلي العلاقات فى الدنيا 
إنتقمت من أوسخ ناس فى حياتي :D أو أصروا أنهم يدوروا فى حياتي :D
ومازلت عند إعتقادي ومبدئي إنك تسيب الوحش هوا اللى هيأذي نفسه بنفسه :D
يعني بمعني أصح معملتش أي حاجة لكن الإنتقام إتحقق

***

لسه بفتكر البنت اللى شعرها طويل واللى كانت بتجنني برقصها والبنت اللى بحس انى خيالي ملوش حدود وانا واقف معاها 
والبنت اللى بحب حكيها وحزمها وجنانها وهزارها والبنت اللى مفيش منها إتنين والبنت اللى بحبها والبنت اللى هتبقى أم عيالي :D
وهكذا :)
لسه بفتكر كل الملامح الحلوة لكل العلاقات الجميلة اللى مريت عليها فى حياتي 
يمكن فى الآخر الواحد لازم يتخلي عن أي إحساس أو فكرة أو ذكري وحشة ويرميها فى الزبالة مع بعض الناس الزبالة :D
الحمد لله علي كل حال 
كام نقطة بس عايز أوضحهمأو نقدر نقول أخليهم غامضين أكتر شوية :) عشان الذكاء دا نسب فى البني آدم :)  :D

***

 أولا : مبنساش :)

***

 ثانيا :
- يا ولدي إذا نويت الرحيل فإحمل وطنك وأحبتك داخل قلبك وأرحل , فكل أرض تنبت بالحب والشوق والحنين يا ولدي وطن 

***

 ثالثا : 
عزيزتي :)
 
#أمان :)

***

رابعا :
من فترةكنت قاعد بتكلم مع شخصية هامة فى حياتي فكانت بتسألني وبتقولي : تفتكر هتنجح ؟
قعدت أضحك أوي وصوت الضحك خلي اللى حوالينا يستغربوا ويقولوا الواد اتجنن 
قلت : أكيد دي تربيتي و ... ببساطة كدا دي التانية ولو فاكرة الأولي مكانش زمانك بتسألي هذا السؤال :D
أنا فاكر ساعتها إني قلت أحا :D

 ***

 رابعا بقى :
أستااااااااااااااااااااااااااااااااااااااذ وبشهادة الكل أنا مجواييش نية إنتقام 
لكن يا ولدي إنها العدالة الإلهية 
لما العدالة الإلهية تجيبلك حقك 
بتبقى واقف تقول الله يا سلام زي علي ربيع :D
بنقل بعض القطع علي لوحة الشطرنج وبتفرج فى صمت :D
وبس خلاص :D

****

هاشتاجات :
#عيد_ميلادي
 #هي
#حرية
#أمان
#نجاح
#سجاير
#الحمد_لله
#Father 
#سعيد
#أحا
#إلبس_يانونو
#هابي
#حط_عليهم
#كله_بحسابه
#سر
#:P
#لأنك_دايما_هنا
#حبك

سويت دريم

كانت ليلة حلوة وحلم أحلي 
ويمكن كانت هتبقى أحلي بكتير لو مكانتش حلم طبعا 
حلم إمبارح بعد البوست الكئيب إعتبرته طبطبه 
بس من مين ؟
منك ولا عقلي اللي أشفق عليا ؟
مش عارف 
بس مبسوط إني حلمت بيكي من جديد
#للتوثيق
#سنة_جديدة
#الباب_المفتوح

شاب فقري