ليلة العيد يا حبيبتي

حبيبتي الحبيبة وعزيزتي العزيزة ... إيه دا ؟؟؟ متنفعش مفتتح ؟
طويب ..
عزيزتي : ... إيه عزيزتي دي ؟؟؟ شكلي زي اللى بيكتب جواب لخالته :(
طويب ماشي 
الرائعة دائما وأبدا وال...  فيها مبالغة ؟؟؟ صح ؟؟ مش هتصدق طبعا 
طووووووويب 
أنتِ ... هبتدي الجواب بكسره ونحوية ؟؟ كدا فال وحش وكمان ممكن تقول الكلام مش عليا
نجيب من الآخر ... طييييييييب كويس جدا 
حبيبتي ... هتشك فى حضرتي 
إشطا جدا 
ماي  **** , ماي سوبر **** , ياعاشقة الورد , يا سنو ....
حبيبتي شرطة مايلة فراغ ...
(( بيتهيألي كدا مظبوط بقى وأركز في الجواب :D ))

بعد التحية والسلام والأشواق والأفكار والكلمات العابرة لكل السنين الضوئية التي تفصلنا , بعد عبور الشوق لإستحالة اللقاء وبعد هجرة الحزن من بين السطور , وبعد ما قلبي مشتاق (( مع إن مشتاق بعتبرها إبتذال أحيانا بس مفيش مشكلة عديها يعني :D )) , بعد كل حاجة حلوة ببعتها لك وبعد كل صعاب عديتها عشان أكتب وبعد كل ظروف تيت قلت لازم مهتمش بيها وأركز فى كلامي , ببعت لك وبكتب لك وبصراحة كدا وحشتيني ...

أبدأ خطابي وأنا مش عارف أبتدي منين , بصراحة المواضيع كتير وفى ملايين الحاجات اللى متتحكيش لأنها ببساطة تتعاش وتتحس وفى ملايين الأحداث البسيطة اللى أهم من الأحداث العظيمة واللى بتقول وتحكي أنا بحبك قد إيه .. حبيبتي وماي سوبر بيرسون وماي بيرسون وكل حاجة حلوة فى الوجود مختصرة وملخصة فى إبتسامتك وفى نظرة عينيكي زي أميرة من أميرات الحكايات اللى كنا بنسمعها وإحنا صغيرين , بالظبط زي حكاية التلات إخوات : بتوع سكة السلامة وسكة الندامة وسكة اللي يروح ميرجعش , أيون إنتي بقى أحلي من كل الأميرات دول ويمكن حكاياتهم سرقت سحرها من بس إبتسامتك ونظرة عيونك 

النهارده حلمت بيكي ... 
آه والله , قبل ما أنام كنت بشوف مسلسل ديكستر وبفكر بيني وبين نفسي هصوم بكره ولا لاء , لأني حاسس إني مينفعش أصوم لأني كاره نفسي حبتين وزعلان مني وفى حالة حرب عالمية بداخلي وكمان تم إنتهاك كل إتفاقيات السلام ومحتاج حد ييجي يشاور بس عشان الحرب تهدي , وكما قال الشاعر : ولو صعبة عليكي السكة شاوري لى وأنا أجيلك , أيون وربنا بالظبط كدا أنا بقى لما تشاوري الحرب هتهدي وتنتهي ويعود السلام والأمان مرة أخري بداخلي , فى الأماكن اللى محدش يعرفها غيرك , الخلاصة إني وأنا بفكر أصوم بكره ولا لاء وبشوف ديكستر لقيت فى حلقة فى المسلسل فى واحدة من أصدقاء أبوه وتعتبر مربياه وتعرف سره وإسمها كاميلا بتتحايل عليه عشان يقتلها وبتقوله إن السرطان هيذلها وياخد منها كرامتها ويهينها بكل شكل وهي مش عايزة دا ومتقدرش تنتحر وإن لازم ينقذها من المرض ويقتلها وبعدين مسكت فيه وقالت له بليز (Help me ) وفجاة مع الدموع ونظرتها المسكينة دي شفت حاجة جوايا يمكن نفسيتي يمكن روحي يمكن قلبي يمكن فى حاجة بتستغيث بنفس الشكل وبتطلب مني صيام الوقفة عشان مبقاش ميت بشكل كامل , وعقدت النية والعزم عالصيام وغمضت عيوني وشفتك :D

 الأغنية بتقول : لو فاتني العمر كله يرجع حبي يلاقيه ؟؟

وفى الحلم بقى كان السلام , قابلت حضرتك وسلمت عليكي وقعدت أسألك وأتخانق مع ناس كتير بعبط , تقريبا الحلم كان طويل جدا وتفاصيله لا تنتهي , ممكن أقعد أحكي فى التفاصيل والجواب دا يستمر قراءته الكام سنة الجايين :D فبلاش خلينا فى المهم 
صحيت وأنا بسأل وبقولك كلام :D  , صحيت وأنا بتكلم , تقريبا زهقتي من الرغي بتاعي فى الحلم فقلتي لى لو سمحت إصحي :D أو طردتيني من الحلم وروحتي تكمليه لوحدك , مع إني بقول ساحرة طيبة بس والله شكل معاكى مكنسة :D

أنا كل ما أكتب حاجة أمسحها ... الكلام كتير أوي محتاج صراحة شريط تسجيل عشان أسجل براحتي وبمزاج بقي :D

المهم يعني 
إني مفكرتش فى كل مشاكلي وفى كل أحداث اليوم , اللى كان شاغلني حاجة واحدة بس وهوا إني حلمت بيكي ... آه وربنا :D

يعني تطلعي فى الحلم يوم الوقفة وكمان فى اليوم اللى لازم أكتب فيه البوست اللطيف بتاع : ليلة العيد يا حبيبتي , ساعتها بقى يبقى فى علامة يا مارد :D

دا نفس إحساسي وأنا نايم وشايف إبتسامتك وبحلم بيكي 
عارفة حتي وأنا نايم حسيت إن ربنا يمكن للحظة رضي عليا وكافئني 
يمكن عشان قررت أصوم وبعدين نمت وحسيت بكل الراحة دي 
أينعم صحيت علي مصيبة وكارثة ومشاكل وهيصة 
بس المهم أنا كنت مستعد إزاي لمعارك اليوم دا 
:) :) و :) كمان يعني .

 عايز أقولك إني عايز مشابك أعلق عليها أحلامي قدامي كدهون وأحط الحبل ورا الباب وأعلق عليه كل الأحلام زي الورق اللى ورا الباب واللى مكتوب عليه كلام كتير وقواعد ومبادىء كتير , عايز أقولك إني لازم أفتكر كل أحلامي دي وكل حاجة فى كل حاجة فيا بالتفصيل بعد الجيش وإني بمر بحالة طوارىء ولابد من إني أحافظ علي كل حاجة جوايا والله ولذلك فبشاطرتي المعهودة وعبقريتي الفذة وغروري الرهيب لقيت حل جامد فحت :D هبقى أكتب عنه لاحقا :)

دلوقتى بسمع فيروز : :))) الأندلسيات مع وديع الصافي وشوية وهشغل علي الحجار من أول ( عارفة ) ومرورا ب ( لو تعرفي ) وإلي ( بكره جاي أخضر ) وصولا إلي : بحبك وأنطلق عصفور ... :)

دلوقتى شغلت علي الحجار وطبعا مفهوم ومعروف إني بحبك أكتر زي ما أنا عارف إنك بتحبيني أكتر منها :D

من غير ما تتكلمي..
مدي العيون سلمي
فوق الحيطان ارسمي
الحلم متفسر
وبكرة جاي أخضر
وانتي بتتبسمي.

:)

وأنا من زمان ليكي
عاشق دفا عنيكي
في سكاتي بناديكي
في غنايا تتنسمي
:D
آه والله 
 

فات كتير وأنا بكتب لك صح ؟؟ لازم أنشر بقى عشان ألحق قبل ما الساعة تلاتة بليل تفوت , تصدقي فاتت وبقت تلاتة واتناشر دقيقة :D
عادي إيه المشكلة ما تستني الجواب والرسالة الرائعة دي

الحكاية كلها إني فى يوم هبطل جري لأني هوصل و المسافات هتخلص فى لحظة ما , وهتلاقيني واقف هنا ... بالظبط هنا والله ... يوما ما هتعرفي هنا إمتي مش لازم دلوقتى يعني :D الله , يمكن فى أول مرة قلت لك فيها بحبك ويمكن تحت بيتكوا ويمكن فى مكان مفاجىء :D , عادي بقى بس مسير السكة تخلص بالنسبة لى عشان تبتدي سكة جديدة وعمر أحلي من أي عمر جنبك 
أنا عارف وواثق إن كل اللي بقوله مهما كان فهوا مش أكليشيه بالنسبة لك وإن كلامي واصل وإنك حاسة والأهم من كدا فاهمة ومستوعبة :)

الحكاية كلها إن دي ليلة عيد ونفسي أطلع السماء أجيبلك منها نجمة ويمكن أجيبلك حتة من السحاب ونشوف طعمه حلو زي المارشمللو كدا ؟؟ ولا إيه الكلام بالظبط :D ؟ طبعا فى يوم هندوقه سوا ( السحاب طبعا لما أطلعك علي قمة العالم ) بس حاليا عايز أبوح لك بسر :D
أنا معرفش طعم المارشمللو دا علي فكرة :D
آه وربنا :D
لم تتح لي الفرصة لأني أكله أو أشتريه :D
بس مسيري عن قريب ويمكن عن قريب أوي لما أروح أتوه فى إسكندرية :D وبدون جي بي آر إس وبدون خرايط وبدون ما يبقى فى شحن فى الموبايل وبدون ما يكون فى أي حاجة غير أنا والشارع والتوهان وبس :D هتصدقي لو قلت لك عملتها كتير بس مبحكيش لحد عن كدا عشان مبانش عبيط :D
بس عادي هبقى أحكي لك يوما ما عن توهاني الحبيب فى إسكندرية مئات المرات :D واحد بيحب حضرتك وبيحب يتوه هل فى مشكلة فى ذلك ؟؟؟

عايز أفضل أكتب وأحكي الحلم , برغم إنه دايقني جدا فى بعض النقط إلا إني كنت مبسوط وهدخله التاريخ وهسجله فى مدونتي الخاصة ومش هحكي عنه أي حاجة لأي حد :D

النهارده وقفت فى المطبخ وعكيت الدنيا بشكل كامل :D , آه وربنا , بس الحمد لله فى الآخر كلت وكمان عملت إختراع بلح باللبن والسمنة والسكر وكان رائع , وكمان غسلت المواعين فى الآخر 
تباً لكم أنا رائع :P آه وربنا :P 
قلت لك مليون مرة وكتبت مليون مرة إني مش متكبر أنا مغرور بس 
بتفرج علي جرايز أناتومي وشايل الحلقة الرابعة لبكره الصبح الساعة تسعة بالظبط :D
 هختفي عن قريب وهسلم نفسي يوم ستة وعشرين 
بإختصار كدا ... بدون كتر كلام :D
وحشتيني ووصيتك لو جرالي حاجة أو إتأخرت كتير جوا خدي بالك من الحاجة 
إوعي تنسي دي  أمانة :) :) :)
متوعديش 
أنا عارف إنك بتنفذي بدون وعود 
وختاماً يا ماي بيرسون يا ماي سوبر بيرسون يا بندق يا سنو يا حتة مني ومن روحي ( مش هقعد أدور علي كلام بقى أدلعك بيه وأختم الجواب بدلع .. كدا مينفعش :D خليكي حمشة شوية :D )
هتوحشيني 

سلام :)

صحيح :D
نسيت أقولك بقي إنها ليلة العيد :D
وإن كل سنة وإنتي طيبة 
وإن هابي عيد تحرير سينا بالمرة 
:D
وإن أنا بجد لا أتمني من الوجود كله فى لحظة زي دي إلا سندوتش :)
أيووووووووووووون سندوتش :D
وبما إنها ليلة العيد فأنا شايل فيلم علي جنب بقالى سنين لحد ما تبقى جنبي زماناً ومكاناً وروحاً وجسداً وقلباً وقالباً وكل حاجة وتبقى ليا بحيث نسهر ونشوفه سوا وإحنا مبسوطين ويمكن نعيط لأنه فيلم أسطوري وعبيط شوية ويمكن أحضنك وأطبطب عليكي وأفكرك بحبك قد إيه وأفكرك قد إيه العشر دقائق الضوئيين كانوا صعبين عليا وإن المسافات إنتهت وفعلا بعد البعد الرهيب بيحصل قرب رهيب وإن سنة الحياة التغيير وإننا سوا ومتخافيش وإني هنا 

بس حالياً هكتفي بإني أعيد عليكي وأقولك إني بحبك وهتوحشيني زي كل مرة وإني بجد تعبني المسافات الطويلة دي وياريتك هنا جنبي بجد  ومتخافيش أنا دائماً وأبداً هنا وحتي تحترق النجوم 

فى حاجات مبتتكسرش 
فى حاجات مبتموتش 
فى حاجات بتستمر للأبد 
فى حاجات كتير عايشة ومستحيل تموت 
حتي ولو قلت خالص وبقت واحد فى المليار 
الحب والإيمان بينجوا :)
فى بكره 
وبكره جاي أخضر :)
:) :) :)
مساء الشوكليت يا أفندم وهابي عيد :)

:)

كريم

 بس خلاص :)
الساعة بقت أربعة إلا ربع الفجر أهوه :)

شاب فقري

بكره الشتاء يجيبك

Winter Is Coming 

قلت بثقة المؤمن 

وبحب وبإبتسامة وشوق 

: بكره الشتاء يجيبك 

***

مفيش وجع 

 عشان ...

كل ذكري

 وكل نفس 

وكل دعوة

 وكل لحظة 

كل كلمة حلوة متقالتش 

وكل كلمة حلوة مستنياها 

علي قلبها حراس ( 22 )

عشان كدا الهجر بيطول 

و الوقت بيعدي فى إنتظار 

بس لسه فى عمر هيتعاش 

هتستني وهستني 

وفى حياة غصب عن الدنيا كلها جاية

ومين يقدر يقول لأتنين مجانين : لاء ؟ 

***

المشهد خارجي 

والمنظر : البحر والسماء والشمس ولحظة شروق 

والبطل واقف ومش فاهم اللى بيجري 

المدي متقسم زي ما يكون بازل محتاج حد يرتب 

البطل لوحده فى وحشة غريبة 

والشمس مش فى السماء , الشمس نورها متكسر ما بين القطع ومتقطعة حتت

وحتي البحر بموجه وغضبه جزء فوق وجزء تحت والسماء ش بتساع شىء لأنها معادتش موجودة

صوت ناي فى الخلفية  

البطلة غايبة وصوتها بيرن فى وسط اللخبطة بشوق وخوف ورعشة حب مخفية

:كل حاجة بتحصل لسبب 

 وكل حاجة لها وقتها 

وكل حاجة فى الآخر بتنزل فى مكانها فى البازل 

بتوضح الصورة 

يقلق البطل من غيابها وميقلقش من لخبطة الكون 

ميصدقش أنها مش بترتب جنبه الصورة بأولوياتها وتفاصيلها اللى بتعشقها 

يغمض البطل عيونه وبفتحها من تاني  

يبان علي وشه إنطباع اللى شاف جزي من الحقيقة , بيبص حواليه بقلق ويدور عليها 

يجري ورا صدي الصوت عالشط قدام صورة الكون المتشقلب ويقف فجأة وكأنه لقي الحل 

يبص لكهف ويتخيل نفسه عجوز حكيم معزول 

عزلة ؟؟ يبقى ملعون أبو الحكمة 

يجري من تاني ورا الصدي 

يدور عليها 

يبص للرمل ... ينطق : وكل الذي فوق التراب ترابُ ... 

يسكت ويلمح عتمة بعيدة فى الجنب زي ما يكون المكان بيفقد روحه شوية بشوية 

يصرخ : 

- أنا قررت ...قررت أروح أتعفر فى أي حتة تانية غير هنا .

بيتردد صوتها وهوا بيبعد أكتر :

 - أنا منك إنته وبس ... فاكر ؟؟؟ (( جربت ضمة تحسسك برجوع ضلعك المنزوع مكانه ( 11 )؟؟  ))

يحس بوجع ويلمس جنبه الشمال ويلاقي فى حتة ناقصة برغم إنها تتحس مش تتشاف إلا إنه بيرجع يدور ويقع عالأرض من الوجع ويفكر ويقوم من تاني يجري ورا الصدي 

يصرخ :

- أنا مش خارج من هنا من غيرك حتي لو كنت هموت هنا 

يتعب من الجري ويقع عالأرض ووشه عليه علامات التعب والحزن والأسي ونظرة أمل ..

يتردد صوته جواه :

- حاسب لا يضيع عمرك فى البحث عن الحقيقة , إوعي دا الحقيقة بحث يعني عشان توصلها يبقي عمرك ما هتوصل 

يهمس لنفسه 

- فى أمل , وبرده هحاول وبدون خوف ..

يحاول يرتاح 

يفتكرها 

يغمض عيونه ويحلم بيها من تاني .. يناديها ويجري أكتر وكأنه مش هيوصل 

- فوتت فى الجحيم عشاني ومسيري أعديه عشانك 

يحاول يعدي النار فى الحلم لكنه بيصحي علي لسعة الشمس 

يفضل فى مكانه ... يبص للسماء بتركيز 

يبص فى السماء ويحرك إيديه زي مايسترو ... يحركها ويحاول يرتب البازل ومع كل غمضة عين بيترتب جزء من الكون المتلخبط 

تختفي العتمة اللى كانت بدأت تنتشر عالجنب 

كل شوية يغمض ولسعة الشمس قاتلة 

تكتمل البازل وتوضح الصورة 

صوتها جاي من بعيد ... 

بتقول اللى مبيتقالش أبدا واللى مشتاق يحسه ويسمعه 

يصرخ فى الكون اللى اترتب : 

- وأنا كمااااااااااااااان 

يرد عليه الصدي بنفس الكلمة وترتعش السما مع صوت برق بيزيد فى الخلفية والدنيا بتضلم وبيطلع القمر مستخبي وسط السحاب

يحس بالمطر علي وشه ... يصرخ : 

- كاليبسو .. إنتى الشتاء ... إنتي حبيبتي 

يقرب من البحر ويبتدي ينزل فى الميه شوية بشوية وصوت الرعد كأنه بيرد عليه 

يهمس لها وكأنه بيبعت رسالة مع الهوا والبحر :33

- My Heart Will Always belong to you  , Whatever it takes 

يهدي الجو والمطر وتخرج حورية من البحر 

تحضنه 

يضمها بشوق مجنون 

بوسة من الحورية المجهولة اللى حضناه بشوق

تهمس :

- دلوقتى إنتي ليا 

تشده للقاع لحياة أبدية

تلمع نجمتين فى السماء جنب القمر

ينتهي المشهد 

CUT

***

مساء الشوكليت 

نفسي فى سندوتش 

بحاول أتعود عالجاي وأسكت وأكتم وأستحمل وأعيش 

P.S : حياة , حواديت , عناد , أطفال

صحيح الطفل مهما كان عنيد لازم ياكل فى الآخر :)

وبس 

شاب فقري

11 من ديوان العشق السادي لأحمد العايدي

22 وقف الشريط بوضع ثابت ...

33 pirates of the caribbean davy jones story

الوجه الآخر للشتاء

Winter Is Coming

 وهلت ريحة الشتا .

***

شوق

لهفة 

حب

حلم

دفء

أنتِ

***

** ومشتاق أنا

لعطرك

لثيابك

لوقفتك

لضحكتك

صوتك

فرحك

صمتك 

حتي خناقك

حنانك 

حبك

عيونك

دفا صوتك

شوق عيونك

مواعيدك

إنتظارك

قلة صبرك

حزمك

زعلك 

أحلامك

تخيلاتك

هدوئك 

صبرك اللى بينفذ علي طول 

الأسئلة اللى إجاباتها بتطمن

حكاياتك

إنتِ

***

*** الشتاء 

- شوق

متضاعف مليار مرة 

- حب 

يملا الوجود

- سلامات 

توصل برغم البعد والمسافات

- مطر 

بيستجاب فيه دعوتك 

- فرحة 

بمجرد لقاكي

- كسوف

طلب الدفا المستخبي فى عيونك

- برد

بيخليكي هنا 

- حضن

لو حتي بكلمة بيتحس 

***

بحبك

وأفتح دراعاتي وأقول 

قااااااااااااااااااااااااااد كدهوه 

وأضمك 

ولو حتي بكلمة 

بس خلاص

***

الإيمان بينجي

ويطمن ويصبر أوي

حتي لو مفيش أي أمل 

حتي لو كل حاجة مستحيلة 

حتي لو المسافات متتعدش 

حتي لو إنتي مش هنا

والدنيا شتا

شاب فقري

وإستحمل

انتوا عارفين انى عايز اكتب 

وانا عارف انى عايز اكتب 

طيب أكتب ليه بقى ؟؟

***

 

الصبر والتحمل والتعامل مع الوقت الحاجات اللى ببدع فيها وبقدر أعيش بيها بقوة لدرجة إن فى ناس بتعتقد إني مجنون , يمكن عندهم حق , أنا بس عايز أتكلم فى كام حاجة جت فى بالي إمبارح 

إمبارح كنت فى نقل عفش واحد صحبي يدعي الميت :D والميت صديقي بيجهز شقته شايف التعب اللى باين عليه والشقاء اللى بيبان علي كل عريس إفتكرت ساعتها جملة كانت بتتقال وكنت بعارضها دايما 
الجملة بتقول :  محدش يستاهل 
واللى انا بقوله : كل واحد له قدر معين من العناء أو التعب اللى يستاهل نتعبه عشانه ولازم تعرف كل واحد يستاهل قد إيه لأن محدش يستاهل نقطة العناء المطلقة إلا لو كان يستاهلها فعلا 
الفكرة كلها بتدور فى محيط إنك بتعرف اللى قدامك يستحق قد إيه من التعب والعناء من ناحيتك , يستاهل تتعب عشانه قد إيه أو ببساطة يطلع عينك قد إيه 
في ناس تستاهل أوكي بس مش كل العناء دا وفى ناس تستاهل قدر أكبر من الكتير بتاعك وهكذا 

إمبارح كنت بكلم واحد صاحبي تاني وكنا بنحكي فى مواضيع وبيحكي لى على مواقف كتير وبعدين فكرني بأيام ما كنت بشتغل ستاشر ساعة متواصل برا البيت ولما كنت بقعد يومين صاحي شغال فى البيت عالنت وبيطلع عيني والصداع بيبقى هيفجر لى دماغي , إفتكرت أيام الشقاء كلها , وقلت مهما يكن اللى جاي انا عارف انا هعمل ايه وهرتب إيه وهظبط إزاي , لكن دا فكرني بخسائر كتير أوي , أنا عارف إني تعبت بس عادي ما الحياة شقاء , عارف إن حتي عالمستوي الشخصي فى حياتي فالبعد فى المسافة والوقت بيخلق قسوة ووجع وبيخلي الشوق وحالة الحنين تقتلك لكن فى نفس الوقت أنا عارف ومتأكد من إن كل شىء بيتغير لأن التغيير هوا سنة الحياة فبالتالى كل ما نبعد أكتر عارف إننا لو قربنا هنقرب بشكل مطلق وفترة من الزمان لا يمكن تصورها هتتحسب بعمرنا إن شاء الله , كل ما الوقت فى البعد أو المسافة تزيد ببقى عارف والله إن اللى جاي بعدها قرب رهيب ومتأكد من دا وربنا يعينني لما ييجي الوقت دا  , يعني من الآخر اللى حاصل هينتهي ولما ينتهي إن شاء الله سواء بكره أو بعده أو أياً يكن الوقت هييجي بعده قرب جامد أوي ودا مخليني مطمن أوي .... فعايز أقولك بس إني مطمن من أي بعد فى المسافة أو الزمان وكل ما يطول ويزيد بعرف إني بخلص رصيدنا من الفراق والوجع واللى هيتبقى لنا الفرحة إن شاء الله 
أنا مؤمن بدا :)
جدا :)
آه وربنا 

فى كام سؤال مش لاقى لهم إجابة منهم سؤال : 

هوا أنا حلمت الحلم دا ليه ؟؟
هوا أنا بيجرالي إيه ؟؟
هوا أنا هرجع أتوجع تاني ؟؟؟
طيب  وغيرهم كتير ...

أنا عندي حلم 
وحلم كبير أوي أوي أوي 
وهيتحقق إن شاء الله وهبقى أحكي لكم فى كل خطوة بمشيها إن شاء الله 
الحمد لله إتخرجت وباقى لي أخلص فترة الخدمة العسكرية 
وبعدها هنطلق بقي للحلم بتاعي 
أوعدكم في كل خطوة مفاجأة :D
دلوقتى أنا تعبان ومعنوياتي زفت وحالتي الجسدية والنفسية زفت جدا 
لكن مازال جوايا نقطة الإيمان دي بتنور وبتلمع أوي أوى أوي بتخليني حاسس إني ممكن أمسك النجوم بإيديا 
بتقنعني إن للبعد الزمانى والمكاني دا نهاية وهتبقى هنا 
بتقنعني إن الحلم هيتحقق ولسه فى وقت وفى فعلا حد يستاهل كل العناء دا 
بتقنعني إني لازم منساش ولازم أركز ولازم مهربش ولازم أواجه ولازم أحارب وأتعب وحتي النفس الأخير 
وبتخليني مؤمن جدا بإن فى حد يستاهل وبإن فى فرحة جاية وإن بكره هقدر أحقق فيه حلمي مهما كان قدر التعب أو الوجع اللى عايش فيه 
أنا تقريبا خلصت كلام 
وجبت سيرة الإيمان والحاجات اللى مبتتكسرش وعرفتي إني مشتاق لك ومشتاق لوجودك قد إيه وعرفتي إني بمر بأزمات كتير لكني قوي وهعرف أفوت وأبقى كويس ونقول يارب بقى :)

شاب فقري

فى فيلم gangster squad فى مشهد حلو اوى 

البنت جريس كانت بتقوله :  “Where have you been all my miserable life?” 

وفى مشهد تاني : حصل التالي 

وبس كدا 

وهنا أنا تنحت 

وسكتت لما شفت الصورة 

ونزلت الفيلم كله :)

وتنحت برده 

وبس خلاص ...

حاول تاني

من الصبح من ساعة ما صحيت بحاول أكتب هنا فى المدونة 
إمبارح معرفتش أنام غير لما كتبت فى المدونة المقفولة بوست مختصر جدا جدا جدا 
الصبح أول ما صحيت حاولت بكل طاقتي أفتكر الحلم كويس أوي لكن مش فاكر منه غير حاجات بسيطة ولذلك كنت هكتب بوست خاص وأخليه يتكلم عن الحلم واللى فكرت فيه , وبعدها بشوية فضلت أفكر أفكر أفكر يمكن أوصل لحاجة , وبعدين قلت خلاص أشغل مزيكا , وروحت شغلت أغنية بكرهها منزلها فيديو وفجأة طلعت أغنية تانية , اللى هوا يخرب بيت كدا , طلعت أغنية للست سيلين ديون , كانت لابسة فستان أسود وصوتها هادي والجمهور عمال يصقف وأنا فجأة إبتديت أنام وأنا بنام قلت طيب ما أحاول أكتب ورجعت كتبت كام سطر وبعدين نمت وصحيت قلت مينفعوش بوست هبقى بستعبط الصراحة لو نشرته كدا 
((
العزيزة سيلين ديون

الفستان الحلو اللى غنيتي بيه فى حفلة ما كان تحفة
أنا بحب الفستان وحضرتك بس مش س

))

مش إيه بقى دا موضوع تاني خالص :D
ودلوقتى بحبك وأنطلق عصفور لعلي الحجار :D
أيون والله ولسه بحاول أكتب , أحيانا مبيبقاش الواحد عايز يطلع اللى جواه كله يخلي شوية حاجات مستخبية بحيث لما تطلع تبقى مفاجأة حلوة , بحيث لو محضر مفاجأة أو شايل حاجة مبتتكسرش أو حاجة كدا بعيد عن الدنيا كلها 
المهم بقى إني إكتشفت النهارده الضهر إن الأستاذة (( اللى أصبحت صديقة من فترة طويلة )) بتعاملني زي الناس أو تقريبا كدا بتعاملني أقل من الناس وتطورت وتغيرت بشكل يقلقني ويخليني أخد حذري وبالتالى قررت إني أعاملها زي بقية الناس , خلاص يا صاحبة النبؤة , معادش فى معاملة خاصة ليكي ولا هاجى أقولك عندي واحد إتنين تلاتة أو فى مشكلة , لأني ببساطة مبوقفش واحد فى الشارع واقوله تصدق أنا بحب بنت ونفسيتي بتتعب وهي بعيد بس بستحمل وكله بيفوت وبستحمل وكله بيفوت وهكذا 
مبتحصلش 
وبالتالى زيك بقى زي الراجل اللى فى الشارع , ما هوا أنا مش هقول للدنيا كلها إن فى حد مهم وإحساسه عالى وبيتنبأ وبيحلم وبيفسر وبيفهم وفى الآخر الحد دا ميقدرنيش , تبقى عيبة أوي فى حقي يعني 
بس كدا ... إنتهي الكلام اللى يخص حضرتك
 

***

فاصل بقي ونواصل البوست 

****

إليكي يا إسمك إيه :)

برغم إني معنديش حاجة أقولها لكن هقولك (( مساء الشوكليت ))
وأروح أنام أنا كمان
 عشان بكره رايح أنقل عفش واحد صاحبي متجوز جديد وله مليون حكاية معايه 
يلا 
تصبحوا علي خير 

صحيح فى كتاب بقراه صاحبه مؤمن بحاجة مهمة جدا : الأحلام هي الحقيقة الوحيدة 
وبيقول كمان متحطش عنوان غير لما تخلص اللى بتعمله عشان العنوان بيحددك وبيخليك توصل للشىء اللى انته عايزه مش هتكتشف جديد لكن لما متحطش عنوان هتتفاجىء بحاجات كتير لأنك وانته شغال هتلاقى نفسك منطلق 
كتاب أنا فيلليني لفديركو فيلليني 
وفى طبعا نسخة بى دي إف عالنت , سيرش بقي :D
شاب فقري

*مبحبش أتكلم عن الموت ولا حتى مع اقرب الناس ليا 
*مش عايز افكر فى حاجات كتير 
*عايز اتعمى عن بعض الاشارات والحقايق 
*عايز اسافر اسكندرية 
*عايز اصالح ناس معينة 
*عايز انام بكل تاكيد
*عايز تلات سندوتشات من المحل اياه 
*عايز اشوف فيلم بحبه 
*عايز اخلص الكتاب دا عشان حلو بأفورة 
*عايز ألحق أنام كتير الفت رة اللى جاية 
*عايز الصوت الرخم اللى عمال يتردد فى دماغي  دا يسكت 
*عايز أكتب فى المدونة المقفولة اكتر 
*محتاج أتنفس دلوقتى وأغمض عيوني وأحكي للحيطة وأنام 
*عايز اوصي حد علي حاجة معينة تساعدني بدون عذاب 
*عايز شوية نار علي وجع يحسسوني بالحياة :))
بس خلاص

صحيح بقى : وعد : هتلاقيني هناك :)


ملخص : الموت لسه مجاش وان لازم تستغل الوقت وتعمل الحاجات المهمة اوى علي طول لاحسن تموت قبلها وكمان متبقاش ندمان علي اى حاجة عملتها .

وبرده نمت وانا بكتبه تانى ...وتم النشر الجمعة صباحا