ست أيام

لسه بنحلم
بكره وبيت وولاد وألف العالم وأعيش مرتاح
يمكن فى البلد فى بيت فلاحى بالطين
أو فى أى مكان فى الدنيا
يمكن فى حاجات بتمناها
وفاكر إن مستحيل أوصلها
وفاكر إنها المستحيل بعينه
فاكر إن الفراق خلاص نهاية الكون
التعب النفسى بيتحول لألم جسدى وبيحصل هلوسة وضيق تنفس وخنقة وسهر وإرهاق
لسه صابر عاللى بيحصل لسه بفكر فى بكره
يمكن بتعب يمكن بنهار كتير
يمكن بموت كتير
يمكن بخسر كتير أوى
بس مش بخسر فرص .... بسيبها تمشى بس ... لأنى مش عايزها ...أو مش هتكمل حلمى بالشكل اللى محتاجه
يمكن الحلم هيكمل لما الفرص دى تضيع ويتبقى لى الفرصة المستحيلة
الله أعلم عن الحياة وعن المستقبل
وعن اللى بيحصلى
يمكن فى خسارتى مكسب كبير
يمكن فى ألمى قوة بتعلمها إن بكره مش سهل وإن اللى فات مجرد حاجة بسيطة للى حصل
يمكن فى كل مرة بتألم فيها وبخسر حاجات كتير
والألم النفسى والجسدى بيزيد
يمكن فى كل مرة
بشوف حاجة مختلفة
فى كل ألم
فى كل موقف
فى كل خسارة
برجع أحلم تانى
يمكن فى خلق الدنيا والإنسان حاجة بتلهمنى إنى الصبر حلو وإن الصبر مهما كان مر وصعب إن الواحد يتحمله
لكن حلمى بينقلنى
لعالم تانى وأحلام بلاقيها بتتحول لحقايق
شوية شوية وشوية شوية بنلاقى جزء من حلمنا عالواقع
يمكن فات خمس سنين
فات وقت جبار
فات كتير
بس يمكن اللى جاى أكتر من اللى فات
يمكن أحلام بدأ يتحقق منها جزء
يمكن اللى حصلى وكسرنى هوا جزء من حلمى
لازم أدفع
وأتألم وأخسر كتيررررررررر
بس المهم إن الحلم هيبقى قدامى فى الآخر
سبع شهور من ناو 15 -2- 2011
مش مدة كبيرة ... دا ربنا خلق الدنيا فى ست أيام
وأنا مش إله .... أنا هجرب فى السبع شهور وأعمل اللى عليه
سواء نجحت أو فشلت ... فالفشل مش نتيجى حتمية
ولو فشلت فدا أكبر إثبات إن ينفع الواحد يجرب ويحلم عشان يعرف يعيش
وحلمى يطلع للنور
يطلع منه جزء
تطلع عليه الشمس ويظهر للكل
كل اللى قال إن اللى بقوله غلط وغباء وكل حاجة خسرت فيها هيشوف حلمى
يمكن ....
بس حتى لو موصلتش لحاجة وخسرت فرص وخسرت أكتر
هرجع أحلم تانى
لأن مفيش حاجة تانية قدامى
ولو حصل ومش إتحقق الحلم
يمكن يكون فى ألم
هيحققلى حاجات كتير أوى أوى أوى
هيوصلنى إنى أشوف حاجات حقيقية أكتر
مهما كانت النتيجة
مستنى سبع شهور
عشان أحلم من تانى

تحياتى يا قلبى

شاب فقرى

ملحوظة : صورتى أنا وصحابى من ست أو سبع شهور ... مش مهم حلمى ساعتها مش كمل أو إنهار أو ضاع منى ... بس اللى واثق منه
إنى هحاول تانى ... على فكرة ... الفقرى أقصى اليسار

البشر الفانون الضعفاء

أكتر حاجة بتبهرنى خلقها ربنا
هى الإنسان
بنبهر بالتفكير والتصرف وحتى الجنون
كل المشاعر
منها الحب والكره وحتى الألم الشديد اللى لا يحتمل
والأجمل توقع الأفعال والتصرفات
لكن من وجهة نظرى
إن أكتر حاجة عجبانى فى الإنسان بجانب عقله
إنه فانى
مش هيعيش للأبد
كل لحظة مميزة
مهما حملت اللحظة دى من ألم ووجع وتعب وإنهيار وصدمة وكارثة
مهما حصل للواحد من خيانه وتخلف من الآخرين
كل لحظة فى حياته مميزة
عمرنا ما هنبقى فى نفس الموقف
ولا فى نفس المكان بنفس الشكل والظروف
عشان كدا الناس بتعشق الصدف
لأنها بتخلى دنيتهم تحتمل عالأقل
بتخليها مناسبة وليها معنى
بتخلى ليها شكل مميز
بتظهر الجزء الخاص والجميل فى إننا فانيين
بتطلع الجزء اللى بيقول إن حتى لحظات الألم ممتعه
لأنها مميزة
مش هتحصل ولا حصلت قبل كدا
ولو حتى إتكرر الموقف
فبيختلف تصرف الإنسان فيه
وبيختلف إحساسه
سواء بإن (( جتته نحست )) على رأى الواد خليفه اللى كان معايه فى تانية عدادى :D
أو بقى أقوى ... على رأى البت سكوكرة
والأجمل فى إننا فانيين
إننا لازم ناخد قرار فى وقت ونتحمل تبعاته
ناخد قرار مش عارفين هيودينا فين
ولا هيمشى بينا فين
المستقبل غامض ومجهول
بيسبب الرعب للبعض والحب للحياة للبعض الآخر
أحب أحكى لكم حاجة حلوة إفتكرتها
لما كنت فى أليكس من مدة مع صحابى
روحنا نجيب واحد من محطة سيدى جابر
ونزلنا عند خالد إبن الوليد
الشارع من ناحية مؤمن كدا
ومشينا بقى مشى جبار
كنا واحدة بليل
مشينا لحد الساعة تلاتة
تايهين ومبسوطين بوجودنا فى الشوارع بليل فى الهدوء فى عز الشتا
وعمالين نقول الشارع دا شبه دا
ودا شبه دا
ومدينه فيصل منين ياولاد
والعيال إنهارت منى فى أول نص ساعة مشى بس :D
ياريتهم جربونى فى أول تلات ساعات توهان
ببقى مذهل :D
اللى نطلع بيه من الموقف دا
إن الموقف دا عمره ما هيتكرر
ولا عمرنا هنحس بمتعه زى دى تانى
يمكن نتقابل ونتمشى بس مش هيبقى نفس الإحساس
هنحس بمتعه يمكن لما نتوه تانى ونمشى بليل
بس مش هتبقى هى هى
أظن فهمتوا

بيس بقى :D

شاب فقرى

الصورة اللى فوق تصويرى
وهى هدية لفاتيما وبس
ومن أليكس
وأنا رديت فى التعليق اللى فات وقلت الموقف والمناسبه
والموقف اللى حكيته المرة دى بيثبت إنى بيبقى معايه فلوس وبحب أمشى من المهندسين لحد البيت :P
يعنى مستورة والحمد لله يا فاتميا
تحياتى :)

إنهيار

الصورة دى معايه بقالها أكتر من أربع سنين
بتفكرنى بكل لحظات الإنهيار والألم والتعب والعذاب والخسارة والندم اللى عشتها فى حياتى
زى ما بيحصلى دلوقتى بالظبط
دايما الإيد اللى بتتمد للمساعدة بتكون أبعد إيد ولا عمرنا بنطولها ولا بتطولنا عشان تحن علينا
ومش بيلاحظ أى حد أى حاجة غير لما بنضيع خالص وبنخسر نفسنا وبنتعب ونتألم
ونحس بحاجات مش حقيقية
ونحس إننا مش عارفين بنعمل إيه فى الدنيا
آلام لا تنتهى

شاب فقرى

الصفقة

كل حاجة فى حياتنا بقت صفقة
بقى كل شىء بمقابل
وكل شىء مدفوع
مش بتكلم على أساس الناس تنزل توزع فول نابت فى الشوارع
أو قرص فى الترب والمقابر
طبيعى إن كل حاجة فى الحياة ليها تمن
لكن المشاعر والإحساس
الحب
بمقابل ؟؟؟؟
مبقتش حاسس إن فى حب من غير مقابل أيا يكن
صحيح بنضحى فى الحب ودا منطقى جدا بل هوا جزء من الحب
لكن الغريب بقى
هوا اللى بيتدفع للحبيب
بتحب حد يبقى لازم يكون فى مقابل مهم تحققه
لازم إثباتات وبراهين وخلافه
مليون حاجة تثبت إنك بتحب قبل ما تدفع التمن الأكبر
دايما شايف إن التمن الأمثل للحب هوا الوحدة
صحيح هما ملهمش علاقة ببعض
لكن بتدفع كل مشاعرك ومليون حاجة تانية زى ما بتصرف فلوسك بالظبط
فإنته بتحرق نفسك من أجل حد قد يكون مش مقدرك
زى الشمعة
مش عارف ليه كل حاجة بقت صفقة ؟
يمكن إحنا اللى رخصنا تمننا ؟
ولا إحنا اللى خدنا بالنا من حد مش يستاهل ؟
ولا يمكن إتخدعنا ؟
اللى أعرفه فى حياتى
إن الحب الغير مشروط بأى مقابل
حتى الآن مش شوفته غير مرة واحدة بس
وساعتها إضطريت إنى أودع الشخصية دى وأقرالها الفاتحه كل ما إفتكرها
فعلا
مقدرش أقول غير يا خسارة

إلى كل حد وهبنا فى يوم حب بلا شروط
بجد شكرا

تحياتى

شاب فقرى

إذا أردت شيئا بشدة

كنت بسمع زمان نكته عن إن فى واحد بيحب ( يجرى ) بس ( يجرى ) مبيحبوش
كنت بضحك قوى كانت بالنسبة لى نكتة لطيفة مع إنى حاسس إنها دلوقتى تستاهل الحرق
لكن لما حبيت يجرى ويجرى محبنيش بدأت أفكر فى نقطة إن مش كل حاجة بتختارها ومستعد تعيش عشانها ممكن تكون مش عايزاك أو مش مفكرة فى كل دا أو مش مستعدة لتقبل كل التضحيات اللى إنته بتقدمها دى
وبصراحة أنا فكرت كتير فى رغبة الإنسان فى تملك الشىء
وفكرت أكتر فى طرق التملك
طبعا الطرق دى شرعية أو غير شرعية
لأن الحب جنون ومش كل واحد بيفكر بطريقة تحترم حريات الآخرين

أولا :
لاقيت إنك ممكن تفضل تجرى لحد ما يطلع عينك وقلبك يقف من كتر الجرى
لكن المشكلة إن برده يجرى مادام شايف إنه مش بيحبك فعمره ما هيحبك
لان ممكن يكون فى اختلاف فى وجهات النظر فى الحياة أو فى التفكير بيشوف فيها ( يجرى ) إن الحياة لا تحتمل
زى ما تكون فى واحدة شايفة ان فلان مينفعلهاش لأنه زى أخوها ( حاجة سخيفة )
أو فى واحد مش قابل فلانه لأنها ببساطة عقلها صغير
وفى الحالة دى لو صاحبنا فضل يجرى
قلبه هيقف من كتر الجرى ومش هيعرف يجرى تانى ولا يحب تانى


ثانيا :
إنك تفضل تجرى ورا ( يجرى ) لحد ما تموت من الجرى
ولا هتطوله ولا عمره هيغير رأيه
تنتحر أو تحرق نفسك كشمعه
عشان خاطر بتحب يجرى
ويجرى مبيحبكش

ثالثا :
خليك غامض ومحير وسر كبير
فى ناس بتعشق الأسرار وبتحب تكشفها وبس
فعشان كدا عمرك ما تقول السر لأى حد أبداااااا
خليك فى حالك يابن الناس
حتى لو بتحب ( يجرى ) خليك معاه غامض أحسن ما تخسره

رابعا :
الأسلوب المفضل عندى بقى

إذا أحببت شيئا بشدة ...طلع عين أمه

وهوا بيشرح نفسه مش محتاج منى شرح

تحياتى

شاب فقرى

الصورة اللى فوق من تصويرى لما كنت مسافر فى مرة من المرات
و.... مش مهم