شارياك

أنا : إيه اللى يثبت بقى إنك مش هتبيعينى تانى زى ما عملتى وتبعدى سنتين
هى : أنا بحبك وشارياك .... حتى لو مسألتش وسيبتنى كام سنة لوحدى

أنا : ..... :)
أحلى كلمة ممكن بنت تقولها على مدار التاريخ
ياااااااااااااااااااااه
ويا سلام لما تبقى قصداها مش يبقى كلام حلو بيتقال بيقوى العلاقة او بنقضى وقت وخلاص

***

اليومين دول
وقت إنتخابات مجلس الشعب
بتفكرنى بأيام ما والدى الله يرحمه إترشح لمجلس الشعب من اربعتاشر سنة تقريبا
ياااااااااااااااااااه
مش عايز أقولكم كنت ببقى مبسوط إزاى والكل بيقول
الواد كريم أهوه ... أبوه مرشح نفسه فى مجلس الشعب
كانت أيام حلوة أوى :)
وفى المدرسة وفى الفصل والشارع وفى كل حته
يلاااااااا
إقلب

***

العقول العبيطة

المشكلة العظمى
اللى بلاقيها اليومين دول
إنى إكتشفت إن فى نسبة كبيرة جدا من اللى أعرفهم عقولهم زوغيرة جدا
يا اما سنهم صغير ولسه مكونوش لا فكرة ولا رأى فى أى حاجة
ياإما بيعاندوا على أتفه الأسباب لمجرد العناد
او الدخول فى مجادلات عقيمة ملهاش أى قيمة ولا تغير من الواقع شىء وبتحرق الأعصاب عالفاضى
ياما محاولة التعمق فى نفسيتى أنا ومحاولة تحليلى ومحاولة فهم أسلوبى فى الحياة والصراحة دى حاجة بتفقعنى
لأنى بلاقى أسئلة مباشرة وبحس إنى ماشى فى موضوع عبارة عن إمتحان كيميا بتاع تانية ثانوى
او طرق من العقول الصغيره دى فى انها تعملى قلق فى حياتى بمجرد كلام أو تصرفات عبيطة
الصراحة مش عارف
بس متأكد إن كل شىء واضح دلوقتى

***

الخيبة التقيلة

انا كنت نشرت انى هنزل ببوست أتكلم فيه عن حاجات كتير مهمة
لكن بصراحة كل حاجة طارت من دماغى تماما لما سمعت الخبر اللى الحكومة والمجلس الاعلى للجامعات قرروه
إن مصاريف طلبة الإنتساب
هتبقى خمس تلاف جنيه بدلا من ربعميه وخمسين جنيه
يعنى حداشر ضعف
منعرفش بقى دا فيه اكتر من احتمال ليه
1- احتمال ان دا يخلى الناس بدل ما تدخل عيالها انتساب بخمس تلاف يدخلوهم كلية خاصة او معهد خاص
2 - يقللوا العبء عن الدولة شوية
3- يحرقوا فى دمنا ويخلوا الشعب جاهل ...خصوصا وإن طلبة إنتساب كتير جدا جدا جدا
أنا أفتكر إنى كنت مرة فى محاضرة كان فيها الفين طالب... ودا مدرج واحد بس فى تجارة القاهرة
يعنى فى مدرجات تانية ومجموعات تانية غيرنا حوالى تلاتة تانيين
تخيل بقى
انا عن نفسى اعرف ناس بشكل شخصى لو المصاريف عليت كدا
هيسيبوا الجامعة... وهيبطلوا دراسة
4- مخطط كبير لجعل التعليم بفلوس وغير مجانى
ويبقى اللى قاله رئيس الجمهورية لسه زى ما هوا التعليم مجانى
بس المصاريف مش مجانية ولا عادية ولا معقولة
عالعموم

إنتهى الكلام
إلى لقاء آخر

شاب فقرى

على حافة الشباك

بوست يوم خمسة رمضان
يحكى سؤال واحد بس
يارب حد يعرف يجاوبه ....

ليه أحيانا فى ناس ممكن تنط من الشباك من مكان عالى أوى؟؟؟

الإجابة بكره فى نفس الميعاد..

شاب فقرى

أخيرا قالتها وفوقتنى

بوست يوم أربعة رمضان
بعد مكالمة توتة إمبارح
النهارده يوم عادى بشكل مش عادى
يوم عادى بالقياس إلى ما كان من سنة ونص أو سنتين
الواحد بيصحى الصبح رايق وفايق وهوا مبسوط من كل كلمة سمعها إمبارح
مش محتاج حد يصحينى عشان أبقى مبسوط زى ما إتعودت الشهور اللى فاتت
النهارده حسيت إنى رجعت بالزمن سنتين مش عشر شهور بس
سنتين كاملين
مكالمة واحدة تقدر تمسح من عمرك سنتين وتصحى حب عمره سنين وسنين
تعرفك قد إيه قيمة كل لحظة فاتت
تعرفك إنته قيمتك إيه
تعرفك كويس أوى المكان اللى المفروض تبقى فيه
تريح قلبك
أنا كنت إتعودت على إن كل يوم فى حد يصحينى
طبعا لأنى شغال من البيت وشغلى كله عالنت الفترة الحاليه لحد ما أستلم شغلى إن شاء الله فى إسكندرية
فكنت متعود على كدا
لكن النهارده بالذات حسيت بتغيير وإختلاف جميل قوى
إن حد يصحيك من فترة نوم سنتين ويعرفك إن قلبك مكانش صحي بالكامل
وإن طاقة حبك قادرة تغير أى حاجة مهما كانت
أنا بجد النهارده سعيد
وعايز أنام من تانى .. محدش بيصحينى صحيح
بس عارف إنى قلبى صاحى على طول :)

شاب فقرى

وبرده بحبها زيادة

وبرده بحبها زيادة
ومحدش يسألنى ليه؟؟
مش عايز حد يسألنى هوا ربنا مخلقش غيرها ؟؟
ولا عايز حد يقولى بعد اللى عملته ؟؟؟
المهم إنها إتصلت بيه
توتة كلمتنى .....
عشان الحسد
وعشان الموضوع توب سوكريت
وعشان أنا فى مود مستحيل أوصله غير كل ما بسمع صوتها
وعشان ربنا يسهل الموضوع ويتم على خير
فأنا مش هحكى
بس كفاية تفرحوا معايه ...
:)

شاب فقرى

موبايلات وفطار طنطا

بوست يوم تلاتة رمضان
طبعا أنا وعدت نفسى بكل يوم بوست فى رمضان عشان نرجع تانى لأهل التدوين ونطلع من الوحدة والحاجات الوحشة اللى انا فيها دى
لكن بقى اللى مانعنى بجد بجد بجد ........
وبدون كسوف

الموبايل

فى المناسبات الهامة والأعياد والأجازات الطبيعى إن كل واحد زمان كان بيزور أهله ويفطر معاهم أو حتى يزورهم بعد الفطار ويقابل صحابه عالقهوة ومفيش فرصة للحب والحاجات دى لأن الواحد صايم ليل ونهار
دلوقتى بقى
بقى فى الموبايل
كل واحد بيكسل ويعمل فيها عبده المشغول
يتصل بأخوه فى البلد أو إبن عمه فى المريخ حتى
الإختراع الرهيب دا اللى قصر المسافات
بقيت بدل ما تروح تفطر مع أهلك فى البلد
يدوبك ترفع الموبايل وتكلم عمك وتفهمه الظروف وشكرا
بقت علاقاتنا بالآخرين منحصرة فى الموبايل وبس
تبعت مسج لأخوك تقوله كل سنة وانته طيب ورساله صوتيه للبنت اللى بتحبها تقولها بحبك وكأنك روميو اللى ملوش زى
والمرة دى بقى هتتصل لأن الحاجة مبتفهمش فى المسجات والحاجات دى وتقولها أيون ياماما أنا كويس وبخير .. رمضان كريم يا حبيبتى
وبعدين تريح أعصابك وتشوف بقى هتصلى ولا هتقعد عالفتيس بوك ولا هتخرج مع صحابك ولا هتعمل إيه
وهنا بقى ... يبتدى الموبايل يرن
إنته إتصلت بالناس اللى يهموك
إتبقى بقى الناس اللى إنته تهمهم
تلاقى بتاع عشر رسايل من صحابك من ثانوى
ترمى الموبايل لأنك لو إبتديت تهنى وتكلم الناس مش هتخلص قبل الفجر تانى يوم
وبعدين تستغفر وتحاول تكلم اى واحد فيهم تلاقى الشبكة واقعه
طيب هما بيوصلوا لى ازاى ؟؟؟
هوا أنا فقرى للدرجة دى ؟؟؟
حتى لما أفك كيسى وأقول هتصل بالناس ألاقى الشبكة واقعه
وفجاة المخفى حسه يرن وتلاقى الشخص اللى كنت بتتصل بيه
ومهما حاولت تقنعه مش هيصدق إنك مكنتش عارف تكلمه
وغير كدا
الساعات المجانية بتاعت فودافون
يعنى أنا مثلا ربنا كرمنى بسبع ساعات كل يوم الأسبوع دا مجانا
تخيلوا بقى بعد سبع ساعات ماسك الموبايل
هتتأكد فى قرارة نفسك إن داروين لو كان عايش فى زماننا دا كان قال إن الإنسان أصله sms
إتصالات ومكالمات ورسايل
ودا كله من غير حتى ما تلبس هدومك ولا تاكل لقمة عند حد
ياااااااااااااااااااااااااااااااااااااه
قد إيه أصبحنا بنتفه العلاقات الإنسانيه بمحاولاتنا لإختصار الوقت وإراحة أعصابنا بعض الشىء من واجبات قد تبدو ثقيلة لكن الواجبات دى هى اللى بتشكل حياتنا وبتخلى للذكرى طعم وبتخلى لرمضان نفسه طعم (( صلة الرحم )) بتخلى الواحد يفضل فاكر رمضان دا على طول
زى ما أنا مثلا فاكر رمضان لما كنت بفطر فى البلد فى بيت جدى والديك الرومى حلف ليعورنى وإتبهدلت فى اليوم دا
بس أولا وأخيرا هى ذكرى حلوة أوى
وعشان أحارب ظاهرة الموبايل فى المشاعر الإنسانية دى
قررت إمبارح إنى أفطر برا
أخدت بعضى وكلى ولبست وقررت إنى أسافر لأخويا وحبيبى وصديقى ضاضا
ضياء فى طنطا
نطيت فى الهدوم وركبت عربية يوم الخميس والسفر أساسا يوم الخميس زى الزفت والعربية كانت مكسره وحالتها وحشة
بس معلش خلينا ساكتين ... اللهم إنى صائم
كل التعب دا يهون عشان خاطر أفطر مع صاحبى وحبيبى والواحد نفسه تتفتح بدل ما هوا بقاله شهر مش عارف ياكل وداخلين فى شهرين أهوه
روحت وووصلت لأخطر مطعم أكلت فيه فى التاريخ ((( فى المرتبه التانية بعد حسن أبو على بتاع إسماعيلية )) وصلت قبل الفطار بخمس دقايق لكوبرى القرشى فى طنطا عند (( ميمى ))
صراحة أنا شايف أقل واجب إنى أعمل له إعلان هنا
والحمد لله طلبنا أكل والواحد قال هيقطع الدنيا أكل
وعملت حسابى وطلبت بزيادة
واول ما المدفع ضرب والمغرب قال الله أكبر
فجاة كدا ولوحدى وبدون إرادة لقيت مليش أى نفس أكل
يعنى يدوبك عشان مزعلش الراجل وأخليه يضربنى
كلت طبق رز تقريبا ست معالق
يعنى وجهة نظرى فعالة لما أبقى مع صحابى نفسى هتتفتح
وفعلا نفسى إتفتحت جدا وزودت فى الأكل تلات معالق بحالهم :)
زغردى ياللى منتيش ويانا
لكن المهم
إن الواحد قعد على كافتيريا (( كورنيش بلازا ))
يااااااااااااه ... والله وحشتنى خروجات الصحاب
فات سنة على علاقتى بضياء
وفات سنة على خروجى من اللى كنت فيه
وفات سنة تقريبا على بداية رجوعى التدوين بعد غياب سنتين
لما أشوف هبقى أعمل عيد ميلاد إمتى لليوميات الفقرية
وأهم حاجة
إن الواحد إبتعد عن الموبايل وقام بعمل علاقات مع الناس ورمى الموبايل فى شنطة السفر
سيبك إنته

رمضان كريم

شاب فقرى