كسبنا والحمد لله

الحمد لله مر الماتش على خير وكسبنا

بعد طلوع الروح طول الماتش والتلات تبديلات بتوعنا

والتكسير اللى عملوه فينا

بس ربكم كريم ومنسيش المصريين وجبر بخاطرنا

والحمد لله الحمد لله الحمد لله الحمد لله الحمد لله كسبنا

الواحد بقاله كتير أوى مفرحش كدا

ربنا يفرحهم ويجبر بخاطرهم زى ما جبروا بخاطرنا

ومبروك يا شيما

وربنا يفرحك كمان وكمان ويفرحنا كمان وكمان

مصر .....
مصر .....
مصر .....

تى ترى تى تى
مصر
تى ترى تى تى
مصر
تى ترى تى تى
مصر

هنكسب بعون الله

أول حاجة شوفوا الفيديو دا

http://www.youtube.com/watch?v=i-3tDB3w53M

اغنيه راب لاحمد مكى عن الماتش
----------

أول جريمة فى الكون كانت بين إتنين أخوات
قابيل هابيل
ياريتنا بنتعلم من كل اللى فات
تاريخنا عاد نفسه مليون مرة ومبنتعلمش
وبنسأل نفسنا طب ليه دايما طب ليه مبنتقدمش
قالها راجل حكيم زمان :
فى الإتحاد قوة وفى الفرقة ضعف
ياريتك تفهم معنى كلمة ضعف
عارف الغرب أتحول عالم أول ليه ؟؟؟
مشيوا بالظبط عاللى فى يوم جدودك قالوا عليه
الغرب إتعلم مننا فكرة الإتحاد
وترجم كل كتبنا للغتهم وإتقدم وإستفاد
وإحنا بقينا عالم تالت
وكرهنا لبعض زودها
خلانا عالم مكانه ثابت

يا مصر ويا جزائر
إنتوا أحفاد شهداء لرفع إسم العروبة فوق ...فدوها بالدماء
والله لو عملتوا نص اللى إتعمل ما بينكم ساعة ما أمريكا جت غزت العراق
مكتش دخلت
خير أجناد الأرض وأقوى وأعظم ثوار
لو إتحدتوا مع بعض صوتكوا هيكون جبار
قريت جرايد برا ... شفت اليوتيوب وإتنكدت
ياااااااااااااااه لما الحفيد يضيع جهد الجد

صراع الأخوات بقى مانشتات جرايد الغرب
كل المحطوط عاليوتيوب مش تشجيع دى إسمها حرب
تشجيع بلودك من حقك مش بس من حقك دا من واجبك
إهتف قوم إرفع علمك
وإوعى تخلى الأنانية والعصبية تشوه وطنك
الوطن العربى ما هو وطنى ووطنك
فيكم نفس الأديان
فيكوا نفس الألوان
نفس القارة
نفس الوطن
إنتم الإتنين أخوات
فوقوووووووا

-------------------
أنا مسحت البوست وكتبته تانى
كتبت الأغنيه عشان الناس كلها تفهم إننا مش بنهاجم الكورة ولا اللعب
بنهاجم التعصب والضجة الجامدة المعمولة عالماتش
بنهاجم الغباوة فى التشجيع من الجماهير للفريقين
بنهاجم أى حد ينسى إن العداوة دى لو إتزرعت هيبقى كأننا بنكرر قصة هابيل وقابيل
مش معنى اللى كتبته إنى مش بشجع مصر إنى مش وطنى ولا مصرى
الوطنية مش فى الكورة يا هندسة
وكمان فى ألف مليون حاجة تفرح المصريين مش الكورة بس
بس هى اللى قفلت معانا

يارب يكون الموضوع وضح وإتفهم


وأخيرا وليس آخرا
انا بشجع للمنتخب المصرى بالفوز
ويارب يجبر بخاطر المصريين ويكسبنا الماتش
ونوصل لنهائى كأس العالم كمان :)
مش بعيدة على ربنا
قادر على كل شىء

خالص تحياتى

شاب فقرى

وأوقات بموت قصادى

((

غريب يا حالى ... غريب ومش مفهوم
ساعات بلاقى نفسى عايش فى وسط هموم
وممكن بكون ورقة متقطعه ومرميه فى كل حته
وساعات قلبى يدق ....لكن من غير لزوم
أيام بلاقى نفسى بضحك فى عز حزنى
وأيام دموعى تبكى على نفسى فى عز فرحى
وأيام بتعدى عادى ....وأيام عن نفسى راضى

وأيام بموت قصادى

سحابة الغيوم زودت الهموم علينا

))
أغنيه راب
ل Priesto Ft Romel B
بإسم sha7's leh kayan

تحياتى

شاب فقرى

طالبة معايه

إزيكم

البوست التالت عالتوازى النهارده

دلوقتى أنا كنت كتبت إتنين وقررت أنام

لكن فجأة

قررت إنى أصحى و أطبق ومضيعش يوم الخميس اللى أنا بعتبره ثورة قومية لا يمكن التفريط فيها تحت أى مسمى

ولذلك أنا طالبة معايه ناو الحاجات دى :

- قهوة عربى ... عملت كوباية تقيلة جدا
- صوت مودى راب ...أسمع أغنيه عايز أنام آخر حاجة نزلت إمبارح
- مذاكرة داخل سيسكو ... الواحد يفتح المنهج وينط فيه بقالى كثير مش إتغابيت فى الشبكات
- إنى أكتب كمان بوستين النهارده وهيكونوا وعد منى حاجة مميزة جدا
- إنى أخد أجازة من الشغل واللى مش عاجبه يولع فى نفسه :D
- إنى أفوق من النوم وأطبق يومين وهيبقى يوم بتنجان أصلى فهمى :)
- أدخل عند ponpona منى سلامة و أقرا مدونتها كمان مرة

طبعا محدش يقولى هات شفطة أو اللى يشرب لوحده يزور :D
أان قاعد هنا طول اليوم متابع المدونة وبذاكر
لا هفتح فيس بوك ولا ميلات ولا أى حاجة غير لما الغزالة تروق كدا وأنجز بتاع تلات chapter أو فصول فى سيسكو
ساعتها بس ممكن أرضى عن نفسى وأسترخى فى صمت عالكرسى
ويغمى عليه وأنا قاعد فى مكانى وأنام تلات ساعات وأصحى ألاقى الماوس فى إيدى والكيبورد فى حجرى
ولسه فى مكانى
أقوم و أكمل كمان ساعة فى نفس المكان
وبعدين أقوم و ألبس أتهيأ وأتغدى :D

صباح الفل

النهارده الخميس

من وجهة نظرى اللى يضيع يوم الخميس يستحق أن يضرب بالشوز القديمة :)

صباح الورد عليكم يا حلوين

كان معكم

شاب فقرى
الساعة 7:19 صباحا

الموت يلقى عليكم السلام

السلام عليكم ورحمة الله وبركاته

إحم إحم

الفقرى يتحدث

الأسبوع اللى فات حتى الأمس بيحصلى حوادث كتير جدا
نبداأ بمواجهات مع الموت

........|| مواجهات مع الموت ||.........
أول موقف كان فى فرح طنطا وإحنا طاالعين من طنطا
طبعا راكبين عربية ملاكى ومسافرين طالعين القاهرة
والسواق حبيب هارتى كان شارب حشيش :D
طبعا كان مهيص ومشهيص العملية والحالة تمام
بس والله على قد ما كنت قلقان على قد ما شكرت صانع الحشيش دا واللى إبتكره وقلت الحمد لله إنه شربه
لأنه والحمد لله السواق مزاجه مش بيتعدل غير كدا ولا بيعرف يشوق غير كدا
ملحوظة : العربية متأجرة هى والسواق :D لأحسن حد يقول بتصاحب حشاشين يا فقرى :$

الموقف التانى وإحنا راجعين من المعادى عالدائرى
كنا سايقين ببساطة جدا على 180 كيلو متر فى الساعة
يعنى ال 500 متر بنمشيهم فى ثانية :D
وفجأة الزيت اللى فى العربية وقع أو حصل مصيبة ووقفنا بشكل فجائى وكما هنتقلب :D
وطبعا مش عايز أقولكم ربنا ستر لو حد كان جاى من ورانا بسرعة كان زمانكم دلوقتى بتعزوا فى الفقرى
رغم إنى عارف إن أهلى مش هيسكتوا غير لما ياخدوا بالتار بس مش مشكلة إبقوا عزوا فى المدونة هنا
والحمد لله ربنا حلها لنا فى الليلة دى ووصلت البيت الساعة سته :D
علما بأن الموقف دا حصل عالطريق الدائرى الساعة اتنين

نسيت أقولكم إن وإحنا واقفين جت عربية ضخمة تريلا كدا
وقام الكاوتش مفرقع ولولا ستر ربنا كان زمانها خبطت فينا وبقينا كلنا فطيرة باللحمة :D
طبعا عطلت فى نفس المكان
محدش يقولى إن العيب من الفقرى بقى :$
عالعموم أنا هقول لوزارة المرور فى مصر هنا
إنى لما أنزل أمشى فى الشارع يفضوا لى الطريق
أنا أهم من المسؤلين
لأن لو مشيت فى الطريق ممكن تحصل حوادث أو كبارى تقع
فبالذوق توقفوا الطريق وتريحوا دماغكم :$

الموقف التالت :
لما ركبت من إسماعيلية عربية طنطا وفوتت فى الطريق عالزقازيق وبنها ونزلت فى بنها
كنا سايقين الساعة اتنين ونص وكان الجو زفت والطريق كله عربيات نقل كبيرة وبلاوى
وكنا هنموت متين مرة مش مرة واحدة بس
ولما نزلت بنها وملقتش عربيات وقمت اتمشسيت وكنت ناوى أمشى لحد القاهرة بالظبط 45 كيلو
بس لقيت فى أول إستراحة عربية توصلنى مصر والحمد لله وصلت فى عربية نقل
شفت فيها الرعب :D

ما أحلى الرجوع إليه

الموقف الرابع :
إمبارح وأنا فى الشغل مسكت مكنه بشكل غلط
نسيت
قلة تركيز كنت بفكر فى حاجة تانية
طبعا مش عايز أقول إنى كان ممكن أموت أو إيدي تتقطع أو يحصلى كارثة بس ربكم بيحبكم وبيحبنى وخلانى أعيش عشان أكتب لكم البوست دا
طبعا المكنة إسمها الصاروخ
اللى يعرفها هيعرف أنا بتكلم عن إيه بالظبط

ونتوكل على الله ونخش فى أحداث أخرى

أثبتت لى الظروف إنى شخص عامل زى الجوكر أى مكان بيتحط فيه فى الكوتشينه بيسد
وبيلعب وبيبقى ميه ميه
لما نزلت الشغل اللى قلت لكم عليه بالاضافة للدراسة فى الكورسات وبالاضافة لشغل النت وبالاضافة للدراسة
لقيت نفسى بتعلم بسرعة والحمد لله
إكتسبت معلومات كتيرة فى وقت قليل
قلبى جامد بقيت بستخدم حاجات ممكن تودينى فى داهية عادى جدا :D
دعواتكم معايه يا جدعان

وننتقل لجزء آخر ونقول :
إن فى ناس كانت فاكرة بعد البوست بتاع (( أتمنى أن أغفو قليلا ))
إنى يائس وقاعد عالجدار جمب الفرخة قاعد أعيط
طيب هتقولولى فرخة إيه
هقولكم فرخة هنيدى اللى بيقولها (( عالجدار عالجدار الفرخة ماشية عالجدار ))
بحب الأغنيه دى أوى

:D

مش إكتئاب ولا حاجة بس مطلوب منى أركز فى أكتر من حاجة
ومشغول وبسهر طول الليل وبنزل الشغل وحالتى ما يعلم بيها إلا ربنا
يعنى لما كنت بكتب فى اليوم تلات مقالات كان الناس بتقولى براحة ياعم فقرى
مش بنلحق نقرا وبتاع

طيب دلوقتى ؟؟؟

أستمر كل سنة بوست ولا أستمر كل يوم إتنين وإطلع اللى جوايه وأصدعكم :)

المهم دلوقتى

ياريت تركزوا فى الدعاء :D
هيعمل شغل جامد معايا لأنى محتاج دعواتكم بجد
البوست اللى فات فلسفى أوى ياريت محدش يفكر يقراه لأنه مش هيفهم حاجة
واللى هيفهم هجيبله عسلية
وبرده هيدفع تمنها :D

شاب فقرى