البقاء لله

وفاة جدتى لأمى بالأمس ...
إنا لله وإنا إليه لراجعون ...

كريم عبد القادر

لن أعيش فى بلوفر شفيق

أحمد شفيق بعد الثورة يتحدث عنها ويتمنى لمصر مستقبل أفضل وفى حديثه يشير إلى الثورة بأنها ثورتنا ...
ثورتكوا منين يا عم أحمد ؟؟؟
جبت الكلام دا منين ؟؟؟؟
ولا نسيت فى الأيام الأولى للثورة طلعت لنا عالتلفزيون ببلوفر جميل وقلت هذه ليست ثورة ولا يمكن إعتبارها هكذا ؟؟؟
وبعدين هى حكومتك خلاص إستنفذت كل طرق التواصل مع الشعب مبقاش ناقص غير الفيس بوك ؟؟؟
يعنى مكاتب إستقبال شكاوى المواطنين ضد الفساد وحليت مشكلة المصريين فى طرابلس وجبت حق اللى إستشهدوا فى المظاهرات
خلاص قدرت تحل كل مشاكل البلد فقلت تلبس البلوفر وتطلع فى فيديو لصفحة الحكومة عالفيس بوك؟؟؟؟
الفيديو دا بيفكرنى ب فيديو الدكتور الفاضل المحترم أحمد فتحى سرور بعد إنشاء صفحة محبيه عالفيس بوك قبل الثورة بكام يوم وإنضم لها حوالى متين وخمسين مشترك
أبسط ما يقال عن الفيديوهين أنهم مهزلة ....
ورجاء إعتبره وطنى أو شخصى أو مهلبية حتى : إرحل بحكومتك بالفاسدين اللى بتحميهم
وياريت الفيديو الجاى تطلع لنا كدا ومعاك الراجل اللى واقف ورا عمر سليمان وبتعلن فيه إستقالة الحكومة


*****
***
وهنا فى هذا الفيديو فى جمعة التطهير أحد المواطنين المصريين بيعبر عن رأيه ...
نازل ليه ؟؟
وليه بيطالب بإسقاط الحكومة ؟؟؟
وليه شارك فى الثورة ؟؟
وليه لسه بينزل وبيشارك فيها ؟؟؟
نموذج مشرف للمواطن المصرى الواعى

ومازالت الثورة مستمرة حتى تحقيق بقيت المطالب
وحتى يتم الله نعمته علينا ...
تحيا مصر
تحيا ثورتنا

شاب فقرى

قوم من النوم

إيه يا مصريين ....

هتفضلوا فى مكانكم ؟؟؟

بقالكوا كتير أوى ساكتين ...

آن الأوان دلوقتى تتحرك وتعمل بطاقة إنتخابية وتتابع الأخبار (( بدون ما ييجى لك الضغط أو نقطة وتتشل )) وتعرف البلد بيجرى فيها إيه وتعمل حسابك دايما فى جنيه فى المحفظة تركب بيه المترو وتروح بيه التحرير فى أى وقت مع أخواتك المصريين تقول لاء لأى ظلم أو فساد

آن الأوان ترفع رأسك وتقول أنا مصرى وتتحرك وتثبت نفسك ويكون ليك رأى وتنادى بيه بحرية ...

والحمد لله اللى قدر لأخواتك أنهم يخلعوا الديكتاتور مبارك ... مش هيبقى صعب عليهم يعنى يطردوا شفيق أو أى حد يحاول يتآمر على المصريين أو ينشر الفساد والظلم أو يكتم صوت حق ... بس برده لازم تكون معانا ... عشان ميجيش يوم تقول فيه ياريت اللى جرى ما كان .. ولا إيه ؟؟؟

قوم من نوم وقوم بواجبك كمصرى وإنصر الثورة والحق ... إنصر مصر

---- الجزء القادم نقلا عن أحد أصدقائى عالفيس بوك ------

أكيد في لعبة معينة بحيث يخرجوا ناس كتير من الكشوف. اللي مسيطرين على الحكومة عموماً والداخلية خصوصاً هم نفس العصابة بتاعة التزوير

وصلتني هذه الرساله الهامة

طبقاً للقرار الجديد الانتخابات ستكون ببطاقة الرقم القومي، روحت القسم امبارح اسأل بالظبط عشان أتأكد .. بالنسبة للناس اللي كان معاهم قبل كده بطاقات انتخابية يبقى مفيش مشكلة . هيروحوا ينتخبوا عادي بالرقم القومي، أما الناس اللي ما كنش عندهم بطاقات انتخابية لازم يروحوا القسم اللي هما تابعين ليه (اللي استخرجوا منه البطاقة الشخصية)، تاخد معاك الآتي :

- بطاقة الرقم القومي و صورة منها

- شهادة الميلاد و صورة منها

- وهتملى الاستمارة

تروح القسم و تقف في الطابور و تسلم الاوراق دي و الظابط هيقولك و انت واقف على اللجنة الأنتخابية بتاعتك .

الإجراء ده مش عشان استخراج بطاقة انتخابية ، ده عشان اسمك يكون مسجل في الكشوف الآنتخابية و تعرف لجنتك .

و ده عشان انتخابات مجلس الشعب و انتخابات الرئاسة و استفتاء الدستور

القسم بيستقبل الطلبات من 8.30 ص و حتى 2 مساءا يوميا ما عادا الجمعة و آخر معاد تسليم الطلبات يوم السبت 5 مارس 2011

ما حدش يكسل الموضوع مش بياخد اكتر من نص ساعه ، على الرغم اني روحت في يوم اجازة و الطابور كان طويل جدا لكن الدنيا كانت ماشية بسرعه و سلاسة و خلصت في منتهى السهولة

-------- إنتهت النوت --------

يبقى أولا تسجيل إسمك فى كشوف الناخبين (( لازم تروح القسم ... وبلاش رشاوى لأى موظفين الله يرضى عليكم ))
وثانيا : الله يرضى عليكم لا تنسوا التبرع بالدم يوم الجمعة 4 مارس وهنا تفاصيل اليوم عند نوران .
وثالثا : إن شاء الله مسافر إسكندرية بكره .... السفرية جت فجأة لو قدرت أرجع هحضر التبرع بالدم وأكيد هكمل اليوم فى الميدان ...

ربنا يحميكى يا مصر ....
شاب فقرى

مبارك الأب ... عندها يا أدهم

السلام عليكم ورحمة الله وبركاته

بعد تنحى الريس محمد حسنى مبارك ولأول مرة فى مصر يطلق على رئيس كلمة الرئيس الأسبق وبدأت أنباء عن مرض الرئيس الأسبق : محمد حسنى مبارك وبدأ المصريين فى التعاطف وظهرت صفحات حب وبدأت تتنظم مسيرات فى حب الرئيس وحملات تدعو له بالشفاء ومصريين بيبكوا بليل كل يوم (( والله العظيم الكلام دا بجد وحقيقى وناس متعلمه وواعية وناس جهلة برده متعرفش لا تقرأ ولا تكتب )) وبدأ الناس تحن لما مضى وتبكى الرئيس المريض بالسرطان وظهرت تفسيرات بأن الجيش كان ينوى الإنقلاب وكلام كتير كدا مش لازم نتكلم فيه دلوقتى .... هنتكلم فيه لاحقا
لكن الأهم حاليا هوا الرئيس محمد حسنى مبارك ومرضه والتصرف الصادر من البعض ...أنا طبعا مليش علاقة بحد وكل واحد حر فى رأيه وقلت من أول يوم نزلت فيه فى الثورة أو شجعت لها أو حتى إتكلمت عنها إن النزاع على اللى هيمسك مصر أو عن اللى المفروض يحكمها يتحل بحاجة واحدة : إنتخابات نزيهة وشريفة وقاضى لكل صندوق فى ظل شفافية وصدق تام ... غير كدا يبقى ملناش علاقة بحد وكل واحد حر فى رأيه ... مش هفرض عليك رأيى لكنى هناقشك فى رأيك عالأقل
نيجى للسؤال الأهم والإجابة المستفزة :
السؤال : إنته بتبكى على جناب الريس ليه ؟؟؟
الإجابة :
- الرئيس مبارك كان بطل حرب أكتوبر
- الرئيس مبارك فى بداية حكمه كان راجل طيب وكويس
- الرئيس مبارك عيشنا فى سلام طوال فترة حكمه
- عملنا مشاريع وكبارى ومترو الأنفاق وقهر الإرهاب والجماعات المتطرفة فى مصر
- راجل كريم ومحترم ويستحق التبجيل ل...كذا كذا كذا كذا

ردى :
أولا : فلنقل إنى شاركت فى حرب أكتوبر ... ولا بلاش الحرب ... أنا شاركت فى الثورة الحالية ومن أول مظاهرة طلعت (( زى أول ضربة جوية كدا )) وإتبهدلنا وحصلنا وحصلنا ... هل دا يمنحنى الحق فى سرقة البلاد ؟؟؟ هل مشاركتى فى شىء بطولى (( هوا فى الأساس واجب عليا إنى أطلع أقول لاء للفساد والظلم زى ما واجب على كل جندى إنه يدافع عن وطنه )) تمنحنى الحق فى إفساد وطنى أو قتل أبناؤه ؟؟؟ هل عشان الريس شارك فى الحرب أصبح من حقه إنه يذلنا كل شوية بمشاركته دى ويسرق البلد ويكون السبب فى كل البلاوى ؟؟
وهل الرئيس إحترم ضحايا الحروب ومن شاركوا فيها زى الفريق سعد الدين الشاذلى ؟؟ جمعة الشوان ؟؟ وغيره ....
هل الرئيس إحترم المدنيين ؟؟؟ هل أصدر أوامره للداخليه بمعاملتهم بإحترام وحمايتهم فى المظاهرات عالأقل وبدأ يستجيب للطلبات من اليوم الأول ؟؟؟
هل الرئيس إحترم ورد مصر (( الشباب )) ووفر لهم فرص عمل أو حتى حاول أن يترك لهم شىء من الكرامة ؟؟ أو حتى رحمهم ؟؟؟أو جاب لهم حقهم لما ماتوا فى العبارة ؟؟؟ أو حاول يقضى على الفاسدين المحيطين بيه ؟؟؟

ثانيا : هل بداية حكم الرئيس مبارك تشفع له كل اللى عمله فى التسعتاشر سنة الأخيرة ؟؟؟
يعنى مثلا وليكن شاب فقرى رئيس الجمهورية وعملت لكم الأنفاق الطائرة .... فهل من حقى بقى إنى أعمل اللى أنا عايزه بعد كدا عادى ... سواء بتوزيع ثروة البلد على أولادى أو إسكات صوت الحق فى البلد وقهر المفكرين وإعتقال المواطنين ؟؟؟

ثالثا :
هل الهروب من الحرب فى الأصل ... عمل بطولى ؟؟؟
إن كانت الحرب واجبا عليك وتفاديتها ... فإنته فى الحالى دى مش بطل ...إنته جبان
هل تصدير الغاز للعدو الأول للمصريين وللعرب والمسلمين يعتبر عمل بطولى أو سلمى ؟؟؟
وهل هروبك من الحرب بحجة البناء ... وبعدين يختفى البناء والتنمية .... يبقى حضرتك بتبنى عزبة بقى مش بتبنى بلد عشان تحارب أو تكون دولة قوية ... ولا إيه ؟؟

رابعا :
عمل المشاريع والحاجات الكتير الحلوة دى هل دا مكافأة من بيت الريس ؟؟؟ يعنى هل هوا أعطانا الميراث الخاص بيه وقام بعمل تلك المشروعات من ماله الخاص ؟؟؟ هل هذا ليس واجبه وهوا متفضل ومتكرم علينا بيه جدعنه ؟؟؟
طبعا واجبه كرئيس جمهورية وواجب القسم اللى أقسمه وإن لم يكن جاهز لهذا فليه يقسم القسم من الأول أصلا ؟؟؟

خامسا :
العذر الأكثر إستفزاز ....(( فقع من وجهة نظرى ))
حضرتك حاليا وليكن فى عهد السيد الرئيس المبجل المحترم محمد حسنى مبارك (( نتكلم بأدب )) وبتقبض 500 أو 650 جنيه (( مش قلنا بلاش قلة أدب )) ... وخد بالك إنته بتقبض كويس فى ناس تانية شغالة باليومية ومش بتشوف الطبيخ أو اللحمة أصلا ... دا بفرض إن حضرتك موظف ... قولى بقى هتربى عيالك إزاى من المرتب المحترم دا فى عهد الرئيس المبجل ؟؟؟
هتأكلهم حب الريس ؟؟؟ هتعالجهم بطيبة الريس؟؟؟ ولا هتفسحهم كل جمعة بجدعنة الريس ؟؟؟
ساعتها خلى المشاعر تنفعك .... السياسة والحكم لا يقيم بالمشاعر والعواطف بالرغم من إننا شعب عاطفى بالدرجة الأولى ... ومعظم أحكامنا وتصرفاتنا قائمة عالعواطف والمشاعر

كام سؤال أخير :
هل من حقنا أن نشمت فى مبارك ؟؟؟
هل يستحق عطفنا أو حبنا ؟؟
هل كل أعماله البطولية تيشفع له إطلاق النار على المتظاهرين والمدنيين أو إختطاف أبناء الشعب وتعذيبهم فى السجون ؟؟؟؟
هل يستحق الدفن فى مصر أو حتى جنازة عسكرية ؟؟؟
هل يستحق أن يحيا بيننا على أرض مصر ؟؟؟
هل يظل للأب حقوق حتى بعد أن يعق أبناؤه ؟؟؟
هل الفساد الذى إنتشر فى عهده يمكن المسامحة فيه ؟؟؟
ماذا عن شهداء الثورة ؟؟ وماذا عن شهداء العبارة وقطار الصعيد و أكثر من قطار غيره ؟؟ وماذا عن تصدير الغاز ؟؟ وماذا عن من ماتوا فى السجون ؟؟ وماذا عن مليارات سويسرا ؟؟؟ وماذا عن أمراض الشعب المصرى التى سببها له بفساد من حوله ومتاجرتهم فى دماء المصريين ؟؟؟ وماذا عن كل العقول المفكرة التى هجرت البلاد بسبب فسادها وإحتمالية دفنهم أحياء يشتكون فى طوابير دواوين الحكومة أو فى إنتظار قراراتها ؟؟ وماذا عن التوريث وجمال وعز وصفوت وسرور وغالى وغيرهم ؟؟؟ وماذا عن الرعب الذى سببته للشعب بفتح السجون ؟؟؟ وماذا عن وعن وعن ... لا تسعنى المدونة ولا حتى الكتب لنشر آلام الشعب التى سببتها بعنادك وجبروتك وتكبرك علينا وفسادك أولا وأخيرا ....

كلمة أخيرة للرئيس الأسبق حتى وإن لم يكتب لها النجاة لتصل إليه :

سيدي الرئيس :
كل الشعب كان يتمني لك خروجا كريما من السلطه...لأننا لسنا شعب خائن لا يقدر الجميل ولسنا أنذالا ولأنك كنت رئيسا لمصر أم الدنيا و أرض الكنانة وكنت جندى من خير أجناد الأرض ولكنك نسيت هذا وتناسيت من أنت وما هوا دورك حقا ونسيت أبناء وطنك وأمرت بإعدامهم فى الشوراع ... و للاسف أنت من اضطررتنا لذلك .. وعلي الرغم من فرحتنا العارمه بنجاح ثورتنا الا انها تركت لنا غصه في حلوقنا لاننا لم نكن نرغب في ان يخرج رئيسا لمصر بتلك الطريقه وكنا نتمني خروجا كريما ... وتركنا لك الأختيار تقديرا لك ... تركنا لك بعض الكرامة والتقدير ولكنك تماديت فى عنادك
أنت من وقفت في وجه التيار... تيار الحرية وموجات تسونامى الغصب وتكبرت على أن تتنحى ونسيت ان من يقف فى وجه تيار الحرية ومن يتاجر فى ألام الشعب وفقره لا يستطيع يصمد كثيرا .... وفى النهاية لا أدعو لك ولا أدعو عليك إنما أقول : حسبنا الله ونعم الوكيل والله يحكم بين الشعب وبينك يوم الدين ... لكن لا تنتظر منا شيئا ولا حتى عطفا ... فجراح الوطن منك أعظم من أن يطويها النسيان أو الشفقة أو حتى الحب

شاب فقرى

ملحوظة : محدش ييجى يقولى يا عميل وبتحب مبارك والرغى الفاضى دا ... المقال مجرد نقاش ورد على المتعاطفين معاه وتقدير له كرئيس جمهورية سابق وإنسان .... غير كدا لو مفهمتش يبقى تقرأ تانى لأنك مقرتش أصلا أولانى ...

ملحوظة 2 :
قريت إستاتس عند سووو عالفيش وكان بيقول كل ما نيجى نقول حاجة عن مبارك يقولوا لنا أبوكم مبارك ولو إتكلمنا عن الشرطة اللى بتقتل الناس فى الشوارع يقولوا إخواتكم معلش يا شباب .... دا إيه العيلة الوسخة دى
:D

تحيا مصر وتحيا الثورة

مش عارف أقولكم إيه .....
مبروك علينا ... مبروك لثورتنا
أبطالنا اللى إستشهدوا .... الناس اللى بيتت فى الشوارع ... الناس اللى خرجت وقالت لاء .... الشباب اللى مخافش من الموت ومخافش من الإعتقال والحبس ..... شباب مصر الرجالة بجد
إن شاء الله ثورتنا وكفاحنا دا يكون نور لغيرنا .... يكون دافع لكل الشعوب العربية إنها تتحرك وتقول لاء لظلم الحكام ولاء للفساد
جوايا كلام كتير أوى بس مش هقدر أكمله .... عندى مشوار مهم ... للأسف سيبت الميدان الصبح وراجع له دلوقتى أحتفل مع كل المصريين برحيل وتنحى الظاغية ....
ألف مبروووووووووووووووووووك لمصر
الصورة دى أنا بعتز بيها جدا من يوم 25 يناير وبزى الأمن المركزى :D
بعد ما إتضربنا بالطوب والقنابل المسيلة للدموع وإتبهدلنا ....
الحمد لك يارب
الحمد لك إن تعبنا وشهداءنا ودم أهلنا مراحش هدر ....
غدا تشرق شمس الحرية

مبروك تانى وتحياتى لكم جميعا
مش هقول شمتان فى اللى قالولى مش هتغير حاجة أو فى اللى إتريقوا على الثورة وعلى دم اللى ماتوا فيها .... اليوم ننسى كل شىء ... اليوم كلنا مصريين

فلتحيا مصر

شاب فقرى