عشر أسباب

بفكر نفسي بالنهارده وهستني يوم الخميس عشان :
1- أعرف أحكيلك عنه كويس لما تيجي يوم الخميس
(( عشان لو عملتي كدا فى يوم أكون حنين بس وأولع فيكي ومعملش زي اللي عملته النهارده  ))

2-  منساش مشاكله وأزماته و روقان البال
( الوحدة فى المصنع والحياة فى اكتوبر و المشوار بتاع الصبح ومكالمة الصبح وخناقة الصبح واللي جري بالظبط )

3- أعمله علامة لليوم اللي رجعت فيه مبادىء قديمة أوي قوية جدا
(( اللي ميقدرنيش ميلزمنيش))
(( بيع  بكل قوة وبكل عزم وبكل طاقة ممكنة ))
(( قرب تتكهرب ))

4- عشان أفكر نفسي ممكن أغضب قد إيه وأنا فى قمة الهدوء
(( فى ستين ألف سلامة ))

5- عشان أعرف أحكي لك عن الكراهية بين الصحاب والناس اللي بتخسر الغالي وتشتري الرخيص والناس اللي مبتقدرش اللي معاها بجد
(( كلهم كدابين حتي بينهم وبين نفسهم ولو كل شخص عرف عن التاني حاجات مش هيكلمه بقية عمره , وإسمهم أصدقاء ))

6-  إني أبعت رسالة من بين السطور لأكثر مكان موحش فى العالم وفى التاريخ بأكمله , أكتر مكان فيه شر وإنعدام للحقيقة وكدب وخيانة وعبث طفولي
(( متصدقيش أي حاجة ))

7- لأنك وحشتيني وبجنون
(( الأولي والتانية والتالتة مش بس الأولي ولا بس التانية ولا حتي التالتة اللي مش قلت عليها قبل كدا ولأول مرة ببتكر معناها فى حياتي ))

8- عشان تعرفي إني مرضيتش أتكلم النهارده
(( مش مطنش ومش متجاهل بس في حاجات متنفعش تحصل غير فى أوقات معينة وكل حاجة فى وقتها ))

9- عشان تعرفي إن فى حاجات مبسامحش فيها
(( أكيد واثقة من دا وعارفاهم كويس أوي ))

10- عشان لما تقري الكلام دا تعرفي إن ميهمنيش طول الأسبوع لكن يهمني لحظة واحدة بس وحقيقة واحدة بس وتعرفي إني أقدر أكتب عنك فى أي لحظة بس أنا اللي مبحبش دا .
(( إنتي حرة فى أفعالك وتصرفاتك وقراراتك لكن معاكي أنا بحس إني مع حد مش من صنعي وإني مع فطرة زي فطرتي وبالتالي ميهمنيش كل اللي موجودين لكن يهمني حقيقة إن جواكي أوي إنتي معايه أوي , وبس كدا ))

***

أي شخص فى الوجود مينفعش يتصرف بدون علم ومعرفة ولو عمل كدا يبقي مجرد طفل بيجري ورا لعبة
أول مرة أشوف جوا الناس كمية الكراهية دي اللي حسيت إنها ممكن تحرق الكون كله
مش عارف هيفرق فى إيه بس حاليا أنا مبسوط من كل لحظة عشتها الفترة اللي فاتت لأني إتعلمت منها وشوفت القدر أو الزمن عايز يقولي إيه , كل الإشارات والتفاصيل البسيطة واللي مستحيل حد يركز فيها لكن أنا بشوف كل حاجة

وأولا وأخيرا والله العظيم مقدرش أقول غير إني بجد بشكر التكنولوجيا
لأول مرة بقول كدا
بس فعلا حاليا بشكر التكنولوجيا
:)

***
صحيح

هي وغيرها
فى ستين ألف سلامة
***

بفكر فى حاجة ممكن تخليني أبطل أكتب بالشكل دا ....

مش مهم

أنا بجد مش عايز أكل ولا أنام

مش إكتئاب
بس روقان بال
مين قدي فى الوجود دا يا أفندم ؟؟؟

***

ختاما
هي فعلا ينفع يتقالها أحسن تستاهلي وكذلك الكل .

أنا ...
ومش هقول أنا مين

#عشر أسباب لإنتظارك يوم الخميس

النهارده عامل كدا ليه ؟؟؟

سؤال واحد بس :


هوا النهارده عامل كدا ليه ؟؟؟

وبس كدا ...

وزي ما قلت الإجابة متهمنيش

لو فيا

ياريت ...

لو فيا ...



#مروان_خوري
#لو
#حكايات_قبل_النوم

خليه معاكي

قلت : خلي بالك
خليه معاكي
وحافظي عليه كويس
خبيه
وإخفي الخبر
ومتقوليش الحقيقة
متقوليش إنه معاكي
متجيبيش سيرة لحد
خليه بعيد عن الدنيا كلها

وقلت : معاكي دلوقتي ؟؟؟ متأكدة ؟؟؟ هتحافظي عليه ؟؟؟ دا كل ما أملكه فى الحياة, مفهوم ؟
ردت الرد المشهور بتاعها
إبتسمت لآخر مرة وسكتت
وأغلقت الصندوق وأعطيته لها
وخبأت المفتاح بداخلي

ودلوقتي

وقت الغضب  و النار و الموت ...


أن تكون قبيحاً معروفاً بالشر ومعرف بإسم الشيطان وبداخلك حشود الملائكة خير لك ألف مرة من أن تكون بمنظر الملاك الهادىء الوديع وبداخلك القبح كله والشياطين .


ودلوقتي

أقبل الموت بصدر رحب فى هذا الوطن
أقبل الموت بصدر رحب من أجل أشياء لا معني لها إلا عندي وحدي
أقبل الموت بصدر رحب

وأنتظر الدعوة بفارغ الصبر

 تصبحون علي حي آه وأصبح علي موت

ولأكمل إنهياري لليلة ..

منين ولفين وليه ؟؟؟

منين بتيجي الحاجات دي ؟؟؟

كنت زمان بسأل ودايما بسأل بتيجي منين القوة اللي بيتمتع بيها بعض الناس
فى البداية عرفت مكان سهل وبسيط
وكان الموضوع رائع لاني فهمت مصدر قوي البعض  وإحترمت الناس دول
وبعدها
إضطريت أفكر تاني
لقيت الإجابة بتتغير
صراحة إحتقرت الناس دي لأن بعض الينابيع مخصصة للكلاب فقط للشرب منها وللمخلوقات الأقل تطوراً

وبعدها
إضطريت إسأل مرة تانية
والإجابة إختلفت
الإيمان ؟

الإيمان قوة
بس الإيمان المفروض يديك الأمان ويخليك تتصرف كإنسان مع بقية البشر وتعاملهم من المنطلق دا
ولا إيه ؟؟؟
ولكن لقيت إن البعض بيحول طاقة الإيمان لطاقات أخري
وللأسف أنا مفيش مصدر إلا وجربته كويس اوي أوي أوي
بس فكرت تاني
ولقيت إن فى مشاكل بين المؤمنين بأي شىء
اللي مؤمنين بحاجات كتير بينهم مشاكل
فلقيت إن الناس بتحول طاقة الإيمان لأشكال كتير
قسوة , كره , عناد , جنون , معاملة , هجر وفراق وكل الشرور الأخري التي يتقنها البشر
يا هلتري هل النور اللي نابع من  الإيمان يقدر يتحول لنار تحرق اللي حوالينا ؟؟؟
وياتري هل آدميتنا هتسمح لنا بدا
؟؟؟؟
أنا مش هاممني الصراحة
لأن الإجابة لا تعنيني فى شىء
الإجابات لا معني لها حين تختلف الأفعال
دا مبدأ أساسي ومبيتغيرش
فكرت كمان شوية
هوا يا هلتري زي ما النور بيتحول لنار تحرق اللي حوالينا هل النار جوانا تقدر تتحول لنور ؟؟؟
نور ينور للي حوالينا ويظهر جمالنا وروعتنا
ولكن باغتتني نقطة إن النار اللي بتندلع جوا البشر مينفعش تتحول لنور
يعني الكلام دا مينفعش
يعني مينفعش الشر يطلع منه خير
مينفعش واحد يبقي موجوع ويائس ويقدر ينور ويبهر الناس
ولا إيه ؟؟




ولفين يتم توجيه الأمور دي ؟؟؟
الأهم هوا كل حاجة بتتحول مهما كان مصدرها بتروح فين
وهوا دا مصدر كل شىء حلو ووحش فى حياة البشر
هوا دا كل حاجة فى كل حاجة
اللي هتعمله هتوديه فين ولمين ؟؟

مين يستاهل النور أياً كان مصدره ؟؟؟
مين يستاهل النار والشرور ؟؟
مين يستاهل المفيش ؟
مين ملوش تمن ؟
مين اللي واللي واللي ...؟

مشترتش جرنال ومش هشغل مزيكا ومش هعمل قهوة

***
قالت : ليه مش كلمتني لما كت فى الحالة دى ؟؟؟

قال: لأنك كنتش مشغولة ومش فاضية ووراكي حاجات كتير وكدا يعني وعشان مش أخنقك

قالت : بس أنا نفسي تخنقني



((
كان أحمقا حين أخفي عنها حقيقة الأمر ولم يقل لها أنه قرر أن لا يتصل بإنسان آخر إلي أن ينتهي الزمن كما ينتهي كل شىء آخر وسيظل هكذا إلي أن يموت
))

***

فى تكملة لكل جملة كتبتها

يكفيني إني أكتب الأسئلة وأنا مش عايز أجاوب لأن :
فى فيلسوفة وعالمة زمان قالت إن الحقائق لو وصلنا لها ومش إستفدنا بيها ونورت جوانا وحسينا بيها فهي مجرد كلام لا فائدة منه

ولأن :
 أنا بقول إن : الإجابة لا تعنيني فى شىء
الإجابات لا معني لها حين تختلف الأفعال
دا مبدأ أساسي ومبيتغيرش

تعرف النيل بليل شكله عامل إزاي ؟؟؟
آه لأني بشوفه كل يوم وببص للنجوم كل يوم

تعرف إحساس التلجاية اللي قعدت فى الشمس ؟؟؟
آه لأني النهارده لما ركبت الموتوسيكل و فردت دراعاتي فى الهوا عيوني دمعت وحسيت إني طاير والتلجاية قعدت فى الشمس

تعرف ...
مليش نفس أعرف
أنا نفسي أحس
زي ما حسيت اللي فات
ويمكن أكتر شوية


ونفسي أتنفس
لأني مخنوق أوي والحبل بيضيق والصندوق بقي خنيق أوي

ونفسي أغمض عيوني وأنام وأنا واثق إن بكره لما أصحي فى حدث هفتكره وأقول ( أنا بجد مش مصدق , طيب إزاي ؟؟؟ ) وأضحك بصوت عالي وأغني فى الحمام وأرقص في الصالة





حد جه ؟؟؟
حد سأل ؟؟؟
حد فهم حاجة ؟؟؟

منين ؟؟؟

و لفين ؟؟؟

وليه ؟؟؟؟

و هاو ماتش تايم ؟؟؟؟

أنا زهقت

تصبحوا علي خير

رايح أبتسم فى وش الموت

وأكمل إنهياري




***
تحديث

انا دايما عامل حسابي إني خارج ومش راجع ومن قبل التحرير والثورة بنزل من البيت وبحضن وببوس البيت كله
ويمكن امي بس
ولو فى يوم ركبت أتوبيس أو قطر أو عبارة أو حتي زي ما بركب اليومين دول ملاكي وميكروباص وموتوسيكل وإتقلب بيا
هبقى راضي عن نفسي جدا
بس بالأمانة
كنت هتمني أرجع أسلم عليهم أوي وأحضنهم بضمير
ويمكن أحضن ناس تانية وتالتة وعاشرة
ويمكن أعمل حاجات مستحيلة بجد بجد يعنى

تعليقا على كومنت عالفيس علي حادث القطر والاطفال بيقول إن فى أب إتصل يحكي عياله عملوا إيه قبل ما ينزلوا من البيت ...

****