أنا حبيبتك

- آلو

- إزيك يا حبيبى

- الحمد لله

- وحشتنى موووووووووت

- طيب مين ؟

- نفسى أشوفك بقى

- إنتى مين ؟؟

- أنا حبيبتك

- حبيبتى مين ؟؟؟ أنا معرفش صوتك أصلا ولا أعرفك

- مش مهم ... هتعرف أنا مين بكره

- ليه ؟؟؟ هتتصلى تانى ؟

- يمكن ... مش عارفة ... بس فى المستقبل أكيد هتعرفنى

- وليه معرفكيش دلوقتى ؟؟

- لأنك متقدرش تعملى حاجة ولا تعمل لأى حد حاجة

- طيب

- يلا بقى سلام دلوقتى ... هتوحشنى أوى والله .. مش قادرة أستنى اليوم اللى هشوفك فيه

- ربنا يسهل

- أوعدنى لما أبقى جمبك مش هتسيبنى ... صح مش هتسيبنى ؟

- مش هسيبك ... أوعدك مش هسيبك ...لأن الناس هى اللى بتسيبنى وأنتى اللى هتسيبينى مش أنا .

- مستحيل وبكره الأيام تثبت لك

- بكره الأيام تثبت لك أنتى

- سلام

- سلام

(( من وحى الخيال ))

شاب فقرى

حبيبتى والبطيخة

الأول نشوف الفيديو دا قبل أى حاجة وبعدين يبدأ البوست
ملحوظة هامة : الأغنية دى حاصلة عالأوسكار
إسمعوها
اسمها jai aho
وليها نسخة تانية بالانجليزى بس لفرقة امريكية مشهورة اسمها Pussycat Dolls
-------

----------

إيه هوا الحب ؟
إيه هى الثقة ؟؟
إيه هى الثقة فى الطرف التانى ؟
إيه هوا الحب ؟
أسئلة بتتكرر وتزن على دماغ الواحد
ببساطة جدا
زمان مسكت كتاب للأستاذ عبد الوهاب مطاوع بيحكى عن شاب فى كلية طب
حب بنت معاه فى الجامعة
هى من فقراء المسلمين الغلابة اللى مش لاقيين ياكلوا
وهوا إبن ناس جدا جدا جدا وأبوه تقريبا كان مدير أمن
المهم إن اللى حصل إنه طلب من أهله إنه يرتبط بيها
رفضوا لانه هوا إبن ناس وهى زبالة بالنسبة لهم
طبعا هوا مش كان شايف كدا
هوا كان بيحب
أنا الصراحة معرفتش معنى الحب فى حياتى غير مرتين
وأنا بقرا القصة دى لقيت معنى الحب دا
وحبيت مرة واحدة قبل كدا
مرة بجد
المهم
إن صاحبنا فكر كويس
وظبط وربط
وقرر يتجوز الآنسة
:|
طبعا الكل مش مصدق اللى حصل
لكن دا اللى حصل
وراح عشا معاها فى بيت عالسطوح
وفضلوا يدرسوا سوا ومرت سنة الإمتياز بمدايقات من أبوه
كان بيبعت له ظباط ومخبرين يبهدلوه ويكسروا له الأودة ستين حته
عشان يسمع الكلام ويرجع لهم تانى ويسيب البنت
لدرجة إن أبوه قاله : يابنى مش خدت منها اللى إنته عايزه خلاص سيبها بقى
اللى حصل إن حبهم دا إستمر
يوم بصل ويومين زفت
كان بيحكى فى الجواب بتاعه إن هما مكانش عندهم لحاف ولا غطا وكانوا بيرتعشوا فى الشتا ومش لاقيين ياكلوا
بالظبط كانوا عايشين عالعيش والميه
لحد ما خلصوا السنة الأخيرة
ربنا كرمهم وخلصت على خير وبدأوا يشتغلوا
وبيدرسوا عشان ياخدوا حاجة إسمها الزمالة
معرفش هى إيه الصراحة لكن اللى فهمته إنه درجة كبيرة فى الطب
الإتنين كانوا عايشين فى عيشة قحت
لحد ما ربنا كرمهم وإشتغلوا وبدأوا يعوضوا
وربنا كرمهم بطفل طبعا فى السنة التانية من الجواز
وبالرغم من المشاكل والقرف كملوا
وفضلت جمبه وفضل جمبها
ولما ربنا كرمهم وبقوا فى مشتوى تانى خالص غير العشة اللى كانوا عايشين فيها
عملوا فرح كبير
وكان فى الفرح دا أولادهم معاهم
فرح بعد الحصول على درجة علمية كبيرة
وبعد النجاح وبعد ما بقى عندهم أطفال
وأهلهم كلهم حضروا
خصلت الحدوته
صراحة أنا مكنتش فى حاجة إنى أقرى رد الأستاذ عبد الوهاب مطاوع
لأنه مش هيفرق معايه كتير
لأن مفيش تعليق ينفع عالقصة
أنا إكتفيت بكاتب القصة والكلام اللى كتبه
الموضوع حقيقة
ويمكن ربنا يكرمنى وكاتب القصة الرهيبة دى يرد عليه فى البوست دا
لكن اللى عايز أوضحه بإختصار
إن الثقة دى حاجة لا يمكن منحها لأى حد
مش أى حد نقرر إننا هنكمل معاه حياتنا كلها بحلوها ومرها
مش أى حد هيكون معانا طول المشوار
اللى حاولت أطلع بيه من القصة
إن لو هى كانت بتحبه وبتشغل عقلها كانت قالت أتجوزه لأن مزاياه كتير
أو عيوبه قليله وبيخاف ربنا
لكن بطلة القصة مفكرتش فى كدا وقالت لما أتجوزه أهله هيرموهع زى الكلب فى الشارع
وكمان البطل مفكرش هى أحسن ولا هوا أحسن
مفكرش فى دا كله
عارفين لما يبقى فى حالة حب الأتنين فيها مش بيدوروا على مين الأحسن ومين الزبالة ؟؟؟
لما يبقوا الطرفين عارفين بعض وكل طرف واثق فى التانى
طز فى الظروف
أنا واثق فى إختيارى
وزى ما قلت للأستاذ abo ali
لما قال تختار ديل الأسد ولا راس القطة
أنا قلت له لما أختار دا أو دا مستقبلا
هل لما أكون ديل الأسد والأسد يطلع عبيط وبياخد على قفاه من كل فيران الغابة هل هبقى مبسوط ؟
وهل لما أختار راس القطة و أى حاجة تعتدى عليه أو تضربنى هبقى مبسوط ساعتها بتفكيرى ؟؟؟
المهم حالة الرضا بعد الإختيار
الثقة فى الطرف التانى
هل أنا واثق فى الأسد وتفكيره
إنى أبقى مجرد تابع ليه ؟
هل مستقبلا هكون راضى عن حالتى
طبقا للقصة
أنا أختار أكون راس القطة
عشان لما الدنيا تتعك برده هحكون راضى عن نفسى ومبسوط وتمام التمام
حتى لو بقت الحالة زفت الزفت
لأن ببساطة أنا معايه حاجة أنا اللى مختارها
وكمان أنا واثق فيها
لا فكرت فى عيوب ولا مميزات ولا بلا أزرق

هل الثقة تمنح لأى حد ؟
هل ممكن أقابل حد وأمنحه الثقة دى بالساهل كدا
حتى إن قلت للطرف التانى أنا واثق فيك ؟
لاء طبعا
الثقة دى بتتكون مع الأيام ومع المواقف المختلفة
الحياة عاملة زى إختبارات
كل ما تعدى إختار معين مع الطرف التانى
بتثق فيه أكتر وبتثق فى رأيه وتفكيره وحبه وفى كل حاجة
كل أما بتشوف هوا بيضحى قد إيه
هوا بيفكر فى إيه
بيشوف الحياة إزاى
بيحافظ عليك إزاى
مش مهم يكون فاشل ولا ناجح ولا مستواه ولا أى حاجة
المهم إن إنته تكون واثق فى المعدن
الإنسان كمان ليه نواة زى البلح كدا
هل أنته واثق فى نواة الإنسان اللى قدامك
هل إنته واثق إن جواه حاجة حلوة مش صفيحة زبالة ؟
دا هوا المهم
ممكن يكون فى عيوب
مفيش بنى آدم كامل
لكن اللى أنا شايفه إن الناس بقت بتتعامل مع الطرف التانى
إنى بعترف بالحب وبقول إنى بحبك ببساطة جدا
تبعا لميزات وعيوب وهتريحنى ولا لاء وهل هتمتحنى الحنان اللى انا مستنيه ولا لاء
بقينا بنتعامل مع الحب على أساس ان اللى قدامنا حلو
طيب بعدين بقى
لازم نركز فى المميزات والعيوب عشان البطيخة متطلعش قرعة
نحن فى زمن البطيخ
هل لما البطيخة تتفتح هل هتعجبك وهتبقى تمام التمام ؟؟؟
(( دا بعد الجواز لأن مش كل حاجة بتطلع فى الأول كدا وبتلاقى كل حاجة إشطة ياريس فى الأول ...أكيد فى حاجات مش بتظهر غير بعد الجواز
أساسى ))
هل خلاص الحب بقى بالنسبة لنا مميزات وعيوب وإتفاقات وشوية ورق ؟؟؟
هوا لازم نتفق الأول قبل أى حاجة ؟
يعنى مثلا
أنا عن نفسى وبالنسبة لى شايف إن الراجل
اللى هوا الراجل
الراجل
الراجل اللى هوا بيحتوى زوجته بحنانه وبحبه وبعطفه ومش بيحرمها من أى حاجة ولا بيبهدلها ودايما عنده معززة ومكرمه
وبيحاول يسعدها
واللى بيعرف يفكر فى بكره
محدش يفهم أى حاجة زى أشباه الرجال اللى ماليين الدنيا دلوقتى
الراجل ليه مطلق الحق فى السيطرة على بيته وهوا صاحب الكلمة الأولى والأخيرة
هل معنى كدا إنها هتعيش صفر عالشمال ؟

لو فكرت فى كدا يبقى هى مش بتحبه
نسيت إنه بيحبها
نسيت إنها كل حياته
إنها أهم حاجة فى الدنيا ومستحيل يكسر نفسها أو يدايقها أو يخليها تغضب يوم واحد
ولا حتى دقيقة واحدة
يعنى لو إتناقشوا فى حاجة وموصلوش لحل
لازم هى تسمع كلامه
لأنها ووووووووووواااااااااثقة فيه وفى رأيه
واثقة فى حيه وإهتمامه بيها وإنه عمره ما هيرضى بحاجة تزعلها
ولا هيمنع عنها حاجة زى الشغل مثلا عشان مجرد إنه يذلها وتبقى محووجة له على طول زى ثقافة رجالة كتيررررر أوى
الثقة
الحب
الإحترام
الإهتمام
الطاعة
فين المعانى دى ؟؟؟
هل يعرف البعض إن فى الصعيد اللى الناس بتفتكر إن هناك الست مش واخده حقها نهائى وبتتبهدل
هل يعرف البعض إن الست هى اللى بتحرك الراجل
بتفكيرها وحبها وحنانها وعقلها الراجح
مش الكل
أنا عن نفسى مكنتش أعرف لحد ما شفت
سواء فى الريف
أو فى الصعيد
لكن عندنا فى المدينة بيحصل كدا
الحقيقة إن الست لما بتسلم للراجل جوزها وتمنحه حياتها وروحها وتحبه
ضعفها هوا مجرد قوة أخرى لا يعلم عنها العالم شىء
ضعفها هوا مطلق القوة
لا يمكن واحدة هتروح تهزق جوزها وتقوله يلا يا جزمة هاتلى عربية
لكن لو جوزها دا بيحبها وبيتمنى لها الرضا لأنها كل حياته وروحه
مش هيتردد ثانيه فى منحها أى حاجة فى حياته حتى لو هيموت بعدها
لأنها فى اللحظة دى بقت هى كل حاجة
ربنا يهدى الجميع ويوصل الحقايق دى للستات ويفوق الرجاله

مستحيل منح الثقة
بدون التأكد من الطرف التانى
بدون رؤية الطرف التانى تحت كل الظروف وتحت كل الضغوط
هل هيفضل ولا هيسيب حبه دا يضيع مع التيار
هل هيتمسك بالحب دا لآخر لحظة
أحيانا عن نفسى ممكن أخفى حقايق وأسيب العيوب تظهر وجوانب الضعف
عشان أشوف الطرف التانى هيعمل إيه
ولو مفهمش معنى الحب ولا حبنى
يبقى خلاص مع ألف سلامة

شاب فقرى

إلى سيدى الفاشل

السلام عليكم ورحمة الله وبركاته عزيزى الفاشل
يارب تكون بخير
أخوك فى الكفاح بجد بيتمنى يشوفك
لأن الفشل بقى اليومين دول سهل أوى
والناس كلها بتفشل وبقينا كتير أوى
بجد مش قادر أقولك الفشل لم قد إيه
والله يا صاحبى ما عارف أوصفلك إزاى إن الفشل بقى بيلم أوى
حتى الناجحين والكويسين والأقويا بقوا بيتمحكوا فى الفشل
وبيدوروا عليه بمنكاش
تعرف يا صديقى
واحد صحبى قابلته إمبارح يادوب لسه طالع من دوامة الإدمان
ومتعالج وحالته تمام ومر بفترة الكل وقف معاه فيها وكفايه إن أهله ذات نفسهم وقفوا جمبه
بصراحة الراجل منظره كان يفرح
لأنه من زمان وأنا بعتبره شخصية قوية وبيفكر وبنى آدم بجد من اللى خلقهم ربنا
وأهله ناس كويسة وعايزينه ينجح ويبقى كويس
وبعد ما عملنا لقاء إحنا التلاتة اللى أصدقاء من أيام ثانوى
وسلمنا على صاحبنا التالت ومشيناه وركبناه العربية لحد بيته
لقيت صاحبى اللى المفروض شخصية كويسة وبيفكر وربنا كرمه وإتعالج
بيطلع الموبايل وبيتصل بديلر عشان يجيبله حشيش
آه والله الناس يا أخى مبقتش عايزة تنجح
مهما توفرت لها أساليب النجاح
متشوفش غير النص الفاضى من الكوباية
وأحيانا نظرهم بيضعف تماما ومش بيشوفوا الكوباية :D
طيب وهنروح بعيد ليه يا صاحبى تعالى أوريك أبسط مثال
قصة حب بين تيفا ونونا
قصة حب رهيبة إستمرت سنين وسنين فى الكلية
طبعا كلمة كانوا بيعشقوا بعض دى شوية وتعتبر تافهة وملهاش معنى جمبهم
والراجل الصراحة كان عامل اللى عليه
كل أجازة يسافر لقرايبه فى هولندا ويقعد يشتغل هناك شهرين تلاتة
يرجع بحوالى عشرين ألف ولا حاجة يدفع منهم مصاريف الكلية والباقى يصرف بيه عالبيت وعلى أهله
بجد حاجة تبسط لما تشوف قصة حب جميلة وفى طريقها للنجاح وتبقى حياة زوجية سعيدة
والحمد لله إتخرجوا السنة اللى فاتت الأتنين وتقديرات كويسة وصاحبنا تيفا راح يتقدم لأهل البنت
عشان يخطبها
شكلك فاقس الحوار وعارف أنا بتكلم على إيه

أهلها رفضوا

دا لو كان من الكفار مكانوش عاملوه كدا
فما بالك بشاب كويس وبيحب بنتهم وعلى استعداد يسافر آخر الدنيا عشان يسعدها
مش هطول فى الحكاية عشان عارفك بتكسل تغسل وشك الصبح
صاحبنا بعد ما إترفض زهق وإتنرفز وإتجوز بنت كانت شغاله معاه فى بلاد برا
والله زى ما بقولك كدا :)
بنت هولندية
هتقولى مش فاشل ياعم روح إلعب بعيد
بقى فى حد يسيب بنات بلده كلهم اللى 85 % منهم مثقفات وناجحات ومتدينات ومتربيات ويروح يتجوز واحدة ملهاش مله أصلا ومش من بلده كمان
من وجهة نظرى هوا فاشل
المهم يا صاحبى سيبك من كل الناس اللى بتتمحك فى الفشل دى
إنته عامل إيه وإزاى المدام والأولاد
وأوعى تقولى عديت التلاتين ومفيش شقة ومفيش زوجة ومفيش أولاد ومفيش داعى
تصدق أنا خلاص قربت أتنقط
الناس مبقتش عايزة تشوف الجانب الحلو فى الحياة
هتقولى إن حالتك لسه متكحرته وزى الطين هقولك
إن دايما الجانب الحلو فى الحياة إننا عايشين وقادرين ناخد نفس
لاء إوعى تفهمنى غلط مش نفش من السجارة
يعنى قصدى إنك عايش وربنا كارمك بالحياة
يعنى لسه فى إمكانية فى التغيير تقدر تتغير وتبقى حاجة ميه الميه وتمام وفل الفل
لاء يا صديقى إوعى تفهمنى غلط وتقول إنى تركت معسكر الفاشلين بقى وخلاص مش هكافح فى الفشل معاكم أنا بس بحاول أنقص المعسكر واحد لأنه خلاص بقى زيادة بشكل أوفر أوى وبجد بقى زحمة وأنا عندى حساسية من الزحمة

تعرف إن نظرتنا للحياة هى اللى بتشكل دايما إختيارتنا
يعنى مثلا : ممكن إنته تشوف المجال اللى إنته فيه ملوش مستقبل وزى الزفت ومش بيكسب وحالته طين وبينقرض بس

أحب أقولك يا صديقى إن فى شركات عالمية متخصصة فى صناعة حاجات تافهة وهبلة أوى
لاء وإيه معتمدة وعليها ختم
يعنى تيجى تشترى مثلا جزمة (( صراحة مش لاقى حاجة أقل من كدا ))
ممكن تلاقيها أمريكانى أو تلاقيها هندى أو حتى بتنجانى وعليها ختم الشركة أو ختم عم الحاج السعداوى أشهر صانع أحذية فى بلده
تخيل واحد شغال فى صناعة الجزم ولسه مستمر وعايش وصناعته متقدمة و مبسوط
ليه مش تكون زيه مهما كان مجالك مقرف
صدقنى لو حبيته وتعبت وعملت اللى عليك هتلاقى الوسيلة اللى تخليك أحسن وأحسن وأحسن
وتسيب المعسكر بقى
دا يعتبر الجواب الأخير اللى ببعتهولك يا صاحبى
أنا جهزت خطة للهروب من المعسكر
بجد لو ناوى تهرب معايه
إبعت لى جواب
بس صدقنى على ما يوصل هكون هربت
هتوحشنى يا دزمة

مع تحياتى وإحتراماتى

أخوك يا أبو الشباب الفقرى الكبير

ملاحظة : كتبت بوستات كتير أوى الفترة اللى فاتت بس مكنتش بنشر لأن مفيش وقت للتعليقات والردود
وهنشرهم إن شاء الله اليومين دول بس أكيد مش بمعدل سته يوميا
بالمناسبة : أنا فزت فى مسابقية خيخيه وهاخد جايزة عشرة جنيه :D
حاليا مشغول بجهز عشان أرجع لشغلى تانى وأستمر
وكان دا أول حاجة جت فى بالى إنى أكتب جواب وداع لصديقى الفاشل
وحشتونى
لكن خلاص رجعت الحمد لله

(( تم فتح الغير معرف فى التعليقات ))

الحلاق والشعر الأبيض

الحلاق: إزيك يا باشا
أنا : الحمد لله
الحلاق : زى كل مرة نفس الشكل ؟
أنا : أيوا الله يكرمك بس فى الإنجاز عشان مش فاضى
الحلاق: مالك يابنى
أنا : مالى إزاى يعنى فى إيه ؟؟
الحلاق: فى حاجة مدايقاك ؟؟ أو فى مشاكل فى حياتك ؟
أنا : الحمد لله على كل حال ... بس ليه ؟
الحلاق : أصل شعرك أبيض وإنته لسه معدتش التلاتين
قربت من المراية لقيت كلام الراجل صح
أنا كنت عارف إن فى شعر أبيض من أيام الطفولة
لكن دلوقتى بيزيد ليه ؟؟؟
أنا : قول يارب اليومين دول يمروا على خير و إحلق وخلاص ياعم

---------



----------

I'm tired of being what you want me to be

Feeling so faithless, lost under the surface

I don't know what you're expecting of me

Put under the pressure of walking in your shoes


(Caught in the undertow just caught in the undertow)

Every step that I take is another mistake to you

(Caught in the undertow just caught in the undertow)


I've become so numb I can't feel you there

Become so tired so much more aware

I'm becoming this all I want to do

Is be more like me and be less like you

Can't you see that you're smothering me?

Holding too tightly, afraid to lose control

?Cause everything that you thought I would be

Has fallen apart right in front of you

(Caught in the undertow just caught in the undertow)

Every step that I take is another mistake to you

(Caught in the undertow just caught in the undertow)

And every second I waste is more than I can take

I've become so numb I can't feel you there

Become so tired so much more aware

I'm becoming this all I want to do

Is be more like me and be less like you

And I know I may end up failing too

But I know you were just like me

With someone disappointed in you


I've become so numb I can't feel you there

Become so tired so much more aware

I'm becoming this all I want to do

Is be more like me and be less like you

I've become so numb I can't feel you there

I'm tired of being what you want me to be

I've become so numb I can't feel you there

I'm tired of being what you want me to be

-----
بإنتظار يوم 3-2

لأعود

لأبدأ صناعة المستحيل

رسم إبتسامة

وكسر الصمت

وأشياء أخرى

شاب فقرى

لقاء المدونين فى نادى الزراعيين

السلام عليكم ورحمة الله وبركاته
أولا :
بعتذر عن الإنسحاب المفاجىء من القاء وبشكل أنا شايف أنه مش حلو
بس مقدرتش أقول إن دماغى هتنفجر من الصداع عشان مخليش الناس تقلق أو تزعل
بس الحمد لله إنى عرفت أروح
نتكلم بقى فى اللقاء
------------

اليوم اللقاء كان جميلا وفاق كل توقعاتى
حضر اللقاء مدونين كتير جدا
أذكر منهم :
شيما الشعب لابد له من حكومة تشكمه
abo ali
وسوووووووووو
خالد همس الأحباب
داليا قوس قزح
عادل بيه
محمد غاليه
منامينو
رومانسى
دودو عاشقة الرومانسية
كيارا
الدكتورة ستيته حسب الله الحمش
شمس النهار
فاتيما
سها سكرة
ومواطن شوجاع
ووليد الدوغرى
وهانى أبو زيد الهلالى
وعمود نور
وأم بتول وإبنتها
و i'm the Crazy one
و كأنى أتكلم
وصبرنى يارب وزوجها
وضياء بيوتيفول مايند
وappy
وبنت خيخة وأى كلام
الحمد لله اليوم كان جميل وفاق كل توقعاتى
وجرت نقاشات جادة وقوية أسعدتنى بجد
وأنا كنت بدخن معظم الوقت مع إنى والحمد لله مبطل سجاير
بس بدخن أحيانا كنوع من القلق والتوتر والدلع الماسخ من العبد لله
أنا أول بوست يتنشر عن اللقاء لأنى من أوائل اللى روحوا
بس مش هقدر أتكلم عشان الصداع
....
أوجه كلمة لكل اللى حضروا اللى لقاء
(( بجد شكرا عاليوم دا كان يوم رائع ويارب يتكرر تانى وأنا سعدت بيكم جدا جدا جدا جدا جدا جدا ))
أنا آسف لو نسيت أقول إسم حد والله بجد آسف لو نسيت بس غصب عنى
ولكن الصداع مدمر خلايا المخ ومخلينى فاقد حاسه التفكير
ودا هيخلينى مكونش متواجد النهارده ولا هقدر أحط تعليقات ولا أنشر التعليقات ولا أرد عليها
عذرا أخوانى الطيبين
دعواتكم عشان بكره يوم صعب بجد
وعشان ربنا يكرمنى وأفوق من الصداع دا
تحياتى لكم جميعا
أحبكم فى الله
شاب فقرى